वृत्त क्र. 962 

मौजे ब्रम्हपुरी गोदावरी नदीच्या  पात्र परिसरात कलम 144

 

नांदेड, दि. 20 ऑक्टोबर :- मौजे ब्रम्हपुरी येथील गोदावरी नदी पात्र परिसरात शांतता व सुव्यवस्था अबाधीत रहावी यासाठी भारतीय नागरिक सुरक्षा संहिता 2023 चे कलम 163 नुसार नांदेड ग्रामीण पोलीस स्टेशनच्या हद्दीतील नदी पात्रातील परिसर प्रतिबंधीत क्षेत्र म्हणून 20 ऑक्टोबर 2024 रोजी सकाळी 6 वाजेपासून ते 19 नोव्हेबर 2024 चे मध्यरात्री पर्यंत घोषित करण्यात आले आहे. त्याबाबत जिल्हादंडाधिकारी कार्यालयाने आदेश निर्गमित केले आहेत.

 

भारतीय नागरिक सुरक्षा संहिता 2023 चे कलम 163 नुसार प्राप्त अधिकाराचा वापर करुन चतु:सिमा पूर्वेस वाजेगाव कोल्हापुरी बंधारा, पश्चिमेस नांदेड ते देगलूर कडे जाणाऱ्या रोडवरील जुना पूल, दक्षिणेस गोदावरीचे नदीचे पात्र आणि उत्तरेस चिल्ला/दर्गाची संरक्षण भिंत यामधील जागा 20 ऑक्टोबर  रोजी सकाळी 6 वाजेपासून ते 19 नोव्हेबर 2024 रोजीच्या मध्यरात्री पर्यंत भारतीय नागरिक सुरक्षा संहिता 2023 चे कलम 163 नुसार प्रमाणे प्रतिबंधीत क्षेत्र म्हणून जिल्हादंडाधिकारी यांनी घोषित केले आहे.

 

हा आदेश शासकीय कर्तव्यावरील अधिकारी व कर्मचारी, एक खिडकी पथकातील अधिकाऱ्यांनी परवानगी दिलेल्या भाविकांना तसेच ज्यांना जिल्हाधिकारी नांदेड व पोलीस अधीक्षक नांदेड यांनी परवानगी दिली अशा व्यक्तींना लागू राहणार नाही.

00000

 वृत्त क्र. 961

निवडणूक कालावधीत कायदा व सुव्यवस्था राखा- जिल्हाधिकारी अभिजीत राऊत

नागरिकांनी सी-व्हीजल ॲपवर तक्रारी नोंदविण्याचे आवाहन

नांदेड दि. 19 ऑक्टोबर :- नांदेड जिल्ह्यात 9 विधानसभा व लोकसभा पोटनिवडणूकीसाठी 20 नोव्हेंबर 2024 रोजी मतदान होणार आहे. यासाठी जिल्ह्यात 15 ऑक्टोबरपासून आदर्श आचारसंहिता सुरु झाली आहे. या काळात पैशाची देवाण-घेवाण, भेट वस्तु वाटप, रोख रक्कम, अंमली पदार्थ, दारु विक्री व वाहतूक अशा घटनावर नियंत्रण होण्यासाठी संबंधित यंत्रणानी काळजी घ्यावी. यादृष्टीने जिल्ह्यात एफएसटी व एसएसटी पथकांची नियुक्ती करण्यात आली आहे. या पथकांनी जास्तीत जास्त कारवाई करुन जिल्ह्यात कायदा सुव्यवस्था राखण्यावर भर द्यावा, असे निर्देश जिल्हाधिकारी तथा जिल्हा निवडणूक निर्णय अधिकारी अभिजीत राऊत यांनी दिले.

