वृत्त क्रमांक

तात्पुरत्या फटाका परवान्यांसाठी अर्ज स्वीकारण्यास 27 ऑक्टोबरपर्यंत मुदतवाढ

नांदेड महानगरपालिका हद्दीसह जिल्ह्यातील संबंधित उपविभागांतर्गत अर्ज स्वीकारले जाणार

  

नांदेड(जिमाका), दि. 19 : दीपावली उत्सवाच्या पार्श्वभूमीवर तात्पुरत्या फटाका स्टॉलसाठी परवाना घेऊ इच्छिणाऱ्या अर्जदारांना अर्ज सादर करण्यासाठी दि. 27 ऑक्टोबर 2026 पर्यंत मुदतवाढ देण्यात आली आहे. यापूर्वी जाहीर करण्यात आलेल्या अर्ज विक्री व स्वीकृतीच्या कालावधीत अंशतः बदल करण्यात आला असून, उर्वरित अटी व शर्ती कायम राहणार आहेत, अशी माहिती अपर जिल्हादंडाधिकारी, नांदेड यांनी दिली आहे.

वर्ष 2026 मध्ये दीपावली उत्सव दि. 5 नोव्हेंबर ते 11 नोव्हेंबर 2026 या कालावधीत साजरा होत आहे. त्यानुषंगाने नांदेड महानगरपालिका हद्दीतील तात्पुरत्या फटाका स्टॉलसाठी सार्वजनिक बांधकाम विभागाच्या ताब्यातील अधिग्रहीत जमीन, प्रचलित नाव मोदी मैदान, मामा चौकाजवळ, असर्जन, नांदेड येथे परवानगी देण्यात येणार आहे.

सेतू समिती व उपविभागीय कार्यालयामार्फत अर्ज स्वीकारणार

नांदेड महानगरपालिका हद्दीतील तात्पुरत्या फटाका परवान्यासाठीचे अर्ज सेतू समिती, जिल्हाधिकारी कार्यालय, नांदेड यांच्यामार्फत, तर जिल्ह्यातील इतर भागांसाठी संबंधित उपविभागीय कार्यालयामार्फत त्यांच्या कार्यक्षेत्रातील तात्पुरत्या फटाका स्टॉलसाठी अर्ज विक्री व स्वीकृती करण्यात येणार आहे.

विस्फोटक अधिनियम, 2008 मधील तरतुदीनुसार तात्पुरत्या फटाका परवान्यासाठी अर्ज सादर करण्याची मुदत दि. 27 ऑक्टोबर 2026 पर्यंत वाढविण्यात आली आहे.

विनापरवाना फटाका विक्री केल्यास फौजदारी कारवाई

यापूर्वी प्रसिद्ध करण्यात आलेल्या जाहीर प्रगटनातील इतर सर्व अटी व शर्ती कायम राहतील. तसेच, विनापरवाना फटाक्यांची विक्री करताना कोणी आढळून आल्यास संबंधिताविरुद्ध फौजदारी कार्यवाही करण्यात येईल, असा इशारा प्रशासनाने दिला आहे.

तात्पुरत्या फटाका स्टॉलसाठी परवाना घेऊ इच्छिणाऱ्या संबंधितांनी विहित मुदतीत अर्ज सादर करावेत, असे आवाहन करण्यात आले आहे.

******

 वृत्त क्रमांक

दुष्काळी परिस्थितीत विद्यार्थ्यांच्या शुल्कासाठी सक्ती करू नका

• शेतकरी व शेतमजूर कुटुंबांतील विद्यार्थ्यांना सहकार्य करण्याचे जिल्हा प्रशासनाचे आवाहन

नांदेड (जिमाका), दि. 19 : जिल्ह्यातील दुष्काळसदृश परिस्थितीमुळे शेतकरी व शेतमजूर कुटुंबांना आर्थिक अडचणींचा सामना करावा लागत आहे. या पार्श्वभूमीवर विद्यार्थ्यांचे शिक्षण अबाधित राहावे आणि आर्थिक अडचणींमुळे त्यांचे शैक्षणिक नुकसान होऊ नये, यासाठी जिल्ह्यातील सर्व खासगी शिकवणी वर्ग, स्पर्धा परीक्षा मार्गदर्शन केंद्रे आणि शैक्षणिक संस्थांनी सामाजिक बांधिलकी जपत सहकार्य करावे. शेतकरी व शेतमजूर कुटुंबांतील विद्यार्थ्यांकडून शुल्क वसुलीसाठी सक्ती करू नये, असे आवाहन जिल्हा प्रशासनाच्या वतीने करण्यात आले आहे.

दुष्काळी परिस्थितीमुळे आर्थिक अडचणीत असलेल्या कुटुंबांतील विद्यार्थ्यांना शुल्क भरण्यासाठी वारंवार तगादा लावू नये. आर्थिक परिस्थितीमुळे विद्यार्थ्यांना मानसिक त्रास होईल किंवा त्यांच्या शिक्षणात अडथळे निर्माण होतील, असे वर्तन टाळावे. संबंधित विद्यार्थ्यांच्या पालकांची आर्थिक परिस्थिती लक्षात घेऊन शुल्क भरण्यासाठी मुदतवाढ देणे, टप्प्याटप्प्याने शुल्क स्वीकारणे तसेच शक्य असेल तेथे शुल्कात सवलत देणे, अशा पर्यायांचा विचार करावा.

