वृत्त क्रमांक 478

राष्ट्रीय खाद्यतेल अभियान तेलबिया अंतर्गत मुल्य साखळी भागीदार निवड प्रक्रिया 

शेतकरी उत्पादक कंपन्यांना 9 मे पर्यंत प्रस्ताव सादर करण्यास मुदत     

नांदेड दि. 6 मे :- राष्ट्रीय खाद्यतेल अभियान तेलबिया सन 2025-26 अभियानांतर्गत सोयाबीन, करडई व सूर्यफूल या पिकासाठी नांदेड जिल्हयाची निवड करण्यात आली आहे. या अभियानाच्या अंमलबजावणीमध्ये पिकनिहाय मुल्य साखळी भागीदार म्हणून शेतकरी उत्पादक कंपनीची निवड करण्यात येणार आहे.  निकष पुर्ण करणाऱ्या शेतकरी उत्पादक कंपन्यांनी परीपुर्ण प्रस्ताव आपल्या संबंधित तालुक्यातील तालुका कृषि अधिकारी कार्यालयाकडे शुक्रवार 9 मे 2025 पर्यंत कार्यालयीन वेळेत सादर करावेत, असे आवाहन जिल्हा अधिक्षक कृषि अधिकारी दत्तकुमार कळसाईत यांनी केले आहे.  

या अभियानांतर्गत जिल्हा तेलबिया समितीने निवड केलेल्या मुल्य साखळी भागीदार यांच्यामार्फत शेतकरी प्रशिक्षण, प्रमाणित बियाणे वितरण, शेतकरी शेतीशाळा आदी घटक राबवायचे आहेत. याबाबतचे निकष पुढीलप्रमाणे असून नांदेड जिल्ह्यात पिकनिहाय मुल्य साखळी भागीदार म्हणुन शेतकरी उत्पादक कंपनी (FPC) यांनी तालुका कृषि अधिकारी कार्यालयाकडे आपले परिपूर्ण प्रस्ताव सादर करावेत. 

पात्रता निकष

कंपनी कायदा किंवा सहकारी कायद्यांतर्गत नोदणी केलेली असावी. ज्या तालुक्यात समुह तयार झाला आहे तेथे काम करण्याचा किमान 3 वर्षांचा अनुभव असावा म्हणजेच नोंदणी मार्च 2022 पुर्वीची असावी. किमान 200 शेतकरी उत्पादक कंपनीमध्ये (FPC) नोंदणीकृत असावी. मागील 3 वर्षातील सरासरी वार्षिक उलाढाल 9 लाख रुपया पेक्षा जास्त असावी. शेतकरी उत्पादक कंपनी (FPC) मध्ये शेतकऱ्यांचा किमान 3 लाख रुपयांचा समभाग असावा. सरकारकडून अनुदान प्राप्तकर्त्या शेतकरी उत्पादक संघाला प्राधान्य दिले जाईल, असे प्रसिद्धी पत्रकात जिल्हा अधिक्षक कृषि अधिकारी दत्तकुमार कळसाईत यांनी स्पष्ट केले आहे.

0000

 पुण्यश्लोक अहिल्यादेवी होळकर यांच्या त्रिशताब्दी जयंती वर्षाचे औचित्य आणि त्यांच्या मंदिर पुनर्निमाणाच्या कामाला अभिवादन म्हणून राज्यातील विविध सात तीर्थस्थळांच्या विकासासाठी ५ हजार ५०३ कोटी रुपयांच्या आराखड्यांना मंत्रिपरिषदेच्या बैठकीत मंजुरी.

#मंत्रिमंडळनिर्णय

#CabinetDecision

  वृत्त क्रमांक 477

अनु.जाती प्रवर्गातील विद्यार्थ्यांसाठी परदेशात उच्च शिक्षणासाठी शिष्यवृत्ती

 विद्यार्थ्यांना अर्ज करण्यास 20 मे 2025 पर्यत मुदतवाढ 

नांदेड दि. 6 मे :-  अनुसूचित जाती , नवबौध्द प्रवर्गातील विद्यार्थ्यांना परदेशामध्ये विशेष अध्ययन करण्यासाठी प्रवेश घेतलेल्या सन 2025-26 या शैक्षणिक वर्षाच्या शिष्यवृत्तीसाठी महाराष्ट्र शासनाच्या संकेतस्थळावर विस्तृत जाहिरात प्रसिध्द करण्यात आली आहे.

