वृत्त क्र. 923 

क्रीडा व युवक कल्याण मंत्री

संजय बनसोडे यांचा नांदेड दौरा

नांदेड दि. 9 ऑक्टोबर : राज्याचे क्रीडा व युवक कल्याण, बंदरे मंत्री संजय बनसोडे हे 10 ऑक्टोबर नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील. 

गुरूवार 10 ऑक्टोबर 2024 रोजी मुंबई येथून विमानाने श्री गुरू गोविंद सिंगजी विमानतळ नांदेड येथे दुपारी 2.05 वा. आगमन. दुपारी 2.10 वा. हेलिकॉप्टरने श्री साई गणेश मिलिटरी फाउंडेशन येथील हेलिपॅड रुद्धा पाटी ता. अहमदपूर जिल्हा लातूरकडे प्रयाण करतील.  

0000

 वृत्त क्र. 922   

कृषी मंत्री धनंजय मुंडे यांचा नांदेड दौरा

नांदेड दि. 9 ऑक्टोबर : राज्याचे कृषी मंत्री धनंजय मुंडे हे 10 ऑक्टोबर रोजी नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील. 

गुरूवार 10 ऑक्टोबर 2024 रोजी मुंबई येथून विमानाने श्री गुरू गोविंद सिंगजी विमानतळ नांदेड येथे दुपारी 2.05 वा. आगमन. दुपारी 2.10 वा. हेलिकॉप्टरने श्री साई गणेश मिलिटरी फाउंडेशन येथील हेलिपॅड रुद्धा पाटी ता. अहमदपूर जिल्हा लातूरकडे प्रयाण करतील.  

0000

 वृत्त क्र. 921 

मुख्यमंत्री महिला सशक्तीकरण कार्यक्रमासाठी

शहरात दोन वाहनतळाची व्यवस्था 

नांदेड दि. 9 ऑक्टोबर :- मुख्यमंत्री महिला सशक्तीकरण अभियान कार्यक्रमासाठी प्रत्येक तालुक्यातून विविध योजनाचे लाभार्थी यांना ने-आण करण्यासाठी जिल्हा प्रशासनाच्यावतीने 249 बसेसची व्यवस्था करण्यात आली आहे. 

 वाहनतळास जाण्याचे असे आहेत मार्ग 

या बसेससाठी नांदेड शहरात दोन वाहनतळाची व्यवस्था केली आहे. नांदेड मनपा, नांदेड, अर्धापूर, भोकर, मुदखेड, हिमायतनगर या तालुक्यासाठी 170 बसेससाठी वाहनतळाची व्यवस्था नांदेड शहरातील शासकीय तंत्रनिकेतन मैदान येथे केली आहे. तर यशवंत महाविद्यालयाच्या मैदानावर हदगाव, नायगाव, बिलोली, उमरी, धर्माबाद, मुखेड, देगलूर, कंधार व लोहा या तालुक्यासाठी एकूण 129 बसेस पार्किंगची व्यवस्था केली आहे. नांदेड येथील वाहतुकीला कोणताही अडथळा होवू नये यासाठीही नियोजन केले आहे.   

नांदेड तालुक्यासाठी 60 बसेस व अर्धापूर तालुक्यासाठी 15 बसेस व्यवस्था केली असून या बसेसनी नमस्कार चौक-महाराणा प्रताप चौक-वसंतराव नाईक चौक-आनंदनगर चौक-शासकीय तंत्रनिकेतन मैदान येथे वाहनतळाकडे येण्याचा मार्ग असेल. मुदखेड तालुक्यासाठी 20 बसेसची व्यवस्था असून वाजेगांव-देगलूर नाका-बाफना टी पॉईन्ट-महाराणा प्रताप चौक–वसंतराव नाईक चौक-आनंद नगर चौक –शासकीय तंत्र निकेतन मैदान नांदेड येथे पोहोचायचे आहे. 