संकटाच्या काळात विद्यार्थ्यांचे शिक्षण सुरू राहणे ही सर्वांची सामूहिक जबाबदारी आहे. त्यामुळे खासगी शिकवणी वर्ग, कोचिंग क्लासेस आणि शैक्षणिक संस्थांच्या संचालकांनी सहानुभूतीपूर्वक भूमिका घेऊन आर्थिक अडचणीत असलेल्या शेतकरी व शेतमजूर कुटुंबांतील विद्यार्थ्यांना दिलासा द्यावा. आर्थिक परिस्थितीमुळे कोणत्याही विद्यार्थ्याचे शैक्षणिक नुकसान होणार नाही, याची दक्षता घ्यावी, असे आवाहन जिल्हा प्रशासनाने केले आहे.

***

वृत्त क्रमांक

पदवीधर मतदारसंघ निवडणुकीच्या पार्श्वभूमीवर नांदेड जिल्ह्यात मद्यविक्रीची दुकाने बंद

• 21 ऑक्टोबर रोजी सायंकाळी 4 वाजेपासून 23 ऑक्टोबरपर्यंत मद्यविक्री बंद

नांदेड (जिमाका), दि. 19: महाराष्ट्र विधानपरिषद औरंगाबाद विभाग पदवीधर मतदारसंघ निवडणूक-2026 अंतर्गत नांदेड जिल्ह्यात मतदान प्रक्रिया सुरळीत, शांततापूर्ण व निर्भय वातावरणात पार पाडण्यासाठी जिल्हाधिकारी तथा जिल्हा निवडणूक अधिकारी राहुल कर्डिले यांनी जिल्ह्यातील मद्यविक्रीची दुकाने बंद ठेवण्याचे आदेश दिले आहेत.

भारत निवडणूक आयोगाने महाराष्ट्र विधानपरिषद औरंगाबाद विभाग पदवीधर मतदारसंघ निवडणूक-2026 चा कार्यक्रम घोषित केला असून, दि. 23 ऑक्टोबर 2026 रोजी मतदान होणार आहे. निवडणूक प्रक्रिया पारदर्शकपणे पार पाडणे, आदर्श आचारसंहितेची प्रभावी अंमलबजावणी करणे, खर्चावर नियंत्रण ठेवणे, मतदारांवर प्रभाव टाकणाऱ्या वस्तूंच्या वाटपावर अंकुश ठेवणे तसेच सार्वजनिक शांतता अबाधित राखणे या उद्देशाने हा आदेश जारी करण्यात आला आहे.

महाराष्ट्र दारूबंदी कायदा, 1949 मधील कलम 142(1) तसेच महाराष्ट्र विधानपरिषद निवडणुकीसंदर्भातील निवडणूक आयोगाच्या निर्देशांनुसार नांदेड जिल्ह्यातील मद्यविक्रीची दुकाने दि. 21 ऑक्टोबर रोजी सायंकाळी 4 वाजेपासून दि. 23 ऑक्टोबर, 2026 या कालावधीत मतदान संपण्यापूर्वी 48 तास अगोदर, मतदानाच्या पूर्वीचा दिवस व मतदानाच्या दिवशी बंद ठेवण्यात येणार आहेत.

वरील कालावधीत नांदेड जिल्ह्यातील संबंधित मद्यविक्रीची दुकाने बंद ठेवणे बंधनकारक राहील. या आदेशाचे उल्लंघन करून मद्यविक्री सुरू असल्याचे आढळून आल्यास संबंधित अनुज्ञप्ती रद्द करण्याची कार्यवाही करण्यात येईल, याची सर्व संबंधितांनी नोंद घ्यावी, असे आदेशात नमूद करण्यात आले आहे. 

जिल्ह्यातील निवडणूक प्रक्रिया शांततापूर्ण व निर्भय वातावरणात पार पाडण्यासाठी नागरिकांनी तसेच मद्यविक्री अनुज्ञप्तीधारकांनी प्रशासनास सहकार्य करावे, असे आवाहन करण्यात आले आहे.

**

वृत्त क्रमांक

गुरुवार पासून करता येणार घरबसल्या खतांची खरेदी

केंद्र सरकारच्या फ्रेमवर्क फॉर फर्टिलायझर सेल अॅपमुळे खत खरेदीचा मार्ग सुकर

• खत खरेदीची डिजिटल सुविधा

• ‘एफएफएफएस’ अॅपद्वारे घरबसल्या खतांचा साठा व उपलब्धतेची माहिती; शेतकऱ्यांच्या रांगा आणि जादा दराने विक्रीला आळा

नांदेड (जिमाका), दि. 19 : शेतकऱ्यांना खत खरेदी सुलभ व्हावी, तसेच खतांची उपलब्धता, साठा आणि विक्री प्रक्रियेत पारदर्शकता यावी, यासाठी केंद्र सरकारने फ्रेमवर्क फॉर फर्टिलायझर सेल (एफएफएफएस) ही डिजिटल प्रणाली विकसित केली आहे. महाराष्ट्रात गुरुवार, दि. 22 ऑक्टोबरपासून या प्रणालीची अंमलबजावणी करण्यात येणार असून, शेतकऱ्यांना मोबाईलद्वारे आपल्या परिसरातील खतांची उपलब्धता आणि साठ्याची माहिती मिळविणे शक्य होणार आहे. त्यामुळे खत खरेदीसाठी दुकानांसमोर रांगा लावण्याची गरज कमी होणार असल्याची माहिती जिल्हा अधीक्षक कृषी अधिकारी द. रा. कळसाईत यांनी दिली.

