मराठवाडा मुक्तीसंग्राम दिनानिमित्त

जिल्ह्यात 55 हजार नागरिकांनी लस घेत जपली बांधिलकी

 

·         लसीकरणाच्या अभूतपूर्व यशाबद्दल पालकमंत्री अशोक चव्हाण यांच्याकडून गौरव   

नांदेड (जिमाका) दि. 18 :- मराठवाडा मुक्तीसंग्राम दिनाच्या औचित्याने दिनांक 17 सप्टेंबर रोजी जिल्ह्यात 75 हजार कोविड-19 लसीकरणाचा संकल्प जिल्हा प्रशासनाच्यावतीने घेण्यात आला होता. मराठवाडा मुक्ती दिनाच्या दिवशी जिल्ह्यात 55 हजार 33 व्यक्तींनी लस घेऊन कोरोना लसीकरणाच्या साक्षरतेत आपले योगदान दिले. या यशाबद्दल पालकमंत्री अशोक चव्हाण यांनी जिल्हा प्रशासनाच्या या अभिनव उपक्रमाचे कौतूक करून ही मोहिम अधिक सर्वसमावेशक व व्यापक करण्याच्या प्रयत्नांना व नांदेड जिल्हावासीयांना शुभेच्छा दिल्या. 

जिल्हाधिकारी डॉ. विपीन इटनकर, जिल्हा परिषदेच्या  मुख्य  कार्यकारी अधिकारी वर्षा ठाकूर-घुगे, मनपा आयुक्त सुनिल लहाने, आरोग्य विभाग, महसूल विभाग, महानगरपालिका, ग्रामीण भागातील प्राथमिक आरोग्य केंद्र, सार्वजनिक गणेश उत्सव मंडळ, विविध सेवाभावी संस्था यांच्या योगदानातून साकारलेल्या या भव्य लसीकरण मोहिमेला नागरीकांनी भरभरून प्रतिसाद दिला. 

दिनांक 17 सप्टेंबर रोजी झालेल्या या लसीकरण मोहिमेत नांदेड मनपा क्षेत्रात 5 हजार 102, ग्रामीणमध्ये 39 हजार 778,  नगरपालिका क्षेत्रात 10 हजार 153 असे एकुण 55 हजार 33 लसीकरण झाले.  लसीकरणासाठी आरोग्य खात्याशी संबंधित सर्व अधिकारी, कर्मचारी, नर्स यांनी विशेष परीश्रम घेतले. या सर्वांचे जिल्हाधिकारी डॉ. विपीन इटनकर यांनी अभिनंदन करुन लसीकरण करून घेतलेल्या नागरीकांचेही त्यांनी आभार मानले. यापुढच्या काळातही असे उपक्रम राबवले जाणार आहेत. अशा समाजउपयोगी उपक्रमामध्ये सर्व नांदेड जिल्हावासीयांनी सहभाग नोंदवावा असे आवाहन जिल्हाधिकारी डॉ. विपीन इटनकर यांनी केले.  

000

 जिल्हा विकास योजनेच्या समन्वयासाठी

दिशा समितीची आढावा बैठक संपन्न 

नांदेड (जिमाका) दि. 18 :- जिल्ह्यातील विविध विकास योजना या लाभधारकापर्यंत पोहचण्यासाठी जिल्हा प्रशासनातर्फे केलेल्या कार्यवाहीची आढावा घेणारी बैठक डॉ. शंकरराव चव्हाण नियोजन भवन येथे संपन्न झाली. खासदार प्रताप पाटील चिखलीकर यांच्या अध्यक्षतेखाली  झालेल्या या बैठकीस आमदार राम पाटील रातोळीकर, आमदार डॉ. तुषार राठोड, आमदार राजेश पवार, जिल्हाधिकारी डॉ. विपीन इटनकर, मुख्य कार्यकारी अधिकारी वर्षा ठाकूर, मनपा आयुक्त डॉ. सुनिल लहाने यांच्यासह विविध विभागांचे प्रमुख अधिकारी आदींची उपस्थिती होती. 

