वृत्त क्र. 1093

लोकसभा व विधानसभा निवडणुकीत ५५ उमेदवारांवर विविध गुन्हे दाखल 

उमेदवारांनी १८ तारखेपर्यंत प्रिंट व इलेक्ट्रॉनिक माध्यमात प्रत्येकी ३ जाहिराती देणे आवश्यक 

उमेदवारांनी गुन्हेगारी पार्श्वभूमीची माहिती मतदारांना देणे अनिवार्य

नांदेड, दि. १४  नोव्हेंबर :- नांदेड जिल्हयामध्ये लोकसभा व विधानसभा निवडणुकीत उभे असणाऱ्या १८४ उमेदवारांपैकी ५५ उमेदवारांवर विविध गुन्हे दाखल आहेत. या ५५ उमेदवारांनी निवडणूक पूर्ण होईपर्यंत आपली माहिती वृत्तपत्रातून जनतेला कळविणे आवश्यक आहे. ज्यांनी वृत्तपत्रातून जाहिराती दिल्या नसतील त्यांनी १८ नोव्हेंबर पर्यत दयाव्यात, अशी सूचना खर्च विभागाचे नोडल अधिकारी जनार्दन पक्वाने यांनी केली आहे.

भारत निवडणूक आयोगाने निर्देशित केल्याप्रमाणे सर्व उमेदवारांना त्यांची गुन्हेगारी पार्श्वभूमी असल्यास कोणते गुन्हे दाखल आहेत याबाबतची सविस्तर माहिती माध्यमामध्ये निवडणूक उमेदवारी जाहिर झाल्यापासून तर मतदान होईपर्यत जाहिर करणे अनिवार्य केले आहे.

त्यामुळे अशा पार्श्वभूमीच्या उमेदवारांनी मतदारांना माहिती होईल अशा प्रकारे माध्यमामधून एकूण तीन वेळा जाहिराती देवून जनतेला माहिती द्यावी, असे आवाहन निवडणूक आयोगाने केले आहे. यासंदर्भात आयोगाने 15 ऑक्टोबर 2024 रोजी निर्देश जारी केले आहेत. नांदेड जिल्हयात लोकसभेसाठी १९ तर विधानसभेसाठी ९ मतदारसंघात १६५ उमेदवार उभे आहेत. अशा एकूण १८४ उमेदवारापैकी ५५ उमेदवारांवर गुन्हे दाखल आहेत.

या सर्व उमेदवारांना प्रिंट मीडियामध्ये तीन जाहिराती व इलेक्ट्रॉनिक मीडियामध्ये प्रत्येकी तीन जाहिराती प्रकाशित करणे आयोगाने अनिवार्य केले आहे. त्यामुळे आयोगाच्या निर्देशानुसार जाहिराती प्रसारित करण्याचे स्पष्ट केले आहे.

000

 वृत्त क्र. 1092

दिव्यांग व ज्येष्ठ मतदारांनी ‘सक्षम ॲप’ चा वापर करुन सुविधा प्राप्त करुन घ्याव्यात : जिल्हाधिकारी

नांदेड, दि. 14 नोव्हेंबर : लोकसभा पोट निवडणूक व विधानसभा सार्वत्रिक निवडणुकीत दिव्यांग आणि ज्येष्ठ मतदारांना सुलभ रीतीने मतदान करता यावे, यासाठी निवडणूक आयोगाने सक्षम नावाचे मोबाईल ॲप तयार केले आहे. या ॲपवर दिव्यांग व ज्येष्ठ मतदारांसाठी मूलभूत सुविधा उपलब्ध करून दिल्या आहेत. या सुविधेसाठी सर्व दिव्यांग मतदारांनी आपल्या मोबाईलमध्ये सक्षम अँप डाऊनलोड करून मतदारांसाठी दिलेल्या सोयी सुविधा प्राप्त करून घ्याव्यात, असे आवाहन जिल्हाधिकारी तथा जिल्हा निवडणूक अधिकारी अभिजीत राऊत यांनी केले आहे. 

