जिल्ह्यात चार जणांची कोरोनावर मात, तिघे कोरोना बाधित तर एकाचा मृत्यू    

नांदेड (जिमाका) दि. 20 :- जिल्ह्यात आज प्राप्त झालेल्या 1 हजार 86 अहवालापैकी 3 अहवाल कोरोना बाधित आले आहेत. यात आरटीपीसीआर तपासणीद्वारे 3 तर अँटिजेन तपासणीद्वारे निरंक अहवाल बाधित आहेत. जिल्ह्यात आजवर एकुण बाधितांची संख्या 90 हजार 714 एवढी झाली असून यातील 88 हजार 7 रुग्णांना रुग्णालयातून सुट्टी देण्यात आलेली आहे. आजच्या घडीला 46 रुग्ण उपचार घेत असून 3 बाधितांची प्रकृती अतिगंभीर आहे. जिल्ह्यातील कोरोनाचा प्रादुर्भाव कमी करण्यासाठी सेवाभावी संस्था, प्रतिनिधी आणि जागरुक नागरिकांनी आरोग्य जागराच्या चळवळीत जनतेने सहभाग घेवून मास्क, सॅनिटायझर, सुरक्षित अंतर आणि लसीकरण याबाबत व्यापक जनजागृती करुन अनावश्यक घराबाहेर पडणे टाळावे, असे आवाहन जिल्हाधिकारी डॉ. विपीन इटनकर यांनी केले आहे. 

गुरुवार 19 ऑगस्ट 2021 रोजी कंधार तालुक्यातील दिग्रस येथील 76 वर्षाच्या महिलेचा शासकीय वैद्यकीय महाविद्यालय विष्णुपुरी येथे उपचारा दरम्यान मृत्यू झाला. जिल्ह्यात आतापर्यंत बाधित मृत रुग्णांची संख्या 2 हजार 661 एवढी आहे. आजच्या बाधितामध्ये आरटीपीसीआर तपासणीद्वारे नांदेड मनपा 1, नायगाव तालुक्यात अंतर्गत 1, देगलूर तालुक्यातर्गत 1 असे एकूण 3 बाधित आढळले. 

आज जिल्ह्यातील 4 कोरोना बाधितांना औषधोपचारानंतर सुट्टी देण्यात आलेली आहे. यात शासकीय वैद्यकीय महाविद्यालय विष्णुपुरी 1, मनपा अंतर्गत एनआरआय भवन गृह विलगीकरण 3 व्यक्तीला रुग्णालयातून सुट्टी देण्यात आली. 

आज 46 कोरोनाबाधित रुग्णांवर औषधोपचार सुरु आहेत. यात शासकीय वैद्यकीय महाविद्यालय विष्णुपुरी 10, देगलूर कोविड रुग्णालय 1, नांदेड मनपा अंतर्गत गृह विलगीकरण 29, नांदेड जिल्ह्यातील तालुके अंतर्गत गृह विलगीकरण 6 व्यक्ती उपचार घेत आहेत. 

आज रोजी सायंकाळी 5 वाजेपर्यंत उपलब्ध असलेल्या खाटांची संख्या पुढील प्रमाणे आहे. शासकीय वैद्यकीय महाविद्यालय विष्णुपूरी येथे 124, जिल्हा रुग्णालय कोविड हॉस्पिटल नांदेड येथे 145 खाटा उपलब्ध आहेत. 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 6 लाख 95 हजार 366

एकुण निगेटिव्ह स्वॅब- 5 लाख 92 हजार 468

एकुण पॉझिटिव्ह बाधित व्यक्ती- 90 हजार 714

एकूण रुग्णालयातून सुट्टी दिलेली संख्या- 88 हजार 7

एकुण मृत्यू संख्या-2 हजार 661

उपचारानंतर बाधित रुग्ण बरे होण्याचे प्रमाण 97.1 टक्के

आज स्वॅब तपासणी अनिर्णीत संख्या-निरंक

आज स्वॅब नाकारण्यात आलेली संख्या-8

आज प्रलंबित स्वॅब तपासणी संख्या-2

रुग्णालयात उपचार घेत असलेले बाधित व्यक्ती-46

आज रोजी अतिगंभीर प्रकृती असलेले-3

00000

 जिल्ह्यातील 68 केंद्रावर कोविड-19 चे लसीकरण 

नांदेड (जिमाका) दि. 20 :- जिल्हा आरोग्य विभागातर्फे जिल्ह्यातील 68 लसीकरण केंद्रावर कोविड-19 चे लसीकरण व्हावे यादृष्टिने उपलब्ध लस सर्वत्र विभागून पाठविली आहे. यात 18 ते 44 वयोगटासह 45 वर्षावरील व्यक्तींना कोव्हॅक्सीन व कोविशील्ड लसीचा पहिला व दुसरा डोस उपलब्ध करुन दिला आहे. शनिवार 21 ऑगस्ट 2021 रोजी लसीकरण केंद्रावर उपलब्ध असलेली डोसची संख्या पुढीलप्रमाणे आहे. 

