वृत्त क्र. 519   

26 जून रोजी सकाळी 8 वाजता समता दिंडीचे आयोजन

·         विद्यार्थी व नागरिकांनी मोठया संख्येने समता दिंडीत सहभागी व्हावे

नांदेड दि. 24 :- सामाजिक न्याय विभागामार्फत राजर्षी छत्रपती शाहू महाराज यांचा जन्मदिन 26 जून हा सामाजिक न्याय दिन म्हणून साजरा करण्याबाबत शासनाने आदेशित केलेले आहे. त्याअनुषंगाने समाज कल्याण कार्यालयामार्फत सामाजिक न्याय दिवस साजरा करण्यात येत असून सामाजिक न्याय दिनानिमित्त 26 जून रोजी सकाळी 8 वाजता समता दिंडीचे आयोजन करण्यात आले आहे. नांदेड जिल्ह्यातील महाविद्यालयीन व शाळेतील विद्यार्थ्यांनी व नागरिकांनी या समता दिंडीत मोठया संख्येने सहभाग घ्यावा, असे आवाहन समाज कल्याण विभागाचे सहाय्यक आयुक्त शिवानंद मिनगिरे यांनी केले आहे.

महात्मा ज्योतिबा फुले यांच्या पुतळयास मान्यवरांच्या हस्ते पुष्पहार अर्पण करुन समता दिंडीची सुरवात होईल. या समता दिंडीचा मार्ग महात्मा ज्योतिबा फुले पुतळा स्नेहनगर ते राजर्षी छत्रपती शाहू महाराज पुतळा असा आहे. राजर्षी छत्रपती शाहू महाराज पुतळा येथे दिंडीचा समारोप होईल. या समता दिंडीमध्ये नांदेड जिल्ह्यातील महाविद्यालयीन व शाळेतील विद्यार्थ्यांनी उर्त्स्फूत सहभाग घ्यावा, असे आवाहन समाज कल्याण विभागाच्यावतीने करण्यात आले आहे.   

00000 

   वृत्त क्र. 518

इयत्ता दहावी व बारावी परीक्षेचे अतिविलंब शुल्काने आवेदनपत्र भरण्यास मुदतवाढ

नांदेड दि. 24 :-जुलै-ऑगस्ट 2024 मध्ये होणाऱ्या माध्यमिक शालांत प्रमाणपत्र (इ. 10 वी ) व उच्च माध्यमिक प्रमाणपत्र (इ.12 वी) पुरवणी परीक्षेस प्रविष्ठ होणाऱ्या विद्यार्थ्यांची नियमित व विलंब शुल्कासह परीक्षेची आवेदनपत्र ऑनलाईन स्वीकारण्याची मुदत 17 जून 2024 होती.  आता आवेदन पत्र सादर करण्याची विलंब शुल्काची निर्धारित मुदत संपल्यानंतर अतिविलंब/विशेष अतिविलंब/अतिविशेष अतिविलंब शुल्क आकारून आवेदनपत्र स्विकारण्याच्या तारखांना मुदतवाढ दिली आहे.

इयत्ता दहावी व बारावीच्या परीक्षेसाठी अतिविलंब शुल्क अंतिम मुदत रु. 50 प्रतिदिन प्रतिविद्यार्थी याप्रमाणे आहे. सोमवार 24 जून ते 1 जुलै 2024 असा आहे. विशेष अतिविलंब शुल्क अंतिम मुदत प्रतिदिन 100 रुपये प्रतिविद्यार्थी असून मंगळवार 2 जुलै ते 8 जुलै 2024 पर्यत आहे. अति विशेष अतिविलंब शुल्क अंतिम मुदत 200 रुपये प्रतिदिन, प्रतिविद्यार्थी याप्रमाणे असून मंगळवार 9 जुलै ते सोमवार 15 जुलै 2024 पर्यत आहे. आवेदनपत्र कनिष्ठ महाविद्यालयाने ऑनलाईन पध्दतीने www.mahahsscboard.in या संकेतस्थळावर भरावयाची आहेत. त्यानंतर विद्यार्थी व प्राचार्य मुख्याध्यापक यांच्या स्वाक्षरीसह आवेदनपत्राची  प्रिंट आऊट व आवेदनपत्र जमा करण्याच्या दिवसांपर्यतचे अतिविलंब/विशेष अतिविलंब/अति विशेष अतिविलंब शुल्क घेण्यात यावे. हे शुल्क मंडळाकडे प्राप्त झाल्यानंतरचे अर्ज ग्राह्य धरण्यात येईल.

प्रचलि‍त पध्दतीप्रमाणे विशेष अतिविलंब शुल्कासह आवेदनपत्रे स्विकारण्याच्या तारखा व सर्व सूचनांचे परिपत्रक संबंधित माध्यमिक व उच्च माध्यमिक शाळा प्रमुखांना सोबतच्या नमुन्याप्रमाणे (परिशिष्ट अ) विहित प्रपत्रासह पाठविण्यात यावे. तसेच अतिविलंब/विशेष अतिविलंब/अति विशेष अति विलंब शुल्कासह आवेदनपत्र स्विकारावी.

