वृत्त क्रमांक  1128

जुन ते ऑक्टोबर या कालावधीतील अतिवृष्टी व पुर बाधितांना निधीचे वाटप

नांदेड, दि. 27 ऑक्टोबर :  नांदेड जिल्ह्यात माहे जुन ते ऑक्टोबर 2025 या कालावधीत विशेषतः माहे ऑगस्ट 2025 मध्ये मोठ्या प्रमाणात अतिवृष्टी व पूर झाल्याने जिवीत व वित्तहानी झाली होती. अशा बाधितांना वेळोवेळी तातडीने जिल्हाप्रशासनातर्फे मदत देण्यात आली आहे. सर्व शेतकऱ्यांनी त्यांचे अॅग्रीस्टॅक योजने अंतर्गत फार्मर आयडी काढून घ्यावेत. तसेच केवायसी पूर्ण करुन घ्यावी, असे आवाहन जिल्हाधिकारी राहुल कर्डिले यांनी केले आहे.

27 ऑक्टोबर रोजी साईनाथ मारोती खानसोळे मौ.वासरी ता. मुदखेड जि.नांदेड या व्यतीने आज अंदाजे 1 च्या  सुमारास पिक नुकसान अनुदान जमा झाले नसल्याने तहसीलदार मुदखेड यांचे शासकीय गाडीचा समोरील काच फोडून आरडाओरड केली. सदरील व्यतीने मौ.वासरी गावातील गट क्र.371 व 382 मधील पिक नुकसानीचे अनुदान रुपये 6 हजार 290 रुपये संबंधिताचे बॅंक खात्यामधे 8 ऑक्टोबर 2025 रोजी जमा झाले आहेत.

जिल्ह्यात माहे जुन ते ऑक्टोबर 2025 या कालावधीत विज पडून, पुरात वाहून व इतर कारणाने एकूण 36 व्यक्ती  मयत झाले असून त्यापैकी 31 प्रकरणात वारसांना प्रत्येकी रु.4 लक्ष प्रमाणे रु.1.24 कोटी इतकी मदत वितरीत करण्यात आलेली आहे. उर्वरीत 5 प्रकरणात कागदपत्रांची पुर्तता होताच मदत वितरीत करण्यात येणार आहे. तसेच नांदेड जिल्ह्यात माहे जुन ते ऑक्टोबर 2025या कालावधीत विज पडून, पुरात वाहून व इतर कारणाने मयत जनावरांची एकूण 673 पात्र प्रकरणे असुन त्यापैकी 619 प्रकरणात रुपये 1.61 कोटी इतकी मदत वितरीत करण्याणत आलेली आहे. उर्वरीत प्रकरणात कार्यवाही सुरु आहे. याच कालाधीत जिल्ह्यातील एकूण 26 हजार 276  कुटुंबांच्यार घरात पाणी शिरुन नुकसान झाले होते. अशा बाधित कुटुंबापैकी 24 हजार 97 कुटुंबांना प्रत्येकी 10 हजार रुपये प्रमाणे 24.09 कोटी रुपये वाटप करण्यात आले असुन उर्वरीत प्रकरणात कार्यवाही सुरु आहे.

नांदेड जिल्ह्यात माहे जुन ते सप्टेबर 2025 मध्ये 9 लाख 35 हजार 703 इतक्या शेतकऱ्यांच्या  पिकांचे व शेत जमिनीचे नुकसान झाले होते. त्या अनुषंगाने शासनाकडून मंजुर एकूण रुपये 649.81 कोटी मंजुर रक्कम बाधित शेतकऱ्यांना ऑनलाईन प्रणालीद्वारे वाटप करण्यात येणार असुन आता पर्यंत जिल्हृयातील 6 लाख 13 हजार 993 इतक्या शेतकऱ्यांना 459.91 कोटी इतक्या रकमेचे वाटप करण्यासाठी माहिती ऑनलाईन प्रणालीवर तहसील कार्यालयातून भरण्यात आली आहे. सदर कार्यवाही 70.72 टक्के पूर्ण झाली असुन शेतकरी यांचे खात्यावर थेट मदतीची रक्कम डिबीटी पध्दतीने जमा होत आहे. विशेषतः जिल्ह्यात मोठ्या प्रमाणात नुकसान झालेल्या माहे ऑगस्ट 2025 मधील 82 टक्के  शेतकरी यांची माहिती ऑनलाईन प्रणालीवर भरण्यात आली असुन त्यासाठी 453.22 कोटी रक्कम प्रत्यक्ष शेतकरी यांचे खात्यावर डिबीटी पध्द्तीने जमा होत आहे. शेतकऱ्यांनी त्यांचे अॅग्रीस्टॅक योजनेअंतर्गत फार्मर आयडी काढून घ्यावेत, तसेच केवायसी पूर्ण करुन घ्यावी असे आवाहन जिल्हा प्रशासनाने केले आहे. 

