वृत्त क्र. 1097

नांदेडमध्ये मतदार माहिती चिठ्ठी वाटप गतीने सुरू 

 बीएलओशी संपर्क साधावा ; बीएलओंना सहकार्य करावे 

नांदेड दि.15:  निवडणूक आयोगातर्फे मतदारांना मतदार माहिती चिठ्ठी अर्थात (Voter Information Slip ) वाटप करण्यात येते. या मतदार चिठ्ठी मध्ये मतदाराचे नाव, परिसर, केंद्र कोणते, यादी क्रमांक, भाग क्रमांक, रुम क्रमांक, इत्यादी आवश्यक माहिती आहे.नांदेड जिल्हयातील सर्व मतदार संघात मतदार चिठ्ठी वाटप गतीने सुरू असून नागरिकांनी बीएलओंकडून चिठ्ठी प्राप्त करावी, असे आवाहन जिल्हाधिकारी अभिजीत राऊत यांनी केले आहे.

16 नांदेड लोकसभा व विधानसभा सार्वत्रिक निवडणुकी अंतर्गत मतदार माहिती चिठ्ठी वाटपाचा कार्यक्रम सध्या सुरू आहे. मतदार माहिती चिठ्ठी मतदारांकडे असल्यास मतदान केंद्र व अन्य माहिती सुलभतेने प्राप्त होते. मतदान लवकर करण्यास त्यामुळे मदत होते. नागरिकांनी या सुविधेचा फायदा घ्यावा, घरी येणाऱ्या आपल्या मतदान केंद्रस्तरीय अधिकारी अर्थात बीएलओला सहकार्य करावे असे आवाहन करण्यात आले आहे. १८ तारखेपर्यंत प्रत्येक मतदान केंद्रावर बीएलओची उपस्थिती असणार असून त्याच्याकडून मतदार माहिती चिठ्ठी  प्राप्त करून घ्यावी, असे आवाहन करण्यात आले आहे. 

मतदान माहिती चिठठीमध्ये आपले नाव, वय, लिंग, आपल्या मतदार ओळखपत्राचा क्रमांक, राज्य, लोकसभेचे क्षेत्र, विधानसभेचे क्षेत्र,मतदान केंद्राचा पत्ता, भाग क्रमांक, तसेच आपला अनुक्रमांक देखील असतो. त्यामुळे अत्यंत सुलभतेने स्वतःचे नाव तपासून मतदान करता येते. नागरिकांनी गतीने मतदान करण्यासाठी याचा वापर करावा, असे आवाहनही करण्यात आले आहे.

मतदान माहिती चिठठी ओळखपत्र नाही

तथापि, मतदान माहिती चिठठी ही मतदान सुलभतेने व्हावे यासाठी निर्माण केलेली यंत्रणा आहे. मात्र मतदान माहिती चिठठी हे ओळखपत्र नाही, हे नागरिकांनी लक्षात घ्यावे ओळखपत्रासाठी १२ पुरावे निवडणूक आयोगाने स्पष्ट केले असून त्यानुसारच ओळख पटवून घ्यावी. मतदान माहिती चिठठी मतदान सुलभतेने होण्यासाठी मदतीची आहे.

ऑनलाइनही मतदार चिठ्ठी उपलब्ध

इलेक्ट्रॉल सर्च डॉट ई सी आय डॉट जीओव्ही डॉट इन या वेबसाईटवर जाऊन आपला इपिक नंबर अर्थात मतदार ओळखपत्रावर असणारा क्रमांक टाकावा. त्यामध्ये राज्य महाराष्ट्र टाकावे.कॅपच्याचा कोड टाकल्यानंतर सर्च क्लिक केल्यावर आपल्या नावाची संपूर्ण माहिती उमटते. आपल्या नावामध्ये व्हीव डिटेल क्लिक केल्यास आपली संपूर्ण माहिती स्क्रीनवर उमटते. आपणही माहिती डाऊनलोड सुद्धा करू शकता. इंटरनेट वापरणाऱ्या व अँड्रॉइड मोबाईल वापरणाऱ्या सर्व तरुणांनी अशा प्रकारे आपली मतदान माहिती चिठठी स्वतः मिळवावी, असे आवाहनही प्रशासनाने केले आहे. तसेच आपल्या आजूबाजूच्या नागरिकांना ही मतदान माहिती चिठठी मिळून देण्यासाठी मदत करण्याचे ही सुचविले आहे. याशिवाय इलेक्ट्रॉल हेल्पलाइन ॲप डाऊनलोड केल्यास हे अगदी सहजपणे शक्य आहे. याशिवाय युट्युब वर देखील कशा पद्धतीने वोटर लिस्ट मध्ये आपले नाव शोधावे याबाबतचे मार्गदर्शन करण्यात आले आहे त्यासाठी https://youtu.be/Si6i9tcTp24 या लिंक वर जाऊन मार्गदर्शन मिळू शकते.

