वृत्त क्रमांक 8

नांदेड जिल्ह्यात वाचन संकल्प महाराष्ट्राचा पंधरवड्यास मोठ्या उत्साहात प्रारंभ

नवीन वर्षाची सुरुवात वाचनाने

नांदेड दि. १ जानेवारी :- “वाचन संकल्प महाराष्ट्राचा” वाचन पंधरवाडयानिमित्त नांदेड जिल्हयातील सार्वजनिक ग्रंथालयामध्ये १ ते १५ जानेवारी २०२५ या कालावधीत ग्रंथप्रदर्शन व वाचन सामूहिक कार्यक्रम

असे विविध कार्यक्रमाचे आयोजन करण्यात येत आहे.

उच्च व तंत्रशिक्षण विभागाच्या निर्देशाप्रमाणे 1 जानेवारी ते 15 जानेवारी या कालावधीत वाचन संकल्प महाराष्ट्राचा या उपक्रमाअंतर्गत जिल्हा ग्रंथालय अधिकारी कार्यालय व जिल्हयातील शासनमान्य सार्वजनिक ग्रंथालय यांच्या संयुक्त विद्यमाने आज विविध कार्यक्रमांची सुरुवात झाली त्यामध्ये ग्रंथप्रदर्शन,वाचन कौशल्य कार्यशाळा निवडलेल्या पुस्तकांचे सामुहिक वाचन लेखन व विद्यार्थी यांच्या मधील वाचन संवाद कार्यक्रम,पुस्तक परिक्षण व कथन स्पर्धेचे आयोजन करण्यात आले.जिल्हा ग्रंथालय अधिकारी कार्यालय व राम मनोहर लोहिया सार्वजनिक वाचनालय,नांदेड वाघाळा शहर महानगरपालिका नांदेड या अभ्यासिकेत सामुहिक वाचन करताना जिल्हा ग्रंथालय अधिकारी अ.वा.सुर्यवंशी, महापालिकेचे ग्रंथपाल श्रीनिवास इज्जपवार यांनीही विद्यार्थ्यासोबत सामुहीक वाचन करुन “वाचन संकल्प महाराष्ट्राचा” या उपक्रमाची सुरुवात केली.

नांदेड जिल्ह्यात आज संभाजी सार्वजनिक वाचनालय,वाढवणा, भगवान श्रीकृष्ण वाचनालय,भोकर, हु.संतराम कांगठीकर वाचनालय,अर्जापूर,सचखंड गुरुव्दारा संचलित श्री हुजूर साहेब सार्वजनिक वाचनालय,नांदेड,डॉ.बाबासाहेब आंबेडकर वाचनालय,नगर परिषद कंधार, श्री समर्थ वाचनालय देगलूर,श्री संत नारायणगीरी महाराज सार्वजनिक वाचनालय वासरी, का.मातोश्री सुंदराबाई सार्वजनिक वाचनालय,बिलोली यांनी या उपक्रमात प्रामुख्याने सहभाग घेतला.

०००००

 वृत्त क्रमांक 7

​उद्योग राज्यमंत्री इंद्रनिल नाईक यांचा दौरा

 

नांदेड दि. 1 जानेवारी :  राज्याचे उद्योग, सार्वजनिक बांधकाम, उच्च व तंत्रशिक्षण, मृद व जलसंधारण, आदिवासी विकास व पर्यटन राज्यमंत्री इंद्रनिल नाईक हे गुरूवार 2 जानेवारी 2025 रोजी सकाळी 10.30 वा. किनवट तालुक्यातील दहेली तांडा येथे माजी आमदार स्व. प्रदीप नाईक यांचेकडे सांत्वन भेट. सकाळी 11 ते 11.30 वाजेपर्यंत राखीव. सकाळी​ 11.40 वा. माहूर, सारखणी मार्गे दहेली तांडा ता. किनवट येथून नाईक बंगला कार्ला रोड पुसद जिल्हा यवतमाळकडे प्रयाण करतील.

