वृत्त क्रमांक

येरगी ग्रामसभेत व रिफॉर्म उत्सवात केंद्रीय सहसचिव पी. नरहरी यांचा सहभाग

ग्रामस्थांशी संवाद साधत शाश्वत ग्रामविकासासाठी केले मार्गदर्शन

बालिका पंचायत उपक्रमाचे विशेष कौतुक

ग्रामसभेत महिलांचा उत्स्फूर्त सहभाग

नांदेड (जिमाका), दि. २  : केंद्र सरकारचे सहसचिव पी. नरहरी यांनी येरगी येथे आयोजित ग्रामसभा व रिफॉर्म उत्सवात सहभागी होऊन ग्रामस्थांशी थेट संवाद साधला. ग्रामविकासाच्या विविध विषयांवर ग्रामस्थांची मते, सूचना व अनुभव जाणून घेत त्यांनी शासनाच्या योजना आणि उपक्रमांच्या प्रभावी अंमलबजावणीसाठी मार्गदर्शन केले.

रिफॉर्म उत्सवाच्या माध्यमातून शासनाच्या विविध योजना, लोककल्याणकारी उपक्रम आणि प्रशासकीय सुधारणांची माहिती ग्रामस्थांपर्यंत पोहोचविण्यात आली. यावेळी श्री. नरहरी यांनी विविध शासकीय योजनांच्या लाभार्थींशी संवाद साधून योजनांचा प्रत्यक्ष लाभ मिळाल्यानंतर त्यांच्या जीवनात झालेल्या बदलांची माहिती घेतली. योजनांची माहिती आणि त्यांचा लाभ अधिकाधिक पात्र नागरिकांपर्यंत पोहोचविण्याची गरज त्यांनी अधोरेखित केली.

येरगी येथील बालिका पंचायत उपक्रमाची श्री. नरहरी यांनी विशेष दखल घेत कौतुक केले. ग्रामीण भागातील बालिकांना ग्रामविकासाच्या प्रक्रियेत सहभागी करून घेणे, त्यांच्यात नेतृत्वगुण विकसित करणे आणि निर्णयप्रक्रियेची जाणीव निर्माण करणे, हा उपक्रम अनुकरणीय असल्याचे त्यांनी नमूद केले.

यावेळी श्री. नरहरी यांच्या हस्ते वृक्षलागवड करण्यात आली तसेच जलतारा कामांचे भूमिपूजन करण्यात आले. ग्रामस्थांच्या सक्रिय सहभागातून जलसंधारणाची कामे, पर्यावरण संवर्धन आणि शाश्वत ग्रामविकासाला गती देण्याचे आवाहन करण्यात आले. जिल्हाधिकारी राहुल कर्डिले यांची यावेळी उपस्थिती होती.

महाराष्ट्र शासनाच्या ग्रामविकास विभागामार्फत शासकीय योजनांच्या प्रचार-प्रसारासाठी तयार करण्यात आलेले पोस्टर्स, बॅनर्स तसेच विविध शासन आदेशांची मांडणी श्री. नरहरी यांनी पाहिली. शासनाच्या योजना व उपक्रमांची माहिती सोप्या आणि प्रभावी पद्धतीने सर्वसामान्य नागरिकांपर्यंत पोहोचविण्यासाठी करण्यात येत असलेल्या या प्रयत्नांचे त्यांनी कौतुक केले.

ग्रामसभेस मुख्य कार्यकारी अधिकारी महेश पाटील, अतिरिक्त मुख्य कार्यकारी अधिकारी परीक्षित यादव, उपमुख्य कार्यकारी अधिकारी दत्तात्रय गिरी यांच्यासह जिल्हा परिषद स्तरावरील विविध विभागांचे अधिकारी, गावस्तरावरील विविध विभागांचे कर्मचारी आणि ग्रामस्थ मोठ्या संख्येने उपस्थित होते.

ग्रामसभेत महिलांचा सहभाग लक्षणीय होता. महिलांनी उत्स्फूर्तपणे सहभाग नोंदवत ग्रामविकासाशी संबंधित विविध विषयांवर आपली मते, सूचना आणि अनुभव मांडले. ग्रामस्थांचा सक्रिय सहभाग, शासनाच्या योजनांची माहिती आणि स्थानिक पातळीवरील विकासकामांचा आढावा यामुळे येरगी येथील ग्रामसभा व रिफॉर्म उत्सवाला विशेष महत्त्व प्राप्त झाले.

****

वृत्त क्रमांक

राष्ट्रीय सफाई कर्मचारी आयोगाचे सदस्य हरदीप सिंग गिल यांचा नांदेड दौरा

नांदेड (जिमाका), दि. 2 : राष्ट्रीय सफाई कर्मचारी आयोगाचे सदस्य हरदीप सिंग गिल हे दि. 8 ते 11 ऑक्टोबर, 2026 या कालावधीत नांदेड दौऱ्यावर येत आहेत. त्यांच्या दौरा कार्यक्रमाचा तपशील पुढीलप्रमाणे आहे. 

गुरुवार, दि. 8 ऑक्टोबर रोजी सायंकाळी 7 वाजता बिदर येथून मोटारीने नांदेडकडे प्रयाण करुन रात्री 9.30 वाजता नांदेड येथे आगमन व मुक्काम. 

शुक्रवार, दि. 9 ऑक्टोबर रोजी सकाळी 10 वाजता हजूर साहिब गुरुद्वाराला भेट. दुपारी 2 वाजता नांदेड-वाघाळा शहर महानगरपालिका आयुक्त यांच्यासोबत बैठकीस उपस्थिती आणि नंतर मुक्काम. 

शनिवार, दि. 10 ऑक्टोबर रोजी स्थानिक कार्यक्रमास उपस्थिती. रविवार, दि. 11 ऑक्टोबर रोजी सकाळी 11.05 वाजता रेल्वेने दिल्लीकडे प्रयाण करतील. 

**

वृत्त क्रमांक

राज्य सेवा हक्क आयुक्त डॉ. किरण जाधव यांचा नांदेड दौरा

नांदेड (जिमाका), दि. 2 : छत्रपती संभाजीनगर विभागाचे राज्य सेवा हक्क आयुक्त डॉ. किरण जाधव हे दि. 12 ते 13 ऑक्टोबर, 2026 या कालावधीत नांदेड दौऱ्यावर येत आहेत. त्यांच्या दौरा कार्यक्रमाचा तपशील पुढीलप्रमाणे आहे. 

सोमवार, दि. 12 ऑक्टोबर रोजी सकाळी 6 वाजता रेल्वेने नांदेड येथे आगमन व शासकीय विश्रामगृह येथे राखीव. 11.30 वाजता येथील जिल्हाधिकारी कार्यालयात जिल्ह्यातील सर्व विभाग प्रमुख यांच्याकडून महाराष्ट्र लोकसेवा हक्क अधिनियम 2015 च्या प्रभावी अंमलबजावणी संदर्भात आढावा घेतील. दुपारी 4 वाजता तहसील कार्यालय माहूर येथे महाराष्ट्र लोकसेवा हक्क अधिनियम 16(1)(ख) नुसार कार्यालयीन तपासणीस उपस्थिती व शासकीय विश्रामगृह माहूर येथे मुक्काम. मंगळवार, दि. 13 ऑक्टोबर रोजी सकाळी 8 वाजता हिंगोलीकडे प्रयाण करतील. 

**

 वृत्त क्रमांक

पीक कापणी प्रयोग व जलतारा प्रकल्पाचे जिल्हाधिकाऱ्यांच्या हस्ते उद्घाटन

• दुष्काळाच्या पार्श्वभूमीवर प्रशासकीय यंत्रणांनी सतर्क राहण्याचे जिल्हाधिकारी राहुल कर्डिले यांचे निर्देश

नांदेड (जिमाका), दि. 02 : देगलूर तालुक्यातील मौजे कुशावाडी येथे जिल्हाधिकारी राहुल कर्डिले यांच्या उपस्थितीत पीक कापणी प्रयोगाची पाहणी करण्यात आली. तसेच मौजे येरगी येथे त्यांच्या हस्ते जलतारा प्रकल्पाचे उद्घाटन करण्यात आले. त्यानंतर जिल्हाधिकाऱ्यांनी देगलूर तालुक्यातील सर्व प्रशासकीय प्रमुखांची आढावा बैठक घेऊन दुष्काळाच्या पार्श्वभूमीवर विविध यंत्रणांना आवश्यक सूचना दिल्या.