दिव्यांग मतदारांसाठी आयोगाने तयार केलेले सक्षम ॲपवर विविध सोयी सुविधा देण्यात येत आहेत. या सुविधेचा लाभ घेण्यासाठी सर्वप्रथम प्रत्येक दिव्यांग मतदाराने सक्षम ॲप आपल्या मोबाईलमध्ये डाऊनलोड करून घ्यावे. निवडणूकसंदर्भात सेवा घेण्यासाठी दिव्यांग व वयोवृद्ध मतदारांना त्यांचे नाव पत्ता आणि मोबाईल क्रमांक इत्यादी माहिती ॲपमध्ये भरावी लागणार आहे. दिव्यांग, वयोवृद्ध मतदारांना या सक्षम ॲपद्वारे मतदानासाठी लागणाऱ्या सहायतेची मागणी नोंदविता येईल. त्याद्वारे मतदारसंघातील दिव्यांग, वयोवृद्ध मतदानाचे मतदारसंघ व स्थाननिश्चिती यंत्रणेला करणे शक्य होईल. या ॲपद्वारे नोंदणी झाल्यानंतर या मतदारांना ने-आण करण्यासाठी वाहतूक व्यवस्था, व्हील चेअर, सहाय्यक मदतनीस इत्यादी प्रकारची सुविधा या ॲपच्या माध्यमातून मिळवू शकतो.

सक्षम ॲप अनेक वैशिष्ट्ये प्रदान करते. दृष्टीहीन असलेल्यांसाठी आवाज प्रदान करते. श्रवण अक्षम असलेल्यांसाठी ॲप-टेक्स्ट-टु-स्पीच प्रदान करते. ॲपमध्ये मोठे फॉन्ट आणि उच्च कॉन्ट्रास्ट रंग असल्यामुळे ते वापरण्यासाठी सोपे होते. ॲपमध्ये मतदान केंद्राबद्दल माहिती उपलब्ध असून त्यामध्ये मतदान केंद्राचे स्थान, मतदान केंद्र उपलब्ध प्रवेश योग्यता वैशिष्ट्ये आणि मतदान अधिकाऱ्यांच्या संपर्क तपशिलांचा समावेश आहे. दिव्यांग मतदाराला निवडणूक प्रक्रियेत सहभागी होतांना येणाऱ्या कोणत्याही समस्याबद्दल ॲपवर तक्रारी नोंदविता येतात.

दिव्यांग मतदारांना निवडणूक प्रक्रियेत सहभागी होण्यासाठी सक्षम ॲप हे महत्वाचे असून, वापरण्यास सोपा आहे. दिव्यांग मतदारांना मतदान करण्यासाठी नोंदणी करणे, त्यांचे मतदान केंद्र शोधणे आणि त्यांचे मत देणे सोपे होते. 

जिल्ह्यातील सर्व दिव्यांग मतदारांनी सक्षम ॲप डाऊनलोड करून विविध सुविधेचा लाभ घ्यावा ,असे आवाहन जिल्हाधिकारी तथा जिल्हा निवडणूक अधिकारी अभीजीत राऊत यांनी केले आहे.

००००००

  वृत्त क्र. 1091

जिल्हा रुग्णालयात जागतिक मधुमेह दिन साजरा

नांदेड, दि. 14 नोव्हेंबर :- आज १४ नोव्हेंबर २०२४ रोजी जिल्हा रुग्णालयात जिल्हा शल्य चिकित्सक डॉ निळकंठ भोसीकर, अतिरिक्त जिल्हा शल्यचिकित्सक डॉ. संजय पेरके व एनसीडी नोडल अधिकारी डॉ. हनुमंत पाटील यांच्या मार्गदर्शनाखाली “जागतिक मधुमेह दिन” साजरा करण्यात आला. यावेळी उपस्थित रुग्ण व त्यांचे  नातेवाईक यांना  तज्ञ डॉक्टरांमार्फत मार्गदर्शन करण्यात आले.

सर्वप्रथम डॉ. विखारुनिसा खान यांनी प्रास्ताविकेच्या माध्यमातून मधुमेहा संदर्भात रुग्णांना मार्गदर्शन केले. त्यानंतर मधुमेह तज्ञ डॉ. दत्तात्रय इंदुरकर यांनी उपस्थित रुग्णांना मधुमेह म्हणजे काय? तो कसा होतो? त्याची कारणे कोणती ? मधुमेह झालेल्या रुग्णांनी आहार कोणता घ्यावा इत्यादी संदर्भात मार्गदर्शन केले. डॉ. तजमुल पटेल यांनी उपस्थिताना मार्गदर्शन केले. शारीरिक कष्टाची कामे दिवसेंदिवस कमी होत आहेत, त्यामुळे जनतेला मधुमेहासारख्या समस्यांना सामोरे जावे लागत आहे. म्हणून प्रत्येक व्यक्तीने दररोज किमान अर्धा तास तरी शारीरिक व्यायाम करावा, आहारात मिठ आणि साखरेचे प्रमाण कमी ठेवावे, संतुलित आहार घ्यावा. जेणेकरून रुग्णांना मधुमेह सारखा आजार नियंत्रणात ठेवण्यास मदत होईल असे अध्यक्षीय समारोपात निवासी वैद्यकीय अधिकारी डॉ. पुष्पा गायकवाड यांनी सांगितले.

