वृत्त क्र. 1195 

ऊस तोडणीसाठी पैशांची मागणी केल्यास होणार कारवाई  : आयुक्त (साखर) डॉ. कुणाल खेमनार

 

नांदेड दि. 13 डिसेंबर :- ऊस उत्पादक शेतकऱ्यांची ऊस तोडणी मजूर, मुकादम, वाहतुकदार यांच्याकडून आर्थिक पिळवणूक होत असल्याच्या तक्रारी चालू गाळप हंगामात येणार नाही याची कार्यकारी संचालक व खाजगी साखर कारखान्यांच्या जनरल मॅनेजर, मुख्य कार्यकारी अधिकारी यांनी दक्षता घ्यावी, असे निर्देश पुणे येथील आयुक्त (साखर) डॉ. कुणाल खेमनार यांनी परिपत्रकाद्वारे दिले आहेत.

 

ऊस तोडणी मजूर व मुकादम, वाहतूक कंत्राटदार यांच्याकडून ऊस तोडणी करताना, ऊस पिक चांगले नाही, ऊस खराब आहे, ऊस पडलेला आहे, ऊस क्षेत्र अडचणीचे आहे, तोडणी करणे परवडत नाही अशी विविध कारणे सांगून ऊस तोडणीसाठी शेतकऱ्यांकडून रोख पैशांची व अन्य वस्तू / सेवा यांची मागणी केली जाते. ऊस तोडणी मजूर व मुकादम यांच्या मागणीप्रमाणे शेतकऱ्यांनी पैसे दिले नाही तर ऊस तोडणीस टाळाटाळ केली जाते / ऊस योग्य प्रकारे तोडला गेला नाही अशा प्रकारच्या आर्थिक पिळवणूकीच्या तक्रारी ऊस उत्पादक शेतकऱ्यांकडून वारंवार होत आहेत.

 

राज्यात चालू 2024-25 गाळप हंगामात उपलब्ध असलेला सर्व ऊस सर्वसाधारणपणे 145-150 दिवसांत गाळप होईल एवढी साखर कारखान्यांची स्थापित गाळप क्षमता वाढली असल्याने शेतकऱ्यांनी आपला ऊस गाळप होईल की नाही याबाबत शंका घेऊन ऊस लवकर गाळपास जावा याकरिता अनुचित मार्गाचा अवलंब करू नये. प्रादेशिक सह संचालक (साखर) व साखर आयुक्त कार्यालयाचे स्तरावरही ऊस गाळपाच्या संदर्भात नियमितपणे आढावा घेतला जाणार असून कोणत्याही ऊस उत्पादक शेतकऱ्याचा ऊस शिल्लक राहणार नाही याचे नियोजन करण्यात येत आहे.

 

शेतकऱ्यांची आर्थिक पिळवणूक रोखण्यासाठी सर्व कारखान्यांनी जाहीर प्रकटन करून अशा प्रकरणातील गैरव्यवहाराला आळा बसेल असे पाहावे. तसेच ऊस उत्पादक शेतकऱ्यांना तक्रार करण्यासाठी मोबाईल फोन, व्हाट्सअँप क्रमांक जारी करावा व याबाबतची माहिती शेतकऱ्यांना वेळोवेळी देण्यात यावी. सर्व सहकारी साखर कारखान्यांच्या कार्यकारी संचालक व खाजगी साखर कारखान्यांच्या जनरल मॅनेजर, मुख्य कार्यकारी अधिकारी यांना प्राप्त तक्रारींचे निवारण करण्यासाठी पुढील प्रमाणे सूचना देण्यात आल्या आहेत.

 

अशा स्वरुपाच्या प्राप्त तक्रारींचे निराकरण करण्यासाठी कारखान्यांनी तक्रार निवारण अधिकारी म्हणून शेती विभागाच्या वरिष्ठ अधिकाऱ्यांची नेमणुक करावी. सदर तक्रारनिवारण अधिकारी यांचे नाव, संपर्क मोबाईल नंबर याची माहिती कार्यक्षेत्रातील व कार्यक्षेत्राबाहेरील ऊस तोडणी होत असलेल्या गावांमध्ये कारखान्याच्या गटऑफिसवर व ग्रामपंचायतीच्या सूचना फलकावर प्रसिद्ध करावी. याबाबतची व्यापक प्रसिद्धी सर्व प्रसिद्धी माध्यमांद्वारे शेतकऱ्यांपर्यंत पोहोचवावी. शेतकऱ्यांनी लेखी स्वरूपात अशी तक्रार साखर कारखान्याकडे परिशिष्ट-अ मधील नमुन्यात घटना घडल्यावर लगेच करावी व त्याची पोहच घ्यावी. या कामाकरिता नेमलेल्या वरिष्ठ अधिकाऱ्यांनी सदर तक्रारीचे निवारण सात दिवसात करावे.