कुशावाडी येथे शेतकरी सुरेश हणमंत हिंगोले यांच्या गट क्रमांक 123 मध्ये आयोजित पीक कापणी प्रयोगाची जिल्हाधिकारी राहुल कर्डिले व जिल्हा अधीक्षक कृषी अधिकारी दत्तकुमार कळसाईत यांनी पाहणी केली. पीक कापणी प्रयोगाची कार्यपद्धती, नोंदणी व अचूकता याबाबत जिल्हाधिकाऱ्यांनी संबंधित अधिकाऱ्यांना महत्त्वपूर्ण निर्देश दिले.

यावेळी उपविभागीय अधिकारी अनुप पाटील, उपविभागीय कृषी अधिकारी गीते, तहसीलदार भरत सूर्यवंशी, निवासी नायब तहसीलदार गिरीश सर्कलवाड, नायब तहसीलदार गणेश रायेवार, तालुका कृषी अधिकारी सोनकांबळे यांच्यासह संबंधित अधिकारी उपस्थित होते. 

येरगी येथे जलतारा प्रकल्पाचे उद्घाटन

मौजे येरगी येथे जिल्हाधिकारी राहुल कर्डिले यांच्या हस्ते जलतारा प्रकल्पाचे उद्घाटन करण्यात आले. शेतातील पावसाचे पाणी जमिनीत मुरवून भूजल पातळी वाढविणे, मातीची धूप रोखणे तसेच दुष्काळाच्या परिस्थितीत जलसुरक्षेला बळकटी देणे, हा या प्रकल्पाचा प्रमुख उद्देश आहे.

जलतारा प्रकल्पामुळे विहिरी व बोअरवेलच्या पाणीपातळीत वाढ होण्यास मदत होत असून, पाण्याची उपलब्धता सुधारल्याने शेती उत्पादनातही वाढ होण्यास हातभार लागतो. हा उपक्रम विकसित भारत रोजगार व आजीविका हमी मिशन (ग्रामीण) अंतर्गत महाराष्ट्रातील विविध जिल्ह्यांत राबविण्यात येत आहे.

यावेळी सहसचिव (भू.सं.) ग्रामीण विकास मंत्रालय पी. नरहरी, जिल्हा परिषदेचे मुख्य कार्यकारी अधिकारी महेश पाटील, उपविभागीय अधिकारी अनुप पाटील, तहसीलदार भरत सूर्यवंशी, गटविकास अधिकारी श्रीकांत बलदे यांच्यासह संबंधित अधिकारी व मान्यवर उपस्थित होते.

दुष्काळाच्या पार्श्वभूमीवर प्रशासनाला सतर्क राहण्याचे निर्देश

त्यानंतर जिल्हाधिकारी राहुल कर्डिले यांनी देगलूर तालुक्यातील सर्व प्रशासकीय प्रमुखांची आढावा बैठक घेतली. दुष्काळाच्या पार्श्वभूमीवर सर्व प्रशासकीय यंत्रणांनी सतर्क राहून नागरिकांना आवश्यक सेवा व सुविधा वेळेत उपलब्ध करून द्याव्यात, असे निर्देश त्यांनी दिले.

दुष्काळाच्या अनुषंगाने उपलब्ध पाणी, चारा, शेती व महसूलविषयक बाबींचा सातत्याने आढावा घेण्यासोबतच शासनाच्या विविध उपाययोजनांची प्रभावी अंमलबजावणी करण्याच्या सूचनाही जिल्हाधिकाऱ्यांनी संबंधित यंत्रणांना दिल्या. तालुक्यातील परिस्थितीवर नियमित लक्ष ठेवून आवश्यक त्या उपाययोजना तातडीने करण्याचे निर्देश यावेळी देण्यात आले. या बैठकीस देगलूर तालुक्यातील विविध विभागांचे कार्यालय प्रमुख उपस्थित होते.

***

वृत्त क्रमांक

पीक कापणी प्रयोगात अचूकता व पारदर्शकतेवर जिल्हाधिकारी राहुल कर्डिले यांचा भर

• ताकबीड येथे सोयाबीन पीक कापणी प्रयोगाची जिल्हाधिकाऱ्यांकडून प्रत्यक्ष पाहणी

• दुष्काळसदृश परिस्थितीत प्रयोगांना विशेष महत्त्व

• मोटारसायकलने शेतांमध्ये जाऊन जिल्हाधिकाऱ्यांकडून पाहणी

• वरिष्ठ महसूल व कृषी अधिकाऱ्यांची उपस्थिती

नांदेड (जिमाका), दि. 02 : खरीप हंगामातील पिकांची प्रत्यक्ष उत्पादकता अचूकपणे निश्चित करण्यासाठी तसेच पीक विमा, नैसर्गिक आपत्तीमुळे होणारे पीक नुकसान आणि शासनामार्फत देण्यात  येणाऱ्या नुकसानभरपाईच्या निर्धारणासाठी महत्त्वपूर्ण असलेल्या पीक कापणी प्रयोगांना जिल्ह्यात वेग आला आहे. जिल्हाधिकारी राहुल कर्डिले यांच्या मार्गदर्शनाखाली जिल्ह्यातील विविध महसूल मंडळांमध्ये हे प्रयोग निर्धारित कार्यपद्धतीनुसार व शास्त्रोक्त पद्धतीने राबविण्यात येत आहेत.

याच अनुषंगाने नायगाव तालुक्यातील मौजे ताकबीड येथे शेतकरी सोनी सतीश टेकाळे यांच्या गट क्रमांक 183 मधील सोयाबीन पिकावर पीक कापणी प्रयोग घेण्यात आला. जिल्हाधिकारी राहुल कर्डिले यांनी प्रत्यक्ष शेतावर उपस्थित राहून या प्रयोगाची पाहणी केली. यावेळी त्यांनी संबंधित अधिकाऱ्यांकडून प्रयोगाची कार्यपद्धती, निवडलेले क्षेत्र, पिकाची सद्यस्थिती तसेच उत्पादकतेच्या नोंदीबाबत सविस्तर माहिती घेतली.

पीक कापणी प्रयोगाच्या अचूकतेवर विशेष लक्ष

जिल्ह्यात खरीप हंगामातील विविध पिकांच्या उत्पादकतेचे वस्तुनिष्ठ मूल्यमापन करण्यासाठी नियोजित पद्धतीने पीक कापणी प्रयोग घेण्यात येत आहेत. महसूल, ग्रामविकास आणि कृषी विभागाच्या समन्वयातून हे प्रयोग निर्धारित निकष व कार्यपद्धतीनुसार पार पाडले जात आहेत.

पीक कापणी प्रयोगाची अचूकता व पारदर्शकता राखण्यासाठी सर्व जिल्हास्तरीय अधिकाऱ्यांनी प्रयोगाच्या वेळी प्रत्यक्ष क्षेत्रावर उपस्थित राहून पाहणी करावी, अशा सूचना जिल्हाधिकारी राहुल कर्डिले यांनी दिल्या आहेत. त्यानुसार वरिष्ठ अधिकारी प्रत्यक्ष शेतावर उपस्थित राहून प्रयोगाच्या प्रक्रियेचे निरीक्षण करीत आहेत.

पीक कापणी प्रयोगासाठी निवडण्यात आलेल्या शेतगटांमध्ये प्रयोग पूर्ण होण्यापूर्वी संबंधित शेतकऱ्यांनी पीक कापणी करू नये, असे आवाहनही जिल्हाधिकारी यांनी केले आहे.

दुष्काळसदृश परिस्थितीत प्रयोगांना विशेष महत्त्व

जिल्ह्यातील सद्यस्थितीतील दुष्काळसदृश परिस्थितीच्या पार्श्वभूमीवर यंदाच्या पीक कापणी प्रयोगांना विशेष महत्त्व प्राप्त झाले आहे. पावसाचे प्रमाण, पिकांची वाढ, पिकांची सद्यस्थिती आणि प्रत्यक्ष उत्पादकता यांचे वस्तुनिष्ठ मूल्यमापन करण्यासाठी पीक कापणी प्रयोग ही महत्त्वाची प्रक्रिया आहे.