मोबाईलवर मिळणार खतांच्या उपलब्धतेची माहिती

शेतकऱ्यांना आपल्या मोबाईलमधील प्ले स्टोअरवरून हे अॅप डाउनलोड करून वापरता येणार आहे. या अॅपद्वारे परिसरातील कोणत्या कृषी सेवा केंद्रात कोणते खत उपलब्ध आहे आणि त्याचा किती साठा आहे, याची माहिती मिळेल. खत खरेदीची प्रक्रिया डिजिटल पद्धतीने सुलभ करण्यास या प्रणालीमुळे मदत होणार आहे. तसेच प्रणालीतील नोंदीनुसार खत खरेदीसाठी आरक्षित केलेले खत संबंधित दुकानदाराने उपलब्ध करून देणे बंधनकारक राहणार असल्याचे त्यांनी सांगितले.

जादा दराने विक्री आणि खतांसोबत इतर निविष्ठांची सक्ती रोखण्यास मदत

या डिजिटल प्रणालीमुळे खत विक्री प्रक्रियेवर नियंत्रण ठेवणे शक्य होणार आहे. खतांची छापील किमतीपेक्षा जास्त दराने विक्री करणे तसेच अनुदानित खतांसोबत इतर कृषी निविष्ठांची खरेदी करण्याची सक्ती करणे, अशा प्रकारांना आळा घालण्यास मदत होणार आहे. खत विक्रीतील पारदर्शकता वाढविणे आणि शेतकऱ्यांची होणारी गैरसोय दूर करणे हा या प्रणालीचा प्रमुख उद्देश आहे. यापूर्वी नाशिक जिल्ह्यात या प्रणालीची प्रायोगिक तत्त्वावर अंमलबजावणी करण्यात आली होती. आता संपूर्ण राज्यात ही प्रणाली लागू करण्यात येणार आहे.

गावपातळीवर प्रशिक्षण; तक्रारींच्या निवारणासाठी तालुकास्तरीय कक्ष

जिल्ह्यातील शेतकऱ्यांना या अॅपचा वापर करता यावा, यासाठी क्षेत्रीय सहाय्यक कृषी अधिकारी आणि संबंधित कृषी विभागाच्या अधिकाऱ्यांमार्फत गावपातळीवर प्रशिक्षण देण्यात येणार आहे. तसेच शेतकरी आणि कृषी सेवा केंद्र चालकांना येणाऱ्या अडचणींचे निराकरण करण्यासाठी तालुकास्तरावर व्यवस्था करण्यात येणार आहे. शेतकऱ्यांनी खत खरेदीसंदर्भात काही अडचण किंवा तक्रार असल्यास तालुका कृषी अधिकारी कार्यालयातील गुणवत्ता नियंत्रण विभागाचे कृषी अधिकारी तसेच पंचायत समितीतील कृषी अधिकाऱ्यांशी संपर्क साधावा, असे आवाहन जिल्हा अधीक्षक कृषी अधिकारी द. रा. कळसाईत यांनी केले आहे.

***

 वृत्त क्रमांक

पदवीधर मतदारसंघ निवडणुकीच्या पार्श्वभूमीवर नांदेड जिल्ह्यात मद्यविक्रीची दुकाने बंद

 

• 21 ऑक्टोबर रोजी सायंकाळी 4 वाजेपासून 23 ऑक्टोबरपर्यंत मद्यविक्री बंद

 

नांदेड (जिमाका), दि. 19: महाराष्ट्र विधानपरिषद औरंगाबाद विभाग पदवीधर मतदारसंघ निवडणूक-2026 अंतर्गत नांदेड जिल्ह्यात मतदान प्रक्रिया सुरळीत, शांततापूर्ण व निर्भय वातावरणात पार पाडण्यासाठी जिल्हाधिकारी तथा जिल्हा निवडणूक अधिकारी राहुल कर्डिले यांनी जिल्ह्यातील मद्यविक्रीची दुकाने बंद ठेवण्याचे आदेश दिले आहेत.

भारत निवडणूक आयोगाने महाराष्ट्र विधानपरिषद औरंगाबाद विभाग पदवीधर मतदारसंघ निवडणूक-2026 चा कार्यक्रम घोषित केला असून, दि. 23 ऑक्टोबर 2026 रोजी मतदान होणार आहे. निवडणूक प्रक्रिया पारदर्शकपणे पार पाडणे, आदर्श आचारसंहितेची प्रभावी अंमलबजावणी करणे, खर्चावर नियंत्रण ठेवणे, मतदारांवर प्रभाव टाकणाऱ्या वस्तूंच्या वाटपावर अंकुश ठेवणे तसेच सार्वजनिक शांतता अबाधित राखणे या उद्देशाने हा आदेश जारी करण्यात आला आहे.