भोकर तालुक्यासाठी 15 बसची व्यवस्था असून त्यांचा मार्ग नमस्कार चौक-महाराणा प्रताप चौक-वसंतराव नाईक चौक-आनंद नगर चौक-शासकीय तंत्रनिकेतन मैदान येथे वाहनतळाकडे येण्याचा मार्ग असेल. उमरी तालुक्यातील 6 बसेस व मुखेड तालुक्यासाठीच्या 20 बसेस आणि देगलूर तालुक्यासाठी 10 बसेस व कंधार तालुक्यासाठी 15 बसेस, लोहा तालुक्यातील 20 बसेससाठी यशवंत महाविद्यालया मैदान नांदेड येथे वाजेगाव-देगलूर नाका-बाफना-अबचलनगर कमान-यात्री निवास पोलीस चौकी-हिंगोली गेट ओव्हर ब्रिज-अण्णाभाऊ साठे चौक-व्हीआयपी रोड-कुसुमताई सभागृह यशवंत महाविद्यालय मैदान नांदेड येथे पार्क करायच्या आहेत. 

हदगाव तालुक्यासाठीच्या  20 बसेससाठी नमस्कार चौक-महाराणा प्रताप चौक-वसंतराव नाईक चौक-अण्णाभाऊ साठे चौक-व्हीआयपी रोड-कुसूमताई सभागृह–यशवंत महाविद्यालय मैदानाकडे यावे. हिमायतनगर तालुक्याच्या 10 बसेससाठी नमस्कार चौक-महाराणा प्रताप चौक-वसंतराव नाईक चौक-आनंद नगर चौक-शासकीय तंत्रनिकेतन मैदान येथे वाहनतळाकडे येण्याचा मार्ग असेल.बिलोली तालुक्यातील 12 बससाठी व धर्माबाद तालुक्यासाठीच्या 6 व नायगांव तालुक्यातील 20 बसेसचा मार्ग वाजेगांव –देगलूर नाका-बाफना-अबचलनगर कमान-यात्री निवास पोलीस चौकी-हिंगोली गेट ओव्हर ब्रिज-अण्णाभाऊ साठे चौक –व्हीआयपी रोड-कुसूमताई सभागृह यशवंत महाविद्यालयाचे मैदान असे राहील.

00000

 वृत्त क्र. 920

केंद्रीय परिवहन मंत्री नितीन गडकरी यांच्या हस्ते महाराष्ट्रातील वसतिगृहाचे उद्घाटन

·         नांदेड येथील दोन वसतीगृहाचा समावेश

नांदेड दि. 9 ऑक्टोबर :  शासकीय मुलांचे वसतीगृह, काळेश्वर नगर, विष्णुपूरी नांदेड व शासकीय मुलीचे वसतीगृह दिपनगर नांदेड या दोन वसतीगृहासोबत महाराष्ट्रातील 44 वसतीगृहाचे उद्घाटन केंद्रीय परिवहन, महामार्ग मंत्री नितीन गडकरी यांच्या हस्ते आज दुपारी नागपूर येथून दुरदश्य प्रणालीद्वारे संपन्न झाले. यावेळी राज्याचे उपमुख्यमंत्री देवेंद्र फडणवीस, गृहनिर्माण मंत्री अतुल सावे हे उपस्थित होते.

यावेळी महाज्योती, नागपूर या प्रशिक्षण संस्थेमार्फत प्रशिक्षण घेवून भारतीय प्रशासकीय सेवा, भारतीय वन सेवेमध्ये निवड झालेल्या विद्यार्थ्यांचा उपमुख्यमंत्री देवेंद्र फडणवीस यांच्या हस्ते सत्कार करण्यात आला. राज्यामध्ये प्रथमच इतर मागास प्रवर्ग, विमुक्त जाती, भटक्या जमाती व विशेष मागास प्रवर्ग या प्रवर्गातील पदवी अभ्यासक्रमात प्रवेश घेणाऱ्या विद्यार्थ्यांसाठी वसतिगृहे सुरु करण्यात आली आहेत. या वसतिगृहामध्ये जास्तीत जास्त विद्यार्थी प्रवेश घेवून लोकसेवा, राज्यसेवा आयोगामार्फत घेण्यात येणाऱ्या परिक्षेत उत्तीर्ण होतील याबाबत त्यांनी शुभेच्छा दिल्या.

तसेच नांदेड येथे दोन वसतीगृहाचे दुरदश्य प्रणालीद्वारे उदघाटन मान्यवरांच्या हस्ते करण्यात आले. या वसतीगृहातील प्रवेशित मुलांनी वसतिगृहामध्ये वास्तव्य करीत शिस्त ठेवावी. अटी व शर्तीचे पालन करावे. राज्यामध्ये प्रथमच विमुक्त जाती भटक्या जमाती, इतर मागासवर्ग व विशेष मागास प्रवर्गासाठी वसतिगृह सुरु झाले असल्याने जास्तीत जास्त विद्यार्थ्यांनी वसतिगृहात प्रवेश घ्यावा असे आवाहन इतर मागास बहुजन कल्याण विभागाचे सहायक संचालक शिवानंद मिनगिरे यांनी केले. तसेच गुणानुक्रमे प्रवेशासाठी पात्र असलेल्या मुला-मुलींना वसतीगृहात प्रवेश निश्चित करण्यासाठी पत्र देण्यात येऊन शुभेच्छा दिल्या. राष्ट्रगीताने कार्यक्रमाची सांगता करण्यात आली.

