वृत्त क्रमांक  382 

भारतरत्न डॉ.बाबासाहेब आंबेडकर जयंती निमित्त  

जय भीम पदयात्रेचे रविवारी आयोजन

 

नांदेड दि. 12 एप्रिल :- आयुक्त क्रीडा व युवक सेवा संचालनालय पुणे, जिल्हा प्रशासन व जिल्हा क्रीडा अधिकारी कार्यालय नांदेडच्यावतीने भारतरत्न डॉ. बाबासाहेब आंबेडकर यांची 134 वी जयंती 14 एप्रिल2025 रोजी आहे.   त्यानुषंगाने जिल्हास्तरावर जिल्हा प्रशासन, जिल्हा युवा अधिकारी, नेहरू युवा केंद्र यांच्या समन्वयाने जय भीम पदयात्रेचे आयोजन रविवार 13 एप्रिल, 2025 रोजी सकाळी 7.30 वा. करण्यात आले आहे.

 

या पदयात्रेचा मार्ग पुढील प्रमाणे आहे. श्री गुरुगोबिंदसिंघजी स्टेडीयम, जिल्हा क्रीडा संकुल क्रीडा वसतिगृह येथून सुरुवात होऊन आयटीएम कॉलेज-ग्लोबल हॉस्पीटल समोरुन-महात्मा जोतीबा फुले व क्रांतीज्योती सावित्रीबाई फुले यांच्या पुतळयास पुष्पहार अर्पण करुन- परत कुसुम सभागृह मार्ग- जिल्हा क्रीडा संकुल, क्रीडा वसतिगृह येथे या पदयात्रेचा समारोप करण्यात येणार आहे.

 

या पदयात्रेमध्ये नांदेड जिल्हयातील  शैक्षणीक संस्थेमधील शालेय विद्यार्थी, विविध क्रीडा संघटनेचे खेळाडू, एन.सी.सी., एन.वाय.के.एस., भारत स्काऊट ॲन्ड गाईड, जिल्हा प्रशासन अंतर्गत विविध कार्यालयातील अधिकारी, कर्मचारी, विविध विभागाचे अधिकारी, कर्मचारी, विविध क्रीडा संघटनेचे पदाधिकारी इत्यादींच्या सहभागाने जयभीम पदयात्रा संपन्न होणार आहे.

 

त्याकरीता नांदेड जिल्हयातील सर्व मान्यवर, लोकप्रिय प्रतिनिधी, सर्व विभागाचे विभागप्रमुख, अधिकारी-कर्मचारी, सर्व शैक्षणिक संस्थेतील विद्यार्थी, खेळाडू, विविध क्रीडा संघटनेचे खेळाडु मुले-मुली, प्रशिक्षक व पदाधिकारी, विद्यापीठे, एनजीओ, एनएसएस, एन.वाय.के संस्था, भारत स्काऊट ॲन्ड गाईड व My Bharat Volunteers, एनसीसी व आदींनी या पदयात्रेत जास्तीतजास्त मोठया संख्येने उपस्थित राहुन सहभाग नोंदवावा व शासकीय उपक्रमांस सहकार्य करावे, असे आवाहन जिल्हा प्रशासन, शिक्षण विभाग (प्राथ./माध्य), जिल्हा परिषद नांदेड, जिल्हा युवा अधिकारी, नेहरु युवा केंद्र व जिल्हा क्रीडा अधिकारी जयकुमार टेंभरे यांनी केले आहे.

0000

 वृत्त क्रमांक  381 

राज्य युवा पुरस्कारासाठी अर्ज करण्याचे आवाहन

 

नांदेड दि. 12 एप्रिल :- जिल्हा युवा पुरस्कारासाठी युवक अथवा युवा विकासाचे कार्य करणाऱ्या संस्था यांची गत तिन वर्षामध्ये केलेल्या कामगीरीचे मुल्यांकन विचारात घेण्यात येणार असुन जिल्हा युवा पुरस्कार सन 2024-25 साठी अर्ज सोमवार 21 एप्रिल 2025 पर्यंत जिल्हा क्रीडा अधिकारी कार्यालयात अर्ज सादर करणे आवश्यक आहे. अर्जाचा नमुना जिल्हा क्रीडा अधिकारी कार्यालय नांदेड येथे कार्यालयीन वेळेत उपलब्ध राहतील. जिल्ह्यातील जास्तीत जास्त युवा-युवती व युवा विकासाचे कार्य करणाऱ्यांनी पुरस्कराचे अर्ज सादर करावे, असे आवाहन जिल्हा क्रीडा अधिकारी जयकुमार टेंभरे यांनी केले आहे.

