सर्वसाधारण, स्थानिक, डोंगरी विकास योजना

संगणकीय प्रणालीचे आज नांदेड येथे प्रशिक्षण

नांदेड, दि. 11 :- जिल्हा वार्षिक योजना (सर्वसाधारण), खासदार व आमदार स्थानिक विकास कार्यक्रम तसेच डोंगरी विकास कार्यक्रम योजनांच्या प्रभावी सनियंत्रणासाठी संगणक प्रणाली विकसित करण्यात आली आहे. याबाबत प्रशिक्षणाचे आयोजन गुरुवार 12 डिसेंबर 2019 रोजी येथील जिल्हाधिकारी कार्यालय परिसरातील नियोजन भवन कॅबिनेट हॉल येथे सकाळी 11 वा.  करण्यात आले आहे. या प्रशिक्षणास संबंधीत अधिकारी, कर्मचाऱ्यांनी उपस्थित रहावे, असे निर्देश जिल्हाधिकारी तथा जिल्हा नियोजन समितीचे सदस्य सचिव अरुण डोंगरे यांनी दिले आहेत.

या प्रशिक्षण कार्यक्रमास औरंगाबाद विभागीय आयुक्त कार्यालयाचे उपायुक्त नियोजन यांची प्रमुख उपस्थिती राहणार असून या प्रशिक्षणाचे उद्घाटन जिल्हाधिकारी अरुण डोंगरे यांच्या हस्ते होणार आहे. या  कार्यक्रमास जिल्हा परिषदेचे मुख्य कार्यकारी अधिकारी अशोक काकडे यांची उपस्थिती राहणार आहे. जिल्हा वार्षिक योजना (सर्वसाधारण), खासदार व आमदार स्थानिक विकास कार्यक्रम तसेच डोंगरी विकास कार्यक्रम योजनांच्या प्रभावी सनियंत्रणासाठी iPAS-Integrated Planning Office Automation System ही संगणक प्रणाली विकसीत करण्यात आली आहे.

000000

सुशिक्षित बेरोजगार अभियंतांना  

काम वाटप करण्यासाठी समितीची बैठक

नांदेड, दि. 10 :- जिल्ह्यातील सुशिक्षित बेरोजगार अभियंता यांना लॉटरी पद्धतीने काम वाटप करण्यासाठी गठीत केलेल्या काम वाटप समितीची बैठक सोमवार 23 डिसेंबर 2019 रोजी सार्वजनिक बांधकाम मंडळ नांदेड येथे दुपारी 12 वा. येथे घेण्यात येणार आहे.

कामे घेण्यास इच्छुक सुशिक्षीत बेरोजगार अभियंतांनी नोंद घेऊन आवश्यक कागदपत्रासह बैठकीस उपस्थित रहावे, असे आवाहन नांदेड काम वाटप समिती तथा सार्वजनिक बांधकाम मंडळाचे अधीक्षक अभियंता यांनी केले आहे.

000000

श्रीक्षेत्र खंडोबा माळेगाव यात्रेनिमित्त

24 डिसेंबरला स्थानिक सुट्टी

नांदेड, दि. 11 :- जिल्हाधिकारी कार्यालयाकडून सन 2019 साठी नांदेड जिल्ह्यात स्थानिक सुट्टया निश्चित करण्यात आल्या आहेत. त्यानुसार मंगळवार 24 डिसेंबर 2019 रोजी श्रीक्षेत्र खंडोबा माळेगाव यात्रा (पालखी सोहळा ) यानिमित्त नांदेड जिल्ह्यात स्थानिक सुट्टी जाहीर करण्यात आली आहे.

श्रीक्षेत्र खंडोबा माळेगाव यात्रा ( पालखी सोहळा ) निमित्त मंगळवार 24 डिसेंबर 2019 रोजी नांदेड जिल्ह्यातील सर्व राज्य शासकीय कार्यालये, जिल्हा परिषद अंतर्गत कार्यालये, महानगरपालिका, नगरपालिका कार्यालये, स्थानिक स्वराज्य संस्थांची कार्यालये तसेच कोषागार, उपकोषागार कार्यालये व शैक्षणिक संस्थांना या सुट्टया लागू राहतील. सुट्टयांचा हा आदेश नांदेड जिल्ह्यातील दिवाणी व फौजदारी न्यायालये, केंद्र शासनाची कार्यालये आणि बँका यांना लागू होणार नाही, असेही आदेशात नमूद केले आहे.

