जिल्हाधिकारी अरूण डोंगरे राज्याचे स्वच्छतादूत- प्रधान सचिव राजेश कुमार

नांदेड दि. 6 :-  सोलापूर जिल्हा परिषदेत तत्कालिन मुख्य कार्यकारी अधिकारी म्हणून जिल्हाधिकारी अरूण डोंगरे यांनी स्वच्छता अभियानात राबविलेले उपक्रम राज्याला प्रेरणादायी आहेत. श्री. डोंगरे राज्याचे स्वच्छतादूत म्हणून मार्गदर्शन करतील असे मत राज्याच्या पाणी पुरवठा व स्वच्छता विभागाचे प्रधान सचिव राजेश कुमार यांनी आज पुणे येथे व्यक्त केले. स्वच्छ भारत मिशन (ग्रामीण) या कार्यक्रमांतर्गत मार्च 2018 अखेर संपूर्ण राज्य हागणदारी मुक्त करण्यासाठी हॉटेल ऑरचिड पुणे येथे दोन दिवसीय राज्यस्तरीय आत्मसन्मान 4 कार्यशाळेचे आयोजन करणेत आले होते. या कार्यशाळेत मार्गदर्शन करताना श्री. राजेशकुमार बोलत होते. 

या कार्यशाळेत जिल्हाधिकारी श्री डोंगरे यांनी  व सोलापुरचे तत्कालीन मुख्य कार्यकारी अधिकारी म्हणून सोलापूर जिल्ह्यात राबविलेल्या स्वच्छ भारत मिशनच्या विविध उपक्रमाचे प्रभावाशील सादरीकरण केले.

या कार्यशाळेसाठी तयार करण्यात आलेल्या मार्गदर्शनपर १० प्रदर्शनी फलकांपैकी पाच फलकांवर सोलापूर जिल्ह्यातील विविध उपक्रमांची दखल घेण्यात आली आहे. या प्रसंगी जलस्वराज्य प्रकल्प व्यवस्थापक  डॉ. दिलीप देशमुख,   नांदेडचे जिल्हाधिकारी अरूण डोंगरे, पाणी व स्वच्छता सहाय्य संस्थाचे संचालक डॉ. सतीश उमरीकर,  युनिसेफ मुंबई चे कार्यक्रम अधिकारी आनंद घोडके यांची उपस्थिती होती. या कार्यशाळेत या पुढील संपूर्ण वर्षांची रणनीती ठरविणे, स्थिती समजून घेणे, कृती कार्यक्रम ठरविणे या सर्व बाबींवर चिंतन या कार्यशाळेत करणेत आले. 

या कार्यशाळेस राज्यातील सर्व जिल्हा परिषदांचे मुख्य कार्यकारी अधिकारी, उपयुक्त विकास,  उपमुख्य कार्यकारी अधिकारी (पाणी व स्वच्छता) , जिल्हा कार्यक्रम व्यवस्थापक, युनिसेफ, मुंबई चे प्रतिनिधी , वासो चे सर्व अधिकारी/सल्लागार या कार्यशाळेत सहभागी झाले होते. दोन दिवस झालेल्या या कार्यशाळेत पाणी, स्वच्छता या विषयावर मंथन  झाले.

 तत्कालीन मुख्य कार्यकारी अधिकारी अरूण डोंगरे यांनी राबविलेल्या विविध उपक्रमाची दखल राज्याच्या पाणी पुरवठा व स्वच्छता विभागाने घेतली. नादेंडचे जिल्हाधिकारी म्हणून निवड झाल्यानंतरही त्यांना खास निमंत्रण देऊन बोलाविण्यात आले होते. या कार्यशाळेत शालेय स्वच्छतादूत उपक्रम, एक लक्ष शौचालय बांधकाम नियोजन, स्वच्छता गुढी उपक्रम, कुटूंब स्तर संवाद अभियान, आदी बाबींवर प्रेझेंटेशन केले. प्रभारी मुख्य कार्यकारी अधिकारी पी. व्ही. बनसोडे, उप मुख्य राजेंद्र अहिरे, जिल्हा कार्यक्रम व्यवस्थापक सचिन जाधव यांनी पंढरीचे दारी स्वच्छतेची वारी या उपक्रमाची माहिती दिली.