 

राष्ट्र व राज्य निर्माणामध्ये युवकांची महत्वपूर्ण भूमिका असुन युवा वर्ग मोठया संख्येने, संस्था राज्यात सामाजिक कार्य करीत आहे. युवामध्ये असलेल्या सुप्त गुणांना वाव देणे त्यांनी केलेल्या सामाजिक कार्याला प्रोत्साहन देणे, त्यांचा गुणगौरव करणे आवश्यक आहे. राज्याचे युवा धोरण अंतर्गत युवांच्या सामाजिक कार्याचा गौरव करण्यासाठी राज्य युवा पुरस्कार शालेय शिक्षण व क्रीडा विभागचे शासन निर्णय 12 नोव्हेंबर 2013 नुसार देण्यात येतात.

 

सन 2024-25 या वर्षात जिल्हा युवा पुरस्कार करीता जिल्हयातील युवांनी केलेल्या कार्याचा गौरव व्हावा याकरीता 1 युवक, 1 युवती व 1 नोंदणीकृत संस्था यांना जिल्हा युवा पुरस्कार देण्यात येणार आहे. या पुरस्काराचे स्वरुप युवक, युवती यांना प्रत्येकी रोख 10 हजार रुपये व संस्थेस 50 हजार रुपये तसेच गौरव पत्र, सन्मान चिन्ह राहणार आहे.

0000

 वृत्त क्रमांक  380

इयत्ता दहावी-बारावी परीक्षेसाठी खाजगीरित्या प्रविष्ट होणाऱ्या

विद्यार्थ्यांची ऑनलाईन नाव नोंदणी अर्जाची कार्यवाही सुरू

 

नांदेड दि. 12 एप्रिल :- महाराष्ट्र राज्य माध्यमिक व उच्च माध्यमिक शिक्षण मंडळामार्फत माध्यमिक शालान्त प्रमाणपत्र (इ. 10 वी) व उच्च माध्यमिक प्रमाणपत्र (इ. 12 वी) परीक्षांसाठी विद्यार्थ्यांना खाजगीरित्या फॉर्म नं. 17 भरुन परीक्षेस प्रविष्ट होण्याची सुविधा उपलब्ध करुन देण्यात आली आहे. जुलै-ऑगस्ट 2025 परीक्षेसाठी खाजगीरित्या प्रविष्ट होणाऱ्या विद्यार्थ्यांसाठी ऑनलाईन नावनोंदणी अर्जाबाबतची कार्यवाही मंगळवार 15 एप्रिल 2025 पासून सुरु करण्यात येत असून सदरील अर्ज मंडळाच्या संकेतस्थळावर भरावयाचे आहेत.

 

सद्यस्थितीत फक्त फेब्रुवारी-मार्चच्या परीक्षांसाठीच खाजगी विद्यार्थी म्हणून प्रविष्ट होण्यासाठी नावनोंदणी अर्ज ऑनलाईन पध्दतीने स्विकारण्याची कार्यवाही करण्यात येत आहे. तथापि अनेक विद्यार्थी पात्र असूनही मंडळाने दिलेल्या मुदतीत नावनोंदणी अर्ज भरू न शकल्याने अशा विद्यार्थ्यांचे शैक्षणिक वर्ष वाया जाते. शैक्षणिक वर्ष वाया जावू नये म्हणून यावर्षी प्रथमच जुलै-ऑगस्ट 2025 च्या परीक्षांसाठी खाजगी विद्यार्थी म्हणून प्रविष्ट होण्याकरिता नावनोंदणीसाठी संधी देण्यात येत आहे.

 

इयत्ता 10 वी व इयत्ता 12 वी परीक्षेसाठी खाजगी विद्यार्थ्यांकरिता सर्व शाळा-कनिष्ठ महाविद्यालये मंडळाच्या अटी शर्ती नुसार नावनोंदणी करण्याकरिता उपलब्ध आहेत. यासंदर्भातील सर्व माहिती व मार्गदर्शक पुस्तिका मंडळाच्या http://www.mahahsscboard.in या संकेतस्थळावर प्रसिध्द करण्यात येत आहेत. तसेच अधिक माहितीसाठी सर्व विद्यार्थी, शाळा, कनिष्ठ महाविद्यालयांनी आपल्या कार्यकक्षेतील विभागीय मंडळाशी संपर्क साधावा.

