वृत्त क्र. 243  

किनवट तालुक्यातील भंडारवाडी "मधाचे गाव" घोषित

 

नांदेड दि. 14 :- किनवट तालुक्यातील भंडारवाडी हे गाव मराठवाड्यातील पहिले व महाराष्ट्रातील चौथे मधाचे गाव म्हणून नावलौकिकास आले आहे.  महाराष्ट्र राज्य खादी व ग्रामोद्योग मंडळाचे सभापती रविंद्र साठे यांनी दिनांक 12 मार्च 2024 रोजी ही घोषणा केली. मंडळाचा उपक्रम शेती आणि पर्यावरणपूरक असून किनवट तालुक्यातील मौजे भंडारवाडी हे मराठवाड्यातील पहिले मधाचे गाव निर्माण होणार असल्याची घोषणा महाराष्ट्र राज्य खादी व ग्रामोद्योग मंडळाने येथे जाहीर केले आहे.

 

भंडारवाडी ग्रामपंचायतच्या संयुक्त विद्यमाने मधाचे गाव या कार्याक्रमाचे शुभारंभ सोहळा 12 मार्च 2024 रोजी झाला. या गावातील ग्रामपंचायत आवारात कार्यक्रमाचे आयोजन करण्यात आले होते. या कार्यक्रमास मंडळाचे सभापती रविंद्र साठे व किनवटचे सहाय्यक जिल्हाधिकारी श्रीमती कावली मेघणा, उपमुख्य कार्यकारी अधिकारी (उद्योग) बिपीन जगताप, तहसिलदार श्रीमती शारदा चौडेकर, जिल्हा अधिक्षक कृषी अधिकारी भाऊसाहेब बराटे, तालुका कृषी अधिकारी बालाजी मुळे, जिल्हा ग्रामोद्योग अधिकारी संजय सारंगधर, भंडारवाडीचे सरपंच अभिमन्यु गादेवाड व उपसरपंच अमोल केंद्रे, निरीक्षक (मध योजना) डी. व्ही. सुत्रावे, त्याचबरोबर ग्रामसेवक तुपकर व मंडळाचे इतर कर्मचारी आणि ज्ञानेश्वर जेवलेवाड, समस्त गावकरी मंडळी उपस्थित होते.

 

पंतप्रधानाच्या मधक्रांती आवाहनाला सकरात्मक प्रतिसाद देत भंडारवाडी या गावाला मधाचे गाव म्हणून घोषित करण्यात आले आहे. प्रत्येक जिल्ह्यातील एका गावाची निवड तसेच गाव येथे मधपेटीची गरज मंडळाचे सभापती रविंद्रजी साठे यांनी यावेळी सांगितले. या व्यवसायातून आत्मनिर्भर भारताचे स्वप्न साकारेन तर मधमाशी वाचविण्याच्या चळवळीची आवश्यकता त्यांनी व्यक्त केली.

 

राज्यात मधाचे गाव ही संकल्पना मोठ्याप्रमाणात राबविण्यात येत आहे. मधाचे गाव म्हणून भंडारवाडी या गावाची ओळख निर्माण होणार आहे. या गावात मधुबन आणि मधाची निर्मिती मोठ्या प्रमाणात होणार असल्याची माहिती उपमुख्य कार्यकारी बिपीज जगतात यांनी दिली. सदरील मधाचे गाव ही संकल्पना   रवींद्र साठे सभापतीआणि मुख्य कार्यकारी अधिकारी श्रीमती आर विमला, जिल्हाधिकारी अभिजीत राऊत यांच्या मार्गदर्शनाखाली राबविण्यात येणार आहे.

