महत्वाचे वृत्त क्रमांक  216

प्रधानमंत्री आवास योजना ग्रामीण टप्पा २ अंतर्गत 

नांदेड जिल्ह्यातील १ लक्ष २० हजार लाभार्थीना पाहिला हप्ता वितरण

बालेवाडी, पुणे येथील राज्यस्तरीय कार्यक्रमाचे थेट प्रक्षेपण 

नांदेड येथील कार्यक्रमात खासदार डॉ. अजित गोपछडे यांची उपस्थिती 

घरकुलांचे बांधकाम गतीने होण्यासाठी प्रयत्न करणार : मुख्य कार्यकारी अधिकारी मीनल करनवाल 

#नांदेड दि. २२ फेब्रुवारी: केंद्रीय गृहमंत्री अमित शहा, मुख्यमंत्री देवेंद्र फडणवीस यांच्या उपस्थितीत पुणे येथील बालेवाडीतील प्रधानमंत्री आवास योजना कार्यक्रम आज नांदेडच्या शेकडो लाभार्थ्यांनी नांदेड वरून दृकश्राव्य माध्यमातून बघितला. नांदेड जिल्ह्यातील १लक्ष २० हजार लाभार्थ्यांना आज पहिला हप्ता देण्यात आला. खासदार डॉ. अजित गोपछडे, मुख्य कार्यकारी अधिकारी मीनल करनवाल आदींची यावेळी उपस्थिती होती.

केंद्रीय गृहमंत्री अमित शाह, मुख्यमंत्री देवेंद्र फडणवीस,उपमुख्यमंत्री एकनाथ शिंदे, उपमुख्यमंत्री अजित पवार, ग्राम विकास व पंचायतराज मंत्री जयकुमार गोरे, यांच्या प्रमुख उपस्थितीत पुणे बालेवाडी येथे आयोजित कार्यक्रमात दूरदृश्य प्रणालीद्वारे राज्यातील प्रधानमंत्री आवास योजना ग्रामीण टप्पा २ मधील २० लक्ष लाभार्थ्यांना मंजुरी पत्र आणि १० लक्ष लाभार्थ्यांना पहिला हप्ता वितरण करण्यात आले. यानिमित्ताने नांदेड येथे जिल्हाधिकारी कार्यालयातील नियोजन भावनात जिल्हाभरातील लाभार्थी एकत्रित आले होते. 

नांदेड जिल्ह्यामध्ये प्रधानमंत्री आवास योजना ग्रामीण टप्पा दोन अंतर्गत एकूण एक लक्ष एकोणपन्नास हजार लाभार्थी मंजूर आहेत. त्यापैकी आज १लक्ष २० हजार लाभार्थ्यांना १५ हजारचा पहिला टप्पा बहाल करण्यात आला. त्यांच्या खात्यात थेट हा पैसा जमा झाला. यावेळी अनेक लाभार्थ्यांनी शासनाने तातडीने यासंदर्भात निर्णय घेतल्याचा आनंद व्यक्त केला. प्रधानमंत्री आवास योजनेअंतर्गत घर बांधणीसाठी एक लक्ष २० हजार रुपये देण्यात येतात. त्यातील पहिला टप्पा आज १५ हजाराचा या लाभार्थ्यांना देण्यात आला. तर याच वेळी १ लक्ष ४९ हजार लाभार्थ्यांना मंजुरी पत्र देण्यात आले उर्वरित लाभार्थ्यांना देखील हा हप्ता मिळणार असल्याचे यावेळी खासदार डॉ. अजित गोपछडे यांनी सांगितले.

नियोजनभवनातील या कार्यक्रमाला खासदार डॉ.अजित गोपछडे, मुख्य कार्यकारी अधिकारी मीनल करनवाल, अतिरिक्त मुख्य कार्यकारी अधिकारी संदीप माळोदे प्रकल्प संचालक जिल्हा ग्रामीण विकास यंत्रणा डॉ. संजय तुबाकले, उपमुख्य कार्यकारी अधिकारी राजकुमार मुक्कावार,संजय कोडगे, सचिन उमरेकर आदीसह शेकडो लाभार्थी उपस्थित होते.

 यावेळी बालेवाडी, पुणे येथील कार्यक्रमाचे थेट प्रक्षेपण लाभार्थ्यांना दाखविण्यात आले.