 

तक्रारीमध्ये तथ्य आढळून आल्यास कार्यकारी संचालक, जनरल मॅनेजर यांनी सदरची रक्कम मजूर, मुकादम, वाहतुक कंत्राटदार यांचे बिलातून वसूल करून संबंधित शेतकऱ्यांना अदा करावी.  सदर तक्रारीचे निवारण कारखान्याकडून न झाल्यास नांदेड, लातूर, परभणी, हिंगोली जिल्ह्यातील ऊस उत्पादक शेतकऱ्यांनी संबंधित प्रादेशिक सहसंचालक (साखर) यांच्याकडे प्रादेशिक सहसंचालक (साखर) नांदेड यांचा rjdsnanded@rediffmail.com ईमेलवर तक्रार करावी व प्रादेशिक सहसंचालक (साखर) यांनी सत्यता पडताळून प्राप्त तक्रारीचे निवारण करावे, असेही परिपत्रकात नमूद केले आहे.

000

नांदेड जिल्हा पोलिस दला मार्फत जाहीर आवाहन.

#NandedPolice #DGPMaharashtra

 

 वृत्त क्र. 1194

 महाराष्ट्र राज्य दिव्यांगत्व संशोधन समितीत

अशासकीय सदस्यांच्या नियुक्तीसाठी माहिती सादर करण्याचे आवाहन

 

नांदेड दि. 13 डिसेंबर :- महाराष्ट्र राज्य दिव्यांगत्व संशोधन समितीसाठी अशासकीय सदस्यांची नावे शिफारशीसह सादर करण्यात येणार आहेत. दिव्यांग क्षेत्रात कार्यरत नामवंत व तज्ज्ञ व्यक्ती, दिव्यांग व्यक्ती, दिव्यांग व्यक्ती व दिव्यांगांच्या स्वयंसेवी संस्थांचे प्रतिनिधीत्व करणारे दिव्यांग पदाधिकारी व सदस्य यांनी समाज कल्याण विभाग जिल्हा परिषद नांदेड या कार्यालयात सोमवार 16 डिसेंबर 2024 पर्यंत पोष्टाने किंवा समक्ष उपस्थित राहुन माहिती सादर करावी, असे आवाहन  जिल्हा परिषदेचे जिल्हा समाज कल्याण अधिकारी सतेंद्र आऊलवार यांनी केले आहे.

 

दिव्यांग व्यक्ती हक्क अधिनियम 2016 उपकलम 2 (2) व महाराष्ट्र शासन राजपत्र असाधारण भाग चार अ दिनांक 5 सप्टेंबर 2024 मधील प्रकरणे 2 (3) मध्ये (ग) अन्वये महाराष्ट्र राज्य दिव्यांगत्व संशोधन समितीवर नियुक्तीसाठी अशासकीय सदस्य म्हणून राज्य शासनाने दिव्यांग व्यक्तीमधून सदस्य म्हणून नामनिर्देशित केलेल्या 7 व्यक्ती किंवा अधिनियमाच्या कलम 2 च्या कलम (झेड) अंतर्गत परिभाषित केल्यानुसार नोंदणीकृत संस्थेचे प्रतिनिधित्व करणारे सदस्य म्हणून समावेश केलेला आहे. त्यानुसार सदर समितीमध्ये अशासकीय सदस्यांची राज्य शासनामार्फत नियुक्ती होणे आवश्यक आहे. याबाबत महाराष्ट्र राज्य दिव्यांगत्व संशोधन समिती करीता अशासकीय सदस्य म्हणून नावे पुढीलप्रमाणे विहित तक्त्यात सादर करावेत, असे आवाहन जिल्हा समाज कल्याण अधिकारी

 

नामनिर्देशित बाब : राज्य शासनाने दिव्यांग व्यक्ती मधून सदस्य म्हणून नामनिर्देशित केलेल्या सात व्यक्ती किंवा अधिनियमाच्या कलम 2 च्या कलम (झेड) अंतर्गत परिभाषित केल्यानुसार नोंदणीकृत संस्थाचे प्रतिनिधीत्व करणारे सदस्य. सदस्य संख्या : 7, शिफारस केलेल्या नामनिर्देशित सदस्यांचे नाव, पत्ता, संपर्काचा क्रमांक व ईमेल. शिफारस केलेल्या नामनिर्देशित सदस्यांची संपूर्ण वैयक्तिक माहिती, शिफारस केलेल्या नामनिर्देशित सदस्यांच्या उल्लेखनीय कार्य केल्याची कामगिरी ही माहिती सादर करावी, असेही प्रसिद्धी पत्रकात नमूद केले आहे.

