नांदेड जिल्ह्यातील जिल्हा परिषद गटाच्या आरक्षणाची सोडत जाहीर   

नांदेड (जिमाका) दि. 28 :- राज्य निवडणूक आयोगाच्या आरक्षण सोडत सुधारीत कार्यक्रमानुसार नांदेड जिल्हा परिषदेची आरक्षण सोडत आज जिल्हाधिकारी डॉ. विपीन इटनकर यांच्या अध्यक्षतेखाली पार पडली. या सोडतीचे निकाल पुढील प्रमाणे आहे.

 

माहूर तालुक्यात लखमापूर अनुसूचित जमाती, वाई बा. अनुसूचित जाती, वानोळा सर्वसाधारण गटासाठी आरक्षण जाहीर झाले आहे. किनवट तालुक्यातील सारखणी सर्वसाधारण, मांडवी सर्वसाधारण, मोहपूर अनुसूचित जाती (महिला), गोकुंदा अनुसूचित जाती (महिला), बोधडी बु. अनुसूचित जाती, जलधारा सर्वसाधारण, इस्लापूर अनुसूचित जातीसाठी आरक्षण जाहीर झाले आहे. हिमायतनगर तालुक्यातील सिरंजणी सर्वसाधारण महिला, सरसम बु. सर्वसाधारण महिला, दुधड अनुसूचित जातीसाठी आरक्षण जाहीर झाले आहे. हदगाव तालुक्यातील निवघा बा. सर्वसाधारण महिला, रुई धा. सर्वसाधारण महिला, पळसा सर्वसाधारण, कोळी सर्वसाधारण महिला, मनाठा ना. मा. प्र. (महिला), तामसा सर्वसाधारण, आष्टी ना. मा. प्र. साठी आरक्षण जाहीर झाले आहे. अर्धापूर तालुक्यातील लहान अनुसूचित जमाती (महिला), येळेगाव सर्वसाधारण, मालेगाव ना.मा. प्र साठी आरक्षण जाहीर झाले आहे. नांदेड तालुक्यातील वाजेगाव ना.मा.प्र (महिला), वाडी बु. सर्वसाधारण, लिंबगाव सर्वसाधारण, धनेगाव ना.मा.प्र. (महिला), बळीरामपूर सर्वसाधारणसाठी आरक्षण जाहीर झाले आहे. मुदखेड तालुक्यातील बारड सर्वसाधारण, मुगट सर्वसाधारण, माळकौठा सर्वसाधारणसाठी आरक्षण जाहीर झाले आहे. भोकर तालुक्यात पाळज सर्वसाधारण (महिला), भोसी अनुसूचित जाती (महिला), पिंपळढव अनुसूचित जाती (महिला)साठी आरक्षण जाहीर झाले आहे. उमरी तालुक्यातील गोरठा सर्वसाधारण (महिला), तळेगाव अनुसूचित जमातीसाठी आरक्षण जाहीर झाले आहे. धर्माबाद तालुक्यातील करखेली सर्वसाधारण महिला, येताळ सर्वसाधारण (महिला) साठी आरक्षण जाहीर झाले आहे. बिलोली तालुक्यातील आरळी अनुसूचित जमाती (महिला), सगरोळी सर्वसाधारण, रामतीर्थ ना.मा.प्र., लोहगाव सर्वसाधारण (महिला)साठी आरक्षण जाहीर झाले आहे. नायगाव खै. तालुक्यातील बरबडा ना.मा.प्र. (महिला), कुंटूर ना.मा.प्र., देगाव अनुसूचित जमाती, मांजरम ना.मा.प्र., नरसी सर्वधारण (महिला) साठी आरक्षण जाहीर झाले आहे. लोहा तालुक्यातील सोनखेड अनुसूचित जाती, वडेपुरी अनुसूचित जाती (महिला), उमरा ना.मा.प्र. (महिला), कलंबर अनुसूचित जाती, सावरगाव अनुसूचित जाती, माळाकोळी ना.मा.प्र.साठी आरक्षण जाहीर झाले आहे. कंधार तालुक्यातील शिराढोण ना.मा.प्र. (महिला), कौठा सर्वसाधारण, बहाद्दरपुरा अनुसूचित जाती (महिला), फुलवळ सर्वसाधारण (महिला), पेठवडज सर्वसाधारण (महिला), गौळ अनुसूचित जाती (महिला), कुरूळा सर्वसाधारण (महिला) साठी आरक्षण जाहीर झाले आहे. मुखेड तालुक्यातील जांब बु. ना.मा.प्र., चांडोळा सर्वसाधारण, एकलारा ना.मा.प्र. (महिला), येवती सर्वसाधारण (महिला), सावरगाव पी. अनुसूचित जाती (महिला), बाऱ्हाळी सर्वसाधारण, दापका गु. सर्वसाधारण (महिला), मुक्रामाबाद ना.मा.प्र. (महिला)साठी आरक्षण जाहीर झाले आहे. देगलूर तालुक्यातील खानापूर सर्वसाधारण, शहापूर सर्वसाधारण, करडखेड अनुसूचित जमाती (महिला), मरखेल सर्वसाधारण (महिला), हानेगाव सर्वसाधारण (महिला) साठी आरक्षण जाहीर झाले आहे.