00000

 वृत्त क्रमांक  1127

लाचलुचपत प्रतिबंधक विभागाकडून जनजागृती मोहिमेस प्रारंभ

दक्षता जनजागृती सप्ताहाच्या अनुषंगाने विविध कार्यक्रमाचे आयोजन

राज्यपाल व मुख्यमंत्री महोदय यांच्या शुभेच्छा संदेशाचे वाचन

नांदेड, दि. 27 ऑक्टोबर :  दिनांक 27 ऑक्टोबर ते 2 नोव्हेंबर 2025 या कालावधीत दक्षता आपली सामायिक जबाबदारी (दक्षता जनजागृती सप्ताहाचे) आयोजन करण्यात आले आहे. या अनुषंगाने दक्षता जनजागृती सप्ताहाचे उद्घाटन आज लाचलुचपत प्रतिबंधक कार्यालयात पोलीस उप अधीक्षक प्रशांत पवार यांच्या हस्ते करण्यात आले. जनजागृतीसाठी सर्व पथके जिल्ह्यात रवाना करण्यात आले आहेत.  

या कार्यक्रमाच्या वेळी पोलीस निरीक्षक करीमखाँ पठाण, साईप्रकाश चन्ना, अर्चना करपुडे, अनिता  दिनकर, पोलीस अंमलदार उपस्थित होते. दक्षता जनजागृती सप्ताहाच्या निमित्ताने लाचलुचपत प्रतिबंधक कार्यालयात भ्रष्टाचार निर्मुलन सत्यनिष्ठेबाबतची शपथ घेण्यात आली. यावेळी राज्यपाल व मुख्यमंत्री महोदया यांच्या संदेशाचे वाचन करण्यात करण्यात येवून भ्रष्टाचार विरोधी जनजागृती बाबत तयार करण्यात आलेले पोस्टर, बँनर, स्टिकरचे विमोचन करण्यात आले.  

जिल्ह्यातील तालुका पातळीवर तसेच जिल्हास्तरावर शासकीय विभाग, शाळा, कॉलेज, सार्वजनिक ठिकाणे इ. ठिकाणी पथकातील अधिकारी, अंमलदार यांनी नागरिकांना लाच देणे व घेणे हा गुन्हा असून ‘भ्रष्टाचार मिटवू हा देश पुढे नेऊ’ या घोष वाक्याची माहिती देवून प्रबोधनपर आवाहन त्यांनी केले. 

आकाशवाणी नांदेड येथून लाच लुचपत प्रतिबंधक विभागाचे अपर पोलीस अधिक्षक हे नागरिकांना आवाहन करणार आहेत. तसेच शासकीय कर्मचारी तसेच त्यांचे कुटूंबिय यांचे भ्रष्टाचार विरोधी संदर्भान्वये विविध स्पर्धाचे आयोजन केले आहे. संपूर्ण जिल्ह्यात विविध कार्यक्रमाचे आयोजन करुन नागरिकांच्या भेटी घेवून, सार्वजनिक दर्शनीय भागावर भ्रष्टाचार विरोधी जनजागृतीबाबत तयार करण्यात आलेले पोस्टर, बॅनर, स्टिकर, लावून जनजागृती मोहिम राबविण्यात येत आहे. 

