धर्मादाय रुग्णालयाचे आरोग्य शिबीर

निर्धन, गरीब रुग्णांनी लाभ घ्यावा

नांदेड, दि. 2 :- धर्मादाय रुग्णालय योजनेंतर्गत रविवार 3 डिसेंबर 2017 रोजी नांदेड येथे तीन ठिकाणी  मोफत आरोग्य शिबिराचे आयोजन केले असून जास्तीत जास्त निर्धन व गरीब रुग्णांनी लाभ घ्यावा, असे आवाहन सहाय्यक धर्मादाय आयुक्त ईना धांडे यांनी केले आहे.  

आरोग्य शिबिराचे आयोजन सार्वजनिक न्यास नोंदणी कार्यालय गाडीपुरा येथे वाडेकर डॉक्टर, आंध्रा समितीच्या बाजुला गवळीपुरा येथे मोनार्क कॅन्सर हॉस्पीटल येथे भालेराव डॉक्टर तर मार्कंडेश्वर मंदिराजवळ गंगाचाळ मिलगेट परिसराजवळ रयत रुग्णालय डॉक्टर येथे करण्यात आले आहे. गरीब रुग्णांना मोफत उपचार तसेच दुर्बल लोकांना सवलतीच्या दरात उपचार देण्याची तरतूद आहे. कायद्याप्रमाणे शिबिरात गरजु लोकांना सर्व तपासण्या करुन पुढील मोफत उपचार महाराष्ट्रातील कोणत्याही धर्मादाय रुग्णालयात आजार संपुर्ण बरा होईपर्यंत देण्यात येईल, असेही प्रसिद्धी पत्रकात म्हटले आहे.  

00000

मतदार नोंदणी, दावे, हरकती

स्विकारण्यास मुदतवाढ

नांदेड दि. 2 :- भारत निवडणूक आयोगाने छायाचित्र मतदार याद्यीत नाव नोंदणी, दावे व हरकती स्विकारणे तसेच बीएलओ यांनी घरोघरी भेटी देण्याच्या कार्यक्रमास शुक्रवार 15 डिसेंबर 2017 पर्यंत मुदतवाढ दिली आहे. मतदार यादीत नाव नोंदणी, दुरुस्ती, वगळणीबाबत नागरिकांनी बीएलओ यांना सहकार्य करावे, असे आवाहन जिल्हाधिकारी तथा जिल्हा निवडणूक अधिकारी यांनी केले आहे.

यापुर्वी भारत निवडणूक आयोगाने 3 ऑक्टोंबर ते 30 नोव्हेंबर 2017 या कालावधीसाठी छायाचित्र मतदार याद्यांचा संक्षिप्त पुनरिक्षण कार्यक्रम घोषीत केला होता. जिल्ह्यातील 9 विधानसभा मतदारसंघाच्या प्रारुप मतदार याद्यांची प्रसिद्धी करण्यात आली असून नाव नोंदणी संदर्भात दावे व हरकती स्विकारण्यात आल्या होत्या, असेही प्रसिद्धी पत्रकात नमुद केले आहे.

000000

सोयाबीन अनुदान वितरणाबाबत  

जिल्हा उपनिबंधकाचे आवाहन  

नांदेड , दि. 2 :- खरीप हंगाम सन 2016-17 मध्ये सोयाबीन उत्पादक शेतकऱ्यांना मंजूर झालेले सोयाबीन अनुदान वितरण करण्यात येत आहे. काही लाभार्थ्यांनी बँक खात्याचा तपशील दिला नसल्याने रक्कम बचत खात्यात जमा करण्यास अडचण येत आहे. बँक खात्यात रक्कम जमा झाली नाही अशा पात्र लाभार्थ्यांनी आधार कार्डची झेरॉक्स प्रत, बँक खात्याचा तपशीलासह संबंधीत तालुका सहाय्यक निबंधक यांच्याशी त्वरीत संपर्क साधावा, असे आवाहन जिल्हा उपनिबंधक, सहकारी संस्था, नांदेड यांनी केले आहे.