या कार्यक्रमास एनसीडी जिल्हा कार्यक्रम व्यवस्थापक डॉ. उमेश मुंडे, शासकीय परिचर्या प्रशिक्षण महाविद्यालयाच्या प्राचार्या सुनिता बोथीकर, श्रीमती नारवाड, श्रीमती बंडेवार, तसेच जिल्हा रुग्णालयातील सर्व अधिकारी कर्मचारी, महाविद्यालयाचे विध्यार्थी, रुग्ण व त्यांचे नातेवाईक उपस्थित होते. या कार्यक्रमाचे सूत्रसंचालन बालाजी गायकवाड यांनी तर कार्यक्रम यशस्वीतेसाठी प्रकाश आहेर, सदाशिव सुवर्णकार, सुनिल तोटेवाड यांनी परिश्रम घेतले.

00000

 वृत्त क्र. 1090

जात वैधता प्रमाणपत्र निकाली

काढण्यासाठी 28 नोव्हेंबरपर्यत विशेष मोहिमेचे आयोजन

नांदेड, दि. 14 नोव्हेंबर :- शैक्षणिक वर्ष 2024-25 मध्ये विविध व्यावसायिक पाठयक्रमासाठी प्रवेशित एसईबीसी, इमाव व इतर राखीव प्रवर्गातील विद्यार्थ्याना जात वैधता प्रमाणपत्र मिळण्यासाठी जाती दावा प्रस्ताव प्रलंबित आहेत, अशी प्रकरणे त्वरीत निकाल काढण्यासाठी 14 ते 28 नोव्हेंबर 2024 या कालावधीत जिल्हा जात प्रमाणपत्र पडताळणी समिती मार्फत विशेष मोहिम शिबिराचे आयोजन करण्यात आले आहे. या विशेष मोहिम शिबिराचा मागासवर्गीय विद्यार्थी, पालकांनी लाभ घ्यावा, असे आवाहन समितीचे अध्यक्ष सुनिल महिंद्रक्रर, उपायुक्त तथा सदस्य डॉ. छाया कुलाल व संशोधन अधिकारी तथा सदस्य सचिव रामचंद्र वंगाटे यांच्यावतीने करण्यात आले आहे.  

शैक्षणिक वर्ष 2024-25 वर्षामधील एसईबीसी, इमाव व इतर राखीव प्रवर्गातून प्रवेशित ज्या विद्यार्थ्याचे समितीकडे जात वैधता प्रमाणपत्र जाती दावा प्रस्ताव दाखल होऊन त्रुटी पुर्तता अभावी प्रलंबित आहेत, अशा सर्व प्रकरणामध्ये विद्यार्थ्याचे जात वैधता प्रमाणपत्रा अभावी शैक्षणिक नुकसान होऊ नये, यासाठी समितीकडून त्यांना विहित मुदतीत जात वैधता प्रमाणपत्र देण्यासाठी तसेच विद्यार्थी, पालक यांना त्यांच्या अडीअडचणीबाबत ऑनलाईन वेबिनारद्वारे मार्गदर्शन करण्यासाठी 14 ते 28 नोव्हेंबर 2024 या कालावधीत समितीमार्फत विशेष मोहिम शिबिर राबविण्यात येत आहे.

जिल्हा जात प्रमाणपत्र पडताळणी समिती, नांदेड कार्यालयाचा पत्ता- डॉ. बाबासाहेब आंबेडकर सामाजिक न्याय भवन, हिंगोली रोड, ग्यानमाता शाळेसमोर, नमस्कार चौक, नांदेड-४३१६०४ येथे 14 नोव्हेंबर ते 28 नोव्हेंबर 2024 या कालावधीत सन 2024 या कालावधीत सन 2024-25 मध्ये विविध व्यावसायिक अभ्यासक्रमासाठी प्रवेशित एसईबीसी, इमाव व इतर राखीव प्रवर्गातील ज्या मागासवर्गीय विद्यार्थ्यांनी जात वैधता प्रमाणपत्र मिळण्यासाठी समितीकडे त्यांचे ऑनलाईन भरलेले प्रस्ताव दाखल केलेले आहेत. परंतु प्रस्तावातील त्रुटी पुर्तता अभावी समितीकडे त्यांचे प्रस्ताव प्रलंबित आहेत, अशा सर्व प्रकरणामध्ये समितीकडून अर्जदारांना ऑनलाईन प्रणालीद्वारे त्यांचे नमूद केलेल्या ईमेल आयडी द्वारे व संपर्क क्रमांकावर एसएमएसद्वारे त्रुटी पुर्तता करण्याबाबत कळविण्यात आले आहे. अशा प्रकरणांमध्ये अर्जदार, पालकांनी विशेष मोहीम शिबिराचा लाभ घेण्यासाठी समितीस्तरावर स्वत: समिती कार्यालयात उपस्थित राहावे. तसेच त्यांच्या प्रस्तावातील ईमेलद्वारे कळविण्यात आलेल्या त्रुटीची पुर्तताबाबत मुळ कागदपत्रे अथवा साक्षाकिंत सादर करावेत. जेणेकरून अशा प्रकरणांमध्ये नियमानुसार समितीकडून त्वरीत तपासणीची कार्यवाही करुन संबंधित अर्जदारांना शिबिरादरम्यान जात वैधता प्रमाणपत्र निर्गमि‍त करण्यात येणार आहे.

