वृत्त क्र. 745 

जिल्ह्यातील पात्र शेतकऱ्यांनी देशाबाहेरील अभ्यास दौऱ्यात भाग घ्यावा

– जिल्हा अधिक्षक कृषि अधिकारी दत्तकुमार कळसाईत

 

अभ्यास दौऱ्यासाठी 30 जुलैपर्यत अर्ज करण्याचे आवाहन

 

नांदेड दि. 18 जुलै  :-  कृषी विभागामार्फत जिल्ह्यातील पात्र शेतकऱ्यांसाठी देशाबाहेरील अभ्यास दौरे सन 2025-26 ही योजना राबविण्यात येत आहे. इच्छुक शेतकऱ्यांनी या परदेश अभ्यास दौऱ्यासाठी 30 जुलै 2025 पूर्वी संबंधित तालुका कृषि अधिकारी कार्यालयात अर्ज करावेत. तसेच अर्ज केलेले शेतकरी यांनी 4 ऑगस्ट 2025 रोजी जिल्हा अधीक्षक कृषि अधिकारी कार्यालय, नांदेड येथे दुपारी 2 वाजता उपस्थित रहावे. प्राप्त अर्जातून जिल्हास्तरीय समितीसमोर सोडत काढण्यात येणार असून यासाठी जास्तीत जास्त शेतकऱ्यांनी यात सहभागी व्हावे, असे आवाहन जिल्हा अधिक्षक कृषि अधिकारी, दत्तकुमार कळसाईत यांनी केले आहे.

 

या आर्थिक वर्षात जिल्हास्तरावरून निवड करताना प्रति जिल्हा किमान 1 महिला शेतकऱ्याची व किमान 1 राज्य तथा केंद्रीय शासन स्तरावरील विविध कृषी पुरस्कार प्राप्त व पीकस्पर्धा विजेते शेतकरी असे एकूण पाच शेतकऱ्याची निवड करण्यात येणार आहे. जिल्ह्यातील शेतकऱ्यांना विविध प्रगत देशातील विकसित आणि आधुनिक तंत्रज्ञानाची माहिती होण्यासाठी तसेच शेतमालाची निर्यात/ कृषी मालाचे पणन व बाजार पेठेतील मागणी, कृषी माल प्रक्रिया याबरोबरच त्यादेशांमध्ये उपयोगात येत असलेले अद्ययावत तंत्रज्ञान अवगत करून त्याचा वापर जिल्ह्यातील तसेच राज्यातील शेतकऱ्यांनी त्यांच्या शेतावर / शेतीमध्ये करण्यासाठी सहाय्य करणे. विविध देशांनी विकसित केलेले शेती तंत्रज्ञान व अनुषंगिक बाबी यांची माहिती त्यादेशातील शेतकऱ्यांशी प्रत्यक्ष चर्चा करून तसेच क्षेत्रीय भेटी, संबंधित संस्थाना भेटी इत्यादीद्वारे शेतकऱ्यांचे ज्ञान आणि क्षमता उंचावण्याकरिता कृषी विभागाकडून राज्यातील शेतकऱ्यांचे देशाबाहेर अभ्यासदौरे सन 2025-26 ही योजना राबविण्यात येत आहे.

 

