वृत्त क्र. 879

 एकलव्य रेसिडेंशियल पब्लिक स्कूलमध्ये

प्रवेशासाठी अर्ज करण्याचे आवाहन 

नांदेड, (जिमाका) दि. 21 :- एकात्मिक आदिवासी विकास प्रकल्प, किनवट अंतर्गत इंग्रजी माध्यमाच्या एकलव्य रेसिडेंशियल पब्लिक स्कुलमध्ये प्रवेशासाठी  स्पर्धा परीक्षेचे आयोजन करण्यात आले आहे. ही प्रवेश परीक्षा शासकीय आश्रमशाळा बोधडी ता. किनवट जि. नांदेड व एकलव्य रेसिडेंशियल पब्लिक स्कूल, सहस्त्रकुंड ता. किनवट जि. नांदेड येथे रविवार 25 फेब्रुवारी 2024 रोजी सकाळी 11 ते 1 या वेळेत घेण्यात येणार आहे. या परीक्षेसाठी विहित नमुन्यातील प्रवेश अर्ज किनवट प्रकल्प कार्यालयाअंतर्गत येणाऱ्या सर्व शासकीय अनुदानीत आश्रमशाळा व एकलव्य रेसिडेंशियल पब्लिक स्कुल, सहस्त्रकुंड मुख्याध्यापकाकडे विनामुल्य उपलब्ध आहेत.

आदिवासी विकास विभागाच्या शासकीय व अनुदानित आश्रमशाळा जिल्हा परिषद, नगरपालिका व महानगर पालिकेच्या प्राथमिक व माध्यमिक शाळा तसेच सर्व शासनमान्य अनुदानित प्राथमिक व माध्यमिक शाळेतील सन 2023-24 या शैक्षणिक वर्षात इयत्ता 5 वी, 6 वी, 7 वी, व 8 वी मध्ये शिकत असलेल्या अनुसूचित/आदिम जमातीचे विद्यार्थी इंग्रजी माध्यमाच्या एकलव्य रेसिडेंशियल पब्लिक स्कुलमध्ये प्रवेश परिक्षेसाठी पात्र राहणार आहेत. 

पात्र विद्यार्थ्यांचे पूर्ण भरलेले विहित नमुन्यातील प्रवेश अर्ज संबंधित शाळांच्या मुख्याध्यापकांनी 17 फेब्रुवारी, 2024 पर्यंत एकात्मिक आदिवासी विकास प्रकल्प कार्यालय, किनवट जि. नांदेड यांच्याकडे सादर करावेत, असे प्रकल्प अधिकारी तथा सहायक जिल्हाधिकारी एस कार्तीकेयन यांनी  प्रसिद्धीपत्रकान्वये कळविले आहे.

0000 

सुधारित वृत्त क्र. 878

हॉटेल, खानावळ, ढाब्यावर अवैधरित्या दारु विक्रीचे गुन्हे दाखल

 ·         मद्यसेवन करणाऱ्या ग्राहकांना अटक

·         राज्य उत्पादन शुल्क विभागाची धडक कारवाई

 

नांदेड (जिमाका) दि. 21 :- नांदेड येथील नमस्कार चौक परिसरातील हॉटेल, खानावळ व ढाब्यावर परवाना नसतांना दारूची विक्री केल्याप्रकरणी छापा टाकून कायदेशीर कारवाई करण्यात आली. राज्य उत्पादन शुल्क विभागाचे अधीक्षक अतुल कानडे यांच्या नेतृत्वाखाली भरारी पथकाने दि. 19 व 20 डिसेंबर रोजी अचानकपणे दारुच्या गुत्त्यावर छापे टाकले.

