सुट्टीच्या दिवशी पक्की अनुज्ञप्ती चाचणी सुरु   

नांदेड (जिमाका) दि. 8 :- पक्की अनुज्ञप्ती (Driving License) चाचणीसाठी उशीराने अपॉईंटमेंट मिळत असल्याने प्रतिक्षा कालावधी वाढला आहे. हा कालावधी कमी करुन नागरिकांची गैरसोय कमी करण्याच्या दृष्टीने व लॉकडाऊन कालावधीतील प्रलंबित पक्क्या अनुज्ञप्ती चाचण्यांचा नियमन करण्यासाठी प्रादेशिक परिवहन कार्यालयामर्फत 9, 16, 23 व 30 ऑक्टोबर 2021 शनिवार या सुट्टीच्या दिवशी पक्की अनुज्ञप्ती चाचणीसाठी नांदेड प्रादेशिक परिवहन कार्यालयात शिबीराचे आयोजन करुन एक दिवस आगोदर अपॉईंटमेंट उपलब्ध करुन देण्यात येणार आहे. त्यानुसार अर्जदारांनी ऑनलाईन उपलब्ध असलेली अपॉईंटमेंट घ्यावी व त्यादिवशी चाचणीसाठी कार्यालयात उपिस्थत रहावे, असे आवाहन प्रादेशिक परिवहन अधिकारी नांदेड यांनी केले आहे.

000000

 स्कुल बसेसाठी मानक कार्यपध्दती जाहीर 

नांदेड (जिमाका) दि. 8 :-  गेल्या दीड वर्षापासून बंद असलेल्या शाळा 4 ऑक्टोबर पासून सुरू झाल्या आहेत. कोरोना प्रतिबंधित नियमांचे पालन करणे शाळांना बंधनकारक असून या पार्श्वभूमीवर विद्यार्थ्यांची वाहतूक करणाऱ्या बसेसाठी प्रादेशिक परिवहन विभागाने मानक कार्यपद्धती जाहीर केली आहे. 

कोव्हिड -19 च्या अनुषंगाने स्कुल बस ऑपरेटर यांनी परिवहन विभागाने निर्गमित केलेल्या निर्देशांचे पालन करणे बंधनकारक केले आहे.मोटार वाहन नियम 1989 च्या नियम 20(1) (X) मधील तरतुदीनुसार लोकसेवा वाहनाच्या प्रत्येक चालकाने स्कुल बसच्या प्रत्येक फेरीनंतर वाहन स्वच्छ व निर्जंतुक करणे अत्यावश्यक आहे. कर्तव्यावर असणाऱ्या वाहन चालकाने मास्क, सॅनिटायझरचा वापर करावा. बस जिथे उभ्या राहतात तिथे गर्दी होणार नाही याची काळजी घ्यावी. स्कुल बसच्या चालकाचे लसीकरणाचे दोन्ही डोस पूर्ण झालेले असावेत विद्यार्थ्याच्या वापरासाठी काही अतिरिक्त मास्क जवळ ठेवावे. मास्क परिधान न केलेल्या विद्यार्थ्यांना बसमध्ये प्रवेश न नाकारता त्यांना उक्त मास्क वापरासाठी उपलब्ध करून घ्यावे. बसच्या प्रवेशव्दाराजवळ सॅनिटायझर ठेवावे.विद्यार्थ्यांना प्रवेश देताना हात निर्जंतुक करून घ्यावे बसमध्ये प्रवेश देताना विद्यार्थ्यांचे थॅमल स्कॅनिंग करून घ्यावे. ताप, सर्दी, खोकला इत्यादी आजाराचे लक्षण दिसल्यास विद्यार्थ्यांना प्रवेश देण्यास प्रतिबंध करावा. अशा विद्यार्थ्यांना त्वरीत पालकांच्या ताब्यात दयावे. बस वाहनामध्ये एका बाकावर एक याप्रमाणे 50 टक्के आसन क्षमतेप्रमाणे वाहतुकीस परवानगी देण्यात आली आहे.स्कुल बसमध्ये चढताना किंवा उतरताना सोशल डिस्टिन्सिंगचे पालन करणे आवश्यक आहे याची दक्षता सहवर्ती चालकाने घ्यावी.शालेय विद्यार्थ्यांची वाहतूक करणाऱ्या बसच्या खिडक्या उघड्या ठेवाव्यात.तसेच वातानुकूलीत बसेसमध्ये 24 ते 30 डिग्री सेल्सीअस इतके तापमान ठेवावे.बसमध्ये कचरा फेकू नये आणि बस स्वच्छ ठेवण्याच्या सूचना विद्यार्थ्यांना दयाव्यात .स्कुल बसचे निर्जतुकीकरण करणे तसेच त्याचे अभिलेख ठेवण्याची जबाबदारी परवानधारकाची असेल.सुचनाचे पालन न केल्यास परवानधारका विरूध्द मोटार वाहन अधिनियम 1988 केंद्रीय मोटार वाहन नियम 1989 आपत्ती व्यवस्थापन कायदा 2005 मधील तरतुदीनुसार कारवाई स्थानिक प्रशासन कारवाई करेल. केंद्र किंवा राज्य शासनाकडून वेळोवेळी प्राप्त होणाऱ्या सुचनाचे पालन करणे आवश्यक असल्याचे निर्देश उपप्रादेशिक परिवहन अधिकारी अविनाश राऊत यांनी दिले आहे.