अशा विद्यार्थ्यांना विभागीय मंडळ निश्चित करेल त्याच परीक्षा केंद्रावर परीक्षा द्यावी लागेल. तसेच त्याचा निकाल इतर विद्यार्थ्यांबरोबर जाहीर होवू शकला नाही तरी विद्यार्थी त्यास हरकत घेऊ शकनार नाही असे विद्यार्थ्याकडून हमीपत्र घेण्यात यावे. ही बाब माध्यमिक शाळा व कनिष्ठ महाविद्यालयामार्फत विद्यार्थ्यांना सूचित करावी .

राज्य मंडळ कार्यालयाकडून अतिविलंब /विशेष अतिविलंब /अति विशेष अतिविलंब शुल्कासह आवेदनपत्र स्विकारण्याची मंजुरी 15 जुलै 2024 पर्यत घेण्यात यावी. तसेच राज्यमंडळ कार्यालयाकडून परीक्षा सुरु होण्यापूर्वी मान्यता देणे शक्य होईल अशा बेताने आवेनदन पत्रांचे तक्ते राज्यमंडळाकडे सादर करावेत. कोणताही विद्यार्थी परीक्षेपासून वंचित राहणार नाही याची दक्षता घ्यावी असे आवाहन राज्यमंडळाच्या सचिव अनुराधा ओक यांनी केले आहे.

0000 

  वृत्त क्र. 517

बारावी विज्ञान उत्तीर्ण विद्यार्थी आणि पालकांसाठी अभियांत्रिकी प्रवेशासाठी मार्गदर्शन

नांदेड दि. 24 :- श्री गुरु गोबिंद सिंघजी इन्स्टिट्यूट ऑफ इंजिनिअरिंग अँड टेक्नालॉजी विष्णुपूरी नांदेड यांच्या तर्फे बारावी उर्त्तीण विद्यार्थी व त्यांच्या पालकांसाठी स्कूल कनेक्ट (NEP कनेक्ट) 2024 कार्यक्रमाचे आयोजन बुधवार 26 जून 2024 रोजी सकाळी 11 वाजता कुसुम सभागृह, व्हीआयपी रोड, नांदेड येथे करण्यात आले आहे. या कार्यक्रमाचा विद्यार्थी व त्यांच्या पालकांनी लाभ घ्यावा असे आवाहन श्री गुरु गोबिंद सिंघजी इन्स्टिट्युट ऑफ इंजिनिअरिंग अँड टेक्नालॉजी विष्णुपूरी, नांदेड यांच्या मार्फत केले आहे.

या कार्यक्रमास जिल्हाधिकारी अभिजीत राऊत, उच्च व तंत्र शिक्षण विभागाचे सहसंचालक उमेश नागदेवे, श्री गुरु गोबिंद सिंघजी इन्स्टिट्यूट ऑफ इंजिनिअरिंग अँड टेक्नालॉजी विष्णुपूरीचे संचालक डॉ. मनेश कोकरे यांची उपस्थिती राहणार आहे.

या कार्यक्रमाअंतर्गत 12 वी विज्ञान उत्तीर्ण विद्यार्थी तसेच त्यांच्या पालकांना पुढील शिक्षणाच्या प्रवेशासाठी मार्गदर्शन करणे हे या एक दिवशीय मार्गदर्शन कार्यशाळेचे मुख्य उद्दिष्ट आहे. अभियांत्रिकी शिक्षणातील विविध संधीची कल्पना आणि वेगाने होत असलेल्या बदलांचा विद्यार्थ्यांना फायदा होवून त्यांचे भविष्य कसे उज्वल होईल या उद्देशाने ही कार्यशाळा आयोजित करण्यात येणार आहे.

राज्य सामायिक प्रवेश परीक्षा कक्षाच्या संकेतस्थळावरील सविस्तर माहिती तसेच तंत्रशिक्षण संचालनालयाच्या अधिनस्त असलेले विविध पदवी अभ्यासक्रम, त्यांना प्रवेश घेतांना लागणारी पात्रता, प्रवेश नियमावली, ऑनलाईन प्रवेश प्रक्रीया, अर्ज भरण्याची प्रक्रीया, प्रक्रीयेला साधारण कालावधी, त्यासाठी लागणारी कागदपत्रे इत्यादीची माहिती या कार्यशाळेत देण्यात येणार आहे. याला अनुसरून प्रवेश अर्ज भरल्यानंतर अर्ज निश्चिती करणे, गुणवत्ता यादीमधील त्रुटी दुरुस्त करणे, अंतिम गुणवत्ता यादी तपासणी, विकल्प सादर करणे, कॅप जागा वाटप, जागास्वीकृती करणे, जागावाटप केलेल्या संस्थेत प्रत्यक्ष जावून प्रवेश घेणे इत्यादी प्रवेश प्रक्रीयेशी संबंधीत बाबींची सविस्तर माहिती विद्यार्थ्यांना देण्यात येणार आहे.  तसेच यासोबतच शासनामार्फत देण्यात येणाऱ्या विविध शिष्यवृत्त्या विषयी माहिती देवून अभियांत्रिकीय शिक्षण कमी खर्चात पूर्ण करुन रोजगारक्षम तसेच उद्यमशिल उद्योजक कसे बनता येईल आणि प्लेसमेंट संबंधी विस्तृत माहिती विद्यार्थी व पालकांना देण्यात येणार आहे.

00000