कापूस, तूर पिकाचा कृषि संदेश 

            नांदेड, दि. 4 :- नांदेड जिल्हयात  कापूस, तुर पिकासाठी किड व रोग सर्वेक्षण या प्रकल्पाअंतर्गत काम सुरु आहे. शेतकऱ्यांना पुढील प्रमाणे किडी पासुन संरक्षणासाठी कृषि संदेश देण्यात आला आहे.

कापूस पिकावर कामगंध सापळयातील लुर बदलावे आणि सायपरमेथ्रीन 3 टक्के प्लस इंडोक्झाकार्ब 10 टक्के एस. सी 5 मिली प्रति 10 पाण्यात फवारावे.

 तुर पिकावर शेंगा पोखरणाऱ्या अळीसाठी प्रति हेक्टरी 5 कामगंध सापळे लावावेत. तसेच इमामेक्टीन बेंझोएट 5 एस.जी 5 ग्रॅम प्रति 10 लिटर पाण्यात मिसळुन फवारावे. गुंडाळलेली पाने अळीसहीत नष्ट करावीत, असे आवाहन उप विभागीय कृषि अधिकारी आर. टी. सुखदेव यांनी केले आहे.

000000

नांदेड जिल्हयात शनिवारी  

राष्ट्रीय लोकन्यायालयाचे आयोजन

नांदेड, दि. 4 :- राष्ट्रीय विधी सेवा प्राधिकरण दिल्ली तसेच महाराष्ट्र राज्य विधी सेवा प्राधिकरण मुंबई यांच्या आदेशान्वये जिल्हा विधी सेवा प्राधिकरण नांदेड शनिवार 8 डिसेंबर 2018 रोजी जिल्हा न्यायालय नांदेड व जिल्ह्यातील सर्व तालुका न्यायालयात तसेच कौटुंबिक न्यायालय, कामगार न्यायालय व सहकार न्यायालय नांदेड येथे राष्ट्रीय लोक न्यायालयाचे आयोजन करण्यात आले आहे.

            या राष्ट्रीय लोकन्यायालयात आज पर्यंत न्यायालयात प्रलंबित प्रकरणांपैकी एकुण 2 हजार 234 प्रकरणे त्यात 749 दिवाणी व 1 हजार 485 फौजदारी प्रकरणे तडजोडीने मिटविण्यासाठी ठेवण्यात येणार आहेत. त्यात दिवाणी प्रकरणात, मो. अ. दावा प्रकरणे, भूसंपादन प्रकरणे तसेच इतर दिवाणी प्रकरणे, बॅंक कर्ज वसुली प्रकरण इत्यादी प्रकरणे तडजोडीसाठी ठेवण्यात येणार आहेत. त्याचबरोबर फौजदारी प्रकरणेही जी तडजोड पात्र आहेत अशी प्रकरणे ठेवण्यात येणार आहेत.

            याशिवाय, या लोकअदालतीत विद्युत कंपनी, विविध बॅंका, भारत संचार निगम यांचे थकीत बाकी येणे बाबतची दाखल पूर्व प्रकरणे तसेच, विविध मोबाईल कंपन्यांची ही थकीत रकमेबाबतची प्रकरणे तडजोडीद्वारे निकाली काढण्यासाठी ठेवण्यात येणार असून आतापर्यंत 4 हजार 667 दाखल पूर्व प्रकरणे तडजोडीसाठी ठेवण्यात आलेली आहेत.

            या राष्ट्रीय लोकअदालतीमध्ये जिल्हा सरकारी वकिल  संजय लाठकर तसेच जिल्हयातील सर्व सन्माननीय विधीज्ञ आणि विविध विमा कंपनीचे अधिकारी, भूसंपादन अधिकारी, मनपा, महसुल विभागाचे अधिकारी यांचा सहभाग राहणार आहे. या लोकअदालतीत मोठया संख्येने प्रकरणात तडजोड होण्यासाठी सर्वांना सहकार्य करावे. संबंधित पक्षकारांनी यासंबंधीचा लाभ घ्यावा, असे आवाहन नांदेडचे प्रमुख जिल्हा न्यायाधीश एस. जी. मेहरे व जिल्हा विधी सेवा प्राधिकरण सचिव न्यायाधीश डी. टी. वसावे यांनी केले असून सहकार्याची अपेक्षा व्यक्त केली आहे.

000000

शुक्रवारी सशस्त्र सेना ध्वजदिन निधी

संकलन शुभारंभ, माजी सैनिकांचा मेळावा

        नांदेड, दि. 4 :- सशस्त्र सेना ध्वजदिन निधी 2018-19  संकलन  शुभारंभ व माजी सैनिकांच्या मेळावा शुक्रवार 7 डिसेंबर 2018 रोजी जिल्हाधिकारी कार्यालय बचत भवन येथे सकाळी 11  वा. आयोजित केला आहे.  

सशस्त्र सेना ध्वजदिन निधी 2018 संकलनाचा शुभारंभ संकलन समितीचे अध्यक्ष व  जिल्हाधिकारी अरुण डोंगरे यांच्या  हस्ते होणार असुन या प्रसंगी  समितीचे सदस्य मुख्य कार्यकारी अधिकारी अशोक काकडे, भा.प्र.से, पोलीस अधिक्षक संजय जाधव, अप्पर जिल्हाधिकारी खुशालसिंह परदेशी,  निवासी उपजिल्हाधिकारी संतोष वेणीकर, जिल्हा उद्योग अधिकारी,  जिल्हा शिक्षणाधिकारी उपस्थित राहणार आहेत.