विद्यार्थ्यांना 2025-26 या शैक्षणिक वर्षाच्या शिष्यवृत्तीसाठी जाहिरातीद्वारे अर्ज स्विकारण्याची यापूर्वी अंतिम मुदत 30 एप्रिल 2025 दिली होती. त्याअनुषंगाने या जाहिरातीस आता अर्ज स्विकारण्याची अंतिम मुदतवाढ 20 मे 2025 दिली आहे.

तरी सन 2025-26 या शैक्षणिक वर्षात अनुसूचित जाती, नवबौध्द प्रवर्गातील विद्यार्थ्यांनी परदेश शिष्यवृत्ती योजनेअंतर्गत अर्ज तात्काळ आयुक्त, समाज कल्याण आायुक्तालय, 3, चर्चपथ, पुणे-01 याचेस्तरावर अर्ज करावेत, असे आवाहन सहाय्यक आयुक्त शिवानंद मिनगिरे यांनी केले आहे.  

00000

 वृत्त क्रमांक 476

भारतरत्न डॉ. बाबासाहेब आंबेडकर स्वाधार योजना

नवीन व नुतनीकरणाचे अर्जाबाबत सूचना

सन 2024-25 मधील विद्यार्थ्यानी बँक खात्याची माहिती संकेतस्थळावर भरण्याचे आवाहन

नांदेड दि. 6 मे :-  महाराष्ट्र शासनाच्या सामाजिक न्याय व विशेष सहाय्य विभागाकडून अनुसूचित जाती व नवबौध्द घटकातील जे विद्यार्थी शासकीय प्रवेशास पात्र असून प्रवेश मिळालेला नाही. अशा विद्यार्थ्यांना मॅट्रीकोत्तर शिक्षण घेता यावे म्हणून भोजन, निवास व इतर शैक्षणिक सुविधा विद्यार्थ्यांना स्वतः उपलब्ध करून घेण्यासाठी आवश्यक रक्कम संबधीत अनुसूचित जाती व नवबौध्द घटकातील विद्यार्थ्यांच्या आधार संलग्न बँक खात्यामध्ये थेट वितरीत करण्यासाठी 13 जुन 2018 व 26 डिसेंबर 2024 च्या शासन निर्णयान्वये भारतरत्न डॉ.बाबासाहेब आंबेडकर स्वाधार योजना राबविण्यात येत आहे. 

भारतरत्न डॉ. बाबासाहेब आंबेडकर स्वाधार योजना शैक्षणिक वर्ष 2023-24 मध्ये ज्या विद्यार्थ्यांनी नवीन व नुतनीकरण ऑनलाईन अर्ज भरलेले आहेत, अशा विद्यार्थ्यांचे नुतनीकरण अर्ज ऑनलाईन पध्दतीने तपासणी सुरु आहे. ज्या विद्यार्थ्यांचे अर्ज अपूर्ण कागदपत्राअभावी त्रुटीत आलेले आहेत अशा विद्यार्थ्यांना त्यांच्या नोंदणीकृत मोबाईल क्रमांकावर एसएमएस द्वारे माहिती देण्यात येत असून सदारच्या त्रुटीची हि शेवटची संधी देण्यात आलेली आहे. अर्ज त्रुटीत आलेल्या विद्यार्थ्यांनी https://www.syn.mahasamajkalyan.in संकेतस्थळावर भेट द्यावी. तसेच आपल्या अर्जातील त्रुटीची पूर्तता एसएमएस प्राप्त झाल्याच्या 13 मे  2025 या कालावधीत कार्यालयास सादर करावयाची आहेत, याची सर्व विद्यार्थ्यांनी नोंद घ्यावी, असे आवाहन समाज कल्याण विभागाचे सहाय्यक आयुक्त शिवानंद मिनगिरे यांनी केले आहे.

