#नांदेड जिल्ह्यातील श्री. क्षेत्र माळेगाव येथे प्रसिद्ध यात्रा महोत्सवात आज शंकरपट आयोजित करण्यात आला होता. हजारोंच्या उपस्थितीत या शंकरपटाचा आनंद नागरिकांनी घेतला.#नांदेड जिल्हा प्रशासनामार्फत विविध कार्यक्रमांचे या ठिकाणी आयोजन केले जाते.

 
#माळेगावयात्रा

 वृत्त क्रमांक 21

माळेगाव यात्रेत आज कुस्त्यांची दंगल

विविध स्पर्धेतील बक्षीस वितरण 

नांदेड, 4 जानेवारी- माळेगाव यात्रेत जिल्हा परिषदेच्या वतीने विविध कार्यक्रमांचे आयोजन करण्यात आले असून आज रविवार दिनांक 5 जानेवारी रोजी यात्रेत कुस्त्यांची भव्य दंगल आयोजित करण्यात आली आहे.

दुपारी 12 वाजता होणाऱ्या या कार्यक्रमाचे उद्घाटन नांदेडचे खासदार रवींद्र चव्हाण यांच्या हस्ते होणार असून आ. प्रतापराव पाटील चिखलीकर यांची विशेष उपस्थिती असेल. आ. बाबुराव कदम कोहळीकर, आ. भीमराव केराम, लोहा पंचायत समितीचे गट विकास अधिकारी दशरथ आडेराघो यांची  उपस्थिती राहणार आहे.

महाराष्ट्र केसरीच्या धर्तीवर माळेगाव यात्रेत विजेत्या मल्लास माळेगाव केसरी हा सन्मान प्रदान केला जातो. नांदेडसह विविध राज्यांतून कुस्तीपटू मोठ्या संख्येने या स्पर्धेत भाग घेणार आहेत. माळेगावच्या लाल मातीत कुस्त्या रंगणार असून या कार्यक्रमात सर्वांनी उपस्थित राहावे, असे आवाहन करण्यात आले आहे. 

पशु प्रदर्शन व दुग्ध स्पर्धा बक्षीस वितरण

माळेगाव यात्रेनिमित्त पशु प्रदर्शन, दुग्ध स्पर्धेा, कृषी तसेच स्पर्धेतील विजेत्या स्पर्धकांना आज माळेगाव यात्रेत बक्षीस वितरण केले जाणार आहे. 

आज सकाळी 11 वाजता होणाऱ्या कार्यक्रमाचे उद्घाटन जिल्हाधिकारी अभिजीत राऊत यांच्या शुभहस्ते करण्यात येणार आहे. यावेळी बाळासाहेब ठाकरे हरिद्रा (हळद) संशोधन केंद्राचे अध्यक्ष हेमंत पाटील यांची विशेष उपस्थिती राहणार आहे.  आ. डॉ. तुषार राठोड, आ. बालाजीराव कल्याणकर यांची प्रमुख उपस्थिती राहणार आहे.

बक्षीस वितरण सोहळ्यानंतर माळेगाव यात्रेचा समारोप होईल. जिल्हा परिषदेच्या वतीने आज होणाऱ्या दोन्ही कार्यक्रमात यात्रेकरूंनी नागरिकांनी व स्पर्धकांनी उपस्थित राहण्याचे आवाहन केले आहे.

00000

नांदेड जिल्हा परिषदेच्या मुख्य कार्यकारी अधिकारी मीनल करणवाल यांनी आज श्री क्षेत्र माळेगाव येथील खंडोबारायाचे दर्शन घेतले. त्यांनी यात्रेत फेरफटका मारला. तसेच आजच्या शंकरपट आयोजनातही त्या सहभागी झाल्या.