00000

 दहा नगरपरिषदांच्या आरक्षण निश्चितीबाबत  

हरकती व सूचना असल्यास 1 ऑगस्टपर्यत कराव्यात

 

नांदेड (जिमाका) दि. 28 :- राज्य निवडणूक आयोगाने नांदेड जिल्ह्यातील कंधार, मुखेड, देगलूर, बिलोली, कुंडलवाडी, धर्माबाद, उमरी, भोकर, मुदखेड व हदगाव या नगरपरिषदांच्या सदस्य पदांच्या सार्वत्रिक निवडणूकीसाठी नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) व सर्वसाधारण(महिला) आरक्षण व सोडतीचा सुधारीत कार्यक्रम-2022 जाहीर केलेला आहे.

 

या कार्यक्रमानुसार या दहा नगरपरिषदांच्या सदस्य पदांच्या सार्वत्रिक निवडणूकांसाठी 28 जुलै 2022 रोजी आरक्षण निश्चित करण्यात आले आहे. या आरक्षणाची माहिती रहिवाशांसाठी संबंधित नगरपरिषदेच्या कार्यालयात उपलब्ध आहे. सदर आरक्षणाची प्रसिध्दी त्या दहा नगरपरिषदांच्या क्षेत्रात प्रमुख ठिकाणी करण्यात आली आहे. तसेच जिल्हाधिकारी कार्यालयाने संकेतस्थळावरही या आरक्षणाची प्रसिध्दी करण्यात आली आहे.

 

या आरक्षण निश्चितीबाबत ज्या कोणत्याही व्यक्तींच्या हरकती व सूचना असतील त्यांनी कारणासह संबंधित नगरपरिषदांचे मुख्याधिकारी यांचेकडे शुक्रवार 29 जुलै ते सोमवार 1 ऑगस्ट 2022 रोजी दुपारी 3 वाजेपर्यत लेखी सादर करावे. 1 ऑगस्ट 2022 रोजी दुपारी 3 वाजेनंतर आलेल्या हरकती व सूचना विचारात घेतल्या जाणार नाहीत. संबंधितानी यांची नोंद घ्यावी, असे जिल्हाधिकारी डॉ. विपीन इटनकर यांनी कळविले आहे.

0000

 

 हिमायतनगर नगरपंचायतीच्या आरक्षण निश्चितीबाबत

हरकती व सूचना असल्यास 1 ऑगस्टपर्यत कराव्यात

 

नांदेड (जिमाका) दि. 28 :- राज्य निवडणूक आयोगाने नांदेड जिल्ह्यातील हिमायतनगर नगरपंचायतीच्या सदस्य पदांच्या सार्वत्रिक निवडणूकीसाठी नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) व सर्वसाधारण(महिला) आरक्षण व सोडतीचा सुधारीत कार्यक्रम-2022 जाहीर केलेला आहे.