तसेच सन 2024-25 मधील ज्या विद्यार्थ्यानी ऑनलाईन प्रणालीमार्फत बँक खाते चे सर्व माहिती  https://hmas.mahait.org या संकेतस्थळावर तात्काळ माहिती व्यवस्थीत भरावी जेणेकरून या वर्षीचा लाभ देणे सोयीचे होईल. तसेच सन 2023-24 मधील लाभार्थ्यानी https://www.syn.mahasamajkalyan.in ज्या विद्यार्थ्यांचे अर्ज त्रुटीत आलेले आहेत, अशा विद्यार्थ्यांनी ऑनलाईन प्रणालीवर ज्या कागदपत्रांची पुर्तता केलेली आहे, त्याची प्रत सहाय्यक आयुक्त समाज कल्याण कार्यालय डॉ. बाबासाहेब आंबेडकर असे आवाहन सहाय्यक आयुक्त शिवानंद मिनगिरे यांनी केले आहे.

00000

 वृत्त क्रमांक 475

वाजेगाव महसूल मंडळात महाराजस्व  समाधान शिबीर संपन्न

महसूल विभागातील विविध योजनांचा जनतेने लाभ घ्यावा : डॉ.सचिन खल्लाळ

                                                                                                                                                                         नांदेड दि. 6 मे :- महसूली प्रशासन अधिक लोकाभिमुख, कार्यक्षम व गतिमान करण्याच्याप अनुषंगाने “छत्रपती शिवाजी महाराज महाराजस्व  समाधान शिबीर अभियान”राबविण्यात येत आहे.  गाव पातळीवर लोकांची कामे व्हावीत यादृष्टीने या शिबीराचे आयोजन करण्यात करण्यात येत आहे. नागरिकांनी या शिबीराचा अधिकाधिक लाभ घ्यावा, असे आवाहन उपविभागीय अधिकारी डॉ. सचिन खल्लाळ यांनी केले. 

वाजेगांव मंडळा अंतर्गत वाजेगाव येथील राष्ट्रमाता माध्यमिक व उच्च माध्यमिक विद्यालय येथे नुकतेच तहसिल कार्यालय नांदेड यांच्यावतीने “छत्रपती शिवाजी महाराज महाराजस्व समाधान शिबीर अभियान”चे आयोजन करण्यात आले होते. यावेळी ते बोलत होते. 

या कार्यक्रमास तहसिलदार संजय वारकड, कृषी पर्यवेक्षक चुंचूवार, शाळेचे मुख्याध्यापक क्षिरसागर, सरपंच जमील शेठ, रविकांत तारू, नायब तहसिलदार स्वप्नील दिगलवार आदी उपस्थित होते. 

                                                                                                                                                                        क्षेत्रिय स्तरावर ग्रामीण भागात सर्वसामान्य जनता, शेतकरी, विद्यार्थी व महिला यांचे महसूल विभागाशी संबंधित दैनंदिन प्रश्नांचे निराकरण करणे व जनतेच्या  तक्रारी लवकर निकाली काढणे हे या शिबीरांच्या माध्यमातुन सुलभ होणार आहे असे उपविभागीय अधिकारी डॉ. सचिन खल्लाळ यांनी सांगितले. 

यांनी सामाजिक न्यायविभागाच्या विविध योजनांचा लाभ घ्या वा तसेच राशनकार्ड, पुरवठा विषयक, अॅग्रीस्टॅक, पीएम किसान आदीचा लाभ घेण्यासाठी ई-केवायसी करावी असे आवाहन तहसिलदार संजय वारकड यांनी केले.

