नांदेड विधानपरिषद निवडणुकीसाठी

एका उमेदवाराचे नामनिर्देशन पत्र दाखल

नांदेड, दि. 1 :- महाराष्ट्र विधान परिषद , नांदेड स्थानीक प्राधिकारी मतदारसंघ निवडणूक-2016  साठी नामनिर्देशन पत्र दाखल करण्याच्या पाचव्या दिवशी आज अपक्ष उमेदवार म्हणून श्‍यामसुंदर दगडोजी शिंदे यांनी दोन नामनिर्देशनपत्रे दाखल केली आहेत, अशी माहिती निवडणूक निर्णय अधिकारी नांदेड जिल्हा स्थानीक प्राधिकारी मतदारसंघ नांदेड कार्यालयाकडून देण्यात आली. नामनिर्देशनपत्रे देण्याचा व स्विकारण्याचा आज पाचवा दिवस होता.   

00000000

केळी पिक संरक्षणासाठी

कृषि कार्यालयाचा संदेश

नांदेड दि. 1 –  कृषि कार्यालयांतर्गत मुदखेड व अर्धापूर तालुक्यात केळी पिकासाठी कीड व रोग सर्वेक्षण प्रकल्प राबविण्यात येत आहे. केळी पिकावर काही ठिकाणी करपा रोगाचा प्रादुर्भाव दिसून आला आहे. रोगाचा प्रसार रोखण्यासाठी शेतकऱ्यांनी केळी पिकावरील प्रादुर्भावग्रस्त वाळलेल्या फांद्या काढून टाकाव्यात. पिवळ्या रंगाचे डाग पानावर दिसून आल्यास त्वरीत कार्बेन्डॅझिम 50 डब्लु. पी. 0.1 टक्के एक ग्रॅम प्रती लिटर पाण्यात 1 मिली स्टीकर टाकून फवारणी करावी, असे आवाहन नांदेड उपविभागीय कृषि अधिकारी डॉ. व्ही. व्ही. भरगडे यांनी केले आहे.

0000000