कायदा व सुव्यवस्था राखण्याबाबत आज जिल्हाधिकारी कार्यालयाच्या परिसरातील नियोजन भवन येथे आज त्यांच्या अध्यक्षतेखाली बैठक संपन्न झाली. यावेळी जिल्हा पोलीस अधिक्षक अबिनाश कुमार, जिल्हा परिषदेच्या मुख्य कार्यकारी अधिकारी मीनल करनवाल, मनपा आयुक्त डॉ. महेशकुमार डोईफोडे, निवडणूक सहाय्यक जिल्हाधिकारी मेघना कावली, अपर जिल्हाधिकारी पांडुरंग बोरगावकर, उपजिल्हाधिकारी राजकुमार माने, निवासी उपजिल्हाधिकारी महेश वडदकर, सर्व सहा. निवडणूक निर्णय अधिकारी व संबंधित विभागाचे अधिकारी आदीची उपस्थिती होती.

जिल्ह्यात विधानसभा व लोकसभा पोटनिवडणूकीची आदर्श आचारसंहिता सुरु झाली असून या कालावधीत आचारसंहितेचा भंग होणार नाही यांची काळजी सर्व विभागानी घ्यावी. निवडणूका मुक्त, निर्भय वातावरणात व प्रलोभन मुक्त होण्यासाठी सर्व सहायक निवडणूक अधिकाऱ्यांनी काळजी घ्यावी. सर्व परिस्थितीवर एसएसटी व एफएसटी पथके बारीक लक्ष ठेवून आहेत. जिल्ह्यात वाहतूक होणाऱ्या सर्व वाहनाची इएसएमएसला नोंद होईल यादृष्टीने कारवाई व्हावी. जीएसटी. आयकर. पोलीस विभागांनी पेट्रोलिंग वाढवावे. तसेच सिझरचे प्रमाण वाढवावे अशा सूचना जिल्हाधिकारी अभिजीत राऊत यांनी संबंधित यंत्रणेला दिल्या. तसेच नागरिकांनी कुठेही आचारसंहिता भंग होत असल्याचे निदर्शनास आल्यास सि-व्हीजल ॲपवर पुराव्यासह तक्रारी करण्याचे आवाहन त्यांनी केले. तसेच यापुढे सि-व्हीजल ॲपवर तक्रारी आल्यास संबंधीत विभागाने गुन्हे दाखल करण्याची कार्यवाही करावी असेही त्यांनी स्पष्ट केले.

नांदेड जिल्ह्यात 1 हजार 158 शस्त्र परवाने दिलेले आहेत. शस्त्र जमा करण्याची कारवाई प्रगती पथावर असून मागील लोकसभा निवडणूकीत 782 शस्त्र जमा करण्यात आली होती. नांदेड जिल्ह्यात 9 विधानसभा मतदार संघात ग्रामीण भागासाठी 2 हजार 265 व शहरी भागासाठी 823 असे एकूण 3 हजार 88 मतदान केंद्र असून मतदान केंद्रावर गोंधळ होवू नये यासाठी तेथील नियुक्त पोलीस कर्मचाऱ्यांनी विशेष काळजी घ्यावी. जिल्ह्यात पाच सवेदनशिल मतदान केंद्र असून या ठिकाणी शांततेत मतदान प्रक्रीया होईल यासाठी सर्वांनी सतर्क रहावे, अशा सूचना जिल्हाधिकारी यांनी दिल्या.

निवडणूक काळात सतर्क राहा: जिल्हा पोलीस अधिक्षक अबिनाश कुमार

विधानसभा व लोकसभा पोटनिवडणूक दोन्हीही निवडणूका एकत्र होत आहेत. या निवडणूक कालावधीत आपल्यावर जास्त जबाबदारी असून, उपलब्ध मनुष्य बळामध्ये ही मतदान प्रक्रिया शांततेत व सुरळीत पार पाडावयाची आहे. नांदेड जिल्हा इतर राज्याच्या सीमेला लागून असल्यामुळे एकमेकात समन्वय साधत निवडणूक कालावधीत रोख रक्कम, अंमली पदार्थ, शस्त्रास्त्र, मद्य यांची वाहतूक व विक्री होणार नाही यांची काळजी घ्यावी. नियुक्त केलेल्या विशेष पथकांनी जास्तीत जास्त दक्ष राहून कारवाया कराव्यात, असे निर्देश जिल्हा पोलीस अधिक्षक अबिनाश कुमार यांनी दिले.