 

नमस्कार चौक येथील रानाजी हॉटेल, राजवाडा ढाबा, स्वागत ढाबा येथे राज्य उत्पादन शुल्क विभागाच्या पथकाने महाराष्ट्र दारूबंदी कायद्याच्या कलम 68 व 84 प्रमाणे कारवाई करून चालक व मद्यपींवर गुन्हे दाखल केले. यात चालकांशिवाय एकुण 7 मद्यसेवन करणाऱ्या व्यक्तींविरूद्ध महाराष्ट्र दारूबंदी कायद्याच्या कलम 84 प्रमाणे कारवाई करण्यात आली. त्यांना न्यायालयात हजर केले असता न्यायालयाने ढाबाचालकास प्रत्येकी 35 हजार रूपये व मद्यसेवन करणाऱ्या ग्राहकांना प्रत्येकी 500 रुपयाप्रमाणे दंड ठोठावला. वरील तीनही कारवाईमध्ये धाबा मालक आरोपींना एकुण 1 लाख 5 हजार रुपये व 7 मद्यसेवन करणाऱ्या आरोपींना 3 हजार 500 रुपये एवढा दंड ठोठावला.

 

अनुज्ञप्ती नसतांना मद्यसेवनास परवानगी द्याल

तर दंडासह 5 वर्षांपर्यंत होईल कारवाई

- राज्य उत्पादन शुल्क अधीक्षक अतुल कानडे

 

शासनमान्य अनुज्ञप्ती नसतांना कोणत्याही हॉटेलमध्ये / ढाबा येथे जर ग्राहकांना मद्यसेवनास परवानगी दिली तर यात परवानगी देणारे आणि पिणारे या दोघांवर कायदेशीर कारवाई होईल. यात 3 ते 5 वर्षांपर्यंत कारवासाची शिक्षा असून महाराष्ट्र दारूबंदी कायद्याच्या कलम 68 (क), (ख) अन्वये ही कारवाई होईल. आर्थीक दंडाचीही यात कारवाई असून 25 हजार ते 50 हजार रुपयांपर्यंतचा दंड अथवा दोन्ही प्रकारची कारवाई केली जाईल, असा इशारा राज्य उत्पादन शुल्क विभागाचे अधिक्षक अतुल कानडे यांनी दिली. महाराष्ट्र दारूबंदी कायद्याच्या कलम 84 अन्वये कोणत्याही अनुज्ञप्ती नसलेल्या ठिकाणी मद्य पिल्यास तर त्यांना 5 हजार रुपयांपर्यंत दंड होऊ शकतो. नागरिकांनी कुठल्याही अवैध ढाब्यावर किंवा अवैध ठिकाणी दारू पितांना आढळून आल्यास ढाबा मालकासह मद्यसेवन करणाऱ्या व्यक्तीविरूद्ध कडक कारवाई करू, असे त्यांनी स्पष्ट केले. अवैध मद्यनिर्मिती, विक्री, वाहतूक यासंदर्भात कोणाचीही तक्रार असल्यास विभागाचा टोल फ्री क्रमांक 18002339999, व्हॉटसॲप क्र. 8422001133 तसेच दूरध्वनी क्र. 02462-287616 या क्रमांकावर संपर्क करावा.

00000

वृत्त क्र. 877

 तुर खरेदीसाठी ऑनलाईन नोंदणी करण्याचे आवाहन

नांदेड, (जिमाका) दि. 21 :-  नाफेडच्या वतीने पीएसएफ योजनेअंतर्गत हंगाम 2023-24 मध्ये बाजार भावाने तुर खरेदी करण्यासाठी पणन महासंघाच्या संस्थाकडून शेतकऱ्यांची ऑनलाईन नोंदणी सुरु झाली आहे. अर्धापूर, हदगाव, कासराळी, देगलूर येथील केंद्राना असे निर्देश देण्यात आले आहेत. नोंदणी करण्यासाठी शेतकऱ्यांना आधार कार्ड, अचुक बँक खाते आणि ऑनलाईन पिक पेरा असलेला सातबारा आवश्यक आहे. तरी या योजनेत जास्तीत जास्त शेतकऱ्यांनी नोंदणी करावी, असे आवाहन जिल्हा पणन अधिकारी राजेश हेमके यांनी केले आहे.  

0000