वृत्त   

पीक परिस्थितीच्या पाहणीसाठी मुख्यमंत्री शेतकऱ्यांच्या बांधावर !

पिकांचे सरसकट नुकसान; मदतही सरसकट देणार-मुख्यमंत्री देवेंद्र फडणवीस

• लातूर जिल्ह्यातील जाऊ आणि खरोसा येथे पिकांची पाहणी; शेतकऱ्यांशी संवाद

• शेतकऱ्यांना थेट मदत देण्यासाठी गतीने पावले उचलण्यास सुरुवात

• संकटकाळात शेतकऱ्यांना एकटे सोडणार नाही; शासन पूर्ण ताकदीने पाठीशी उभे राहणार

लातूर, दि. २३ (विमाका) : मराठवाड्यासह राज्यातील अनेक जिल्ह्यांत यावर्षी अतिशय कमी पाऊस पडला आहे. त्यामुळे पिकांचे मोठे नुकसान झाल्याचे दिसून येत आहे. लातूर जिल्ह्यात सर्वात कमी म्हणजेच केवळ ५० टक्के पाऊस झाला असून, येथील नदी-नाले व विहिरी कोरड्या पडल्या आहेत. पावसाअभावी पिकांचे सरसकट नुकसान झाल्याचे दिसत असून, राज्य शासनही शेतकऱ्यांना सरसकट मदत करेल. या संकटकाळात शेतकऱ्यांना एकटे न सोडता शासन पूर्ण ताकदीने त्यांच्या पाठीशी उभे राहून आवश्यक ती सर्व मदत करेल, अशी ग्वाही मुख्यमंत्री देवेंद्र फडणवीस यांनी दिली.

पीक परिस्थितीच्या पाहणीसाठी मुख्यमंत्री श्री. फडणवीस यांच्या दौऱ्याला लातूर येथून सुरुवात झाली. यावेळी त्यांनी लातूर जिल्ह्यातील जाऊ आणि खरोसा येथे शेतकऱ्यांच्या बांधावर जाऊन खरीप पिकांच्या नुकसानीची पाहणी केली व शेतकऱ्यांशी थेट संवाद साधला. या प्रसंगी लातूरचे पालकमंत्री शिवेंद्रसिंहराजे भोसले, सहकार मंत्री बाबासाहेब पाटील, जिल्हा परिषद अध्यक्षा उषाताई पाटील, खासदार ओमप्रकाश राजेनिंबाळकर, आमदार बसवराज पाटील, आमदार संभाजी पाटील निलंगेकर, आमदार संजय बनसोडे, आमदार अभिमन्यू पवार यांच्यासह प्रशासनातील वरिष्ठ अधिकारी, लोकप्रतिनिधी आणि संबंधित विभागांचे अधिकारी उपस्थित होते.

राज्यात यंदा दुष्काळाची भीषणता १९७२ पेक्षाही अधिक तीव्र राहण्याची शक्यता आहे. या बाबीचे गांभीर्य लक्षात घेऊन राज्य शासनाने गतीने पावले उचलली आहेत. लवकरच दुष्काळाबाबतची अधिसूचना प्रसिद्ध केली जाईल. संकटात सापडलेल्या शेतकऱ्यांच्या बँक खात्यात थेट मदत जमा करण्यासाठी राज्य शासन प्रयत्नशील आहे, असे मुख्यमंत्री श्री. फडणवीस म्हणाले. शेतकऱ्यांचे सुमारे ४८ हजार कोटी रुपयांचे कृषिपंप वीज बिल यापूर्वीच माफ केले असून, यापुढेही त्यांना वीज बिल भरावे लागणार नाही. तसेच पुण्यश्लोक अहिल्यादेवी होळकर कर्जमुक्ती योजना राबवून शेतकऱ्यांना शासनाने दिलासा दिला असून, या योजनेचा लाभ प्रत्येक पात्र शेतकऱ्याला मिळेपर्यंत तिची अंमलबजावणी सुरूच राहील, असेही त्यांनी स्पष्ट केले.