तरी शासकीय अधिकारी, कर्मचारी हे शासकीय काम करण्यासाठी लाचेची मागणी करीत असल्यास तसेच त्यांचे लाचेच्या मागणी संदर्भात नागरिकांनी खालील क्रमांकावर संपर्क करावा, असे आवाहन पोलीस उपअधीक्षक प्रशांत पवार यांनी केले आहे.  पोलीस अधिक्षक संदीप पालवे -02462-255811, मो.क्र.9226484699 , अपर पोलीस अधीक्षक-02462-255811, पोलीस उप अधीक्षक प्रशांत पवार -9359056840, टोल फ्री-1064, लाच लुचपत प्रतिबंधक विभागाचा दुरध्वनी क्रमांक-02462-253512, वेबसाईट-www.acbmaharashtra.gov.in, मोबाईल ॲप-www.acbmaharashtra.net, फेसबुक पेज-www.facebook.com/maharashtraACB, व्टिटर-@ACBnanded, इंस्टाग्राम- acb_nanded, युटयुब चॅनल- @AntiCorruptionBureauNanded.

00000

२६ ऑक्टोबर 2025

 वृत्त क्रमांक  1126

२६ ते २९ ऑक्टोबर या चार दिवसासाठी यलो अलर्ट जारी

नांदेड, दि. २६ ऑक्टोबर:- प्रादेशिक हवामानशास्त्र केंद्र, मुंबई यांनी  26 ऑक्टोबर 2025 रोजी  दिलेल्या सूचनेनुसार नांदेड जिल्ह्यासाठी  26 ते 29 ऑक्टोबर 2025 या चार दिवसांसाठी यलो अलर्ट जारी केलेला आहे. 26 ते 29 ऑक्टोबर 2025 हे चार दिवस जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे. या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी. खबरदारीची उपाययोजना म्हणून खालील प्रमाणे काळजी घ्यावी.

या गोष्टी करा :

1) विजेच्या गडगडाटासह पावसाची पूर्वकल्पना असल्यास बाहेर जाणे टाळा. जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा.

2) आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका.

3) आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा.

4) तारांचे कुंपण, विजेचे खांब व इतर लोखंडी वस्तूंपासून दूर रहा.

5) पाण्यात उभे असाल तर तात्काळ पाण्यातून बाहेर पडा.

या गोष्टी करु नका: 

1) आकाशात विजा चमकत असल्यास घरातील लँडलाईन फोनचा वापर करू नका. शॉवरखाली अंघोळ करू नका. घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत उपकरणांचा वापर करू नका.

2) विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका.

3) उंच झाडाच्या खाली आसरा घेऊ नका.

4) धातूंच्या उंच मनोऱ्याजवळ उभे टाकू नका.

5) जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे.

00000

वृत्त  

गुरु तेग बहादुर यांचे हौतात्म्य

भारताच्या धार्मिक आणि सांस्कृतिक परंपरेच्या रक्षणासाठी

मुख्यमंत्री देवेंद्र फडणवीस

  मुंबई, दि. २५ : शीख पंथाचे ९ वे गुरु तेग बहादुर यांचे हौतात्म्य हे केवळ शीख पंथीयांसाठी नव्हे, तर संपूर्ण भारताच्या धार्मिक आणि सांस्कृतिक परंपरेच्या रक्षणासाठी महत्वाचे असल्याचे प्रतिपादन मुख्यमंत्री देवेंद्र फडणवीस यांनी केले. गुरु तेग बहादुर यांच्या  हौतात्म्याचा इतिहास सर्वदूर पोहोचविण्यासाठी शासन सर्वतोपरी सहकार्य करेल असेही मुख्यमंत्री म्हणाले.

            'हिंद दी चादर श्री गुरु तेग बहादुर' यांच्या ३५०व्या शहिदी समागमानिमित्त दादर येथील योगी सभागृहात राज्यस्तरीय कार्यशाळेचे आयोजन करण्यात आले होते. यावेळी मुख्यमंत्री देवेंद्र फडणवीस बोलत होते.

            कार्यक्रमास आपत्ती व्यवस्थापन मंत्री गिरीश महाजन, आमदार बाबू सिंह महाराज, अल्पसंख्यांक विभागाचे सचिव रूचेश जयवंशी, संत ज्ञानी हरनाम सिंघजी (खालसा भिंदरनवाले मुखी दमदमी टकसाल, प्रधान सत समाज), राज्यस्तरीय समितीचे रामेश्वर नाईक, सरताज सतींदर, महंत सुनील महाराज, स्वामी हिरानंद, प्रसिद्ध गायक सतेंदर सरताज आदींसह  विविध सहा समाजाचे संत, गुरू आणि समितीचे पदाधिकारी उपस्थित होते.

