वृत्त क्र. 981

 

नांदेड जिल्ह्यात विधानसभेसाठी आतापर्यंत 46 इच्छुकांचे 55 अर्ज दाखल

 

लोकसभा पोटनिवडणुकीसाठी 7 अर्ज दाखल

 

·         शुक्रवारी एकाच दिवशी 27 इच्छुकांचे अर्ज दाखल

·         आता सोमवार व मंगळवारी अर्ज दाखल करता येणार

 

नांदेड दि. 25 ऑक्टोबर :- नांदेड लोकसभा पोटनिवडणुकीसाठी आतापर्यंत 7 इच्छुकांनी अर्ज दाखल केले असून 9 विधानसभा क्षेत्रासाठी आतापर्यंत चार दिवसात 44 इच्छुकांचे एकूण 55 अर्ज दाखल झाले आहेत. 

 

नांदेड लोकसभा पोटनिवडणूक व विधानसभा निवडणुकीसाठी उमेदवारी अर्ज दाखल करण्याच्या चौथ्या दिवशी 18 इच्छुकांनी 32 नामनिर्देशनपत्र प्राप्त केली. आतापर्यंत 74 इच्छुकांनी 131 नामनिर्देशनपत्राची उचल केली आहे. आतापर्यंत एकूण 7 इच्छुकांनी अर्ज दाखल केले आहेत.

 

16-नांदेड लोकसभा पोटनिवडणूक

नांदेड लोकसभा पोटनिवडणुकीसाठी आजपर्यंत अपक्ष जफरअली खॉ महेमूद अली खॉ, ज्ञानेश्वर बाबुराव कोंडामंगले, इंडियन नॅशनल कॉग्रेसचे रविंद्र वसंतराव चव्हाण, राष्ट्रीय किसान कॉग्रेस पार्टीचे विष्णू मारोती जाधव, अपक्ष रुक्मीणबाई शंकरराव गिते, आम आदमी पार्टीचे जगजीवन तुकाराम भेदे, अपक्ष अब्दुल सलाम सल्फी यांनी अर्ज दाखल केले आहेत. 

 

83-किनवट 

किनवट विधानसभा सार्वत्रिक निवडणुकीसाठी आज 4 इच्छुकांनी 5 अर्ज दाखल केले. आतापर्यंत 8 इच्छुकांनी 9 अर्ज दाखल केले. अर्ज दाखल करणाऱ्यांमध्ये सीपीआय एमचे अर्जुन किशन आडे, भारतीय जनता पार्टीचे भिमराव रामजी केराम, नॅशनलिस्ट कॉग्रेस पार्टी शरदचंद्र पवारचे प्रदिप हेमसींग जाधव, बेबीताई प्रदिप जाधव, राष्ट्रीय समाज पक्षाचे गोविंद सांबन्ना जेठेवार, भाजपाचे सचिन माधवराव जाधव,अपक्ष संदिप बाबुराव कऱ्हाळे,सपना सचिन जाधव यांचा समावेश आहे. 

 

84-हदगाव

हदगाव विधानसभा सार्वत्रिक निवडणुकीसाठी आज 3 इच्छुकांनी 3 अर्ज दाखल केले. तर आतापर्यंत 4 इच्छुकांनी 5 अर्ज दाखल केले. अर्ज दाखल करणाऱ्यांमध्ये इंडियन नॅशनल कॉग्रेसचे माधवराव निवृत्तीराव पवार, अपक्ष सुनिता माधव देवसरकर, रमाकांत दत्तात्रय शिंदे, देविदास नागनाथ स्वामी, बालाजी परसराम वाघमारे, नॅशनॅलीस्‍ट कॉग्रेस पार्टीचे व्यंकटेश मारोतराव पाटील, अपक्ष माधव दादाराव देवसकर, उमेश सिद्राम धोटे यांचा समावेश आहे.  

 

85- भोकर

भोकर विधानसभेसाठी आज 3 इच्छुकांनी 3 अर्ज दाखल केले.  आतापर्यंत 4 इच्छुकांनी 5 अर्ज दाखल केले. अर्ज दाखल करणाऱ्यांमध्ये अपक्ष मो ईलयास अब्दुल वहीद महोम्मद, अशोक माधवराव क्षीरसागर, विजयमाला ज्ञानेश्वर कपाटे, राष्ट्रीय समाज पक्षाचे साहेबराव बाबा गोरठकर यांचा समावेश आहे.

