तात्पुरता फटाका परवाना अर्ज विक्रीस मुदतवाढ

 

नांदेड (जिमाका) दि. 26 :- दिपावली सण 2023 अनुषंगाने तात्‍पुरता फटाका परवाना अर्ज विक्री व स्विकारण्‍याच्‍या कालावधीस दिनांक  3 नोव्‍हेंबर 2023 पर्यत मुदतवाढ देण्‍यात आली आहे. या व्‍यतीरिक्‍त दिनांक 6 ऑक्‍टोबर 2023 रोजी दिलेल्या अटी  व शर्ती कायम राहतील, असे जिल्हादंडाधिकारी अभिजीत राऊत यांनी सांगितले आहे.  

 

वर्ष-2023 मध्‍ये दिपावली उत्‍सव हा दिनांक 9  ते 15  नोव्‍हेंबर 2023 या कालावधीत साजरा होत आहे. त्‍यानुषंगाने नांदेड महानगरपालिका हद्दीतील तात्‍पुरता फटाका परवाना सेतू समिती जिल्‍हाधिकारी कार्यालय नांदेड यांच्‍या मार्फत व जिल्‍हयातील उपविभागीय कार्यालयामार्फत त्‍यांच्‍या कार्यक्षेत्रातील तात्‍पुरते फटाका परवाना अर्ज विस्‍फोटक अधिनिमय 2008 नुसार दिनांक 9 ते  23 ऑक्‍टोबर 2023 या कालावधीत विक्री व स्विकारले जाणार होते. तथापी सदर तात्‍पुरते फटाका परवाना अर्ज विक्री व स्विकारण्‍याच्‍या कालावधीची मुदतवाढ 3 नोव्‍हेंबर 2023 पर्यंत देण्‍यात आली आहे, असेही जिल्हादंडाधिकारी अभिजीत राऊत यांनी स्पष्ट केले आहे.

00000

केंद्रीय वित्त राज्यमंत्री डॉ. भागवत कराड यांचा दौरा

 

नांदेड (जिमाका) दि. 26 :- केंद्रीय वित्त राज्यमंत्री डॉ. भागवत कराड हे शनिवार 28 ऑक्टोबर 2023 रोजी नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील.

 

शनिवार 28 ऑक्टोबर 2023 रोजी मुंबई येथून देवगिरी एक्सप्रेसने सकाळी 8.50 वा. नांदेड रेल्वे स्टेशन येथे आगमन. सकाळी 9 वा. रेल्वे स्टेशन येथून नियोजन भवनकडे वाहनाने प्रयाण. सकाळी 9.30 वा. जिल्हाधिकारी कार्यालय परिसरातील नियोजन भवन मुख्य सभागृह येथे आगमन व सकाळी 10 ते सायं. 5 वाजेपर्यंत रोजगार मेळाव्यास उपस्थिती. सायं 5 वा. नियोजन भवन मुख्य सभागृह येथून वाहनाने छत्रपती संभाजीनगरकडे प्रयाण करतील.

0000 

 परदेशातून आयात केलेले फटाके व त्‍यांच्‍या विक्रीस प्रतिबंध  

अन्यथा कायदेशीर कठोर कारवाई

-   जिल्हादंडाधिकारी अभिजीत राऊत

 

नांदेड (जिमाका) दि. 26 :- राज्य शासनाच्या गृह विभागाच्या परिपत्रकानुसार आगामी दिपावली सणाच्या पार्श्वभुमीवर विदेशातून अनधिकृतपणे आयात केलेले फटाक्यांची साठवणूक व विक्रीस प्रतिबंध करण्याकरीता फटाके विक्रीला परवानगी देणारे सर्व यंत्रणांना जिल्हादंडाधिकारी तथा जिल्हाधिकारी अभिजीत राऊत यांनी योग्य त्या खबरदारीचे निर्देश दिले आहेत.  

 

विदेशी फटाक्यांची साठवणूक, विक्री व वितरण होणार नाही याकरिता संबंधित यंत्रणांना सतर्क राहतील व नियमित तपासणी करतील. विदेशी फटाक्यांची साठवणूक, विक्री व वितरण होत असल्याच्या बाबी निदर्शनास आल्यास त्याबाबत कायदेशीर कठोर कारवाई करण्याचे जिल्हादंडाधिकारी यांनी निर्देश दिले आहेत. सर्व फटाका आस्थापनांची सर्व समावेशक तपासणी करुन प्रतिबंधात्मक उपाययोजनेमध्ये सर्व ई कॉमर्स कंपनी व स्थानिक विक्रेते यांच्या मार्फत विदेशातून अनधिकृतपणे आयात केलेल्या फटाक्यांची व स्थानिक पातळीवर अनधिकृतपणे उत्पादित केलेल्या फटाक्यांची विक्री होणार नाही याची दक्षता घेण्याचे सांगितले आहे.

