कोरोना : पुणे – मुंबईहून येणा-यांची नोंद होणार,
रुग्णालयात 20 बेड आरक्षित
तहसीलदार परळीकर यांची माहिती
------------------------------
कोरोना व्‍हायरसचा पादूर्भाव होऊ नये यासाठी तालुका प्रशासन यंत्रणा सज्‍ज झाली आहे. पुणे-मुंबई व अन्‍य भागातून लोहा तालुक्‍यात येणा-या प्रत्‍येक नागरिकांची नोंद केली जात आहे. त्‍यांना आवश्‍यक त्‍या सूचना देण्‍यात येत आहेत. लोहा ग्रामीण रुग्णालयात दहा व शहरातील खाजगी रुग्णालयात दहा असे वीस बेड आरक्षित केले आहेत. शहरी भागाची संपूर्ण जबाबदारी मुख्‍याधिकारी यांच्‍यावर आहे. नागरिकांनी काळजी घ्‍यावी, घाबरु नये, कोरोनाची लक्षणे आढळल्‍यास तात्‍काळ जवळच्‍या दवाखान्‍यात दाखवावे, असे आवाहन लोहा तहसिलदार विठ्ठल परळीकर यांनी केले आहे.
कोरोनाच्‍या पार्श्‍वभूमीवर केंद्रीय आपत्‍ती व्‍यवस्‍थापन कायदा 2005 नुसार तालुक्यातील गटविकास अधिकारी, मुख्‍याधिकारी न.पा. , गटशि‍क्षणाधिकारी, महिला बालविकास अधिकारी आणि तालुका आरोग्‍य अधिकारी यांच्या सेवा अधिग्रहीत करण्‍यात आल्‍या आहेत.
जिल्हाधिकारी डॉं. विपीन ईटनकर यांनी जे आदेश दिले आहेत, त्‍याची अमलबजावणी तालुका प्रशासन करीत आहे. ग्रामीण भागात गावातील गल्‍ली निहाय कोरोना बाबत जनजागृती, नवीन येणा-यांची नोंद घेतल्‍यानंतर लक्षणे आढळल्‍यास त्‍याची तातडीने माहिती देण्‍यासाठी पथक कार्यान्‍वीत करण्‍यात आले आहे. ग्रामसेवक, शिक्षक, आशा वर्कर्स, अंगणवाडी कार्यकर्ती, सेविका, यांची त्‍या- त्‍या गावात नेमणूक करण्‍यात आली असून ते दैनंदिन अहवाल सबंधिताना देतील असे तहसीलदार परळीकर यांनी सांगीतले.
कोरोनाचा प्रादूर्भाव होवू नये यासाठी प्रभावीपणे अमलबजावणी तालुका प्रशासन करीत आहे. तहसीलदार परळीकर यांनी केलेल्‍या उपाययोजना बाबत सांगितले की, ग्रामीण रुग्णालयात 10 व शहरातील खाजगी रुग्णालयात 10 असे 20 बेड आरक्षित करण्‍यात आले आहे. तसेच खबरदारीची उपाययोजना म्‍हणून शहरातील 4 लॉजिंग मध्‍ये विलगीकरणांची व्‍यवस्‍था करण्‍यात आली आहे. नगरपालिका क्षेत्रातील सर्व जबाबदारी मुख्‍याधिकारी यांच्‍यावर सोपविण्‍यात आली आहे.
सर्दी, खोकला, निमोनिया, ताप, अशी लक्षणे असतील तर त्‍यांनी तात्‍काळ रुग्णालयात दाखवावे. कोरोनासाठी शासनाकडून मोफत उपचार केला जाणार आहे. कोरोनाचा प्रादूर्भाव होऊ नये यासाठी नागरिकांनी गर्दी टाळावी. लग्‍न - समारंभा टाळावेत, घाबरु नये भीती बाळगु नये असे आवाहन तहसिलदार परळीकर यांनी केले आहे.