सर्वसामान्यांचे स्वतःच्या घराचे स्वप्न साकार होण्यासाठी प्रधानमंत्री आवास योजना राबविण्यात येत आहे. या योजनेच्या दुसऱ्या टप्प्यात सन २०२४-२५ मध्ये जिल्ह्यात एक लक्ष 49 हजार घरकुलांना मंजुरी दिली आहे. यापैकी एक लक्ष 20 हजार लाभार्थ्यांना पहिला हप्ता वितरीत केला जात आहे. 

प्रधानमंत्री नरेंद्र मोदी यांची प्रधानमंत्री आवास योजना ही महत्त्वाकांक्षी योजना असून या योजनेतून ज्यांना घर मिळाले आहेत त्यांना आणखीनही सुविधा उपलब्ध केल्या जातील. प्रत्येकाच्या घराचे स्वप्न पूर्ण व्हावे यासाठी वेळोवेळी या योजनेचा पाठपुरावा केला जाईल. सर्व लाभार्थ्यांना याचा लाभ मिळेल कोणीही या लाभापासून वंचित राहणार नाही असेही यावेळी खासदार डॉ.अजित गोपछडे यांनी सांगितले.

प्रधानमंत्री आवास योजनेतील घरकुले गतीने पूर्ण करण्यासाठी जिल्हा प्रशासन कटिबद्ध असून लाभार्थ्यांनीही यासाठी सहकार्य करावे, असे आवाहन जिल्हा परिषदेचे मुख्य कार्यकारी अधिकारी मीनल करणवाल यांनी केले.

यावेळी उपस्थितांच्या हस्ते प्रातिनिधिक स्वरुपात निवडक लाभार्थ्यांना मंजुरी आदेश आणि व काही लाभार्थ्यांना पहिल्या हप्त्याचे वितरण करण्यात आले. 

***

 #मुख्यमंत्रीबळीराजावीजसवलतयोजना

#नांदेड

 

वृत्त क्रमांक  215 

पालकमंत्री अतुल सावे यांचा नांदेड दौरा 

नांदेड दि. 22 फेब्रुवारी : राज्याचे इतर मागास बहुजन कल्याण, दुग्धविकास, अपारंपारिक ऊर्जा मंत्री तथा नांदेड जिल्ह्याचे पालकमंत्री अतुल सावे हे नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील. 

रविवार 23 फेब्रुवारी रोजी निवासस्थान छत्रपती संभाजीनगर येथून वाहनाने सकाळी 10 वा. शासकीय विश्रामगृह नांदेड येथे आगमन व राखीव. दुपारी 12 वा. अर्थसंकल्पीय बाबीबाबत प्रेस. स्थळ- शासकीय विश्रामगृह नांदेड. सायं. 4 वा. राज्यस्तरीय महसूल क्रीडा व सांस्कृतिक स्पर्धा 2025 समारोप कार्यक्रमास उपस्थिती. स्थळ श्री गुरूगोविंदसिंघजी स्टेडीयम नांदेड. सोयीनुसार श्री गुरूगोविंदसिंघजी स्टेडीयम नांदेड येथून वाहनाने छत्रपती संभाजीनगरकडे प्रयाण करतील.

0000

वृत्त क्रमांक 214

क्रिकेटचा अंतिम सामना कोकण विरुध्द पुणे यांच्यात उद्या होणार

महिला उंच उडीमध्ये नाशिक विभाग पहिला

महिला टेबल टेनिस एकेरी व दुहेरीमध्ये अमरावतीची सरसी

उद्या दुपारपर्यंत चालणार क्रीडा स्पर्धा

नांदेड दि. 22 फेब्रुवारी : राज्यस्तरीय महसूल क्रीडा सांस्कृतिक स्पर्धेच्या राज्यस्तरीय क्रीडा स्पर्धा अंतिम टप्प्यात आले असून उद्या दुपारपर्यंत कोणता विभाग बाजी मारणार हे निश्चित होणार आहे. कोकण विभागाची दमदार आगे कुछ सर्व खेळांमध्ये चालू असून सर्वांचे लक्ष असणारा क्रिकेटचा सामना कोकण विरुद्ध पुणे असा उद्या रंगणार आहे उद्या चार वाजेपर्यंत सर्वसाधारण विजेतेपद निश्चित होणार असून पाच वाजताच्या सुमारास बक्षीस वितरण होणार आहे.

