Tuesday, November 17, 2026

वृत्त  

मुख्यमंत्री समृद्ध पंचायतराज अभियानाचा विभागस्तरीय पुरस्कार वितरण सोहळा १९ नोव्हेंबरला

दुष्काळावर मात आणि समृद्ध गावाचा संकल्प या विषयावर परिसंवाद ; 

उपमुख्यमंत्री सुनेत्रा पवार यांची प्रमुख उपस्थिती

छत्रपती संभाजीनगर, दि. १७ (विमाका) : मुख्यमंत्री समृद्ध पंचायतराज अभियानांतर्गत विभागस्तरीय पुरस्कार वितरण सोहळा आणि 'दुष्काळावर मात आणि समृद्ध गावाचा संकल्प' या विषयावरील परिसंवाद गुरुवार, दि. १९ नोव्हेंबर २०२६ रोजी सकाळी १० वाजता कॅम्ब्रिज चौक मैदान, जालना रोड, छत्रपती संभाजीनगर येथे आयोजित करण्यात आला आहे.

या कार्यक्रमास उपमुख्यमंत्री सुनेत्रा पवार यांची प्रमुख उपस्थिती लाभणार असून, पर्यावरण व वातावरणीय बदल मंत्री पंकजा मुंडे यांच्या विशेष उपस्थितीत आणि इतर मागास बहुजन कल्याण मंत्री अतुल सावे यांच्या अध्यक्षतेखाली कार्यक्रम होणार आहे. ग्रामविकास व पंचायतराज मंत्री जयकुमार गोरे यांच्यासह विविध विभागांचे मंत्री, लोकप्रतिनिधी आणि वरिष्ठ अधिकारी उपस्थित राहणार आहेत.

कार्यक्रमात मुख्यमंत्री समृद्ध पंचायतराज अभियान २.० अंतर्गत राबविण्यात येणाऱ्या उपक्रमांचे सादरीकरण, जलसंधारण, जलसुरक्षा व दुष्काळ निवारणाच्या उपाययोजनांबाबत तज्ज्ञांचे मार्गदर्शन होणार आहे. तसेच उल्लेखनीय कामगिरी करणाऱ्या ग्रामपंचायतींच्या यशोगाथा मांडण्यात येणार असून, सन २०२५-२६ मधील पुरस्कारप्राप्त ग्रामपंचायतींना विभागस्तरीय पुरस्कार प्रदान करण्यात येणार आहेत.

या कार्यक्रमाचे आयोजन छत्रपती संभाजीनगर विभागीय प्रशासनाच्या वतीने करण्यात आले आहे.

****

 महात्मा जोतीराव फुले यांच्या द्विजन्मशताब्दी वर्षानिमित्त त्यांच्या ऐतिहासिक व परिवर्तनवादी कार्याला अभिवादन !


 अमर क्रांतिकारकाला अभिवादन

भगवान बिरसा मुंडा हे केवळ स्वातंत्र्यलढ्यातील क्रांतिकारक नव्हते, तर आदिवासी अस्मिता, स्वाभिमान आणि संघर्षाचे प्रेरणास्थान होते. त्यांचे विचार आणि कार्य येणाऱ्या अनेक पिढ्यांना अन्यायाविरुद्ध लढण्याची प्रेरणा देत राहतील. #BirsaMunda #जनजातीयगौरवदिवस



 वृत्त क्रमांक

स्वाधार योजनेच्या अर्जांसाठी 30 नोव्हेंबरपर्यंत मुदतवाढ!

• अनुसूचित जातीच्या पात्र विद्यार्थ्यांनी नवीन, नूतनीकरणाचे अर्ज व प्रलंबित त्रुटींची पूर्तता करावी

नांदेड, दि. 17 : भारतरत्न डॉ. बाबासाहेब आंबेडकर स्वाधार योजनेंतर्गत शैक्षणिक वर्ष 2026-27 साठी पात्र विद्यार्थ्यांना नवीन अर्ज, नूतनीकरणाचे अर्ज तसेच प्रलंबित अर्जांतील त्रुटींची पूर्तता करण्यासाठी 30 नोव्हेंबर 2026 पर्यंत मुदतवाढ देण्यात आली आहे. अनुसूचित जातीतील 50 टक्क्यांपेक्षा अधिक गुणांनी उत्तीर्ण झालेल्या आणि समाजकल्याण विभागाच्या शासकीय वसतिगृहात प्रवेश न मिळालेल्या पात्र विद्यार्थ्यांनी या संधीचा लाभ घेऊन परिपूर्ण अर्ज सादर करावेत, असे आवाहन समाजकल्याण विभागाचे सहाय्यक आयुक्त शिवानंद मिनगिरे यांनी केले आहे.