00000

 वृत्त क्र. 1089

खर्च निरीक्षक मयंक पांडे यांनीही लावली नांदेडची दौड

मतदान वाढीसाठी युवकांची शहरात मॅराथॉन    

* स्विप व जिल्हा क्रीडा कार्यालयाचा स्तुत्य उपक्रम 

* स्केटर्सने वेधले लक्ष, विजेत्यांना मिळाले बक्षिस   

नांदेड दि. 14 नोव्हेंबर :-  नांदेड शहरवासियांनी मतदानाकडे दूर्लक्ष करू नये यासाठी प्रशासनाने गुरूवारी सकाळी नांदेडच्या प्रमुख रस्त्यांवर मॅराथॉनचे आयोजन केले होते. या शर्यतीत शेकडो युवकांनी भाग घेतला. विशेषत: मुलींनी घेतलेला भाग आणि स्केटर्सनी ही शर्यत स्केटींग करून लक्ष वेधले. 

जिल्हा स्विप कक्ष, 87-दक्षिण नांदेड, 86- उत्तर नांदेड कक्ष तसेच जिल्हा क्रीडा अधिकारी कार्यालय, क्रीडा प्रबोधिनी, नांदेड जिल्हा हौशी ॲथेलेटिक्स संघटना तसेच विविध संघटनांच्या सहभागातून आज गुरूवारी सकाळी जिल्हाधिकारी कार्यालय ते जिल्हा क्रीडा कार्यालयापर्यंत मॅराथॉन शर्यतीचे आयोजन करण्यात आले होते. विशेष म्हणजे यामध्ये गुजराथ कॅडरचे आयआरएस अधिकारी तथा निवडणूक खर्च निरीक्षक मयंक पांडे यांनीही पूर्ण मॅराथॉन पूर्ण केली. त्यांच्यासोबत जिल्हा परिषदेचे अतिरिक्त मुख्य कार्यकारी अधिकारी संदिप माळोदे व अन्य अधिकारीही या जनजागृती मोहिमेत सहभागी झाले. 

भल्या पहाटे तरुणांचे जत्थे आज या मॅराथॉनमध्ये सहभागी झाले होते. जिल्हाधिकारी कार्यालयात सर्व प्रथम भारत निवडणूक आयोगाने जारी केलेल्या मतदारांच्या प्रतिज्ञेचे निवडणूक निरीक्षकांच्या उपस्थित वाचन करण्यात आले. यावेळी उपायुक्त संजय जाधव, जिल्हा क्रीडा अधिकारी जयकुमार टेंबरे, जिल्हा शिक्षणाधिकारी माधव सलगर, शिक्षणाधिकारी दिलीप बन्सोडे , मनपाचे शिक्षणाधिकारी व्यंकेटेश चौधरी,जिल्हा माहिती अधिकारी प्रवीण टाके, उप अभियंता गोकुळे , गटशिक्षणाधिकारी आडे, प्रलोभ कुळकर्णी, शुभम तेलेवार,राज्य क्रीडा मार्गदर्शक बालाजी शिरसीकर, क्रीडा अधिकारी राहूल श्रीरामवार, विपूल दाभके, दत्तकुमार धुतडे, संजय चव्हाण, सुभाष धोंगडे उर्फ शक्ती, विद्यानंद भालेराव, शेख अक्रम, मोहन प्रवार, चंदू गव्हाणे, जिल्हा हौशी ॲथलेटिक्स संघटनेचे पंच बंटी सोनसळे, वैभव दमकोंडवार, गोविंद पांचाळ, शिद्धोधन नरवाडे, वैभव अंभोरे, गजानन फुलारी, कपील सोनकांबळे, नांदेड उत्तरचे सुनिल मुत्तेपवार, माणिक भोसले, संभाजी पोकले, शिवराज पवार, मुकुंद आळसपुरे, सौ. आशा पोले तर नांदेड दक्षिणचे श्री. आडे, हनुमंत राठोड, सारिका आचमे, सुनिल दाचावार, डॉ. डी. एम. बडुरे, डॉ. व्ही. एल. तरोडे, एस. के. ढवळे, एस. डी. लबडे यांची उपस्थिती होती. 