या आर्थिक वर्षात जिल्हास्तरावरून निवड करताना प्रति जिल्हा किमान 1 महिला शेतकऱ्याची व किमान 1 राज्य तथा केंद्रीय शासन स्तरावरील विविध कृषी पुरस्कार प्राप्त व पीकस्पर्धा विजेते शेतकरी असे एकूण पाच शेतकऱ्याची निवड करण्यात येणार आहे. या दौऱ्यासाठी शेतकऱ्यांची निवड करण्यासाठी काही निकष निश्चित करण्यात आले आहेत. यामध्ये अभ्यास दौऱ्यासाठी जाणारा लाभार्थी हा स्वतः शेतकरी असावा. स्वतःच्या नावे चालू कालावधीचा (मागील सहा महिन्यातील ) सातबारा व ८-अ उतारा, उत्पन्नाचे मुख्य साधन शेती असावे तसे त्याने स्वयंघोषणापत्रात नमूद करावे. ॲग्रीस्टॅक अंतर्गत फार्मर आयडी असणे आवश्यक आहे. शेतकऱ्यांचे वय 25 वर्ष पूर्ण असावे तसेच कमाल वयाची अट नसून शेतकरी शारीरिकदृष्ट्या तंदुरुस्त असणे बंधनकारक आहे. शेतकरी वैध पारपत्र(पासपोर्ट) धारक असावा. शेतकरी कुटुंबामधून फक्त एकाच व्यक्तीला या योजनेचा लाभ घेता येणार आहे. या योजनेत सहभागी होण्यास अर्ज सादर करताना शारीरिकदृष्टया तंदुरुस्त असल्याबाबतचे वैद्यकीय प्रमाणपत्र सादर करणे आवश्यक आहे. शेतकरी शासकीय, निमशासकीय, सहकारी, खाजगी संस्थेत नोकरीस नसावा. वैद्यकीय क्षेत्रातील डॉक्टर, वकील, सीए, अभियंता, कंत्राटदार नसावा तसे त्याने स्वतः स्वयंघोषणापत्रात नमूद करावे, शासनाकडून अभ्यास दौऱ्यासाठी सर्व घटकातील (संवर्गातील) शेतकऱ्यांना एकूण खर्चाच्या 50 टक्के रक्कम किंवा जास्तीत जास्त 1  लाख रुपये यापैकी कमी असेल ती रक्कम अनुदान म्हणून देय आहे. सन 2025-26 मध्ये खालील प्रमाणे शेतीचे वैशिष्ठे, दिवस कंसात देश / देशाचा गट देण्यात आले आहे -1. फलोत्पादन, सेंद्रियशेती आणि दुग्धोत्पादन- दौरा 12 दिवस- ( युरोप - नेदरलँड्स, जर्मनी, स्वित्झर्लंड, फ्रान्स) 2.आधुनिक कृषी तंत्रज्ञान, पाणी व्यवस्थापन व कृषीयांत्रिकीकरण -  दौरा 9 दिवस- (इस्राईल) 3. सेंद्रिय शेती व आधुनिक कृषी तंत्रज्ञान- दौरा 10 दिवस- (जपान) 4.फळे व भाजीपाला पिकांचे काढणी पश्चात तंत्रज्ञान (Post-Harvest Technology) आणि व्यवस्थापन प्रणाली- दौरा 12 दिवस – (मलेशिया, व्हिएतनाम व फिलीपाइन्स) 5.विविध कृषी तंत्रज्ञान, पीक उत्पादकता वाढवण्यासाठी लागणारे तंत्रज्ञान आणि कृषी एक्पो – दौरा 8 दिवस – ( चीन ) 6. आधुनिक कृषी अन्नप्रक्रिया तंत्रज्ञान – दौरा 8 दिवस –( दक्षिण कोरिया ) याप्रमाणे दौरे नियोजित असून इच्छुक व पात्र शेतकऱ्यांनी विहित वेळेत 30 जुलै 2025 पूर्वी संबंधित तालुका कृषि अधिकारी कार्यालयात अर्ज करावेत असे कृषी विभागाने प्रसिध्दीपत्रकाद्वारे कळविले आहे.

000000

वृत्त क्र. 744

 

ग्रामीण गुंठेवारी प्रस्‍ताव उपविभागीय अधिकारी कार्यालयात दाखल करावेत

 

 नांदेड दि. 18 जुलै  :-  गुंठेवारीचे प्रस्‍ताव दाखल करण्यासाठी उपविभागीय अधिकारी कार्यालय, नांदेड (चिखलवाडी कॉर्नर नांदेड) येथे गुंठेवारी कक्ष स्थापन करण्यात आला आहे. तरी नांदेड व अर्धापूर तालुक्यातील ग्रामीण भागातील गुंठेवारीचे प्रस्‍ताव दाखल करण्‍यास 31 डिसेंबर 2025 पर्यत मुदतवाढ देण्यात आलेली आहे. त्यामुळे नागरिकांनी उपविभागीय अधिकारी कार्यालय, नांदेड येथे गुंठेवारीचे प्रस्ताव दाखल करावेत, असे प्राधिकृत अधिकारी (गुंठेवारी कक्ष) तथा उपविभागीय अधिकारी नांदेड यांनी कळविले आहे.