00000

 जिल्ह्यातील 103 केंद्रावर कोविड-19 चे लसीकरण 

नांदेड (जिमाका) दि. 8 :- जिल्हा आरोग्य विभागातर्फे जिल्ह्यातील 103 लसीकरण केंद्रावर कोविड-19 चे लसीकरण व्हावे यादृष्टिने उपलब्ध लस सर्वत्र विभागून पाठविली आहे. यात 18 ते 44 वयोगटासह 45 वर्षावरील व्यक्तींना कोव्हॅक्सीन व कोविशील्ड लसीचा पहिला व दुसरा डोस उपलब्ध करुन दिला आहे. 9 ऑक्टोंबर 2021 रोजी लसीकरण केंद्रावर उपलब्ध असलेली डोसची संख्या पुढीलप्रमाणे आहे.

मनपा क्षेत्रातील श्री गुरु गोविंद जिल्हा रुग्णालय, डॉ. शंकरराव चव्हाण वैद्यकिय महाविद्यालय, शासकीय आयुर्वेदिक महाविद्यालय, स्त्री रुग्णालय, शहरी दवाखाना हैदरबाग, शिवाजीनगर, जंगमवाडी, दशमेश हॉस्पिटल, कौठा, श्रावस्तीनगर (विजयनगर), सिडको, पोर्णिमानगर, सांगवी, करबला, तरोडा, विनायकनगर, अरब गल्ली, खडकपुरा, रेल्वे हॉस्पिटल या 19 केंद्रावर कोविशील्ड लसीचे प्रत्येकी 100 डोस उपलब्ध करुन दिले आहेत. याचबरोबर श्री गुरु गोबिंदसिंघजी जिल्हा रुग्णालय, डॉ. शंकरराव चव्हाण वैद्यकिय महाविद्यालय, शासकीय आयुर्वेदिक महाविद्यालय, स्त्री रुग्णालय, शहरी दवाखाना हैदरबाग, शिवाजीनगर, जंगमवाडी, दशमेश हॉस्पिटल, कौठा, श्रावस्तीनगर (विजयनगर), सिडको, पोर्णिमानगर, सांगवी, करबला, तरोडा, विनायकनगर, खडकपुरा, अरबगल्ली रेल्वे हॉस्पिटल या 19 केंद्रावर प्रत्येकी 100 डोस कोव्हॅक्सीन लसीचे उपलब्ध करुन दिले आहेत.