पीक कापणी प्रयोगातून प्राप्त होणाऱ्या आकडेवारीच्या आधारे संबंधित महसूल मंडळातील पिकांची सरासरी उत्पादकता निश्चित केली जाते. ही उत्पादकता प्रधानमंत्री पीक विमा योजनेअंतर्गत नुकसानभरपाईच्या निर्धारणासाठी तसेच नैसर्गिक आपत्तीच्या परिस्थितीत शासनाच्या प्रचलित निकषांनुसार देण्यात येणाऱ्या मदतीच्या निर्धारणासाठी महत्त्वाचा आधार ठरते.

त्यामुळे पीक कापणी प्रयोगाची प्रक्रिया अचूक, पारदर्शक आणि वस्तुनिष्ठ पद्धतीने होण्यासाठी जिल्हाधिकारी राहुल कर्डिले हे या प्रक्रियेवर विशेष लक्ष ठेवून आहेत.

मोटारसायकलने शेतांमध्ये जाऊन जिल्हाधिकाऱ्यांकडून पाहणी

ताकबीड येथे पीक कापणी प्रयोगाची पाहणी करण्यासाठी जिल्हाधिकारी राहुल कर्डिले यांनी मोटारसायकलने परिसरातील विविध शेतगटांना भेट दिली. या वेळी त्यांनी मार्गातील शेतांमधील सोयाबीनसह विविध पिकांची स्थिती, पिकांची वाढ, पावसाचा परिणाम तसेच शेतकऱ्यांच्या शेतीतील प्रत्यक्ष परिस्थितीची पाहणी केली.

निवडलेल्या पीक कापणी प्रयोगासोबतच परिसरातील एकूण पीक परिस्थितीचा प्रत्यक्ष आढावा घेत जिल्हाधिकाऱ्यांनी क्षेत्रीय अधिकाऱ्यांकडून आवश्यक माहिती जाणून घेतली. जिल्हाधिकाऱ्यांच्या या प्रत्यक्ष क्षेत्रभेटीमुळे पीक कापणी प्रयोगांची अचूकता, गांभीर्य आणि निर्धारित कार्यपद्धतीनुसार अंमलबजावणी करण्यावर भर देण्यात आला.

वरिष्ठ महसूल व कृषी अधिकाऱ्यांची उपस्थिती

या पीक कापणी प्रयोगावेळी बिलोलीचे उपविभागीय अधिकारी अजय शिंदे, जिल्हा अधीक्षक कृषी अधिकारी दत्तकुमार कळसाईत, नायगावच्या तहसीलदार धम्मप्रिया गायकवाड, देगलूरचे उपविभागीय कृषी अधिकारी विठ्ठल गित्ते आणि नायगावचे तालुका कृषी अधिकारी दिपेश देवरे यांच्यासह महसूल, ग्रामविकास व कृषी विभागातील संबंधित अधिकारी व कर्मचारी उपस्थित होते.

अधिकाऱ्यांनी प्रत्यक्ष क्षेत्रावर पीक कापणी प्रयोगाची कार्यपद्धती, पिकाची स्थिती आणि प्रयोगाशी संबंधित विविध बाबींची पाहणी केली.

पीक कापणी प्रयोगातून प्राप्त होणारी आकडेवारी विविध शासकीय योजना व नैसर्गिक आपत्तीच्या काळातील मदतीच्या निर्धारणासाठी महत्त्वाची असल्याने प्रयोग निर्धारित पद्धतीने, अचूक व पारदर्शकपणे पार पाडण्याच्या सूचना जिल्हाधिकारी राहुल कर्डिले यांनी दिल्या आहेत. जिल्ह्यातील सर्व पीक कापणी प्रयोगांमध्ये संबंधित विभागांनी समन्वयाने काम करून वस्तुनिष्ठ नोंदी करण्यावर भर देण्याचे निर्देशही त्यांनी दिले.

यावेळी परिसरातील शेतकरी, ग्रामस्थ तसेच महसूल, ग्रामविकास व कृषी विभागाचे क्षेत्रीय कर्मचारी उपस्थित होते.

***

वृत्त क्रमांक

उपलब्ध चारा सकस करण्यासाठी ‘चारा साक्षरता अभियानास’ प्रारंभ

• चारा टंचाईवर मात करण्यासाठी जिल्हाधिकारी राहुल कर्डिले यांचा पुढाकार

नांदेड (जिमाका), दि. 02 : जिल्ह्यात अल्प पर्जन्यमानामुळे निर्माण झालेल्या दुष्काळी परिस्थितीच्या पार्श्वभूमीवर आगामी काळात संभाव्य चारा टंचाईवर प्रभावीपणे मात करण्यासाठी जिल्हाधिकारी राहुल कर्डिले यांनी उपलब्ध चाऱ्याचे शास्त्रीय पद्धतीने संवर्धन व व्यवस्थापन करण्यावर भर दिला आहे. त्यांच्या संकल्पनेतून जिल्ह्यात ‘चारा साक्षरता अभियान’ व्यापक स्वरूपात राबविण्यात येत असून, या अभियानाची सुरुवात आज बिलोली तालुक्यातील मौजे रामतीर्थ येथे करण्यात आली.

जिल्हाधिकारी राहुल कर्डिले यांच्या उपस्थितीत प्रगतिशील शेतकरी व पशुपालक गुणवंत शिवाजीराव देगलूरे यांच्या प्रक्षेत्रावर ‘निकृष्ट चारा सकस करणे’ या विषयावर प्रत्यक्ष प्रात्यक्षिक घेण्यात आले. संभाव्य चारा टंचाईच्या काळात उपलब्ध चाऱ्याचा अधिकाधिक कार्यक्षम वापर करून पशुधनास आवश्यक पोषणमूल्ययुक्त चारा उपलब्ध करून देण्याच्या दृष्टीने या अभियानातून शेतकरी व पशुपालकांना मार्गदर्शन करण्यात येत आहे.

सोयाबीन व हरभरा कुटारावर युरिया-काकवी प्रक्रिया

रामतीर्थ येथील प्रात्यक्षिकात उपलब्ध सोयाबीन कुटार व हरभरा कुटारावर युरिया व मोलासेस (काकवी) प्रक्रिया करण्याची शास्त्रीय पद्धत प्रत्यक्ष दाखविण्यात आली. या प्रक्रियेमुळे उपलब्ध निकृष्ट चाऱ्याची पौष्टिकता, पाचकता व रुचकरता वाढविण्याच्या पद्धतीची माहिती पशुपालकांना देण्यात आली. 

दुष्काळी परिस्थितीत नवीन चारा उपलब्ध होण्याचे प्रमाण कमी होण्याची शक्यता असल्याने उपलब्ध चाऱ्याचे योग्य संवर्धन करणे, त्याची साठवणूक करणे आणि उपलब्ध चाऱ्याचा शास्त्रीय पद्धतीने वापर करणे आवश्यक आहे. याबाबतही या वेळी शेतकरी व पशुपालकांना मार्गदर्शन करण्यात आले.

चारा टंचाईच्या काळात शास्त्रीय व्यवस्थापनावर भर

चारा टंचाईच्या काळात उपलब्ध चाऱ्याची पौष्टिकता वाढवून त्याचा प्रभावी वापर केल्यास पशुधनासाठी आवश्यक पोषणमूल्ययुक्त चारा उपलब्ध करून देता येतो. त्यामुळे पशुपालकांनी उपलब्ध चाऱ्याचे योग्य व्यवस्थापन व संवर्धन करण्याबरोबरच तज्ज्ञांच्या मार्गदर्शनानुसार चारा प्रक्रिया तंत्रज्ञानाचा वापर करावा, हा संदेश या प्रात्यक्षिकातून देण्यात आला.

जिल्हाधिकारी राहुल कर्डिले व जिल्हा परिषदेचे मुख्य कार्यकारी अधिकारी महेश पाटील यांच्या संकल्पनेतून राबविण्यात येणाऱ्या ‘चारा साक्षरता अभियान’ अंतर्गत जिल्ह्यातील शेतकरी व पशुपालकांना उपलब्ध चाऱ्याचा शास्त्रीय पद्धतीने वापर, चारा संवर्धन, प्रक्रिया व व्यवस्थापनाबाबत मार्गदर्शन करण्यात येणार आहे. संभाव्य चारा टंचाईच्या काळात पशुधनाचे पोषण अबाधित ठेवण्यासाठी या अभियानाच्या माध्यमातून जनजागृती व प्रात्यक्षिकांवर भर देण्यात येत आहे.