 

86- नांदेड उत्तर

नांदेड उत्तरसाठी आज 3 इच्छुकांनी 3 अर्ज दाखल केले. आतापर्यंत 3 इच्छुकांनी 4 अर्ज दाखल केले आहेत. अर्ज दाखल करणाऱ्यांमध्ये रिपब्लीकन सेनाचे अकबर अख्तर खान, महाराष्ट्र नवनिर्माण सेनाचे सदाशिव व्यंकटराव आरसुळे, अपक्ष निसार शेख मकदुम यांचा समावेश आहे.

 

87 नांदेड दक्षिण

नांदेड दक्षिणसाठी आज 3 इच्छुकांनी 3 अर्ज दाखल केले. आतापर्यंत 6 इच्छुकांनी 6 अर्ज दाखल केले आहेत. अर्ज दाखल करणाऱ्यांमध्ये अपक्ष भास्कर बालाजी हंबर्डे, संजय शिवाजी घोघरे, भारतीय युवा जन एकता पार्टीचे नय्यर जहां मोहम्मद फेरोज हुसैन, अपक्ष लतीफखान पीरखान पठाण, मिलिंद दिनाजी शिराढोणकर, वंचित बहुजन आघाडीचे फारुख अहमद इकबाल अहमद यांचा समावेश आहे.

 

88-लोहा

लोहा विधानसभेसाठी आज एका इच्छुकानी दोन अर्ज सादर केले. आतापर्यंत 3 इच्छुकांनी 5 अर्ज सादर केले आहेत. अर्ज दाखल करणाऱ्यांमध्ये सेवा जनशक्ती पार्टीचे प्रा. मनोहर बाबाराव धोंडे, भारतीय जनता पार्टीचे चिखलीकर प्रतापराव गोविंदराव, शिवसेना (उबाठा)चे एकनाथ रावसाहेब पवार यांचा समावेश आहे. 

 

89-नायगाव

नायगावमध्ये आज 3 इच्छुकांनी 3 अर्ज दाखल केले. आतापर्यंत 4 इच्छुकांनी 4 अर्ज दाखल केले आहेत. अर्ज दाखल करणाऱ्यांमध्ये भारतीय जनता पार्टी राजेश संभाजीराव पवार, गजानन तानाजी श्रीरामवार, अपक्ष पुनम राजेश पवार, गजानन शंकरराव चव्हाण यांचा समावेश आहे.

 

90-देगलूर

देगलूर विधानसभेसाठी आज 4 इच्छुकांनी 5 अर्ज दाखल केले. आतापर्यंत 7 इच्छुकांनी 8 अर्ज दाखल केले आहेत. अर्ज दाखल करणाऱ्यांमध्ये प्रहार जनशक्ती पक्षाचे सुभाष पिराजीराव साबणे, भारतीय जनता पार्टीचे जितेश रावसाहेब अंतापूरकर, अपक्ष यादव धोंडीबा सोनकांबळे, चांदू हाणमंतराव सोनकांबळे दरेगावकर, भारतीय जनता पार्टीचे जया बाळू राजकुंडल, राष्ट्रीवादी कॉग्रेस पार्टी (श.प.गट)चे सुजित रामचंद्र कांबळे, अपक्ष विश्वंभर जळबा वरवंटकर यांचा समावेश आहे.

 

91-मुखेड

मुखेडसाठी आज एकही अर्ज दाखल झाला नाही. आतापर्यंत 3 इच्छुकांनी 5 अर्ज दाखल केले आहेत. अर्ज दाखल करणाऱ्यांमध्ये इंडियन नॅशनल कॉग्रेसचे पाटील हनमंतराव व्यंकटराव, भारतीय जनता पार्टीचे तुषार गोविंदराव राठोड, शिवसेना उबाठाचे दशरथ मंगाजी लोहबंदे यांचा समावेश आहे.