महाराष्ट्र दारूबंदी कायदा, 1949 मधील कलम 142(1) तसेच महाराष्ट्र विधानपरिषद निवडणुकीसंदर्भातील निवडणूक आयोगाच्या निर्देशांनुसार नांदेड जिल्ह्यातील मद्यविक्रीची दुकाने दि. 21 ऑक्टोबर रोजी सायंकाळी 4 वाजेपासून दि. 23 ऑक्टोबर, 2026 या कालावधीत मतदान संपण्यापूर्वी 48 तास अगोदर, मतदानाच्या पूर्वीचा दिवस व मतदानाच्या दिवशी बंद ठेवण्यात येणार आहेत.

वरील कालावधीत नांदेड जिल्ह्यातील संबंधित मद्यविक्रीची दुकाने बंद ठेवणे बंधनकारक राहील. या आदेशाचे उल्लंघन करून मद्यविक्री सुरू असल्याचे आढळून आल्यास संबंधित अनुज्ञप्ती रद्द करण्याची कार्यवाही करण्यात येईल, याची सर्व संबंधितांनी नोंद घ्यावी, असे आदेशात नमूद करण्यात आले आहे.

जिल्ह्यातील निवडणूक प्रक्रिया शांततापूर्ण व निर्भय वातावरणात पार पाडण्यासाठी नागरिकांनी तसेच मद्यविक्री अनुज्ञप्तीधारकांनी प्रशासनास सहकार्य करावे, असे आवाहन करण्यात आले आहे.

******

 वृत्त क्रमांक

गुरुवारपासून करता येणार घरबसल्या खतांची खरेदी

केंद्र सरकारच्या फ्रेमवर्क फॉर फर्टिलायझर सेल अॅपमुळे खत खरेदीचा मार्ग सुकर

 

• खत खरेदीची डिजिटल सुविधा
• ‘एफएफएफएस’ अॅपद्वारे घरबसल्या खतांचा साठा व उपलब्धतेची माहिती; शेतकऱ्यांच्या रांगा आणि जादा दराने विक्रीला आळा

 

नांदेड (जिमाका), दि. 19 : शेतकऱ्यांना खत खरेदी सुलभ व्हावी, तसेच खतांची उपलब्धता, साठा आणि विक्री प्रक्रियेत पारदर्शकता यावी, यासाठी केंद्र सरकारने फ्रेमवर्क फॉर फर्टिलायझर सेल (एफएफएफएस) ही डिजिटल प्रणाली विकसित केली आहे. महाराष्ट्रात गुरुवार, दि. 22 ऑक्टोबरपासून या प्रणालीची अंमलबजावणी करण्यात येणार असून, शेतकऱ्यांना मोबाईलद्वारे आपल्या परिसरातील खतांची उपलब्धता आणि साठ्याची माहिती मिळविणे शक्य होणार आहे. त्यामुळे खत खरेदीसाठी दुकानांसमोर रांगा लावण्याची गरज कमी होणार असल्याची माहिती जिल्हा अधीक्षक कृषी अधिकारी द. रा. कळसाईत यांनी दिली.

 

मोबाईलवर मिळणार खतांच्या उपलब्धतेची माहिती

 

शेतकऱ्यांना आपल्या मोबाईलमधील प्ले स्टोअरवरून हे अॅप डाउनलोड करून वापरता येणार आहे. या अॅपद्वारे परिसरातील कोणत्या कृषी सेवा केंद्रात कोणते खत उपलब्ध आहे आणि त्याचा किती साठा आहे, याची माहिती मिळेल. खत खरेदीची प्रक्रिया डिजिटल पद्धतीने सुलभ करण्यास या प्रणालीमुळे मदत होणार आहे. तसेच प्रणालीतील नोंदीनुसार खत खरेदीसाठी आरक्षित केलेले खत संबंधित दुकानदाराने उपलब्ध करून देणे बंधनकारक राहणार असल्याचे त्यांनी सांगितले.

 

जादा दराने विक्री आणि खतांसोबत इतर निविष्ठांची सक्ती रोखण्यास मदत

 

या डिजिटल प्रणालीमुळे खत विक्री प्रक्रियेवर नियंत्रण ठेवणे शक्य होणार आहे. खतांची छापील किमतीपेक्षा जास्त दराने विक्री करणे तसेच अनुदानित खतांसोबत इतर कृषी निविष्ठांची खरेदी करण्याची सक्ती करणे, अशा प्रकारांना आळा घालण्यास मदत होणार आहे. खत विक्रीतील पारदर्शकता वाढविणे आणि शेतकऱ्यांची होणारी गैरसोय दूर करणे हा या प्रणालीचा प्रमुख उद्देश आहे. यापूर्वी नाशिक जिल्ह्यात या प्रणालीची प्रायोगिक तत्त्वावर अंमलबजावणी करण्यात आली होती. आता संपूर्ण राज्यात ही प्रणाली लागू करण्यात येणार आहे.