आत्मसन्मान कार्यशाळेसाठी जिल्हाधिकारी डोंगरे खास निमंत्रित !

तत्कालीन मुख्य कार्यकारी अधिकारी अरूण डोंगरे यांनी राबविलेल्या विविध उपक्रमाची दखल राज्याच्या पाणी पुरवठा व स्वच्छता विभागाने घेतली. नादेंडचे जिल्हाधिकारी म्हणून निवड झाल्यानंतर त्यांना खास निमंत्रण देऊन कार्यशाळेस बोलाविण्यात आले होते. या कार्यशाळेत शालेय स्वच्छतादूत उपक्रम, एक लक्ष शौचालय बांधकाम नियोजन, स्वच्छता गुढी उपक्रम, कुटूंब स्तर संवाद अभियान, आदी बाबींवर सादरीकरण करण्यात आले. कार्यशाळेत पंढरीचे दारी स्वच्छतेची वारी या उपक्रमाची माहिती देण्यात आली, तसेच शौचालय तांत्रिक बाबीबाबत मार्गदर्शन करण्यात आले.

"नीट" साठी उद्या 35 केंद्रावर

13 हजार 713 विद्यार्थ्यांची परीक्षा  

परीक्षा सुरळीत पार पाडण्यासाठी प्रशासनाचे आवाहन

नांदेड दि. 6 :- केंद्रीय माध्यमिक शिक्षण बोर्डाकडून (सीबीएसई) घेण्यात येणारी वैद्यकीय अभ्यासक्रमाच्या प्रवेशासाठीची राष्ट्रीय पात्रता व प्रवेश परीक्षा (नीट) 2017 रविवार 7 मे 2017 रोजी घेण्यात येणार आहे. नांदेड केंद्रांतर्गत या वर्षी पहिल्यांदाच परीक्षा होत आहे. नांदेड शहरात 34 आणि मुदखेड येथील एक अशी एकूण 35 परीक्षा उपकेंद्र निश्चित करण्यात आली आहेत. या परीक्षेसाठी सुमारे तेरा हजारांवर विद्यार्थ्यांनी नांदेड केंद्राची निवड केली आहे. परीक्षा सुरळीत पार पाडण्यासाठी सर्व घटकांनी सहकार्य करावे, असे आवाहन जिल्हा प्रशासनाच्यावतीने करण्यात आले आहे.

परीक्षा संयोजनाची जबाबदारी होरायझन डिस्कव्हरी ॲकडमीकडे आहे. त्यासाठी समन्वयक म्हणून ॲकडमीचे प्राचार्य फनींद्र बोरा तसेच नीटचे अधिकारी एस.आय. उस्ताद, होरायजन ॲकडमीचे मुख्य कार्यकारी अधिकारी ए. के. सिरसाट परीक्षा सुरळीत पार पडावी यासाठी प्रयत्नशील आहेत.

