वृत्त क्र. 651

सामाजिक न्याय दिनानिमित्त गुरुवारी समता दिंडीचे आयोजन

विद्यार्थ्यांनी दिंडीत सहभाग नोंदविण्याचे आवाहन 

 नांदेड, दि. 23 जून :-राज्यात सामाजिक न्याय विभागामार्फत राजर्षी छत्रपती शाहू महाराज यांचा जन्मदिन 26 जून हा सामाजिक न्याय दिन म्हणून साजरा करण्यात येतो. सामाजिक न्याय दिनानिमित्त 26 जून 2025 रोजी सकाळी 8 वा. राजर्षी छत्रपती शाहू महाराज यांचा जन्मदिनानिमित्त समता दिंडीचे आयोजन करण्यात आले आहे. या समता दिंडीमध्ये जिल्ह्यातील महाविद्यालय व शाळेतील विद्यार्थ्यांनी उस्फुर्त सहभाग नोंदवावा, असे आवाहन समाज कल्याण विभागाचे सहाय्यक आयुक्त शिवानंद मिनगिरे यांनी केले आहे. 

सहाय्यक आयुक्त, समाज कल्याण नांदेड कार्यालयामार्फत सामाजिक न्याय दिवस साजरा करण्यात येत आहे. यानिमित्त समता दिंडीचे आयोजन करण्यात आले आहे. महात्मा ज्योतिबा फुले यांच्या पुतळयास मान्यवरांच्या हस्ते पुष्पहार अर्पण करुन समता दिंडीची सुरवात होईल. या समता दिंडीचा मार्ग महात्मा ज्योतिबा फुले पुतळा, स्नेहनगर ते राजर्षी छत्रपती शाहू महाराज पुतळा असा असून, राजर्षी छत्रपती शाहू महाराज पुतळा येथे दिंडीचा समारोप होईल.

00000

वृत्त क्र. 650

जिल्हा न्यायालयात योगा दिन मोठया उत्साहात साजरा 

नांदेड, दि. 23 जून :- महाराष्ट्र राज्य विधी सेवा प्राधिकरण, मुंबई यांच्या निर्देशानुसार व जिल्हा विधी सेवा प्राधिकरणाचे अध्यक्ष तथा प्रमुख जिल्हा न्यायाधीश सुनिल गं. वेदपाठक यांच्या मार्गदर्शनाखाली जिल्हा न्यायालयाच्या प्रांगणात 21 जून 2025 रोजी सकाळी 7 वा. जागतिक योगा दिवस साजरा करण्यात आला.

या कार्यक्रमामध्ये जिल्हा अभिवक्ता संघाचे जेष्ठ विधीज्ञ अॅड. एच.आर.जाधव तथा रिटेनर लॉयर जिल्हा विधी सेवा प्राधिकरण हे योग प्रशिक्षक होते. त्यांनी योगा मधील विविध आसनाची माहिती दिली. त्यामध्ये समस्थी, उर्ध्व हस्तासन, उत्तानासन,  अर्ध उत्तानासन, उत्थिता अश्व संचलासन, चतुरंग दंडासन, उर्ध्वमुख, अधोमुख, उत्थिता अश्व संचलनासन शवासन, मकरासन तसेच अनुलोम, विलोम व कपाळभाती, अशा विविध आसना विषयी माहिती व प्रशिक्षण देवुन त्यांचे उपयोग सांगितले. या कार्यक्रमामध्ये जिल्हा न्यायालय येथील अधिकारी, कौटुंबिक न्यायालयाचे न्यायाधीश, न्याय रक्षक कार्यालयाचे अधिकारी कर्मचारी उपस्थित होते. कार्यक्रमाचे प्रास्ताविक जिल्हा विधी सेवा प्राधिकरणाचे सचिव शरद जी. देशपांडे यांनी करुन योगाचे जीवनामधील महत्व विशद केले. रामेश्वर गायकवाड  यांनी  आभार  मानले. कार्यक्रमास एकुण 80 ते 100 लोक उपस्थित होते. 

000

दि. 21 जून 2025

वृत्त क्र. 649

जिल्हा ग्रंथालय अधिकारी कार्यालयात योग दिन साजरा                                                                            

नांदेड दि. 21 जून :-आंतरराष्ट्रीय योग दिनानिमित्त जिल्हा ग्रंथालय अधिकारी कार्यालय व विचार विकास मंदिर नांदेड यांच्या संयुक्त विद्यमाने आज 21 जून रोजी जिल्हा ग्रंथालयात योग दिनाचे आयोजन करण्यात आले होते. या कार्यक्रमात योग प्रशिक्षकांनी योगा विषयी माहिती देवून प्रात्यक्षिके करुन दाखविली. यावेळी सर्व योग साधकांना व विद्यार्थ्यांना वाचनाची आवड जोपासण्यासाठी सभासद होण्याचे आवाहन जिल्हा ग्रंथालय अधिकारी यांच्यामार्फत करण्यात आले. यावेळी योग साजरा करण्याचे महत्व सांगण्यात आले. 

