मंडप पेंडाल तपासणी

समितीमध्ये अंशत: बदल

नांदेड, दि. 11 :- महानगरपालिका क्षेत्रासाठी मंडप / पेंडाल तपासणी सनियंत्रण समितीमध्ये जिल्हाधिकारी नांदेड यांनी अंशत: बदल करुन मनपा उपआयुक्त संतोष कंदेवाड  ऐवजी (क्षे.का.क्र. 1 ते 6) मनपा उपआयुक्त विलास भोसीकर यांची नियुक्ती आदेश काढले आहेत.  

00000

श्री गणेश उत्सव कालावधीत

डॉल्बी सिस्टीम वापरास प्रतिबंध

नांदेड, दि. 11 :- जिल्ह्यात श्री गणेश उत्सव 13 ते 24 सप्टेंबर या कालावधीत डॉल्बी मालक / धारक / गणेश मंडळाचे पदाधिकारी यांनी त्यांचे कब्जातील डॉल्बी सिस्टीम वापरात / उपयोगात आण्यास प्रतिबंध आदेश जिल्हादंडाधिकारी अरुण डोंगरे यांनी काढला आहेत.  

जिल्हादंडाधिकारी अरुण डोंगरे यांनी फौजदारी प्रक्रिया संहिता 1973 मधील कलम 144 (1) अन्वये 13 सप्टेंबर रोजी गणेशाचे आगमन ते 24 सप्टेंबर रोजी श्रीचे विसर्जन मिरवणूक संपेपर्यंत नांदेड जिल्ह्यात कोणत्याही डॉल्बी मालक / धारक / गणेश मंडळाचे पदाधिकारी यांनी त्यांचे कब्जातील डॉल्बी सिस्टीम वापरात / उपयोगात आण्यास प्रतिबंध करण्यात आला आहे. या डॉल्बी मशीन व यंत्रसामुग्री संबंधितांनी स्वत:चे कब्जात सिलबंद स्थितीत ठेवावी. हा आदेश 13 सप्टेंबर 2018 रोजी सकाळी 7 ते 24 सप्टेंबर 2018 रोजी श्रीचे विसर्जन होईपर्यंतच्या कालावधीसाठी लागू राहील,

डॉल्बीचे आवाजामुळे व कंपनामुळे लहान मुले, वयोवृद्ध ज्येष्ठ नागरिक तसेच आजारी व सामान्य नागरीक यांच्या कानास, ऱ्हदयास आरोग्यास,जिवितास धोका होण्याची तसेच सामाजिक स्वास्थ बिघडण्यास व मालमत्तेस हानी पोहचण्याची शक्यता असल्याने सार्वजनिक शांतता व सुरीक्षततेस बाधा उत्पन्न होण्याची शक्यता असल्याने गणेश विसर्जन मिरवणुकीमध्ये डॉल्बी मालक / धारक यांचेवर बंदी घालण्यात आली आहे. असेही आदेशात नमुद केले आहे.

00000

कापूस, सोयाबीन पिकासाठी कृषि संदेश

नांदेड, दि. 11 :- जिल्ह्यात कापूस व सोयाबीन पिकासाठी किड व रोग सर्वेक्षण या प्रकल्पाअंतर्गत काम सुरु आहे. शेतकऱ्यांनी पुढील प्रमाणे किडीपासून संरक्षणासाठी उपविभागीय कृषि अधिकारी नांदेड यांनी कृषि संदेश दिला आहे.

कापुस गुलाबी बोंडआळीसाठी थायोडीकार्ब 75 डब्ल्यू पी 20 ग्रॅम तसेच रसशोषण किडीसाठी बुप्रोफेझीन 15 टक्के अधिक असिफेट 35 टक्के डब्ल्यू पी 25 ग्रॅम प्रति 10 लिटर पाण्यात मिसळून त्वरीत फवारावे.

सोयाबीन पिकावरील खोडमाशी, उंटअळी तसेच चक्रीभुंग्यासाठी थायमिथोक्झॅम 12.6 अधिक लॅमडा सॅहलोथ्रीन 9.5 झेडसी 3 मिली प्रती 10 लिटर पाण्यात मिसळून फवारावे, असे आवाहन उपविभागीय कृषि अधिकारी नांदेड यांनी केले आहे.