नांदेड केंद्रांतर्गत या परीक्षेसाठी सुमारे 13 हजार 713 विद्यार्थ्यांनी नोंदणी केली आहे. परीक्षेसाठी नीटकडून मुदखेडसह शहरात 35 परीक्षा केंद्र निश्चित करण्यात आली आहेत. या परीक्षा केंद्रांची नावे पुढील प्रमाणे (कंसात विद्यार्थी संख्या )-  आंध्र समिती तेलगू हायस्कूल नांदेड (240), केंब्रीज विद्यालय (360), शासकीय तंत्रनिकेतन (240), ग्रामीण कॉलेज ॲड इंजिनिअरिंग (240), ग्रामीण तंत्रनिकेतन (480), गुजरार्थी हायस्कुल (420), ग्यान माता विद्या विहार (300), होरायजन डिस्कव्हरी ॲकडमी (393), इंदिरा गांधी महाविद्यालय (420), इंदिरा गांधी हायस्कुल (300), किड्स किंगडम् पब्लिक स्कूल (420), कुसूमताई हायस्कूल (240), महात्मा फुले हायस्कूल (540), मातोश्री प्रतिष्ठान स्कूल ऑफ इंजिनीअरींग (360), एमजीएम कॉलेज (480), नागार्जूना पब्लिक स्कूल (420), नारायणराव चव्हाण लॉ कॉलेज (600), एनएसबी कॉलेज (360), ऑक्सफोर्ड इंटरनॅशनल स्कूल (840), ऑक्सफोर्ड द ग्लोबल स्कूल (420), पिपल्स हायस्कूल (240), प्रतिभा निकेतन हायस्कूल (360), प्रतिभा निकेतन कॉलेज (360), राजर्षी शाहू विद्यालय आणि कॉलेज (360), एसएसएस कॉलेज ऑफ एज्युकेशन सहयोग कॅम्पस (240), सावित्रीबाई फुले हायस्कूल (240), सायन्स कॉलेज (360), शिवाजी उच्च माध्यमिक विद्यालय (240), श्री शारदा भवन स्कूल (300), श्री शिवाजी माध्यमीक आणि उच्च माध्यमिक विद्यालय (240), एसएसएस इंदिरा इन्स्टीट्युट ऑफ टेक्नॉलॉजी-पॉलीटेक्नीक (420), विश्वभारती पॉलीटेक्नीक इन्स्टीट्युट (480), यशवंत महाविद्यालय-लातूर बोर्ड (780), यशवंत महाविद्यालय-एसआरटीएम (780) आणि मुदखेड केंद्रीय विद्यालय (240).

परीक्षेसाठी आवश्यक आरोग्य पथके, परीक्षा केंद्रांवरील सोई-सुविधा, पिण्याचे पाणी,  तसेच या दिवशी परीक्षा कालावधीत अखंडीत वीज पुरवठा राहील यासाठीचे नियोजन, वाहतुकीसाठी पुरेशा शहर वाहतूक बस, याशिवाय परीक्षा साहित्यासाठीची अनुषंगीक वाहतूक व्यवस्था, परीक्षा केंद्रांवरील पुरेसा पोलीस बंदोबस्त याबाबत यापुर्वीच नियोजन करण्यात आले आहे. परीक्षा सुरळीत पार पडावी यासाठी, संबंधीत पर्यवेक्षक आदींची प्रशिक्षणही वेळेत पुर्ण करण्यात आले आहे.

प्रत्यक्ष नीट परीक्षेचे रविवार 7 मे रोजीचे वेळापत्रक

विद्यार्थ्यांना परीक्षाहॅाल मध्ये प्रवेश	सकाळी 7.30 वा.पासून
परीक्षा प्रवेशपत्रांची पडताळणी	सकाळी 7.30 ते 9.45. वाजेपर्यंत
प्रश्नपत्रिकांची वाटप	सकाळी 9.45 वाजता
प्रश्नपत्रिका उघडणे, त्यातून उत्तरपत्रिका बाहेर काढणे	स. 9.55 वा.
परीक्षा हॅालमध्ये उशिरात उशिरा प्रवेश देणे	सकाळी 9.30 वा.
परीक्षा सुरु	सकाळी 10.00 वा.
परीक्षा कालावधी समाप्त	दुपारी 1.00 वा.
परीक्षेचे निकाल	गुरूवार 8 जून 2017.

परीक्षासाहित्याविषयी विद्यार्थ्यांना सूचना

परीक्षा हॅालमध्ये विद्यार्थ्यांना केवळ परीक्षा प्रवेशपत्र (ॲडमीट कार्ड), विहीत नमुन्यावर लावलेले पासपोर्ट आकाराचे तसेच पोस्टकार्ड आकाराचे छायाचित्र, इतकेच साहित्य नेता येणार आहे.