यावेळी जिल्हा ग्रंथालय अधिकारी कार्यालयातील अधिकारी कर्मचारी तसेच विचार विकास मंदिर विद्यालयाचे विद्यार्थी, शिक्षक यांची उपस्थिती होती.

000

21 जून 2025

 वृत्त क्र. 648

11 व्या आंतरराष्ट्रीय योग दिन उत्साहात साजरा

नियमीत योगा ही आरोग्यासाठी संजीवनी आहे

- विशेष पोलीस उपमहानिरीक्षक शहाजी उमाप 

नांदेड दि. 21 जून :- नियमीत योगा ही आरोग्यासाठी संजीवनी आहे. सर्वांनी या योग दिनाच्या औचीत्याने नियमीत योगा करुन आपले आरोग्य सुदृढ करावे, असे आवाहन विशेष पोलीस उपमहानिरीक्षक शहाजी उमाप यांनी केले. आज 11 व्या आंतरराष्ट्रीय योग दिनानिमित्त आयोजित कार्यक्रमात ते बोलत होते.

आयुष मंत्रालय, भारत सरकार, महाराष्ट्र शासन, क्रीडा व युवक सेवा संचालनालय, महाराष्ट्र राज्य,पुणे, जिल्हा प्रशासन, जिल्हा पोलिस अधिक्षक कार्यालय, जिल्हा क्रीडा अधिकारी कार्यालय, शिक्षण विभाग, जिल्हा परिषद, योग विदया धाम, पतंजली योग समिती, जिल्हा योग संघटना, योग विद्येचा प्रसार करणाऱ्या स्थानिक संस्थांचे प्रतिनिधी व विविध खेळ संघटना यांच्या संयुक्त विद्यमाने आज 21 जून,2025 रोजी सकाळी 7 वा. पोलीस परेड मैदान, वजिराबाद, नांदेड येथे या आंतरराष्ट्रीय योग दिनाचे आयोजन करण्यात आले होते.

यावेळी जिल्हाधिकारी राहुल कर्डिले, जिल्हा परिषदेच्या मुख्य कार्यकारी अधिकारी श्रीमती मेघना कावली, जिल्हा पोलीस अधिक्षक अबिनाश कुमार, मनपा आयुक्त डॉ. महेशकुमार डोईफोडे, सहाय्यक जिल्हाधिकारी अनन्या रेडडी, निवासी उपजिल्हाधिकारी महेश वडदकर, अतिरिक्त पोलीस अधिक्षक सुरज गुरव, पोलीस उपअधीक्षक श्रीमती अश्विनी जगताप, शिक्षणाधिकारी माध्यमिक माधव सलगर, समाज कल्याण विभागाचे सहाय्यक आयुक्त शिवानंद मिनगीरे, उप मुख्य कार्यकारी अधिकारी राजकुमार मुक्कावार, जिल्हा क्रीडा अधिकारी जयकुमार टेंभरे आदींची उपस्थिती होती. 

यावेळी जिल्हाधिकारी राहुल कर्डिले यांनी उपस्थित नागरिकांना करो योग रहो निरोग असा संदेश देवून 11 व्या आंतरराष्ट्रीय योग दिनाच्या शुभेच्छा दिल्या.

आयुष मंत्रालय, भारत सरकारच्या वतीने 21 जूनहा दिवस आंतरराष्ट्रीय योगा दिन म्हणून आयोजित करण्याचे निर्देश दिले असून प्रधानमंत्री नरेंद्र मोदीजी यांनी सन 2014 च्या राष्ट्रीय महासभेत 21 जून हा दिवस आंतरराष्ट्रीय योगादिन म्हणून दरवर्षी साजरा करण्याचा ऐतिहासिक निर्णय घेतला आहे. त्यानुषंगाने दरवर्षी 21 जून हा दिवस आंतरराष्ट्रीय योगा दिन म्हणून जगभरात मोठया उत्साहाने साजरा करण्यात येतो. योगा दिनाच्या निमीत्ताने जगभरात योगासनाची परंपरा स्वीकारणे व ती अंगीकारणे, ही आपल्या देशासाठी अभिमानाची बाब आहे. योगा हा आपल्या भारतीय संस्कृती वारसाचा अविभाज्य घटक आहे.