गुरुगोविंद सिंह जी क्रीडा संकुलात उद्या महसूल मंत्री चंद्रशेखर बावनकुळे व पालकमंत्री अतुल सावे यांच्या हस्ते विजेत्यांना बक्षीस दिले जाणार आहे.

आज दुसऱ्या दिवशीच्या खेळांना सुरूवात झाली.आठही संघ एकमेका विरुध्द खेळत असून काही व्यक्तिगत प्राविण्‍यामुळे खेळांचे सूत्र प्रत्येक विभागाने आपल्या ताब्यात राखून ठेवले आहे. 

काल झालेल्या क्रिकेट सामन्यात उपांत्य फेरी सामना कोकण विरुध्द अमरावती विभाग यांच्यात झाला हा सामना कोकण विभाग चार गडयांनी विजयी होऊन अंतीम फेरीत धडकला आहे. दुसऱ्या सत्रात पुणे विरुध्द नाशिक या सामन्यात पुणे विभागाने बाजी मारली. आता अंतिम सामना कोकण विरुध्द पुणे यांच्यात होणार. तर पुरुषाच्या थाळी फेकमध्ये पहिला क्रमांक नाशिक, दुसरा छ.संभाजीनगर, तीसरा क्रमांक पुणे विभागाने पटकाविला.

धावणे 100 मी पुरुष यामध्ये पहिला छ. संभाजी नगर, दुसरा अमरावती तर तीसरा कोकण विभागाने विजय मिळविला. धावणे 200 मीटर पुरुष  पहिला अमरावती, दुसरा छ. संभाजीनगर तर तीसरा क्रमांक पुणे विभागाने पटकाविला. 400 मीटर धावणे यात छ. संभाजीनगर पहिला तर दुसरा नागपूर, तृतीय क्रमांक पुणे विभागाने मिळविला. 4 बाय 100 रिले धावणे पुरुष यात पहिला क्रमांक कोकण , दुसरा छ. संभाजीनगर तर तीसरा क्रमांक पुणे विभागाने मिळविला. 4 बाय 400 रिले धावणे यात कोकण विभाग पहिला तर दुसरा नागपूर तर तीसरा नाशिक विभागाने विजय मिळविला.

थाळी फेक पुरुष यात पहिला नाशिक, दुसरा छ. संभाजीनगर तीसरा पुणे विभागाने विजय मिळविला.

लॉन टेनिस एकेरी पुरुष फायनल मध्ये अंतिम सामना पुणे विरुध्द छ. संभाजीनगर यांच्यात होवून यामध्ये छ. संभाजीनगर विभागाने बाजी मारली. दुहेरीमध्ये अंतिम सामना अमरावती विरुध्द कोकण यामध्ये होवून कोकण विभाग विजयी झाला.

उंच उडी मध्ये पुरुष यात पहिला कोकण, दुसरा नाशिक व तीसरा क्रमांक पुणे विभागाने मिळविला. भाला फेक यात पहिला पुणे, दुसरा नागपूर तर तीसरा अमरावती विभागाने विजय मिळविला आहे. फुटबॉल यात सेमी फायनल मध्ये नाशिक विभागाने बाजी मारली. दुसऱ्या सत्रात नागपूर विभाग विजय ठरला. अंतिम लढत नाशिक विरुध्द नागपूर यांच्यात होणार आहे. कबड्डी पुरुष यात सेमी फायनलमध्ये नागपूर विरुध्द कोकण सामन्यात कोकण विभागाने बाजी मारली.

जलतरण 50 मीटरमध्ये फ्रीस्टाईल पुरुष यात पहिला नागपूर, दुसरा पुणे, तीसरा क्रमांक कोकण विभागाने तर जलतरण 50 मीटर बॅकस्ट्रोक पुरुष यात पहिला नागपूर, दुसरा पुणे, तीसरा क्रमांक कोकण विभागाने पटकाविला. जलतरण 100 मीटर फ्रीस्टाईल पुरुष यात पहिला पुणे तर दुसरा छ. संभाजीनगर, तीसरा नागपूर विभागाने विजय मिळविला. 4 बाय 50 जलतरण रिले पुरुष यात पहिला पुणे, दुसरा कोकण, तीसरा नागपूर विभागाने विजय मिळविला.