हे शिबीर यशस्वी करण्यासाठी वाजेगावचे मंडळ अधिकारी प्रमोद बडवणे, ग्राम महसूल अधिकारी रेखा मंडगीलवार, एम.के.पाटील, दिलीप पवार, कृषी सहायक सुरेखा शिंदे यांनी विशेष परिश्रम घेतले. यावेळी महसूल विभागाचे माधव मोरे, प्रतिभा मारतळेकर, दिपाली पवार, संतोष वाघमारे आदींनी विविध योजनांची माहिती देवून लाभार्थ्यांना विविध योजनांचा लाभ दिला.  कार्यक्रमास वाजेगाव महसूल मंडळातील नागरिक मोठया संख्येने उपस्थित होते.

000000

 वृत्त क्रमांक 474

​ऊसतोड कामगारांच्या मुलांसाठी कंधार व मुखेड येथे वसतीगृह सुरु

                                                                                                                                                                            ऑफलाईन अर्ज प्राप्त करुन घेण्याचे आवाहन

नांदेड दि. 6 मे :- सन 2025-26 या शैक्षणिक वर्षासाठी इयत्ता पाचवी ते पदवी, पदवीव्युत्तर अभ्यासक्रमासाठी वसतिगृह प्रवेश ऑफलाईन अर्ज वाटप करण्यास सुरवात झाली आहे.  इच्छुक विद्यार्थी व पालकांनी संबंधित गृहपालांशी संपर्क साधून ऑफलाईन अर्ज प्राप्त करुन घ्यावेत, असे आवाहन समाज कल्याण विभागाचे सहाय्यक आयुक्त शिवानंद मिनगिरे यांनी केले आहे.

सामाजिक न्याय व विशेष सहाय्य विभागाचा शासन निर्णय 10 जानेवारी 2024 अन्वये ऊसतोड कामगारांच्या मुलां-मुलींसाठी नांदेड जिल्ह्यासह इतर जिल्ह्यातील 62 संत भगवान बाबा मुलांचे शासकीय वसतीगृह सुरु करणेबाबत मंजुरी देण्यात आली आहे. त्यानुसार नांदेड जिल्ह्यातील कंधार व मुखेड या दोन तालुक्यातील सन 2025-26 या शैक्षणिक वर्षासाठी इयत्ता पाचवी ते पदवी, पदव्युत्तर अभ्यासक्रमासाठी 100 मुलांच्या क्षमतेची वसतीगृह सुरु करण्यात आली आहेत.

विद्यार्थी व पालकांनी अर्ज प्राप्त करुन घेण्यासाठी संत भगवान बाबा मुलांचे शासकीय वसतिगृह, कंधार साठी व्ही.एम. चपलवार यांचा मो. क्रमांक 7744946836 व संत भगवान बाबा मुलांचे शासकीय वसतिगृह, मुखेड या वसतीगृहासाठी पी.एन पल्लेवाड यांचा मो. क्र. 8390474908 या संपर्क क्रमांकावर संपर्क साधावा.

0000

वृत्त क्रमांक 473

जिल्ह्यात जमावबंदी, शस्त्रबंदी आदेश लागू 

                                                                                                                                                                            नांदेड दि. 6 मे :- नांदेड जिल्ह्यात 16 मे 2025 च्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.  

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 16 मे 2025 रोजी मध्यरात्री पर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000

वृत्त क्रमांक 472

नांदेड शहरात लोडशेडींगच्या अनुषंगाने

जिल्हाधिकाऱ्यांच्या उपस्थितीत शनिवारी बैठक

विद्युत वितरण कंपनीसह संबंधित अधिकाऱ्यांनी उपस्थित राहण्याचे निर्देश

नांदेड दि. 6 मे :- नांदेड शहरातील अनेक भागात सध्या वारंवार लोडशेडींग होत आहे. या प्रकरणात अनेक तक्रारी प्राप्त झाल्या असून लोडशेडींगमुळे विद्युत पुरवठा खंडीत होण्याच्या या घटनेच्या अनुषंगाने जिल्हाधिकारी राहुल कर्डिले यांनी शनिवार 10 मे 2025 रोजी जिल्हाधिकारी कार्यालयातील त्यांच्या बैठक कक्षात सकाळी 11 वा. बैठक आयोजित केली आहे.