बीएलओचा क्रमांक उपलब्ध

आपण ज्या परिसरात राहतो त्या परिसरात आपली मतदार माहिती चिट्ठी मिळाली नसेल तर आपल्या बीएलओचा अर्थात मतदान केंद्रस्तरीय अधिकाऱ्याचा संपर्क क्रमांकही आपल्याला माहिती होऊ शकतो. यासाठी देखील निवडणूक आयोगाने वोटर हेल्पलाइन ॲप मध्ये सर्वांचे नंबर टाकले आहे. हा ॲप डाऊनलोड करणे अतिशय सोपे आहे. प्ले स्टोअर मध्ये जाऊन अतिशय सुलभतेने हा ॲप डाऊनलोड करता येते व या ठिकाणावरून नो युवर बीएलओ असे म्हटल्यानंतर आपल्या मतदार ओळखपत्रावरील नंबर टाकल्यानंतर आपल्या परिसरातील बीएलओचा मोबाईल नंबर आपल्याला माहिती होतो.

00000

मतदान कर्तव्यात असलेल्या अधिकारी कर्मचाऱ्यांसाठी टपाली मतदानाची सुविधा उपलब्ध करुन दिली आहे. अधिकारी कर्मचारी यांनी टपाली मतदान करण्यासाठी जिल्हाधिकारी कार्यालयाच्या नियोजन भवनात आज गर्दी केली. हे टपाली मतदान १८ तारखेपर्यंत करता येणार आहे. याबाबतची छायाचित्रे

 

 वृत्त क्र. 1096

लोकसभा पोटनिवडणूक व विधानसभा निवडणूक 2024

मतदान व मतमोजणीच्या दिवशी मद्यविक्री बंद

नांदेड दि. 15 नोव्हेंबर : लोकसभा पोट निवडणूक व विधानसभा सार्वत्रिक निवडणुकीसाठी जिल्ह्यात 20 नोंव्हेंबर 2024 रोजी मतदान होत असून त्याची मतमोजणी 23 नोव्हेंबर 2024 रोजी संबंधित निवडणूक निर्णय अधिकारी यांनी निश्चित केलेल्या स्थळी होणार आहे. मतदानाची प्रक्रिया मुक्त व  निर्भयपणे व शांततेत पार पाडण्याच्यादृष्टीने व शांतता, सुव्यवस्थेचा प्रश्न निर्माण होऊन अनुचित प्रकार घडू नये यासाठी लोकप्रतिनिधीत्व अधिनियम 1951 चे कलम 135 (सी) महाराष्ट्र दारुबंदी कायद्याच्या कलम 142 (1) तरतुदीनुसार तसेच निवडणूक आयोगाच्या विविध निर्देशानुसार नांदेड जिल्ह्यातील सर्व ठोक व किरकोळ अनुज्ञप्ती मद्यविक्री बंद ठेवण्याचे आदेश जिल्हाधिकारी अभिजीत राऊत यांनी  दिले आहेत.

निवडणूकीच्या आचारसंहितेची प्रभावी अंमलबजावणी व खर्चावर नियंत्रण, आर्थिक बळाचा दुरुपयोग टाळणे, मतदारांवर प्रभाव टाकणाऱ्या वस्तुंच्या वाटपावर अंकुश ठेवण्यासाठी तसेच सार्वजनिक शांतता अबाधित ठेवण्यासाठी नांदेड जिल्ह्यात मतदान संपण्यापुर्वी 48 तास अगोदर ते मतदान संपेपर्यत 18 नोव्हेंबर 2024  सायंकाळी 6 वाजेपासून ते 20 नोंव्हेबर 2024 रोजी सांयकाळी 6 वाजेपर्यत किंवा मतदान संपेपर्यत तसेच मतमोजणीच्या दिवशी 23 नोव्हेंबर 2024 रोजी संपूर्ण दिवस मतमोजणी प्रक्रीया संपेपर्यत संपूर्ण नांदेड जिल्ह्यात अनुज्ञपती बंद ठेवण्याचे आदेश दिले आहेत. 

या आदेशाचे उल्लंघन करुन मद्यविक्री करीत असल्याचे  आढळून आल्यास संबंधित अनुज्ञप्ती रद्द करण्याची कारवाई  करण्यात येईल यांची नोंद घ्यावी, असे आदेशात नमूद केले आहे.