संकटकाळात सर्वतोपरी मदत करणार

दुष्काळी परिस्थितीचा सामना करण्यासाठी पिण्याचे पाणी व जनावरांच्या चाऱ्याचे योग्य नियोजन करण्यात येईल. तसेच शेतकऱ्यांना अन्नधान्यासह आवश्यक ती सर्व मदत करण्यासाठी पावले उचलली जात आहेत. जलसंधारणाची आणि रोजगार निर्मितीची कामे मोठ्या प्रमाणावर हाती घेण्यात येतील. या संकटात राज्य शासन पूर्ण ताकदीने शेतकऱ्यांच्या पाठीशी उभे राहील. पुढचे काही महिने अतिशय आव्हानात्मक असून या काळात धीर सोडू नका; संकटाचा सामना आपण सर्वजण एकजुटीने करूया, असे आवाहन मुख्यमंत्र्यांनी केले. तसेच बंद असलेल्या पाणीपुरवठा योजना लवकरात लवकर सुरू करण्यात येतील, असेही त्यांनी सांगितले.

शेतकऱ्याला हुंदका अनावर; मुख्यमंत्र्यांकडून दिलासा

निलंगा तालुक्यातील जाऊ येथे मुख्यमंत्र्यांना पीक नुकसानीची माहिती देताना नूर पटेल हे शेतकरी भावूक झाले. वाळलेली पिके पाहून त्यांना हुंदका अनावर झाला. यावेळी मुख्यमंत्र्यांनी त्यांचा हात हातात घेऊन, "घाबरू नका, राज्य शासन या संकटात पूर्णपणे तुमच्यासोबत आहे. सर्वतोपरी मदत केली जाईल, असा धीर देत दिलासा दिला. तसेच या ठिकाणी उपस्थित महिला शेतकऱ्यांशीही मुख्यमंत्र्यांनी संवाद साधला.

***

वृत्त   

शासन शेतकऱ्यांच्या पाठीशी खंबीरपणे उभे - मुख्यमंत्री देवेंद्र फडणवीस

 दुष्काळाची पहिली अधिसूचना लवकरच 

लातूर, दि. 23 (जिमाका)  :   शासनाने दुष्काळाची परिस्थिती अतिशय गांभीर्याने घेतली आहे. शासन दुष्काळाची पहिली अधिसूचना लवकरच प्रसिद्ध करणार असल्याची माहिती मुख्यमंत्री देवेंद्र फडणवीस यांनी आज दिली. शासन शेतकऱ्यांच्या पाठीशी खंबीरपणे उभे असल्याचेही यावेळी त्यांनी सांगितले.

लातूर, धाराशीव जिल्ह्यातील पीक-पाणी परिस्थितीच्या पाहणीसाठी मुख्यमंत्री फडणवीस यांचे आज (ता.23) सकाळी लातूर विमानतळावर आगमन झाले, यावेळी त्यांनी माध्यमांशी संवाद साधला. 

दुष्काळाच्या संबंधाने करावयाच्या आवश्यक त्या उपयोजनांबाबत शासनस्तरावर योग्य कार्यवाही सुरू आहे. तसेच दुष्काळासंदर्भातील अहवाल शासनास प्राप्त झालेले आहेत. सध्याची परिस्थिती अतिशय गंभीर आहे. शेतकऱ्यांना आवश्यक ती मदत शासन करत आहे. सोबतच पुण्यश्लोक अहिल्यादेवी होळकर शेतकरी कर्जमुक्ती योजनेचा लाभही देण्यात येत आहे. यासाठी आवश्यक तेवढा ‍निधी उपलब्ध करून देण्यात येणार असल्याचेही मुख्यमंत्री फडणवीस म्हणाले. 

दुष्काळी परिस्थितीत आवश्यक असणारे पाणी, जनावरांचा चारा आदी बाबींचे सूक्ष्म नियोजन करण्यात आले असल्याचेही मुख्यमंत्री यांनी सांगितले.

0000

 वृत्त   

औरंगाबाद विभाग पदवीधर मतदारसंघ निवडणुकीसाठी आचारसंहितेचे काटेकोर पालन करा : जिल्हाधिकारी राहुल कर्डिले

 

24 तासांत बॅनर, पोस्टर्स हटविण्याच्या सूचना

 

नांदेड, दि. 23 सप्टेंबर : औरंगाबाद विभाग पदवीधर मतदारसंघ निवडणूक-2026 च्या पार्श्वभूमीवर जिल्ह्यात आदर्श आचारसंहितेचे काटेकोर पालन करावे, असे निर्देश जिल्हाधिकारी तथा सहायक निवडणूक निर्णय अधिकारी राहुल कर्डिले यांनी विविध शासकीय विभागांच्या प्रमुखांना दिले.

