नांदेड-भोकर रोडवर सिताखंडी मोड येथे अपघातात 4 मृत्यू 

·  लगेच माहिती मिळाल्याने जिल्हा प्रशासनाकडून तात्काळ जखमींवर उपचार

 

 नांदेड (जिमाका) दि. 19 :-  नांदेड-भोकर रोडवर सिताखंडी मोड येथे आज दुपारी 3.50 च्या सुमारास हा अपघात झाला.  टेम्पो (407) व  टाटा मॅजिक यांच्यात समोरासमोर हा अपघात झाला. ग्रामीण रुग्णालय भोकरच्या 108 क्रमांकाच्या रुग्णवाहिका अन्य रुग्णाला नांदेडकडे घेऊन येत असतांना या रुग्णवाहिकेसमोरच सदर अपघात घडल्याने अती गंभीर 4 रुग्णांना नांदेड येथे तातडीने हालवणे सोपे झाले. या अपघातात जागेवरच 4 व्यक्तींचा मृत्यू झाला. त्यांचे मृतदेह ग्रामीण रुग्णालय भोकर येथे पाठविण्यात आले. इतर चार जखमी व्यक्तींना पुढील उपचारासाठी तातडीने भोकर ग्रामीण रुग्णालयात हलविण्यात आले. अपघात घडल्याबरोबर याची माहिती तातडीने शासकीय रुग्णालय व प्रादेशिक परिवहन विभागाला कळल्यामुळे प्रशासनाला तात्काळ पुढील व्यवस्था करणे शक्य झाले. भोकर येथील ग्रामीण रुग्णालयात प्राथमिक उपचार घेणाऱ्या चार रुग्णांनाही शासकीय वैद्यकीय महाविद्यालय नांदेड येथे हालविण्यात आले आहे.

00000

 योजनांविषयक सर्वसामान्यांची साक्षरताही आवश्यक

- जिल्हाधिकारी अभिजीत राऊत 

डॉ. शंकरराव चव्हाण जिल्हा नियोजन भवन सभागृहात जिल्हाधिकारी राऊत यांनी घेतला विभागनिहाय आढावा

नांदेड (जिमाका) 19 :- लोककल्याणकारी राज्याच्या संकल्पनेत ज्यांच्यासाठी योजना आखल्या जातात त्या योजनांबाबतची माहिती, साक्षरता लाभार्थ्यांना देणे अत्यावश्यक असते. त्यादृष्टिने शासन आपल्या दारी हा अभिनव उपक्रम अत्यंत महत्वाचा आहे. यासाठी केले जाणारे कागदावरचे नियोजन आता जिल्ह्यातील सर्व शासकीय यंत्रणांनी प्रत्यक्षात उतरून योजनांबाबतचा आत्मविश्वास लाभार्थ्यांपर्यंत पोहचविण्यास कटिबद्ध व्हा, असे आवाहन जिल्हाधिकारी अभिजीत राऊत यांनी केले. शासन आपल्या दारी या उपक्रमाच्या प्रस्तावित भव्य कार्यक्रमाच्या नियोजन बैठकीत ते बोलत होते.

डॉ. शंकरराव चव्हाण जिल्हा नियोजन भवन सभागृहात झालेल्या या बैठकीस जिल्हा परिषदेच्या मुख्य कार्यकारी अधिकारी वर्षा ठाकूर-घुगे, मनपा आयुक्त डॉ. महेश डोईफोडे, मुख्यमंत्री जनकल्याण कक्षाचे प्रमुख गजानन पाटील, निवासी उपजिल्हाधिकारी महेश वडदकर, उपजिल्हाधिकारी शरद मंडलिक, जि.प.चे अतिरिक्त मुख्य कार्यकारी अधिकारी संदिप माळोदे, जिल्हा ग्रामीण विकास यंत्रणेचे प्रकल्प संचालक डॉ. संजय तुबाकले सर्व विभाग प्रमुख यांची यावेळी उपस्थिती होती.