0000000

अनुकंपा तत्वावरील नियुक्तीसाठी

364 धारकांची प्रतिक्षा यादी घोषित

आक्षेपाबाबत 15 सप्टेंबरची मुदत

नांदेड, दि. 11 :- अनुकंपा तत्वावरील नियुक्तीसाठी जिल्हा परिषदेच्या सामान्य प्रशासन विभागाने नुकतीच 364 अनुकंपा धारकांची प्रतिक्षा यादी जिल्हा परिषद नांदेडच्या www.zpnanded.in या वेबसाईटवर आणि जिल्हा परिषदेच्या, नांदेड जिल्ह्यातील सर्व पंचायत समिती कार्यालयातील आवाराच्या भिंतीवर प्रसिद्ध करण्यात आली आहे.

प्रतिक्षा यादी 30 जून 2018 अखेर प्राप्त प्रस्तावाप्रमाणे घोषित करण्यात आली आहे. घोषित केलेल्या यादीतील ज्या उमेदवारांचे प्रस्ताव अपूर्ण आहेत अशा अनुकंपा धारकांनी कागदपत्रांची पुर्तता केली नाही अथवा ज्येष्ठेतबाबत काही आक्षेप असल्यास संबंधित अनुकंपा धारकांनी 15 सप्टेंबर 2018 पर्यंत त्यांचे म्हणणे लेखी पुराव्यानिशी जिल्हा परिषदेच्या सामान्य प्रशासन विभागास सादर करावे. त्यानंतर आलेल्या आक्षेपाच्या विचार करण्यात येणार नाही याची दक्षता घ्यावा, असे आवाहन उपमुख्य कार्यकारी अधिकारी (सामान्य) जिल्हा परिषद नांदेड यांनी केले आहे.

000000

प्रेरणा प्रकल्पच्यावतीने

“जागतिक आत्महत्या प्रतिबंध दिन” साजरा

नांदेड, दि. 11 :-  जागतिक आत्महत्या प्रतिबंध दिनानिमित्त प्रेरणा प्रकल्प शेतकरी समुपदेशन व आरोग्य सेवा कार्यक्रमाच्यावतीने येथील गुरुगोबिंद सिंघजी शासकीय रुग्णालय येथे 10 सप्टेंबर रोजी हा दिवस साजरा करण्यात आला. या कार्यक्रमाच्या अध्यक्षस्थानी जिल्हा शल्य चिकित्सक डॉ. बी. पी. कदम होते.   

यावेळी डॉ. एच. आर. गुंटूरकर, मानसोपचार तज्ज्ञ डॉ. दि. भा. जोशी, आतिरिक्त जिल्हा शल्य चिकित्सक डॉ. नीलकंठ भोसीकर, नोडल आधिकारी डॉ.वाघमारे, वैद्यकीय आधिकारी डॉ. हजारी, डॉ. पाटील, नर्सिंग कॉलेजच्या प्राचार्या श्रीमती गायकवाड यांची प्रमुख उपस्थिती होती.

यावेळी जिल्हा शल्य चिकित्सक डॉ. कदम यांनी विविध आजाराबद्दल मार्गदर्शन केले. डॉ. गुंटूरकर यांनी सध्या आत्महत्या वाढण्यामागचे कारण नैराश्य आसल्याचे सांगितले. डॉ.जोशी यांनी आत्महत्येमागची विविध कारणांची माहिती दिली. प्रेरणा प्रकल्प कार्यक्रमाचे कार्यक्रम आधिकारी डॉ. प्रणद जोशी यांनी आत्महत्या रोखण्यासाठी विविध उपाययोजनाबद्दल तसेच ताण-तणाव नियोजन यावर सखोल मार्गदर्शन केले.

याप्रसंगी सन्मित्र फाेेउंडेशन पत्रिकेचे अनावरण करण्यात आले. नर्सिंग कॉलेजच्या विद्यार्थ्यांनी आत्महत्येवर पथनाट्य सादर करुन जनजागृती केली. कार्यक्रमाचे सूत्रसंचलन सामाजिक कार्यकर्त्या शीतल उदगीरकर यांनी केले तर आभार मानसशास्त्रज्ञ डॉ. कैलास चव्हाण यांनी मानले. या कार्यक्रमाचे संयोजन प्रेरणा प्रकल्पचे राहुल कराळे, वंदना कसपटे व रुपाली मस्के यांनी केले.

000000