 

गावपातळीवर प्रशिक्षण; तक्रारींच्या निवारणासाठी तालुकास्तरीय कक्ष

 

जिल्ह्यातील शेतकऱ्यांना या अॅपचा वापर करता यावा, यासाठी क्षेत्रीय सहाय्यक कृषी अधिकारी आणि संबंधित कृषी विभागाच्या अधिकाऱ्यांमार्फत गावपातळीवर प्रशिक्षण देण्यात येणार आहे. तसेच शेतकरी आणि कृषी सेवा केंद्र चालकांना येणाऱ्या अडचणींचे निराकरण करण्यासाठी तालुकास्तरावर व्यवस्था करण्यात येणार आहे. शेतकऱ्यांनी खत खरेदीसंदर्भात काही अडचण किंवा तक्रार असल्यास तालुका कृषी अधिकारी कार्यालयातील गुणवत्ता नियंत्रण विभागाचे कृषी अधिकारी तसेच पंचायत समितीतील कृषी अधिकाऱ्यांशी संपर्क साधावा, असे आवाहन जिल्हा अधीक्षक कृषी अधिकारी द. रा. कळसाईत यांनी केले आहे.

*******

वृत्त क्रमांक

विधान परिषद पदवीधर मतदारसंघ निवडणुकीत असे करा मतदान !

• शुक्रवारी 23 ऑक्टोबरला होणार मतदान

• प्रथम पसंतीच्या उमेदवारासमोर ‘1’ हा अंक लिहिणे अनिवार्य

• मत नोंदविताना जांभळ्या स्केच पेनचाच वापर करा

नांदेड (जिमाका), दि. 19 : भारत निवडणूक आयोगाने 22 सप्टेंबर 2026 रोजी महाराष्ट्र विधान परिषदेच्या 05-औरंगाबाद विभाग पदवीधर मतदारसंघाच्या द्विवार्षिक निवडणुकीचा कार्यक्रम जाहीर केला आहे. या कार्यक्रमानुसार 23 ऑक्टोबर 2026 रोजी मतदान होणार आहे.

या निवडणुकीत मतपत्रिकेद्वारे पसंतीक्रमानुसार मतदान केले जाणार आहे. मतदानासाठी आयोगाकडून उपलब्ध करून देण्यात आलेल्या जांभळ्या रंगाच्या स्केच पेनचाच वापर करणे आवश्यक आहे. मतदारांनी मतदानाची पद्धत समजून घेऊन मतदान करावे. 

मतदानाची पद्धत व महत्त्वाच्या सूचना

मतपत्रिकेसोबत पुरविण्यात आलेल्या जांभळ्या रंगाच्या स्केच पेननेच मत नोंदवावे. अन्य पेन, पेन्सिल किंवा बॉलपेन वापरू नये.

प्रथम पसंतीच्या उमेदवाराच्या नावासमोरील ‘पसंतीक्रम’ या स्तंभात ‘1’ हा अंक लिहावा. हा अंक केवळ एका उमेदवारासमोरच लिहावा.

उमेदवारांची संख्या कितीही असली, तरी केवळ एका उमेदवाराच्या नावासमोरच ‘1’ हा अंक लिहावा.

इतर उमेदवारांना पसंती द्यायची असल्यास त्यांच्या नावासमोर अनुक्रमे ‘2’, ‘3’, ‘4’ इत्यादी अंक लिहिता येतील. इतर पसंतीक्रम नोंदविणे ऐच्छिक आहे. निवडणूक लढविणाऱ्या उमेदवारांच्या एकूण संख्येइतके पसंतीक्रम नोंदविता येतात.

प्रत्येक उमेदवाराच्या नावासमोर एकच पसंतीक्रम लिहावा. एकच पसंतीक्रम एकापेक्षा अधिक उमेदवारांसाठी वापरू नये. पसंतीक्रम शब्दांत (एक, दोन, तीन इत्यादी) न लिहिता मान्यताप्राप्त अंकांमध्ये दर्शवावा.

पसंतीक्रम दर्शविण्यासाठी आंतरराष्ट्रीय स्वरूपातील भारतीय अंक, रोमन अंक किंवा भारतीय संविधानाच्या आठव्या अनुसूचीमध्ये मान्यता प्राप्त असलेल्या कोणत्याही भारतीय भाषेतील अंक वापरता येतात.

मतपत्रिकेवर स्वाक्षरी, आद्याक्षरे, स्वतःचे नाव किंवा इतर कोणतेही शब्द लिहू नयेत. अंगठ्याचा ठसाही उमटवू नये.

पसंती दर्शविण्यासाठी ‘टिक’ (√) किंवा ‘क्रॉस’ (X) अशी खूण करू नये. अशी खूण असलेली मतपत्रिका अवैध ठरते.

मतपत्रिका वैध ठरण्यासाठी किमान एका उमेदवाराच्या नावासमोर ‘1’ हा अंक लिहून प्रथम पसंती नोंदविणे आवश्यक आहे. त्यामुळे मतदान करण्यापूर्वी मतदारांनी वरील सूचनांची नोंद घ्यावी व योग्य पद्धतीने मतदान करावे, असे आवाहन सहायक निवडणूक निर्णय अधिकारी तथा जिल्हाधिकारी राहुल कर्डिले यांनी केले आहे. 