स्वीप मार्फत मतदार जनजागृतीवर भर: मीनल करनवाल

नांदेड जिल्ह्यात 9 विधानसभा व लोकसभा पोटनिवडणूकीसाठी मतदान 20 नोव्हेंबर 2024 रोजी होत आहे. या निवडणूकीत जास्तीत जास्त मतदारांनी मतदान करावे यासाठी स्वीपमार्फत जनजागृती कार्यक्रम सुरु केले आहेत. यावेळी मतदानाचे जास्तीत जास्त उदिष्ट गाठण्यासाठी स्वीप मार्फत जनजागृती कार्यक्रमाचे नियोजन करण्यात आल्याची माहिती जिल्हा परिषदेच्या मुख्य कार्यकारी अधिकारी मीनल करनवाल यांनी सांगितले.

0000

#विधानसभानिवडणूक२०२४

वृत्त क्र. 961 October 19, 2024

 नांदेड क्रीडा संकुलात राज्यस्तरीय शालेय धनुर्विद्या क्रीडा स्पर्धेचे शानदार उदघाटन

#नांदेड दि. १९ ऑक्टोबर :- नांदेड येथील श्री गुरुगोबिंदसिंघजी क्रीडा संकुलामध्ये आजपासून राज्यस्तरीय शालेय धनुर्विद्या क्रीडा स्पर्धेचा शानदार शुभारंभ करण्यात आला.नांदेडच्या जिल्हा क्रीडा संकुलात या संदर्भातील अद्यावत सेवा उपलब्ध करण्यात आल्या असून जिल्ह्याच्या यजमानपदामध्ये आज याचा प्रारंभ झाला.

आयुक्त, क्रीडा व युवक सेवा संचालनालय, महाराष्ट्र राज्य,पुणे अंतर्गत जिल्हा क्रीडा अधिकारी कार्यालय, नांदेड, जिल्हा क्रीडा परिषद,नांदेड संयुक्त विद्यमाने व नांदेड जिल्हा आर्चरी (धनुर्विद्या )असोसिएशन यांचे सहकार्याने चालू असलेल्या राज्यस्तरीय शालेय आर्चरी 14,17,19 वर्षे मुले-मुली . क्रीडा स्पर्धेचे आयोजन 18 ते 21 ऑक्टोबर, 2024 या कालावधीत श्री गुरुगोबिंदसिंघजी स्टेडीयम, नांदेड येथे संपन्न होत आहे. या स्पर्धेचे उदघाटन आज दि. 19 ऑक्टोंबर,2024 रोजी सकाळी 10.00 वा आयुक्त, नांदेड वाघाळा शहर महानगरपालिका, नांदेड. महेशकुमार डोईफोडे यांचे शुभहस्ते करण्यात आले.