मनपा क्षेत्रातील श्री गुरु गोबिंद सिंघजी जिल्हा रुग्णालय, डॉ. शंकरराव चव्हाण वैद्यकिय महाविद्यालय, शासकीय आयुर्वेदिक महाविद्यालय, स्त्री रुग्णालय, शहरी दवाखाना हैदरबाग, शिवाजीनगर, जंगमवाडी, दशमेश हॉस्पिटल, कौठा, श्रावस्तीनगर (विजयनगर), सिडको, रेल्वे हॉस्पिटल, पोर्णिमानगर, सांगवी, करबला, तरोडा, विनायकनगर या 17 केंद्रावर कोविशील्ड लसीचे प्रत्येकी 100 डोस उपलब्ध करुन दिले आहेत. याचबरोबर श्री गुरु गोबिंदसिंघजी जिल्हा रुग्णालय, डॉ. शंकरराव चव्हाण वैद्यकिय महाविद्यालय, शासकीय आयुर्वेद महाविद्यालय, शहरी दवाखाना हैदरबाग, स्त्री रुग्णालय, शिवाजीनगर, जंगमवाडी, दशमेश हॉस्पिटल, कौठा, श्रावस्तीनगर (विजयनगर), सिडको, रेल्वे हॉस्पिटल, पोर्णिमानगर, सांगवी, करबला, तरोडा, विनायकनगर या 17 केंद्रावर कोव्हॅक्सीन लसीचे प्रत्येकी 100 डोस तर स्त्री रुग्णालय येथे 50 डोस उपलब्ध करुन दिले आहेत. 

शहरी भागात मोडणाऱ्या लसीकरण केंद्रावर उपलब्ध असलेले डोस पुढीलप्रमाणे आहेत. उपजिल्हा रुग्णालय देगलूर, गोकुंदा, हदगाव, मुखेड, ग्रामीण रुग्णालय भोकर, बिलोली, हिमायतनगर, कंधार, मांडवी, माहूर, लोहा, मुदखेड, बारड, नायगाव, उमरी या 15 केंद्रावर कोविशील्ड लसीचे प्रत्येकी 100 डोस तर उपजिल्हा रुग्णालय देगलूर, हदगाव, गोकुंदा, ग्रामीण रुग्णालय भोकर, बिलोली, हिमायतनगर, कंधार, धर्माबाद, मांडवी, लोहा, माहूर, मुदखेड, बारड, नायगाव, उमरी या 15 केंद्रावर कोव्हॅक्सीन लसीचे प्रत्येकी 100 डोस उपलब्ध आहेत. ग्रामीण भागात 68 प्राथमिक आरोग्य केंद्रावर कोविशील्डचे प्रत्येकी 100 डोस देण्यात आले आहेत. 

वरील सर्व लसीकरण केंद्रावर 18 ते 44 वयोगटासह 45 वर्षावरील लाभार्थ्यांना कोविड-19 लसीचा पहिला व दुसरा डोस दिला जाणार आहे. यासाठी ऑनलाईन किंवा लसीकरण केंद्रावर नोंदणी करण्याची सुविधा उपलब्ध करुन दिली आहे. 

जिल्ह्यात 19 ऑगस्ट 2021 पर्यंत एकुण 9 लाख 27 हजार 486 लाभार्थ्यांचे लसीकरण करण्यात आले. नांदेड जिल्ह्यात 20 ऑगस्टपर्यत कोविड लसींचा साठा खालीलप्रमाणे प्राप्त झालेला आहे. कोविशिल्डचे 7 लाख 50 हजार 30 डोस, कोव्हॅक्सीनचे 2 लाख 44 हजार डोस याप्रमाणे एकुण 9 लाख 94 हजार 30 डोस प्राप्त झाले आहेत. 