बुध्दीबळ अंतिम सामन्यात कोकण विभागाने बाजी मारली. गोळाफेक पुरुष यात पहिला छत्रपती संभाजीनगर, दुसरा अमरावती, तीसरा नाशिक विभागाने विजय मिळविला. हॉलीबॉल च्या सामन्यात कोकण विभागाने बाजी मारली.

महिलांच्या स्पर्धेमध्ये

खो-खो सामन्यात अमरावती विरुध्द छ. संभाजीनगर यांच्या लढतीत छ. संभाजीनगर विभागाने बाजी मारली. अंतिम सामना बाकी आहे. 100 मीटर धावणे यात पहिला नाशिक, दुसरा छ. संभाजी नगर, तीसरा क्रमांक कोकण विभागाने पटकाविला. तर 200 मीटर धावणे यात पहिला छ. संभाजी नगर, दुसरा नागपूर, तीसरा अमरावती विभागाने बाजी मारली. 400 मीटर धावणे यात पहिला छ. संभाजी नगर, दुसरा कोकण विभाग, तिसरा नाशिक विभागाने विजय मिळविला. 4 बाय 100 रिले धावणे यात पहिला कोकण , दुसरा नागपूर, तीसरा अमरावती तर 4 बाय 400 रिले धावणे मध्ये पहिला छ. संभाजी नगर दुसरा कोकण तर तीसरा अमरावती विभागाने विजय मिळविला.

उंच उडी मध्ये पहिला नाशिक, दुसरा कोकण, तीसरा क्रमांक नागपूर विभागाने मिळविला. रिंग टेनिस अंतिममध्ये अमरावती विरुध्द नाशिक यामध्ये अमरावती विभागाने बाजी मारली. टेबल टेनिस एकेरी मध्ये अंतिम सामन्यात अमरावती विभागाने विजय मिळविला. टेबल टेनिस दुहेरी मध्ये अंतिम सामन्यात अमरावती विभागाने विजय मिळविला. थाळीफेकमध्ये पहिला नागपूर, दुसरा कोकण, तीसरा पुणे विभाग पुढे आहे. गोळाफेकमध्ये पहिला नाशिक, दुसरा नागपूर, तीसरा पूणे विभागाने विजय मिळविला आहे.

00000

वृत्त क्रमांक 213

दर्जेदार सांस्कृतिक कार्यक्रमाने पहिला दिवस गाजवला 

महसूल क्रीडा व सांस्कृतिक स्पर्धेमध्ये एकापेक्षा एक सादरीकरण 

नांदेड दि.२२ फेब्रुवारी : गायन, अभिनय, दिग्दर्शन,वादन सर्वच क्षेत्रात एकापेक्षा एक दमदार सादरीकरणामुळे महसूलच्या सांस्कृतिक कार्यक्रमाला वेगळीच रंगत चढली आहे.महसूल विभागाने काल दर्जेदार सांस्कृतिक कार्यक्रम सादर करून सर्वांना थक्क केले.

२१, २२ व २३ फेब्रुवारीला राज्यस्तरीय महसूल व क्रीडा सांस्कृतिक स्पर्धा नांदेड येथे होत आहे. १० ते १२ वर्षाच्या कालावधीनंतर होणाऱ्या या स्पर्धांमध्ये सांस्कृतिक स्पर्धा देखील तेवढ्याच दर्जेदार होत असून काल नागपूर, कोकण,नाशिक आणि जमाबंदी आयुक्त कार्यालयाच्या चमुने सांस्कृतिक कार्यक्रमाचे सादरीकरण केले.

नागपूर विभागाने आदिवासी भागात लोकप्रिय असलेल्या रेला नृत्य सादर केले. वादन गायन या प्रकारातही नागपूरचे सादरीकरण अप्रतिम होते. कोकण विभागाने देखील अप्रतिम असे नाटक सादर केले. या नाटकामध्ये त्यांनी नृत्य, वादन ,गायन, सर्व प्रकार घेतले.