0000

वृत्त क्र. 1095

मतदानाची टक्केवारी वाढविण्यासाठी 

पाचशे कामगारांना मतदानासाठी मिळाली अर्धी सुट्टी 

कामगाराना दिली मतदान करण्याची शपथ 

नांदेड दि. 15 नोव्हेंबर : माझ्या एका मताने फरक पडतो म्हणून प्रत्येकांनी मतदान केलेच पाहिजे. जिल्हा निवडणूक अधिकारी अभिजीत राऊत व 087 विधानसभा मतदारसंघाचे निवडणूक निर्णय अधिकारी डॉ सचिन खल्लाळ यांच्या आवाहनास प्रतिसाद देत , गुंडेगाव परिसरातील सुप्रीम गोल्ड लिमिटेड , सुरज रूफिंग व सुरज मेटल्स अशा विविध कंपनीतील जवळपास पाचशे कामगारांना येत्या 20 नोव्हेंबर रोजी मतदानासाठी पगारी अर्धी सुट्टी आज घोषित केली आहे. अशी घोषणा सुरज ग्रुप इंडस्ट्रीजचे चेअरमन रमेशसेठ पारसेवार,संचालक रामसेठ तुप्तेवार,राहूल पारसेवार व गजानन येरावार यांनी केली. 

मतदान टक्केवारी वाढवण्यासाठी व मतदान जनजागृतीच्या कार्यासाठी सुट्टी जाहीर केली. गुंडेगाव परिसरातील सुप्रीम गोल्ड लिमिटेड , सुरज रूफिंग व सुरज मेटल्स अशा विविध कंपनीतील जवळपास पाचशे कामगारांसाठी 087 नांदेड दक्षिण स्वीप कक्षाच्यावतीने मतदान जनजागृती कार्यक्रम घेण्यात आला. यावेळी रामसेठ तुप्तेवार यांनी कामगारांना मतदानाचे महत्त्व पटवून देवून ‘मी मतदान करणारच’ अशी शपथ दिली. या कार्यक्रमास रुस्तुम आडे, डॉ घनश्याम येळणे, प्रा.राजेश कुलकर्णी, संजय भालके, बंडू आमदूरकर व बालासाहेब कच्छवे यांची उपस्थिती होती. या कार्यक्रमाचे सूत्रसंचालन आर.जी.कुलकर्णी यांनी केले तर आभार एस.व्ही. भालके यांनी मानले.

0000

वृत्त क्र. 1094

मोठ्या प्रमाणात निवडणूक साहित्याचे वितरण

साहित्य वितरण कक्षाची अविरत सेवा

नांदेड दि. 15 नोव्हेंबर : मुंबई, पुणे, संभाजीनगर आदी ठिकाणावरून शासकीय मुद्रणालय व पुरवठादार यांच्याकडून प्राप्त होणारे विविध प्रकारचे साहित्य वितरणाचे महत्त्वपूर्ण काम साहित्य वितरण कक्षातून सुरू आहे. नांदेड लोकसभा पोटनिवडणूक व विधानसभा सार्वत्रिक निवडणूक मतदारसंघासाठी जवळपास हे वितरण सुरु आहे.

लोकसभा पोटनिवडणूक व विधानसभा निवडणुकीमध्ये आवश्यक साहित्य वितरण वेळेत व्हावे, याला अधिक महत्त्व दिले जाते. यासाठी आचारसंहिता लागल्यापासून साहित्य वितरण कक्ष स्थापन केला जातो. जिल्हा पुरवठा अधिकारी श्रीमती रूपाली चौगुले यांच्या मार्गदर्शनात जिल्हाधिकारी कार्यालयाच्या परिसरातील नियोजन भवनांमध्ये या साहित्य कक्षाची उभारणी करण्यात आली आहे.

निवडणुकांमध्ये मतदान केंद्रावर आवश्यक ते सर्व साहित्य पुरविणे व त्याची नोंद या कक्षामार्फत करण्यात येते. अधिक सुबक, प्रगत असे साहित्य सध्या वापरण्यात येत आहे. ईव्हीएमचे बॅलेट युनिट कव्हर करणारे कंपार्टमेंट, पोस्टर, सूचना पत्र,ओळखपत्रे, लेखन सामग्री, स्टेशनरी, विविध नमुने, लिफाफे, कागदी सील, वोटर स्लिप, बॅलेट पेपर, शिक्के, माहितीपुस्तिीका, हस्तपुस्तिका, मतदान अधिकाऱ्याना वापरण्यात येणारे विविध प्रकारचे  आवश्यक साहित्य या कक्षामार्फत दिले जाते. जिल्हा पुरवठा अधिकारी यांच्यासह त्यांची मोठी टीम या कार्यामध्ये सहभागी झाली आहे.

00000