 

जुलै-ऑगस्ट 2025 मध्ये होणाच्या माध्यमिक शालांत प्रमाणपत्र (इ. 10 वी) व उच्च माध्यमिक प्रमाणपत्र (इ. 12 वी) परीक्षेसाठी खाजगी विद्यार्थी नावनोंदणी अर्ज (फॉर्म नं. 17) ऑनलाईन स्वीकारण्याच्या तारखा पुढील प्रमाणे निश्चित करण्यात आल्या आहेत.

 

विद्यार्थ्यांनी नावनोंदणी अर्ज व शुल्क ऑनलाईन भरुन अर्जाची प्रत, ऑनलाईन नाव नोंदणी शुल्क जमा केल्याबाबत पोच पावतीची प्रिंट आऊट व मूळ कागदपत्रे अर्जावर नमूद केलेल्या शाळेत, कनिष्ठ महाविद्यालयात जमा करण्यासाठी नावनोंदणी अर्ज ऑनलाईन स्वीकारण्याची मुदत 15 एप्रिल ते 15 मे 2025 पर्यंत देण्यात आली आहे.  

 

खाजगी विद्यार्थी म्हणुन प्रविष्ठ होण्यासाठी फेब्रुवारी-मार्च 2025 च्या परीक्षेचेवेळी ज्या अटी व शर्ती निर्धारित केलेल्या होत्या त्याच अटी व शर्ती जुलै-ऑगस्ट 2025 च्या परीक्षेसाठी कायम राहतील. सदर अर्ज फक्त नियमित शुल्काने घ्यावयाचे असून याकरिता विलंब, अतिविलंब शुल्काची मुदत असणार नाही व मुदतवाढ देण्यात येणार नाही याची सर्व संबधित घटकांनी नोंद घ्यावी.

 

खाजगी विद्यार्थ्यांना इ. 10 वी व इ. 12 वी साठी नावनोंदणी अर्ज ऑनलाईन पद्धतीनेच भरावयाचे आहेत. त्यामुळे कोणाचाही ऑफलाईन अर्ज स्वीकारला जाणार नाही याची नोंद घ्यावी. खाजगी विद्यार्थ्यांनी इ. 10 वी, 12 वीसाठी नावनोंदणी अर्ज ऑनलाईन भरण्यापूर्वी ज्या शाळा, कनिष्ठ महाविद्यालयातून मंडळाची परीक्षा दयावयाची आहे त्या शाळा, कनिष्ठ महाविद्यालयात जाऊन शाळा, कनिष्ठ महाविद्यालयाचा सांकेतांक, विषय योजना, माध्यम, शाखा व इतर आवश्यक माहिती घेऊनच नोंदणी करावी.

 

नावनोंदणी अर्ज करतांना विद्यार्थ्यांनी http://www.mahahsscboard.in या संकेतस्थळावरील Student Corner या option चा वापर करावा, अर्ज भरण्यासाठीच्या सूचना संकेतस्थळावर उपलब्ध आहेत, त्या वाचून अर्ज भरण्यास सुरुवात करावी. सदर मूळ कागदपत्रे स्कॅन करुन अपलोड करावयाची आहेत. काही कारणास्तव विद्यार्थ्यांकडे दुय्यम शाळा सोडल्याचा दाखला असेल तर त्याची मूळ प्रत जोडणे आवश्यक आहे. कागदपत्रे स्कॅन करण्यासाठी विद्यार्थ्यांनी स्कॅनर, मोबाईलद्वारे कागदपत्रांचे फोटो (पीडीएफ) काढून ते अपलोड करावेत. विद्यार्थ्यांचा मोबाईल क्रमांक व ई-मेल आयडी पुढील संपर्कासाठी अनिवार्य आहे.

 

विद्यार्थ्यांनी अर्ज, ऑनलाईन नाव नोंदणी शुल्क जमा केल्याबाबत पोच पावतीची प्रिंटआऊट व मूळ कागदपत्रे नाव नोंदणी अर्जावर नमूद केलेल्या शाळा, कनिष्ठ महाविद्यालयात विहीत मुदतीत जमा करावयाची आहेत. खाजगी विद्यार्थी नावनोंदणी शुल्काचा तपशील खालीलप्रमाणे

 

इयत्ता 10 वी व बारावी : 1 हजार 110 रुपये नाव नोंदणी शुल्क अधिक 100 रुपये प्रक्रिया शुल्क लागू राहील.

