आपले सरकार सेवा केंद्रामार्फत

शासकीय हमीभाव खरेंदी केंद्रासाठी

शेतकरी बांधवांनी नोंदणी करावी

नांदेड, दि. 27 :- शासनाने घोषित केलेल्या हमीभावानुसार चना खरेदीसाठी नाफेड मार्फत राज्य पणन महासंघ, विदर्भ सहकारी पणन महासंघ व महाफार्मस्‍ यांचेवतीने नांदेड जिल्ह्यात एकंदर 15 सबएजंट संस्थांची / शेतकरी उत्पादक कंपन्याची नेमणूक करण्यात आली असून सद्यस्थितीत शासनाने घोषीत केलेल्या हमीभावापेक्षा (रु. 4,875/- प्रति क्विंटल) बाजार भाव रु. 900 ते 1,000/- पेक्षा कमी असल्यामुळे शेतकरी त्यांच्या पिकाची नोंदणी करण्यासाठी सबएजंट संस्थेकडून स्थापन केलेल्या केंद्रावर मोठ्या प्रमाणावर गर्दी करीत आहेत.

सध्या कोव्हिड-19 विषाणू संसर्गाच्या पार्श्वभूमीवर शासनाकडून देशपातळीवर संचारबंदी (Lock Down) घोषीत करण्यात आली आहे. सद्यस्थितीत सबएजंट संस्थांकडे असलेले अपुरे तांत्रिक व सक्षम मनुष्यबळ तसेच पुरेसे संगणक, स्कॅनर, आदिंची अनुपब्धता विचारात घेता शेतकऱ्यांच्या शेतमालाची नोंदणी गाव पातळीवर उपलब्ध असलेल्या ‘आपले सरकार’ सेवा केंद्रांद्वारे झाल्यास गर्दीमुळे होणारा विषाणू संसर्ग टाळण्यास निश्चितच मदत होणार आहे व शेतकऱ्यांनाही ते सोईचे ठरणार आहे. त्यामुळे शासनाने जिल्ह्यातील गाव पातळीवर उपलब्ध असलेल्या ‘आपले सरकार’ सेवा केंद्रांस सामाजिक अंतर (Social distancing) चे पालन करुन नोंदणी करणेसाठी परवानगी दिलेली आहे.

नांदेड जिल्ह्यात सध्या प्रायोगीक तत्त्वावर देगलूर तालुक्यातील गवंडगाव, बिलोली तालुक्यातील कासराळी, हदगाव तालुक्यातील मनाठा, निवघा, तळणी व तामसा किनवट तालुक्यातील दिगडी (एम), कोठारी (चि.), मांडवा (कि.), मांडवी व सारखनी येथील ‘आपले सरकार’ सेवा केंद्रांवर नोंदणीची कार्यवाही सुरु करण्यात आले असून जिल्ह्यातील इतर ठिकाणी येत्या दोन-तीन दिवसात आपले सरकार सेवा केंद्रामार्फत नोंदणी सुरु केली जाणार आहे.

तेंव्हा शेतकऱ्यांनी ‘आपले सरकार’ सेवा केंद्रांवर नोंदणीसाठी येताना त्यांचे आधार ओळखपत्र, पीक पेऱ्याची Online नोंद असलेला गाव नमुना क्र. 7/12 चा उतारा, वैयक्तिक संगणकीकृत पेरा प्रमाणपत्र, आधार क्रमांकाशी जोडणी असलेल्या बँक बचत खात्याच्या पहिल्या पानाची छायाप्रत व बँक खात्याशी जोडलेला भ्रमणध्वनी क्रमांक घेऊन यावा. शेतकऱ्यांनी सदर नोंदणी केंद्रावर गर्दी होणार नाही याची खबरदारी घ्यावी. तसेच गावातील ‘आपले सरकार’ सेवा केंद्रांवर कमीत-कमी गर्दी होईल यासाठी संबंधित गावातील पोलीस पाटील, सरपंच, सेवा सहकारी संस्थेचे अध्यक्ष, इ. यंत्रणेने त्यांचे स्तरावरुन आवश्यक ते सहकार्य करावे. नोंदणी केंद्रावर शेतकऱ्यांची एकदम गर्दी होणार नाही या दृष्टीने संबंधित घटकांशी समन्वय ठेवून आपले स्तरावर नियोजन व अंमल करावा. तेव्हा शेतकऱ्यांना आवाहन करण्यात येते की, त्यांनी गावपातळीवर असलेल्या “आपले सरकार” सेवा केंद्र येथे जाऊन चना शेतमालाची नोंदणी करुन घ्यावी.