याप्रसंगी योग विदयाधाम व पतंजली योग समिती यांचेमार्फत उपस्थितांना आयुष मंत्रालय, भारतसरकार च्या प्रोटोकालनुसार पोलादवार (योगगुरु), श्रीमती शकुतंला कलंबरकर,श्रीमती अनिता नेरकर, श्रीमती राणी दळवी,श्रीमती सुजाता गोरेआदीनी योगासनाचे धडे दिले. याप्रसंगी संजय पवार, रवी पालमकर, रेणगुंटवार, श्रीमती श्रृती चिंतावार, श्रीमती मंगला जोंधळे,  नारायण आष्टुकर आदी योगसाधकाच्या कृती मधील सुधारणा करण्याचे काम केले. कार्यक्रमाचे सुत्रसंचलन प्रलोभ कुलकर्णी यांनी तरआभार माध्यमिक शिक्षणाधिकारी यांनी मानले.

या योग दिन कार्यक्रमासाठी जिल्हयातील पिनॅकल इंग्लिश मेडीयम स्कुल,  डीव्हीएम इंग्लिश मेडीयम स्कुल,  व विविध शाळा/संस्थेतील विदयार्थी, जिल्हयातील एकविद्य क्रीडा संघटनेचे खेळाडू मुले-मुली व पदाधिकारी तसेच जिल्हयातील विविध शासकीय कार्यालयाचे अधिकारी/कर्मचारी, पोलीस अधिकारी/ कर्मचारी, एसडीआरएफचे अधिकारी/कर्मचारी, जिल्हा योग संघटना व योग विद्येचा प्रसार करणा-या स्थानिक संस्थांचे प्रतिनिधी व योगप्रेमी आदीनी उत्सफुर्तपणे सहभाग नोंदवला. 

हा कार्यक्रम यशस्वी करणेसाठी जिल्हा क्रीडा अधिकारी जयकुमार टेंभरे यांचे मार्गदर्शनाखाली कार्यासन प्रमुख राज्य क्रीडा मार्गदश्रक बालाजी शिरसीकर, क्रीडा ‍अधिकारी संजय बेतीवार, राज्य क्रीडा मार्गदर्शक श्रीमती शिवकांता देशमुख, चंद्रप्रकाश होनवडजकर, क्रीडा अधिकारी  राहुल श्रीरामवार, विपुल दापके, कनिष्ठ लिपीक दत्तकुमार धुतडे,  संजय चव्हाण,आनंद जोंधळे,  हनमंत नरवाडे, मोहन पवार, सुभाष धोंगडे,  चंद्रकांत गव्हाणे, विद्यानंद भालेराव, यश कांबळे, सोनबा ओव्हाळ आदीनी सहकार्य केले.

00000

वृत्त क्र. 647

श्री गुरूगोबिंदसिंघजी शासकीय औद्योगिक प्रशिक्षण संस्थेत योग दिवस साजरा 

नांदेड, दि. २१ जून:- जगभरामध्ये 21 जून हा आंतरराष्टीय योग दिवस म्हणून साजरा केल्या जातो.  आरोग्याच्या दष्टीने योग साधनेचे अनन्य साधारण महत्व असून राज्यातील सर्व सामान्य व्यक्तिपर्यंत योग साधनेची गोडी वध्दींगत  होण्यासाठी सर्व शासकीय/खाजगी औदयोगिक प्रशिक्षण संस्था मध्ये आंतरराष्टीय योग दिवस साजरा करण्याच्या सुचना प्राप्त झाल्या होत्या.

 त्यानुसार औद्योगिक प्रशिक्षण संस्थेमध्ये आज 21 जून रोजी आंतरराष्टीय योग दिवस साजरा करण्यात आला.   

या निमित्ताने  योगतज्ञ म्हणून आर. जी. केंद्रे, माजी गटनिदेशक व डॉक्टर संगनोड साहेब उपस्थित होते. त्यांनी सध्याच्या धकाधकीच्या जीवनशैलीमुळे  जीवनामध्ये योगसाधनेबददल अतिशय मोलाचे मार्गदर्शन केले.

  कार्यक्रमासाठी संस्थेचे प्राचार्य सुर्यवंशी एस.व्ही, उपप्राचार्य कंदलवाड व्ही.डी. अन्नपुर्णे पी. के. सहायक प्रशिक्षणार्थी सल्लागार मुलभूत प्रशिक्षण तथा अनुषंगीक सुचना केंद्र व्दारा नांदेड तसेच संस्थेतील सर्व कर्मचारी व प्रशिक्षणार्थी उपस्थित होते.  कार्यक्रमाचे सर्व नियोजन राष्टीय सेवा योजनेचे कार्यक्रमाधिकारी पोतदार डी.  ए. यांनी केले.