सर्वसामान्यांच्या विकासाची संकल्पना राबवितांना अप्रत्यक्षपणे योजनेला मूर्त स्वरूप हे सकारात्मक दृष्टिकोन बाळगणारे लाभधारक देत असतात. त्यांच्या मनातील विश्वास वाढावा, शासकीय योजनांचे प्रतिबिंब त्यांच्या विकासात उमटावे, योजनांच्या उद्दीष्टाप्रती त्यांच्या मनात सजगता निर्माण व्हावी या उद्देशाने शासन आपल्या दारी हे अभियान महत्वाचे आहे. यावेळी मुख्यमंत्री जनकल्याण कक्षाचे प्रमुख गजानन पाटील यांनी उपक्रमाबाबत व नियोजनाबाबत अमूल्य सूचना केल्या.

0000

 मोफत तायक्वांदो प्रशिक्षण शिबीराचे आयोजन

 

नांदेड (जिमाका) दि. 19 :- महाराष्ट्र शासनाच्या क्रीडा व युवक सेवा संचालनालय पुणे अंतर्गत जिल्हा क्रीडा अधिकारी नांदेड व तायक्वांदो असोसिएशन ऑफ नांदेडच्यावतीने 28 जून 2023 पर्यत  मोफत तायक्वांदो प्रशिक्षण शिबीराचे आयोजन जिल्हा क्रीडा संकुल समिती, वसतीगृह इमारत येथे करण्यात आले आहे. सायं 5.30 ते 7 या कालावधीत आयोजित शिबिराचा इच्छुकांनी लाभ घ्यावा, असे आवाहन जिल्हा क्रीडा अधिकारी राजेश्वर मारावार यांनी केले आहे.

 

या शिबीरात स्वसंरक्षणाचे, फिटनेस, स्ट्रेन्थ, कंडीशनीग, स्पर्धापूर्व तयारीबाबतचे प्रशिक्षण आंतरराष्ट्रीय तायक्वांदो प्रशिक्षक मास्टर बालाजी पाटील जोगदंड, एन आय एस प्रशिक्षक ओमप्रकाश आळणे हे प्रशिक्षण देणार आहे. यात सहभागी गरीब व होतकरू पाच तायक्वांदो पटूना जिल्हा संघटनेच्यावतीने दत्तक घेणार असल्याचे बालाजी पाटील जोगदंड यांनी सांगीतले आहे. दहा दिवस चालणाऱ्या या शिबीराचा जास्तीत जास्त नागरिकांनी विशेषता महिला व मुलींनी लाभ घ्यावा असे संघटनेचे कार्याध्यक्ष डॉ. हंसराज वैद्य, सुभाष डाकोरे पाटील, अभिजीत ( मुन्ना ) कदम, तायक्वांदो पालक समितीचे अध्यक्ष राजेद्र सुगावकर, संतोष कनकावार यांनी प्रसिध्दीपत्रकाद्वारे कळविले आहे.

0000

 देहदान सर्वश्रेष्ठ दान

मुलीने केले आईचे देहदान

                                               

नांदेड (जिमाका) दि. 19 :- मृत्यूनंतर देह हा जाळून, पुरुन नष्ट होण्यापेक्षा तो शैक्षणिक कार्यासाठी उपलब्ध करून देणे हे खऱ्या अर्थाने सामाजिक कार्य आहे. यासाठी नागरिकांनी देहदानाच्या चळवळीत सहभाग घेण्यासाठी पुढे यावे, असे आवाहन अधिष्ठाता डॉ. वाकोडे यांनी केले आहे.