**

वृत्त क्रमांक

वृत्तपत्रात शेवटच्या दोन दिवसांत जाहिरात देताना पूर्वप्रमाणन आवश्यक

• २१ ऑक्टोबरपर्यंत मतदानाच्या दिवशीच्या जाहिरातींचा मसुदा सादर करावा

औरंगाबाद विभाग पदवीधर मतदारसंघाच्या निवडणुकीसाठी शुक्रवार, दि. २३ ऑक्टोबर २०२६ रोजी मतदान होणार आहे. या निवडणुकीच्या अनुषंगाने मतदानाच्या आदल्या दिवशी आणि मतदानाच्या दिवशी वृत्तपत्रांमध्ये जाहिराती प्रसिद्ध करू इच्छिणाऱ्या उमेदवारांनी जाहिरातीचे पूर्वप्रमाणन करून घेणे आवश्यक आहे. त्यासाठी जाहिरातीचा मसुदा माध्यम प्रमाणन व संनियंत्रण समितीकडे (एमसीएमसी) विहित मुदतीत सादर करावा, असे आवाहन प्रशासनातर्फे करण्यात आले आहे.

निवडणूक आचारसंहितेचा भंग टाळण्यासाठी तसेच मतदानाच्या आदल्या दिवशी व मतदानाच्या दिवशी वृत्तपत्रांमधून प्रसिद्ध होणाऱ्या जाहिरातींचे प्रकाशन नियमानुसार व्हावे, यासाठी निवडणूक आयोगाने स्पष्ट निर्देश दिले आहेत. त्यानुसार, गुरुवार, दि. २२ ऑक्टोबर रोजी जाहिरात प्रसिद्ध करावयाची असल्यास मंगळवार, दि. २० ऑक्टोबरपर्यंत, तर मतदानाच्या दिवशी म्हणजेच शुक्रवार, दि. २३ ऑक्टोबर रोजी जाहिरात प्रसिद्ध करावयाची असल्यास बुधवार, दि. २१ ऑक्टोबरपर्यंत जाहिरातीचा मसुदा पूर्वप्रमाणनासाठी जिल्हास्तरावर कार्यरत असल्यास एमसीएमसी समितीकडे सादर करावा. प्रमाणित जाहिरातीवर समितीने दिलेला जावक क्रमांक नमूद करणे बंधनकारक आहे. ही अट केवळ मुद्रित माध्यमांतील (प्रिंट मीडिया) जाहिरातींच्या प्रकाशनासाठी लागू आहे. इलेक्ट्रॉनिक माध्यमांवरील जाहिरातींच्या पूर्वप्रमाणनाची प्रक्रिया नियमानुसार स्वतंत्रपणे सुरू आहे.

त्यामुळे उमेदवार आणि त्यांच्या प्रतिनिधींनी विहित मुदतीत जाहिरातींचे पूर्वप्रमाणन करून घ्यावे. तसेच वृत्तपत्रांनी एमसीएमसीकडून प्रमाणित केलेल्या जाहिरातींचेच नियमानुसार प्रकाशन करावे, असे आवाहन प्रशासनातर्फे करण्यात आले आहे.

***

वृत्त क्रमांक

पदवीधर मतदान केंद्रांच्या 200 मीटर परिसरात निर्बंध-जिल्हाधिकारी राहुल कर्डिले यांचे आदेश

नांदेड(जिमाका), दि. 19: 05-औरंगाबाद विभाग पदवीधर मतदारसंघ निवडणूक-2026 अंतर्गत दि. 23 ऑक्टोबर 2026 रोजी होणाऱ्या मतदानाची प्रक्रिया शांततेत, निर्भय व निष्पक्ष वातावरणात पार पाडण्यासाठी जिल्हाधिकारी तथा जिल्हादंडाधिकारी राहुल कर्डिले यांनी भारतीय नागरिक सुरक्षा संहिता, 2023 मधील कलम 163 अन्वये मतदान केंद्रांच्या 200 मीटर परिसरात विविध निर्बंध लागू केले आहेत.

भारत निवडणूक आयोगाने दि. 22 सप्टेंबर 2026 रोजी 05-औरंगाबाद विभाग पदवीधर मतदारसंघ निवडणुकीची घोषणा केली असून, त्याच दिवसापासून आदर्श आचारसंहिता लागू झाली आहे. निवडणूक प्रक्रिया सुरळीतपणे पार पाडण्यासाठी कायदा व सुव्यवस्था अबाधित ठेवण्याच्या दृष्टीने हे निर्बंध लागू करण्यात आले आहेत.

मतदान केंद्राच्या 200 मीटर परिसरात विविध बाबींवर प्रतिबंध

दि. 23 ऑक्टोबर रोजी मतदान सुरू झाल्यापासून मतदान प्रक्रिया पूर्ण होईपर्यंत मतदान केंद्रापासून 200 मीटर परिसरात राजकीय पक्षांचे मंडप, दुकाने, फेरीवाले तसेच निवडणूक कामाव्यतिरिक्त खासगी वाहनांना प्रतिबंध राहील. संबंधित पक्षांच्या चिन्हांचे प्रदर्शन करण्यासही मनाई करण्यात आली आहे.