राज्यातील खरीप हंगाम सन 2016-17 मध्ये सोयाबीन उत्पादक शेतकऱ्यांना आर्थिक मदत देण्याच्यादृष्टीने 1 ऑक्टोंबर ते 31 डिसेंबर 2016 या कालावधीत राज्यातील कृषि उत्पन्न बाजार समितीमध्ये सोयाबीन विक्री केलेल्या शेतकऱ्यांना प्रती क्विंटल 200 रुपये तर जास्तीतजास्त 25 क्विंटल प्रती शेतकरी याप्रमाणे अनुदान मंजुर करण्याचा निर्णय शासनाने घेतला आहे. त्यानुसार नांदेड जिल्ह्यातील सोयाबीन उत्पादक, पात्र लाभार्थी संख्या 10 हजार 630 असून 3 कोटी 85 लाख 29 हजार 206 रुपये शासनामार्फत जिल्हा उपनिबंधक सहकारी संस्था नांदेड कार्यालयास प्राप्त झालेली आहे. हे अनुदान पात्र लाभार्थ्यांचे बचत खाती वर्ग करण्यासाठी संबंधीत तालुका कार्यालयास वर्ग करण्यात आली आहे. ही रक्कम लाभार्थ्यांच्या बँकेच्या बचत खात्यात जमा केली जाणार आहे. परंतु काही लाभार्थ्यांनी बँक खात्याचा तपशील दिला नाही त्यामुळे मुदतीत बँक खात्याचा तपशील सादर न केल्यास सदर रक्कम शासनाकडे परत केली जाईल, असेही जिल्हा उपनिबंधक सहकारी संस्था नांदेड यांनी प्रसिद्धी पत्रात नमुद केले आहे.

000000

कापुस, तुर पिक

संरक्षणासाठी कृषि संदेश

नांदेड , दि. 2 :- कृषि विभागातील नांदेड, मुदखेड, अर्धापूर, लोहा, कंधार या पाच तालुक्यामध्ये तूर, कापूस, हरभरा पिकासाठी किड व रोग सर्वेक्षण या प्रकल्पातंर्गत काम सुरु आहे. शेतकऱ्यांना पुढीलप्रमाणे किडीपासून संरक्षणासाठी कृषि संदेश देण्यात आला आहे.

कापशीवरील गुलाबी बोंडअळीच्या नियंत्रणासाठी फेनवेलेरेट 20 इसी 8 मिली किंवा थायोडीकार्ब 75 डब्ल्यु पी 20 ग्रॅम प्रति 10 लिटर पाण्यात मिसळून फवारणी करावी. तूर शेंग माशीच्या नियंत्रणासाठी क्यनॉलफॉस 25 इसी 30 मिली प्रति 10 लिटर पाणी, एनएसई (निबोंळीतेल ) 5 टक्के फवारणी करावी. हरभरा पिकांवरील मर रोग नियंत्रणासाठी ट्रायकोडर्मा व्हिरीडी 1 टक्क डब्ल्यु पी 9 ग्रॅम प्रति किलो बियाणे बिजप्रक्रिया करावे, असे आवाहन नांदेड उपविभागीय कृषि अधिकारी डॉ. व्ही.व्ही. भरगंडे यांनी केले आहे.

000000

आदिवासी विभागाची शिष्यवृत्ती

"महाडीबीटी" संकेतस्थळाद्वारे

नांदेड दि. 2 :- सन 2017-18 पासून राज्य शासनातर्फे सर्व शिष्यवृत्तीसाठी एकत्रित संकेतस्थळ विकसीत करण्यात आले आहे. या संकेतस्थळाचे नाव महाडीबीटी https://mahadbt.gov.in हे आहे. संचालक माहिती व तंत्रज्ञान यांचेमार्फत हे संकेतस्थळ कार्यान्वित करण्यात आले आहे. आदिवासी विकास विभागामार्फत देण्यात येणारी शिष्यवृत्ती, शिक्षण व परीक्षा शुल्क, विद्यावेतन, निर्वाह भत्ता वितरीत करावयाच्या योजनांचा समावेश या संकेस्थळात करण्यात आला आहे, अशी माहिती  किनवट एकात्मिक आदिवासी विकास प्रकल्प कार्यालयाचे प्रकल्प अधिकारी तथा सहाय्यक जिल्हाधिकारी अजित कुंभार यांनी दिली आहे.

अनुसूचित जमातीच्या विद्यार्थ्यांना शिष्यवृत्ती शिक्षण शुल्क, परीक्षा, निर्वाह भत्ता, विद्यावेतन योजना विषयक योजनांचा लाभ मिळण्यासाठी स्वत:ची नोंदणी करणे, अर्ज भरणे, अर्ज भरल्यापासुन ते रक्कम लाभार्थ्यांच्या बॅंक खात्यात जमा करण्याची सर्व प्रकिया आता राज्यस्तरीय डिबीटी पोर्टलद्वारे करणे अनिवार्य आहे.