0000 

  वृत्त क्रमांक 6

माळेगाव यात्रेत आज विविध कार्यक्रमांचे आयोजन

कृषी व पशु प्रदर्शन; कृषीनिष्ठ शेतकऱ्यांचा होणार सत्कार

                                                                                                                                                                         महिला व बालकांसाठीच्या स्पर्धेचे उदघाटन

 लावणी महोत्सव ठरणार आकर्षण ; लावणी महोत्सउवात नऊ संचाचे होणार सादरीकरण

                                                                                                                                                                     नांदेड दि. 1 जानेवारी :- श्रीक्षेत्र माळेगाव येथे सुरु असलेल्यार श्री खंडोबाच्या यात्रेत आज जिल्हा परिषदेच्यावतीने गुरुवार  2 जानेवारी रोजी विविध कार्यक्रमांचे आयोजन करण्यात आले आहे. यात्रेच्या निमित्ताने आयोजित कार्यक्रमांत कृषी प्रदर्शन, अश्व, श्वान, कुक्कुट प्रदर्शन, कृषीनिष्ठ शेतकऱ्यांचा सत्कार, महिलांसाठी व बालकांसाठी स्पर्धा तसेच लावणी महोत्सव मुख्य आकर्षण ठरणार आहे.

                                                                                                                                                                     उद्या गुरुवारी सकाळी 10 वाजता अश्व, श्वान व कुक्कुट प्रदर्शन व विविध स्पर्धांचे उद्घाटन माजी मुख्यमंत्री तथा राज्यसभा सदस्य खासदार अशोकराव चव्हाण यांच्या हस्ते होणार आहे. यावेळी खासदार डॉ. अजित गोपछडे यांची विशेष उपस्थिती राहणार आहे. तर आमदार प्रतापराव पाटील चिखलीकर, आमदार सतीश चव्हाण, आमदार विक्रम काळे, आमदार तुषार राठोड, आमदार बालाजीराव कल्याणकर तसेच जिल्हा परिषद संवर्धन अधिकारी डॉ. प्रवीणकुमार घुले यांची प्रमुख उपस्थिती राहणार आहे.

                                                                                                                                                                  सकाळी 11 वाजता महिला व बालकांसाठी स्पर्धांचे उद्घाटन लातूर जिल्हयाचे खासदार डॉ. शिवाजी काळगे यांच्या हस्ते होणार आहे. आमदार प्रतापराव पाटील चिखलीकर यांची यावेळी विशेष उपस्थिती राहणार आहे. तर आमदार श्रीजया चव्हाण व आमदार जितेश अंतापुरकर यांची प्रमुख उपस्थिती राहणार आहेत.

                                                                                                                                                                        कृषी प्रदर्शनाचे उद्घाटन व डॉ. शंकरराव चव्हाण कृषीनिष्ठ पुरस्कार प्राप्त शेतकऱ्यांचा गौरव

                                                                                                                                                                       आज दुपारी 2 वाजता माळेगाव येथे कृषी प्रदर्शनाचे आयोजन करण्यात आले आहे. या कार्यक्रमाचे उद्घाटन राज्याचे सहकार मंत्री बाबासाहेब पाटील यांच्या हस्ते करण्यात येणार आहे. या कार्यक्रमाला हिंगोली जिल्हायाचे खासदार नागेश पाटील आष्टीकर यांची विशेष उपस्थिती राहणार आहे. तर आमदार प्रतापराव पाटील चिखलीकर, आमदार आनंदराव बोंढारकर, आमदार राजेश पवार व प्रभारी कृषी विकास अधिकारी सचिन कपाळे यांची प्रमुख उपस्थिती राहणार आहे. 

                                                                                                                                                                 दुपारी तीन वाजता लावणी महोत्सव

                                                                                                                                                                   यात्रेचे प्रमुख आकर्षण असलेला लावणी महोत्सव उद्या दुपारी तीन वाजता आयोजित करण्यात आला आहे. या महोत्सवाचे उद्घाटन लोहा विधानसभा मतदार संघाचे आमदार प्रतापराव पाटील चिखलीकर यांच्या हस्ते होणार आहे. यावेळी बाळासाहेब ठाकरे हरिद्रा (हळद) संशोधन व प्रशिक्षण केंद्राचे अध्यक्ष हेमंत पाटील व  खासदार रवींद्र चव्हाण यांची विशेष उपस्थिती राहणार आहे. तर आमदार डॉ. तुषार राठोड व आमदार बालाजीराव कल्याणकर याची प्रमुख उपस्थिती राहणार आहे. तरी भाविकांनी या कार्यक्रमांमध्ये सहभागी व्हाावे, असे आवाहन नांदेड जिल्हा परिषदेच्यावतीने करण्यात आले आहे.    