000

 कृपया सुधारित वृत्त क्र. 1193 

जिल्हा वार्षिक योजनेचा आढावा

नियोजित कामे संबंधित यंत्रणांनी तातडीने पुर्ण करावे

- जिल्हाधिकारी अभिजीत राऊत

 

नांदेड, दि. 13 डिसेंबर :-  जिल्हा वार्षिक योजनेचा मंजूर निधी विविध विकास कामांवर खर्च करुन नियोजित कामे संबंधित यंत्रणानी तात्काळ पुर्ण करण्याचे निर्देश जिल्हाधिकारी अभिजीत राऊत यांनी  दिले.

 

जिल्हा वार्षिक योजना (सर्वसाधारण), जिल्हा वार्षिक अनुसूचित जाती उपयोजनेची आढावा बैठक जिल्हा नियोजन समितीच्या सभागृहात जिल्हाधिकारी यांच्या अध्यक्षतेखाली झाली. त्यावेळी ते बोलत होते. यावेळी अतिरिक्त मुख्य कार्यकारी अधिकारी संदिपकुमार माळोदे, समाज कल्याणचे सहायक आयुक्त शिवानंद मिनगिरे, जिल्हा नियोजन अधिकारी सुधाकर आडे यांच्यासह संबंधित विभागाच्या विभागप्रमुखाची उपस्थित होती.

 

जिल्हाधिकारी पुढे म्हणाले की, संबंधित यंत्रणानी तांत्रिक व प्रशासकीय मान्यतेची कार्यवाही तात्काळ पूर्ण करुन विकास कामे सुरु करावीत. सदरची मंजूर कामे तातडीने देऊन पूर्ण करण्याच्या सूचना दिल्या. तसेच सन 2025-26 चा आराखडा प्रारुप आराखडा आयपास प्रणालीवर भरुन सादर करण्याच्या सूचना केल्या. मंजूर संपूर्ण निधीचा विनीयोग करुन निधी परत जाता कामा नये, याची खबरदारी घ्यावी. तसेच मागील वर्षीची प्रलंबित कामे तात्काळ पूर्ण करण्याबाबत जिल्हाधिकारी यांनी निर्देश दिले.

00000

 वृत्त क्र. 1192 

जप्त रेतीसाठ्याचा नायगाव (खै.) येथे बुधवारी लिलाव

 

नांदेड दि. 13 डिसेंबर :- नायगाव (खै.) तालुक्यातील मौ. मेळगाव, सांवगी, धनज परिसरातील सन 2019-2020 मधील 4304.98 ब्रास तसेच सन 2019 मधील मौ. ईज्जतगाव (बु.) येथील 700.00 ब्रास असे एकुण 5004.98 ब्रास अवैध उत्खननातून जप्त करण्यात आले होते. या रेतीसाठ्याचा लिलाव 600 रुपये या दराने उपविभागीय अधिकारी बिलोली यांच्या अध्यक्षतेखाली तहसिल कार्यालय नायगांव (खै.) येथे बुधवार 18 डिसेंबर 2024 रोजी सकाळी 11.30 वा. ठेवण्यात आला आहे. लिलावात भाग घेऊ इच्छिणाऱ्या व्यक्तींनी यात भाग घ्यावे. लिलावाच्या अटी व शर्ती तहसिल कार्यालय नायगांव (खै.) च्या नोटिस बोर्डवर प्रसिद्ध करण्यात आले आहे, असे तहसिलदार नायगांव (खै.) यांनी प्रसिद्धी पत्रकाद्वारे कळविले आहे.

0000

वृत्त क्र. 1191

 

राष्ट्रीय ऊर्जा संवर्धन दिन व सप्ताह साजरा करण्याचे निर्देश  

 

नांदेड दि. 13 डिसेंबर :- राष्ट्रीय ऊर्जा संवर्धन दिन 14 डिसेंबर आणि ऊर्जा संवर्धन सप्ताह 14 ते 20 डिसेंबर या कालावधीत साजरा करण्याचे निर्देश जिल्हा प्रशासनाने जिल्ह्यातील सर्व कार्यालयाना दिले आहेत. 