००००००

21 जून 2025

वृत्त क्र. 646

शरीर आणि मन निरोगी ठेवण्यासाठी योग महत्वाचा-राज्यमंत्री मेघना साकोरे बोर्डीकर

भक्ती लॉन्स येथे आंतरराष्ट्रीय योग दिन मोठया उत्साहात साजरा                                                                    

नांदेड दि. 21 जून :- योग ही भारताला मिळालेली प्राचीन देगणी असून, ती शरीर व मनाला निरोगी ठेवते. आपले आरोग्य चांगले असेल तर देशाच्या प्रगतीसाठी, विकासासाठी हातभार लागतो. योगामुळे मनुष्याचे शरीर व मन निरोगी राहते, असे प्रतिपादन राज्याच्या सार्वजनिक आरोग्य व कुटुंब कल्याण, पाणीपुरवठा आणि स्वच्छता, ऊर्जा, महिला व बालविकास, सार्वजनिक बांधकाम (सार्वजनिक उपक्रम) राज्यमंत्री मेघना साकोरे-बोर्डीकर यांनी केले.                                                                                                                                                                         आज ११ व्या आंतरराष्ट्रीय योग दिनानिमित्त भक्ती लॉन्स येथे पतजंली योग पिठ यांच्यामार्फत आयोजित कार्यक्रमात त्या बोलत होत्या. यावेळी आमदार बालाजी कल्याणकर, नांदेड परिक्षेत्राचे विशेष पोलीस उपमहानिरीक्षक शहाजी उमाप, जिल्हाधिकारी राहुल कर्डिले, पोलीस अधीक्षक अबिनाश कुमार, जिल्हा परिषदेच्या मुख्य कार्यकारी अधिकारी मेघना कावली, मनपा आयुक्त डॉ. महेश कुमार डोईफोडे, आदींची उपस्थिती होती.

आयुष मंत्रालय, भारत सरकार यांच्यावतीने 21 जून हा दिवस आंतरराष्ट्रीय योगा दिवस म्हणून आयोजित करण्याचे निर्देश आहेत. त्यानुसार आज ठिकठिकाणी योगा दिवस साजरा करण्यात आला. योग ही भारताला मिळालेली देणगी असून यामुळे शरीर व मन निरोगी ठेवते. कोरोना नंतर तर योगाचे महत्व सर्व जगाला पटले असून हम फिट तो इंडिया फिट हा प्रधानमंत्री नरेंद्र मोदीजीचा नारा पूर्ण करण्यासाठी  आपण सर्वजण एकत्र येऊ या असे आवाहनही राज्यमंत्री मेघना बोर्डीकर यांनी केले. तसेच योगा हा प्रत्येक घरा-घरात झाला पाहिजे. आपल्या देशाची प्रगती साधायची असेल तर योगा हा आपल्या जीवनाचा अविभाज्य भाग बनवा, असेही त्यांनी सांगितले. 

यावेळी पंतजली योग पिठाच्या योग प्रशिक्षकांनी उपस्थितांकडून विविध आसने करुन घेतली. या योग दिनाच्या कार्यक्रमात नागरिकांसह महिला, मुले यांची मोठया प्रमाणात उपस्थिती होती.

00000

21.6.2025.

नांदेड जिल्हा प्रशासन, जिल्हा परिषद, पोलीस अधीक्षक कार्यालय, जिल्हा क्रीडा अधिकारी कार्यालय व विविध योग संघटना यांच्या संयुक्त विद्यमाने पोलीस कवायत मैदान येथे आंतरराष्ट्रीय योग दिनानिमित्त आयोजित कार्यक्रमास नांदेड परिक्षेत्राचे विशेष पोलीस उपमहानिरीक्षक शहाजी उमाप, जिल्हाधिकारी राहुल कर्डिले, पोलीस अधीक्षक अबिनाश कुमार, जिल्हा परिषदेच्या मुख्य कार्यकारी अधिकारी मेघना कावली, मनपा आयुक्त डॉ महेश कुमार डोईफोडे, आदींची उपस्थिती होती.

👆 व्हिडिओ👆

21.6.2026

 आंतरराष्ट्रीय योगा दिवस कार्यक्रम भक्ती लॉन्स नांदेड

 राज्यमंत्री मेघना साकोरे बोर्डीकर, आमदार बालाजी कल्याणकर, नांदेड परिक्षेत्राचे विशेष पोलीस उपमहानिरीक्षक शहाजी उमाप, जिल्हाधिकारी राहुल कर्डिले, पोलीस अधीक्षक अबिनाश कुमार, जिल्हा परिषदेच्या मुख्य कार्यकारी अधिकारी मेघना कावली, मनपा आयुक्त डॉ महेश कुमार डोईफोडे, आदींची उपस्थिती होती.

👆 व्हिडिओ👆

21 जून 2025