वृत्त क्रमांक

सणासुदीतील अन्नभेसळीविरोधात प्रशासनाची धडक कारवाई

 

• नांदेडमध्ये 29.17 लाखांचा संशयित अन्नसाठा जप्त; 32 आस्थापनांची तपासणी

 

नांदेड (जिमाका), दि. 16 : सणासुदीच्या काळात नागरिकांना सुरक्षित आणि दर्जेदार अन्नपदार्थ उपलब्ध व्हावेत, यासाठी अन्न व औषध प्रशासनामार्फत ‘सुरक्षित अन्न, सुरक्षित महाराष्ट्र’ ही राज्यव्यापी मोहीम राबविण्यात येत आहे. या मोहिमेंतर्गत नांदेड जिल्ह्यात नवरात्रोत्सव सुरू झाल्यापासून 32 आस्थापनांची तपासणी करण्यात आली. यामध्ये भेसळीचा संशय असलेली मिरची पूड, हळद पूड, धने पूड आणि मीठ या पदार्थांचा एकूण 25 हजार 832 किलो साठा जप्त करण्यात आला आहे. त्याची किंमत 29 लाख 17 हजार 172 रुपये आहे,

अन्न सुरक्षा आयुक्त तुकाराम मुंडे यांच्या संकल्पनेतून राबविण्यात येणाऱ्या या मोहिमेंतर्गत तपासणीदरम्यान 53 अन्न नमुने विश्लेषणासाठी प्रयोगशाळेकडे पाठविण्यात आले आहेत. आढळलेल्या त्रुटींबाबत 13 आस्थापनांना सुधारणा नोटिसा बजावण्यात आल्या आहेत. विना नोंदणी व्यवसाय करणाऱ्या एका आस्थापनेला व्यवसाय तत्काळ बंद करण्याचे आदेश देण्यात आले आहेत. सुधारणा नोटीस देऊनही त्रुटींची पूर्तता न करणाऱ्या एका आस्थापनेचा परवाना निलंबित करण्यात आला आहे. तसेच चार आस्थापनांविरुद्ध तडजोडीची प्रकरणे दाखल करून 21 हजार रुपयांचा दंड वसूल करण्यात आला आहे.

माहूरगड येथे होणाऱ्या शारदीय नवरात्र महोत्सवाच्या पार्श्वभूमीवरही प्रशासनाने विशेष तपासणी केली. यामध्ये 15 अन्न आस्थापनांची तपासणी करून 16 अन्न नमुने विश्लेषणासाठी प्रयोगशाळेकडे पाठविण्यात आले. संबंधित व्यावसायिकांना स्वच्छतेचे नियम काटेकोरपणे पाळण्याचे निर्देश देण्यात आले आहेत.

सणासुदीच्या काळात ग्राहकांनी परवानाधारक विक्रेत्यांकडूनच अन्नपदार्थ खरेदी करावेत. पॅकबंद पदार्थ खरेदी करताना त्यांची मुदत तपासावी. मिठाई व दुग्धजन्य पदार्थ योग्य तापमानात आणि स्वच्छ ठिकाणी साठवून त्यांचा वेळेत वापर करावा. अन्नभेसळीचा प्रकार आढळल्यास अन्न व औषध प्रशासनाच्या नांदेड कार्यालयाशी संपर्क साधावा किंवा FoSCoS या ऑनलाइन पोर्टलवर तसेच complaints.mahafda.in या संकेतस्थळावर तक्रार नोंदवावी, असे आवाहन अन्न व औषध प्रशासनाच्या सहायक आयुक्तांनी केले आहे.

******