बैठकीत सुरवातीला मागील सभेच्या इतिवृत्ताचे वाचन व त्यास मान्यता देण्यात आली. यावेळी समितीच्या सदस्यांनी प्रशासकीय पातळीवर येत असलेल्या अडचणी सांगून त्या दूर करण्याची मागणी केली. याचबरोबर आमदार राम पाटील रातोळीकर, आमदार डॉ. तुषार राठोड, आमदार राजेश पवार यांनी जिल्हा प्रशासनास सूचना केल्या. अध्यक्ष खासदार प्रताप पाटील चिखलीकर यांनी विविध योजनांच्या प्रभावी अंमलबजावाणीसाठी संबंधित यंत्रणेने त्वरीत कार्यवाही करावी, असे निर्देश जिल्हा प्रशासनाला दिले. जिल्हाधिकारी डॉ. विपीन इटनकर यांनी सूचनांचे स्वागत करुन उपस्थित झालेल्या प्रश्नांबाबत वस्तूस्थिती सभागृहाला अवगत करुन दिली.  

0000

 नांदेड जिल्ह्यात 3 कोरोना बाधित झाले बरे 

नांदेड (जिमाका) दि. 18 :- जिल्ह्यात आज प्राप्त झालेल्या 714 अहवालापैकी 712 अहवाल निगेटिव्ह प्राप्त झाले यात एकही अहवाल कोरोना बाधित आढळला नाही. जिल्ह्यात आजवर एकुण बाधितांची संख्या 90 हजार 305 एवढी असून यातील 87 हजार 624 रुग्णांना बरे झाल्याने रुग्णालयातून सुट्टी देण्यात आली आहे. आजच्या घडीला 29 रुग्ण उपचार घेत असून 3 बाधितांची प्रकृती अतिगंभीर आहे. जिल्ह्यातील कोरोनाचा प्रादुर्भाव कमी करण्यासाठी सेवाभावी संस्था, प्रतिनिधी आणि जागरुक नागरिकांनी आरोग्य जागराच्या चळवळीत जनतेने सहभाग घेवून मास्क, सॅनिटायझर, सुरक्षित अंतर आणि लसीकरण याबाबत व्यापक जनजागृती करुन अनावश्यक घराबाहेर पडणे टाळावे, असे आवाहन जिल्हाधिकारी डॉ. विपीन इटनकर यांनी केले आहे. 

जिल्ह्यात आतापर्यंत बाधित मृत रुग्णांची संख्या 2 हजार 652 एवढी आहे. आज जिल्ह्यातील 3 कोरोना बाधितांना औषधोपचारानंतर सुट्टी देण्यात आली आहे. यात मनपा अंतर्गत एन.आर.आय. भवन व गृह विलगीकरण 1, खाजगी रुग्णालयातील 2 असे एकुण 3 व्यक्तीला रुग्णालयातून सुट्टी देण्यात आली. 

आज 29 कोरोनाबाधित रुग्णांवर औषधोपचार सुरु आहेत. यात शासकीय वैद्यकीय महाविद्यालय विष्णुपुरी 7, नांदेड मनपा अंतर्गत गृह विलगीकरण 15, नांदेड जिल्ह्यातील तालुक्यांतर्गत गृह विलगीकरण 5, खाजगी रुग्णालय 2 व्यक्ती उपचार घेत आहेत. 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 7 लाख 24 हजार 744

एकुण निगेटिव्ह स्वॅब- 6 लाख 21 हजार 448

एकुण पॉझिटिव्ह बाधित व्यक्ती- 90 हजार 305

एकूण रुग्णालयातून सुट्टी दिलेली संख्या- 87 हजार 624

एकुण मृत्यू संख्या-2 हजार 652

उपचारानंतर बाधित रुग्ण बरे होण्याचे प्रमाण 97.03 टक्के

आज स्वॅब तपासणी अनिर्णीत संख्या-निरंक

आज स्वॅब नाकारण्यात आलेली संख्या-02

आज प्रलंबित स्वॅब तपासणी संख्या-निरंक

रुग्णालयात उपचार घेत असलेले बाधित व्यक्ती-29

आज रोजी अतिगंभीर प्रकृती असलेले-3.

00000

 जिल्ह्यातील 103 केंद्रावर कोविड-19 चे लसीकरण 

नांदेड (जिमाका) दि. 18 :- जिल्हा आरोग्य विभागातर्फे जिल्ह्यातील 103 लसीकरण केंद्रावर कोविड-19 चे लसीकरण व्हावे यादृष्टिने उपलब्ध लस सर्वत्र विभागून पाठविली आहे. यात 18 ते 44 वयोगटासह 45 वर्षावरील व्यक्तींना कोव्हॅक्सीन व कोविशील्ड लसीचा पहिला व दुसरा डोस उपलब्ध करुन दिला आहे. रविवार 19 सप्टेंबर 2021 रोजी लसीकरण केंद्रावर उपलब्ध असलेली डोसची संख्या पुढीलप्रमाणे आहे. 