 

या कार्यक्रमानुसार हिमायतनगर नगरपंचायतीच्या सदस्य पदांच्या सार्वत्रिक निवडणूकीसाठी 28 जुलै 2022 रोजी आरक्षण निश्चित करण्यात आले आहे. या आरक्षणाची माहिती रहिवाशांसाठी नगरपंचायत हिमायतनगर कार्यालयात उपलब्ध आहे. या आरक्षणाची प्रसिध्दी नगरपंचायत क्षेत्रात प्रमुख ठिकाणी करण्यात आली आहे. तसेच जिल्हाधिकारी कार्यालयाने संकेतस्थळावरही या आरक्षणाची प्रसिध्दी करण्यात आली आहे.

 

या आरक्षण निश्चितीबाबत ज्या कोणत्याही व्यक्तींच्या हरकती व सूचना असतील त्यांनी कारणासह मुख्याधिकारी नगरपंचायत हिमायतनगर यांचेकडे शुक्रवार 29 जुलै ते सोमवार 1 ऑगस्ट 2022 रोजी दुपारी 3 वाजेपर्यत लेखी सादर करावे. 1 ऑगस्ट 2022 रोजी दुपारी 3 वाजेनंतर आलेल्या हरकती व सूचना विचारात घेतल्या जाणार नाहीत. संबंधितानी यांची नोंद घ्यावी, असे जिल्हाधिकारी डॉ. विपीन इटनकर यांनी कळविले आहे.

0000

 नांदेड जिल्ह्यात 5 व्यक्ती कोरोना बाधित

 

नांदेड (जिमाका) दि. 28 :- जिल्ह्यात आज प्राप्त झालेल्या 149 अहवालापैकी आरटीपीसीआर तपासणीद्वारे नांदेड ग्रामीण 1 तर ॲटीजन तपासणीद्वारे नांदेड मनपा 1, माहूर 2, बिलोली 1 असे एकूण 5 अहवाल कोरोना बाधित आढळले आहेत. जिल्ह्यात आजवर एकुण बाधितांची संख्या 1 लाख 3 हजार 117 एवढी झाली असून यातील 1 लाख 385 रुग्णांना उपचारानंतर बरे झाल्याने रुग्णालयातून सुट्टी देण्यात आलेली आहे. आजच्या घडीला 40 रुग्ण उपचार घेत आहेत.

 

जिल्ह्यात आतापर्यंत बाधित मृत रुग्णांची संख्या 2 हजार 692 एवढी आहे. नांदेड मनपा अंतर्गत गृह विलगीकरणात 3  व नांदेड जिल्ह्यातील तालुक्यातर्गंत गृह विलगीकरणातील 6 असे एकूण 9  रुग्णाला उपचारानंतर बरे झाल्याने सुट्टी देण्यात आली. नांदेड जिल्ह्यातील तालुक्याअंतर्गत गृह विलगीकरण 14, नांदेड मनपा अंतर्गत गृहविलगीकरणातील 18, शासकीय वैद्यकीय महाविद्यालय विष्णुपुरी 7 खाजगी रुग्णालय 1 असे एकुण 40  व्यक्ती उपचार घेत आहेत.

 

जिल्ह्यातील कोरोनाचा प्रादुर्भाव कमी करण्यासाठी सेवाभावी संस्था, प्रतिनिधी आणि जागरुक नागरिकांनी आरोग्य जागराच्या चळवळीत सहभाग घ्यावा. याचबरोबर मास्क, सॅनिटायझर, सुरक्षित अंतर आणि लसीकरण याबाबत व्यापक जनजागृती करुन अनावश्यक घराबाहेर पडणे टाळावे, असे आवाहन जिल्हाधिकारी डॉ. विपीन इटनकर यांनी केले आहे.