 

आचारसंहितेच्या अंमलबजावणीबाबत जिल्हाधिकारी राहुल कर्डिले यांच्या अध्यक्षतेखाली आज जिल्हाधिकारी कार्यालयात सर्व विभाग प्रमुखांची आढावा बैठक घेण्यात आली. यावेळी उपजिल्हाधिकारी राजकुमार माने यांच्यासह जिल्ह्यातील विविध विभागांचे अधिकारी उपस्थित होते.

 

भारत निवडणूक आयोगाच्या निर्देशानुसार पदवीधर, शिक्षक तसेच स्थानिक प्राधिकारी मतदारसंघांच्या निवडणुकांनाही आदर्श आचारसंहितेच्या तरतुदी लागू आहेत. त्यामुळे निवडणूक प्रक्रिया पूर्ण होईपर्यंत कोणत्याही शासकीय यंत्रणेकडून आचारसंहितेचा भंग होणार नाही, याची दक्षता घेण्याचे निर्देश देण्यात आले.

पदवीधर मतदारांवर प्रत्यक्ष किंवा अप्रत्यक्ष प्रभाव पडेल अशी कोणतीही नवीन शासकीय योजना किंवा धोरण जाहीर अथवा मंजूर करू नये. तसेच पदवीधर मतदारसंघातील शैक्षणिक संस्थांचे उद्घाटन किंवा पायाभरणी मंत्री महोदयांच्या हस्ते करू नये. निवडणूक कामाशी संबंधित अधिकारी-कर्मचाऱ्यांना मंत्र्यांच्या बैठकीस उपस्थित राहण्यासाठी बोलावू नये, अशाही सूचना देण्यात आल्या. स्थानिक स्वराज्य संस्थांच्या सदस्यांची बैठक किंवा व्हिडिओ कॉन्फरन्स मंत्री महोदयांमार्फत आयोजित करू नये. अत्यावश्यक नियमित बैठका केवळ जिल्हा निवडणूक अधिकाऱ्यांच्या पूर्वपरवानगीने घेता येतील, असे स्पष्ट करण्यात आले.

 

नवीन कामांना मंजुरीवर निर्बंध

खासदार, आमदार व विधानपरिषद सदस्य निधी योजनेंतर्गत आयटी प्लॅटफॉर्मद्वारे कोणत्याही नवीन कामास मंजुरी देऊ नये. तसेच निवडणुकीसाठी नियुक्त अधिकारी व कर्मचाऱ्यांच्या बदल्यांवर निवडणूक जाहीर झाल्यापासून पूर्ण बंदी राहील. अपरिहार्य कारणास्तव बदली करणे आवश्यक असल्यास आयोगाची पूर्वपरवानगी घेणे बंधनकारक राहणार आहे.

 

काळ्या पैशाच्या तसेच पैशाच्या गैरवापराच्या हालचालींवर नियंत्रण ठेवण्यासाठी प्रचलित कार्यपद्धतीनुसार कार्यवाही करावी. मतदारांना हॉटेल, रिसॉर्ट अथवा तत्सम ठिकाणी ठेवण्याची बाब लाचखोरी समजली जाईल. अशा प्रकार आढळल्यास संबंधित कायदेशीर तरतुदींनुसार कारवाई केली जाईल.

 

आदर्श आचारसंहिता लागू झाल्यापासून शासकीय मालमत्तेच्या विरुपनास प्रतिबंध केले आहे. महानगरपालिका, सार्वजनिक बांधकाम विभाग, जिल्हा परिषद, नगरपरिषदा, ग्रामपंचायती, महाराष्ट्र राज्य विद्युत कंपनी, बीएसएनएल तसेच सर्व शासकीय व निमशासकीय विभागांच्या मालमत्तेवर लावण्यात आलेले राजकीय स्वरूपाचे फलक, कापडी बॅनर्स, पोस्टर्स आदी तात्काळ काढून टाकावेत, असे निर्देश देण्यात आले.

 

विभागाच्या अधिनस्त मालमत्तेचे विरुपन झालेले नाही, याची संबंधित विभाग प्रमुखांनी खात्री करून प्रमाणित करावे. त्यानंतरही अशा प्रकारचे लिखाण झाल्यास संबंधि कायद्यानुसार तातडीने कारवाई करावी. कारवाईत कुचराई किंवा दिरंगाई करणाऱ्या संबंधित अधिकारी-कर्मचाऱ्यांवरही नियमानुसार कारवाई करण्यात येईल, असा इशारा देण्यात आला.