00000

वृत्त क्र. 919

उपमुख्यमंत्री अजित पवार यांचा नांदेड दौरा 

नांदेड दि. 9 ऑक्टोबर :  महाराष्ट्र राज्याचे उप मुख्यमंत्री अजित पवार हे नांदेड दौऱ्यावर येत असून त्यांचा दौरा कार्यक्रम पुढीलप्रमाणे आहे. 

गुरुवार 10 ऑक्टोबर 2024 रोजी मुंबई येथून विमानाने श्री गुरु गोविंद सिंगजी विमानतळ येथे दुपारी 2.05 वाजता आगमन. दुपारी 2.10 वाजता हेलिकॉप्टरने लातूर जिल्ह्यातील अहमदपूर तालुक्यातील रुध्दा पाटी येथील हेलिपॅडकडे प्रयाण. सायंकाळी 4.50 वाजता हेलिकॉप्टरने  श्री गुरु गोविंद सिंगजी विमानतळ नांदेड येथे आगमन. सायंकाळी 5 वाजता कृषी उत्पन्न बाजार समिती मैदान, नवा मोंढा, नांदेड येथे आगमन. सायंकाळी 5 वाजता मुख्यमंत्री महिला सशक्तीकरण अभियान जिल्हास्तरीय कार्यक्रमास  उपस्थिती. सायंकाळी 7.25 वाजता श्री गुरु गोविंद सिंगजी विमानतळ नांदेड येथे आगमन. सायंकाळी 7.30 वाजता विमानाने मुंबईकडे ते प्रयाण करतील. 

00000

मुख्यमंत्री माझी लाडकी बहीण योजना दरमहा रु. १५०० मिळत आहेत.

#मुख्यमंत्रीमाझीलाडकीबहीण

#आपलंसरकारलाडकंसरकार

#नांदेड

 

महाराष्ट्र सरकारची युवा कार्यप्रशिक्षण योजना : रोजगारासाठी तयारी, आत्मनिर्भरतेकडे वाटचाल!

#युवाकार्यप्रशिक्षणयोजना

#आपलंसरकारलाडकंसरकार

#नांदेड

 

 वृत्त क्र. 918

मुख्यमंत्री एकनाथ शिंदे यांचा नांदेड दौरा  

नांदेड दि. 9 ऑक्टोबर :- नांदेड येथील महिला सशक्तिकरण अभियान कार्यक्रमात सहभागी होण्यासाठी महाराष्ट्र राज्याचे मुख्यमंत्री एकनाथ शिंदे हे उदया नांदेड दौऱ्यावर येत असून त्यांचा दौरा कार्यक्रम पुढीलप्रमाणे आहे.  

गुरुवार 10 ऑक्टोबर 2024 रोजी जालना येथून हेलिकॉप्टरने सायंकाळी 4.25 वाजता नांदेड विमानतळ येथे आगमन व मोटारीने नवा मोंढा मैदानाकडे प्रयाण. सायं. 4.30 वाजता महिला सशक्तीकरण अभियानातंर्गत मुख्यमंत्री माझी लाडकी बहीण योजनेचा प्रचार व प्रसार कार्यक्रम व आमदार बालाजी कल्याणकर यांच्या मतदार संघातील विविध विकास कामांचे ऑनलाईन भूमीपुजन. सायं. 6 वाजता मोटारीने नांदेड विमानतळाकडे प्रयाण. सायं 6.15  वा. नांदेड विमानतळ येथे आगमन व शासकीय विमानाने मुंबईकडे ते प्रयाण करतील.

00000

 कॅप्शन : नांदेडच्या कृषी उत्पन्न बाजार समिती नवा मोंढा मैदानावर होणाऱ्या उद्याच्या मुख्यमंत्री महिला सशक्तिकरण अभियान कार्यक्रमासाठी प्रशासनाची तयारी पूर्ण झाली आहे. भव्य सभा मंडप व आवश्यक बैठक व्यवस्था करण्यात आली आहे. उद्या चार वाजता मुख्यमंत्री या ठिकाणी लाडक्या बहिणींना संबोधित करणार आहेत.