चौकट

लावणी महोत्सवात नऊ संचाचे होणार सादरीकरण

लावणी महोत्सवात नऊ संचाचे सादरीकरण होणार असल्याने हा कार्यक्रम अतिशय आकर्षक ठरणार आहे. या संचांमध्ये प्रथितयश कलाकारांचा समावेश असून त्यामध्ये विविध ठिकाणांहून आलेले संच बहारदार लावण्यासह लोकसंगीत व नृत्याचे सादरीकरण करणार आहेत. लावणी महोत्सवातील संचामध्ये आशा रूपा परभणीकर मोडनिंब, शामल स्नेहा लखनगावकर मोडनिंब, आकांक्षा कुंभार प्रस्तुत मराठमोळा-नादखुळा, प्रिया पाटील सोलापुर प्रस्तुत झंकार घुंगराचा, योगेश देशमुख पुणे प्रस्तुत तुमच्यासाठी कायपण, श्रुती मुंबईकर प्रस्तुत लावण्यवतीचा जलवा या संचाचा समावेश आहे. विशेष म्हणजे नांदेड जिल्ह्यातील अनुराधा नांदेडकर व स्वर सरगम कलासंच माळाकोळी या दोन कला संचांना देखील या महोत्सवात संधी मिळाली आहे. आज होणारा लावणी महोत्स व रसिकांसाठी पर्वणी ठरणार आहे.

00000

 वृत्त क्रमांक 5

जिल्हास्तरीय सरस भव्य विक्री व प्रदर्शनाचे 6 ते 10 जानेवारी या कालावधीत नांदेड येथे आयोजन

महाराष्ट्रातील विविध खाद्यपदार्थ व सांस्कृतीक कार्यक्रमाची मेजवाणी

मल्टीपर्पज हायस्कूल वजीराबादच्या प्रागंणावर कार्यक्रमाचे आयोजन

#नांदेड दि. 1 जानेवारी :- नांदेड शहरातील व जिल्ह्यातील महिला व सर्व कुटूंबासाठी मकर संक्राती निमित्त महाराष्ट्रातील प्रसिध्द वस्तुंचे भव्य विक्री व प्रदर्शनाचे आयोजन 6 ते 10 जानेवारी 2025 या कालावधीत सकाळी 10 ते संध्याकाळी 10 पर्यत करण्यात आले आहे. हे प्रदर्शन मल्टीपर्पज हायस्कूल वजीराबाद नांदेड याठिकाणी होणार असून या प्रदर्शनाबरोबर महाराष्ट्रातील विविध प्रसिध्द खाद्यपदार्थ व सांस्कृतीक कार्यक्रमाची मेजवानी नांदेडकरांना मिळणार आहे. तरी या जिल्ह्यातील नागरिकांनी यांचा लाभ घ्यावा, असे आवाहन जिल्हा ग्रामीण विकास यंत्रणेचे प्रकल्प संचालक नांदेड यांनी केले आहे.

या सरस विक्री प्रदर्शनामध्ये महिला बचतगटांनी उत्पादित केलेल्या कुटूंबासाठी लागणाऱ्या विविध वस्तू व राज्यातील व्हेज, नॉनव्हेज, साऊथ इंडियन व चायनीज प्रसिध्द खाद्य पदार्थाची मेजवाणी मिळणार आहे. यामध्ये नायगाव तालुक्याची घोंगडी, कंधारची बिबा गोंडबी व बिबा तेल, अर्धापूरची केळी चिप्स व हळद, माहूरचे बंजारा ड्रेस, नांदेडचा सोया पनीर, कोल्हापूरची चप्पल, सोलापूरची शेंगदाना चटणी, बाजरीची कडक भाकरी, धर्माबादची लाल मिरची, लोह्याची बाजरीची खारोडी, हदगावचे व्हेज ऑम्लेट, अमरावतीची मांड्यावरची मडक्यावर केलेली पुरण-पोळी, बाजरीची भाकरी व बेसन आणि ठेचा, पुरुषांचे ड्रेस, साड्या, लहान लेकरांची खेळणी, शोभेच्या वस्तु, घर सजावटीच्या वस्तू, बांबूच्या वस्तू, गंगाखेडची प्रसिध्द कलम, किनवटची धावंडा डिंक, चारोळी आणि मध, भोकरची आवळा कॅन्डी, सौदय प्रसाधने, बेन्टेक्स ज्वेलरी, नागपूरची संत्रा बर्फी, कोकणातील काजू व मँगो पल्प, रुचकर पापड, कुरडई, अहिल्यानगरचा चांदवडचा प्रसिध्द पेढा, विविध प्रकारचे लोणचे, गावरान झनझनीत मसाले, शेवया, नाचणीचे पदार्थ, सर्व प्रकारच्या जात्यावर केलेल्या डाळी , गावरान तूप, मुखेडचे सेंद्रीय लाकडी घाण्यावरचे करडई तेल, हस्तनिर्मित वस्तू, जयपुरी टोपी, नाशिकच्या मणुका, सावंतवाडीच्या लाकडी वस्तू, वाणाचे वस्तू, भांडी इत्यादी वस्तूंची विक्री होणार आहे.