केंद्र शासनाच्या सूचनेनुसार कोविशिल्ड लसीचा पहिला डोस ज्यांनी घेतला आहे त्यांच्या 12 ते 16 आठवडे म्हणजेच सुमारे 84 दिवसानंतर दुसरा डोस दिला जाईल. जिल्ह्यातील सर्व कार्यक्षेत्रामध्ये कोविशील्ड व कोव्हॅक्सीन लस 18 ते 44 वयोगटासाठी व 45 वर्षावरील वयोगटासाठी पहिला व दुसरा डोस उपलब्ध राहील. यासाठी ऑनलाईन व ऑनस्पॉट नोंदणीची सुविधा उपलब्ध राहिल. मनपा कार्यक्षेत्रातील लाभार्थ्यांना कोविशील्ड व कोव्हॅक्सीन लस घेण्यासाठी cowin.gov.in या वेबसाईटवर ऑनलाईन नोंदणी करणे अनिवार्य आहे. ऑनलाईन नोंदणी पूर्ण झाल्यानंतर लाभार्थ्यांचे संबंधित केंद्रावर लसीकरण करण्यात येईल. ऑनलाईन नोंदणीची वेळ सायंकाळी 6 पासून पुढे सुरु राहील. लसीचा उपलब्धतेप्रमाणे आरोग्य विभाग याचे नियोजन करेल. नागरिकांनी लसीच्या उपलब्धतेप्रमाणे आरोग्य विभागातील कर्मचाऱ्यांना सहकार्य करावे, असे आवाहन जिल्हा आरोग्य अधिकारी डॉ. बालाजी शिंदे यांनी केले.

00000

 शासकीय कार्यालये तंबाखू मुक्त राहण्यासाठी शासनाचे आदेश

प्रवेशद्वाराजवळ तंबाखू त्याग पेटीबाबत मार्गदर्शक सूचना 

नांदेड (जिमाका) दि. 20 :- जिल्ह्यातील सर्व शासकीय व निमशासकीय कार्यालये तंबाखुमुक्त राहण्यासाठी शासनाने स्वतंत्र निर्णय काढून काटेकोर अंमलबजावणीचे निर्देश दिले आहेत. यात प्रामुख्याने प्रत्येक शासकीय कार्यालयाच्या प्रवेशद्वाराजवळ तंबाखु त्याग पेटी, जमा तंबाखू व तंबाखू पदार्थाची विल्हेवाट, दंडात्मक कारवाई याबाबत स्पष्ट सूचना दिलेल्या आहेत. मुंबई पोलीस अधिनियम 1951 च्या कलम 116 मधील तरतुदीनुसार सार्वजनिक ठिकाणी धुम्रपान व थुंकण्यावर प्रतिबंध आहेत. याचबरोबर साथरोग अधिनियम 1897 व आपत्ती व्यवस्थापन कायदा 2005 मधील तरतुदीच्या अधिन राहून राज्यात कोणत्याही सार्वजनिक ठिकाणी तंबाखू, सुपारी, पान, पानमसाला, गुटखा व इतर तंबाखूजन्य पदार्थाच्या सेवनास, थुंकण्यास व धुम्रपानास (ई-सिगारेटसह) प्रतिबंध करण्यात आला आहे. यासंदर्भात जिल्हाधिकारी डॉ. विपीन इटनकर यांनी आदेश निर्गमीत करुन जिल्ह्यातील सर्व शासकीय व निमशासकीय कार्यालय परिसरात धुम्रपान करतांना कोणी आढळल्यास दंडात्मक कारवाई करण्याचे निर्देश दिले आहेत. 

हे आदेश शासकीय, निमशासकीय, खाजगी, विविध मंडळे, परिमंडळे, महामंडळे, औद्योगिक, व्यावसायिक, वाणिज्य, शैक्षणिक, वैद्यकीय, रहिवासी, क्षेत्र व संकुले, रेल्वे स्थानके, बस स्थानके, जल वाहतूक स्थानके, बंदरे क्षेत्र, न्यायालयीन संस्था, देवस्थान, बगीचे, पर्यटन स्थळे, शॉपिग मॉल, तरण तलाव, सिनेमागृहे, व्यायाम शाळा, रस्ते, बाजार पेठा, हॉटेल्स इ. संस्था, आस्थापना व सार्वजनिक क्षेत्रांच्या ठिकाणी व आवारातही लागू करण्यात आले आहेत. 