मनपा क्षेत्रातील श्री गुरु गोबिंदसिंघजी जिल्हा रुग्णालय, डॉ. शंकरराव चव्हाण वैद्यकिय महाविद्यालय, शासकीय आयुर्वेदिक महाविद्यालय, स्त्री रुग्णालय, शहरी दवाखाना हैदरबाग, शिवाजीनगर, जंगमवाडी, दशमेश हॉस्पिटल, कौठा, श्रावस्तीनगर (विजयनगर), सिडको, पौर्णिमा नगर, सांगवी, करबला, तरोडा, विनायकनगर, रेल्वे हॉस्पिटल, अरबगल्ली, खडकपुरा या 19 केंद्रावर कोविशील्ड लसीचे प्रत्येकी 100 डोस व कोव्हॅक्सीन लसीचे प्रत्येकी 100 डोस उपलब्ध करुन दिले आहेत.

शहरी भागात मोडणाऱ्या लसीकरण केंद्रावर उपलब्ध असलेले डोस पुढीलप्रमाणे आहेत. उपजिल्हा रुग्णालय देगलूर, हदगाव, गोकुंदा, मुखेड, ग्रामीण रुग्णालय भोकर, बिलोली, धर्माबाद, हिमायतनगर, कंधार, माहूर, मांडवी, लोहा, मुदखेड, बारड, नायगाव, उमरी या 16 केंद्रावर कोविशील्ड लसीचे प्रत्येकी 100 डोस तसेच कोव्हॅक्सीन लसीचे प्रत्येकी 100 डोस डोस उपलब्ध आहेत. ग्रामीण भागात 68 प्राथमिक आरोग्य केंद्रावर कोविशील्डचे प्रत्येकी 100 डोस देण्यात आले आहेत. 

वरील सर्व लसीकरण केंद्रावर 18 ते 44 वयोगटासह 45 वर्षावरील लाभार्थ्यांना कोविड-19 लसीचा पहिला व दुसरा डोस दिला जाणार आहे. यासाठी ऑनलाईन किंवा लसीकरण केंद्रावर नोंदणी करण्याची सुविधा उपलब्ध करुन दिली आहे. जिल्ह्यात 17 सप्टेंबर 2021 पर्यंत एकुण 12 लाख 60 हजार 977 लाभार्थ्यांचे लसीकरण करण्यात आले. नांदेड जिल्ह्यात 18 सप्टेंबरपर्यत कोविड लसींचा साठा खालीलप्रमाणे प्राप्त झालेला आहे. कोविशिल्डचे 10 लाख 71 हजार 30 डोस, कोव्हॅक्सीनचे 3 लाख 2 हजार 80 डोस याप्रमाणे एकुण 13 लाख 73 हजार 110 डोस प्राप्त झाले आहेत. 

केंद्र शासनाच्या सूचनेनुसार कोविशिल्ड लसीचा पहिला डोस ज्यांनी घेतला आहे त्यांच्या 12 ते 16 आठवडे म्हणजेच सुमारे 84 दिवसानंतर दुसरा डोस दिला जाईल. जिल्ह्यातील सर्व कार्यक्षेत्रामध्ये कोविशील्ड व कोव्हॅक्सीन लस 18 ते 44 वयोगटासाठी व 45 वर्षावरील वयोगटासाठी पहिला व दुसरा डोस उपलब्ध राहील. यासाठी ऑनलाईन व ऑनस्पॉट नोंदणी सुविधा उपलब्ध राहिल. मनपा कार्यक्षेत्रातील लाभार्थ्यांना कोविशील्ड व कोव्हॅक्सीन लस घेण्यासाठी cowin.gov.in या वेबसाईटवर ऑनलाईन नोंदणी करणे अनिवार्य आहे. ऑनलाईन नोंदणी पूर्ण झाल्यानंतर लाभार्थ्यांचे संबंधित केंद्रावर लसीकरण करण्यात येईल. ऑनलाईन नोंदणीची वेळ सायंकाळी 6 पासून पुढे सुरु राहील. लसीचा उपलब्धतेप्रमाणे आरोग्य विभाग याचे नियोजन करेल. नागरिकांनी लसीच्या उपलब्धतेप्रमाणे आरोग्य विभागातील कर्मचाऱ्यांना सहकार्य करावे, असे आवाहन जिल्हा आरोग्य अधिकारी डॉ. बालाजी शिंदे यांनी केले.

