वैद्यकीय संस्थेतील हल्ले प्रकरणात

पोलीस विभागाने त्वरीत कार्यवाही करावी  

- जिल्हाधिकारी डोंगरे 

          नांदेड, दि. 14 :- वैद्यकीय सेवा संस्थेतील डॉक्टर, कर्मचाऱ्यांवरील हल्ले व मारहाणी प्रकरणात संबंधीत व्यक्तींवर आरोपपत्र दाखल झाले नाहीत त्याबाबत पोलीस विभागाने त्वरीत कार्यवाही करावी, असे निर्देश जिल्हाधिकारी अरुण डोंगरे यांनी दिले.

            महाराष्ट्र वैद्यकीय सेवा-व्यक्ती आणि वैद्यकीय सेवा संस्था (हिंसक कृत्ये व मालमत्तेची हानी किंवा नुकसान यांना प्रतिबंध) अधिनियम 2010 अंतर्गत जिल्हास्तरीय सुरक्षा समितीची बैठक जिल्हाधिकारी श्री. डोंगरे यांच्या अध्यक्षतेखाली जिल्हाधिकारी यांच्या निजी कक्षात आज संपन्न झाली, त्यावेळी ते बोलत होते.

            बैठकीस जिल्हा शल्यचिकित्सक डॉ. बी. पी. कदम, अतिरिक्त जिल्हा शल्यचिकित्सक डॉ. एच. आर. गुंटूरकर, मनपा वैद्यकीय अधिकारी डॉ. सुमती वाघमारे, पोलीस निरीक्षक व्ही. के. मुंढे, निमाचे अध्यक्ष डॉ. डी. लक्ष्मण, परिचारीका संघटनेचे अध्यक्ष एस. आर. मंगोत्रा, सार्वजनिक बांधकाम विभागाचे उपविभागीय अभियंता एस. एन. गवारे, एस. डी. वाघमारे  यांची उपस्थिती होती.

             जिल्हाधिकारी श्री. डोंगरे म्हणाले की, रुग्णांच्या नातेवाईकांनी सत्य परिस्थिती समजून घ्यावी व रुग्णसेवेमध्ये अप्रिय घटना घडणार नाहीत याबाबत सहकार्य करावे. जिल्ह्यातील वैद्यकीय सेवा संस्थेतील सीसीटीव्ही यंत्रणेबाबत सद्यस्थिती तपासून ती पुर्णवेळ सुरु राहतील याकडेही लक्ष दयावे. सीसीटीव्ही यंत्रणेमुळे गुन्हा शोधण्यासाठी मोठी मदत होईल, असेही त्यांनी सांगितले.    

            प्रास्ताविकात जिल्हा शल्यचिकित्सक डॉ. कदम यांनी वैद्यकीय सेवा व्यक्ती आणि वैद्यकीय सेवा संस्था अधिनियम, जिल्ह्यातील डॉक्टर, कर्मचारी यांच्यावरील हल्ले व मारहाण प्रकरणांबाबत माहिती दिली.

000000

जिल्ह्यात गत 24 तासात

 सरासरी 7.55 मि. मी. पाऊस

जिल्ह्यात आतापर्यंत 19.85 टक्के पाऊस

          नांदेड, दि. 14 :- जिल्ह्यात शुक्रवार 14 जुलै 2017 रोजी  सकाळी 8 वा. संपलेल्या गत 24 तासात सरासरी 7.55 मिलीमीटर  पावसाची  नोंद  झाली  असून  जिल्‍ह्यात  दिवसभरात एकूण 120.82  मिलीमीटर पाऊस झाला आहे. तर जिल्ह्यात आतापर्यंत सरासरी 189.71 मि.मी. पावसाची  नोंद झाली आहे. जिल्ह्यात आतापर्यंत 19.85 टक्के एवढा पाऊस झाला आहे.

जिल्ह्यात 14 जुलै 2017 रोजी सकाळी 8 वा. संपलेल्या 24 तासात झालेला पाऊस मिलीमीटरमध्ये  तालुका निहाय पुढील  प्रमाणे  कंसात  एकूण  पाऊस : नांदेड- 13.13 (285.79), मुदखेड- 3.00 (235.33), अर्धापूर- 8.33 (179.33), भोकर- 7.50  (222.25) , उमरी- 7.00 (151.66), कंधार- 10.67 (200.67), लोहा- 9.00 (177.49), किनवट- 3.00 (240.43), माहूर- 1.63 (194.01), हदगाव- 11.29 (219.32), हिमायतनगर- 15.00 (131.81), देगलूर- 3.83  (132.31), बिलोली- 6.60 (172.20), धर्माबाद- 10.67 (182.34), नायगाव- 4.60 (148.06), मुखेड- 5.57 (162.43) आज  अखेर  पावसाची सरासरी 189.71 (चालू वर्षाचा एकूण पाऊस 3035.43) मिलीमीटर आहे.

00000

महिला लोकशाही दिनी

अर्ज करण्याचे आवाहन 

  नांदेड, दि. 14 :- समस्याग्रस्त व पिडीत महिलांनी सोमवार 17 जुलै 2017 रोजी महिला लोकशाही दिनी आपले अर्ज विहित नमुन्यात सादर करावे, असे आवाहन जिल्हास्तरीय महिला लोकशाही दिन समितीचे अध्यक्ष तथा जिल्हाधिकारी नांदेड व सदस्य सचिव तथा जिल्हा महिला व बाल विकास अधिकारी नांदेड यांनी केले आहे.  

दर महिन्याच्या तिसऱ्या सोमवारी जिल्हास्तरीय महिला लोकशाही दिन घेण्यात येतो. सोमवार 17 जुलै रोजी सकाळी 11 वा. जिल्हाधिकारी नांदेड यांच्या अध्यक्षतेखाली त्यांच्या दालनात जिल्हाधिकारी कार्यालयात महिला लोकशाही दिन होणार आहे. संबंधीत समितीचे सदस्य व शासन निर्णयात नमुद संबंधीत विभागाचे अधिकारी यांनी उपस्थित रहावे, असेही आवाहन सदस्य सचिव तथा जिल्हा महिला व बालविकास अधिकारी नांदेड यांनी केले आहे.

00000

नांदेड तहसिल येथे  

सोमवारी लोकशाही दिन

नांदेड दि. 14 :- नागरिकांच्या अडीअडचणी जाणुन त्याचे निरसर करण्यासाठी तहसिल कार्यालय नांदेड येथे महिन्याचा तिसऱ्या सोमवार 17 जुलै 2017 रोजी सकाळी 11 वा. तहसिल कार्यालय नांदेड येथे तालुकास्तरीय लोकशाही दिन घेण्यात येणार आहे. संबंधितांनी लोकशाही दिनास उपस्थित रहावे, असे आवाहन तहसिलदार नांदेड यांनी केले आहे.                           

000000