शहरी भागात मोडणाऱ्या लसीकरण केंद्रावर उपलब्ध असलेले डोस पुढीलप्रमाणे आहेत. उपजिल्हा रुग्णालय देगलूर, हदगाव, गोकुंदा, मुखेड, ग्रामीण रुग्णालय भोकर, बिलोली, धर्माबाद, हिमायतनगर, कंधार, माहूर, मांडवी, लोहा, मुदखेड, बारड, नायगाव, उमरी या 16 केंद्रावर कोविशील्ड लसीचे प्रत्येकी 100 डोस उपलब्ध आहेत. तसेच उपजिल्हा रुग्णालय देगलूर, हदगाव, गोकुंदा, मुखेड ग्रामीण रुग्णालय भोकर, बिलोली, धर्माबाद, हिमायतनगर, कंधार, माहूर, मांडवी, लोहा, मुदखेड, बारड, नायगाव, उमरी या 16 केंद्रावर कोव्हॅक्सीन लसीचे प्रत्येकी 100 डोस उपलब्ध आहेत. तर ग्रामीण भागात 68 प्राथमिक आरोग्य केंद्रावर कोविशील्डचे प्रत्येकी 100 डोस देण्यात आले आहेत. 

वरील सर्व लसीकरण केंद्रावर 18 ते 44 वयोगटासह 45 वर्षावरील लाभार्थ्यांना कोविड-19 लसीचा पहिला व दुसरा डोस दिला जाणार आहे. यासाठी ऑनलाईन किंवा लसीकरण केंद्रावर नोंदणी करण्याची सुविधा उपलब्ध करुन दिली आहे. 

जिल्ह्यात 7 ऑक्टोंबर 2021 पर्यंत एकुण 15 लाख 73 हजार 486 लाभार्थ्यांचे लसीकरण करण्यात आले. नांदेड जिल्ह्यात 9 ऑक्टोंबर 2021 पर्यत कोविड लसींचा साठा खालीलप्रमाणे प्राप्त झालेला आहे. कोविशिल्डचे 13 लाख 47 हजार 30 डोस, कोव्हॅक्सीनचे 3 लाख 45 हजार 120 डोस याप्रमाणे एकुण 16 लाख 92 हजार 150 डोस प्राप्त झाले आहेत. 

केंद्र शासनाच्या सूचनेनुसार कोविशिल्ड लसीचा पहिला डोस ज्यांनी घेतला आहे त्यांच्या 12 ते 16 आठवडे म्हणजेच सुमारे 84 दिवसानंतर दुसरा डोस दिला जाईल. जिल्ह्यातील सर्व कार्यक्षेत्रामध्ये कोविशील्ड व कोव्हॅक्सीन लस 18 ते 44 वयोगटासाठी व 45 वर्षावरील वयोगटासाठी पहिला व दुसरा डोस उपलब्ध राहील. यासाठी ऑनलाईन व ऑनस्पॉट नोंदणीची सुविधा उपलब्ध राहिल. मनपा कार्यक्षेत्रातील लाभार्थ्यांना कोविशील्ड व कोव्हॅक्सीन लस घेण्यासाठी cowin.gov.in या वेबसाईटवर ऑनलाईन नोंदणी करणे अनिवार्य आहे. ऑनलाईन नोंदणी पूर्ण झाल्यानंतर लाभार्थ्यांचे संबंधित केंद्रावर लसीकरण करण्यात येईल. ऑनलाईन नोंदणीची वेळ सायंकाळी 6 पासून पुढे सुरु राहील. लसीचा उपलब्धतेप्रमाणे आरोग्य विभाग याचे नियोजन करेल. नागरिकांनी लसीच्या उपलब्धतेप्रमाणे आरोग्य विभागातील कर्मचाऱ्यांना सहकार्य करावे, असे आवाहन जिल्हा आरोग्य अधिकारी डॉ. बालाजी शिंदे यांनी केले.