 वृत्त क्रमांक 20

शंकरपटाच्या लोकप्रियतेवर माळेगावच्या गर्दीचे शिक्कामोर्तब 

हजारो शेतकऱ्यांनी अनुभवला ५८ बैल जोड्यांचा सहा तास थरार 

नांदेड दि. ४ जानेवारी : लाईन क्लिअर...जोडी सोडा... जोडी मालकासाठी खुशखबर... तीन सेकंद 38 पाँईट... आणि वायुगतीने... विक्रमी वेळेत अंतर पार... पाठोपाठ शेतकऱ्यांच्या टाळ्या शिट्ट्या... अशा माळेगावच्या माळरानावरील धावत्या समालोचनात ५८ बैल जोड्यांनी डोळ्यांचे पारणे फेडणारा थरार रचला. शंकर पटाच्या गर्दीने हा खेळ तुफान लोकप्रिय असल्याचे पुन्हा एकदा शिक्कामोर्तब केले.

शेती,मातीत रमणाऱ्या शेतकऱ्यांचा माळेगावचा शंकरपट म्हणजे जीव की प्राण. न्यायालयाच्या निर्णयानंतर गेल्या वर्षीपासून पुन्हा बैलगाड्यांच्या शर्यतीला सुरुवात झाली आहे.  बंदी उठल्यावरचा आजचा  माळेगावचा दुसरा शंकरपट. आज गर्दीचे सर्व उच्चांक मोडत माळेगावात मराठवाडा, विदर्भातील तसेच बाजूच्या राज्यातील शेतकऱ्यांनी या शंकरपाटासाठी गर्दी केली होती. महाराष्ट्राच्या अनेक जिल्ह्यातून यासाठी बैलजोडी आल्या होत्या. त्यामुळे यंदाचा शंकरपठ अतिशय चुरशीचा गर्दीचा आणि उत्कंठेचा ठरला आहे.

माळेगावात आज दुपारपासून 58 जोडीनी आपले कसब दाखविले. सायंकाळी साडेपाच पर्यंत हा थरार सुरू होता.

माळेगावच्या यात्रेला आज एक आठवडा झाला. 29 डिसेंबरच्या पालखी यात्रेनंतर सुरू झालेली माळेगावची यात्रा आज शंकर पटाने गाजवली उद्या माळेगाव यात्रेची आणखी एक परंपरा असणाऱ्या कुस्तीच्या फडाने शासकीय कार्यक्रमाची सांगता होणार आहे. जिल्हा परिषदेच्या मुख्य कार्यकारी अधिकारी मीनल करणवाल यांनीही आज शंकरपटाचा आनंद घेतला. त्यानंतर आमदार बालाजी कल्याणकर यांनी देखील यात्रेला भेट दिली.

 तत्पूर्वी आज या कार्यक्रमाचे उद्घाटन आ. आनंदराव बोंढारकर यांच्या हस्ते करण्यात आले. जिल्हा परिषदेचे माजी सभापती प्रवीण पाटील चिखलीकर यांच्या अध्यक्षतेखाली झालेल्या कार्यक्रमात उपविभागीय अधिकारी अरुणा संगेवार, पोलीस अधिकारी अश्विनी जगताप, सामान्य प्रशासन विभागाचे उपमुख्य कार्यकारी अधिकारी राजकुमार मुक्कावार, नरेगाचे उपमुख्य कार्यकारी अधिकारी अमित राठोड, पोलीस निरीक्षक संजय नीलपत्रेवार, जिल्हा पशुसंवर्धन उपायुक्त डॉ. राजकुमार पडीलवार, सहाय्यक पशुसंवर्धन आयुक्त डॉ. दिनेश महेर, जिल्हा आरोग्य अधिकारी डॉ. संगीता देशमुख, जिल्हा पशु संवर्धन अधिकारी डाॅ. प्रवीणकुमार घुले, जिल्हा माहिती अधिकारी प्रवीण टाके, सरपंच प्रतिनिधी हनुमंत धुळगंडे, गट विकास अधिकारी दशरथ आडेराघो,  पंचायत समितीचे माजी सभापती आनंदराव शिंदे, अंबादास जाहागीरदार, अशोक मोरे, नरेंद्र गायकवाड, उद्धव शिंदे, विस्तार अधिकारी धनंजय देशपांडे आदी मान्यवरांची उपस्थिती होती.