 मॅराथॉन विजेते 

आज झालेल्या मॅराथॉनमध्ये पुरुष गटात रोहन देवानंद लोणे ( प्रथम ) सुमीत शिवाजीराव ढगे ( व्दीतीय ) कपील त्र्यंबक पवार ( तृतीय )तर महिला गटात नेहा साईनाथ पंदेलवार ( प्रथम ) रूपाली संतोष ढाले ( व्दीतीय ) मिनाक्षी दतात्रय दमयावार ( तृतीय ) विजयी झाले.

0000

वृत्त क्र. 1088

निर्भय वातावरणात मोठ्या संख्येने 

मतदार केंद्रावर येतील हे सुनिश्चित करा -  विभागीय आयुक्त दिलीप गावडे 

•  लोकसभा, विधानसभेची आढावा बैठक 

• लोकसभा, विधानसभा संदर्भिकेचे प्रकाशन  

नांदेड दि. 14 नोव्हेंबर :- मतदान केंद्रांवर सर्व आवश्यक सुविधा निर्माण करा. सर्व मतदार निर्भय वातावरणात लोकशाहीच्या या उत्सवामध्ये मोठ्या संख्येने सहभागी होतील याची खातरजमा प्रत्येक निवडणूक कर्मचाऱ्याने घेणे आवश्यक आहे. केवळ निवडणूक निर्णय अधिकारी नव्हे तर आपल्या प्रत्येकांची ही जबाबदारी आहे. याची जाणीव ठेवा, असे आवाहन विभागीय आयुक्त दिलीप गावडे यांनी केले. 

आज जिल्हाधिकारी कार्यालयामध्ये त्यांनी आढावा बैठक घेतली. नांदेड जिल्ह्यामध्ये 1999 नंतर प्रथमच लोकसभा पोटनिवडणूक व विधानसभा सार्वत्रिक निवडणूक एकत्रित होत आहे. त्यामुळे या ठिकाणच्या निवडणूक यंत्रणेला अन्य जिल्ह्यातील निवडणूक यंत्रणेपेक्षा उपलब्ध मनुष्यबळ कुशलतेने वापरणे आवश्यक आहे. येणाऱ्या काळात मतदान केंद्रावरील नियोजन आवश्यक आहे. मतदाराला मतदान केंद्रावर सर्व पायाभूत सुविधा मिळाव्यात, तसेच हिवाळ्यात होणारी ही निवडणूक लक्षात घेऊन आवश्यक वीज पुरवठा त्या-त्या ठिकाणी उपलब्ध असेल यासाठी देखील सर्वांनी जागरूक रहावे. येत्या 20 तारखेला मतदान आहे. तेंव्हा ज्या ठिकाणी सुविधांमध्ये काही कमी असेल तर पूर्ण करण्यात यावी.  

या बैठकीला जिल्हाधिकारी अभिजीत राऊत, जिल्हा पोलीस अधीक्षक अबिनास कुमार, जिल्हा परिषदेच्या मुख्य कार्यकारी अधिकारी मीनल करनवाल, मनपा आयुक्त डॉ. महेशकुमार डोईफोडे, अपर जिल्हाधिकारी पांडुरंग बोरगावकर, निवासी उपजिल्हाधिकारी महेश वडदकर, उपजिल्हाधिकारी (निवडणूक) राजकुमार माने यांच्यासह सर्व विभाग प्रमुख तथा नोडल अधिकाऱ्यांची उपस्थिती होती.   