00000

 

अतिवृष्टीमुळे जिल्ह्यात नुकसान झालेल्या पिकांची

कृषी विभागाचे सचिव एकनाथ डवले यांच्याकडून पाहणी 

नांदेड (जिमाका) दि. 8 :- अतिवृ्ष्टीमुळे जिल्ह्यात नुकसान झालेल्या पिकाची पाहणी राज्याचे कृषी सचिव एकनाथ डवले यांनी पाहणी केली. मागील काही दिवसात झालेल्या अतिवृष्टीमुळे सोयाबीन आणि इतर पिकांचे मोठ्या प्रमाणात नुकसान झाले. याप्रसंगी जिल्हाधिकारी डॉ. विपीन इटनकर, विभागीय कृषी सहसंचालक साहेबराव दिवेकर, जिल्हा कृषी अधिकारी रविशंकर चलवदे, उपविभागीय कृषी अधिकारी रविकुमार सुखदेव इतर अधिकारी उपस्थित होते. 

यावेळी मार्गदर्शन करताना एकनाथ डवले म्हणाले की, कृषी विभागाने 3.5 हेक्टर क्षेत्रावर रब्बी पिकांचे नियोजन केले असून यामध्ये आणखी वाढ होण्याची शक्यता आहे. यावर्षी मोठ्या प्रमाणात करडई लागवड करावी तसेच खरीप हंगामासाठी उन्हाळी सोयाबीन कार्यक्रम राबवून सोयाबीन बियाणे राखुन ठेवावे. येत्या काही दिवसात पावसाची शक्यता आहे यामुळे 15 ऑक्टोबर पर्यत सोयाबीन पिकाची काढणी करावी व सोयाबीन सुरक्षित ठिकाणी झाकून ठेवावे अशा सूचना त्यांनी उपस्थित शेतकऱ्यांना केल्या.

000000  

 पिकविम्यासाठी सोयाबीन पिकाचा समावेश

- जिल्हाधिकारी डॉ. विपिन इटनकर 

नांदेड (जिमाका) दि. 8 :- जिल्हयामध्ये 4 लाख 34 हजार 251 हे. क्षेत्रावर सोयाबिन पिकाची पेरणी झाली आहे. जवळपास सर्व शेतकऱ्यांनी सोयाबिनचा पिक विमा काढलेला आहे. अतिवृष्टीमुळे सोयाबिन पिकाचे मोठया प्रमाणावर नुकसान झालेले आहे. विमा कंपनी व कृषि विभाग नुकसानीचे पंचनामे करत आहे. येत्या 3 ते 4 दिवसात पंचनामे पुर्ण करण्यात येणार असून, विमा कंपनी इतर पिकांसोबत सोयाबिन पिकाची देखील नुकसान भरपाई शेतकऱ्यांना देणार असल्याची माहिती जिल्हाधिकारी डॉ. विपीन इटनकर यांनी दिली. 

संभाव्य अवकाळी पावसापासुन पिकाचे नुकसान होणार नाही यादृष्टीने शेतकऱ्यांनी सोयाबिन जर हाती लागले असेल तर अशा काढणीला आलेल्या सोयाबिन पिकाची 15 ऑक्टोबर पुर्वी काढणी करून घ्यावी असे आवाहनही करण्यात आले आहे. काही वृत्तपत्रामध्ये 8 ऑक्टोंबर 2021 रोजी प्रसिध्द झालेल्या बातमीत पिक विमा आगाऊ मिळणेसाठी नांदेड जिल्हयामध्ये सोयाबीनचा उल्लेख केलेला नसल्याचे दिसून आले. यामूळे शेतकऱ्यांच्या मनामध्ये निर्माण झालेला संभ्रम दूर करण्यासाठी जिल्हा प्रशासनाच्या व कृषी विभागाच्या वतीने ही वस्तुस्थिती स्पष्ट केली आहे.