 

ऊर्जा संवर्धन दिन व सप्ताह साजरा करतांना ऊर्जा संवर्धनाची प्रतिज्ञा द्यावी. तसेच विविध प्रसिद्धीमाध्यमातून जनजागृती, शालेय स्तरावर ऊर्जा संवर्धन विषयांतर्गत निबंध, चित्रकला स्पर्धेचे आयोजन करावे. ऊर्जा संवर्धन कायद्यातर्गंत उद्योगक्षेत्रातील पथनिर्देशित ग्राहकांकडून हा आठवडा साजरा करण्यात येणार आहे. तसेच या आठवड्या दरम्यान विविध क्षेत्रासाठी जनजागृतीपर कार्यक्रमांचे उपक्रम राबवून ऊर्जा दिन व सप्ताह साजरा करण्याच्याही सूचना जिल्हा प्रशासनाच्यावतीने दिल्या आहेत.

0000

 वृत्त क्र. 1190

नांदेड जिल्‍हयात सोमवार पासून  ॲग्रिस्टॅक मोहिमेस सुरुवात

१६ तालुक्‍यात लोकप्रतिनिधींच्‍या - वरीष्‍ठ अधिकारी यांच्‍या उपस्थितीत एकाच वेळी उदघाटन

नांदेड दि. 13 डिसेंबर : कृषि क्षेत्रात डिजीटल सेवांचा वापर करुन शासनाच्या विविध योजनांचा जलदगतीने व परिणामकारकरित्या लाभ देणे सुलभ व्हावे यासाठी राज्यात ॲग्रिस्टॅक योजना राबविण्यात येत आहे. या योजनेअंतर्गत प्रत्येक गावात सर्व शेतकऱ्यांचे शेतकरी ओळख क्रमांक (फार्मर आयडी) तयार करण्यात येत आहेत. नांदेड जिल्ह्यात यासाठी 16 डिसेंबरपासून मोहिम राबविण्यात येत आहे. तरी जिल्ह्यातील शेतकऱ्यांनी मोहिमेच्या दिवशी उपस्थित राहून आपला शेतकरी ओळख क्रमांक प्राप्त करुन घ्यावा, असे आवाहन जिल्हाधिकारी अभिजीत राऊत यांनी केले आहे. 

शेतकरी ओळख क्रमांकामुळे शेतकऱ्यांना पीएम किसान ,पीककर्ज , पीक विमा, शेतीअनुदान इत्‍यादी विविध योजनांचा लाभ सुलभतेने मिळवता येणार आहे. सोमवार १६ डिसेंबर २०२४ रोजी जिल्‍हा भरात या मोहिमेस सुरुवात होणार आहे. प्रत्‍येक तालुक्‍यातील एका गावात स्‍थानिक लोकप्रतिनिधी, प्रभावशाली व्‍यक्‍ती व संबंधीत उपविभागीय अधिकारी, तहसिलदार, गटविकास अधिकारी, तालुका कृषी अधिकारी, उपाधिक्षक भूमि अभिलेख व त्‍यांचे अधिनस्‍त कर्मचारी उपस्थित राहणार आहेत. 

या योजनेच्‍या प्रभावी अंमलबजावणीसाठी गावनिहाय पथकांची निर्मिती करण्‍यात आली आहे. यात ग्राम महसूल अधिकारी (तलाठी) आणि ग्रामविकास अधिकारी (ग्रामसेवक)/ कृषी सहायक यांचा समावेश आहे. हे पथक त्‍यांना नेमून दिलेल्‍या गावांमध्‍ये तीन दिवस निवासी राहून अॅग्रीस्‍टॅक योजनेची प्रचार व प्रसिध्‍दी करेल आणि जास्‍तीत जास्‍त शेतकरी ओळख क्रमांक तयार करण्‍याची कार्यवाही पुर्ण करेल.

तरी शेतकऱ्यांनी शासकीय योजनांचे लाभ प्राप्त करुन घेण्यासाठी आपल्या गावात मोहिमेच्या दिवशी शेतकरी ओळख क्रमांक प्राप्त करुन घ्यावा, असे आवाहन जिल्हा प्रशासनाने केले आहे. 

तालुका निहाय पुढील गावात दिनांक १६.१२.२०२४ रोजी होणार ॲग्रिस्टॅकमोहिमेचे उद्धाटन. नांदेड तालुका दर्यापूर, किनवट- इस्‍लापूर, माहूर- सावरखेड, हिमायतनगर- करंजी, अर्धापूर- पार्डी म., मुदखेड- नागेली, भोकर- पोमनाळ, उमरी- करकाळा, धर्माबाद- नेरली, बिलोली- कोटग्‍याळ, नायगाव- शेळगाव, लोहा- कलंबर खु., कंधार- करताळा, मुखेड- दापका गुं. देगलूर- लख्‍खा व हदगाव तालुक्‍यातील तालंग.

॰॰॰॰॰