00000

 आरोग्याच्या खालोखाल यापुढे 

प्राथमिक शाळांच्या उभारणीवर अधिक भर

- पालकमंत्री अशोक चव्हाण 

 

नांदेड (जिमाका) दि. 18 :-  जिल्ह्यातील ग्रामीण भागात जनतेला आरोग्याच्या सेवा-सुविधा चांगल्याप्रकारे उपलब्ध व्हाव्यात यादृष्टिने मागील 2 वर्षे महाविकास आघाडी शासनाने भर देऊन काम केले आहे. कोरोनाच्या लाटेतून सावरण्यासाठी नांदेड जिल्ह्यात असलेल्या प्राथमिक आरोग्य केंद्रांची उपलब्धता ही पणास लागली. काही वर्षांपूर्वी आपण दूरदृष्टि ठेऊन ग्रामीण भागातील आरोग्य यंत्रणांना, सेवा-सुविधांना भक्कम करण्याचे काम केले. आता वाढत्या लोकसंख्येनुसार अनेक गावांच्या पंचक्रोषीत नव्या प्राथमिक आरोग्य केंद्रांची गरज निर्माण झाली असून त्यावर भर देण्यात येत असल्याचे प्रतिपादन सार्वजनिक बांधकाम मंत्री अशोक चव्हाण यांनी केले. 

येळेगाव येथे प्राथमिक आरोग्य केंद्राच्या भूमीपूजन समारंभा निमित्त आयोजित करण्यात आलेल्या कार्यक्रमात ते बोलत होते. यावेळी जिल्हा  परिषदेच्या अध्यक्षा मंगाराणी अंबुलगेकर, आमदार अमर राजूरकर, जिल्हा परिषदेच्या मुख्य कार्यकारी अधिकारी वर्षा ठाकूर, जिल्हा परिषद आरोग्य सभापती पद्मा रेड्डी, जिल्हा आरोग्य अधिकारी डॉ. बालाजी शिंदे, जिल्हा परिषद सदस्य  बबनराव बारसे, अर्धापूर पंचायत समितीचे सभापती कांताबाई सावंत, उपसभापती अशोक कपाटे, गणपतराव तिडके, गोविंदराव नागेलीकर व मान्यवर उपस्थित होते. 

येळेगाव येथील व पंचक्रोषीतील जवळच्या गावांना या ठिकाणी प्राथमिक आरोग्य केंद्र नसल्याने साध्या आजारांनाही लोकांना नांदेडला यावे लागत होते. लोकांची ही गैरसोय दूर करण्यासाठी येळेगाव येथे आपण प्राथमिक आरोग्य केंद्राची उभारणी करीत असून याठिकाणी आरोग्य केंद्राला लागणारे चांगले आरोग्य वैद्यकिय अधिकारी उपलब्ध करुन देऊ असे पालकमंत्री अशोक चव्हाण यांनी स्पष्ट केले. कोविड-19 च्या आव्हानात्मक काळात आपण आरोग्यासाठी खूप व्यापक प्रमाणात काम केले आहे. जुन्या मोडकळीस आलेल्या व आयुष्यमान संपलेल्या रुग्णवाहिका बदलून आपण जिल्हाभरात 68 नवीन रुग्णवाहिका घेतल्या. नांदेड येथे 300 खाटांचे नवीन हॉस्पिटल आपण उभारत आहोत. ग्रामीण भागातील युवा-युवतींना वैद्यकिय क्षेत्रात सेवेची संधी मिळावी यादृष्टिने नर्सींग कॉलेजही आपण आकारास घातले आहे, असे त्यांनी सांगितले. 

जिल्ह्यातील आरोग्य सेवा-सुविधा भक्कम करण्यासमवेत प्राथमिक शिक्षणाच्याही सेवा-सुविधा अधिक भक्कम करण्याकडे माझा आता कल असणार आहे. ग्रामीण भागातील असंख्य गावांमध्ये जिल्हा परिषदेच्या शाळा अतिशय जीर्ण अवस्थेत आलेल्या आहेत. ग्रामीण भागातील विद्यार्थ्यांना शिक्षणाची गोडी वाढावी यादृष्टिने मोडकळीस आलेल्या शाळा नव्या स्वरुपात शिक्षणाशी जवळीकता साधणाऱ्या रचनेत यापुढे उभारण्यावर भर असेल, असेही सुतोवाच त्यांनी केले. प्रत्येक गावात आदर्श शाळा धोरण जिल्ह्याने स्विकारुन शिक्षणाचे मार्ग अधिक प्रशस्त करण्याबाबत शिक्षकांनीही पुढाकार घेण्याचे आवाहन त्यांनी केले. 