000000

https://www.facebook.com/100009273684447/videos/2564369513882146/?id=100009273684447


नांदेड आरोग्य यंत्रणा कोविड19 च्या प्रतिबंधासाठी अत्याधुनिक यंत्रसामग्री आणि सर्व अधिकारी व कर्मचारी सज्ज असून आरोग्य टीमच्या यशस्वी कार्यासाठी साठी शुभेच्छा#stayhome staysafe#coronafighters

नांदेड जिल्ह्यात 1 हजार 15 संशयितांची झाली नोंद

घेण्यात आलेले 737 नमुन्यांपैकी 677 जण निगेटिव्ह ;

53 जणांचा अहवाल प्रलंबित तर दोन कोरोना रुग्ण पॉझीटिव्ह   

नांदेड, दि. 27 (जिमाका) :- कोरोना विषाणु संदर्भात आज सोमवार 27 एप्रिल 2020 रोजी सायंकाळी 5 वाजेपर्यंत नांदेड जिल्ह्यात एकुण 1 हजार 15 संशयितांची नोंद झाली आहे. यापैकी घेण्यात आलेले स्वॅब एकुण 737 आहेत, त्यापैकी 677 निगेटिव्ह असून 53 स्वँब अहवाल प्रलंबित आहेत. आतापर्यंत एकूण 5  स्वँब तपासणीचा आवश्यकता नसल्याचा निर्वाळा दिलेला आहे.

आतापर्यंत एकूण घेण्यात आलेले स्वँब 737 असून त्यापैकी 2 रुग्णांचा स्वँब पॉझीटिव्ह आढळला आहे. हे रुग्ण शासकीय वैद्यकीय महाविद्यालय विष्णुपुरी नांदेड येथे उपचारासाठी दाखल आहेत.

नांदेड शहरातील पिरबुऱ्हाणनगर येथील रुग्णाचा पॉझीटिव्ह अहवाल बुधवार 22 एप्रिल 2020 रोजी प्राप्त झाला आहे.  या रुग्णास मधुमेह, उच्च रक्तदाब व दमा यासारखे गंभीर आजार असल्यामुळे प्रकृती गंभीर आहे. या रुग्णाच्या संपर्कातील एकूण 80 व्यक्तींचे स्वँब घेण्यात आले, या सर्व व्यक्तींचे अहवाल निगेटिव्ह आले आहेत.  

नांदेड शहरातील अबचलनगर येथील रुग्णाचा पॉझीटिव्ह अहवाल रविवार 26 एप्रिल 2020 रोजी प्राप्त झाला असून या रुग्णाची प्रकृती स्थीर आहे. तसेच त्याचा निकटवर्तीय संपर्कातील 16 व्यक्तींचे स्वॅब घेण्यात आले असून तपासणीसाठी औरंगाबाद येथील प्रयोगशाळेत पाठविण्यात आले आहेत. त्यांचे अहवाल अद्याप प्रलंबित आहेत.

जनतेने मनात कुठल्याही प्रकारची भीती न बाळगता कोणत्याही अफवावर विश्वासु ठेवु नका, असे आवाहन जिल्हा शल्य चिकित्सक डॉ. निळकंठ भोसीकर यांनी केले आहे.

000000

अबचलनगर, परिसर क्षेत्र कंटेनमेंट झोन म्हणून घोषित

येथील नागरिकांच्या हालचालीवर बंधने ;

आवश्यक सेवा महानगरपालिकेतर्फे घरपोच मिळणार ;

संपर्कासाठी नियंत्रण अधिकारी, नोडल अधिकाऱ्यांची नियुक्ती

नांदेड, दि. 27 (जिमाका):- नांदेड वाघाळा शहर महानगरपालिका हद्दीत अबचलनगर या क्षेत्रात कोव्हीड-19 चा रुग्ण आढळून आला आहे. त्यामुळे नियमानुसार अबचलनगर व परिसर या क्षेत्रामध्ये रोगाचा इतरत्र प्रसार होऊ नये म्हणून हे क्षेत्र  कंटेनमेंट झोन (अटकाव) Containment Zone म्हणून घोषित करण्यात आले आहे. तसेच तेथील नागरिकांच्या हालचालीवर बंधने घालण्यात आली आहेत.

जिल्हाधिकारी डॉ. विपीन इटनकर यांच्या आदेशानुसार अनुज्ञेय असलेल्या सर्व आवश्यक त्या सेवा या भागात बंद करण्यात येत आहेत. या सेवा महानगरपालिकेकडून घरपोच देण्यात येतील. त्यासाठी नियंत्रण अधिकारी म्हणून कार्यकारी अभियंता सुग्रीव अंधारे यांची नियुक्ती करण्यात आली आहे. तर सहाय्यक अधिकारी म्हणून प्रकाश गच्चे, सुपरवायझर आणि त्यांच्या अधिनस्त वसुली लिपिकांची नियुक्ती करण्यात आली आहे.

या आदेशाचे उल्लंघन केल्यास त्यांच्या विरुद्ध भारतीय दंडसंहिता (45 ऑफ 1860) च्या कलम 188 नुसार दंडनीय कारवाई करण्यात येईल. तक्रार असल्यास नोडल अधिकारी डॉ. मोहम्मद बदीयोद्दीन 9823012456, बळीराम भुरके मो. 9881120873, सुग्रीव अंधारे मो. 9011000941, प्रकाश गच्चे मो. 8888801960 या नंबरवर संपर्क साधावा, असे आवाहन नांदेड वाघाळा महानगरपालिका आयुक्त डॉ. सुनिल लहाने यांनी केले आहे.

00000