00000

वृत्त क्र. 980

आज नागार्जुना पब्लिक स्कुल येथे दक्षिण मतदार संघाच्यावतीने प्रथम प्रशिक्षण

प्रशिक्षणात ८८४ जणांचा सहभाग

प्रशिक्षणाची तयारी पूर्ण

नांदेड, दिनाक २५ ऑक्टोबर: नांदेडविधानसभा सार्वत्रिक निवडणूक तथा लोकसभा पोट निवडणूक 2024 च्या नांदेड दक्षिण 087 प्रथम प्रशिक्षण उद्या 26 ऑक्टोबर २०२४ रोजी नागार्जुना पब्लिक स्कूल,कौठा,नांदेड येथे होणार आहे.

या प्रशिक्षणाची तयारी पूर्ण झाली आहे. सदरील प्रशिक्षण तयारीचे अवलोकन करण्यासाठी डॉ सचिन खल्लाळ, निवडणूक निर्णय अधिकारी,087 नांदेड दक्षिण तथा उपविभागीय अधिकारी, नांदेड , प्रविण पांडे,तहसीलदार, नांदेड, नितेशकुमार बोलेलू, नायब तहसीलदार निवडणूक विभाग,नायब तहसीलदार स्वप्निल दिगलवाड व रविंद्र राठोड यांनी प्रत्यक्ष येवून पाहणी केली. सदरील प्रथम प्रशिक्षणास मतदान केंद्राध्यक्ष व प्रथम मतदान अधिकारी असे दोन्ही एकूण 884 जणांचे प्रशिक्षण होणार आहे. सदरील तयारी पूर्ण करण्यासाठी प्रशिक्षण टिमचे पेशकार राजकुमार कोटुरवार, रुस्तुम आडे, संजय भालके, राजेश कुलकर्णी,बालासाहेब कच्छवे यांनी विशेष परिश्रम घेतले.

०००००

  वृत्त क्र. 979

सोमवार-मंगळवार ; फक्त 2 दिवस

उमेदवारी अर्ज दाखल करण्यासाठी

शनिवारी अर्जासाठी सार्वजनिक सुटी

 

नांदेड दि. 25 ऑक्टोबर :- लोकसभा पोटनिवडणूक व विधानसभा निवडणुकीसाठी अर्ज दाखल करण्यासाठी आता फक्त दोन दिवस बाकी आहेत. उद्या शनिवार व परवा रविवारी शासकीय सुट्यांचे दिवस आहेत. त्यामुळे उद्या शनिवारी अर्ज दाखल केले जाणार नाहीत. त्यामुळे सोमवार दिनांक 28 ऑक्टोबर व मंगळवार 29 ऑक्टोबर या दोन दिवसातच उमेदवार अर्ज दाखल करू शकणार आहेत.

भारत निवडणूक आयोगाने यासंदर्भात यापूर्वीच विशेष आदेश काढून निवडणूक निर्णय अधिकाऱ्यांना 1951 च्या प्रतिनिधित्व कायदा अंतर्गत निवडणूक काळात येणाऱ्या सुट्यांमध्ये दुसरा व चौथ्या शनिवारी अर्ज न स्विकारण्याचे स्पष्ट केले आहे. त्यामुळे उद्या शनिवारी दिनांक 26 ऑक्टोबरला कोणताही अर्ज स्विकारला जाणार नाही. नांदेड जिल्हा प्रशासनाने देखील ही सूचना जारी केली आहे.

त्यामुळे लोकसभा पोटनिवडणूक व जिल्यातील नऊ विधानसभेसाठी शनिवारी अर्ज स्विकारले जाणार नाहीत. उमेदवारांकडे सोमवार व मंगळवार हे दोन दिवस असून त्या दिवशी सकाळी 11 ते दुपारी 3 यावेळेतच अर्ज स्विकारले जाणार आहेत. सर्व इच्छूक उमेदवारांनी ही बाब लक्षात घेण्याचे आवाहन जिल्हा प्रशासनाने केले आहे.
0000

 वृत्त क्र. 978

मुखेड तालुक्यातील आंबुलगा परिसरात भूकंपाचे सौम्य धक्के

नांदेड दि. 25 : मुखेड तालुक्यातील अंबुलगा (बु.) व परिसरात आज 25 ऑक्टोबर 2024 रोजी दुपारी 14:43 वा व 15:13 वा दोन वेळा भुगर्भातून आवाज येऊन सौम्य हादरे जाणवले असल्याची माहिती जिल्हा आपत्कालीन कार्यकेंद्राने दिली.