 

 जिल्हाधिकारी नांदेड यांचे आदेशान्वये महाराष्ट्र गुंठेवारी विकास अधिनियम (नियमाधीन करणे, श्रेणीवाढ व नियंत्रण) अधिनियम 2021 अंतर्गत महाराष्ट्र शासनाने 31 डिसेंबर 2020 पूर्वीचे अनधिकृत भुखंड / अनधिकृत भुखंडावरील बांधकाम नियमाधिन करण्यास मान्यता दिली. त्यानुसार नांदेड जिल्ह्यातील महानगरपालिका, नगरपालिका व नगरपंचायत हद्दीअंतर्गत क्षेत्रवगळून उर्वरित ग्रामीण भागातील 31 डिसेंबर 2020 पूर्वी अस्तित्वात असलेले अनधिकृत भुखंड / अनधिकृत भुखंडावरील बांधकाम नियमाधिन करण्यासाठी नगररचना विभाग (शाखा कार्यालय नांदेड) यांच्याकडे नोंदणीकृत परवानाधारक आर्किटेक्ट / इंजिनियर यांच्यामार्फत छाननी शुल्‍कासह प्रस्‍ताव दाखल करुन घेवून नांदेड व अर्धापूर तालुक्यातील ग्रामीण भागातील गुंठेवारीची सनद निर्गमित करण्यासाठी उपविभागीय अधिकारी नांदेड यांना प्राधिकृत करण्यात आलेले आहे असे प्रसिद्धी पत्रकाद्वारे प्राधिकृत अधिकारी (गुंठेवारी कक्ष) तथा उपविभागीय अधिकारी नांदेड यांनी कळविले आहे.

00000

 

वृत्त क्र. 743 

वादळी वाऱ्यासह मुसळधार पावसाची शक्यता 

हवामानशास्त्र केंद्राने दिल्या सूचना  

 

नांदेड, दि. 18 जुलै :- प्रादेशिक हवामानशास्त्र केंद्र मुंबई यांनी दि.18 जुलै 2025 रोजी दुपारी 13:04 वाजता दिलेल्या सूचनेनुसार नांदेड जिल्ह्यासाठी दि. 18, 20 व 21 जुलै 2025 या तीन दिवसांसाठी यलो (Yellow) अलर्ट जारी केलेला आहे. दि. 18 जुलै 2025 ह्या दिवशी जिल्ह्यात तुरळक ठिकाणी ताशी 40 ते 50 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह मुसळधार स्वरूपाचा पाऊस पडण्याची तसेच दि. 20 व 21 जुलै 2025 हे दोन दिवस जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह मध्यम स्वरूपाचा पाऊस पडण्याची अधिक शक्यता वर्तविली आहे. या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी. नागरिकांनी खबरदारीची उपाययोजना म्हणून पुढील प्रमाणे काळजी घ्यावी. असे आवाहन जिल्हा प्रशासनाकडून करण्यात आले आहे.

 

या गोष्टी करा 

विजेच्या गडगडाटासह पावसाची पूर्वकल्पना असल्यास बाहेर जाणे टाळा. जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा. आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका. आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा. तारांचे कुंपण, विजेचे खांब व इतर लोखंडी वस्तूंपासून दूर रहा. पाण्यात उभे असाल तर तात्काळ पाण्यातून बाहेर पडा. तुमच्या स्मार्ट मोबाईल फोन मध्ये 'दामिनी', 'सचेत' हे दोन ॲप डाउनलोड करा 'दामिनी' ॲप तुमच्या आजूबाजूला वीज विषयक संभाव्य धोके दर्शविते तर 'सचेत' ॲप मुळे तुम्हाला तुमच्या आजूबाजूच्या हवामानाविषयी अचूक इशारे व माहिती मिळते. 