 

असाच दृष्टीकोन समोर ठेवून किनवट तालुक्यातील बोधडी बु. येथील सविता माधव श्रीरामवार वय 58 वर्ष यांचा मृत्यूपश्चात देह  डॉ. शंकरराव चव्हाण शासकीय वैद्यकीय महाविद्यालयातील शरीररचनाशास्त्र विभागात दान केला आहे.  अधिष्ठाता डॉ.एस.आर.वाकोडे यांनी त्यांच्या कुटुंबीयांचे प्रशस्तीपत्र देऊन आभार व्यक्त केले. यावेळेस डॉ.अनुजा देशमुख, डॉ.अनिस रहेमान तसेच डॉ.इनामदार (जनऔषधी विभाग), नियोजन अधिकारी डोळे हे उपस्थित होते. डॉ.अनुजा देशमुख आणि डॉ. रहेमान तसेच शरीररचनाशास्त्र विभागातील संपूर्ण टीमने देहदानासाठी परिश्रम घेतले.

 

सविता माधव श्रीरामवर यांची देहदान करण्याची इच्छा होती ती त्यांची कन्या रुपाली माधव श्रीरामवार यांनी पुढे येऊन पूर्ण केली.  त्या एक आशा वर्कर सुपरवायझर आहेत आणि त्यांच्या या कार्याचे सर्व स्तरातून कौतुक होत आहे. कोविडच्या कठीण काळात शरीररचनाशास्त्र विभागात मृतदेह हा स्वीकारता येत नव्हता. त्या कारणाने विभागात मृतदेहाची कमतरता भासत होती.  कोविड नंतर देहदाना प्रती जनजागृती निर्माण होऊन बरेचजण आता पुढे येत आहेत. त्यामुळे ही पोकळी भरुन येत आहे. आणि याचा शैक्षणिक तसेच सामाजिक कार्यात खुप मोठा हातभार लागत आहे. समाजातील लोकांनी सविता माधव श्रीरामवार यांचा आदर्श समोर ठेवून देहदानाच्या चळवळीत सहभाग घ्यावा, असे अधिष्ठाता डॉ.वाकोडे यांनी कळविले आहे.

00000

 दहावी, बारावी पुरवणी परीक्षेचे

संभाव्य वेळापत्रक जाहीर   

नांदेड (जिमाका) दि. 19 :-  महाराष्ट्र राज्य माध्यमिक व उच्च माध्यमिक शिक्षण मंडळाच्या लातूर, औरंगाबाद, पुणे, नागपूर, मुंबई, कोल्हापूर, अमरावती, नाशिक व कोकण या नऊ विभागीय मंडळामार्फत घेण्यात येणारी इयत्ता दहावी व इयत्ता बारावीची पुरवणी लेखी परीक्षा जुलै-ऑगस्ट 2023 मध्ये आयोजित केली आहे.

उच्च माध्यमिक प्रमाणपत्र परीक्षा इयत्ता 12 वी (सर्वसाधारण व द्विलक्षी विषय) लेखी परीक्षा मंगळवार 18 जुलै 2023 ते मंगळवार 8 ऑगस्ट 2023 या कालावधी व उच्च माध्यमिक प्रमाणपत्र परीक्षा (इ.12 वी) व्यवसाय अभ्यासक्रम लेखी परीक्षा मंगळवार 18 जूलै 2023 ते शनिवार 5 ऑगस्ट 2023 या कालावधीत होईल. तर इयत्ता 10 वी लेखी परीक्षा मंगळवार 18 जुलै ते मंगळवार 1 ऑगस्ट 2023  या कालावधीत होईल. दिनांक निहाय सविस्तर वेळापत्रक www.mahahsscboard.in या संकेतस्थळावर उपलब्ध करुन देण्यात आले आहे. संकेतस्थळावरील संभाव्य वेळापत्रकांची सुविधा ही फक्त माहितीसाठी आहे. 

परीक्षेपूर्वी माध्यमिक शाळा, उच्च माध्यमिक शाळा, कनिष्ठ महाविद्यालयाकडे छापील स्वरुपात देण्यात येणारे वेळापत्रक अंतिम राहील. छापील वेळापत्रकावरून परीक्षेच्या तारखांची खात्री करुन घ्यावी व विद्यार्थ्यांनी परीक्षेस प्रविष्ठ व्हावे. अन्य संकेतस्थळावरील किंवा अन्य यंत्रणेने छपाई केलेले तसेच व्हॉटस्ॲप किंवा तत्सम माध्यमातून व्हायरल झालेले वेळापत्रक ग्राह्य धरु नये. 