या कार्यक्रमास जिल्हा परिषदेचे मुख्य कार्यकारी अधिकारी महेश पाटील, जिल्हा अधीक्षक कृषी अधिकारी दत्तकुमार कळसाईत, पशुसंवर्धन व दुग्धव्यवसाय विभागाचे जिल्हा उपायुक्त डॉ.सखाराम खुणे, सहायक आयुक्त डॉ.प्रविणकुमार घुले यांच्यासह पशुसंवर्धन विभागाचे अधिकारी व कर्मचारी तसेच परिसरातील शेतकरी व पशुपालक मोठ्या संख्येने उपस्थित होते.

****

वृत्त क्रमांक

महात्मा गांधी, लाल बहादूर शास्त्री यांना जयंतीनिमित्त जिल्हाधिकारी कार्यालयात अभिवादन

नांदेड (जिमाका), दि. 02 :  जिल्हाधिकारी कार्यालयात राष्ट्रपिता महात्मा गांधी व माजी पंतप्रधान लाल बहादूर शास्त्री यांची जयंती साजरी करण्यात आली. यावेळी महात्मा गांधी व माजी पंतप्रधान लाल बहादूर शास्त्री यांच्या प्रतिमांना पुष्पहार अर्पण करून अभिवादन करण्यात आले. 

यावेळी निवासी उपजिल्हाधिकारी संतोषी देवकुळे,तहसीलदार शंकर लाड, रावसाहेब पोहरे, गजानंद ऐनवाड, गणेश नरहिरे, भास्कर गुंगे, बालासाहेब भराडे, गजानन पोतदार, आशिष सातारे,डॉ स्वाती अलोने, मिरा इंदुरकर,मनिषा पानपट्टे, ज्योती कदम, अनिता काळे, सखू शहाणे, रेखा राठोड , माधुरी ठाकुर यांच्या सह अधिकारी कर्मचारी बहुसंख्येने उपस्थित होते. 

***

वृत्त क्रमांक

'माहिती अधिकार दिन' उत्साहात साजरा 

नांदेड दि. 2 ऑक्टोबर :- माहितीचा अधिकार अधिनियम २००५ या कायद्याच्या व्यापक प्रसिध्दीसाठी व प्रभावी अंमलबजावणीकरीता २८ सप्टेंबर हा दिवस राज्यस्तरावर दरवर्षी 'माहिती अधिकार दिन' म्हणून साजरा करण्यात येतो. त्यानुसार नुकताच सोमवार २८ सप्टेंबर २०२६ रोजी डॉ. शंकरराव चव्हाण शासकीय वैद्यकीय महाविद्यालय व रुग्णालय, विष्णूपुरी नांदेड या कार्यालयात 'माहिती अधिकार दिन' चे आयोजन करण्यात आले होते. सदर कार्यक्रम उत्साहात साजरा करण्यात आला.

या कार्यक्रमाच्या अध्यक्षस्थानी कार्यालयाचे अधिष्ठाता डॉ. सुधीर देशमुख हे होते. कार्यक्रमाची सुरुवात व्यासपीठावर उपस्थित मान्यवरांच्या स्वागताने करण्यात आली. अधिष्ठाता डॉ. सुधीर देशमुख यांचे स्वागत डॉ. मुकूंद कुलकर्णी, प्रथम अपिलीय अधिकारी, माहिती अधिकार तथा सहयोगी प्राध्यापक, शरीरक्रियाशास्त्र विभाग यांनी केले. डॉ. हेमंत गोडबोले, उपअधिष्ठाता तथा विशेष कार्य अधिकारी यांचे स्वागत संजय वाकडे, जन माहिती अधिकारी तथा प्रशासकीय अधिकारी महाविद्यालय विभाग यांनी केले, उपअधिष्ठाता तथा प्राध्यापक व विभागप्रमुख डॉ. शितल राठोड, औषधवैद्यकशास्त्र विभाग यांचे स्वागत भिमराव परोडवाड, सहायक जन माहिती अधिकारी तथा कार्यालयीन अधीक्षक रुग्णालय विभाग यांनी केले, डॉ. अजय वराडे उपवैद्यकीय अधीक्षक तथा सहयोगी प्राध्यापक, जीवरसायनशास्त्र विभाग यांचे स्वागत श्री. मारोती बुरफुले, सहायक जन माहिती अधिकारी तथा कार्यालयीन अधीक्षक, महाविद्यालय विभाग यांनी केले. डॉ. मुकुंद कुलकर्णी, प्रथम अपिलीय अधिकारी, माहिती अधिकार तथा सहयोगी प्राध्यापक, शरीरक्रियाशास्त्र विभाग व डॉ. अनिल देगांवकर, प्राध्यापक व विभागप्रमुख, शल्यचिकीत्साशास्त्र विभाग यांचे स्वागत किशोर भांगे, लघुलेखक, माहिती अधिकार कार्यासन यांनी केले तर संजय वाकडे, जन माहिती अधिकारी तथा प्रशासकीय अधिकारी यांचे स्वागत प्रशांत पाठक, वरीष्ठ सहायक यांनी केले.

सदर कार्यक्रमास डॉ. कांतीलाल चंडालिया, डॉ. वैशाली इनामदार, डॉ. किशोर राठोड, डॉ. मोहम्मद समीर, डॉ. वंदना दुधमल, डॉ. कपिल मोरे, डॉ. पंकज कदम, डॉ. उध्दव माने, डॉ. शिवानंद देवसरकर, सतिश इंगळे, बालाजी बोधगिरे, मारोती बुरफुले, भिमराव परोडवाड, प्रशांत पाठक आदी उपस्थित होते.

या कार्यक्रमाचे मुख्य वक्ते डॉ. मुकुंद कुलकर्णी, प्रथम अपिलीय अधिकारी, माहिती अधिकार तथा सहयोगी प्राध्यापक, शरीरक्रियाशास्त्र विभाग यांनी “ माहितीचा अधिकार अधिनियम २००५” या विषयावर अभ्यासपूर्ण व्याख्यान दिले. त्यांनी या कायद्यातील विविध कलमे, प्रकरणे इ. विस्तृतपणे विशद करुन अगदी सोप्या भाषेत या कायद्याविषयी माहिती सांगितली. माहितीचा अर्ज कसा करावा, तद्नंतर प्रथम व द्वितीय अपिल कसे व किती कालावधीत कोणाकडे करावे, अर्ज शुल्क, माहितीचे शुल्क कसे व कोणाकडे भरणा करावे, माहिती किती दिवसात द्यावी, माहिती किती प्रकारची असते, त्रयस्थ पक्ष म्हणजे काय इ. बाबींचा त्यांनी उहापोह केला. तसेच त्यांनी नमुद केले की, सदर कायदा हा नागरीकांना प्रशासनाच्या कामकाजाबाबत माहिती मिळवून देणारा महत्त्वपूर्ण कायदेशीर अधिकार प्रदान करतो. प्रशासनात पारदर्शकता, उत्तरदायित्व आणि लोकसहभाग वाढविण्यासाठी माहिती अधिकार कायद्याची प्रभावी अंमलबजावणी आवश्यक असल्याचेही त्यांनी नमुद केले.

सदर कार्यक्रमात मार्गदर्शन करतांना अधिष्ठाता डॉ. सुधीर देशमुख यांनी नमुद केले की कोणत्याही सर्वसामान्य माणसाला शासकीय कामकाजात सहभागी होण्याची संधी उपलब्ध करुन देणारा हा कायदा आहे. या देशाचा कोणताही नागरीक या कायद्याचा आधार घेवून त्याला हवी असलेल्या माहितीची प्रशासनाकडे मागणी करु शकतो व ती प्राप्त करुन घेवून त्याचे पुढील कार्य पूर्ण करुन घेवू शकतो. तसेच ते पुढे बोलतांना म्हणाले की, या कायद्यामुळे नागरीकांचा प्रशासनातील कामकाजात सहभाग वाढलेला आहे, प्रशासन अधिक उत्तरदायी व पारदर्शक होण्यास मदत झाली आहे. या कायद्यामुळे लोकशाहीचा पाया अधिकच बळकट झाला आहे.