सध्याची पिढी मोबाईल आणि सोशल मीडियाच्या गर्तेत जगणे विसरून गेली आहे. अंतर्मुख झालेली पिढी मानसिक दृष्ट्या कमकुवत होत असल्याचे समाजातील कटू सत्य त्यांनी या नाट्यछटेतून व्यक्त केले. या सांस्कृतिक कार्यक्रमाला जिल्हाधिकारी राहुल कर्डिले,यापूर्वीचे जिल्हाधिकारी अभिजीत राऊत, सातारा जिल्हाधिकारी संतोष पाटील यांच्यासह मान्यवर उपस्थित होते.

काल दुपारी नागपूरचे जिल्हाधिकारी डॉ.विपीन इटनकर, यवतमाळचे जिल्हाधिकारी डॉ.पंकज आशिय,जालना जिल्हाधिकारी श्रीकृष्णनाथ पांचाळ, हिंगोली जिल्हाधिकारी अभिनव गोयल, रायगडचे जिल्हाधिकारी किशन जावळे यांनी विविध कार्यक्रमाला उपस्थिती लावली.

जवळपास दोन हजाराच्या वर अधिकारी कर्मचारी या कार्यक्रमांसाठी व क्रीडा स्पर्धांसाठी नांदेडमध्ये आले आहे रात्री उशिरापर्यंत चालणारे सांस्कृतिक कार्यक्रम हा एक या कर्मचाऱ्यांसाठी गेट-टुगेदर सारखा कार्यक्रम असतो त्यामुळे यशवंत महाविद्यालयाच्या प्रांगणातील भव्य मंडप देखील अपुरा पळावा इतकी गर्दी या कार्यक्रमांना होत आहे.

शनिवारी सायंकाळी अमरावती, छत्रपती संभाजी नगर व पुणे विभागाचे सादरीकरण होणार आहे. रविवारी बक्षीस वितरणामध्ये अधिकृत विजेत्याची घोषणा केली जाणार आहे. पहिल्या दिवसाच्या सांस्कृतिक सोहळ्याचे उद्घाटन जथेदार गुरुद्वारा लंगर साहेबचे संत बाबा बलविंदर सिंग जी व सहआयुक्त राज्य वस्तू सेवा कर विभाग अभिजीत राऊत, जिल्हाधिकारी राहुल कर्डिले पोलीस अधीक्षक अबिनाश कुमार यांच्यासह विविध विभागाच्या अधिकाऱ्यांच्या उपस्थितीत झाले.

000000

 वृत्त क्रमांक 212

महसूलमंत्री चंद्रशेखर बावनकुळे यांचा दौरा

नांदेड दि. 22 फेब्रुवारी :- राज्याचे महसूल मंत्री चंद्रशेखर बावनकुळे हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहिल.

रविवार दिनांक 23 फेब्रुवारी 2025 रोजी नागपूर येथून विमानाने सायं.5.35 वा. नांदेड विमानतळ येथे आगमन. सायं. 5.40 वा. नांदेड विमानतळ येथून मोटारीने कार्यक्रम स्थळी प्रस्थान. सायं. 6 वा. राज्यस्तरीय महसूल क्रीडा व सांस्कृतिक स्पर्धा 2025 च्या समारोपीय कार्यक्रमास उपस्थिती. स्थळ: श्री गुरुगोबिंद सिंघजी स्टेडियम, नांदेड . सायं.7  वा. श्री गुरुगोबिंद सिंघजी  स्टेडियम येथून मोटारीने नांदेड विमानतळाकडे प्रयाण. सायं. 7.15 वा. नांदेड विमानतळ येथे आगमन. सांय. 7.30 वा. नांदेड विमानतळ येथून विमानाने मुंबई कडे प्रयाण करतील.

00000

  वृत्त क्रमांक 211

रविवारी राज्यस्तरीय महसूल क्रीडा स्पर्धेचा शानदार समारोप 

 महसूल मंत्री चंद्रशेखर बावनकुळे पालकमंत्री अतुल सावे यांच्या हस्ते बक्षीस वितरण 

नांदेड दि.२२ फेब्रुवारी : राज्यस्तरीय महसूल क्रीडा स्पर्धेचा समारोप उद्या २३ फेब्रुवारी रोजी सायंकाळी चार वाजता श्री. गुरु गोविंदसिंह जी क्रीडा संकुलात होणार आहे.