00000

 वृत्त क्र. 242  

लिडकॉम आपल्या दारी कार्यशाळा संपन्न

 

नांदेड दि. 14 :- सामाजिक न्याय व विशेष सहाय्य विभागाच्या संत रोहिदास चर्मद्योग व चर्मकार विकास महामंडळ मर्या. नांदेड यांच्यावतीने “शासन आपल्या दारी” या संकल्पनेतुन लिडकॉम आपल्या दारी ही कार्यशाळा  सामाजिक न्याय विभागाचे सचिव सुमंत भांगे तसेच लिडकॉम मुंबईचे व्यवस्थापकीय संचालक धम्मज्योती गजभिये यांच्या मार्गदर्शनातून नांदेड येथील डॉ. बाबासाहेब आंबेडकर सामाजिक न्याय भवन सभागृहात “लिडकॉम आपल्या दारी” कार्यशाळा सोमवार 11 मार्च 2024 रोजी संपन्न झाली. ही कार्यशाळा जिल्हाधिकारी अभिजीत राऊत यांच्या अध्यक्षतेखाली पार पाडली.

 

यावेळी अप्पर जिल्हाधिकारी पांडुरंग बोरगावकर, समाज कल्याण सहायक आयुक्त शिवानंद मिनगीरे, समतादूत बार्टी श्रीमती सुजाता पोहरे, रा.च. महासंघ महाराष्ट्र प्रदेश अध्यक्ष माधवराव गायकवाड, अ.भा.गुरू रविदास समता परिषद संस्थापक इंजि. चंद्रप्रकाश देगलूरकर, लिडकॉम जिल्हा व्यवस्थापक अरूण राऊत, कर्मचारी सुनिल गोवंदे, दिपाली स्वामी, सुरेखा कांबळे यांची उपस्थिती होती.

 

मोठया प्रमाणात महामंडळ स्वरोजगारासाठी कर्ज पुरवठा व शैक्षणीक कर्ज उपलब्ध आहे. महामंडळ स्वरोजगारासाठी कर्ज पुरवठा व शैक्षणिक कर्ज उपलब्ध करून देत असल्याने चर्मकार समाजाने पुरेपुर लाभ घ्यावा, असे प्रतिपादन जिल्हाधिकारी अभिजीत राऊत यांनी केले. तसेच तरूण पिढीला व्यवसायाकडे वळविण्यासाठी मार्गदर्शन केले. महामंडळ व समाज बांधवांना सुवर्ण जयंती वर्षानिमित्त व संत रोहिदास महाराज यांच्या 647 व्या जयंती निमित्त त्यांनी शुभेच्छा दिल्या.

 

जिल्हा व्यवस्थापक अरूण राऊत यांनी प्रास्ताविकात महामंडळामार्फत राबविण्यात येणाऱ्या विविध योजनांची माहिती चर्मकार बांधवाना दिली. हे वर्ष महामंडळाचे सुवर्ण महोत्सवी सुरू असल्याने यामध्ये लाभार्थ्यांना व्याज दरात कपात झाली असून मोठया संख्यने योजनांचा लाभ घ्यावा, असे आवाहन अरुण राऊत यांनी केले. महामंडळाची उत्पादन केंद्र विक्री केंद्र व महाराष्ट्र उद्योजकता विका केंद्र प्रशिक्षण याबाबत सविस्तर माहिती दिली.

 

महाराष्ट्र उद्योजकता विकास केंद्राचे शंकर पवार यांनी शुभेच्छा देत महामंडळामार्फत देण्यात येणाऱ्या महाराष्ट्र उद्योजकता विकास केंद्राच्या प्रशिक्षणाचा जास्तीत जास्त चांभार, मोची, ढोर, होलार युवक-युवती उमेदवारांनी मिळवून घ्यावा, असे सांगीतले.

 

यानंतर महामंडळामार्फत कर्ज योजनेचे माहिती पत्रक व महामंडळाच्या दिनदर्शिका सर्व चर्मकार बांधवांना वाटप करण्यात आले. कार्यक्रमाची सुरूवात दिपप्रज्वलन आणि महापुरूषांच्या प्रतिमेस पुष्पहार अर्पण करून करण्यात आली. कार्यक्रमाचे सूत्रसंचालन रमेश हराळे यांनी केले. अरुण राउत यांनी सर्व प्रमुख पाहुण्याचे व चर्मकार बांधवाचे आभार मानले. कार्यक्रमाला मोठ्या संख्येने चर्मकार महिला व पुरूष उपस्थित होते.