बैठकीस महाराष्ट्र राज्य विद्युत वितरण कंपनीचे अधीक्षक अभियंता, कार्यकारी अभियंता, विद्युत वितरण कंपनी नांदेड शहर, नांदेड ग्रामीण तसेच सर्व संबंधित अधिकारी, संबंधीत क्षेत्रीय अधिकारी यांनी अद्यावत माहितीसह उपस्थित राहावे, असे निर्देश अपर जिल्हादंडाधिकारी नांदेड यांनी दिले आहेत.

00000

 विभागीय आयुक्त दिलीप गावडे साधणार विभागातील दिव्यांगांशी संवाद

दिव्यांग बांधवानी सहभागी होण्याचे आवाहन

छत्रपती संभाजीनगर, दि.02 (विमाका) : मराठवाडा विभागातील गरजू दिव्यांग यांच्या आज पर्यंत प्रलबिंत असलेल्या मागण्या सोडविण्यासाठी शासन निर्णयाच्या  अधिन राहून व दिव्यांग व्यक्ती  अधिकार अधिनियम 2016 बाबत विभागीय आयुक्त दिलीप गावडे हे विभागातील दिव्यांगाशी 7 मे 2025 रोजी दुपारी 4 ते 6 या वेळेत ऑनलाईन वेबिनारद्वारे थेट संवाद साधणार आहे. तरी विभागातील दिव्यांगांनी संवादात सहभागी व्हावे, असे आवाहन प्रशासनाकडून करण्यात आले आहे. 

दिव्यांग व्यक्तीच्या प्रलंबित मागण्याचे निराकरण करण्याबाबत

Wednesday May 7, 16:00 - 18:00

https://us06web.zoom.us/j/81648347485?pwd=WjeVo2SFzOdWv8jkZLjyyNvAWBYDn0.1

Meeting ID: 816 4834 7485

Passcode: 173110

वृत्त क्रमांक 471

भू-प्रमाण केंद्रात मिळणार एकत्रित विविध सेवांचा लाभ 

आता ई-मोजणी अर्ज ऑनलाईन करता येणार 

                                                                                                                                                                    नांदेड दि. 6 मे :- उप अधीक्षक भूमि अभिलेख नांदेड या कार्यालयात भू-प्रमाण केंद्र 11 एप्रिल 2025 पासून सुरु करण्यात आले आहे. या भू-प्रमाण केंद्रात एका छताखाली नागरिकांना अनेक सेवांचा लाभ मिळणार असून, या विविध प्रकारच्या सेवांचा नागरिकांनी लाभ घ्यावा, असे आवाहन उप अधीक्षक भूमि अभिलेख बळवंत मस्के यांनी केले आहे.                                                                                                                                                                             उप अधीक्षक भूमि अभिलेख नांदेड या कार्यालयात भू-प्रमाण केंद्राअंतर्गत नागरिकांना ई-मोजणी अर्ज ऑनलाईन करण्याची सुविधा निर्माण करण्यात आली आहे. तसेच ईप्सीत अंतर्गत फेरफार अर्ज सुध्दा करण्यासाठी सुविधा आहे.                                                                                                                                                                             तसेच सर्व प्रकारच्या नकला या केंद्रामार्फत उपलब्ध होणार आहेत. यामध्ये फेरफार नोंदवहीचा उतारा, परिशिष्ट-अ, परिशिष्ट-ब, नमुना 9 ची नोटीस, नमुना 12 ची नोटीस,अर्जाची पोच, रिजेक्शन पत्र, त्रुटी पत्र, निकाली पत्र, विवादग्रस्त नोंदवहीचा उतारा, डिजीटल मिळकत पत्रिका, सॉफ्ट कॉपी, अपील निर्णयाची प्रत, मुद्रण, छापील स्वरुपात अशा सर्व प्रकारच्या नकला ऑनलाईन पध्दतीने भू-प्रमाण केंद्रात उपलब्ध करुन मिळतील अशी माहिती उप अधीक्षक भूमि अभिलेख कार्यालयाने प्रसिध्दी पत्रकाद्वारे दिली आहे. 

0000