तसेच मोबाईल फोन, कॉर्डलेस फोन, पेजर, वायरलेस संच, ध्वनिक्षेपक आणि इतर इलेक्ट्रॉनिक उपकरणांचा वापर करण्यास प्रतिबंध राहणार आहे. निवडणूक कामाव्यतिरिक्त व्यक्तींना या परिसरात प्रवेश करता येणार नाही.

मतदान प्रक्रिया पूर्ण होईपर्यंत आदेश लागू

निवडणुकीच्या अनुषंगाने कायदा व सुव्यवस्था राखणे आवश्यक असल्याने सद्यस्थितीत सर्व संबंधितांना स्वतंत्र नोटीस देऊन त्यांचे म्हणणे ऐकून घेणे शक्य नसल्याचे नमूद करून भारतीय नागरिक सुरक्षा संहिता, 2023 मधील कलम 163(2) अन्वये हा एकतर्फी आदेश जारी करण्यात आला आहे.

हा आदेश नांदेड जिल्ह्याच्या हद्दीत दि. 23 ऑक्टोबर 2026 रोजी मतदान सुरू झाल्यापासून मतदान प्रक्रिया संपेपर्यंत लागू राहणार आहे. 

***

वृत्त क्रमांक

विधान परिषदेच्या पदवीधर मतदारसंघाच्या निवडणूकीत असे करा मतदान...!

शुक्रवारी २३ ऑक्टोबरला मतदान !

छत्रपती संभाजीनगर, दि. १९ : भारत निवडणूक आयोगाच्या निवडणूक कार्यक्रमानुसार महाराष्ट्र विधान परिषदेच्या औरंगाबाद विभाग पदवीधर मतदारसंघाच्या निवडणूकीसाठी येत्या शुक्रवारी २३ ऑक्टोबर रोजी मतदान प्रक्रिया राबविण्यात येणार आहे.  भारत निवडणूक आयोगामार्फत घेण्यात येणाऱ्या विधानपरिषदेच्या पदवीधर मतदारसंघाच्या निवडणुकीची मतदान पद्धती आणि आयोगामार्फत घेण्यात येणाऱ्या अन्य सार्वत्रिक निवडणुकातील मतदानाची पद्धती यात मूलभूत फरक आहे. विधानपरिषद निवडणूकीचे मतदान हे मतपत्रिकेवर उमेदवारांच्या नावापुढे पसंतीक्रम नोंदवून घेण्यात येते. जितके उमेदवार निवडणूक लढवित असतील अशा सर्वांपुढे पसंतीक्रम नोंदविता येतो. मतदानाच्या या वेगळ्या पद्धतीमुळे मतदारांनी आणि विशेषत: प्रथमच मतदान करणाऱ्यांनी ही पद्धत जाणून योग्यरितीने मतदान करावे, असे आवाहन निवडणूक निर्णय अधिकारी तथा विभागीय आयुक्त जी श्रीकांत यांनी केले आहे.

असे करा मतदान

मतदान करण्यासाठी निवडणूक अधिकाऱ्याने मतपत्रिकेबरोबर पुरवलेले जांभळ्या (व्हायलेट) रंगाचे स्केच पेनच वापरावे. अन्य कोणतेही पेन, पेन्सिल, बॉलपॉईन्ट पेन किंवा अन्य कोणतेही लेखनाचे साधन मतदानासाठी वापरु नये. असे केल्यास तुमची मतपत्रिका अवैध ठरेल. उमेदवाराच्या नावाच्या स्तंभासमोर पसंतीक्रम म्हणून असलेल्या स्तंभामध्ये तुम्ही प्रथम पसंतीचा उमेदवार म्हणून निवडलेल्या उमेदवाराच्या नावासमोर १  असा आकडा लिहून मतदान करा. १  हा आकडा फक्त एकाच उमेदवाराच्या नावासमोर द्यावा. 

निवडून द्यावयाच्या उमेदवारांची संख्या विचारात न घेता जेवढे उमेदवार निवडणूक लढवत असतील तेवढे पसंतीक्रम तुम्हाला देता येतील. उर्वरीत उमेदवारांबाबतचा तुमचा पुढील पसंतीक्रम, अशा उमेदवारांच्या नावासमोर असलेल्या पसंतीक्रम या स्तंभामध्ये तुमच्या पसंतीक्रमानुसार २, ३, ४ इत्यादी आकडे टाकून दर्शवा.

कोणत्याही उमेदवाराच्या नावासमोर आपण फक्त एकच आकडा टाकलेला आहे याची खात्री करून घ्यावी. तसेच तोच आकडा एकापेक्षा अधिक उमेदवारांच्या नावासमोर टाकलेला नाही याची देखील खात्री करुन घ्यावी. पसंतीक्रम फक्त १, २, ३ इत्यादी आकड्यांमध्येच दर्शवावा. एक, दोन, तीन इत्यादी शब्दांमध्ये दर्शवू नये. पसंतीक्रमाचे आकडे भारतीय अंकाच्या 1, 2, 3 इत्यादींसारख्या आंतरराष्ट्रीय रुपात किंवा I, II, III इत्यादींसारख्या रोमन रुपात किंवा १, २, ३ अशा देवनागरी रुपात किंवा संविधानाच्या आठव्या अनुसूचीमधील मान्यता दिलेल्या कोणत्याही एका भारतीय भाषेमध्ये वापरण्यात येणाऱ्या रुपामध्ये चिन्हांकित करता येतील.

