मिशन इंद्रधनुष्य अंतर्गत

19 ते 22 जून कालावधीत

लसीकरण मोहीम यशस्वी करावी

- जिल्हाधिकारी अरुण डोंगरे

           

नांदेड, दि. 13 :- मिशन इंद्रधनुष्य योजनेंतंर्गत लसीकरणाची मोहीम जिल्ह्यात राबविण्यात येत आहे. लसीकरणाने गरोदर माता व बालकांचे आजार टाळण्यासाठी ही मोहीम यशस्वी करावी, असे आवाहन जिल्हाधिकारी अरुण डोंगरे यांनी केले. मिशन इंद्रधनुष्य मोहिमेचा आढावा घेण्यासाठी जिल्हास्तरीय कार्यबल गटाची बैठक जिल्हाधिकारी यांचे अध्यक्षतेखाली जिल्हाधिकारी कार्यालयात घेण्यात आली. त्यावेळी ते बोलत होते.  

            यावेळी जिल्हा आरोग्य अधिकारी डॉ. व्ही. आर. मेकाने, अतिरिक्त जिल्हा आरोग्य अधिकारी डॉ. विद्या झीने, जिल्हा हिवताप अधिकारी डॉ. राजेंद्र पवार, वैद्यकीय अधिकारी डॉ. अविनाश वाघमारे यांची प्रमुख उपस्थिती होती.

जिल्हाधिकारी श्री. डोंगरे म्हणाले, मिशन इंद्रधनुष्य मोहिम कार्यक्रमात जिल्ह्यातील निवडलेल्या गावातील माता-बालक लसीकरणापासून वंचित राहणार नाहीत यासाठी आरोग्य विभागासह संबंधीत विभागाने प्रयत्न करावेत. मिशन इंद्रधनुष्य अंतर्गत या मोहिमेची तिसरी फेरी 19, 20 व 22 जून या कालावधीत घेण्यात येणार आहे. ही मोहिम नांदेड, उमरी, बिलोली, धर्माबाद, देगलूर, मुखेड, कंधार, हदगाव, किनवट व अर्धापूर या दहा तालुक्यातील 20 गावात 24 लसीकरण सत्रासाठी निवड करण्यात आलेली आहे. शुन्य ते दोन वयोगटातील बालक तसेच गर्भवती महिलांना देखील लसीकरण करण्यात येणार आहे. लाभार्थ्यांनी या मोहिमेचा लाभ घ्यावा, असेही आवाहन श्री. डोंगरे यांनी केले. 

यापुर्वी प्रथम फेरीत 23, 24 व 26 एप्रिल या कालावधीत 259 वंचित बालकांपैकी 242 बालकांचे लसीकरण करण्यात आले आहे. तर वंचित  61 गरोदर मातांपैकी 58 गरोदर मातांचे लसीकरण करण्यात आले आहे. दुसरी फेरी 21, 22 व 24 मे 2018 या कालावधीत 166 वंचित बालकांपैकी 165 बालकांचे लसीकरण करण्यात आले तर 33 वंचित गरोदर मातांचे लसीकरण करण्यात आले. जिल्हास्तरावर या मोहिमेच्या अनुषंगाने आवश्यक असलेली औषधी, साधनसामुग्री, मनुष्यबळ आदीचे नियोजन केले आहे. जिल्हा व तालुकास्तर अधिकारी, आरोग्य पर्यवेक्षकामार्फत अतिविशेष मिशन इंद्रधनुष्य मोहिमेचे संनियंत्रण करण्यात येऊन वंचित बालक व गरोदर मातांचे संपुर्ण लसीकरण करण्यात येणार असल्याची माहिती यावेळी देण्यात आली. बैठकीस आरोग्य विभाग, शिक्षण, महिला व बाल कल्याण विभाग प्रमुखांची उपस्थिती होती.

00000

राष्ट्रीय फलोत्पादन अभियानांतर्गत

विविध घटकांसाठी अर्ज करण्याचे आवाहन

 नांदेड, दि. 13 :- राष्ट्रीय फलोत्पादन अभियानांतर्गत कांदाचाळ, शेडनेट, सामुहिक शेततळे, शेततळे अस्तरीकरण, ट्रॅक्टर, प्लास्टिक मल्चींग, फुलपिके, मसाला पिके, हळद रोपवाटिका, आळींबी उत्पादन प्रकल्प, संरक्षित शेती (हरितगृह), हरीतगृहातील उच्च प्रतीची भाजीपाला लागवड, फुलपिके लागवड आदी घटकांचा लाभ घेण्यासाठी शेतकऱ्यांनी www.hortnet.gov.in या संकेतस्थळावर 20 जून 2018 पर्यंत ऑनलाईन अर्ज करावीत, असे आवाहन तालुका कृषि अधिकारी अर्धापूर यांनी केले आहे.

अर्ज करण्यासाठी सातबारा, होल्डींग, आधार कार्ड, राष्ट्रीयकृत बॅकेच्या पासबुकाची झेरॉक्स, विहित नमुन्यातील हमीपत्र, संवर्ग प्रमाणपत्र (अनुसूचित जाती व अनुसूचित जमाती शेतकऱ्यांसाठी) आदी कागदपत्रे अपलोड करणे आवश्यक आहे. अनुसूचित जाती व अनुसूचित जमाती संवर्गातील लाभार्थ्यांनी सामुहिक शेततळे मंजुर करताना त्यांच्याकडे फलोत्पादन पिके असण्याबाबतची अट शिथील करण्यात येत आहे. तथापी शेतकऱ्यास पूर्वसंमती देताना संबंधीत लाभार्थ्यांने भविष्यात फलोत्पादन पिके लागवड करण्यात येणार असल्याबाबत हमीपत्र देणे बंधनकारक राहील. सन 2018-19 पासून 24 बाय 24 बाय 4 मीटर व 34 बाय 34 बाय 4.70 मीटर आकाराचे शेततळे मंजूर करण्यात येणार आहेत. या घटकांचा लाभ घेऊ इच्छिणाऱ्या शेतकऱ्यांनी ऑनलाईन अर्ज करुन योजनेचा लाभ घ्यावा, असेही आवाहन केले आहे.

00000000

जवाहर नवोदय विद्यालयात

अकरावीसाठी प्रवेश सुरु

            नांदेड, दि. 13 :- जवाहर नवोदय विद्यालय शंकरनगर ता. बिलोली येथे 11 वी विज्ञान शाखेतील रिक्त जागेसाठी ऑनलाईन अर्ज 5 जुलै 2018 पर्यंत करावीत, असे आवाहन विद्यालयाचे प्राचार्य यांनी केले आहे.    

सन 2017-18 मध्ये दहावी उत्तीर्ण विद्यार्थ्यांसाठी www.nvshq.org या संकेतस्थळावर अर्ज करता येणार आहेत. संकेतस्थळावर सविस्तर प्रवेश प्रक्रियेची पात्रता व संपुर्ण माहिती उपलब्ध आहे. जिल्ह्यातील इच्छूक विद्यार्थ्यांनी ऑनलाईन प्रवेश अर्ज करावीत, असेही आवाहन केले आहे.

000000