0000

 नांदेड जिल्ह्यात 2 व्यक्ती कोरोना बाधित तर 3  कोरोना बाधित झाले बरे 

नांदेड (जिमाका) दि. 8 :- जिल्ह्यात आज प्राप्त झालेल्या 867 अहवालापैकी 2 अहवाल कोरोना बाधित आले आहेत. यात आरटीपीसीआर तपासणीद्वारे 2 तर अँटिजेन तपासणीद्वारे निरंक अहवाल बाधित आहेत. जिल्ह्यात आजवर एकुण बाधितांची संख्या 90 हजार 334 एवढी झाली असून यातील 87 हजार 668 रुग्णांना रुग्णालयातून सुट्टी देण्यात आलेली आहे. आजच्या घडीला 14 रुग्ण उपचार घेत असून 1 बाधितांची प्रकृती अतिगंभीर आहे. जिल्ह्यातील कोरोनाचा प्रादुर्भाव कमी करण्यासाठी सेवाभावी संस्था, प्रतिनिधी आणि जागरुक नागरिकांनी आरोग्य जागराच्या चळवळीत जनतेने सहभाग घेवून मास्क, सॅनिटायझर, सुरक्षित अंतर आणि लसीकरण याबाबत व्यापक जनजागृती करुन अनावश्यक घराबाहेर पडणे टाळावे, असे आवाहन जिल्हाधिकारी डॉ. विपीन इटनकर यांनी केले आहे. 

जिल्ह्यात आतापर्यंत बाधित मृत रुग्णांची संख्या 2 हजार 652 एवढी आहे. आजच्या बाधितामध्ये आरटीपीसीआर तपासणीद्वारे नांदेड मनपा 2 असे एकूण 2 बाधित आढळले. आज जिल्ह्यातील 3 कोरोना बाधितांना औषधोपचारानंतर सुट्टी देण्यात आलेली आहे. यात मनपा अंतर्गत एन.आर.आय.भवन व गृह विलगीकरण  3 व्यक्तीला रुग्णालयातून सुट्टी देण्यात आली. आज 14  कोरोनाबाधित रुग्णांवर औषधोपचार सुरु आहेत. यात शासकीय वैद्यकीय महाविद्यालय विष्णुपुरी 4, नांदेड मनपा अंतर्गत गृह विलगीकरण 10 व्यक्ती उपचार घेत आहेत. 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 7 लाख 39 हजार 296

एकुण निगेटिव्ह स्वॅब- 6 लाख 35 हजार 813

एकुण पॉझिटिव्ह बाधित व्यक्ती- 90 हजार 334

एकूण रुग्णालयातून सुट्टी दिलेली संख्या- 87 हजार 668

एकुण मृत्यू संख्या-2 हजार 652

उपचारानंतर बाधित रुग्ण बरे होण्याचे प्रमाण 97.4 टक्के

आज स्वॅब तपासणी अनिर्णीत संख्या-निरंक

आज स्वॅब नाकारण्यात आलेली संख्या-7

आज प्रलंबित स्वॅब तपासणी संख्या-निरंक

रुग्णालयात उपचार घेत असलेले बाधित व्यक्ती-14

आज रोजी अतिगंभीर प्रकृती असलेले-1

00000

 एमएच-सीईटी परीक्षा केंद्र परिसरात प्रतिबंधात्मक आदेश 

नांदेड (जिमाका) दि. 8 :- एमएच-सीईटी परीक्षा-2021 रि एक्झाम ही शनिवार 9 ऑक्टोंबर 2021 रोजी दोन सत्रात जिल्ह्यात 7 परीक्षा केंद्रावर सकाळी 7 ते संध्याकाळी 7 या वेळेत घेण्यात येणार आहेत. या परीक्षा केंद्राच्या परिसरात बाहेरील व्यक्तींचा उपद्रव होऊ नये व परीक्षा स्वच्छ सुसंगत पार पाडण्याच्यादृष्टिने या परीक्षा केंद्र परिसरात फौजदारी प्रक्रिया संहिता 1973 चे कलम 144 अन्वये प्रतिबंधात्मक आदेश जिल्हादंडाधिकारी डॉ. विपीन इटनकर यांनी काढले आहेत.  