या कार्यक्रमाचे सुत्रसंचालन व प्रास्ताविक किशोर भांगे लघुलेखक यांनी केले. आभार प्रदर्शन डॉ. मुकूंद कुलकर्णी यांनी केले. या कार्यक्रमास या कार्यालयातील इतर अधिकारी, कर्मचारी व विद्यार्थी यांची मोठ्या संख्येने उपस्थिती होती. कार्यक्रम यशस्वीतेसाठी नारायण चोले, रवी वडजे, अतुल इंगोले यादींनी परिश्रम घेतले.

00000

 वृत्त  

५-औरंगाबाद विभाग पदवीधर मतदारसंघ निवडणूक

तिसऱ्या दिवशी २० इच्छुकांनी घेतले ४० नामनिर्देशन पत्रे; दोन उमेदवारांचे नामनिर्देशन दाखल

आतापर्यंत ६६ इच्छुकांना ११५ नामनिर्देशन पत्रांचे वितरण

छत्रपती संभाजीनगर, दि. १ : ५-औरंगाबाद विभाग पदवीधर मतदारसंघ निवडणूक-२०२६ साठी नामनिर्देशन पत्र दाखल करण्याच्या आज तिसऱ्या दिवशी २० इच्छुक अर्जदारांना एकूण ४० नामनिर्देशन पत्रांचे वितरण करण्यात आले. तसेच, आज दोन उमेदवारांनी नामनिर्देशन पत्र दाखल केले आहे.

आज नामनिर्देशन पत्र दाखल केलेल्या उमेदवारांमध्ये कृष्णा त्रिंबकराव पवार (महा जनता परिवर्तन पार्टी) आणि बाळासाहेब भुजंगराव उगले (अपक्ष) यांचा समावेश आहे.

नामनिर्देशन प्रक्रिया सुरू झाल्यापासून आजअखेर एकूण ६६ इच्छुक व्यक्तींना ११५ नामनिर्देशन पत्रांचे वितरण करण्यात आले आहे. यापैकी आजअखेर दोन उमेदवारांनी निवडणूक निर्णय अधिकारी, ५-औरंगाबाद विभाग पदवीधर मतदारसंघ यांच्याकडे नामनिर्देशन पत्र दाखल केले आहे.

शनिवार, दि. ३ ऑक्टोबर २०२६ रोजी सकाळी ११ ते दुपारी ३ या कालावधीत विभागीय आयुक्त कार्यालयातील नामनिर्देशन कक्ष नामनिर्देशन पत्रांचे वाटप व स्वीकारण्यासाठी सुरू राहणार आहे.

भारत निवडणूक आयोगाच्या निवडणूक कार्यक्रमानुसार ६ ऑक्टोबर ही उमेदवारी अर्ज दाखल करण्याची अंतिम तारीख आहे. ७ ऑक्टोबर रोजी अर्जांची छाननी करण्यात येणार असून, ९ ऑक्टोबर ही उमेदवारी अर्ज मागे घेण्याची अंतिम तारीख आहे. २३ ऑक्टोबर रोजी सकाळी ८ ते सायंकाळी ४ या वेळेत मतदान होणार असून, २७ ऑक्टोबर रोजी मतमोजणी होणार आहे. संपूर्ण निवडणूक प्रक्रिया ३१ ऑक्टोबरपूर्वी पूर्ण करण्यात येणार आहे.

---

 वृत्त क्रमांक

पिण्याच्या पाण्यासाठी आरक्षित जलसाठ्यातून सिंचनासाठी पाणी उपसा करू नये

नांदेड पाटबंधारे विभागाचे परवानाधारक शेतकऱ्यांना आवाहन

नांदेड (जिमाका), दि. 02: नांदेड पाटबंधारे विभाग (उत्तर), नांदेड अंतर्गत शंकररावजी चव्हाण विष्णुपुरी प्रकल्पातील अन्तेश्वर उच्च पातळी बंधारा, विष्णुपुरी उच्च पातळी बंधारा तसेच रेणापूर सुधा लघु प्रकल्पातील संपूर्ण पाणीसाठा पिण्याच्या पाण्यासाठी राखीव ठेवण्यात आला आहे. या राखीव पाणीसाठ्याचा नियोजनानुसार पिण्यासाठी वापर होण्यासाठी तसेच पाण्याचा अधिकृत अथवा अनधिकृत उपसा रोखण्यासाठी शासन निर्णयानुसार आवश्यक कार्यवाही करण्यात येत आहे.

या अनुषंगाने वरील बंधाऱ्यांच्या जलाशयावरील सर्व परवानाधारक शेतकऱ्यांना सूचित करण्यात आले आहे की, जलाशयातील पाणीसाठा पिण्यासाठी आरक्षित असल्यामुळे मोटारपंप, इंजिन, टँकर अथवा अन्य साधनांद्वारे पाणी उपसा करून सिंचन करू नये. तसेच सन २०२६-२७ च्या रब्बी हंगामात कोणत्याही पिकांची लागवड करू नये.

जलाशयाच्या परिसरात असलेले मोटारपंप, इंजिन, टँकर, स्टार्टर, केबल, सर्व्हिस वायर तसेच इतर साहित्य संबंधितांनी स्वतःहून तातडीने काढून घ्यावे, असे आवाहन करण्यात आले आहे.

जलाशयातून अनधिकृतरीत्या पाणी उपसा होत असल्याचे निदर्शनास आल्यास संबंधितांचा विद्युत पुरवठा खंडित करण्यात येईल. तसेच मोटारपंप, इंजिन, टँकर, स्टार्टर, केबल, सर्व्हिस वायर आदी साहित्य भरारी पथकाद्वारे जप्त करून संबंधितांविरुद्ध नियमानुसार गुन्हा दाखल करण्यात येईल, याची सर्व संबंधितांनी नोंद घ्यावी, असे कार्यकारी अभियंता, नांदेड पाटबंधारे विभाग (उत्तर), नांदेड यांनी कळविले आहे.

***

 वृत्त क्रमांक

चारा साक्षरता अभियानांतर्गत आज रामतीर्थ येथे निकृष्ट चारा सकस करण्याचे प्रात्यक्षिक

• पशुपालकांनी या प्रात्यक्षिकाचा लाभ घेण्याचे आवाहन 

• चारा टंचाईवर मात करण्यासाठी उपलब्ध चारा सकस करा

नांदेड(जिमाका), दि. 01 : जिल्ह्यातील अल्प पर्जन्यमानामुळे निर्माण झालेली दुष्काळसदृश्य परिस्थिती आणि आगामी काळातील संभाव्य चारा टंचाई लक्षात घेता उपलब्ध चाऱ्याचा शास्त्रीय पद्धतीने वापर करण्यासाठी ‘चारा साक्षरता अभियान’ राबविण्यात येणार आहे. जिल्हाधिकारी राहुल कर्डिले आणि जिल्हा परिषदेचे मुख्य कार्यकारी अधिकारी महेश पाटील यांच्या संकल्पनेतून हे अभियान राबविण्यात येत आहे.

या अभियानांतर्गत दि. 2 ऑक्टोबर 2026 रोजी सकाळी मौजे रामतीर्थ, ता. बिलोली येथे गुणवंत शिवाजीराव देगलूरे यांच्या पशुपालन प्रक्षेत्रावर ‘निकृष्ट चारा सकस करणे’ या विषयावर प्रात्यक्षिक आयोजित करण्यात आले आहे.

या प्रात्यक्षिकात सोयाबीन कुटार व हरभरा कुटारावर युरिया आणि मोलासेस (काकवी) प्रक्रिया करण्याची शास्त्रीय पद्धत पशुपालकांना प्रत्यक्ष दाखविण्यात येणार आहे. या प्रक्रियेमुळे उपलब्ध चाऱ्याची पौष्टिकता, पाचकता व रुचकरता वाढविण्याबाबत मार्गदर्शन केले जाणार आहे.

तसेच चाऱ्याचे योग्य संवर्धन, साठवणूक आणि व्यवस्थापन करून टंचाईच्या काळात उपलब्ध चाऱ्याचा पशुधनासाठी प्रभावी वापर करण्याच्या पद्धतींची माहिती देण्यात येणार आहे.