प्रारंभी खंडोबाच्या प्रतिमेचे पूजन करून दुपारी एक वाजता शंकरपट शर्यतीला सुरुवात झाली. या शर्यतीसाठी नांदेडसह पालम, गंगाखेड, पूर्णा, परभणी, लातूर, अहमदपुर, हिंगोली आदी ठिकाणांहून 58 बैलजोड्या सहभागी झाल्या होत्या. वेगवान धावणाऱ्या बैलजोड्यांनी उपस्थित लाखो प्रेक्षकांना अक्षरशः थक्क केले. शेतकऱ्यांसाठी ही स्पर्धा केवळ मनोरंजन नाही तर त्यांच्या मेहनतीचा व बैलांवरील प्रेमाचा सन्मान असल्याचे यावेळी एका शेतकऱ्यांनी बोलून दाखवले. पंच म्हणून जनार्दन मंदाडे व नागेश मंदाडे यांनी काम पाहिले.शंकरपटाचे पहिले पारितोषिक 31 हजार, द्वितीय 21 तर तृतीय पारितोषिक 11 हजार रुपये आहे.तसेच काही जणांना प्रोत्साहनपर बक्षीस दिले जातात.

चौकट

शंकरपटाची प्रक्रिया

शर्यतीसाठी मैदानावर विशिष्ट अंतरावर दोन खांब लावले जातात. त्यावर धागे बांधलेले असतात. पहिला धागा तोडला की, वेळ मोजणारे घड्याळ सुरू होते आणि दुसरा धागा तोडला की वेळ थांबते. या दरम्यानची वेळ नोंदवली जाते. ज्या जोडीने सर्वात कमी वेळात अंतर पूर्ण केले ती जोडी विजयी ठरते.

रविवारी बक्षीस वितरण तसेच कुस्त्यांची दंगल 

माळेगावला उद्या शासकीय कार्यक्रमांच्या आयोजनाचा समारोप होणार आहे. उद्या दुपारी माळेगाव येथे गेल्या आठवड्यात आयोजित करण्यात आलेल्या स्पर्धांचा बक्षीस वितरण सोहळा पार पडणार आहे तसेच उद्या कुस्तीची दंगल देखील पार पडणार आहे.

​माळेगाव शंकरपट मुख्य बातमी जोड / चौकट

माळेगाव बैलगाडा स्पर्धेचे विजेते पुढीलप्रमाणे आहेत
 
१. महादू कोंडीबा रिटे पिंपळदरी तालुका औंढा जिल्हा हिंगोली ( ४.३० सेकंद )
2. साई संदीप घुगे सेलसुरा ( ४.३० सेकंद )
3. विठ्ठलराव कदम, आनंदराव चव्हाण, वसमत 4.36 सेकंद
4. विजय देवीसिंह राठोड, दगडघर 4.43 सेकंद
5. नितीन शंकरराव लांडगे, शिवपुरी 4.43 सेकंद
6. बालाजी विश्वनाथ गलांडे, मालेगाव 4.46 सेकंद
7. कोंडीबा पांडुरंग धोत्रे नाळेश्वर 4.49 सेकंद
8. आरिफ खान जुम्मा खाँ पठाण, फुलसावंगी 4.49 सेकंद
9. देवा किसन खर्डे चिंचगव्हाण 4.58 सेकंद
10. शिवप्रसाद रामराव मुलगीर पोतरा 4.59 सेकंद

​0000

माळेगाव यात्रेतील शनिवारचा शंकरपट बैलगाडा शर्यतीची लोकप्रियता दर्शविणारा ठरला. हजारो शेतकऱ्यांच्या उपस्थितीत 58 बैल जोड्यांनी या स्पर्धेत भाग घेतला.शंकर पटाचे उद्घाटन आ. आनंदराव बोंढारकर यांच्या हस्ते करण्यात आले.