यावेळी जिल्ह्यामध्ये मतदानाची आकडेवारी वाढविण्यासाठी सुरू असलेल्या प्रयत्नाबाबत त्यांनी जाणून घेतले. नोडल अधिकारी मिनल करनवाल व डॉ.महेशकुमार डोईफोडे यांच्याकडून माहिती घेतली. निवडणूक सिजर व्यवस्थापन कक्षाबाबत व कायदा व सुव्यवस्थेबाबत जिल्हा पोलीस अधिक्षक अबिनाश कुमार यांनी माहिती दिली.  मतदान केंद्रावरील सुविधा उपलब्ध करून देण्याबाबत केलेल्या उपाययोजनांची माहिती यावेळी जिल्हा परिषदेचे अतिरिक्त मुख्य कार्यकारी अधिकारी संदीप माळोदे यांनी दिली. याकाळात जिल्ह्याच्या विविध भागात दिलेल्या भेटीचा तपशील त्यांना दिला. तसेच निवडणूक कर्मचाऱ्यांच्या प्रशिक्षणाची माहिती नोडल अधिकारी पांडूरंग बोरगावकर यांनी दिली. आचारसंहिता, कायदा व सुव्यवस्थेची संदर्भात दाखल झालेले गुन्हे व जिल्ह्यामधील परिस्थितीबाबत नोडल अधिकारी महेश वडदकर यांनी माहिती दिली. निवडणुकीच्या संदर्भातील माहिती व्यवस्थापनाची तसेच निवडणूक आयोगाच्या सूचना व संपर्काची माहिती उपजिल्हा निवडणूक अधिकारी राजकुमार माने यांनी दिली. यावेळी राज्य उत्पादन शुल्क विभागाचे अधिक्षक गणेश पाटील, निवडणूक निर्णय कक्षाचे नोडल अधिकारी प्रशांत शेळके, इव्हीएम कक्षाचे अजय शिंदे, साहित्य स्विकृती कक्षाच्या नोडल अधिकारी रुपाली चौगुले, मतदान कर्मचारी व्यवस्थापन कक्षाचे नोडल अधिकारी संजीव मोरे, संगणक व माहिती तंत्रज्ञान कक्षाचे नोडल अधिकारी प्रफुल कर्णेवार, सिव्हिजील कक्षाचे नोडल अधिकारी गंगाधर इरलोड, निवडणूक खर्च तपासणी संदर्भात मुख्य लेखा व वित्त अधिकारी जनार्दन पक्कवाने, माध्यम प्रमाणीकरण व सनियंत्रण कक्षाबाबत जिल्हा माहिती अधिकारी प्रवीण टाके यांनी माहिती दिली. यावेळी विविध विभागांचे प्रमुख उपस्थित होते. 

संदर्भिकेचे प्रकाशन

यावेळी त्यांनी जिल्हा माहिती कार्यालयामार्फत तयार करण्यात आलेल्या संदर्भिकेचे प्रकाशन केले. जिल्ह्यातील सर्व निवडणूक निर्णय कार्यालयाला ही पुस्तिका वितरीत करा. तसेच सर्व माध्यम प्रतिनिधींपर्यंत ही पुस्तिका पोहोचेल यासंदर्भात दक्षता घ्या, असे आवाहन त्यांनी केले. लोकसभेच्या पहिल्या निवडणुकीपासून तर महाराष्ट्राच्या निर्मिती पासूनच्या विधानसभेच्या निवडणुकीची माहिती यामध्ये आहे. या संदर्भिकेचे त्यांनी कौतुक केले. 

00000

  वृत्त क्र. 1087

मतदान जनजागृतीसाठी नीमाचा पुढाकार

नांदेड, दि. १४ नोव्हेंबर:- मतदानाची टक्केवारी वाढविण्यासाठी नॅशनल इंटिग्रेटेड मेडिकल असोसिएशन (NIMA) यांच्यामार्फत मतदानाच्या दिवशी मतदान करुन शाई बोटाला दाखविल्यास त्या दिवशी बाह्यरुग्ण तपासणीच्या शुल्कात 30 टक्के सूट देण्याचा निर्णय घेतला आहे.

मतदारांना मतदानासाठी प्रोत्साहित करण्याच्या हेतूने नांदेड जिल्ह्यातील निमा (NIMA) संघटनेतर्फे शहरातील व जिल्ह्यातील निमा अंतर्गत सदस्यांना रुग्णालयात मतदानाच्या दिवशी म्हणजे 20 नोव्हेंबर 2024 या एका दिवशीसाठी ज्या नागरिकांच्या बोटाला मतदान केल्याची शाई असेल, त्यांना सर्व खाजगी रुग्णालयातील निमा अंतर्गत सदस्याच्या बाह्यरुग्ण तपासणीच्या शुल्कामध्ये 30 टक्के सुट देण्यात येणार आहे. मतदारांनी याचा लाभ घ्यावा, असे आवाहन नॅशनल इंटिग्रेटेड मेडिकल असोसिएशनतर्फे केले आहे.