00000

 वृत्त क्र. 241

नांदेडमध्ये सोमवारी कव्वाली महोत्सव

 

नांदेड दि. 14 : राज्याच्या सांस्कृतिक कार्य संचालनालयामार्फत महासंस्कृती, महानाट्य महोत्सवापाठोपाठ नांदेडमध्ये सोमवारी 18 मार्च रोजी कव्वाली महोत्सव होत आहे. राज्यभरातील विख्यात कव्वाली गायक यामध्ये सहभागी होत असून कव्वाली प्रेमी नागरिकांनी याचा लाभ घ्यावा, असे आवाहन जिल्हा प्रशासनाने केले आहे.

 

सांस्कृतिक कार्य संचालनालयातर्फे हा कार्यक्रम कुसुम सभागृह व्हीआयपी रोड नांदेड येथे होणार आहे. सायंकाळी 6.30 वाजता कव्वाली महोत्सवाला शुभारंभ होणार आहे. राज्याचे सांस्कृतिक कार्यमंत्री सुधीर मुनगंटीवार, राज्याचे ग्रामविकास व पंचायतराज पर्यटन मंत्री तथा नांदेडचे पालकमंत्री गिरीश महाजन यांच्यासह सर्व स्थानिक लोकप्रतिनिधींच्या उपस्थितीत हा कार्यक्रम होणार आहे.

 

नांदेड व परिसरातील कव्वाली प्रेमींनी या कार्यक्रमाचा आस्वाद घ्यावा, असे आवाहन जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी श्रीमती मीनल करनवाल, नांदेडचे जिल्हा पोलीस अधीक्षक श्रीकृष्ण कोकाटे, महानगरपालिका आयुक्त महेशकुमार डोईफोडे यांनी केले आहे.

00000

 वृत्त क्र. 240  

शनिवार व रविवारी नांदेडचा ग्रंथोत्सव

ग्रंथ प्रदर्शन व विविध कार्यक्रमांचे आयोजन

 

नांदेड दि. 14 :- पुस्तक प्रेमींसाठी यावर्षीचा ग्रंथोत्सव 16 व 17 मार्च रोजी शनिवार व रविवारी जिल्हा ग्रंथालय अधिकारी कार्यालय डॉ. शंकरराव चव्हाण प्रेक्षागृहाशेजारी गुरुगोविंद सिंघजी स्टेडियम परिसर येथे होणार आहे. या ग्रंथ प्रदर्शनाचे लाभ घ्यावे, असे आवाहन जिल्हा प्रशासनाने केले आहे.

 

राज्य शासनाच्या उच्च व तंत्र शिक्षण विभाग, ग्रंथालय संचालनालय महाराष्ट्र राज्य मुंबई, जिल्हा ग्रंथालय अधिकारी कार्यालय नांदेड यांच्या संयुक्त विद्यमाने महाराष्ट्र राज्याच्या सांस्कृतिक धोरण अंतर्गत नांदेड ग्रंथोत्सव 2023 चे आयोजन करण्यात आले आहे. ग्रंथ प्रदर्शन विक्री व विविध कार्यक्रमांचे आयोजन सकाळी दहा ते रात्री आठ वाजेपर्यंत होत आहे. रसिक वाचकांनी याचा लाभ घ्यावा, असे आवाहन करण्यात आले आहे.

 

दोन दिवसीय ग्रंथ प्रदर्शनामध्ये विविध कार्यक्रमांचे आयोजन करण्यात आले असून यामध्ये शनिवारी 16 मार्च रोजी सकाळी 8.30 ते 10.30 या काळात महात्मा फुले पुतळा ते कार्यक्रम स्थळापर्यंत ग्रंथदिंडीचे आयोजन करण्यात आले आहे. या ग्रंथदिंडीमध्ये अप्पर जिल्हाधिकारी पांडुरंग बोरगावकर, निवासी उपजिल्हाधिकारी महेश वाडकर, ज्येष्ठ पत्रकार संजीव कुलकर्णी, प्रजावाणीचे संपादक शंतनू डोईफोडे, दिगंबर क्षीरसागर, दत्ता डांगे यांच्यासह शाळकरी विद्यार्थी व अन्य मान्यवर सहभागी होणार आहेत.