इ. 10 वी प्रात्यक्षिक परीक्षा, श्रेणी, तोंडी व अंतर्गत मूल्यमापन परीक्षा मंगळवार 18 जुलै 2023 ते मंगळवार 1 ऑगस्ट 2023 व इ. 12 वी प्रात्यक्षिक, श्रेणी, तोंडी व अंतर्गत मूल्यमापन परीक्षा मंगळवार 18 जुलै 2023 ते शनिवार 5 ऑगस्ट 2023 या कालावधीत आयोजित करण्यात येणार आहे संबंधितानी यांची नोंद घ्यावी असे राज्य मंडळाच्या सचिव अनुराधा ओक यांनी प्रसिद्धी पत्रकात म्हटले आहे.

00000

विशेष लेख :

 मुख्यमंत्री शाश्वत सिंचन योजनेअंतर्गत

शेतकऱ्यांसाठी शेततळे !

 

·   ‘शासन आपल्या दारी’ महत्वाकांक्षी अभियान

 

आज शेतकरी पारंपारिक पद्धतीने शेती करण्याऐवजी तो आधुनिक पद्धतीने शेती करण्यावर जास्त भर देताना दिसत आहे. दिवसेंदिवस नवनवीन तंत्रज्ञानाचा वापर करुन कमी क्षेत्रात जास्तीत जास्त नवनवीन उत्पादन घेण्यावर शेतकरी भर देत आहे. शासनाकडून शेतकऱ्यांसाठी विविध योजना प्रभावीपणे राबविण्यात येत आहेत. शेतीला पाण्याची उत्तम जोड मिळाली तर उत्पादन वाढीवर हमखास चांगला परिणाम होतो. काही शेतकऱ्यांच्या शेतात विहिर, बोअरवेल, नदी, कॅनाल यासारखे स्त्रोत उपलब्ध असले तरी काही ठिकाणी यापैकी एकही स्त्रोत उपलब्ध नसतो. अशा ठिकाणची कोरडवाहू शेती ही शंभर टक्के पावसावर अवंलबून असते. या शेतकऱ्यांकरीता शासनाने सिंचनासाठी मुख्यमंत्री शाश्वत सिंचन योजनेअंतर्गत शेततळे ही योजना सुरु केली आहे. राज्यातील अनेक शेतकऱ्यांनी या योजनेचा लाभ घेवून आपल्या शेतात सिंचनाची सोय करुन उत्पादन वाढीवर भर दिला आहे.  

 

लाभार्थी पात्रता  

अर्जदार शेतकऱ्यांकडे स्वत:च्या नावावर किमान 0.60 हेक्टर क्षेत्र असणे आवश्यक आहे. अर्जदार शेतकऱ्यांची जमीन शेततळे खोदण्यास तांत्रिकदृष्टया योग्य असणे आवश्यक आहे. अर्जदार शेतकऱ्यांनी यापूर्वी मागेल त्याला शेततळे, सामुहिक शेततळे अथवा भात खाचरातील बोडी किंवा इतर, कुठल्याही शासकीय योजनेतून शेततळे या घटकासाठी शासनाच्या अनुदानाचा लाभ घेतलेला नसावा.

 

लाभार्थ्यांची निवड

मुख्यमंत्री शाश्वत कृषि सिंचन योजनेअंतर्गत वैयक्तिक शेततळे या घटकासाठी उपलब्ध अनुदानाच्या प्रमाणात संगणकीय प्रणालीतून होणाऱ्या सोडती नुसार लाभ देण्यात येईल.

 

अर्ज करण्याची पध्दत

महाडीबीटी पोर्टलचे http:/mahadbtmahiti.gov.in या संकेतस्थळावर ऑनलाईन अर्ज सादर करावा. शेतकरी स्वत:चा मोबाईल, संगणक, लॅपटॉप, टॅबलेट, सामुदायिक सेवा केंद्र सीएससी ग्रामपंचायतमधील संग्राम केंद्र सारख्या माध्यमातून संकेतस्थळावर अर्ज करु शकतील.