दहावी-बारावी जुलै-ऑगस्ट 2025 परीक्षेसाठी खाजगी विद्यार्थी (फॉर्म नं. 17) नावनोंदणी शुल्क ऑनलाईन पध्दतीने (Debit Card/Credit Card/ युपीआय/नेटबँकिंगद्वारे) भरणे अनिवार्य राहील. ऑनलाईन पध्दतीने शुल्क जमा केल्याबाबतची पोच पावती विद्यार्थ्याला,संबंधित शाळा, कनिष्ठ महाविद्यालयास त्यांच्या लॉगीनमध्ये प्राप्त होईल.

 

माध्यमिक शालान्त प्रमाणपत्र ( इ. 10 वी) परीक्षेस प्रविष्ट होणाऱ्या खाजगी विद्यार्थ्यांची नावनोंदणी ऑनलाईन पध्दतीने होणार असून नावनोंदणी करतांना विद्यार्थ्यांच्या सध्याच्या पत्त्यातील जिल्हा, तालुका व त्याने निवडलेल्या माध्यमानुसार, त्यास माध्यमिक शाळांची यादी दिसेल. त्यामधील एका माध्यमिक शाळेची निवड विद्यार्थ्याने करावयाची आहे. या माध्यमिक शाळेने परीक्षा अर्ज, प्रकल्प अंतर्गत मूल्यमापन, प्रात्यक्षिक, तोंडी, श्रेणी विषय संदर्भातील कामकाज व अनुषंगिक मूल्यमापन तसेच पुढील कार्यवाही करावयाची आहे.

 

उच्च माध्यमिक प्रमाणपत्र (इ. 12 वी) परीक्षेस प्रविष्ट होणाऱ्या खाजगी विद्यार्थ्यांची नावनोंदणी ऑनलाईन पध्दतीने होणार असून नावनोंदणी करतांना विद्यार्थ्यांच्या सध्याच्या पत्त्यातील जिल्हा, तालुका व त्याने निवडलेल्या माध्यम व शाखेनुसार त्यास उच्च माध्यमिक शाळा, कनिष्ठ महाविद्यालयांची यादी दिसेल. त्यामधील एका उच्च माध्यमिक शाळा, कनिष्ठ महाविद्यालयाची निवड विद्यार्थ्याने करावयाची आहे.

 

या उच्च माध्यमिक शाळा, कनिष्ठ महाविद्यालयाने परीक्षा अर्ज, प्रकल्प अंतर्गत मूल्यमापन, प्रात्यक्षिक, तोंडी, श्रेणी विषय संदर्भातील कामकाज व अनुषंगिक मूल्यमापन तसेच पुढील कार्यवाही करावयाची आहे. दिव्यांग विद्यार्थ्यांना खाजगीरित्या प्रविष्ट व्हावयाचे असेल तर त्यांनी त्यांच्या दिव्यांगत्वाचे जिल्हा शल्य चिकित्सकांच्या प्राधिकृत केलेल्या रुग्नालयाचे प्रमाणपत्र, युडीआयडी कार्डची छायाप्रत प्रमाणित करुन अर्जासोबत सादर करावी व आवश्यकतेनुसार विभागीय मंडळ,माध्यमिक शाळा,  कनिष्ठ महाविद्यालयाकडून माहिती प्राप्त करुन घ्यावी.

 

महाराष्ट्र राज्य मुक्त विद्यालय मंडळामार्फत इयत्ता 5 वी किंवा इयत्ता 8 वी उत्तीर्ण विद्यार्थ्यांना इयत्ता 10 वी साठी (17 नं.) खाजगी विद्यार्थी म्हणून नावनोंदणी करता येईल. ऑनलाईन अर्ज भरतांना अडचण आल्यास कार्यालयीन वेळेत वेबसाईटवर दिलेल्या हेल्पलाईनवर संपर्क साधावा.

 

पात्र विद्यार्थ्यांना नावनोंदणी प्रमाणपत्र ऑनलाईन देण्यात येणार आहे याची नोंद घ्यावी. तसेच पात्र विद्यार्थ्यांना नावनोंदणी प्रमाणपत्र प्राप्त झाल्यानंतर त्यांनी परीक्षेची आवेदनपत्रे ऑनलाईन पध्दतीने मंडळाने विहीत केलेल्या कालावधीत परीक्षा शुल्कासह भरणे आवश्यक आहे, असे देविदास कुलाळ सचिव राज्य मंडळ पुणे यांनी प्रसिद्धी पत्रकाद्वारे कळविले आहे.