तसेच या प्रदर्शनात दररोज संध्याकाळी 8 ते 10 या वेळेत सांस्कृतिक कार्यक्रमाची मेजवाणीचे आयोजन केले आहे. तरी नांदेड शहरातील व ग्रामीण भागातील नागरिकांनी याचा लाभ घ्यावा, असे आवाहन जिल्हा परिषदेच्या जिल्हा ग्रामीण विकास यंत्रणेचे उमेद जिल्हा अभियान व्यवस्थापन कक्ष यांनी केले आहे.

00000

#सरसभव्यविक्रीप्रदर्शन

वृत्त क्रमांक 4

सन 2025 मधील जयंती व राष्ट्रीय दिन साजरे

करण्याबाबत जिल्हा प्रशासनाचे आवाहन 

नांदेड दि. 1 जानेवारी :-  राष्ट्र पुरुष व थोर व्यक्ती यांची जयंती व राष्ट्रीय दिन साजरे करण्याबाबत जिल्हा प्रशासनाच्यावतीने निर्देशित करण्यात आले आहे. जिल्ह्यातील संबंधित शासकीय कार्यालयांनी या शासन निर्देशांचे अवलोकन करावे, असे आवाहन करण्यात आले आहे. 

सन 2025 मध्ये राष्ट्र पुरुष / थोर व्यक्ती यांची जयंती व राष्ट्रीय दिन साजरे करण्याबाबतचे सामान्य प्रशासन विभागाचे परिपत्रक दिनांक 27 डिसेंबर 2024 अन्वये दिलेल्या सुचनेनुसार सन 2025 मध्ये राष्ट्र पुरुष / थोर व्यक्ती यांची जयंती व राष्ट्रीय दिन साजरे करण्याबाबत सूचना देण्यात आलेल्या आहेत. तसेच परिपत्रकातील परिशिष्टात दर्शविलेले कार्यक्रम सर्व शनिवार, रविवार व सार्वजनिक सुट्टीच्या दिवशी येत असतील आणि यासंदर्भात केंद्र शासनाने कार्यक्रमात बदल सुचविल्यास त्याप्रमाणे साजरे करण्यात यावे. अन्यथा ते कार्यक्रम त्याच दिवशी साजरे करण्यात यावेत. शासन परिपत्रक महाराष्ट्र शासनाच्या www.maharashtra.gov.in या संकेतस्थळावर उपलब्ध करण्यात आले आहे. जिल्ह्यातील सर्व विभाग प्रमुखांनी याची नोंद घ्यावी, असे निवासी उपजिल्हाधिकारी नांदेड यांनी निर्देशीत केले आहे.

000000

 वृत्त क्रमांक 3

जिल्ह्यात जमावबंदी, शस्त्रबंदी आदेश लागू

नांदेड दि. 1 जानेवारी :- नांदेड जिल्ह्यात 2 जानेवारी 2025 चे सकाळी 6 वाजेपासून ते 16 जानेवारी 2025 च्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी महाराष्ट्र पोलीस अधिनियम 1951 चे कलम 37 (1) व (3) अन्वये जिल्ह्यात 2 जानेवारीचे सकाळी 6 वाजेपासून ते 16 जानेवारी 2025 रोजी मध्यरात्रीपर्यंत शस्त्रबंदी व जमावबंदी आदेश लागू राहील. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000

 वृत्त क्रमांक 2

जिल्हाधिकारी कार्यालयात मंगळवारी पेन्शन अदालत

नांदेड दि. 1 जानेवारी :- नांदेड जिल्ह्यातील महसूल विभागातून सेवानिवृत्त झालेले अधिकारी आणि कर्मचाऱ्यांच्या अडचणीचे निवारण करण्यासाठी जानेवारी महिन्याच्या मंगळवार 7 जानेवारी 2025 रोजी सकाळी 11 ते 1.30 वा. जिल्हाधिकारी कार्यालय येथे पेन्शन अदालतीचे आयोजन करण्यात आले आहे. सेवानिवृत्त झालेले अधिकारी कर्मचारी यांनी अडचणी निवारण्यासाठी पेन्शन अदालतीच्या दिवशी उपस्थितीत राहून तक्रारीचे निवेदन द्यावेत, असे आवाहन जिल्हाधिकारी नांदेड यांनी केले आहे.