दुष्काळसदृश्य परिस्थितीत पशुधनासाठी उपलब्ध चाऱ्याचा कार्यक्षम वापर करणे आवश्यक असल्याने पशुपालकांनी या प्रात्यक्षिकाचा लाभ घ्यावा, असे आवाहन पशुसंवर्धन विभागामार्फत करण्यात आले आहे.

कार्यक्रमास जिल्हाधिकारी राहुल कर्डिले, जिल्हा परिषदेचे मुख्य कार्यकारी अधिकारी महेश पाटील तसेच पशुसंवर्धन विभागाचे अधिकारी व कर्मचारी उपस्थित राहणार आहेत.

**

वृत्त क्रमांक

दुष्काळ निवारणासाठी महसूल कर्मचाऱ्यांचा मदतीचा हात

ग्राम महसूल अधिकारी व मंडळ अधिकाऱ्यांचे एक दिवसाचे वेतन मुख्यमंत्री सहाय्यता निधीसाठी

नांदेड (जिमाका), दि. 01 : राज्यातील अपुऱ्या पर्जन्यवृष्टीमुळे निर्माण झालेल्या दुष्काळी परिस्थितीच्या निवारणासाठी महाराष्ट्र राज्य तलाठी संघाने सामाजिक बांधिलकी जपत नांदेड जिल्ह्यातील सर्व ग्राम महसूल अधिकारी व मंडळ अधिकारी यांचे सप्टेंबर 2026 मधील एक दिवसाचे वेतन मुख्यमंत्री सहाय्यता निधीस देण्याचा निर्णय घेतला आहे. या सामाजिक बांधिलकीच्या निर्णयाचे जिल्हाधिकारी राहुल कर्डिले यांनी कौतुक करून तलाठी संघाचे अभिनंदन केले आहे.

राज्यातील अनेक भागांत अपुऱ्या पर्जन्यवृष्टीमुळे शेतीचे मोठ्या प्रमाणात नुकसान झाले असून दुष्काळी परिस्थिती निर्माण झाली आहे. या संकटाच्या काळात ग्राम महसूल अधिकारी व मंडळ अधिकारी संवर्ग शासनाच्या निर्देशानुसार दुष्काळ निवारणाच्या विविध उपाययोजनांची प्रभावी अंमलबजावणी करण्यासाठी कार्यरत आहे.

दुष्काळग्रस्त नागरिकांना दिलासा देण्यासाठी शासन व प्रशासनाच्या प्रयत्नांना सामाजिक बांधिलकीची जोड देत महाराष्ट्र राज्य तलाठी संघाने मुख्यमंत्री सहाय्यता निधीस एक दिवसाचे वेतन देण्याचा निर्णय घेतला आहे. या निर्णयातून आपत्तीच्या काळात नागरिकांच्या मदतीसाठी महसूल संवर्गाची सामाजिक बांधिलकी आणि शासनासोबतची कार्याची भूमिका अधोरेखित होत आहे.

महाराष्ट्र राज्य तलाठी संघाच्या दिनांक 28 सप्टेंबर 2026 रोजीच्या निवेदनानुसार, नांदेड जिल्ह्यातील सर्व ग्राम महसूल अधिकारी व मंडळ अधिकारी यांचे सप्टेंबर 2026 च्या वेतनातून एक दिवसाचे वेतन मुख्यमंत्री सहाय्यता निधीत जमा करण्याची कार्यवाही करण्यात येणार आहे.

दुष्काळाच्या पार्श्वभूमीवर प्रशासनासोबत सामाजिक उत्तरदायित्वाची भूमिका घेत केलेल्या या योगदानाबद्दल जिल्हाधिकारी राहुल कर्डिले यांनी महाराष्ट्र राज्य तलाठी संघ तसेच जिल्ह्यातील ग्राम महसूल अधिकारी व मंडळ अधिकाऱ्यांचे अभिनंदन केले आहे.

****

वृत्त क्रमांक

दुष्काळसदृश्य परिस्थितीत पाण्याचे काटेकोर नियोजन करा – जिल्हाधिकारी राहुल कर्डिले

• धरणातील पाणीसाठा, पिण्याचे पाणी आरक्षण व पीक परिस्थितीचा जिल्हाधिकारी राहुल कर्डिले यांनी घेतला आढावा

• पीक कापणी प्रयोग व पंचनामे अचूक करण्याच्या सूचना

नांदेड (जिमाका), दि. 01 : जिल्ह्यात निर्माण झालेली दुष्काळसदृश्य परिस्थिती आणि आगामी काळातील संभाव्य पाणीटंचाई लक्षात घेता उपलब्ध पाणीसाठ्याचे काटेकोर नियोजन करावे. धरणातील पाणीसाठा व पिण्याच्या पाण्यासाठी करण्यात आलेल्या आरक्षणाचा नियमित आढावा घेऊन पाणीटंचाई निवारणासाठी आवश्यक त्या उपाययोजना तत्काळ कराव्यात, अशा सूचना जिल्हाधिकारी राहुल कर्डिले यांनी दिल्या.

जिल्हाधिकारी राहुल कर्डिले यांच्या अध्यक्षतेखाली आज जिल्हास्तरीय दुष्काळ देखरेख समितीची बैठक झाली. यावेळी जिल्ह्यातील सद्यस्थितीतील पर्जन्यमान, पिकांची परिस्थिती, धरणांमधील उपलब्ध पाणीसाठा, पिण्याच्या पाण्याचे आरक्षण, संभाव्य पाणीटंचाई तसेच दुष्काळ निवारणासाठी करण्यात येत असलेल्या उपाययोजनांचा सविस्तर आढावा घेण्यात आला.

या बैठकीस जिल्हा परिषदेचे मुख्य कार्यकारी अधिकारी महेश पाटील, नांदेड पाटबंधारे मंडळाचे अधीक्षक अभियंता इ. म. चिश्ती, नांदेड पाटबंधारे विभागाचे कार्यकारी अभियंता प्रवीण थोरात, सी. आर. बनसोड, वरिष्ठ भूवैज्ञानिक एस. पी. राठोड, लेंडी प्रकल्प विभागाचे कार्यकारी अभियंता प्रणव मुदगल, जिल्हा अधीक्षक कृषी अधिकारी दत्तकुमार कळसाईत, जिल्हा परिषदेचे कृषी विकास अधिकारी, कृषी विज्ञान केंद्राचे प्रतिनिधी व शास्त्रज्ञ, जिल्हा नियोजन अधिकारी, कापूस संशोधन केंद्राचे सहयोगी प्राध्यापक यांच्यासह संबंधित विभागांचे अधिकारी उपस्थित होते.

जिल्ह्यातील धरणांमधील पाणीसाठ्याचा आढावा घेताना अनधिकृत पाणी कनेक्शनवर प्रभावी नियंत्रण ठेवण्याच्या सूचना जिल्हाधिकाऱ्यांनी संबंधित अधिकाऱ्यांना दिल्या. उपलब्ध पाण्याचे योग्य नियोजन करणे आवश्यक असून धरणातील पाण्याच्या भरवशावर शेतकऱ्यांकडून पेरणी केली जाणार नाही, याची संबंधित यंत्रणांनी दक्षता घ्यावी. पाण्याची उपलब्धता आणि पिकांच्या गरजा लक्षात घेऊन शेतकऱ्यांना वस्तुनिष्ठ माहिती व आवश्यक मार्गदर्शन उपलब्ध करून द्यावे, असेही त्यांनी सांगितले.

दुष्काळसदृश्य परिस्थितीच्या अनुषंगाने पीक कापणी प्रयोग आणि नुकसानीचे पंचनामे अत्यंत अचूक व वस्तुनिष्ठ पद्धतीने करावेत. संबंधित अधिकारी व कर्मचाऱ्यांनी प्रत्यक्ष क्षेत्राची पाहणी करून वस्तुस्थितीच्या आधारे नोंदी कराव्यात. या कामात कोणत्याही प्रकारची त्रुटी राहणार नाही, याची दक्षता घ्यावी, असे निर्देश जिल्हाधिकारी राहुल कर्डिले यांनी दिले.