 

उपविभागीय दंडाधिकारी यांनी दिपावली सणाच्या पार्श्वभूमीवर किरकोळ फटाके विक्री करण्याचे परवाने मंजूर करतांना विदेशातून अनधिकृतपणे आयात केलेले फटाक्यांची साठवणूक व विक्रीस प्रतिबंध करण्याकरीता निर्देश दिले आहेत.  मा. सर्वोच्च न्यायालयाने रिट याचिका (सिव्हिल) क्रमांक 728/2015 मध्ये दिनांक 23 ऑक्टोबर 2018 व दिनांक 31 ऑक्टोबर 2018 रोजी दिलेल्या मार्गदर्शक सूचनांचे काटेकोर पालन व्हावे यासाठी या सर्व सूचना सर्व परवानाधारकांच्या निदर्शनास आणून दिल्या पाहिजेत.

 

विदेशातून अनधिकृतपणे आयात केलेले आणि स्थानिक पातळीवर अनधिकृतपणे उत्पादित केलेले फटाके जवळ बाळगणे, त्यांचा साठा करणे आणि त्यांची विक्री करणे कायद्यानुसार अवैध आणि दंडनिय आहे. अशा फटाक्यांची जर कोणी साठवणूक अथवा विक्री करत असल्याचे आढळल्यास जनतेने स्वयंप्रेरणेने त्यांच्या क्षेत्रातील नजीकच्या पोलीस ठाण्यात याबाबत तक्रार करण्याचे आवाहन जिल्हादंडाधिकारी यांनी केले आहे.

 

आगामी दिपावली सणाच्या कालावधीत आयुक्त, नांदेड वाघाळा शहर महानगरपालिका, नांदेड, सर्व उपविभागीय दंडाधिकारी, सर्व तालुका दंडाधिकारी जि.नांदेड व सर्व मुख्याधिकारी (नगरपालिका/ नगरपंचायत) जि.नांदेड यांनी त्यांच्या कार्यक्षेत्रात भरारी पथकाची नियुक्ती करण्याचे सांगितले आहे.  सदर भरारी पथक नियमानुसार कारवाई करतील, असेही जिल्हादंडाधिकारी यांनी परिपत्रकान्वये स्पष्ट केले आहे.

00000

 वृत्त 

 

सारथी व अण्णासाहेब पाटील आर्थिक मागास विकास

महामंडळाच्या योजनांसाठी होणार विशेष कॅम्प

 

लाभार्थ्यांना योजनांची माहिती देण्यासह अर्जांचाही होणार स्वीकार

बँकांच्या प्रतिनिधीसह संबंधित योजनांच्या अधिकाऱ्यांवर जबाबदारी

 

नांदेड (जिमाका) दि. 26 :- महाराष्ट्र शासनामार्फत सारथी व अण्णासाहेब पाटील आर्थिक मागास विकास महामंडळाच्या माध्यमातून विविध योजना युवकांपर्यंत पोहोचविल्या जात आहेत. मराठा समाजाच्या सर्वांगीन विकासासाठी मुख्यमंत्री एकनाथ शिंदे यांच्या अध्यक्षतेखाली नुकतीच बैठक आयोजित करण्यात आली होती. या बैठकीत त्यांनी महत्वपूर्ण निर्देश दिले आहेत. या निर्देशानुसार सामान्य प्रशासन विभागाचे सचिव सुमंत भांगे यांनी मराठा समाजातील युवकांना योजनांचा अधिकाधिक लाभ घेता यावा यादृष्टीने प्रत्येक जिल्ह्यासाठी कार्यक्रमाची रूपरेषा निश्चित करून दिली आहे.

 

या रुपरेषेनुसार जिल्हा पातळीवर कॅम्प अर्थात शिबिराचे आयोजन केले जाणार आहे. यात सारथी व अण्णासाहेब पाटील आर्थिक मागास विकास महामंडळाची सर्व माहिती नागरिकांना देणे, लाभार्थ्याचे अर्ज स्वीकारणे, योजनेबाबत सविस्तर माहिती पोहोचविणे, संवाद साधने यावर भर दिला जाईल.