विद्यार्थ्यांच्या आधार संलग्न बॅंक खात्यावर लाभाची रक्कम जमा केल्याबाबतची सुचना महाडीबीटी पोर्टलद्वारे प्रत्येक महाविद्यालयाला दिली जाणार आहे. त्यामुळे संबधित विद्यापिठ / शैक्षणिक संस्था / महाविद्यालय / तंत्रनिकेतन यांनी कोणत्याही अनुसूचित जमातीच्या विद्यार्थ्यांना प्रवेश घेतेवेळेस शिक्षण शुल्काची रक्कम मागणी करु नये अथवा घेऊ नये तसेच अनुसूचित जमातीच्या विद्यार्थ्यांची आर्थिक पिळवणुक होणार नाही याची योग्य ती दक्षता घेण्याची जबाबदारी संबधित शैक्षणिक संस्थेची असेल. आदिवासी विकास विभागामार्फत राबविण्यात येणाऱ्या भारत सरकार शिष्यवृत्ती, राज्य शासनाची मॅट्रिकोत्तर शिक्षण शुल्क, परीक्षा शुल्क प्रतिपुर्ती योजना, इयत्ता 1 ते 10 वी सुवर्ण महोत्सवी पुर्व माध्यमिक शिष्यवृत्ती योजना ऑनलाईन करण्यात आली आहे.

डीबीटी पोर्टलवर नोदणी करण्यासाठी विद्यार्थी, पालकांना पुढील प्रमाणे सुचना देण्यात आल्या आहेत.

ऑनलाईन नोंदणी करण्यासाठी पुर्वतयारी- विद्यार्थ्यांनी आपला आधार क्रमांक काढणे, कोअर बँकिग सुविधा असलेल्या बॅकेच्या शाखेत खाते उघडणे आवश्यक आहे. जातीचा दाखला जात, जात वैधता प्रमाणपत्र, दहावी-बारावी तसेच मागील वर्षांचे परीक्षा उत्तीर्ण झालेला दाखला व गुणपत्रक जन्मतारेखेचा दाखला रहिवासी, उत्पन्न प्रमाणपत्र प्रवेशित अभ्यासक्रमाची कालावधी, बॅकेच्या पासबुकची झेराक्स, आधार कार्ड, दिव्यांग असल्यास दिव्यांगाचा दाखला शिधापत्रिका आदी कागदपत्रे तयार ठेवावीत.

नोंदणी करताना Internet Exploer, Google,Mozilla firefox या कोणत्याही ब्राउझरचा वापर करुन https//mahadbt.gov.in या वेबवर जाऊन नवीन नोंदणी बटणावर क्लिक करावे. प्रत्येक विद्यार्थ्यांने (ज्या विद्यार्थ्यांने यापुर्वी etribal पोर्टलवर नोदणी केली होती त्यांनी सुध्दा mahadbt या पोर्टलवर नोदणी करणे अनिवार्य आहे. आधार क्रमाकाचा उपयोग करुन नोंदणी करावी. आधार कार्ड असेल होय व नसेल तर नाही वर क्लिक करावे. त्यांनतर OTP हा पर्याय निवडा. वैध आधार क्रमांक टाकल्यानंतर OTP पाठवा बटन क्लिक करावे. मोबाईल क्रमांकावर प्राप्त झालेला आटीपी (One time password ) टाकुन पडताळणी करावी. उपलब्ध विंडोजमध्ये नाव, जन्म दिनांक, मोबाई नंबर, पत्ता आधार, संलग्न बॅक खाते क्रमांक आदी माहिती आपोआप दिसेल. आधार क्रमांक नसल्यास, आधार कार्ड नाही हा पर्याय निवडा आणि आवश्यक ती माहिती भरावी व कागदपत्रे अपलोड करावीत. नोदणी अर्जाच्या विंडोमधील सर्व माहिती भरावी. स्वत:चा युजर नेम व पासवर्ड तयार करावा. 