दुष्काळसदृश्य परिस्थितीमुळे नागरिकांना निर्माण होणाऱ्या अडचणी लक्षात घेऊन सर्व विभागांनी संवेदनशीलतेने आणि जबाबदारीने काम करावे. टंचाई आराखड्यात आवश्यक उपाययोजनांचा समावेश करून त्यांची प्रभावी अंमलबजावणी करावी. पिण्याच्या पाण्याच्या उपलब्धतेला सर्वोच्च प्राधान्य देऊन भविष्यातील गरजांचा विचार करून नियोजन करावे, असेही त्यांनी स्पष्ट केले.

या बैठकीत धरणांच्या किरकोळ दुरुस्तीची कामे, जलतारा तसेच पाणी उपलब्धता वाढविण्यासाठी करण्यात येणाऱ्या विविध उपाययोजनांचा आढावा घेण्यात आला. पाणीटंचाई निर्माण होण्यापूर्वीच आवश्यक प्रतिबंधात्मक उपाययोजना पूर्ण करण्याच्या सूचना संबंधित यंत्रणांना देण्यात आल्या.

अधिकारी व कर्मचाऱ्यांनी मुख्यालयी उपस्थित राहून नागरिकांना आवश्यक शासकीय सेवा वेळेत उपलब्ध करून द्याव्यात. स्थानिक पातळीवर निर्माण होणाऱ्या समस्यांवर तातडीने कार्यवाही करून वरिष्ठ कार्यालयास त्याची माहिती द्यावी, असेही जिल्हाधिकारी श्री. कर्डिले यांनी निर्देशित केले.

**

वृत्त क्रमांक

नोटीस प्राप्त मतदारांना प्रत्यक्ष सुनावणीस उपस्थित राहण्याची आवश्यकता नाही

• बीएलओ घरी भेट देऊन कागदपत्रे स्वीकारणार

• 3, 4, 10 व 11 ऑक्टोबरला विशेष शिबिरातही कागदपत्रे सादर करण्याची सुविधा

नांदेड (जिमाका), दि. 01 : भारत निवडणूक आयोगाच्या दि. 26 सप्टेंबर 2026 रोजीच्या प्रसिद्धीपत्रकानुसार तसेच दि. 29 सप्टेंबर 2026 रोजीच्या पत्रातील सुधारित निर्देशांनुसार, जुळवणी न झालेल्या (No Mapping) किंवा जुळवणीमध्ये तार्किक विसंगती (Logical Discrepancy) असलेल्या मतदारांना बजावण्यात आलेल्या नोटिसांबाबत सुधारित कार्यपद्धती निश्चित करण्यात आली आहे. त्यानुसार अशा मतदारांना प्रत्यक्ष सुनावणीस उपस्थित राहण्याची आवश्यकता नसल्याचे जिल्हा प्रशासनाने स्पष्ट केले आहे.

नोटीस प्राप्त मतदारांच्या घरी मतदान केंद्रस्तरीय अधिकारी (बीएलओ) प्रत्यक्ष भेट देऊन आवश्यक कागदपत्रे व पुरावे स्वीकारतील. त्याआधारे मतदार नोंदणी अधिकारी अथवा सहायक मतदार नोंदणी अधिकारी निर्णय घेतील. तसेच नोटीस प्राप्त मतदारांना आवश्यक कागदपत्रे अथवा पुरावे व्हॉट्सॲपद्वारे संबंधित बीएलओ कडे सादर करता येतील.

तार्किक विसंगतीसाठी संबंधित कागदपत्रे पुरेशी

तार्किक विसंगती असलेल्या मतदारांच्या प्रकरणात केवळ संबंधित विसंगतीशी निगडित कागदपत्रे स्वीकारून किंवा बीएलओ यांच्या पडताळणी अहवाल अथवा पंचनाम्याच्या आधारे निर्णय घेण्यात येईल.

केवळ अपवादात्मक परिस्थितीत, म्हणजे विहित कागदपत्रे उपलब्ध नसल्यास किंवा उपलब्ध कागदपत्रांच्या आधारे निर्णय घेणे शक्य नसल्यास संबंधित मतदार नोंदणी अधिकारी अथवा सहायक मतदार नोंदणी अधिकारी शक्यतो ऑनलाइन पद्धतीने सुनावणी घेतील. या सुनावणीस संबंधित मतदार किंवा त्यांच्या कुटुंबातील कोणतीही प्रौढ व्यक्ती उपस्थित राहू शकते.

विशेष शिबिरांमध्येही कागदपत्रे सादर करता येणार

मतदार नोंदणीसाठी 3, 4, 10 व 11 ऑक्टोबर 2026 रोजी मतदान केंद्रनिहाय विशेष शिबिरे आयोजित करण्यात आली आहेत. या शिबिरांमध्येही नोटीस प्राप्त मतदारांना आवश्यक कागदपत्रे सादर करता येतील.

बेघर मतदार, कामगार, गरीब व्यक्ती, आदिवासी समाजातील विशेषतः पीव्हीटीजी गटातील व्यक्ती, अनाथ गटातील मतदार आदी असुरक्षित गटातील मतदारांसाठी विशेष शिबिरे व मदत कक्ष आयोजित करण्याचे निर्देश देण्यात आले आहेत.

पात्र मतदार मतदारयादीतून वंचित राहू नये यासाठी विशेष दक्षता

भारत निवडणूक आयोगाच्या निर्देशानुसार कोणताही पात्र मतदार मतदार यादीत समावेशनापासून वंचित राहू नये, यासाठी सर्व मतदार नोंदणी अधिकाऱ्यांना विशेष दक्षता घेण्याच्या सूचना देण्यात आल्या आहेत. पर्याप्त पुरावे उपलब्ध नसलेल्या किंवा प्राप्त कागदपत्रांच्या आधारे निर्णय घेणे शक्य नसलेल्या प्रकरणात पुढील कार्यवाहीपूर्वी संबंधित मतदाराला आवश्यक कागदपत्रे सादर करण्याची संधी देण्यात येईल. त्यानंतर आवश्यकतेनुसार सुनावणी घेऊन आदेश पारित करण्यात येतील.

मतदारांशी संपर्क साधणे व कागदपत्रे जमा करून घेण्यासाठी मतदान केंद्रस्तरीय अधिकारी (बीएलओ) राजकीय पक्षांच्या मतदान केंद्रस्तरीय प्रतिनिधींशी समन्वय ठेवतील.

नोटीस प्राप्त सर्व संबंधित मतदारांनी कागदपत्रे स्वीकारण्यासाठी येणाऱ्या मतदान केंद्रस्तरीय अधिकाऱ्यास सहकार्य करावे, असे आवाहन जिल्हा प्रशासनाच्या वतीने करण्यात आले आहे.

***

वृत्त क्रमांक

सेवा संकल्प अभियानात 31 अंगणवाड्यांचे शाळांशी जोडणी

नांदेड (जिमाका), दि. 01 : नवीन राष्ट्रीय शैक्षणिक धोरण 2020 च्या मार्गदर्शक सूचनांनुसार अंगणवाडी केंद्रांना नजीकच्या शाळांशी जोडण्याच्या उपक्रमांतर्गत नांदेड शहरातील 31 अंगणवाड्यांचे जिल्हा परिषद व खासगी शाळांशी स्थलांतर व जोडणीची प्रक्रिया पूर्ण झाली आहे. सेवा संकल्प अभियानांतर्गत ही कार्यवाही करण्यात आली आहे.

जिल्हाधिकारी राहुल कर्डिले यांच्या अध्यक्षतेखाली 10 सप्टेंबर 2026 रोजी जिल्हाधिकारी कार्यालयातील नियोजन भवन येथे अंगणवाडी केंद्रांच्या स्थलांतराबाबत बैठक घेण्यात आली होती. या बैठकीस नांदेड महानगरपालिका अंतर्गत येणाऱ्या शाळांचे मुख्याध्यापक तसेच जिल्हा परिषद शिक्षण विभागांतर्गत प्राथमिक व माध्यमिक शाळांचे मुख्याध्यापक उपस्थित होते.