 

सारथी संस्थेमार्फत घेण्यात येणारे कार्यक्रम

सारथी संस्थेमार्फत राबविण्यात येणाऱ्या विविध योजनांची माहिती देण्यासाठी चर्चासत्र आयोजित करण्याचे निर्देश देण्यात आले आहेत. या चर्चासत्राच्या माध्यमातून लाभधारकांशी संवाद साधण्यासह त्यांच्या मनातील ज्या काही शंका असतील तर त्याचेही निरसन केले जाणार आहे.

 

20 हजार उमेदवारांना रोजगारक्षम कौशल्य प्रशिक्षण

छत्रपती शाहू महाराज संशोधन प्रशिक्षण व मानव विकास संस्था (सारथी) अंतर्गत महाराष्ट्र राज्य कौशल्य विकास सोसायटीस सन २०२३- २४ या वर्षात मराठा, कुणबी व कुणबी मराठा अशा एकूण 20 हजार उमेदवारांना रोजगारक्षम कौशल्य प्रशिक्षण देण्याचे उद्दिष्ट दिले आहे. त्यासाठी कौशल्य प्रशिक्षण व अभ्यासक्रमाची मागणी नोंदणीचा अर्ज विद्यार्थ्यांकडून भरून घेण्याबाबत सूचना देण्यात आल्या आहेत. एमपीएससी, यूपीएससी व इतर स्पर्धा परीक्षा प्रशिक्षणासाठी अर्ज भरून सारथी संस्थेचे माहितीपत्रक वाटप करण्यासोबत एमकेसीएल मार्फत प्रशिक्षण घेत असलेल्या यशस्वी विद्यार्थ्यांशी संवाद साधता येईल.

 

अण्णासाहेब पाटील आर्थिक मागास विकास

महामंडळामार्फत घेण्यात येणारे कार्यक्रम

मराठवाडा विभागातील सर्व जिल्ह्यांमध्ये तालुकानिहाय प्रत्येक ग्रामपंचायतींपर्यंत योजनेची माहिती देण्यात येणार आहे. तालुक्याच्या ठिकाणी मेळाव्याचे आयोजन करून त्याच ठिकाणी महामंडळाचे नोंदणी करण्यासंदर्भात नियोजन करण्यात येणार आहे. महामंडळाच्या माध्यमातून लाभार्थ्यांना त्वरित व्याज परतावा देण्यासंदर्भात कार्यवाही सुरु करण्याबाबत सूचना देण्यात आल्या आहेत.

कृषि उद्योग व्यवसायासाठी विशेष मेळावे

मेळाव्याच्या ठिकाणी बँकेचे अधिकारी कर्मचारी तसेच काही छोट्या उद्योगाबाबत आणि कृषी अधिकाऱ्यांमार्फत कृषी संबंधी उद्योग सुरू करण्यासाठी आवश्यक माहिती देणारे अधिकारी-कर्मचारी उपस्थित राहून याबाबत माहिती देणार आहेत. संस्थांच्या विविध योजनांच्या लाभार्थ्याची निवड, व्यवसायातील प्रगती याबाबतची सारथी व अण्णासाहेब पाटील आर्थिक मागास विकास महामंडळ याबाबत नियमित आढावा घेणार आहे.

 

बँकांच्या प्रतिनिधीसह संबंधित योजनांच्या अधिकाऱ्यांवर जबाबदारी

सारथी व अण्णासाहेब पाटील आर्थिक मागास विकास महामंडळाच्या मार्फत राबविण्यात येणाऱ्या विविध योजनांची अंमलबजावणी करताना पात्र लाभार्थ्यांना तात्काळ योजनांचे लाभ मिळवून देण्याबाबतच्या शिबिराचे आयोजन संबंधित विभाग प्रमुख, बँक अधिकारी, यांच्या समन्वयातून केले जाईल.

 

सारथी तसेच अण्णासाहेब पाटील आर्थिक मागास विकास महामंडळाच्या विविध योजनांची माहिती सविस्तरपणे सांगून पात्र लाभार्थ्यांपर्यंत या संस्थांच्या योजना पोहोचविण्यासाठी प्रयत्न करण्यासोबत शिबिराचे आयोजन होईल. हे शिबीर यशस्वीरित्या करण्यासाठी जिल्हा प्रशासन, जिल्हा परिषद, महानगरपालिका, सारथी, अण्णासाहेब पाटील आर्थिक मागास विकास महामंडळ नियोजन करीत आहेत.

00000