महानगरपालिका क्षेत्रापासून पाच किलोमीटरच्या आत तसेच नगरपालिका, नगरपरिषद, नगरपंचायत आणि तालुक्याच्या ठिकाणी असलेल्या महाविद्यालयांत प्रवेश घेतलेल्या पात्र विद्यार्थ्यांसाठी ही योजना राबविण्यात येते. विद्यार्थ्यांनी https://hmasnew.mahait.org या संकेतस्थळावर नवीन अर्ज भरावेत. नूतनीकरणासाठी पूर्वीचा वापरकर्ता क्रमांक व परवलीचा शब्द वापरून आवश्यक कागदपत्रांसह अर्ज पूर्ण करावा. तसेच अर्जामध्ये त्रुटी आढळलेल्या विद्यार्थ्यांनी आवश्यक कागदपत्रे जोडून त्रुटींची पूर्तता निर्धारित मुदतीत करावी. मुदतीनंतर नूतनीकरणाचे अर्ज भरता येणार नसल्याने विद्यार्थ्यांनी विलंब न करता अर्जाची प्रक्रिया पूर्ण करावी व संकेतस्थळावर अर्जाची सद्यस्थिती तपासावी.

विद्यार्थ्यांनी सादर केलेल्या अर्जाची प्रत संबंधित महाविद्यालयातील समान संधी केंद्रात जमा करावी. योजनेसंदर्भातील अधिकृत माहिती व अडचणींचे निराकरण करण्यासाठी समाजकल्याण कार्यालयाच्या samajkalyannanded या अधिकृत फेसबुक व इन्स्टाग्राम पेजला अनुसरावे. तसेच कार्यालयामार्फत तयार करण्यात आलेल्या अधिकृत व्हॉट्सॲप गटात सहभागी व्हावे. अनधिकृत व्यक्ती किंवा गटांकडून माहिती घेणे टाळावे. काही अडचणी असल्यास समाजकल्याण कार्यालयातील संबंधित कर्मचाऱ्यांशी थेट संपर्क साधावा, असे आवाहन सहाय्यक आयुक्त शिवानंद मिनगिरे यांनी केले आहे.

***

वृत्त क्रमांक

दुष्काळात चारा लागवडीतून पशुधनाला आधार !

• रोहयोतून चारा पिकांसाठी आर्थिक मदत व रोजगार; शेतकऱ्यांनी लाभ घ्यावा

 जिल्हाधिकारी राहुल कर्डिले व सीईओ महेश पाटील यांचे आवाहन

नांदेड, दि. 17 : दुष्काळी परिस्थितीत पशुधनासाठी चारा उपलब्ध होण्याच्या दृष्टीने जिल्ह्यात चारा पीक लागवडीला प्रोत्साहन देण्यात येत आहे. महाराष्ट्र रोजगार हमी योजनेंतर्गत विकसित भारत रोजगार व आजीविका हमी मिशन (ग्रामीण) अंतर्गत चारा पिकांच्या लागवडीसाठी विशेष आर्थिक तरतूद करण्यात आली आहे. या योजनेमुळे पशुपालकांना चारा उपलब्ध होण्यासोबतच ग्रामीण भागातील मजुरांना स्थानिक पातळीवर रोजगाराच्या संधी मिळणार आहेत. त्यामुळे सिंचनासाठी पाणी उपलब्ध असलेल्या अधिकाधिक शेतकऱ्यांनी चारा पीक लागवड करून योजनेचा लाभ घ्यावा, असे आवाहन जिल्हाधिकारी राहुल कर्डिले व जिल्हा परिषदेचे मुख्य कार्यकारी अधिकारी महेश पाटील यांनी केले आहे.

मृद व जलसंधारण विभागाच्या (रोहयो प्रभाग) 6 नोव्हेंबर 2026 रोजीच्या शासन निर्णयानुसार विविध चारा पिकांच्या लागवडीसाठी रोपे, बियाणे, मजुरी व सामग्री यासाठी आर्थिक तरतूद निश्चित करण्यात आली आहे. त्यानुसार मका लागवडीसाठी हेक्टरी 47 हजार 307 रुपये व 95 मनुष्यदिवस, ज्वारीसाठी 42 हजार 778 रुपये व 88 मनुष्यदिवस, तर बाजरीसाठी 35 हजार 505 रुपये व 74 मनुष्यदिवस रोजगार उपलब्ध होणार आहे. नेपिअर गवत लागवडीसाठी 76 हजार 31 रुपये व 155 मनुष्यदिवस, मेथी घास (ल्युसर्न) लागवडीसाठी 1 लाख 13 हजार 290 रुपये व 270 मनुष्यदिवस, ज्वारी मल्टीकटसाठी 52 हजार 36 रुपये व 100 मनुष्यदिवस, तर बाजरी मल्टीकटसाठी 76 हजार 45 रुपये व 180 मनुष्यदिवस रोजगाराची तरतूद करण्यात आली आहे.