या परीक्षा केंद्रापासून 100 मीटर परिसरात शनिवार 9 ऑक्टोंबर 2021 सकाळी 6 ते सायं 8 वाजेपर्यंत परीक्षार्थी व परीक्षेच्या कामाशी संबंधित अधिकारी-कर्मचाऱ्या व्यतिरिक्त इतर कोणत्याही व्यक्तीला प्रवेश करता  येणार नाही. परीक्षा कालावधीत या परीसरात 100 मीटर पर्यंतची सर्व सार्वजनिक टेलिफोन्स, एसटीडी, आयएसडी, भ्रमणध्वणी, फॅक्स, झेरॉक्स आणि ध्वनीक्षेपक चालू ठेवण्यास प्रतिबंध करण्यात आले आहे.  

00000

 संभाव्य कोरोनाचा धोका टाळण्यासाठी दोन लस घेतलेल्या शिधापत्रिकाधारकांनाच प्रथम प्राधान्य

नांदेड (जिमाका), दि. 8 :- राज्यातील कोरोनाची परिस्थिती लक्षात घेऊन जनजीवन पूर्वरत करण्याच्यादृष्टिने अटी व शर्तीच्या अधिन राहून शाळा, मंदिरे, प्रार्थनास्थळ खुली करण्याचा निर्णय घेण्यात आला आहे. यामुळे व येत्या काळात असलेल्या विविध सण व उत्सवामुळे होणारी गर्दी आणि यामुळे वाढू शकणारा संसर्गाचा धोका लक्षात घेता जिल्ह्यातील सर्व शिधापत्रिकाधारक लाभार्थी यांना कोरोना लसीच्या अटी व शर्तीच्या अधिन राहून प्राधान्य देण्याचा निर्णय घेण्यात आल्याची माहिती जिल्हाधिकारी डॉ. विपीन इटनकर यांनी दिली. 

जिल्ह्यातील सर्व स्वस्तधान्य दुकानांवर यापुढे ज्या शिधापत्रिकाधारक लाभार्थ्यांनी कोरोना लसीचे दोन डोस पूर्ण केले आहे अशाच लाभार्थ्यांना प्रथम प्राधान्य देण्याचा निर्णय घेतला आहे. यात जनतेच्या आरोग्याला अधिक प्राधान्य देऊन संभाव्य धोका  व कोरोनाची तिसरी लाट टाळण्यासाठी हे आदेश परिपत्रकान्वये निर्गमीत केले आहेत. लाभार्थ्यांसह जनतेनेही लसीकरणासाठी अधिकाधिक उत्स्फुर्त सहभाग यात घ्यावा, असेही स्पष्ट केले आहे. ज्या व्यक्तींनी लसीचा एक डोस घेतला आहे त्यांना दोन डोस घेतलेल्या लाभार्थ्यांनंतर प्राधान्य दिले जाईल हेही स्पष्ट केले आहे.

0000

 देगलूर विधानसभा पोटनिवडणुकीसाठी निवडणूक निरिक्षक (पोलीस) दाखल 

हरकती असल्यास साधता येईल संपर्क 

 नांदेड (जिमाका) दि. 8 :- भारत निवडणूक आयोग यांच्याकडून देगलूर विधानसभा मतदार संघाची पोटनिवडणूक जाहीर करण्यात आली आहे. या निवडणुकीसाठी आयोगाने नियुक्त केलेले निवडणूक निरीक्षक (पोलीस) गोपेश अग्रवाल हे नांदेड जिल्ह्यात दाखल झाले आहेत. निवडणूकी संदर्भात जिल्ह्यातील नागरिकांपैकी कुणाच्या काही हरकती, तक्रारी, गाऱ्हाणी असल्यास निवडणूक निरिक्षक (पोलीस) गोपेश अग्रवाल यांच्याशी संपर्क साधावा, असे आवाहन जिल्हाधिकारी तथा जिल्हा निवडणूक अधिकारी डॉ. विपीन इटनकर यांनी केले आहे. 