समारोपाच्या या कार्यक्रमाला खेळाडूंचे कौतुक करण्यासाठी महसूल मंत्री चंद्रशेखर बावनकुळे येणार आहेत. तर पालकमंत्री अतुल सावे देखील या कार्यक्रमाला उपस्थित राहणार आहेत.

राज्याचे महसूल मंत्री चंद्रशेखर बावनकुळे हे उद्घाटनाच्या सोहळ्याला उपस्थित राहणार होते. परंतु काही कारणास्तव ते येऊ शकले नाही. इतर मागास बहुजन कल्याण, पशुसंवर्धन व अपारंपारिक ऊर्जामंत्री तथा जिल्ह्याचे पालकमंत्री अतुल सावे हे देखील उद्घाटनाच्या सोहळ्याला येऊ शकले नव्हते. दोन्ही मंत्र्यांनी आपला दौरा निश्चित केला आहे. महसूल मंत्री नागपूर वरून उद्या नांदेडमध्ये पोहोचणार आहेत.

जवळपास दोन हजारावर खेळाडू सध्या या स्पर्धांमध्ये सहभागी झाले आहेत. अनेक जिल्ह्याचे जिल्हाधिकारी दरम्यानच्या काळात या स्पर्धेसाठी उपस्थित राहिले आहे. नांदेडसाठी हे फार मोठे आयोजन असून उद्या या राज्यस्तरीय स्पर्धेचा समारोप होत आहे. त्यामुळे खेळाडूंचे कौतुक करण्यासाठी महसूल मंत्री आणि पालकमंत्री दोघेही उद्या समारोपाच्या कार्यक्रमाला पोहोचणार असल्याची माहिती प्रशासनाने दिली आहे. 

उद्या सायंकाळी चार वाजता गुरुगोविंद सिंह जी क्रीडा संकुलात हा समारोप सोहळा होणार आहे.

00000

  वृत्त क्रमांक 210

पदवी सोबतच छोटे छोटे तांत्रिक कौशल्य पूर्ण करा : राज्यमंत्री बोर्डीकर 

 मराठा युवकांनी अण्णासाहेब पाटील आर्थिक विकास महामंडळाचा लाभ घ्यावा : नरेंद्र पाटील 

अर्धापूर येथे हजारो तरुणांच्या उपस्थितीत युवा उमेदवार रोजगार मेळावा 

नांदेड दि.२२ फेबुवारी : विद्यार्थ्यांनी आपल्या पदवीचा अभ्यासक्रम करताना किंवा पदवी झाल्यानंतर कौशल्यपूर्ण एखादा अभ्यासक्रम पूर्ण करावा. ज्यामुळे त्यांना करिअर करणे आणि नोकरी मिळविणे शक्य होईल, अशी सूचना राज्याच्या राज्याच्या  सार्वजनिक आरोग्य व कुटुंब कल्याण, पाणीपुरवठा आणि स्वच्छता, ऊर्जा, महिला व बालविकास, सार्वजनिक बांधकाम (सार्वजनिक उपक्रम) राज्यमंत्री मेघना साकोरे-बोर्डीकर यांनी केली.

भोकरच्या आमदार श्रीजया चव्हाण यांनी शंकरराव चव्हाण महाविद्यालय अर्धापूर येथे आयोजित केलेल्या युवा उमेदवार रोजगार मेळाव्यात श्रीमती बोर्डीकर उद्घाटक म्हणून त्या बोलत होत्या. नांदेड जिल्ह्यातील शंकरराव चव्हाण महाविद्यालय अर्धापूर येथे आयोजित या युवा उमेद रोजगार मेळाव्यामध्ये मोठ्या संख्येने युवक -युवती उपस्थित होत्या.

कार्यक्रमाचे अध्यक्षस्थानी राज्याचे माजी मुख्यमंत्री तथा खासदार अशोक चव्हाण होते. तर विशेष अतिथी म्हणून अण्णासाहेब पाटील आर्थिक विकास महामंडळाचे अध्यक्ष नरेंद्र पाटील, आ.श्रीजया चव्हाण, स्वामी रामानंद तिर्थ मराठवाडा विद्यापीठाचे कुलगुरू मनोहर चासकर,जिल्हाधिकारी राहुल कर्डिले, माजी आमदार अमर राजुरकर, माजी आमदार अमीता चव्हाण आदीं मान्यवरांची उपस्थिती होती.