 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 9 लाख 12 हजार 439
एकुण निगेटिव्ह स्वॅब- 7 लाख 91 हजार 943
एकुण पॉझिटिव्ह बाधित व्यक्ती- 1 लाख 3 हजार 117
एकूण रुग्णालयातून सुट्टी दिलेली संख्या- 1 लाख 385
एकुण मृत्यू संख्या-2 हजार 692
उपचारानंतर बाधित रुग्ण बरे होण्याचे प्रमाण 97.35 टक्के
आज स्वॅब तपासणी अनिर्णीत संख्या-00
आज स्वॅब नाकारण्यात आलेली संख्या- 02
आज प्रलंबित स्वॅब तपासणी संख्या-निरंक
रुग्णालयात उपचार घेत असलेले बाधित व्यक्ती-40
आज रोजी अतिगंभीर प्रकृती असलेले-00
0000

किटकनाशक फवारणी करतांना

शेतकऱ्यांनी अशी घ्यावी काळजी

-         कृषि विकास अधिकारी डॉ.टी.जी. चिमणशेट्टे

 

नांदेड (जिमाका) दि. 28 :-  पिकावर रोगाचा प्रादुर्भाव होवू नये म्हणून शेतकरी किटकनाशकांची फवारणी करतात. शेतात किड, रोग किंवा तणाचे नियंत्रण करण्यासाठी शेतकरी विविध रासायनिक औषधे फवारतात. ही रासायनिक औषधे फवारतांना मुख्यत तीन प्रकारचा धोका निर्माण होऊ शकतो. हा धोका टाळण्यासाठी शेतकऱ्यांनी पिकावर फवारणी करताना काळजी घ्यावी, असे आवाहन जिल्हा परिषदेचे कृषि विकास अधिकारी  डॉ. टी.जी. चिमणशेट्टे यांनी केले आहे.

 

शेतात किटकनाशके, तणनाशके वापरतांना घ्यावयाची काळजी :

रासायनिक औषधाचे अत्यंत बारीक कण श्वासोश्वासासोबत शरीरात जातात. फवारणी करीत असतांना त्वचेच्या संपर्कामधुन तथा डोळयाद्वारे शरीरात जातात. फवारणी करतांना नकळत तोंडाद्वारे खातांना  बीडी  पितांना शरीरात जाऊ शकतात.

किटकनाशके फवारणी करतांना सर्वसाधारणपणे घ्यावयाची काळजी :