0000

 वृत्त क्रमांक 1

जेईई, नीट, एमएचटी-सीईटीच्या प्रशिक्षणासाठी पात्र विद्यार्थ्यांना टँब व सिमकार्डचे वाटप

                                                                                                                                                                          नांदेड, दि. 1 जानेवारी :-  महात्मा ज्योतीबा फुले संशाधन व प्रशिक्षण संस्था, (महाज्योती ) नागपुर यांच्याकडून प्राप्त झालेले 154 टॅबचे वितरण जेईई/नीट/एमएचटी-सीईटीचे प्रशिक्षण घेणाऱ्या विमुक्त जाती भटक्या जमाती, इतर मागासवर्ग व विशेष मागास प्रवर्गातील विद्यार्थ्याना जिल्हाधिकारी अभिजित राऊत व सहाय्यक संचालक शिवानंद मिनगीरे  यांचे हस्ते नुकतेच करण्यात आले.

विद्यार्थ्यांनी या टॅबचा उपयोग चांगल्या प्रकारे करावा. तसेच जेईई/नीट/एमएचटी-सीईटीचे प्रशिक्षण घेणाऱ्या विमुक्त जाती भटक्या जमाती, इतर मागासवर्ग व विशेष मागास प्रवर्गातील जास्तीत जास्त विद्यार्थ्यानी टॅबमार्फत प्रशिक्षण घ्यावे. यासाठी महाज्योती मार्फत सिमकार्डही उपलब्ध करुन दिले आहेत असे जिल्हाधिकारी अभिजीत राऊत यांनी यावेळी सांगितले.

इयत्ता 11 वी मध्ये जेईई/नीट/एमएचटी-सीईटीची तयारी करणारे विद्यार्थ्यानी ऑनलाईन महाज्योती यावेबसाईटवर अर्ज नोंदणी करावा. त्यामध्ये इयत्ता १० वीचे गुणपत्रक व इ. आवश्यक ती कागदपत्रे अपलोड करावीत, ज्यास्तीत जास्त विद्यार्थी टॅबसाठी पात्र ठरतील असे आवाहन त्यांनी केले.

इतर मागास बहुजन कल्याणचे सहायक संचालक शिवानंद मिनगीरे यांनी जेईई/नीट/एमएचटी-सीईटीचे प्रशिक्षण घेणाऱ्या विमुक्त जाती, भटक्या जमाती, इतर मागासवर्ग व विशेष मागास प्रवर्गातील विद्यार्थ्यानी टॅबचा सदुपयोग चांगल्या प्रकारे घेऊन त्याद्वारे घेण्यात येणारे प्रशिक्षणाचा फायदा घेऊन वैद्यकीय/अभियांत्रिकी प्रवेशासाठी समाज घटकातील विद्यार्थी प्रवेशास पात्र ठरतील अशी सदिच्छा व्यक्त केली.

विमुक्त जाती भटक्या जमाती इतर मागासवर्ग व विशेष मागसप्रवर्ग याघटकातील विद्यार्थ्याना स्पर्धेच्या युगामध्ये टिकूण राहणे, इतर प्रवर्गातील विद्यार्थ्याशी स्पर्धा करणे तसेच आवश्यक ते कौशल्य व गुणवत्ताधारण करणे, विद्यार्थी / विद्यार्थीनिना आर्थिक, सामाजिक व शैक्षणिक दृष्टया विविध क्षेत्रात स्पर्धेला तोंड देता यावे आणि शैक्षणिकद्ष्टया उन्नती होणे आवश्यक असल्याचे मत सहाय्यक संचालक शिवानंद मिनगिरे यांनी व्यक्त केले. टॅब वितरण प्रसंगी, विद्यार्थी, पालक कार्यालयातील कर्मचारी वर्ग बहुसंख्येने उपस्थित होते.

00000

 #नववर्ष२०२५ #newyear2025