00000

‘‘मानवी हक्क दिन’’ निमित्त

कायदेविषयक शिबीर संपन्न

नांदेड, दि. 11 :- राज्य विधी सेवा प्राधिकरण मुंबई यांच्या वार्षिक सर्वसामान्य किमान कार्यक्रमांतर्गत जिल्हा विधी सेवा प्राधिकरण नांदेडच्यावतीने आज नांदेड तालुक्यातील बोंढार येथे मानवी हक्क दिनानिमित्त कायदेविषयक शिबिराचे आयोजन करण्यात आले होते.

यावेळी जिल्हा विधी सेवा प्राधिकरणाचे सचिव आर. एस. रोटे, पॅनल विधीज्ञ अॅड. नय्युमखान पठाण, अॅड सुभाष बेंडे, समाजसेवीका सौ अनुराधा मठपती, सरपंच सौ. शुभाबाई श्रावण सोनटक्के, पोलीस पाटील देवराव कोकरे, गावातील नागरिक उपस्थित होते.

मार्गदर्शन करतांना न्यायाधीश श्री. रोटे यांनी गावकऱ्यांना त्यांच्या मुलभुत हक्कांबाबत व जिल्हा विधी सेवा प्राधिकरणाद्वारे दिल्या जाणाऱ्या मोफत विधी सहाय्य व विविध नुकसान भरपाई योजनांची माहिती दिली. विधीक्ष श्री बेंडे, व श्री पठाण यांनी मानवी हक्काबद्दल मार्गदर्शन केले.    

00000

स्‍पर्धा परिक्षा अभ्‍यासिका चाचणी परीक्षेस

अर्ज करण्यास 27 डिसेंबरची मुदतवाढ

नांदेड, दि. 11 :- सेतु समिती नांदेड संचलित स्‍पर्धा परिक्षा अभ्‍यासिकेत युपीएससी व एमपीएससी परीक्षेच्या तयारीसाठी सेतू समिती संचलित स्‍पर्धा परिक्षा अभ्‍यासिकेत प्रवेश घेण्यास इच्‍छुक व पात्र उमेदवारांना अर्ज करण्यास 27 डिसेंबरची मुदतवाढ देण्यात आली आहे, असे आवाहन निवासी उपजिल्हाधिकारी तथा सदस्य सचिव सेतू समिती नांदेड यांनी केले आहे.  

उमेदवारांनी 13 ते 27 डिसेंबर 2019 कालावधीत www.nanded.gov.in या संकेतस्‍थळावर ऑनलाईन अर्ज करावीत. यापुर्वी ज्‍या विद्यार्थ्यांनी ऑनलाईन अर्ज केली आहेत त्‍यांनी पुन:श्‍च अर्ज करु नये. परंतु ज्‍यांनी परीक्षा शुल्क जमा केली नाही त्‍यांनी शुल्क जमा करणे आवश्‍यक आहे. त्‍यानंतर त्‍यांचा परिक्षेसाठी प्रवेश निश्चित केला जाईल. या निवड चाचणी परिक्षेस मुदतवाढ देण्यात आली असून 5 जानेवारी 2020 रोजी सकाळी 10.30 ते दुपारी 12 यावेळेत ही परिक्षा घेण्‍यात येणार आहे. परिक्षेसाठी उमेदवाराकडे कोणत्‍याही शाखेची पदवी असणे आवश्‍यक आहे. परिक्षा शुल्‍क दोनशे रुपये असून 13 ते 27 डिसेंबर 2019 पर्यंत सकाळी 10 ते सायं 5 या कालावधीत ग्रंथपाल स्‍पर्धा परिक्षा अभ्‍यासिका स्‍टेडीयम परिसर नांदेड यांच्याकडे भरणा करावी.

परिक्षेचे स्‍थळ नांदेड जिल्‍ह्याच्‍या www.nanded.gov.in या संकेतस्‍थळावर वेगळ्याने प्रसिध्‍द करुन आपणास प्रवेशपत्र ऑनलाईन काढण्‍याची सुविधा 31 डिसेंबर 2019 ते 4 जानेवारी 2020 रोजी उपलब्‍ध करुन देण्‍यात येईल व परिक्षेचा निकाल 5 जानेवारी 2020 रोजी सायंकाळी 5 वा. वरील संकेतस्‍थळावर प्रसिध्‍द करण्‍यात येईल, असेही आवाहन निवासी उपजिल्हाधिकारी तथा सदस्य सचिव सेतू समिती नांदेड यांनी केले आहे.

000000

जिल्ह्यात जमावबंदी, शस्त्रबंदी आदेश लागू

नांदेड, दि. 11 :- जिल्ह्यात बुधवार 25 डिसेंबर 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 11 डिसेंबर 2019 रोजी सकाळी 6 वाजेपासून ते 25 डिसेंबर 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000