वृत्त क्र. 891

सुशिक्षित बेरोजगार युवक-युवतींसाठी

शुक्रवारी नायगाव, बिलोली, देगलूर येथे उद्योग मेळाव्याचे आयोजन

नांदेड दि. २ ऑक्टोबर : मुख्यमंत्री रोजगार निर्मिती कार्यक्रमाद्वारे स्वयंरोजगार निर्मितीला चालना देण्यासाठी  शुक्रवार ४ ऑक्टोबर 2024  रोजी पंचायत समिती सभागृह नायगाव व पंचायत समिती सभागृह बिलोली,पंचायत समिती सभागृह देगलूर येथे सकाळी 10 वा. उद्योग मेळाव्याचे आयोजन करण्यात आले आहे. या तालुक्यातील पात्र व होतकरु सुशिक्षित बेरोजगार युवक-युवतींनी मेळाव्यास उपस्थित रहावे, असे आवाहन जिल्हा उद्योग केंद्राचे महाव्यवस्थापक अमोल इंगळे यांनी केले आहे.

सुशिक्षित बेरोजगार युवक-युवतींची वाढती संख्या व उद्योग व्यवसाय क्षेत्रात उपलब्ध होत असलेल्या स्वयंरोजगार व रोजगाराच्या विविध संधी विचारात घेऊन उद्योजकतेला चालना देणारी व सर्जनशिलतेला कालानुरुप वाव देणारा सर्वसमावेश कार्यक्रम शासनाने ऑगस्ट-2019 पासून मुख्यमंत्री रोजगार निर्मिती कार्यक्रम सुरु केलेला आहे. सन 2024-25 नांदेड जिल्हयास एकुण 1000 युवक युवतींना वित्तीय संस्थेच्या माध्यमातून लाभ देण्याचे महाराष्ट्र शासनाचे लक्षांक आहे.

या योजनेतून मोठया प्रमाणात स्वत:चा उद्योग उभारणी करुन त्यातंर्गत स्वयंरोजगार निर्मिती होणार असल्याने मुदतीत लक्षांक पूर्ती होण्यासाठी प्राधान्य देण्यात येत आहे. त्याचाच एक भाग म्हणून या योजनेतर्गंत शुक्रवार ४ ऑक्टोबर 2024 रोजी नायगाव, बिलोली, देगलूर या तीन तालुक्यामध्ये मेळावे आयोजित केले आहेत. या मेळाव्यात कर्ज मंजुरीचे प्रस्ताव, अर्ज अपलोड करणे, मंजुरीच्या प्रक्रियेबाबत जिल्हा उद्योग केंद्र कार्यालयाचे अधिकारी तसेच बँकेचे अधिकारी मार्गदर्शन करणार आहेत. या योजनेचा  लाभ घेण्यासाठी सुशिक्षित बेरोजगार युवक-युवतींनी अनुषंगिक व आवश्यक त्या कागदपत्रांसह या मेळाव्यास उपस्थित रहावे. तसेच कर्ज प्रस्ताव प्रलंबित असलेल्या अर्जदारांनीही आवश्यक त्या कागदपत्रासह/कारणासह पूर्ततेसाठी उपस्थित रहावे, असे कळविले आहे.

मेळाव्यास येताना आधार कार्ड, पॅनकार्ड, रहिवासी दाखला,  शाळा सोडल्याचे प्रमाणपत्र, दोन फोटो, व्यवसायाचा प्रकल्प अहवाल, जातीचा दाखला, व्यावसायानुंषिक इतर परवाने  आवश्यक कागदपत्रे सोबत आणावीत.  ही योजना ऑनलाईन पध्दतीने राबविण्यात येत असून अधिक माहितीसाठी सदर योजनेचे https://maha-cmegp.gov.in या संकेतस्थळ आहे. तालुक्यातील व परिसरातील पात्र-होतकरु सुशिक्षित बेरोजगार युवक-युवतींनी या मेळाव्यास उपस्थित राहून या योजनेचा लाभ घ्यावा, असेही आवाहन जिल्हा उद्योग केंद्राचे महाव्यवस्थापक अमोल इंगळे यांनी केले आहे.

00000

 वृत्त क्र. 890   

नांदेड जिल्ह्यात ड्रोन कॅमेऱ्यासह

मानवनिर्मित वस्तू उडविण्यास प्रतिबंध

 

नांदेड दि. 2 ऑक्टोंबर :- नांदेड जिल्‍ह्यात व शहरात तसेच श्री गुरुगोविंदसिंहजी विमानतळ परिसर, गुरुद्वारा परिसरात ड्रोन कॅमेरा, ड्रोन सदृश्‍य वस्‍तु  व हवेत उडविल्‍या जाणाऱ्या मानवनिर्मित वस्‍तू उडविण्‍यावर 4 व 5 ऑक्टोबर 2024 रोजी बंदी घालण्यात आली आहे. याबाबत भारतीय नागरिक सुरक्षा संहिता 2023 चे  कलम 163 (1) अन्‍वये प्राप्‍त अधिकाराचा वापर करून जिल्हादंडाधिकारी यांनी हे आदेश निर्गमीत केले आहेत.

 

हा आदेश 4 ऑक्टोबरचे 00.00 ते 5 ऑक्टोबर 2024 रोजी मध्यरात्री पर्यंतच्या कालावधीत नांदेड जिल्‍ह्यात व शहरात तसेच श्री गुरुगोविंदसिंहजी विमानतळ परिसर, गुरुद्वारा परिसरात  भारतीय नागरिक सुरक्षा संहिता 2023 चे  कलम 163 (1) नुसार ड्रोन कॅमेरा, ड्रोन सदृश्‍य वस्‍तु  व हवेत उडविल्‍या जाणाऱ्या मानवनिर्मित वस्‍तू उडविण्‍याकरीता या आदेशाद्वारे प्रतिबंध करण्‍यात आले आहे. संबंधीतावर नोटीस बजावून त्‍यांचे म्‍हणने ऐकूण घेण्‍यास पुरेसा अवधी नसल्‍याने आणीबाणीच्‍या प्रसंगी भारतीय नागरिक सुरक्षा संहिता 2023 चे  कलम 163 (2) नुसार एकतर्फी आदेश निर्गमीत करण्‍यात आले आहेत.

00000