 

या गोष्टी करु नका

आकाशात विजा चमकत असल्यास घरातील लँडलाईन फोनचा वापर करू नका. शॉवरखाली अंघोळ करू नका. घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत उपकरणांचा वापर करू नका. विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका. उंच झाडाच्या खाली आसरा घेऊ नका. धातूंच्या उंच मनोऱ्याजवळ उभे टाकू नका. जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे. असे आवाहन जिल्हा प्रशासनाकडून करण्यात आले आहे.

0000

वृत्त क्र. 742 

प्रत्यक्ष प्रत्यारोपण न करता प्लाझ्मा फेरेसीसमुळे निकामी यकृत पुन्हा कार्यरत

 

·         शासकीय रुग्णालयातील डॉक्टरांच्या 21 दिवसाच्या अथक प्रयत्नांना यश

 

नांदेड, दि. 18 जुलै :- एका 27 वर्षीय तरुणास उंदीर मारण्याचे विष अतिप्रमाणात सेवन केल्यामुळे गंभीर स्थितीत ग्रामीण भागातून डॉ. शंकरराव चव्हाण शासकीय वैद्यकीय महाविद्यालय व रुग्णालय नांदेड येथील आपत्कालीन विभागात 24 जून 2025 रोजी आणण्यात आले. रुग्णाची अवस्था अत्यंत गंभीर होती. त्याला काविळ झाला होता, यकृत निकामी होण्यास सुरुवात झाली होती व रक्तदाब अत्यल्प झाला होता. या रुग्णावर तात्काळ प्राथमिक उपचार करून रुग्णास अतिदक्षता विभागात दाखल करण्यात आले. यकृत जवळपास निकामी झाल्यामुळे रक्त गोठण्याची प्रक्रिया बिघडून रक्तस्राव सुरू झाला होता. अशा स्थितीत जीवनावश्यक उपचार सुरुवातीपासूनच अतितातडीने सुरू करण्यात आले होते.

 

रुग्णाने विष अतिप्रमाणात सेवन केल्याने यकृत जवळपास पुर्णत: निकामी (Acute Fulminant Hepatic Failure) झाल्यामुळे यकृत प्रत्यारोपण (Liver Transplant) हा एकमेव उपाय होता. मात्र, प्रत्यारोपणाची उपलब्धता नांदेडमध्ये नसल्याने आणि रुग्णाची आर्थिक परिस्थिती मर्यादित असल्याने, डॉक्टरांच्या तज्ञ पथकाने यकृत पुनर्जीवित करण्याच्या दृष्टीने Plasmapheresis ही विशेष उपचार पद्धती वापरण्याचा निर्णय घेतला.

 

रुग्णावर चार वेळा प्लाइमा फेरेसीस उपचारप्रक्रिया करण्यात आली. या प्रक्रियेनंतर रुग्णाच्या प्रकृतीत हळूहळू सुधारणा दिसून आली व यकृताने काम करणे पुन्हा सुरू केले. 21 दिवसांच्या सातत्यपूर्ण आणि कठोर उपचारांनंतर 14 जुलै 2025रोजी रुग्णास सुस्थितीत रुग्णालयातून डिस्चार्ज देण्यात आला.

 

या यशस्वी उपचार प्रक्रियेमध्ये डॉ. शितल राठोड - प्राध्यापक व विभागप्रमुख, डॉ. कपिल मोरे, डॉ. फारुकी अब्दुल राफे सहयोगी प्राध्यापक, डॉ. मनिषा बोलके, डॉ. अमितकुमार पोतुलवार सहाय्यक प्राध्यापक, डॉ. फैजल अहमद अतिक अहमद, डॉ. राहुल देशमुख (यकृत व पोटविकार तज्ञ), डॉ. अभिषेक पाटील, डॉ. आयुषी, डॉ. विजय कनिष्ठ निवासी डॉक्टर्स हे वैद्यकीय तज्ज्ञ तसेच आयसीयू विभागातील नर्सिंग स्टाफ सीमा भोसले, मर्सी खंडारे, सुमन शेळके कर्मचारी सहभागी होते.