गोपेश अग्रवाल यांना मिनी सह्याद्री व्हीआयपी सुट शासकीय विश्रामगृह नांदेड येथे भेटता येईल. कुणाला आवश्यकता भासल्यास त्यांना 7498401148 या भ्रमणध्वनी क्रमांकावर संपर्क साधता येईल.
00000

 देगलूर विधानसभा पोटनिवडणुकीसाठी निवडणूक निरिक्षक (खर्च) दाखल

 हरकती असल्यास साधता येईल संपर्क 

 नांदेड (जिमाका) दि. 8 :- भारत निवडणूक आयोग यांच्याकडून देगलूर विधानसभा मतदार संघाची पोटनिवडणूक जाहीर करण्यात आली आहे. या निवडणुकीसाठी आयोगाने नियुक्त केलेले निवडणूक निरीक्षक (खर्च) आर.एन.एन.शुक्ला हे नांदेड जिल्ह्यात दाखल झाले आहेत. निवडणूकी संदर्भात जिल्ह्यातील नागरिकांपैकी कुणाच्या काही हरकती, तक्रारी, गाऱ्हाणी असल्यास निवडणूक निरिक्षक (खर्च) आर.एन.एन. शुक्ला यांच्याशी संपर्क साधावा, असे आवाहन जिल्हाधिकारी तथा जिल्हा निवडणूक अधिकारी डॉ. विपीन इटनकर यांनी केले आहे. 

आर.एन.एन. शुक्ला यांना मिनी सह्याद्री व्हीआयपी सुट शासकीय विश्रामगृह नांदेड येथे भेटता येईल. कुणाला आवश्यकता भासल्यास त्यांना 7498131456 या भ्रमणध्वनी क्रमांकावर संपर्क साधता येईल.
00000

 देगलूर विधानसभा पोटनिवडणुकीसाठी निवडणूक निरिक्षक दाखल

 हरकती असल्यास साधता येईल संपर्क 

 नांदेड (जिमाका) दि. 8 :-  भारत निवडणूक आयोगा यांच्याकडून देगलूर विधानसभा मतदार संघाची पोटनिवडणूक जाहीर करण्यात आली आहे. या निवडणुकीसाठी आयोगाने नियुक्त केलेले निवडणूक निरीक्षक पंकज (भा.प्र.से) हे नांदेड जिल्ह्यात दाखल झाले आहेत. निवडणूकी संदर्भात जिल्ह्यातील नागरिकांपैकी कुणाच्या काही हरकती, तक्रारी, गाऱ्हाणी असल्यास निवडणूक निरिक्षक पंकज (भा.प्र.से) यांच्याशी संपर्क साधावा, असे आवाहन जिल्हाधिकारी तथा जिल्हा निवडणूक अधिकारी डॉ. विपीन इटनकर यांनी केले आहे. 

पंकज (भा.प्र.से) यांना मिनी सह्याद्री व्हीआयपी सुट शासकीय विश्रामगृह नांदेड येथे भेटता येईल. कुणाला आवश्यकता भासल्यास त्यांना 9022820141 या भ्रमणध्वनी क्रमांकावर संपर्क साधता येईल.
00000

 जिल्ह्यात लसीकरणासाठी मिशन कवचकुंडल

कोरोनापासून बचावासाठी लसीकरणाची विशेष मोहिम

लसीकरण करुन घेण्याचे जिल्हा प्रशासनाचे आवाहन   

नांदेड (जिमाका), दि. 8 :- संपूर्ण जिल्ह्यात 8 ते 14 ऑक्टोंबर 2021 या कालावधीत मिशन कवचकुंडल ही विशेष कोरोना लसीकरण मोहिम राबविण्यात येत आहे. लसीकरणाचा पहिला व दुसरा डोस न घेतलेल्यानी या मोहिमेत सहभागी व्हावे. कोरोनापासून सुरक्षित राहावयाचे असेल तर लसीकरण होणे अत्यावश्यक आहे. लसीकरण म्हणजे संरक्षक कवचकुंडले आहेत. नागरिकांनी जास्तीत जास्त लसीकरण करुन या मोहिमेत सहभाग घ्यावा, असे आवाहन जिल्हाधिकारी डॉ. विपीन इटनकर यांनी केले आहे. 