याप्रसंगी प्रमुख पाहुणे म्हणुन विजय संतान (उपसंचालक, क्रीडा व युवक सेवा, अमरावती विभाग व प्राचार्य,आर्चरी प्रबोधिनी, मिशन लक्षवेध, महाराष्ट्र राज्य), संतोष झगडे (अधीक्षक, एक्साईज विभाग, छ.संभाजीनगर),जयकुमार टेंभरे (जिल्हा क्रीडा अधिकारी,नांदेड), प्रमोद चांदुरकर (सचिव, महाराष्ट्र आर्चरी असोसिएशन), श्रीमती वृषाली पाटील जोगदंड (सचिव, नांदेड जिल्हा आर्चरी असोसिएशन), श्रीनिवास भुसेवार (आर्चरी संघटना प्रतिनिधी) श्रीमती लता उमरेकर (आंतरराष्ट्रीय बॅडमिंटन खेळाडू (दिव्यांग), अनूराग कमल, भारतीय आंतरराष्ट्रीय धनुर्विद्या प्रशिक्षक, आंतरराष्ट्रीय धनुर्विद्या प्रशिक्षक मेजर चंद्रकांत ईलग (बुलढाणा), प्रवीण सावंत (सातारा),अभिजीत दळवी (अहमदनगर), कुनाल ठावरे (पिंपरी चिंचवड), दिपक चिकणे (सोलापूर), अमर जाधव, क्रीडा मार्गदर्शक तथा आंतरराष्ट्रीय धनुर्विद्या प्रशिक्षक, अमरावती, पवन तोबट (अमरावती), प्रफुल्ल डांगे क्रीडा अधिकारी तथा आंतरराष्ट्रीय धनुर्विद्या प्रशिक्षक, अमरावती,रंजीत चामले (शिवछत्रपती पुरस्कार प्राप्त तथा आंतरराष्ट्रीय धनुर्विद्या प्रशिक्षक), मा. डॉ. शुभांगी अभिजीत दळवी (शिवछत्रपती पुरस्कार प्राप्त तथा क्रीडा अधिकारी- अहमदनगर) व आंतरराष्ट्रीय धनुर्विद्या खेळाडू ज्ञानेश बालाजी चेरले-(नांदेड), सरदार तेजविंदरसिंघ जहागीरदार (नांदेड), शर्वरी शंडे (पुणे), मानव जाधव-(अमरावती), प्रितीका प्रदीप, आंतरराष्ट्रीय धनुर्विद्या खेळाडू, वैष्णवी पवार- (लातूर), साईराज हालमे- (सोलापूर), वैष्णवी पाटील (आंतरराष्ट्रीय धनुर्विद्या खेळाडू), बालाजी पाटील जोगदंड (संघटना प्रतिनिधी) आदि मान्यवर उपस्थित होते. स्वीप कार्यक्रम अंतर्गत कार्यक्रमाच्या सुरुवातीस 18 वर्षे पुर्ण झालेल्या सर्व खेळाडूंना व नविन मतदाराना मतदान करण्याविषयी शपथ देण्यात आली.

उदघाटन कार्यक्रम प्रसंगी महेशकुमार डोईफोडे म्हणाले की, शालेय जिवनात खेळ हा अतिशय महत्वाचा घटक असुन खेळाडूंनी शिक्षणासोबत क्रीडा क्षेत्रातही उल्लेखणीय कार्य करुन आपले करीयर घडवावे असे सांगीतले. क्रीडा विषयक बाबीकरीता जिल्हा क्रीडा अधिकारी कार्यालयास महानगरपालिकेच्या वतीने भरभरुन सहकार्य करण्यात येईल असे सांगीतले. तसेच विजय संतान (उपसंचालक, क्रीडा व युवक सेवा, अमरावती विभाग व प्राचार्य,आर्चरी प्रबोधिनी, मिशन लक्षवेध, महाराष्ट्र राज्य), यांनी म्हणाले की, मिशन लक्षवेध कार्यक्रम अंतर्गत प्रत्येक खेळाडूंनी नोंदणी करणे आवश्यक असून त्यांना शासनामार्फत विविध क्रीडा विषयक सुविधा उपलब्ध करुन देण्याचा शासनाचा मानस असल्याचे सांगीतले.

या कार्यक्रमाचे प्रस्तावीकात जयकुमार टेंभरे यांनी सांगीतले की, या स्पर्धेत महाराष्ट्र राज्यातील विविध विभागातून खेळाडू मुले-मुली मोठयाप्रमाण सहभागी झाले असून यामध्ये निवडलेले खेळाडू नाडीयाड खेडा, गुजरात येथे माहे नोव्हेंबर, 2024 मध्ये संपन्न होणा-या राष्ट्रीय स्पर्धेकरीता महाराष्ट्र राज्याच्या संघाचे प्रतिनिधीत्व करणार असल्याचे सांगीतले.