जिल्हाधिकारी राहुल कर्डिले यांनी उपस्थित मुख्याध्यापकांशी संवाद साधून शाळांमधील उपलब्ध व रिकाम्या वर्गखोल्या अंगणवाडी केंद्रांसाठी उपलब्ध करून देण्याचे आवाहन केले होते. त्यानुसार 17 सप्टेंबर ते 17 ऑक्टोबर 2026 या कालावधीत राबविण्यात येत असलेल्या सेवा संकल्प अभियानात नांदेड शहरातील 31 अंगणवाडी केंद्रांना शाळांशी जोडण्याची प्रक्रिया पूर्ण करण्यात आली आहे.

अंगणवाडी व शाळा यांच्यातील समन्वय वाढवून बालकांना पूर्वप्राथमिक व प्राथमिक शिक्षणाचा सलग अनुभव मिळावा, तसेच उपलब्ध शैक्षणिक पायाभूत सुविधांचा प्रभावी वापर व्हावा, या उद्देशाने ही कार्यवाही करण्यात आली आहे, अशी माहिती बाल विकास प्रकल्प अधिकारी कार्यालय, नांदेड शहर यांच्या वतीने देण्यात आली आहे. 

00000

वृत्त क्रमांक

ज्येष्ठ नागरिकांच्या सन्मान, हक्क व आरोग्यासाठी नांदेड येथे विशेष कार्यशाळा 

• जागतिक ज्येष्ठ नागरिक दिनानिमित्त नांदेड येथे ज्येष्ठ नागरिक कार्यशाळा संपन्न

• आरोग्य तपासणीसह विविध विषयांवर मार्गदर्शन

नांदेड (जिमाका), दि. 01 : जागतिक ज्येष्ठ नागरिक दिनाचे औचित्य साधून सामाजिक न्याय व विशेष सहाय्य विभागांतर्गत सहाय्यक आयुक्त, समाजकल्याण, नांदेड आणि महाराष्ट्र ज्येष्ठ नागरिक महासंघ (फेस्कॉम), मराठवाडा प्रादेशिक विभाग (उत्तर), नांदेड यांच्या संयुक्त विद्यमाने ज्येष्ठ नागरिक कार्यशाळेचे येथील जिल्हाधिकारी कार्यालय परिसरात असलेलया नियोजन भवन येथे आयोजन करण्यात आले होते. 

या कार्यक्रमाचे उद्घाटन उपजिल्हाधिकारी संजीव मोरे यांच्या हस्ते दीपप्रज्वलन व महापुरुषांच्या प्रतिमांचे पूजन करून झाले. कार्यक्रमाच्या अध्यक्षस्थानी जिल्हा विधी सेवा प्राधिकरणचे सचिव शरद देशपांडे होते. कार्यक्रमाच्या सुरुवातीस भारतीय संविधानाच्या उद्देशिकेचे सामूहिक वाचन करण्यात आले. तसेच ज्येष्ठ नागरिकांचा सन्मान व आदर करण्याबाबत उपस्थितांनी सामूहिक शपथ घेतली.

समाज कल्याणचे सहाय्यक आयुक्त शिवानंद मिनगीरे यांनी प्रास्ताविकात ‘मातृ देवो भव, पितृ देवो भव’ ही भारतीय संस्कृतीची शिकवण असून ज्येष्ठ नागरिकांचा सन्मान करणे हे आपले कर्तव्य असल्याचे सांगितले. त्यांनी ज्येष्ठ नागरिकांसाठी शासनाच्या विविध पेन्शन योजनांची माहिती दिली. तसेच मुख्यमंत्री वयोश्री योजना आणि मुख्यमंत्री तीर्थ दर्शन योजनेबाबत शासनाच्या निर्देशानुसार कार्यवाही करण्यात येणार असल्याचे सांगितले. विविध शासकीय विभाग व बँकांमध्ये ज्येष्ठ नागरिकांच्या कामांना प्राधान्य देण्याची आवश्यकता त्यांनी व्यक्त केली.

नांदेड वाघाळा शहर महानगरपालिकेचे अतिरिक्त आयुक्त निलेश सुकेवार यांनी महानगरपालिकेच्या माध्यमातून ज्येष्ठ नागरिकांसाठी उपलब्ध असलेल्या सुविधांची माहिती दिली. शहरात चार विरंगुळा केंद्रे, विविध ठिकाणी वाचन कट्टे तसेच महानगरपालिकेच्या दवाखान्यांमध्ये ज्येष्ठ नागरिकांसाठी उपलब्ध असलेल्या आरोग्य सुविधांची माहिती त्यांनी दिली.

जिल्हा अग्रणी बँकेचे मुख्य व्यवस्थापक बी. जी. सोनकांबळे यांनी ज्येष्ठ नागरिकांना बँकिंग व्यवहारात अडचणी येऊ नयेत यासाठी बँकांना आवश्यक सूचना देण्यात आल्याचे सांगितले. ज्येष्ठ नागरिकांसाठी स्वतंत्र सुविधा उपलब्ध करून देणे तसेच निवृत्तीवेतनधारकांना हयातीचे प्रमाणपत्र देण्यासाठी आवश्यक सुविधा उपलब्ध करून देण्याबाबत माहिती दिली. डिजिटल फसवणुकीपासून सावध राहण्याचे आवाहन करत कोणत्याही व्यक्तीस ओटीपी देऊ नये, असे त्यांनी स्पष्ट केले.

फिजिओथेरपी तज्ज्ञ डॉ. सुमेधकुमार वाघमारे यांनी ज्येष्ठ नागरिकांना आरोग्यविषयक मार्गदर्शन करत सुलभ व्यायामाचे प्रात्यक्षिक करून दाखविले. समुपदेशक ज्योती पिंपळे यांनी अवयवदान, नेत्रदान व देहदानाबाबत माहिती दिली. यावेळी जिल्हा शल्यचिकित्सक कार्यालयाच्या वतीने आरोग्य तपासणी शिबिर घेण्यात आले. उपस्थित ज्येष्ठ नागरिकांची रक्तदाब व रक्तातील साखरेची तपासणी करण्यात आली.

महाराष्ट्र ज्येष्ठ नागरिक महासंघाचे उपाध्यक्ष अशोक तेरकर यांनी ज्येष्ठ नागरिकांच्या विविध प्रश्नांवर मनोगत व्यक्त केले. ज्येष्ठ नागरिकांना सन्मानपूर्वक व सुरक्षित जीवन जगता यावे, यासाठी विविध उपक्रम व योजनांमध्ये त्यांचा सहभाग वाढविण्याची आवश्यकता त्यांनी व्यक्त केली. 

अध्यक्षीय समारोपात जिल्हा विधी सेवा प्राधिकरणाचे सचिव शरद देशपांडे यांनी नव्या पिढीने ज्ञान, विज्ञान आणि संस्कारांची जोपासना करण्याबरोबरच घरातील ज्येष्ठांचा सन्मान केला पाहिजे, असे सांगितले. ज्येष्ठ नागरिकांच्या हक्कांचे संरक्षण आणि त्यांना न्याय मिळवून देण्यासाठी कायदेशीर तरतुदींची माहिती असणे आवश्यक असल्याचे त्यांनी नमूद केले.

या कार्यक्रमास यशवंतराव चव्हाण प्रतिष्ठान, मुंबईच्या भगीरथी बच्चेवार, नाम फाऊंडेशनचे भाऊराव मोरे, ज्येष्ठ विधिज्ञ एम. झेड. सिद्दीकी, जिल्हा वैद्यकीय अधिकारी डॉ. खान, ज्येष्ठ नागरिक महिला आघाडीच्या अध्यक्ष निर्मला भोसकर (कोरे), समाजकल्याण अधिकारी गजानन नरवाडे यांच्यासह विविध विभागांचे अधिकारी, पदाधिकारी व ज्येष्ठ नागरिक उपस्थित होते.

कार्यक्रमाचे सूत्रसंचालन गजानन पांपटवार यांनी केले. आभार प्रदर्शन समाजकल्याण अधिकारी गजानन नरवाडे यांनी केले. सहाय्यक आयुक्त, समाजकल्याण शिवानंद मिनगीरे यांच्या मार्गदर्शनाखाली कार्यशाळेचे आयोजन करण्यात आले. राष्ट्रगीताने कार्यक्रमाची सांगता झाली. या कार्यशाळेस जिल्ह्यातील सुमारे 400 ते 500 ज्येष्ठ नागरिकांनी सहभाग नोंदविला.

**