गळके फवारणी यंत्र न वापरता ते दुरुस्त करुन वापरावे. किटकनाशके फवारणी यंत्रात भरताना सांडू नये यासाठी नरसाळयाचा (चाडीचा) वापर करावा. तणनाशके फवारणीसाठी वेगळा पंप वापरावा. तो पंप किटकनाशके वापरतांना संरक्षण कपडे वापरावेत. फवारणीसाठी  वापरलेले सर्व साहित्य पाण्याने स्वच्छ धुवून ठेवावेत. झिजलेले, खराब झालेले नोझल्स बदलून घ्यावेत. किटकनाशकाला हुंगणे किंवा त्याचा वास घेणे टाळावे. फवारणीचे मिश्रण हाताने न ढवळता लांब दांडयाचा किंवा काठीचा वापर करावा. किटकनाशके पोटात जाण्याची शक्यता असल्याने फवारणीचे मिश्रण करताना अथवा फवारणीच्या वेळी तंबाखू खाणे अथवा धुम्रपान करणे टाळावे. फवारणीचे काम पुर्ण झाल्यावर हात साबनाने स्वच्छ धुवून खाणे -पिणे करावे. फवारणीच्या वेळी लहान मुले, जनावरे, पाळीव प्राणी यांना त्या ठिकाणापासून दुर ठेवावे. उपाशीपोटी फवारणी न करता फवारणीपुर्वी न्याहारी करावी. फवारणी करतांना वापरलेली भांडी इ. साहित्य नदी, नाला किंवा विहीरी जवळ धुवू नयेत. तर धुतांना वापरलेले पाणी त्यात विषारी अवशेष असल्याने पडी  जमिनीत अथवा मातीत गाडावे. किटकनाशक रिकाम्या बाटल्या वापरानंतर नष्ट करुन टाकाव्यात. फवारणी करतांना नोझल बंद पडल्यास ते स्वच्छ करण्यासाठी तोंड लावून फुकू नये अथवा हवा तोंडाने आत ओढू नये. यासाठी सोयीस्कार तार, काडी किंवा टाचणी वापरावी. किटकनाशक फवारतांना अंगावर पडू नये म्हणून वाऱ्यांच्या विरुध्द दिशेने फवारणी करु नये. किटकनाशक फवारतांना संरक्षक पोशाख, चष्मा, हातमोजे यांचा वापर केल्याशिवाय फवारणी करु नये. किटकनाशके मारलेल्या क्षेत्रावर गुरांना चरण्यास किमान दोन आठवडे जावू देऊ नये. जमिनीवर सांडलेले किटकनाशक हातांनी न पुसता व त्यावर पाणी न टाकता ती माती / चिखल यांच्या साहयाने शोषुन घ्यावेत व जमिनीत गाडून टाकावीत. डब्यावरील मार्गदर्शक चिन्हाकडे कळजीपुर्वक लक्ष घ्यावे. लाल रंगाचे चिन्ह / खुणा असलेली औषधी विषारी असून त्यानंतर पिवळा, निळा व हिरवा असा कृम लागतो. कृषि विद्यापीठाने पिकास शिफारस केल्यानुसार किटकनाशक मात्रा वापरावी, जास्त मात्रा वापरु नये. एका पेक्षा जास्त किटकनाशकाचे मिश्रण फवारणी करतांना वापरावे टाळावे. किटकनाशक फवारणीसाठी वापरतांना व खरेदी करतांना त्याची अंतिम मुदत तपासावी.

विषबाधा झाल्याची लक्षणे व उपाययोजना :

विषबाधा ही किटकनाशके / तणनाशके यांचा त्यांचेशी संपर्क किंवा पोटात गेल्यास होते. विषबाधा व इतर आजार यांच्या लक्षणात बरेचदा साम्य राहू शकते.

विषबाधाची लक्षणे :

अशक्तपणा व चक्कर येणे. त्वचेची जळजळ होणे, डाग पडणे, घाम येणे. डोळयाची जळजळ होणे, पाणी येणे, अधुंक दिसणे. तोंडातून लाल गळणे, तोंडाची आग होणे, उलटी येणे, मळमळणे, हगवण होणे, पोटात दुखणे. डोकेदुखी, अस्वस्थ होणे, स्नायुदुखी, जिभ ळुली पडणे, बेशुध्द होणे, धाप लागणे, छाती दुखणे, खोकला येणे.

 

विषबाधेची शंका असल्यास खात्री करा : रोग्याचा  किटकनाशकांसह संपर्क आला होता काय? नेमके कोणते किटकनाशके वापरले? शरीरात किती गेले? व केंव्हा गेले? डॉक्टरांसाठी  वरील माहिती महत्वाची आहे.

विषबाधेवर तातडीने करावयाचे प्रथमोपचार :

किटकनाशके / तणनाशके डोळयांत उडाल्यास, तात्काळ डोळे स्वच्छ पाण्याने 5 मिनीटापर्यंत पाण्याची धार सोडून धुवावे. शरीरावर उडाले असल्यास 10 मिनिटे साबणाने स्वच्छ धुवावे व दवाखान्यात न्यावे. विषबाधे नंतर रोगी जर पुर्ण शुध्दीवर असेल तरच उलटी करण्यास प्रवृत्त करावे. अन्यथा 3 चमचे बारीक लाकडी  कोळसा भुकटी करुन अर्धा ग्लास पाण्यातून पाजा व लगेच दवाखान्यात न्या. विषारी औषध कपडयावर उडाले असल्यास ते कपडे लगेच बदला व रोग्यास शक्य तितक्या लवकर दवाखान्यात पोहचवा.

00000