 

सकाळी 11 वाजता ग्रंथ प्रदर्शनाचे उद्घाटन होणार असून मराठवाडा साहित्य संमेलनाचे अध्यक्ष डॉ. जगदीश कदम यांच्या शुभहस्ते हे उद्घाटन होणार आहे. कार्यक्रमाचे अध्यक्ष माजी शिक्षण संचालक लेखक व प्रसिद्ध वक्ते गोविंद नांदेड असतील .यावेळी व्यासपीठावर राज्याचे ग्रामविकास पंचायतराज व वैद्यकीय शिक्षण क्रीडा व युवक कल्याण मंत्री गिरीश महाजन, माजी मुख्यमंत्री अशोक चव्हाण, खासदार प्रताप पाटील चिखलीकर, लोकसभा सदस्य खासदार सुधाकर शृंगारे, खासदार हेमंत पाटील यांच्यासह जिल्ह्यातील सर्व मान्यवर लोकप्रतिनिधींची उपस्थिती असणार आहे.

 

दुपारी 2 ते 4 या कालावधीमध्ये सार्वजनिक ग्रंथालयासमोरील समस्या व उपाय या विषयावर चर्चासत्राचे आयोजन करण्यात आले आहे. यामध्ये रावसाहेब शेंदारकर, डॉ. गोविंद हंबर्डे, प्राध्यापक व्यंकट पावडे, बालाजी मार्लेवाड हे सहभागी होणार आहेत. दुपारी 4 ते सायं 6 याकालावधीत कथाकथनाचा कार्यक्रम होणार असून यामध्ये दिगंबर कदम, राम तरटे, शंकर विभुते, श्रीमती स्वाती कानेगावकर यांचा सहभाग असणार आहे.

 

रविवारी सकाळी 11 वाजता कवी संमेलनाचे आयोजन करण्यात आले असून या कवी संमेलनाचे अध्यक्ष श्रीमती डॉ. ललिता शिंदे असतील. यामध्ये पंडित पाटील, नारायण शिंदे, प्र. श्री. जाधव, अशोक कुमार दवणे, आनंद पोपुलवाड, श्रीनिवास मस्के, शेख जावेद, बालिका बर्गड, साईनाथ राहटकर, शंकर राठोड, व्यंकट आनेराय यांचा समावेश असणार आहे.

 

दुपारी 2 ते 4 या कालावधीत स्पर्धा परीक्षा काळाची गरज या विषयावर चर्चासत्र आयोजित करण्यात आले आहे. यामध्ये श्रीकांत देशमुख, डॉ. यशवंत चव्हाण सहभागी होणार आहे. समारोपाचा कार्यक्रम सायंकाळी 4 वाजता होत असून समारोपीय कार्यक्रमाचे अध्यक्ष डॉ. भगवान अंजनीकर असतील तर यावेळी शारदा कदम, राजू वाघमारे, बी. जी. देशमुख, राजेंद्र हंबीरे उपस्थित असतील. राज्य शासनाच्या या महत्त्वपूर्ण उपक्रमात नागरिकांनी सहभागी व्हावे व यानिमित्ताने होणाऱ्या ग्रंथ विक्रीचा लाभ घ्यावा, असे आवाहन जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी श्रीमती मीनल करनवाल, जिल्हा पोलीस अधीक्षक श्रीकृष्ण कोकाटे, महानगरपालिका आयुक्त डॉ. महेशकुमार डोईफोडे, ग्रंथोत्सव समन्वय समितीचे सदस्य सहाय्यक ग्रंथालय संचालक सुनील हुसे, शिक्षणाधिकारी माधव सलगर, जिल्हा माहिती अधिकारी प्रवीण टाके, जिल्हा ग्रंथालय संघाचे अध्यक्ष गंगाधर पटने, प्रकाशक संघटनेचे निर्मल कुमार सूर्यवंशी, मराठवाडा साहित्य परिषदेचे अध्यक्ष प्रभाकर कानडखेडकर, सदस्य सचिव जिल्हा ग्रंथालय अधिकारी अनिल सूर्यवंशी यांनी केले आहे.

00000