या कार्यक्रमाचे सुत्र संचलन प्रलोभ कुलकर्णी यांनी केले तर आभार प्रदर्शन श्री.राहुल श्रीरामवार (क्रीडा अधिकारी) यांनी केले.

सदर स्पर्धा यशस्वी करणेसाठी मा.जयकुमार टेंभरे, जिल्हा क्रीडा अधिकारी यांचे मार्गदर्शनाखाली श्री. चंद्रप्रकाश होनवडजकर (राज्य क्रीडा मार्गदर्शक तथा कार्यासन), क्रीडा अधिकारी श्री. संजय बेतीवार, श्री. राहुल श्रीरामवार, राज्य क्रीडा मार्गदर्शक श्री.बालाजी शिरसीकर, श्रीमती शिवकांता देशमुख, वरिष्ठ लिपीक श्री.संतोष कनकावार, व्यवस्थापक संजय चव्हाण, आनंद जोंधळे, हनमंत नरवाडे, आकाश भोरे, मोहन पवार, सुभाष धोंगडे, शेख इकरम, विद्यानंद भालेराव, चंद्रकांत गव्हाणे, सोनबा ओव्हाळ, यश कांबळे व आर्चरी असोसिएशनचे पदाधिकारी व खेळाडू आदिनी सहकार्य करीत आहेत.

सदर स्पर्धा श्री गुरुगोबिंदसिंघजी स्टेडीयम,नांदेड येथे आयोजीत करण्यात आले असून या स्पर्धेचा जास्तीत जास्त खेळाडूं, क्रीडाप्रेमी यांनी आनंद घ्यावा, असे आवाहन जिल्हा क्रीडा अधिकारी श्री. जयकुमार टेंभरे यांनी केले आहे.

--------

लक्षवेध/तातडीचे

 विधानसभा/ लोकसभा मतदान व मतमोजणी पासेसबाबत

नांदेड विधानसभा व लोकसभा पोटनिवडणुकीसाठी मतदान व मतमोजणीसाठी ज्या माध्यम प्रतिनिधीना ( फक्त प्रिन्ट व सॅटेलाईट न्यूज चॅनेल्सचे प्रतिनिधी ) प्राधिकार पत्र हवे असतील त्यांनी तीन अधिक तीन अशी एकूण  सहा छायाचित्र देणे आवश्यक आहे.

तसेच यासोबत विहित नमुना देण्यात येत आहे. त्या विहित नमुन्यात प्राधिकार पत्र द्यावयाच्या व्यक्तीचे नाव, पदनाम, व संबंधित वृत्त संस्थेचे नाव व पत्ता आहे. मराठी व इंग्रजी या दोन्ही भाषेत नमूद करावे . छायाचित्राच्या झेरॉक्स प्रति स्वीकारल्या जाणार नाहीत, याची कृपया नोंद घ्यावी .सदर माहिती संपादकाच्या लेटरहेडवर सही व शिक्का भरून कार्यालयास २१ ऑक्टोंबर २०२४ रोजी सोमवारी संध्याकाळी सात वाजेपर्यंत कार्यालयात जमा करावेत.त्यानंतर आलेल्या विनंती अर्जाचा विचार केला जाणार नाही.

 ( कृपया पोर्टल, युट्युब चॅनेल, वेबसाईट, व अन्य समाज माध्यमांमध्ये काम करणाऱ्यांनी प्रवेशिकासाठी आग्रही असू नये. मर्यादित पासेस बनवायच्या असल्याने, कृपया सहकार्य करावे )

प्रवीण टाके

जिल्हा माहिती अधिकारी, नांदेड