साथरोग अधिनियम व आपत्ती व्यवस्थापन कायदानुसार सर्व सक्षम प्राधिकाऱ्यांने त्यांच्या अधिपत्याखालील क्षेत्रात प्रतिबंधात्मक आदेश, दंड व दंडनीय कारवाईबाबत तसेच सार्वजनिक ठिकाणी दर्शनी भागात जनजागृतीचे फलके प्रसिद्ध करावीत. या अधिनियम व नियमांचे उल्लंघन करणाऱ्यांवर शिक्षा व दंड आकारण्यात येईल. या दंडाची रक्कम शासनास भरण्याची तरतूद करण्यात आली आहे, याची सर्व कार्यालय प्रमुखांनी नोंद घ्यावी असेही शासन निर्णयात स्पष्ट केले आहे.

0000

 अन्न धान्य वितरण व्यवस्थेत आधुनिक तंत्रज्ञानाच्या सहाय्याने पारदर्शकता आणावी - डॉ विश्वजीत कदम 

 ·         तिन महिन्यात शासनाला अहवाल सादर करण्याचे निर्देश 

·         गैर व्यवहार करणाऱ्यांवर कडक कारवाईचे निर्देश

मुंबई दि. 18 :- अन्न धान्य वितरण व्यवस्थेत आधुनिक तंत्रज्ञानाच्या सहाय्याने पारदर्शकता आणावी असे निर्देश आज मंत्रालयात पार पडलेल्या बैठकीत अन्न नागरी पुरवठा राज्यमंत्री डॉ विश्वजीत कदम यांनी दिले. 

जळगाव तसेच नांदेड जिल्ह्यातील 2018 मध्ये उघडकीस आलेल्या कृष्णूर धान्य घोटाळ्याच्या धर्तीवर वाहतूक ठेकेदार यांच्याशी संगनमत करून धान्यांचा काळाबाजार चालू असल्याच्या तक्रारीच्या अनुषंगाने अन्न नागरी पुरवठा राज्यमंत्री डॉ विश्वजीत कदम यांनी गंभीर दखल घेऊन मंत्रालयातील दालनात संबंधित अधिकाऱ्यांची तातडीची बैठक घेऊन याबतीत गांभिर्याने दखल घेऊन संबंधित दोषींवर कारवाई करण्याचे निर्देश दिले. 

जळगाव जिल्ह्यातील वाहतूकदार यांनी गोदामांमध्ये पोहोच मालाच्या ई-1 रजिस्टर मधील अभिलेख तसेच या अभिलेखाचा विविध टोल नाक्यावरील असलेल्या नोंदी तसेच (जि पि एस ) यंत्राचा वापर वाहतूकदार नियमाप्रमाणे करत आहेत का, तसेच ठेकेदार यांची वाहने शासनाच्या निकषांची पुर्तता करतात आहेत का याबाबत संबंधित(RTO) यांचा अहवाल प्राप्त आहेत का, याचबरोर अन्न धान्य वितरण करण्यात येणाऱ्या वाहनांना नियमाप्रमाणे हिरवा रंग तसेच PDS चे फलक लावण्यात आले आहेत का, जळगाव जिल्ह्यातील धान्यांचे पुर्ण इ-पास मशिनद्वारे झाले आहेत का, आदी बाबी डॉ. कदम यांनी उपस्थित अधिकाऱ्यांच्या निदर्शनास आणून दिल्या. जळगाव जिल्ह्यातील वरील सविस्तर बाबतीत अहवाल शासनाला तिन महिन्यात सादर करण्याचे निर्देश डॉ कदम यांनी दिले. 

डॉ. कदम यांनी जिल्हयामधील अन्नधान्य वाहतुकीच्या वाहनांवर शासनाच्या निर्देशाप्रमाणे जी.पी.एस. यंत्रणा बसविलेल्या नसल्याने तिव्र नाराजी व्यक्त केली. तसेच माल व्यपगत करण्याची प्रकरणे तसेच इतर बाबींवर बोट ठेवले. राज्यमंत्री यांनी पुढील 3 महिने सर्व वाहतुक व्यवस्थेवर जी.पी.एस. यंत्रणा क्षेत्राची नावे तसेच इतर सर्व माध्यमातून गैरप्रकाराबाबत तपासणी करुन शासनास अहवाल सादर करण्याचे निर्देश दिले.  

यावेळी या बैठकीला श्री. अभिजित राऊत, जिल्हाधिकारी, जळगाव,  सह सचिव,सुधिर तुंगार, सुनील सुर्यवंशी, जिल्हा पुरवठा अधिकारी, श्री,प्रशांत कुलकर्णी, सहायक पुरवठा अधिकारी, आदीसह संबंधित विभागाचे अधिकारी उपस्थित होते.

00000