मुख्यमंत्री देवेंद्र फडणवीस म्हणाले की, गुरु तेग बहादुर यांनी भारतातील सर्व धर्मीयांच्या रक्षणासाठी बलिदान दिले आहे. म्हणूनच त्यांना 'खालसा दी चादर' नव्हे तर 'हिंद दी चादर' म्हटले गेले. त्यांनी धर्मांतरास विरोध करत भारताच्या संस्कृती आणि श्रद्धेचे रक्षण केले. त्यांच्या बलिदानाचा इतिहास राज्यातील प्रत्येक घरात पोहोचविणे ही आपली सामूहिक जबाबदारी आहे. नांदेड, नागपूरसह मुंबईत शहिदी समागमनिमित्त विविध कार्यक्रम आयोजित करण्यात आले आहेत. तसेच, तहसील, शहर, जिल्हा व क्षेत्रीय समितीच्या माध्यमातून प्रत्येक गावात आणि घराघरात गुरू तेग बहादुरांच्या हौतात्म्याचा इतिहास पोहोचविला जाणार आहे.

            मुख्यमंत्री म्हणाले की, गुरूबाणी ही जगातील एक अशी अनोखी रचना आहे ज्यात केवळ शीख गुरूंचेच नव्हे तर संत नामदेवांचे आणि विविध पंथांचे चांगले विचार समाविष्ट आहेत. सर्व चांगल्या विचारांना सोबत घेऊन जीवनाचा मार्ग दाखवणारी ही गुरूबाणी आपल्याला जोडण्याचे काम करते. या कार्यक्रमानिमित्त शीख, सिकलिगर, बंजारा, लबाना, मोहियाल, सिंधी हे सहा समाज एकत्र आले आहेत. हा कार्यक्रम जनमाणसांपर्यंत पोहोचविण्यासाठी समिती आणि शासन एकत्रितरित्या काम करेल.

            यावेळी 'हिंद दी चादर श्री गुरु तेग बहादुर साहेब' यांच्या ३५०व्या शहिदी समागमनिमित्त संकेतस्थळाचे आणि गुरु तेग बहादूर यांच्या बलिदानाचा इतिहास सांगणाऱ्या गीताचे लोकार्पण मुख्यमंत्री देवेंद्र फडणवीस यांच्या हस्ते करण्यात आले.

0000

दि.२५ ऑक्टोबर 2025

 वृत्त क्रमांक  1125

महादेवा " योजनेंतर्गत 13 वर्षाखालील मुले व मुलींच्‍या फुटबॉल खेळाडू निवड चाचणीचे आयोजन" 

नांदेड दि.२५ ऑक्टोबर :- मुख्यमंत्री यांच्या दूरदर्शी नेतृत्वाखाली प्रोजेक्ट “महादेवा” ही योजना महाराष्ट्रातील 13 वर्षांखालील मुलगा‑मुलींच्या फुटबॉल कौशल्याचा शोध घेण्यासाठी आणि त्यांना प्रोत्साहन देण्यासाठी सुरू करण्यात आली आहे. ही निवड प्रक्रिया तीन टप्प्यांत पार पडणार आहे.

जिल्हास्तरावरील निवड चाचण्या, प्रादेशिक फेरी आणि अंतिम निवड फेरी. अंतिम टप्प्यात 60 मुलांची निवड सीआयडीसीओ ग्राऊंड, खारघर येथे आणि 60 मुलींची निवड डब्ल्यूआयएफए कूपरेज मैदान, मुंबई येथे केली जाईल. 

यापैकी प्रत्येकी 30 मुलगा‑मुलींची निवड केली जाईल आणि त्यांना पाच वर्षांची एकात्मिक शिष्यवृत्ती दिली जाईल, ज्यामध्ये फुटबॉल प्रशिक्षणासोबत शैक्षणिक विकासाचाही समावेश असेल. निवड झालेल्या खेळाडूंना 14 डिसेंबर रोजी मुंबईत येणाऱ्या आंतरराष्ट्रीय फुटबॉल स्टार लिओनेल मेस्सी यांच्या फुटबॉल क्लिनिकमध्ये सहभागी होण्याची अनोखी संधी मिळेल. ही योजना MITRA, क्रीडा विभाग, WIFA, CIDCO आणि VSTF यांच्या संयुक्त विद्यमाने राबविली जात असून, राज्यातील फुटबॉल क्षेत्र अधिक मजबूत करण्याचा उद्देश आहे. 