00000

 वृत्त क्र. 1086

एसजीजीएस कॉलेजमध्ये मतदान जनजागृती कार्यक्रम

नांदेड, दि. १४ नोव्हेंबर:- विधानसभा सार्वत्रिक निवडणुका २०२४ साठी २० नोव्हेंबर रोजी मतदान प्रक्रिया पार पडणार आहे. त्यानिमित्ताने  निवडणूक आयोग आणि निवडणूक निर्णय अधिकारी087 नांदेड दक्षिण विधानसभा मतदार संघाच्या वतीने मतदानाचे प्रमाण वाढवण्यासाठी आणि मतदारांमध्ये,  प्रथमच मतदान करणाऱ्या नवमतदारांमध्ये, मतदानाचे महत्त्व पटवून देण्यासाठी मतदान जनजागृती कार्यक्रम राबविण्यात येत आहेत.

या पार्श्वभूमीवर आज विष्णूपुरी येथील श्री गुरु गोबिंद सिंघजी अभियांत्रिकी व तंत्रशास्त्र संस्थेमध्ये तहसील कार्यालयाच्या 087 स्वीप पथक आणि संस्थेच्या राष्ट्रीय सेवा योजना (NSS) यांच्यावतीने मतदान जनजागृती कार्यक्रम आयोजित करण्यात आला होता. या भव्य कार्यक्रमाचे आज आयोजन करण्यात आले होते. प्राध्यापक, कर्मचारी आणि विद्यार्थी मोठ्या संख्येने सहभागी झाले. 

कार्यक्रमात बाळासाहेब कच्छवे, संजय भालके,राजेश कुलकर्णी व शशिकांत घोरबाड यांनी विद्यार्थ्यांना लोकशाही प्रणालीतील मतदानाच्या महत्त्वावर सखोल प्रकाश टाकला व मतदान प्रक्रियेचे सविस्तर मार्गदर्शन केले. तरुणांच्या सहभागामुळे लोकशाही अधिक बळकट होऊ शकते, यावर त्यांनी विशेष माहिती दिली. संस्थेचे अधिष्ठाता प्रा. संजय देठे यांनी विद्यार्थ्यांना सुजाण मतदार होण्याचे आवाहन केले. या उपक्रमामुळे उपस्थितांमध्ये लोकशाहीबद्दल जागरूकता निर्माण झाली.कार्यक्रमाच्या शेवटी उपस्थित सर्वांनी शपथ घेतली की, ते प्रत्येक निवडणुकीत मतदान करून लोकशाही मजबूत करतील. विद्यार्थ्यांसाठी हा कार्यक्रम प्रेरणादायी ठरला असून, भविष्यातील सुजाण मतदार घडवण्यात महत्त्वाची भूमिका बजावेल.

राष्ट्रीय सेवा योजना एनएसएसचे प्रतिक सरोदे, ज्ञानेश्वरी सुर्वे, जयराम चिंचोले यांनी यशस्वीतेसाठी परिश्रम घेतले.

०००००

 वृत्त क्र. 1085

स्वीपच्यावतीने मतदान जनजागृतीसाठी बारड येथे महिला मेळावा

उपस्थिताना मतदानाची शपथ दिली

नांदेड, १४ नोव्हेंबर:- जिल्हा परिषद हायस्कुल बारड, ता. मुदखेड येथे स्विप कक्षामार्फत मतदान जनजागृती अभियानाअंतर्गत आज महिला मेळाव्याचे आयोजन करण्यात आले होते.

मेळाव्याची सुरुवात ही  मी मतदान करणारच स्वाक्षरीपटाने करण्यात आली. स्वाक्षरी करताना महिला मतदारामध्ये उत्साह दिसून आला.

स्वाक्षरीनंतर लगेच महिलांनी सेल्फी काढला. सर्व महिला हिरीरीने सेल्फी पॉईंट वर सेल्फी काढण्यासाठी रांगा लावून उपस्थित होत्या. महिला मेळाव्यात महिलां मतदारांना मतदान कसे करावे याची माहिती देण्यात आली.

Voter helpline व app चा वापर कसा करावा याबद्दल मार्गदर्शन करण्यात आले. व वापर करण्यासाठी सर्वांना सूचना देण्यात आले. उपस्थित मतदारांना मतदानाची शपथ देण्यात आली. मानवी साखळी तयार करून आधी मतदान, मगच काम अशा घोषणा देण्यात आल्या.

शाळेतील बेसबॉल मुलींचा संघ ही राज्यस्तरीय स्पर्धेत निवड झाल्याने सर्व संघाचा सहभाग घेऊन फळीवर मी मतदान करणारच असे लिहून खेळाची सुरुवात करण्यात आली.