अधिकृतरित्या दिलेल्या वृत्तानुसार या भूकंपसदृश्य हादऱ्यांची तीव्रता रिक्टर स्केलवर अनुक्रमे 1.5 व 0.7 अशी नोंदविण्यात आलेली आहे.

भूकंपाचा केंद्रबिंदू मुखेड शहरापासून 12 किमी दूर दक्षिणपूर्व दिशेला असून या धक्क्यामुळे कुठलीही जीवित व वित्त हानी झाली नसल्याची प्राथमिक माहिती जिल्हाप्रशासनाच्यावतीने देण्यात आली.

०००००

वृत्त क्र. 977

मतदानाची टक्केवारी वाढविण्यासाठी स्वीपमार्फत विविध जनजागृती कार्यक्रम 

मनपा आयुक्ताकडून जिल्हास्तरीय स्वीप कक्षाचा आढावा

 

नांदेड,25 - आगामी लोकसभा पोटनिवडणूक आणि विधानसभा निवडणुकीत मतदानाची टक्केवारी वाढवण्यासाठी 86- नांदेड उत्तर आणि 87- नांदेड दक्षिण मतदारसंघांमध्ये व्यापक जनजागृती मोहिम राबवण्यात येत आहे.

 

यानिमित्त आज नांदेड वाघाळा महापालिका आयुक्त डॉ. महेशकुमार डोईफोडे यांच्या अध्यक्षतेखाली जिल्हास्तरीय स्वीप कक्षाचा आढावा घेण्यात आला.

 

यावेळी निवडणुकीच्या पार्श्वभूमीवर जनजागृती कार्यक्रमाची चर्चा करण्यात आली. मागील निवडणुकीत कमी मतदान झालेल्या केंद्रांवर विशेष लक्ष देण्याच्या सूचना देण्यात आल्या. बीएलओ (बुथ लेव्हल ऑफिसर्स) च्या माध्यमातून घरोघरी भेट देऊन मतदारांपर्यंत पोहोचणे, सार्वजनिक ठिकाणी पथनाट्य, मतदान शपथ, महिला बचत गटांचे मेळावे, विविध व्यापारी आणि सामाजिक संघटनांच्या माध्यमातून मतदार जनजागृती करणे, तसेच ऑटोरिक्षातून जागृती संदेश प्रसारित करणे या उपक्रमांवर भर देण्यात येणार असल्याचे आयुक्त डॉ. महेश कुमार डोईफोडे यांनी सांगितले.

 

 महापालिकेच्या प्रांगणात उभारण्यात आलेल्या सेल्फी पॉईंट आणि ध्वनीक्षेपक रिक्षांचे उद्घाटन डोईफोडे यांच्या हस्ते करण्यात आले. याप्रसंगी मी मतदान करणार या स्वाक्षरी मोहिम फलकाचे अनावरण करण्यात आले. यात अनेकांनी सहभाग घेतला. उपस्थित अधिकारी आणि कर्मचार्‍यांनी विविध उपक्रमांचे आयोजन करण्याबाबत सहमती दर्शवली. तसेच येत्या दिवाळीमध्येही स्वीप अंतर्गत मतदान जनजागृती उपक्रमांचे नियोजन करण्यात आले आहे.

 

या बैठकीस महापालिका अतिरिक्त आयुक्त गिरीश कदम, उपायुक्त अजितपालसिंघ संधू, शिक्षणाधिकारी व्यंकटेश चौधरी, जिल्हा परिषदेचे शिक्षण अधिकारी आडे, प्रा. डॉ. घनश्याम येळणे, अधीक्षक एस.आर. पोकळे, बालासाहेब कच्छवे, हनुमंत राठोड, सारिका आचमे, कविता जोशी, संजय भालके, सुनील मुत्तेपवार, साईराज  मदिराज, आशा घुले, माणिक भोसले, शिवराज पवार, मुकुंद अनासपुरे, गणेश कस्तुरे, अनिल कांबळे यांच्यासह 86- नांदेड उत्तर मतदार संघ व 87- नांदेड दक्षिण मतदार संघाचे स्वीप कक्षाच्या कर्मचाऱ्यांची उपस्थिती होती.