सर्व जिल्हे, संस्था आणि माध्यमांना व्यापक प्रसिद्धी देऊन अधिकाधिक नोंदणीसाठी प्रोत्साहन देण्याचे आवाहन करण्यात येत आहे. इच्छुक खेळाडूंनी निवड चाचण्यांपूर्वी दिलेल्या गूगल फॉर्मद्वारे नोंदणी 26 ऑक्टोंबर,2025 पर्यंत करणे आवश्यक आहे.

​त्यानुषंगाने नांदेड जिल्हा अंतर्गत जिल्हास्तरीय " महादेवा " योजनेंतर्गत 13 वर्षाखालील मुले व मुलींच्‍या फुटबॉल खेळाडू निवड चाचणी आयोजन दिनांक 30 ऑक्टोंबर, 2025 या कालावधीत उस्मानशाही मील फुटबॉल ग्राऊड, नांदेड येथे करण्यात आलेले आहे.  याकरीता जिल्हयातील सर्व शाळांची समन्वय साधून खेळाडूंना चाचणीसाठी पाठवण्याबाबत सूचना दयाव्यात. सर्व खेळाडूंनी चाचणीस्थळी येण्यापूर्वी गुगल नोंदणी लिंक https://forms.gle/6PAR766JoC9d2QH26, https://forms.gle/ctCMRZ4FZDxwYEvA7 या लिंकद्वारे (Google registration link) आपली नोंदणी पूर्ण केली आहे, याची खात्री करावी, खेळाडूंना त्यांचS मूळ आधार कार्ड आणि जन्म प्रमाणपत्र सोबत आणणे आवश्यक आहे.

​राज्यात फुटबॉल खेळाच्या विकास व प्रसारासाठी व राज्यात फुटबॉल खेळाची लोकप्रियता वाढावी म्हणून फुटबॉल खेळातील तांत्रिक प्रशिक्षण, क्रीडा नैपुण्याचा शोध घेण्यासाठी तसेच योजनाबध्द प्रशिक्षण, पायाभूत सुविधा यांना चालना मिळणार आहे. याकरीता नांदेड जिल्हयातील जिल्हा व तालुकातील सर्व क्लब व शाळांनी या संधीचा लाभ घेण्यासाठी 13 वर्षाखालील मुले व मुलींनी "महादेवा" जिल्हास्तर फुटबॉल स्पर्धेत जास्तीत-जास्त संख्येने सहभागी व्हावे व अधिक माहितीकरीता विपुल दापके (क्रीडा अधिकारी) 9511724095 व सय्यद साजीद (संघटना) 9823039892यांचेशी संपर्क साधावा, असे आवाहन जिल्हा क्रीडा अधिकारी जयकुमार टेंभरे यांनी केले आहे.

0000

25 ऑक्टोबर 2025

वृत्त क्रमांक  1124

उपमुख्यमंत्री अजित पवार यांचे आगमन

नांदेड दि. 25 ऑक्टोबर :- राज्याचे उपमुख्यमंत्री अजित पवार यांचे आज सकाळी येथील श्री गुरु गोविंद सिंगजी नांदेड विमानतळावर आगमन झाले. 

यावेळी राज्याचे सहकार मंत्री बाबासाहेब पाटील, आमदार प्रताप पाटील चिखलीकर, आमदार बालाजी कल्याणकर, जिल्हा पोलीस अधीक्षक अबिनाश कुमार, मनपा आयुक्त डॉ. महेशकुमार डोईफोडे, अपर जिल्हाधिकारी डॉ. रत्नदिप गायकवाड,  निवासी उपजिल्हाधिकारी किरण अंबेकर आदींनी त्यांचे स्वागत केले.  

यानंतर उपमुख्यमंत्री अजित पवार यांनी उमरी तालुक्यातील गोरठा येथील नियोजित कार्यक्रमासाठी हेलिकॉप्टरने  प्रयाण केले.

०००००

 

24 ऑक्टोबर 2025

 वृत्त क्रमांक  1123

उपमुख्यमंत्री अजित पवार यांचा नांदेड दौरा 

नांदेड, दि. 24 ऑक्टोबर :- राज्याचे उप मुख्यमंत्री अजित पवार हे शनिवार 25 ऑक्टोबर 2025 रोजी नांदेड जिल्ह्याच्या दौऱ्यावर येत असून त्यांचा दौरा कार्यक्रम पुढीलप्रमाणे राहील. 