दुष्काळी परिस्थितीत चारा टंचाईमुळे पशुधनाच्या संगोपनाचा प्रश्न निर्माण होऊ नये, यासाठी उपलब्ध सिंचनाच्या पाण्याचा उपयोग करून चारा पिकांची लागवड करणे आवश्यक आहे. या उपक्रमामुळे जनावरांसाठी चाऱ्याची उपलब्धता वाढण्यासोबतच पशुपालकांना आर्थिक दिलासा मिळणार आहे. तसेच ग्रामीण भागातील मजुरांना रोजगारही उपलब्ध होणार आहे. त्यामुळे इच्छुक शेतकऱ्यांनी चारा पीक लागवडीसाठी संबंधित पंचायत समिती कार्यालय किंवा पशुसंवर्धन विभागाशी संपर्क साधून योजनेची माहिती घ्यावी व या संधीचा लाभ घ्यावा, असे आवाहन जिल्हा प्रशासनाच्या वतीने करण्यात आले आहे.

****

वृत्त क्रमांक

दिवाळी अंकांच्या साहित्यिक मेजवानीतून वाचनसंस्कृतीला प्रोत्साहन!

• नांदेड जिल्हा ग्रंथालयात दीडशेहून अधिक दिवाळी अंकांचे प्रदर्शन

• जिल्हा नियोजन अधिकारी सुधाकर चिंचाणे यांच्या हस्ते उद्घाटन

नांदेड, दि.17 : दिवाळी अंकांची समृद्ध परंपरा जपत वाचनसंस्कृतीला प्रोत्साहन देण्याच्या उद्देशाने जिल्हा ग्रंथालय अधिकारी कार्यालय व डिजिटल उपकेंद्र, नांदेड यांच्या वतीने आयोजित दीडशेहून अधिक दिवाळी अंकांच्या प्रदर्शनाचे उद्घाटन जिल्हा नियोजन अधिकारी सुधाकर चिंचाणे यांच्या हस्ते करण्यात आले. बहुउद्देशीय सांस्कृतिक संकुल, स्टेडियम परिसरातील शंकरराव चव्हाण प्रेक्षागृहाशेजारील जिल्हा ग्रंथालय अधिकारी कार्यालयात हे प्रदर्शन भरविण्यात आले आहे.

या प्रदर्शनात दिवाळीनिमित्त प्रकाशित झालेले नामवंत नियतकालिकांचे विशेषांक तसेच कला, संस्कृती, साहित्य, बालसाहित्य, कथा, कविता, वैचारिक लेख, विज्ञान आणि महिला विषयक विविध दिवाळी अंक वाचकांसाठी उपलब्ध करून देण्यात आले आहेत. मराठी साहित्यात दिवाळी अंकांची अनेक दशकांची समृद्ध परंपरा असून, महाराष्ट्राच्या वैचारिक, सामाजिक व सांस्कृतिक जडणघडणीत या अंकांचे महत्त्वपूर्ण योगदान आहे. नवोदित लेखकांना आपले विचार आणि लेखन मांडण्यासाठी दिवाळी अंक महत्त्वाचे व्यासपीठ ठरत असल्याचे सुधाकर चिंचाणे यांनी यावेळी नमूद केले. नांदेड जिल्ह्यातील वाचक, अभ्यासक आणि साहित्यिकांनी या प्रदर्शनाला भेट देऊन साहित्याचा लाभ घ्यावा, असे आवाहनही त्यांनी केले.

या कार्यक्रमाचे प्रास्ताविक जिल्हा ग्रंथालय अधिकारी अनिल सूर्यवंशी यांनी केले. हे प्रदर्शन पुढील पंधरा दिवस सर्वांसाठी विनामूल्य खुले राहणार आहे. दिवाळीच्या सुट्ट्यांमध्ये विद्यार्थी, शिक्षक, साहित्यप्रेमी आणि अभ्यासकांनी या प्रदर्शनाला भेट देऊन साहित्यिक मेजवानीचा आस्वाद घ्यावा, तसेच अधिकाधिक नागरिकांनी सार्वजनिक ग्रंथालयाचे सभासद व्हावे, असे आवाहन अनिल सूर्यवंशी यांनी केले.

यावेळी सहाय्यक नियोजन अधिकारी निखिल बासटवार, अजय वट्टमवार, श्रीनिवास इज्जपवार, रघुवीर श्रीरामवार, राजीव पाटील, शंकर शिंदे, गोविंद वाघमारे, दिगंबर शिंदे, रोहित सूर्यवंशी यांच्यासह विद्यार्थी व विद्यार्थिनी उपस्थित होते. 

***





वृत्त   मुख्यमंत्री समृद्ध पंचायतराज अभियानाचा विभागस्तरीय पुरस्कार वितरण सोहळा १९ नोव्हेंबरला दुष्काळावर मात आणि समृद्ध गावाचा संकल्प या वि...