विद्यार्थ्यांना कच्चे लेखन (रफ वर्क) हे प्रश्नपत्रिकेत विहीत केलेल्या रिकाम्या जागेतच करता येईल. मशिन्सव्दारे तपासण्यात येणाऱ्या उत्तरपत्रिकेवर कोणत्याही स्वरुपात खुणा किंवा कच्चे लेखन करता येणार नाही.

सर्वात महत्त्वाचे म्हणजे परीक्षेसाठी निळे किंवा काळ्या शाईचे बॅाल प्वाईंट पेनच वापरता येणार आहे. असे पेन परीक्षा केंद्रावरच उपलब्ध करून देण्यात येणार आहे. या पेनद्वारेच प्रश्नपत्रिका संचावरील माहिती तसेच तसेच उत्तरपत्रिकेतील उत्तर नोंदविता येणार आहेत.

वाहनांवरील दिवे काढण्याबाबत

आरटीओचे आवाहन

            नांदेड दि. 6 :-  जिल्ह्यातील सर्व कार्यालय प्रमुखांनी केंद्र शासनाच्या सुधारणेनुसार ज्या वाहनांवर दिवा लावण्यास अनुज्ञेय नाही त्या वाहनांवरील लाल, अंबर दिवे व ॲम्ब्युलन्सवरील दिवे काढून टाकावेत, असे आवाहन प्रादेशिक परिवहन अधिकारी नांदेड यांनी केले आहे.

            केंद्र सरकारने 1 मे 2017 रोजी केंद्रीय मोटार वाहन नियम 1989 च्या नियम 108 मध्ये सुधारणा केली आहे. या तरतुदीनुसार वाहनांवरील लाल / अंबर दिवा तसेच ॲम्ब्युलन्सवरील दिवा अनुज्ञेय नाही. त्याच बरोबर उच्च पदस्थांच्या एस्कॉर्टींग करणाऱ्या वाहनांवर दिवे लावता येणार नाहीत. आपत्कालीन किंवा आणिबाणी व्यवस्थापनासाठी विशिष्ट प्रकारची रचना केलेल्या वाहनांवर केंद्र शासन विनिर्दिष्ट करेल त्यानुसार बहुरंगी लाल, निळा आणि पांढरा रंगाचा दिवा लावण्यास परवानगी आहे. त्याशिवाय एअरपोर्ट, बंदरक्षेत्र, खनिक्षेत्र आणि प्रकल्पांच्या क्षेत्रात चालणाऱ्या वाहनांवर त्यांच्या कार्यक्षेत्रात अंबर दिवा लावता येईल. 

पेट्रोल पंप तपासणी मोहीम सुरु

नांदेड दि. 6 :-  हिंदुस्थान पेट्रोलियम कॉर्पोरेशन लि. सोलापूर क्षेत्रीय कार्यालय व सहाय्यक नियंत्रक, वैध मापन शास्त्र कार्यालय नांदेड यांच्या संयुक्त विद्यमाने जिल्ह्यातील पेट्रोल पंपाची तपासणी मोहीम शुक्रवार 5 मे रोजी पासून राबविण्यात येत आहे.

त्याअनुषंगाने शुक्रवार 5 मे रोजी मे. वैशालीताई पावडे पेट्रोलियम निला येथे पेट्रोलियम पदार्थाचे माप व गुणवत्तेची तपासणी करण्यात आली. यावेळी कंपनीचे वरीष्ठ मोबाईल अधिकारी शांताराम पाटील, वरिष्ठ परिचालन अधिकारी राकेश रेड्डी, सहायक नियंत्रक संजीव कवरे, वैधमापन शास्त्र निरीक्षक के. एन. रिठे व ग्राहक प्रतिनिधी उपस्थित होते.  पुढील येणाऱ्या दिवसात जिल्ह्यातील सर्व पेट्रोल पंपाची तपासणी करण्यात येणार आहे.