 

शेततळ्यासाठी आकारमान

मुख्यमंत्री शाश्वत कृषि सिंचन योजनेअंतर्गत विविध आकारमानाच्या शेततळ्यासाठी कमाल मर्यादा 75 हजार रुपये फक्त रकमेच्या मर्यादेपर्यंत अनुदान देय राहील. या योजनेचा लाभ घेण्यासाठी शेतकऱ्यांनी अधिक माहितीसाठी तालुका कृषि अधिकारी कार्यालयाशी संपर्क साधावा.

 

सर्वसामान्यांची कामे सुलभ व स्थानिक पातळीवर व्हावीत. नागरिकांना जलद, कमी कागदपत्रे व शासकीय निर्धारित शुल्कात योजनेचा लाभ मिळावा यासाठी महाराष्ट्र शासनाच्यावतीने ‘शासन आपल्या दारी’ हे महत्वाकांक्षी अभियान राबविण्यात येत आहे. या अभियान अंतर्गत शासनाच्या विविध विभागाच्यावतीने विकासात्मक योजनाचा लाभ गरजुंना देण्यात येत आहे. शासन आपल्या दारी उपक्रमात सर्व योजनाची माहिती त्या विभागाच्यावतीने नागरिकांना देण्यात येणार आहे.

 

अलका पाटील,

उपसंपादक, 

जिल्हा माहिती कार्यालय, नांदेड

00000

 निरोगी, सक्षम आयुष्यासाठी तायक्वॉदो खेळ महत्वाचा

-         जिल्हा क्रीडा अधिकारी मारावार

 

नांदेड (जिमाका) दि. 19 :- सक्षम व निरोगी आयुष्यासाठी ऑलम्पीक मान्यता प्राप्त तायक्वांदो खेळाचे महत्व अनन्यसाधारण असल्याचे मत जिल्हा क्रीडा अधिकारी राजेश्वर मारावार यांनी व्यक्त केले. जिल्हा क्रीडा अधिकारी कार्यालय व जिल्हा तायक्वॉदो संघटनेच्यावतीने जिल्हा क्रीडा संकुल, क्रीडा वसतीगृह इमारत, स्टेडीयम परिसरात आयोजित मोफत तायक्वॉदो प्रशिक्षण शिबिराच्या उद्घाटन प्रसंगी ते बोलत होते.

 

यावेळी प्रमुख पाहुणे म्हणून आंतरराष्ट्रीय स्वीमर तथा माजी जिल्हा क्रीडा अधिकारी गंगालाल यादव , किशोर पाठक, जिल्हा सचिव मास्टर बालाजी पाटील, जोगदंड, एन.आय.एस प्रशिक्षक ओमप्रकाश आळणे, मारोती चव्हाण यांची उपस्थिती होती. यावेळी जिल्हा क्रीडा अधिकारी मारावार यांनी खेळांडुना मिळणाऱ्या सुविधांबाबत माहिती दिली. मानवी जीवन जगत असताना शारिरीक तंदुरुस्ती महत्वाची असल्याचे गंगालाल यादव यांनी सांगितले. सर्वागाने सक्षम, स्वावलंबन, शिक्षण, शिष्टाचार शिकविणाऱ्या तायक्वॉदो खेळाचा नांदेडकरांनी लाभ घ्यावा, असे आवाहन जिल्हा सचिव किशोर पाठक यांनी केले.

 

तायक्वॉदो क्षेत्रात शालेय राज्यस्तर स्पर्धेत नांदेडला सुवर्णपदक मिळवून देणाऱ्या कृष्णा तिरमतदार व बैंगलोर येथे आयोजित इंडीया कोरीया एक्सपोमध्ये सुवर्ण ट्रिपल धमाका करणाऱ्या युवराज अभिजीत (मुन्ना) कदमचा सन्मान करण्यात आला. मुखेड येथील हर्षराज मारोती चव्हाण हा खेळाडू प्रशिक्षणाचे धडे घेण्यासाठी आला असता त्याला क्रीडा वसतीगृहात मोफत राहण्याची सोय जिल्हा क्रीडा अधिकारी मारावार यांनी करुन दिली. याबाबत त्यांचे पालक मारोती चव्हाण यांनी आभार व्यक्त केले.

