मुद्रांक शुल्काच्या दंडाबाबत सवलत योजना 

नांदेड (जिमाका) दि. 23 :- नोंदणी व मुद्रांक शुल्क दंड सवलत योजना ही 1 एप्रिल 2022 पासून सुरू करण्यात आली आहे. या योजनेतील पहिला टप्पा हा 31 जुलै 2022 रोजी संपत आहे. थकीत मुद्रांक शुल्क व शास्ती अथवा थकीत शास्ती यासंबंधी पक्षकारांना 31 मार्च 2022 पूर्वी नोटीस प्राप्त झालेल्या असतील व त्यांनी अद्याप या योजनेचा लाभ घेतला नसेल तर त्यासंबंधित पक्षकारांनी या योजनेच्या माहितीसाठी जिल्ह्याचे सह जिल्हा निबंधक व मुद्रांक जिल्हाधिकारी यांच्याशी तात्काळ संपर्क साधून दंड सवलत योजनेचा लाभ घ्यावा, असे आवाहन राज्याचे नोंदणी महानिरीक्षक व मुद्रांक नियंत्रक श्रावण हर्डीकर यांनी केले आहे.

 

संबंधित पक्षकारांनी 31 जुलै 2022 रोजी पर्यंत मुद्रांक शुल्क दंड सवलत योजनेचा लाभ घेतल्यास या सवलतीच्या पहिल्या टप्प्याचा म्हणजे थकित शास्तीवरील 90 टक्के सवलतीचा लाभ मिळेल अन्यथा सदर पक्षकारांना दुसऱ्या टप्प्यातील शर्ती प्रमाणे थकित शास्तीवर 50 टक्के दंड भरावा लागेल.

 

योजनेचे संक्षिप्त स्वरूप

महाराष्ट्र मुद्रांक अधिनियम कलम 31, 32 (अ), 33, 33 (अ), 46, 53 (1अ) व 53 (अ) अन्वये मुद्रांक शुल्क शास्तीच्या संदर्भात दिनांक 31 मार्च 2022 रोजी किंवा त्यापूर्वी नोटीस प्राप्त झालेल्या पक्षकारांसाठी ही माफी योजना कार्यान्वित करण्यात आलेली आहे. ही योजना 1 एप्रिल ते 30 नोव्हेंबर 2022 पर्यंत 8 महिने कार्यान्वित राहणार आहे. सदर माफी योजना ही मुद्रांक शुल्काच्या तुटीच्या भागावर देय शास्तीच्या सवलतीसाठी जाहीर करण्यात आली आहे. दिनांक 1 एप्रिल ते 31 जुलै 2022 या कालावधीत मुद्रांक शुल्क व दंडाची रक्कम भरल्यास अथवा मुद्रांक शुल्क यापुर्वीच भरले असल्यास दंडाच्या रक्कमेत 90 टक्के सूट मिळेल. दिनांक 1 ऑगस्ट ते 30 नोव्हेंबर 2022 या कालावधीत मुद्रांक शुल्क व दंडाची रक्कम भरल्यास अथवा मुद्रांक शुल्क यापूर्वीच भरले असल्यास दंडाची रक्कम भरल्यास दंडाच्या रक्कमेत 50 टक्के सूट मिळेल.

 

या योजनेबाबत अधिक माहिती नोंदणी व मुद्रांक विभागाच्या www.igrmaharashtra.gov.in या संकेतस्थळावर उपलब्ध करून देण्यात आलेली आहे. याबाबत कोणतीही अडचण असल्यास जिल्ह्याचे सह जिल्हा निबंधक व मुद्रांक जिल्हाधिकारी अथवा विभागाचे कॉल सेंटर 8888007777 व ई-मेल आयडी complaint@igrmaharashtra.in यावर संपर्क साधावा, असे आवाहन प्रसिद्धी पत्रकाद्वारे नांदेडचे सह जिल्हा निबंधक वर्ग 1 तथा मुद्रांक जिल्हाधिकारी वि. प्र. बोराळकर यांनी केले आहे.

0000 

 जिल्ह्यात गत 24 तासात सरासरी 15.20 मि.मी. पाऊस

 

नांदेड (जिमाका) दि. 23 :- जिल्ह्यात शनिवार 23 जुलै 2022 रोजी सकाळी 8.20 वाजता संपलेल्या गत 24 तासात सरासरी 15.20 मिलीमीटर पावसाची नोंद झाली असून जिल्ह्यात एकुण 671 मिलीमीटर पाऊस झाला आहे.

 

जिल्ह्यात शनिवार 23 जुलै 2022 रोजी सकाळी संपलेल्या गत 24 तासात झालेला पाऊस मिलीमीटरमध्ये तालुकानिहाय पुढील प्रमाणे, कंसात एकूण पाऊस : नांदेड- 6.40 (638.60) बिलोली-7.70 (700.30), मुखेड- 23.60 (632.10), कंधार-6.40 (646.80), लोहा-6.60 (602.80), हदगाव-9 (610.10), भोकर- 8 (776.10), देगलूर-20.60 (600.10), किनवट-43.80 (710.70), मुदखेड- 4.50 (833.50), हिमायतनगर-23.50 (886.60), माहूर- 37.20 (590.40), धर्माबाद-8 (718.30), उमरी- 6 (825.20), अर्धापूर- 4.90 (621.90), नायगाव- 7.80 (611.70) मिलीमीटर आहे.

0000