या कार्यक्रमाचे प्रास्ताविक जिल्हा आरोग्य अधिकारी डॉ. बालाजी शिंदे यांनी केले.

0000

 एमएच-सीईटी परीक्षा केंद्र परिसरात प्रतिबंधात्मक आदेश 

नांदेड (जिमाका) दि. 18 :- एमएच-सीईटी परीक्षा-2021 ही 20 सप्टेंबर ते 1 ऑक्टोंबर या कालावधीत दोन सत्रात जिल्ह्यात 4 परीक्षा केंद्रावर घेण्यात येणार आहेत. या परीक्षा केंद्राच्या परिसरात बाहेरील व्यक्तींचा उपद्रव होऊ नये व परीक्षा स्वच्छ सुसंगत पार पाडण्याच्यादृष्टिने या परीक्षा केंद्र परिसरात फौजदारी प्रक्रिया संहिता 1973 चे कलम 144 अन्वये प्रतिबंधात्मक आदेश जिल्हादंडाधिकारी डॉ. विपीन इटनकर यांनी काढले आहेत. 

या परीक्षा केंद्रापासून 100 मीटर परिसरात 20 सप्टेंबर ते 1 ऑक्टोंबर या कालावधीत सकाळी 6 ते सायं 8 वाजेपर्यंत परीक्षार्थी व परीक्षेच्या कामाशी संबंधित अधिकारी-कर्मचाऱ्या व्यतिरिक्त इतर कोणत्याही व्यक्तीला प्रवेश करता  येणार नाही. परीक्षा कालावधीत या परीसरात 100 मीटर पर्यंतची सर्व सार्वजनिक टेलिफोन्स, एसटीडी, आयएसडी, भ्रमणध्वी, फॅक्स, झेरॉक्स आणि ध्वनीक्षेपक चालू ठेवण्यास प्रतिबंध करण्यात आले आहे.  

00000

 विस्तीर्ण मराठवाड्यातील विकास कामांच्या गतीसाठी 

विविध प्रमुख कार्यालयांचा विस्तार आवश्यक  

- सार्वजनिक बांधकाम मंत्री अशोक चव्हाण

 

·  नांदेड येथे दक्षता व गुणनियंत्रण आणि संकल्पचित्र (पूल व इमारती)

विभागाच्या कार्यालयाचे उद्घाटन

 

नांदेड (जिमाका) दि. 18 :- मराठवाड्याचे विस्तीर्ण क्षेत्र, आठ जिल्ह्यातील विकास कामांचा असलेला अनुशेष आणि नागरीकांच्या गरजांचा प्राधान्यक्रम निश्चित करणे अत्यावश्यक आहे. हे लक्षात घेऊन शासनाने हाती घेतलेल्या विविध लोकाभिमूख योजनांच्या कामांना गती देण्यासाठी प्रमुख कार्यालयांचा विस्तार व अतिरिक्त सुविधा निर्माण करुन देणे अत्यावश्यक झाले आहे.  सार्वजनिक बांधकाम विभागांतर्गत रस्ते, पूल, इमारती यांचे संकल्पचित्र, गुणवत्ता नियंत्रण व दक्षता या संदर्भातील प्राथमिक कामे वेळीच पूर्ण होण्याच्यादृष्टिने नांदेड येथे ही दोन स्वतंत्र कार्यालय सुरू करण्याचा निर्णय घेण्यात आला. या निर्णयानुसार आता ही दोन्ही कार्यालय नांदेड येथे सुरू झाल्याने 4 जिल्हे औरंगाबाद विभागात तर इतर 4 जिल्हे नांदेड विभागात सुरू झाल्याने संकल्पचित्र व गुणवत्ता नियंत्रण कामांना गती मिळेल असा विश्वास राज्याचे सार्वजनिक बांधकाम मंत्री अशोक चव्हाण यांनी व्यक्त केला. 

नांदेड येथे स्नेहनगर भागातील सार्वजनिक बांधकाम विभागाच्या संकुलात नव्याने सुरू करण्यात आलेल्या दक्षता व गुणनियंत्रण आणि संकल्पचित्र (पूल व इमारती) विभागाच्या कार्यालयाचे उद्घाटन समारंभात ते बोलत होते. यावेळी आमदार अमर राजूरकर, आमदार मोहन हंबर्डे, जिल्हाधिकारी डॉ. विपीन इटनकर, सार्वजनिक बांधकाम विभागाचे मुख्य अभियंता दिलीप उकीरडे, अधिक्षक अभियंता अविनाश धोंडगे, इतर वरिष्ठ अधिकारी व पदाधिकारी उपस्थित होते. 