 

शासकीय वाहनांचा गैरवापर टाळण्याचे निर्देश

आचारसंहितेच्या काळात कोणत्याही शासकीय अथवा निमशासकीय वाहनाचा निवडणूकविषयक कामासाठी गैरवापर होणार नाही, याची कार्यालय प्रमुखांनी दक्षता घ्यावी. पदाधिकाऱ्यांची वाहने जमा करून जिल्हाधिकारी कार्यालयाकडे पाठविण्याच्या सूचनाही देण्यात आल्या. शाळांच्या मैदानांव्यतिरिक्त नेहमी सभांसाठी वापरली जाणारी मैदाने व मोकळ्या जागा सर्व राजकीय पक्ष आणि उमेदवारांना समानतेच्या तत्त्वावर उपलब्ध करून द्याव्यात, असेही स्पष्ट करण्यात आले.

 

शासकीय विश्रामगृहे, शाळांची मैदाने आणि इतर शासकीय इमारतींच्या वापराबाबत निवडणूक आयोगाने घातलेल्या निर्बंधांचे तंतोतंत पालन करावे. कोणत्याही राजकीय कार्यक्रमासाठी अधिकारी-कर्मचाऱ्यांनी उपस्थित राहू नये, असे निर्देश देण्यात आले.

 

निवडणूक कालावधीत वाहनांचा गैरवापर रोखणे, ताफ्यांचे नियमन करणे तसेच प्रचाराचा कालावधी संपल्यानंतरच्या 48 तासांत राजकीय पदाधिकाऱ्यांच्या मतदारसंघातील उपस्थितीवरील निर्बंध या तरतुदी पदवीधर मतदारसंघालाही लागू राहतील.

 

22 सप्टेंबर ते 31 ऑक्टोबरपर्यंत आचारसंहिता

भारत निवडणूक आयोगाच्या सूचनेनुसार 22 सप्टेंबर 2026 ते 31 ऑक्टोबर 2026 या कालावधीत जिल्ह्यात आदर्श आचारसंहितेचे तंतोतंत पालन करावे. यासाठी आवश्यक पूर्वतयारी करून आचारसंहिता विषयक पथके स्थापन करावीत, तसेच सर्व सूचना अधिनस्त कार्यालये, अधिकारी व कर्मचाऱ्यांकडून काटेकोरपणे पाळल्या जातील, याची दक्षता घ्यावी.

 

विभागाशी संबंधित शासकीय योजना तसेच आचारसंहितेचा भंग करणारे बॅनर, पोस्टर्स अथवा अन्य प्रचार साहित्य आढळल्यास ते 24 तासांच्या आत काढून टाकावे, असे निर्देशही जिल्हाधिकारी राहुल कर्डिले यांनी बैठकीत दिले. आचारसंहितेचे उल्लंघन झाल्यास संबंधितांवर सेवाविषयक नियमानुसार तसेच लोकप्रतिनिधित्व अधिनियम, 1951 मधील संबंधित तरतुदींनुसार कारवाई करण्यात येईल, असेही जिल्हाधिकारी राहुल कर्डिले यांनी स्पष्ट केले.

 

राजकीय पक्षांच्या पदाधिकाऱ्यांचीही बैठक

या बैठकीपूर्वी औरंगाबाद विभाग पदवीधर मतदारसंघ निवडणूक-2026 च्या पार्श्वभूमीवर आदर्श आचारसंहितेचे काटेकोर पालन करण्याच्या अनुषंगाने जिल्हाधिकारी कार्यालयात विविध राजकीय पक्षांच्या पदाधिकाऱ्यांची बैठक जिल्हाधिकारी तथा सहायक निवडणूक निर्णय अधिकारी राहुल कर्डिले यांच्या अध्यक्षतेखाली घेण्यात आली. या बैठकीत निवडणूक आयोगाच्या मार्गदर्शक सूचना व आचारसंहितेतील विविध तरतुदींची माहिती देण्यात आली. तसेच निवडणूक प्रक्रिया पारदर्शक व नियमबद्ध पद्धतीने पार पाडण्यासाठी सर्व राजकीय पक्षांनी आदर्श आचारसंहितेचे काटेकोर पालन करावे, असे आवाहन यावेळी करण्यात आले.

0000