 

या शिबिरातील विद्यार्थ्यांना तायक्वॉदो मार्शल आर्टसह उत्तम नागरीक बनण्याचे धडे देण्यात येत असून चालू शैक्षणिक वर्षातील स्पर्धेसाठी तयार करण्यावर भर देणात येणार आहे. हे प्रशिक्षण शिबिर  पूर्ण करणाऱ्या प्रशिक्षाणार्थीना प्रमाणपत्र देण्यात येणार आहे. उत्कृष्ट 5 खेळाडू दत्तक घेणार असून त्यांचा संपूर्ण खर्च तायक्वॉदो जिल्हा संघटनेमार्फत करणार असल्याचे प्रशिक्षक बालाजी जोगदंड यांनी सांगितले.

0000

 आयटीआय शिकाऊ उमेदवारासाठी

मंगळवारी भरती मेळाव्याचे आयोजन

 

नांदेड (जिमाका) दि. 19 :-औद्योगिक प्रशिक्षण संस्थेच्यावतीने मंगळवार 20 जून रोजी आयटीआय उमेदवारासाठी शिकाऊ उमेदवारी योजनेअंतर्गत भरती मेळाव्याचे आयोजन करण्यात आले आहे. आयटीआय उत्तीर्ण प्रशिक्षणार्थ्यानी या औद्योगिक प्रशिक्षण संस्था नांदेड येथे 20 जून रोजी सकाळी 11 वा. उपस्थित राहावे, असे आवाहन अंशकालीन प्राचार्य पी.के. अन्नपुर्णे यांनी केले आहे.

 

या मेळाव्यासाठी पुढील व्यवसायाच्या प्रशिक्षणार्थ्यांची शिकाऊ उमेदवार म्हणून भरती करण्यात येणार आहे. इलेक्ट्रीशियन/वायरमन 4, प्लंबर 3, कारपेंटर- 2, वातानुकुलित तंत्रज्ञ (एसी टेक्नीशियन)-2, संगणक चालक (ऑपरेटर)-2, टेलिफोन चालक 1, कॉम्प्युटर हार्डवेअर ॲण्ड नेटवर्किंग टेक्निशियन 3 असे एकूण 17 उमेवारांची भरती करण्यात येणार आहे.

0000

 मौजे ब्रम्हपुरी गोदावरी नदीच्या

पात्र परिसरात कलम 144 लागू 

 

नांदेड (जिमाका) दि. 19 :-  मौजे ब्रम्हपुरी येथील गोदावरी नदी पात्र परिसरात शांतता व सुव्यवस्था अबाधीत रहावी यासाठी फौजदारी प्रक्रिया संहिता 1973 चे कलम 144 प्रमाणे नांदेड ग्रामीण पोलीस स्टेशनच्या हद्दीतील नदी पात्रातील परिसर प्रतिबंधीत क्षेत्र म्हणून 20 जून 2023 ते 19 जुलै 2023 पर्यंत घोषित करण्यात आले आहे. त्याबाबत जिल्हादंडाधिकारी कार्यालयाने आदेश निर्गमित केले आहेत. 

 

याबंदी आदेशात म्हटले आहे की, फौजदारी प्रक्रिया संहिता 1973 चे कलम 144 नुसार प्राप्त अधिकाराचा वापर करुन चतु:सिमा पुर्वेस वाजेगाव कोल्हापुरी बंधारा, पश्चिमेस नांदेड ते देगलूरकडे जाणाऱ्या रोडवरील जुना पूल, दक्षिणेस गोदावरीचे नदीचे पात्र आणि उत्तरेस चिल्ला / दर्गाची संरक्षण भिंत यामधील जागा 20 जून रोजी सकाळी 6 वाजेपासून ते 19 जुलै 2023 रोजीच्या मध्यरात्री पर्यंत फौजदारी प्रक्रिया संहिता 1973 चे कलम 144 प्रमाणे प्रतिबंधीत क्षेत्र म्हणून जिल्हादंडाधिकारी यांनी घोषित केले आहे. 