 सुधारित विशेष वृत्त क्र. 917

 

मुख्यमंत्री महिला सशक्तीकरण अभियानाचा

नवा मोंढा मैदानावर आज महिला महामेळावा

• मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजितदादा पवार साधणार संवाद
• मान्यवरांच्या उपस्थितीत मुख्यमंत्री लाडकी बहीण योजनेतील महिला लाभार्थ्यांचा सन्मान
• वाहतूक व्यवस्थेसाठी वाहनतळाची व्यवस्था

• सर्वाना विनामुल्य प्रवेश, माध्यम प्रतिनिधीनी ओळखपत्र सोबत ठेवावे

• विविध योजनांचे उद्घाटन

• जिल्हा प्रशासनाच्यावतीने जय्यत तयारी

नांदेड दि. 9 ऑक्टोबर : राज्य शासनाच्या महिला सक्षमीकरणाच्या पथदर्शी योजनांच्या लाभार्थ्यांशी संवाद साधण्यासाठी त्यांना प्रमाणपत्र व लाभ देण्यासाठी राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्यासह मान्यवर उपस्थित राहणार आहेत. कृषि उत्पन्न बाजार समितीच्या नवा मोंढा या मैदानावर यासाठी हजारो महिला बसू शकतील असा मंडप उभारण्यात आला आहे. उद्या जिल्हाभरातील महिलांची उपस्थिती याठिकाणी असेल. उदया दुपार पासून विविध सांस्कृतिक कार्यक्रमाला सुरूवात  होणार असून मुख्यमंत्री एकनाथ शिंदे हे महिलांना दुपारी 4 च्या सुमारास संबोधित करणार आहेत. 

या कार्यक्रमास राज्याचे ग्रामविकास मंत्री  तथा नांदेड जिल्ह्याचे पालकमंत्री गिरीश महाजन, महिला बाल विकास मंत्री आदिती तटकरे यांची प्रमुख उपस्थिती राहणार आहे. तसेच माजी मुख्यमंत्री तथा राज्यसभा सदस्य अशोक चव्हाण, मा. बाळासाहेब ठाकरे हरिद्रा संशोधन व प्रशिक्षण केंद्राचे अध्यक्ष (मंत्री दर्जा) हेमंत पाटील, खासदार डॉ. अजित गोपछडे, हिंगोलीचे खासदार नागेश बापूराव पाटील आष्टीकर, लातूरचे खासदार डॉ. शिवाजी बंडप्पा काळगे, आमदार सतीश चव्हाण, आमदार विक्रम काळे, आमदार बालाजी कल्याणकर, आमदार भिमराव केराम, आमदार माधवराव पवार, आमदार डॉ. तुषार राठोड, आमदार श्यामसुंदर शिंदे, आमदार मोहनराव हंबर्डे, आमदार राजेश पवार, विभागीय आयुक्त दिलीप गावडे, नांदेड परिक्षेत्राचे विशेष पोलीस उपमहानिरीक्षक शहाजी उमाप यांची उपस्थिती असणार आहे.

महिला व बालकल्याण विभागामार्फत आयोजित या कार्यक्रमाचे नियोजन नांदेड जिल्हा प्रशासन करत आहे. मुख्यमंत्री महिला सशक्तीकरण कार्यक्रमाच्या सुरुवाताला मुख्यमंत्री एकनाथ शिंदे यांच्या हस्ते राज्यमाता-गोमाता पुजनाचा कार्यक्रम होणार असून त्यानंतर लखपती दीदी व इतर योजनांच्या स्टॉलचे  उद्घाटन मान्यवरांच्या हस्ते होणार आहे. यावेळी मुख्यमंत्री महोदय व मान्यवर लाभार्थ्यांशी भेट घेवून हितगुज करणार आहेत. यावेळी पोलीस बँडवर राज्यगीत सादर करण्यात येईल. तसेच यावेळी प्रशासनाच्यावतीने मान्यवरांचे स्वागताचा कार्यक्रम होणार असून लेझीम पथकाद्वारे त्यांचे स्वागत करण्यात येणार आहे. कार्यक्रमात मान्यवरांचे हस्ते विविध योजनांच्या लाभार्थ्यांना प्रातिनिधीक स्वरुपात लाभ वितरण करण्यात येणार आहे.