शनिवार 25 ऑक्टोबर 2025 रोजी मुंबई विमानतळ येथून विमानाने सकाळी 10 वा. श्री गुरू गोविंद सिंग जी विमानतळ नांदेड येथे आगमन. त्यानंतर सकाळी 10.10 वा. हेलिकॉप्टरने प्रयाण. सकाळी 10.30 वा. गोरठा हद्दीतील कोर्ट ऑफिसच्या मोकळया जागेवर हेलिपॅड ता. उमरी जि. नांदेड येथे आगमन. नंतर मोटारीने प्रयाण. सकाळी 10.40 वा. मोंढा मैदान, उमरी ता. उमरी, जि. नांदेड येथे आगमन. सकाळी 10.40 वा. कार्यकर्ता मेळाव्यास उपस्थिती. दुपारी 12.25 वा. मोटारीने प्रयाण. दुपारी 12.30 वा. श्री. शिरीष देशमुख गोरठेकर यांचे निवासस्थान, गोरठा, ता. उमरी जि. नांदेड येथे आगमन. दुपारी 12.30 वा. राखीव. दुपारी 1.15 वा. मोटारीने प्रयाण. दुपारी 1.20 वा. गोरठा हद्दीतील कोर्ट ऑफिसच्या मोकळया जागेवरील हेलिपॅड ता. उमरी जि. नांदेड येथे आगमन. दुपारी 1.25 वा. हेलिकॉप्टरने प्रयाण. दुपारी 1.40 वा. देगलूर महाविद्यालय हेलिपॅड, देगलूर, ता. देगलूर जि. नांदेड येथे आगमन. नंतर मोटारीने प्रयाण. दुपारी 1.50 वा. हजरत शाह जियावोद्दीन रफाई दर्गा येथे आगमन व भेट. नंतर मोटारीने प्रयाण. दुपारी 2 वा. मोंढा मैदान, देगलूर, ता. देगलूर जि. नांदेड येथे आगमन व कार्यकर्ता मेळाव्यास उपस्थिती. सायं. 4 वा. मोटारीने प्रयाण. सायं. 4.5 वा. श्री. लक्ष्मीकांत पद्यमवार यांचे निवासस्थान देगलूर येथे आगमन. सायं. 4.5 वा. राखीव. सायं. 4.35 वा. मोटारीने प्रयाण. सायं. 4.40 वा. देगलूर महाविद्यालय हेलिपॅड, देगलूर येथे आगमन. सायं. 4.45 वा.  हेलिकॉप्टरने प्रयाण. सायं.5 वा. श्री. गुरु गोविंद सिंगजी विमानतळ नांदेड येथे आगमन. सायं.  5.5 वा. विमानाने पुणेकडे प्रयाण करतील.

00000

24 ऑक्टोबर 2025

वृत्त क्रमांक  1122

27 ऑक्टोबर ते 2 नोव्हेंबर 2025 या कालावधीत

दक्षता जनजागृती सप्ताह साजरा करण्याच्या सूचना

नांदेड, दि. 24 ऑक्टोबर :  राज्यात 27 ऑक्टोबर ते 2 नोव्हेंबर 2025 या कालावधीत दक्षता जनजागृती सप्ताह साजरा करण्यात येणार आहे. यावर्षी ‘दक्षता- आपली सामायिक जबाबदारी’ ही संकल्पना निश्चित करण्यात आली आहे. 27 ऑक्टोबर रोजी सकाळी 11 वा. भ्रष्टाचार निर्मुलनाच्या प्रतिज्ञेने कार्यक्रमाचा प्रारंभ करावा. सदर प्रतिज्ञा विभाग व कार्यालय प्रमुख किंवा जेष्ठतम अधिकारी यांच्या उपस्थितीत सर्व अधिकारी, कर्मचारी यांनी प्रतिज्ञा करावी व प्रतिज्ञा केल्यानंतर मा. राज्यपाल, मा. मुख्यमंत्री यांनी या सप्ताहानिमित्त दिलेला संदेश उपस्थितांना वाचून दाखवावा अशा सूचना शासन परिपत्रकानुसार दिल्या आहेत.