 

रुग्णाच्या नातेवाईकांनी रुग्णालयात मोफत उपचार व औषधे उपलब्ध करून दिल्याबद्दल अधिष्ठाता डॉ. सुधीर देशमुख यांचे तसेच उपचार करणाऱ्या सर्व डॉक्टरांचे व कर्मचाऱ्यांचे आभार मानले. त्यांच्या भावनांनी उपस्थितांचे मन हेलावून टाकले. यावेळी वैद्यकीय अधीक्षक डॉ. विजयकुमार कापसे व श्रीमती अल्का जाघव, अधिसेविका हे उपस्थित होते. अधिष्ठाता व वैद्यकीय अधीक्षक यांनी यकृत निकामी झालेल्या रुग्णावर नाविन्यपूर्ण उपचारपद्धती यशस्वीरीत्या राबवून रुग्णास जीवनदान दिल्याबद्दल सर्व वैद्यकीय पथकाचे विशेष कौतुक केले.

0000

वृत्त क्र. 741 

समस्याग्रस्त व पीडित महिलांसाठी

21 जुलै रोजी महिला लोकशाही दिन  

 

नांदेड, दि. 18 जुलै :-  समस्याग्रस्त व पिडीत महिलांसाठी सोमवार 21 जुलै 2025 रोजी महिला लोकशाही दिन आयोजित केला आहे. या लोकशाही दिनात समस्याग्रस्त व पिडीत महिलांनी आपले अर्ज विहित नमुन्यात सादर करावे, असे आवाहन जिल्हास्तरीय महिला लोकशाही दिन समितीचे अध्यक्ष तथा जिल्हाधिकारी नांदेड व सदस्य सचिव तथा जिल्हा महिला व बाल विकास अधिकारी नांदेड यांनी केले आहे.   

 

दर महिन्याच्या तिसऱ्या सोमवारी जिल्हास्तरीय महिला लोकशाही दिन घेण्यात येतो. सोमवार 21 जुलै 2025 रोजी सकाळी 11 वा. जिल्हाधिकारी नांदेड यांच्या अध्यक्षतेखाली महसूल प्रबोधनी प्रशिक्षण केंद्र, जिल्हाधिकारी कार्यालय परिसर नांदेड येथे महिला लोकशाही दिन होणार आहे. संबंधीत समितीचे सदस्य व शासन निर्णयात नमूद संबंधित विभागाचे अधिकारी यांनी उपस्थित रहावे, असेही आवाहन सदस्य सचिव तथा जिल्हा महिला व बालविकास अधिकारी नांदेड यांनी केले आहे.

00000

वृत्त क्र. 740

 

सांस्कृतिक कार्य विभागातर्फे सार्वजनिक

गणेशोत्सव मंडळांकरिता राज्यस्तरीय स्पर्धेचे आयोजन

 

5 लाख रुपयांचे प्रथम पारितोषिक

 

नांदेड दि. 18 जुलै :- पु. ल. देशपांडे महाराष्ट्र कला अकादमी, सांस्कृतिक कार्य विभाग, महाराष्ट्र शासन यांच्या वतीने 'महाराष्ट्र राज्य उत्कृष्ट सार्वजनिक गणेशोत्सव मंडळ स्पर्धा 2025 चे आयोजन करण्यात आले आहे. सदर स्पर्धेत नोंदणीकृत संस्था किंवा परवानाधारक सार्वजनिक गणेशोत्सव मंडळे सहभागी होऊ शकतात. सदर स्पर्धेचा अर्ज पु. ल. देशपांडे महाराष्ट्र कला अकादमी, मुंबईच्या संकेतस्थळावर उपलब्ध करून देण्यात आलेल्या ऑनलाईन पोर्टलद्वारेच 20 जुलै पासून 20 ऑगस्ट 2025 पर्यंत स्वीकारण्यात येणार आहेत. अपूर्ण अर्ज रद्द ठरविण्यात येतील.