18 वर्षावरील ज्यांनी लसीचा एकही डोस घेतला नाही आणि लसीचा दुसरा डोस घेतला नाही, त्यांनी तो घेणे आवश्यक आहे. दुसरा डोस घेतल्यानंतर कोरोनापासून बचावासाठीची खरी कवचकुंडले प्राप्त होणार आहेत. लसीकरण पूर्ण झाल्यानंतर कोरोना संसर्ग प्रतिबंध करण्यास मदत होते. कोरानो आजार झाल्यास लवकर बरा होऊ शकतो  आणि मृत्यूदर कमी राखण्यास मदत होते. जिल्ह्यात पहिला डोस अद्यापही घेतलेला नाही असे, आणि पहिला डोस घेऊन दुसरा डोस न घेतलेल्याची संख्या मोठया प्रमाणात आहे. राज्य पातळीवरुनही लसीचा मुबलक पुरवठा होणार आहे. त्यामूळे आता नागरिकांनी लस घेण्यास टाळाटाळ करुन नये. कोरोनाची तिसरी लाट उदभवू नये यासाठी सर्वाचे पूर्ण लसीकरण होणे आवश्यक आहे. या मोहिमेमध्ये पाच लक्ष लसीकरणाचे उद्दिष्ट ठेवण्यात आलेले आहे. या मोहिम कालावधीत महानगरपालिका क्षेत्रात विविध ठिकाणी तसेच ग्रामीण भागात सर्व शासकीय रुग्णालये, गावपातळीवर विविध ठिकाणी स्थानिक प्रशासन आणि शिक्षण विभागामार्फत लसीकरण सत्राचे आयोजन करण्यात आलेले आहे. या काळात 18 वर्षावरील सर्व तसेच चौथ्या महिना व पुढील सर्व गरोदर माता यांनी या मोहिम कालावधीत ज्यांनी एकही डोस घेतला नाही त्यांनी, पहिला डोस आणि ज्यांनी लसीचा दुसरा डोस घेतला नाही त्यांनी दुसरा डोस घ्यावा असे आवाहन आरोग्य विभागामार्फत केले आहे. 

या मोहिम काळात गावपातळीवर विविध शाळेच्या ठिकाणी लसीकरण होणार असून शाळेतील विद्यार्थ्यांच्या पालकांनी सहभाग घ्यावा, असे आवाहन शिक्षणाधिकारी प्रशांत दिग्रसकर यांनी केले आहे.  जिल्ह्यात कोरोनासाठीचे निर्बंध सध्या काही प्रमाणात शिथिल केले आहेत. मंदिरे आणि प्रार्थनास्थळे खुली झाली आहेत. आता नवरात्रोत्सव सुरु झाला आहे. लवकरच दिवाळीचा सण येणार आहे. सणाच्या पार्श्वभूमीवर सर्वत्र गर्दी वाढते आहे. लोकांनी कोणत्याही ठिकाणी गर्दी करणे टाळावे. गर्दी झाली तर कोरोनाचा प्रसार होण्याचा धोका असतो. या सण, उत्सवानंतर कोरोनाची तिसरी लाट सुरु होऊ नये यासाठी सर्वाचे संपूर्ण लसीकरण आवश्यक आहे. सर्व धर्म, जाती आणि स्तरावरील नागरिकांनी या लसीकरण मोहिमेत भाग घेवून प्रशासनास सहकार्य करावे, असे आवाहन जिल्हाधिकारी डॉ. विपीन इटनकर, मनपा आयुक्त डॉ. सुनिल लहाने आणि जिल्हा परिषदेच्या मुख्य कार्यकारी अधिकारी श्रीमती वर्षा ठाकूर-घुगे यांनी केले आहे.

0000