यावेळी बोलताना बोर्डीकर यांनी आजचे युग कौशल्याचे असून तुमच्या पदवीसोबतच तुम्हाला रोजगारासाठी आवश्यक असणारे कौशल्य प्राप्त असणे आवश्यक आहे. बदलत्या तंत्रज्ञानानुसार व आवश्यकतेनुसार आपल्या अभ्यासक्रमांमध्ये बदल करावा लागणार आहे. जगात सध्या कौशल्याची मागणी आहे. त्यामुळे तुमच्याकडे फक्त पदवी असून चालणार नाही. तर जगाला हवे असणारे कौशल्यही लागणार आहे. त्यामुळे विद्यापीठांनी देखील अशा पद्धतीच्या कमी कालावधीच्या अभ्यासक्रमाची निर्मिती करून नव्या पिढीला कौशल्य प्राप्त करून द्यावे, अशी अपेक्षा त्यांनी व्यक्त केली.

यावेळी अण्णासाहेब पाटील आर्थिक विकास महामंडळाचे अध्यक्ष नरेंद्र पाटील यांनी आपल्या महामंडळामार्फत मराठा समाजातील सुशिक्षित बेरोजगार युवकांसाठी मोठ्या प्रमाणात कर्ज परतावा योजना उपलब्ध आहे. म्हणजे थोडक्यात कुणबी मराठा समुदायातील युवकांनी त्यांना आवड असणाऱ्या क्षेत्रातील उद्योग व्यवसाय उभारावा. या उद्योग व्यवसायात उभारण्यासाठी त्यांना बँकेने जे कर्ज दिले आहेत. त्याचा परतावा सरकार करणार आहे. अत्यंत सोपी ही पद्धत आहे. त्यासाठी युवकांनी पुढे यावे ,असे आवाहन त्यांनी यावेळी केले. या योजनेअंतर्गत अनेकांच्या आयुष्यात परिवर्तन झाले आहे. नांदेडमध्ये ही मोठ्या संख्येने या योजनेचा लाभ घ्यावा, असे आव्हान त्यांनी यावेळी उपस्थित युवकांना केले.

माजी मुख्यमंत्री तथा खासदार अशोक चव्हाण यांनी अध्यक्ष स्थानावरून बोलताना प्रत्येक काळाची एक गरज असते. श्रीजया चव्हाण यांनी निवडणुकीमध्ये युवकांना रोजगाराच्या संधी उपलब्ध करून देण्याच्या आवाहन केले होते. त्यानुसार त्यांनी आजचा रोजगार मेळावा घेतला आहे. शेकडो कंपन्या या ठिकाणी आल्या आहेत. हा उपक्रम आता पूर्ण जिल्ह्यामध्ये हळूहळू राबविल्या जाईल. याशिवाय नांदेड जिल्ह्यामध्ये मोठे उद्योग सुरू करण्यासाठी आपण शासनाकडे पाठपुरावा करणार आहे. केवळ नांदेडच नव्हे तर मराठवाड्यात मोठ्या प्रमाणात उद्योग व्यवसाय यावेत यासाठीचे आपले प्रयत्न असून त्यातून युवकांच्या हाताला काम मिळावे, हा उद्देश असल्याचे त्यांनी स्पष्ट केले.जवळपास ४ हजारावर बेरोजगारांची नोंद झाली असल्याचे त्यांनी सांगितले.

स्वामी रामानंद तीर्थ मराठवाडा विद्यापीठाचे कुलगुरू मनोहर चासकर यांनीही यावेळी संबोधित केले. जिल्हाधिकारी राहुल कर्डिले यांनी यावेळी विद्यार्थ्यांशी संवाद साधताना छोट्या छोट्या नोकरी पासून सुरुवात करा. सुरुवात करणे महत्त्वाचे आहे. नंतर दिशा मिळत राहते असे स्पष्ट करून कोणत्याही क्षणी  हार न मानण्याच्या आवाहन विद्यार्थ्यांना केले. कार्यक्रमाचे आभार प्रदर्शन नरेंद्र चव्हाण यांनी केले. सूत्रसंचालन विश्वंधार देशमुख यांनी केले.

00000