00000

वृत्त क्र. 976

नांदेड विधानसभा मतदार संघात धडक कारवाई

आतापर्यंत 24 लाखांचा ऐवज जप्त

 

नांदेड, दि. 25 ऑक्टोंबर :- नांदेड जिल्ह्यामध्ये आचारसंहिता लागल्यापासून आजपर्यंत 24 लक्ष रुपयांचा ऐवज जप्त करण्यात आला आहे. प्रशासनाने पुढील काही दिवस आणखी सक्त कारवाई करण्याचे निर्देश दिले आहेत.

 

नांदेड लोकसभा पोटनिवडणूक व विधानसभा सार्वत्रिक निवडणुकीत मतदान 20 नोव्हेंबर 2024 रोजी होणार आहे. या निवडणूक कालावधीत जिल्ह्यात कायदा व सुव्यवस्था राखण्यासाठी जिल्हा प्रशासनाच्यावतीने फिरते पथक व स्थिर निगराणी पथक तैनात केली आहेत.

 

या पथकामार्फत  काळात पैशाची देवाण-घेवाण, भेट वस्तु वाटप,रोख रक्कम,अंमली पदार्थ, दारु विक्री व वाहतूक अशा घटनावर करडी नजर ठेवण्यात येत आहे. या पथकामार्फत धडक कारवाई करण्यात येवून एकूण 24 लाख 4 हजार 915 रुपयांचा मुद्देमाल जप्त करण्यात आला आहे.

 

यात भोकर 1 लाख 70 हजार 30 रुपये, देगलूर 2 लाख 77 हजार 650, हदगाव 26 हजार 900, किनवट 1 लाख 71 हजार 725, लोहा 44 हजार 100, मुखेड 71 हजार 140, नायगाव 3 लाख 10 हजार 980, नांदेड उत्तर 12 लाख 35 हजार 380, नांदेड दक्षिण 97 हजार 10 रुपयांचा मुद्देमाल जप्त करण्यात आला आहे.

 ०००००

वृत्त क्र. 975

आचारसंहितेचे उल्लंघन होतेय ? मग, सी व्हिजिल ॲपवर तक्रार करा

100 मिनिटाच्या आत मिळतो प्रतिसाद

 

नांदेड, दि. 25 ऑक्टोंबर :- भारत निवडणूक आयोगाने विधानसभा सार्वत्रिक निवडणुकीची तारीख जाहीर केली आहे. 20 नोव्हेंबर रोजी मतदान होणार आहे. त्यासाठी 15 ऑक्टोबर 2024 पासून राज्यात आदर्श आचारसंहिता लागू झाली आहे. या निवडणूक कालावधीत आचारसंहितेचे उल्लंघन होत असल्यास सर्वसामान्य मतदार, नागरिकांना आता थेट निवडणूक आयोगाकडे तक्रार करता येणार आहे. त्यासाठी भारत निवडणूक आयोगाने सी व्हिजिल सिटीझन ॲप विकसित केले आहे. या ॲपवर दाखल होणाऱ्या तक्रारींवर 100 मिनिटांत पहिली कार्यवाही केली जात आहे.

 