 

सदर स्पर्धा निःशुल्क असून सांस्कृतिक कार्यक्रम, सांस्कृतिक स्पर्धांचे आयोजन, संस्कृतीचे जतन व संवर्धन याकरिता राबविण्यात आलेले उपक्रम, गडकिल्ले यांचे जतन व संवर्धन, राष्ट्रीय व राज्य स्मारके, धार्मिक स्थळे यांविषयी जनजागृकता तसेच जतन व संवर्धन, विविध सामाजिक उपक्रम व कार्ये, पर्यावरणपूरक मूर्ती, पर्यावरणपूरक सजावट,ध्वनिप्रदूषण रहित वातावरण, गणेशभक्तासाठी केलेल्या सोयी सुविधा यांच्या आधारे केलेल्या कार्याचा गौरव व्हावा आणि असेच समाजाभिमुख उपक्रम अधिकाधिक घडावेत म्हणून प्रोत्साहनपर पुरस्कार देण्याचे शासनाचे उद्दिष्ट आहे. याच निकषांच्या आधारे स्पर्धेचे परीक्षण केले जाईल.

 

27 ऑगस्ट पासून सुरू होणाऱ्या गणेशोत्सवात सर्व जिल्ह्यांच्या जिल्हाधिकारी कार्यालयांनी 'गठीत केलेली जिल्हास्तरीय समिती या स्पर्धेत सहभागी मंडळे किंवा संस्थांच्या उत्सवस्थळाला भेट देतील आणि जिल्हास्तरीय परीक्षण पूर्ण करतील. मुंबई, मुंबई उपनगर, ठाणे आणि पुणे हे 4 जिल्हे प्रत्येकी 3 आणि हे 4 जिल्हे वगळता अन्य 32 अशा प्रत्येक जिल्ह्यातून एक यानुसार एकूण 44 शिफारसी राज्यस्तरीय परीक्षणासाठी स्वीकारल्या जातील. स्पर्धेच्या अधिक माहितीसाठी सर्वांनी आपापल्या जिल्ह्याच्या जिल्हाधिकारी कार्यालयाशी संपर्क साधावा.

 

राज्यस्तरीय परीक्षणात प्रथम तीन विजेत्यांना अनुक्रमे 5 लाख, 2.5 लाख आणि 1 लाख 'रुपयांचे पारितोषिक व प्रमाणपत्र देऊन गौरवण्यात येणार आहे. तसेच अन्य जिल्हास्तरीय प्रथम विजेत्यांना 25 हजार रुपयांचे पारितोषिक व प्रमाणपत्र देऊन गौरवण्यात येणार आहे. या स्पर्धेत अधिकाधिक संख्येने सहभाग नोंदवण्याचे आवाहन सांस्कृतिक कार्यमंत्री ॲड. आशिष शेलार यांनी केले आहे.

000000

 विशेष वृत्त 739

मुख्यमंत्री सहाय्यता निधी व धर्मादाय रुग्णालय मदत कक्ष गरजु रुग्णांसाठी ठरतोय वरदान

रुग्णांना वैद्यकीय उपचारासाठी मागील सहा महिन्यात 3 कोटी 31 लाख रुपयांचे अर्थसहाय्य वितरीत 

नांदेड, दि. 18 जुलै : मुख्यमंत्री सहाय्यता निधी व धर्मादाय रुग्णालय मदत कक्ष पात्र व गरजु रुग्णांसाठी वरदान ठरत आहे. 1 जानेवारी ते 30 जून 2025 या कालावधीत मुख्यमंत्री सहाय्यता निधी व धर्मादाय रुग्णालय मदत कक्षातून नांदेड जिल्ह्यात 385 रुग्णांना 3 कोटी 31 लाखांची मदत देण्यात आली. दिवसेंदिवस मदतीमध्ये वाढ होत आहे. गरजू रुग्णांना वेळेत मदत मिळावी, यासाठी आम्ही कटिबद्ध आहोत. संवेदनशील मुख्यमंत्री देवेंद्र फडणवीस यांच्या मार्गदर्शनातून जिल्हा स्तरावर कक्ष उपलब्ध झाल्याने रुग्णांना मोठा दिलासा मिळत आहे असे रामेश्वर नाईक, कक्ष प्रमुख, मुख्यमंत्री सहाय्यता निधी व धर्मादाय रुग्णालय मदत कक्ष यांनी सांगितले. 