महिला सशक्तीकरण अभियान कार्यक्रमाचे भव्य आयोजन नांदेड येथील कृषी उत्पन्न बाजार समितीच्या मैदानावर केले असून हा कार्यक्रम सर्वासाठी खुला आहे. नांदेड शहर व जिल्ह्यातील नागरिकांना यासाठी आमंत्रित करण्यात आले आहे. नांदेड जिल्ह्यातील सर्व तालुक्याच्या ठिकाणाहून अनेक लाभार्थी व नागरिक या कार्यक्रमासाठी उपस्थित राहणार असून जिल्हा प्रशासनाच्यावतीने आवश्यक त्या सर्व सोयी-सुविधा केल्या आहेत. कार्यक्रम स्थळी योजनांचे स्टॉल उभारण्यात आले असून या स्टॉलचे उद्घाटन मुख्यमंत्री एकनाथ शिंदे व मान्यवरांच्या हस्ते होणार आहे.

विविध योजनांचे उद्घाटन, भूमीपूजन व नामांतरण

या कार्यक्रमात आत्मन ॲपचा शुभारंभ होणार आहे. तसेच बालीका पंचायत संकल्पनेचे लोकापर्ण, केंद्रशासन पुरस्कृत अमृत 2 अभियानाअंतर्गत पाणी पुरवठयाचे बळकटीकरण व संलग्नीकरण या कामाचे भुमिपूजन, कै. नरहर कुरुंदकर स्मारक भूमिपुजन कार्यक्रम मान्यवरांच्या हस्ते दूरदृश्य प्रणालीद्वारे होणार आहे. या कार्यक्रमासाठी जिल्हा प्रशासनाच्यावतीने नवा मोंढा येथे भव्य मंडप उभारण्यात आला असून मंडपात विविध विभागाचे योजनांच्या स्टॉल उभारण्यात आले आहेत. हा कार्यक्रम नागरिकांना लाईव्ह पाहता येईल यांची व्यवस्था प्रशासनाच्यावतीने करण्यात आली आहे. उद्या या संदर्भातील लिंक समाज माध्यमावर जाहीर केली जाणार आहे.

पावसापासून संरक्षणासाठी व्यवस्था

पावसाळी वातावरण असल्यामुळे जिल्हा प्रशासनाने पावसापासून बचाव करणाऱ्या भव्य मंडपाची व्यवस्था केली आहे. हा मंडप पावसाची शक्यता लक्षात घेऊन उभारण्यात आला आहे. त्यामुळे उद्या नियोजित वेळीच कार्यक्रम होणार असून यासंदर्भात नागरिकांनी निश्चित असावे, असे जिल्हाधिकारी अभिजीत राऊत यांनी स्पष्ट केले आहे.

आढावा बैठक

यासंदर्भात आज जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी मिनल करनवाल, जिल्हा पोलीस अधिक्षक अबिनाश कुमार, मनपा आयुक्त डॉ. महेश डोईफोडे, निवासी उपजिल्हाधिकारी महेश वडदकर, जि.प.अतिरिक्त मुख्य कार्यकारी अधिकारी संदीप माळोदे, जिल्हा महिला व बालविकास अधिकारी श्रीमती रुपाली रंगारी, जिल्हा कार्यक्रम अधिकारी रेखा काळम-पाटील यांच्यासह सर्व वरिष्ठ अधिकाऱ्यांची बैठक झाली. यामध्ये मुख्यमंत्री कार्यालयाचे अधिकारी तसेच आमदार बालाजी कल्याणकरही या ठिकाणी सहभागी झाले होते. उद्या येणाऱ्या महिलांच्या सुरक्षा, खाणपान तसेच प्रवासाच्या संदर्भात सर्व यंत्रणेने सतर्क राहण्याचे निर्देश यावेळी देण्यात आले.

 
माध्यम प्रतिनिधींसाठी आसन व्यवस्था

या कार्यक्रमासाठी माध्यम प्रतिनिधींसाठी आसन व्यवस्था केली असून माध्यम प्रतिनिधीनी स्वत:चे ओळखपत्र सोबत ठेवावे. माध्यम प्रतिनिधींनी आपले ओळखपत्र दाखवून कक्षात प्रवेश करावा, अशा सूचना जिल्हा प्रशासनाने दिल्या आहेत.

 
00000