आचारसंहिता कालावधीत काय करावे आणि काय करु नये याविषयी निवडणूक उमेदवार, प्रशासन आणि राजकीय पक्षांना माहिती दिली जाते. पण, काहीवेळा आदर्श आचारसंहितेचे उल्लंघन होते. त्याची तक्रार करणे आता पूर्वीपेक्षा अधिक सुलभ झाले आहे. आचारसंहिता उल्लंघनाची तक्रार किंवा माहिती निवडणूक आयोग आणि जिल्हा प्रशासनापर्यंत पोहोचवण्यासाठी भारत निवडणूक आयोगाने सी व्हिजिल ॲप विकसित केले आहे. या मोबाईल ॲपद्वारे मतदारांना आता थेट आयोगाकडे तक्रार करता येणार आहे. या सी व्हिजिल ॲपवर तक्रार प्राप्त होताच तातडीने त्यावर कारवाई केली जाते. तक्रारदाराचे नाव गोपनीय ठेवले जाते. सी व्हिजिल ॲप अँड्रॉइड आणि आयओएस डिव्हाइसवर डाऊनलोड करण्यासाठी उपलब्ध आहे. उल्लंघनाची तक्रार करण्यासाठी, वापरकर्त्यांनी फक्त ॲप उघडणे, उल्लंघनाचा प्रकार निवडणे आणि घटनेचे तपशिल, स्थान, वेळ आणि छायाचित्रे किंवा व्हीडिओ प्रदान करणे आवश्यक आहे. ॲप वापरकर्त्यांना त्यांच्या तक्रारींच्या प्रगतीचा मागोवा घेता येणार आहे. वैशिष्ट्ये सी व्हिजिल ॲप हा वापरकर्त्यांना आदर्श आचारसंहितेच्या उल्लंघनाची तक्रार करण्याची अनुमती देतो. नागरिकांना निवडणूक प्रक्रियेत सहभागी होण्यासाठी व्यासपीठ उपलब्ध करून देतो. उल्लंघनाचे स्थान ट्रॅक करण्यासाठी जीपीएस वापरतो. वापरकर्त्यांना केवळ थेट घटना चित्रित करण्याची अनुमती देतो. तक्रारीच्या प्रगतीचा मागोवा घेतो.

 

वापर कसा करायचा एन्ड्रॅाईड मोबाईलमधील गुगल प्ले स्टोर आणि आयफोनमधील ॲप स्टोर या ॲपमध्ये जावून सी व्हिजिल (cVIGIL) सर्च करावे.त्यानंतर ॲप डाऊनलोड करा. त्यानंतर ॲप उघडून मोबाईल क्रमांक, पत्ता, मतदारसंघ समाविष्ट करुन खाते तयार करा. तुम्हाला ज्या उल्लंघनाची तक्रार करायची आहे ते निवडा आणि स्थळ, वेळ आणि छायाचित्रे किंवा व्हिडिओसह घटनेचे तपशील टाका. त्यानंतर तक्रार सबमिट करा. अचूक कृती व देखरेख या ॲप्लिकेशनचा वापर करून, निवडणूक निर्णय अधिकारी कार्यालयात न जाताही काही मिनिटांतच नागरिक राजकीय गैरव्यवहाराच्या घटनांची तक्रार नोंदवू शकतात. हा सी व्हिजिल ॲप जिल्हा नियंत्रण कक्ष, निवडणूक निर्णय अधिकारी आणि भरारी पथकाशी जागरूक नागरिकांना जोडतो. ज्यामुळे एक जलद आणि अचूक कृती, देखरेख आणि अहवाल प्रणाली तयार होते. लाईव्ह फोटो, व्हिडिओ या ॲपच्या अचूकतेसाठी ॲपमधून फक्त लाईव्ह लोकेशनवर आधारित फोटो, व्हीडिओ घेतले जातात. जेणेकरुन भरारी पथक, स्थिर संनिरीक्षण चमुंना वेळेत कार्यवाही करणे शक्य होईल.

 

तातडीने होते कारवाई

या ॲपवर तक्रार दाखल होताच निवडणूक यंत्रणा तुमच्या तक्रारीची चौकशी करेल आणि योग्य ती कारवाई करेल. डाटा सुरक्षा या ॲपवरील डाटा हा सुरक्षित ठेवला जातो. हा डाटा इतर कोणत्याही थर्ड पार्टीला दिला जात नाही. याशिवाय हा डाटा एन्ड टू एन्ड इन्क्रिप्टेड ठेवला जातो.

 

नांदेड विधानसभा मतदार संघात आतापर्यत सी-व्हीजील ॲपवर एकूण 32 तक्रारी दाखल झाल्या असून यापैकी 11 तक्रारी निकाली काढण्यात आलेल्या आहेत, तर 21 तक्रार बेदखल होत्या. तरी नागरिकांनी आचारसंहिता भंगाच्या तक्रारी सी-व्हीजील ॲपवर नोंदवाव्यात तसेच 1950 टोल फ्री क्रमांकावर ही तक्रार नोंदविता येईल.

00000

 

गेल्या तीन दिवस चाललेल्या बुद्धिबळ राज्यस्तर स्पर्धेच्या समारोपापूर्वी स्पर्धकांच्या रंगलेल्या फेरी