राज्यातील नागरिकांना दुर्धर आजारांवरील उपचारासाठी मुख्यमंत्री सहाय्यता निधी कक्षाकडून आर्थिक सहाय्य देण्यात येते. तसेच आपत्ती प्रसंगीही आर्थिक मदत देण्यात येते. यासाठी राज्यातील कानाकोपऱ्यातून मदत मिळविण्यासाठी नागरिक मंत्रालयात जात असत. परंतु नागरिकांना या सेवा सहजपणे त्यांच्या जिल्ह्याच्या ठिकाणी उपलबध व्हाव्यात, म्हणून आता प्रत्येक जिल्ह्याच्या ठिकाणी या कक्षाची स्थापना करण्यात आली आहे. सध्या नांदेड येथे हा कक्ष जिल्हाधिकारी कार्यालय परिसरातील प्रशिक्षण भवनच्या इमारतीत कार्यरत आहे. 

वैद्यकीय उपचाराकरिता मदत मिळण्यासाठी मुख्यमंत्री सहाय्यता निधी व धर्मादाय रुग्णालय मदत कक्षाशी संलग्नीत नांदेड जिल्ह्यातील खालील रुग्णालयांचा समावेश आहे. या निधीच्या मदतीतून रुग्ण या रुग्णालयात उपचार करुन घेतात. 21st सेन्चुरी हॉस्पिटल नांदेड, अभ्युदय लाईफ केअर सुपर स्पेशालिटी इनस्टीटयुट प्रा. ली. नांदेड, आनंद कँसर आणि मल्टीस्पेशालिटी हॉस्पीटल नांदेड, अंकुर मॅक्स क्रीटीकल केअर नांदेड, अपेक्षा क्रिटीकल केअर सेंटर आणि मल्टीस्पेशालिटी हॉस्पिटल प्रा. ली. नांदेड, अश्विनी क्रिटीकल आणि हार्डकेअर सेंटर प्रा. ली. नांदेड, अथर्व सर्जिकल हॉस्पिटल, नांदेड, भगवती मल्टीस्पेशालिटी हॉस्पिटल नांदेड, गोदावरी इनस्टुटयुट ऑफ क्रिटीकल  केअर मेडीसीन नांदेड, गर्व्हमेंट मेडीकल कॉलेज आणि हॉस्पिटल नांदेड, गुरुकृपा सुपर स्पेशालिटी हॉस्पीटल डॉक्टर लेन नांदेड, लव्हेकर हॉस्पीटल नांदेड, लोटस हॉस्पिटल नांदेड, मोनार्क कॅन्सर हॉस्पिटल नांदेड, मुंडे हॉस्पिटल देगलूर, जि. नांदेड, नांदेड क्रिटीकल केअर हॉस्पिटल आणि रिसर्च सेंटर नांदेड, नारायणा इनस्टुटयुट ऑफ मेडीकल सुपर स्पेशालिटी नांदेड, निर्मल न्युरो केअर ॲण्ड सुपर स्पेशालीटी सेंटर नांदेड, रेंगे  हॉस्पिटल नांदेड, साई हॉस्पिटल सर्जीकल ॲण्ड ॲक्सीडेंट नांदेड, संजीवन हॉस्पिटल नांदेड, श्री गंगा हॉस्पिटल नांदेड, श्रीनिवास ऑथोपेडीक नर्सिग होम नांदेड, एसएसपी केअर ॲडव्हॉस पॅट्रीओट्रीक सेंटर प्रा. ली. नांदेड, सनराईज ग्लोबल सुपर स्पेशालिटी हॉस्पिटल नांदेड, विश्वा इनस्टुटयुट न्युरोलॉजी ॲण्ड किडनी सेंटर प्रा. ली. नांदेड, विश्व प्रयाग हॉस्पिटल नांदेड, यशश्री मल्टीस्पेशालिटी हॉस्पिटल नांदेड, यशोसाई क्रिटीकल केअर कौठा, नांदेड, यशोसाई हॉस्पिटल नांदेड, यशोसाई ऑर्थोपेडिक हॉस्पिटल कौठा, नांदेड या रुग्णालयाचा समावेश आहे. तरी गरजू व पात्र रुग्णांनी या उपक्रमांचा लाभ घ्यावा असे आवाहन करण्यात येत आहे.  

00000