कार्यालयांच्या निर्मितीबरोबर काम करणाऱ्या अधिकाऱ्यांसाठी चांगल्या वातावरणात काम करता आले पाहिजे. जेवढे अधिक चांगले वातावरण अधिकारी-कर्मचाऱ्यांना मिळेल तेवढ्या चांगल्या प्रमाणात अधिकारी-कर्मचारी आपले काम गुणवत्तेने पूर्ण करतील यावर माझा विश्वास आहे. काम करतांना झालेल्या चुका एकवेळेस समजून घेता येईल. कामात जर कोणी टाळाटाळ करत असेल तर त्याबाबतही वेगळा विचार करावा लागेल, असे स्पष्ट करुन चांगले काम करणाऱ्या अधिकाऱ्यांच्या मागे मी खंबीरपणे उभा राहिल, अशी ग्वाही त्यांनी दिली. 

रस्ते, पूल, इमारती सारख्या विकास कामांमध्ये आरेखनापासून त्याच्या नियोजनापर्यंत लागणारा कालावधी हा कमी करायचा जर असेल तर हे कार्यालय आणि कार्यालयातील मनुष्यबळ वाढविण्याशिवाय पर्याय नाही. विविध स्थानिक स्वराज्य संस्थांपासून शासनाच्या विविध प्रकल्पातील योजनांच्या कामाचा व्याप ह केवळ औरंगाबाद येथे एकच कार्यालय असल्याने त्यावर पडत होता. आता हा व्याप विभागाला जाऊन विकास कामांच्या आरेखन, संकल्पचित्राचे काम नांदेड येथे सुरू झाल्यामुळे या होणारा विलंब टाळता येणे शक्य झाल्याचे त्यांनी सांगितले. 

विविध विकास कामांमधील गुणवत्ता हा अत्यंत महत्वाचा व जबाबदारीचा विषय असून त्यासाठी आवश्यक असणारा दक्षता व गुणनियंत्रण विभागही आता नांदेडमध्ये कार्यान्वित झाला आहे. विकास कामांसाठी उपलब्ध होणारा निधी किती आव्हानातून शासनाला पुरवावा लागतो याची जाणीव कंत्राटदारांनी ठेऊन कोणत्याही परिस्थितीत कामाच्या गुणवत्तेबाबत तडजोड करता कामा नये. मागील काळात मिळालेल्या कंत्राटाची इतर कंत्राटदारांना विक्री अशी फसवाफसवीची वृत्ती झाल्याने याचा कामाच्या गुणवत्तेवर मोठा दुष्परिणाम झाला. तसे कोणतेही प्रकार खपवून घेतले जाणार नाहीत, असे सांगून त्यांनी ज्या कंत्राटदारांनी गुणवत्तापूर्ण काम केलेले आहे त्यांचे पैसे अडकवू देणार नाही, असे सार्वजनिक बांधकाम मंत्री अशोक चव्हाण यांनी स्पष्ट केले. विकास कामांना लागणाऱ्या निधीची अडचण जरी असली तरी प्राधान्य क्रमाने जी कामे ठरविली आहेत, जी कामे अधिक लोकाभिमूख आहेत अशा कामांना निधीची कमतरता पडू देणार नाही, असेही पालकमंत्री अशोक चव्हाण यांनी स्पष्ट केले. 

चांगले काम करणाऱ्या अधिकाऱ्यांना प्रोत्साहनही मिळाले पाहिजे. शासकीय पातळीवरुन अशा गुणवत्ताधारक अधिकारी-कर्मचाऱ्यांचा गौरव करण्याकरीता महसूल दिनाच्या धर्तीवर अभियंता दिनही पुढच्यावर्षीपासून आपण साजरा करु असे ते म्हणाले. यावेळी मुख्य अभियंता दिलीप उकिरडे व अधिक्षक अभियंता अविनाश धोंडगे  यांनी आपल्या मनोगतात या नवीन कार्यालयाची रचना व महत्व विषद केले. कार्यक्रमास नवीन कार्यालयातील अभियंतासह इतर विभागातील अभियंते व कर्मचारी उपस्थित होते.

00000