 

हा आदेश शासकीय कर्तव्यावरील अधिकारी व कर्मचारी, एक खिडकी पथकातील अधिकाऱ्यांनी परवानगी दिलेल्या भाविकांना तसेच ज्यांना जिल्हाधिकारी नांदेड व पोलीस अधीक्षक नांदेड यांनी परवानगी दिली अशा व्यक्तींना लागू राहणार नाही.

00000

 विशेष वृत्त

 

जिल्ह्यातील प्रत्येक तालुक्यात

वाडी-वसतीवर शासन आपल्या दारीची उत्सुकता

 

· ग्रामीण भागात जिल्हा प्रशासनातर्फे शासकिय योजनाच्या मेळाव्यावर भर

 

नांदेड (जिमाका) दि. 19 :- जनसामान्यांना त्यांच्या शंका समाधानासह शासकीय योजनांचा लाभ पोहचविणाऱ्या शासन आपल्या दारी या अभिनव उपक्रमाबाबत व्यापक जनजागृती केली जात आहे. जिल्ह्यातील सर्व तालुक्यांमधून मंडळाच्या ठिकाणी असलेल्या गावांमध्ये जिल्हा प्रशासनातर्फे मेळावे आयोजित केले जात आहेत. यासाठी गावपातळीवरील दवंडी पासून ग्रामसेवक, तलाठी, आरोग्य सहाय्यक, कृषि सहाय्यक, अंगणवाडी सेविका या सर्वांचा समन्वय साधला जात असल्याने लाभार्थ्यांच्या विविध प्रकरणांना तात्काळ मंजुरीचे प्रमाण जलदगतीने वाढल्याचे तहसिलदार डॉ. व्यंकटेश मुंडे यांनी सांगितले.

 

लोहा तालुक्यातील किवळा व इतर मंडळांच्या ठिकाणी जवळ असलेल्या गावांमध्ये आम्ही शासन आपल्या दारी उपक्रमाच्या प्राथमिक फेरीस आयोजित करत आहोत. या मेळाव्यास सर्वसामान्यांचा मिळणारा प्रतिसाद व शासकीय योजनांकडून त्यांच्या असलेल्या अपेक्षा प्रशासनापर्यंत व्यवस्थीत पोहचल्या जात आहेत. जवळपास सर्वच योजना या ऑनलाईन पद्धतीने आता राबविल्या जात आहेत. यामुळे पारदर्शकतेसह दिलेल्या कालावधीत सदर अर्ज निकाली काढण्याचे प्रमाणही मोठ्या प्रमाणात वाढले असल्याचे त्यांनी सांगितले.

 

लोहा तालुक्यात गत 3 महिन्यात एकुण 176 लाभार्थ्यांना तात्काळ लाभ या योजनेतून पोहचविला गेला आहे. यात श्रावणबाळ व संजय गांधी निराधार योजना, इंदिरा योजना यासाठी जिल्ह्यात एकुण 140 प्रस्ताव आले होते. यापैकी 100 लोकांना लाभ पोहचला आहे. इतर प्रकरणाबाबत लवकरच निर्णय दिला जात आहे. केंद्र शासन राष्ट्रीय कुटुंब अर्थसहाय्य योजनेसाठी 36 प्रस्ताव प्राप्त झाले असून यापैकी 28 प्रस्तावांना लाभ देण्यास सुरू झाला असून उर्वरीत प्रकरणातील त्रुट्या पूर्ण करून त्यांनाही विकासाच्या प्रवाहात सामावून घेत जात असल्याचे माहिती तहसिलदार डॉ. व्यंकटेश मुंडे यांनी दिली.

00000