या मेळाव्यास स्विप कक्ष प्रमुख सुरेश पाटील, नितीन दुगाने, विजय मस्के व शाळेचे मुख्याध्यापक श्रीमती तळनकर व सर्व स्टाफ उपस्थित होते.

००००००

वृत्त क्र. 1084

भोकर मतदारसंघातील उमेदवारांची खर्च निरीक्षकानी केली द्वितीय तपासणी

नांदेड, दि. 14 नोव्हेंबर :- भोकर मतदारसंघातील उमेदवारांच्या निवडणूक खर्चाची द्वितीय तपासणी खर्च निरीक्षक मयंक पांडे यांनी 12 नोव्हेंबर रोजी केली.  यावेळी काही उमेदवार तर काही उमेदवारांचे प्रतिनिधी हजर होते. 

गुजरात कॅडरचे 2009 बॅचचे आयकर विभागाचे वरिष्ठ अधिकारी मयंक पांडे हे सुरत येथे आयकर विभागात अतिरिक्त आयुक्त म्हणून कार्यरत आहेत. त्याच्याकडे भारतय निवडणूक आयोगाने नांदेड जिल्ह्यातील किनवट, हदगाव , भोकर, नांदेड उत्तर व नांदेड दक्षिण या विधानसभा क्षेत्राचे खर्च निरीक्षक म्हणून जबाबदारी सोपविली आहे. मयंक पांडे (आयआरएस) व त्यांचे संपर्क अधिकारी जिल्हा परिषद नांदेडचे मुख्य लेखा व वित्त अधिकारी शिवप्रकाश चन्ना हे आहेत. खर्च निरीक्षक मयंक पांडे यांनी 12 नोव्हेंबर रोजी उमेदवाराच्या खर्चाची द्वितीय तपासणी करुन मार्गदर्शक सूचना दिल्या. यावेळी सहायक निवडणूक निर्णय अधिकारी तथा भोकरचे तहसिलदार विनोद गुंडमवार, सहायक खर्च निरीक्षक मारोती फुलारी, खर्च विभागाचे पथक प्रमुख पी. व्ही. गोविंदवार, दिपक गवलवाड व बालाजी वाकडे यांची उपस्थिती होती. 

00000

  वृत्त क्र. 1083

शनिवारी भोकर विधासभा मतदारसंघातील उमेदवारांच्या खर्चाची तृतीय तपासणी 

नांदेड, दि. 14 नोव्हेंबर :-  85 भोकर मतदारसंघातील उमेदवारांची  निवडणूक खर्चाची तीसरी तपासणी उपविभागीय अधिकारी कार्यालय सभागृह, भोकर येथे शनिवार 16 नोव्हेंबर 2024 रोजी सकाळी 10 ते 5 या कालावधीत होणार आहे. या तपासणीसाठी उमेदवारांनी किंवा त्यांच्या प्रतिनिधींनी निवडणुकीच्या अनुषंगाने केलेल्या खर्चाचा हिशोब खर्च निरीक्षकासमोर सादर करणे आवश्यक आहे.

लोकप्रतिनिधीत्व अधिनियम , 1951 च्या कलम 77 नुसार निवडणुकीच्या वेळेस प्रत्येक उमेदवार एकतर तो स्वत: किंवा त्याच्या, तीच्या निवडणूक प्रतिनिधीद्वारे त्याला, तीला नामनिर्देशित करण्यात आले आहे. त्या दिनांकापासून निवडणुकीच्या निकाल लागण्याच्या दिनांकापर्यत दोन्ही दिनांक धरुन, त्याने किंवा त्याच्या निवडणूक प्रतिनिधीने केलेला किंवा प्राधिकृत केलेल्या सर्व खर्चाचा स्वतंत्र व अचूक हिशेब ठेवणे आवश्यक आहे.                  

तपासणीस अनुपस्थित राहणारे उमेदवार भारत निवडणूक आयोगाकडून वेळोवेळी निर्गमित केलेल्या परिपत्रकानुसार कार्यवाहीस पात्र असतील तसेच निवडणूक लढविणाऱ्या उमेदवाराने निवडणूक खर्चाचा हिशोब ठेवणे व दाखल करण्याच्या कायद्याच्या आवश्यकतांचे अनुपालन करण्यात निवडणूक लढविणाऱ्या उमेदवाराने कसूर केल्यास लोकप्रतिनिधीत्व अधिनियम 1951 च्या कलम 10 क अन्वये तो निवडणूक आयोगाकडून तीन वर्षाच्या कालावधीसाठी निरर्ह ठरविण्यास पात्र असेल यांची नोंद घ्यावी .

00000