00000

 वृत्त क्रमांक  379 

दहावी-बारावी परीक्षेसाठी क्रीडा गुण सवलतीचे प्रस्ताव सादर करण्यास मुदतवाढ

 

नांदेड दि. 12 एप्रिल :- फेब्रुवारी-मार्च 2025 च्या माध्यमिक शालान्त प्रमाणपत्र इयत्ता 10 वी व उच्च माध्यमिक प्रमाणपत्र इयत्ता 12 वी परीक्षेसाठी क्रीडा गुण सवलतीचे प्रस्ताव जिल्हा क्रीडा अधिकारी यांच्याकडून आपले सरकार प्रणालीद्वारे ऑनलाईन पद्धतीने सादर करण्यास सोमवार 21 एप्रिल 2025 पर्यंत मुदवाढ देण्यात आली आहे.

 

यापूर्वी प्रस्ताव मंगळवार 15 एप्रिल पर्यंत स्विकारण्याबाबत सर्व विभागीय मंडळांना कळविण्यात आले होते. तथापि 10 ते 14 एप्रिल 2025 या कालावधीत 'आपले सरकार' सेवा पोर्टल नियमित देखभालीसाठी बंद राहणार असल्याने सर्व जिल्हा क्रीडा अधिकारी कार्यालयाकडून खेळाडू विद्यार्थ्यांचे क्रीडा गुण सवलतीचे प्रस्ताव ऑनलाईन पद्धतीने संबंधित विभागीय मंडळाकडे सादर करण्यासाठी सोमवार 21 एप्रिल 2025 पर्यंत मुदतवाढ देण्यात आली आहे. याबाबत सर्व जिल्हा क्रीडा अधिकारी, उच्च माध्यमिक शाळा/कनिष्ठ महाविद्यालये मुख्याध्यापक / प्राचार्य व सर्व संबंधित घटकांनी या बाबींची नोंद घ्यावी, असे आवाहन महाराष्ट्र राज्य माध्यमिक व उच्च माध्यमिक शिक्षण मंडळाने केले आहे.

0000

 वृत्त क्रमांक  378 

बिलोली शहरात 22 तंबाखू विक्रेत्यांवर दंडात्मक कार्यवाही

 

नांदेड दि. 12 एप्रिल :- जिल्हास्तरीय तंबाखू नियंत्रण पथकाने शुक्रवार 11 एप्रिल रोजी बिलोली शहरात अचानक धाडी टाकून 22 तंबाखू विक्रेत्यांकडून 10 हजार 700 रुपये दंड आकारण्यात आला. ही कार्यवाही जिल्हाधिकारी राहुल कर्डिले यांच्या निर्देशानुसार जिल्हा शल्यचिकित्सक डॉ. निळकंठ भोसीकर, अतिरिक्त जिल्हा शल्यचिकित्सक डॉ. संजय पेरके व नोडल अधिकारी डॉ. हनमंत पाटील यांच्या मार्गदर्शनाखाली करण्यात आली.

 

बिलोली शहरात तंबाखू व तंबाखूजन्य पदार्थाची मोठ्या प्रमाणात विक्री तसेच कोटपा 2003 कायद्याचे उल्लंघन होत असल्याबाबत मिळालेल्या माहितीनुसार ही कार्यवाही करण्यात आली आहे. सार्वजनिक ठिकाणी तसेच शैक्षणिक अथवा शासकीय, निमशासकीय कार्यालयाच्या परिसरात तंबाखू व तंबाखूजन्य पदार्थाची विक्री अथवा सेवन किंवा साठवण होत असल्यास जिल्हा तंबाखू नियंत्रण कक्ष, जिल्हा रुग्णालय नांदेड येथे तक्रार नोंदवून नांदेड जिल्हा तंबाखू मुक्त करण्याच्या या अभियानास सहकार्य करावे असे, आवाहन जिल्हा शल्य चिकित्सक डॉ. निळकंठ भोसीकर यांनी केले आहे.

 

या पथकात जिल्हा सल्लागार डॉ. शितल चातुरे, दंत शल्य चिकित्सक डॉ पूजा काळे, मानसशास्त्रज्ञ प्रकाश आहेर, वैद्यकीय सामाजिक कार्यकर्ते बालाजी गायकवाड, समुपदेशक दिनेश तळणे तसेच केस रजिस्ट्री सहाय्यक सुनील तोटेवाड व मराठवाडा ग्रामीण विकास संस्थेचे मंगेश गायकवाड तसेच बिलोली पोलीस ठाण्याचे पोलीस निरीक्षक अतुल भोसले यांच्या मार्गदर्शनाखाली पोलीस कॉन्सटेबल ए.एस.अचेवाड व इतर पोलीस कर्मचारी उपस्थित होते. 

000