मतपत्रिकेवर मतदाराने आपले नाव, आद्याक्षरे किंवा अन्य शब्द लिहू नयेत किंवा स्वाक्षरी करु नये. तसेच आपल्या अंगठ्याचा ठसा देखील उमटवू नये. असे केल्यास आपली मतपत्रिका अवैध ठरेल. 

पसंतीक्रम दर्शविण्यासाठी तुमच्या निवडीच्या उमेदवाराच्या नावासमोर √ किंवा X अशी खूण करणे टाळावे. अशा मतपत्रिका बाद करण्यात येतील. पसंतीक्रम फक्त आकड्यांमध्येच दर्शवावा. 

आपली मतपत्रिका वैध ठरण्यासाठी एकूण उमेदवारांपैकी एका उमेदवारासमोर १ हा आकडा लिहून तुमची पहिली पसंती दर्शवणे आवश्यक आहे. इतर पसंतीक्रम देणे ऐच्छिक आहेत. म्हणजेच इच्छेनुसार दुसरी किंवा पुढील पसंती दर्शवावी.

अशा मतपत्रिका अवैध ठरतील

१  हा आकडा टाकलेला नसल्यास. १  हा आकडा एकापेक्षा अधिक उमेदवारांच्या नावासमोर टाकलेला असल्यास. १  हा आकडा, तो कोणत्या उमेदवाराला देण्यासाठी टाकलेला आहे याबाबत शंका निर्माण होईल अशाप्रकारे टाकलेला असेल. एकाच उमेदवाराच्या नावासमोर १ आणि त्याबरोबर २, ३ इत्यादी आकडे देखील टाकलेले असतील. पसंतीक्रम आकड्याऐवजी शब्दांमध्ये दर्शवलेला असेल. मतदाराची ओळख पटू शकेल अशी कोणतीही खूण किंवा लेखन असले, आणि असे आकडे टाकण्यासाठी निवडणूक अधिकाऱ्याने दिलेल्या जांभळ्या रंगाच्या स्केच पेन व्यतिरिक्त अन्य साधनाने कोणताही आकडा टाकलेला असेल, तरी अशी मतपत्रिका अवैध ठरेल.

--००--

 वृत्त क्रमांक

मतदानाच्या दिवशी मतदान केंद्र परिसरातील आठवडी बाजार बंद

• 23 ऑक्टोबरचे आठवडी बाजार 24 ऑक्टोबर रोजी भरविण्याचे जिल्हाधिकाऱ्यांचे आदेश

नांदेड (जिमाका), दि. 19 : महाराष्ट्र विधान परिषद 05 औरंगाबाद पदवीधर मतदारसंघाच्या द्वैवार्षिक निवडणुकीसाठी नांदेड जिल्ह्यातील 16 तालुक्यांमध्ये शहरी व ग्रामीण भागातील एकूण 120 मतदान केंद्रांवर शुक्रवार, दि. 23 ऑक्टोबर 2026 रोजी मतदान होणार आहे. मतदान प्रक्रिया सुरळीतपणे पार पाडण्यासाठी मतदान केंद्र परिसरातील आठवडी बाजार बंद ठेवण्याचे आदेश जिल्हाधिकारी तथा जिल्हादंडाधिकारी राहुल कर्डिले यांनी दिले आहेत.

महाराष्ट्र राज्याचे पणन संचालक, पुणे यांनी दिलेल्या निर्देशानुसार मतदानाच्या दिवशी नांदेड जिल्ह्यातील संबंधित 120 मतदान केंद्र परिसरात भरणारे सर्व आठवडी बाजार बंद ठेवण्यात येणार आहेत. तसेच हे आठवडी बाजार अन्य दिवशी भरविण्यास परवानगी देण्यात आली आहे. 

23 ऑक्टोबरचे बाजार 24 ऑक्टोबरला भरविण्याचे निर्देश

मार्केट अँड फेअर अॅक्ट, 1862 मधील कलम 5 अन्वये प्राप्त अधिकारांचा वापर करून जिल्हाधिकारी राहुल कर्डिले यांनी नांदेड जिल्ह्यातील 16 तालुक्यांतील शहरी व ग्रामीण भागातील 120 मतदान केंद्रांच्या परिसरात दि. 23 ऑक्टोबर रोजी भरणारे सर्व आठवडी बाजार बंद ठेवण्याचे आदेश दिले आहेत.

मतदानाच्या दिवशी बंद ठेवण्यात येणारे हे सर्व आठवडी बाजार शनिवार, दि. 24 ऑक्टोबर 2026 रोजी भरविण्यात यावेत, असेही आदेशात स्पष्ट करण्यात आले आहे.

मतदान केंद्र परिसरात मतदानाची प्रक्रिया सुरळीत, सुरक्षित व निर्विघ्नपणे पार पडावी, तसेच मतदान केंद्र परिसरात अनावश्यक गर्दी होऊ नये, यासाठी संबंधितांनी या आदेशाची अंमलबजावणी करावी, असे प्रशासनाने स्पष्ट केले आहे.

***