अर्ज कसा करताना महाडीबीटी पोर्टलवर लॉगईन करण्यासाठी सिलेक्ट युजरमध्ये जाऊन विद्यार्थी हा पर्याय निवडा. युजर नेम व पासवर्ड टाकुन लॉगईन व्हावे. लॉगीन झाल्यानंतर विडोमधील योजना तपशील यावर क्लिक करुन त्यांनतर विभागावर योजना पाहु शकतो व निवडु शकतो. आपणास ज्या योजनेसाठी अर्ज करावयाचा  त्या योजनेच्या नावासमोर क्लिक केले असता योजनेची सर्व माहिती दिसु शकेल. त्यांनतर कोणत्या योजनावर मॅट्रिकपुर्व, मॅट्रिकोत्तरसाठी आपण पात्र आहात त्याची खात्री करा व पर्याय क्लिक करा. (उदा. शालेय विद्यार्थ्यांनी मॅट्रिक पुर्व व महाविद्यालयीन  विद्यार्थ्यांनी मॅर्टिकोत्तर हा पर्याय निवडा.) आवश्यक ती माहिती उदा. जात प्रवर्ग महाराष्ट्राचे रहिवासी अपंगत्व,कौंटुबिक उत्पन्न आदी संकेतस्थळात काळजीपुर्वक भरावी. पालकाची माहिती, शाळा/ महाविद्यालय तपशिल नमुद करावा. आवश्यक ती कागदपत्रे अपलोड करावीत. (रहिवासी दाखला उत्पन्नाचा दाखला, एस.एस.सी प्रमाणपत्र जात प्रमाणपत्र जात वैधता प्रमाणपत्र बॅक खाते क्रमांक आधार कार्ड क्रमांक आदी). अभ्यास क्रमांकाचा तपशील, मागील परीक्षा उत्तीर्ण झाल्याचा आदी सर्व माहिती अर्जदाराने भरावयाची आहे आणि सबमिशन पेजमधील सादर या बटनावर क्लिक करायचे आहे. विद्यार्थी, पालकांना काही अडचणी असल्यास त्यांनी 1800 1025 311 या टोल फ्री वर किंवा helpdesk@mahadbt.gov.in या इमेल आयडीवर संपर्क करावा.

महाविद्यालयासाठी सूचना- महाडिबिटी पोर्टलवर विद्यार्थ्यांना ऑनलाईन नोदणी करणे व अर्ज भरणे विषयी सहकार्य करावे. अनुसूचित जमातीच्या पात्र विद्यार्थ्यांकडून प्रवेशाच्यावेळी शिक्षण शुल्क परीक्षा शुल्काची रक्कम घेवु नये. अनुसूचित जमातीच्या विद्यार्थ्यांना आधार क्रमांक काढणे, कोअर बॅक सुविधा असलेल्या बॅंकेच्या शाखेमध्ये खाते उघडण्यासाठी सुचना द्याव्यात. महाविद्यालयाचे नाव, महाविद्यालयात मान्य असलेल्या अभ्यासक्रमाची नावे,अभ्यासक्रमाचा कालावधी, प्रवेश क्षमता महाविद्यालयाच्या व अभ्यासक्रमाच्या मान्यतेचे विविध आदेश या बाबतची माहिती पोर्टलवर मॅप करण्यासाठी आपआपल्या आयुक्तालयास मॅप करण्याची कार्यवाही करण्यात यावी. महाविद्यालय त्यांचा अभ्यासक्रम त्याची प्रवेश क्षमता अभ्यासक्रमाचा कालावधी शुल्क रचना आदी माहिती पोर्टलवर समावेश (मॅप) करण्याची जबाबदारी संबधित महाविद्यालयाची असेल त्यासाठी ज्या प्राधिकाऱ्यानी (Authority) मान्यता दिली आहे त्यांच्याशी संपर्क साधावा.

आतापर्यंत शिष्यवृत्तीची रक्कम विद्यार्थ्यांच्या खात्यावर आणि शिक्षण व इतर शुल्काची रक्कम विद्यार्थी ज्या महाविद्यालयात शिक्षण घेत आहे त्या महाविद्यालयाच्या खाते क्रमाकावर जमा करण्यात येत होती. परंतु आता देय होणारी वित्तीय लाभाची रक्कम ही लाभार्थी विद्यार्थ्यांच्या आधार संलग्नीत बॅक खात्यावर  जमा करण्यात येणार आहे, असेही किनवट एकात्मिक आदिवासी विकास प्रकल्प कार्यालयाचे प्रकल्प अधिकारी तथा सहाय्यक जिल्हाधिकारी अजित कुंभार यांनी प्रसिद्धी पत्रात म्हटले आहे. 

000000