सप्ताह बाबत आयोजित करावयाच्या कार्यक्रमाबाबत दि. 14 ऑक्टोबर 2025 रोजीच्या शासन परिपत्रकामध्ये सविस्तर कळविले आहे. तरी 27 ऑक्टोबर ते 2 नोव्हेंबर 2025 या कालावधीत सर्व कार्यालय व विभागप्रमुखांनी दक्षता जनजागृती सप्ताह साजरा करावा, असे निवासी उपजिल्हाधिकारी नांदेड यांनी प्रसिध्दीपत्रकाद्वारे कळविले आहे.

00000

24 ऑक्टोबर 2025

वृत्त क्रमांक  1121

३ नोव्हेंबर रोजी लोकशाही दिनाचे आयोजन

नांदेड, दि. 24 ऑक्टोबर :  सामान्य जनतेच्या तक्रारी, अडचणी ऐकून घेऊन त्या सोडविण्यासाठी राज्य शासनाच्यावतीने प्रत्येक महिन्याच्या पहिल्या सोमवारी लोकशाही दिन साजरा करण्यात येतो. लोकशाही दिन सोमवार 3 नोव्हेंबर 2025 रोजी दुपारी 1 ते 3 वाजेपर्यंत जिल्हाधिकारी कार्यालय परिसरातील नियोजन भवन येथे आयोजित केला आहे.  

या दिवशी महसूल, गृह, ग्रामविकास, पाटबंधारे, बांधकाम, परिवहन, सहकार, कृषि विभाग व पाणी पुरवठा समन्वय अधिकारी इत्यादी जिल्हा स्तरावरील प्रमुख अधिकारी व ज्या कार्यालयाचे लोकशाही दिनात प्रलंबीत प्रकरणे आहेत असे अधिकारी बचत भवन जिल्हाधिकारी कार्यालय परिसरात उपस्थित राहतील. सकाळी 12 वाजेपासून निवेदनाची नोंदणी सुरु होणार आहे. त्यानंतर लगेचच प्राप्त झालेल्या अर्जावर, निवेदनावर म्हणणे ऐकून घेण्याच्या कामास सुरुवात करण्यात येईल.  

लोकशाही दिनाच्या दिवशी प्राप्त होणाऱ्या जनतेच्या तक्रारी, अडचणी एकत्रीतरीत्या समजावून घेऊन त्या शक्य तितक्या लवकर सोडविण्यात येतील,  असे निवासी उपजिल्हाधिकारी किरण अंबेकर यांनी कळविले आहे.

00000

२४ ऑक्टोबर 2025

वृत्त क्रमांक  1120

24 ते 28 ऑक्टोबर या तीन दिवसांसाठी यलो अलर्ट जारी

नांदेड दि. २४ ऑक्टोबर:- प्रादेशिक हवामानशास्त्र केंद्र, मुंबई यांनी 24 ऑक्टोबर 2025 रोजी  दिलेल्या सूचनेनुसार नांदेड जिल्ह्यासाठी 24, 26 व 28 ऑक्टोबर 2025 या तीन दिवसांसाठी यलो अलर्ट जारी केलेला आहे. दिनांक 24, 26 व 28 ऑक्टोबर हे तीन दिवस जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे. या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी. खबरदारीची उपाययोजना म्हणून पुढीलप्रमाणे काळजी घ्यावी.

या गोष्टी करा :

1) विजेच्या गडगडाटासह पावसाची पूर्वकल्पना असल्यास बाहेर जाणे टाळा. जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा.

2) आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका.

3) आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा.

4) तारांचे कुंपण, विजेचे खांब व इतर लोखंडी वस्तूंपासून दूर रहा.

5) पाण्यात उभे असाल तर तात्काळ पाण्यातून बाहेर पडा.

या गोष्टी करु नका: 

1) आकाशात विजा चमकत असल्यास घरातील लँडलाईन फोनचा वापर करू नका. शॉवरखाली अंघोळ करू नका. घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत उपकरणांचा वापर करू नका.

2) विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका.

3) उंच झाडाच्या खाली आसरा घेऊ नका.

4) धातूंच्या उंच मनोऱ्याजवळ उभे टाकू नका.

5) जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे.

00000