              गतवर्ष  2017-18  साठी  शासनाने जिल्हयाला  35 लाख  50 हजार रुपये संकलनाचे उद्दिष्ट दिले होते. जिल्ह्याने 54 लाख 81 हजार 688 रुपयाचा निधी जमा करुन  155 टक्के पुर्ण केले आहे. या निधी संकलनासाठी जिल्हयातील सर्व अधिकारी, कर्मचारी, सामाजिक संस्था व नागरिकांनी मोलाचे कार्य करुन सढळ हाताने मदत केली आहे.  या  संकलन  शुभारंभ कार्यक्रमात ज्या कार्यालयाने दिलेले इंष्टाक पुर्ण  करुन निधी जमा केला आहे त्यांचा सत्कार  होणार असुन  जिल्हयातील विरनारी, विरपिता / विरमाता  यांचाही सत्कार करण्याचे आयोजित केले आहे.  यानिमित्ताने माजी सैनिकांचा मेळाव्याचे आयोजन  करण्यात आले आहे. कार्यालय प्रमुखांनी व माजी सैनिकांनी या कार्यक्रमास उपस्थित रहावे, असे आवाहन जिल्हा सैनिक कल्याण अधिकारी मेजर मिलिंद तुंगार यांनी केले आहे.

00000

दिव्‍यांगांनी मतदानासाठी पुढाकार घ्‍यावा – जिल्‍हाधिकारी श्री.अरुण डोंगरे

दिनांक 03 डिसेंबर 2018 रोजी जागतिक दिव्‍यांग दिनानिमित्‍त महाराष्‍ट्र राज्‍य दिव्‍यांग कर्मचारी संघटना व जिल्‍हाधिकारी कार्यालयातील निवडणूक विभाग यांचे संयुक्‍त विद्ममाने, नियोजन भवन, जिल्‍हाधिकारी कार्यालय नांदेड येथे कार्यशाळा व मेळावा आयोजित करण्‍यात आला. कार्यक्रमाचे  उदघाटक मा.श्री.डी.पी.सावंत विधानसभा सदस्‍य उत्‍तर विभाग नांदेड व जिल्‍हा परिषद अध्‍यक्षा मा.श्रीमती. शांताबाई पवार जवळगावकर या होत्‍या. व प्रमुख उपस्थिती मा.श्री. हेमंत पाटील वि.स.स. नांदेड दक्षिण यांची होती. तसेच प्रशासनाच्‍या वतीने मा.श्री.अरुण डोंगरे जिल्‍हाधिकारी नांदेड, मा.श्री. खुशालसिंह परदेशी अपर जिल्‍हाधिकारी नांदेड, श्रीमती दिपाली मोतीयेळे, उपजिल्‍हा निवडणूक अधिकारी, नांदेड श्री. प्रदीप कुलकर्णी, उपविभागीय अधिकारी नांदेड, श्री. किरण अंबेकर, तहसिलदार नांदेड, डॉ.वाय.ए.चव्‍हाण, प्र.अधिष्‍ठाता, डॉ.शंकरराव चव्‍हाण शासकीय वैद्यकीय महाविद्यालय व रुग्णालय नांदेड, श्री. राजेंद्र तुबाकले, उपमुख्‍य कार्यकारी अधिकारी जिल्‍हा परिषद नांदेड, श्री. सत्‍येंद्र आऊलवार, समाजकल्‍याण अधिकारी नांदेड तसेच  विविध वृत्‍तपत्रांचे पत्रकार उपस्थित होते.

   सर्व उपस्थित मान्‍यवरांचे जिल्‍हा संघटना व जिल्‍हा प्रशासनाच्‍यावतीने स्‍वागत करण्‍यात आले. या कार्यक्रमास मा.श्री.डी.पी.सावंत आमदार उत्‍तर विभाग नांदेड व जिल्‍हा परिषद अध्‍यक्षा मा. श्रीमती. शांताबाई पवार जवळगावकर व मा. श्री. हेमंत पाटील विधानसभा सदस्‍य दक्षिण विभाग नांदेड यांनी  मार्गदर्शन केले.

या कार्यक्रमाच्‍या प्रारंभी अंध विद्यालय वसरणी ता. जि. नांदेड  येथील विद्यार्थ्‍यांनी स्‍वागतगीत सादर केले. संघटनेचे जिल्‍हा सचिव श्री.वसंत पवार यांनी कार्यक्रमाचे प्रास्‍ताविक केले. तसेच या कार्यक्रमात उत्‍कृष्‍ट काम करणा-या दिव्‍यांग कर्मचारी व कर्मचा-यांचे गुणवंत पाल्‍य यांचा मान्‍यवर अतिथींच्‍या हस्‍ते सत्‍कार करण्‍यात आला. यावेळी दिव्‍यांगांना साहित्‍य वाटप करण्‍यात आले. तसेच जिल्‍हा प्रशासनाच्‍यावतीने जिल्‍हा संघटनेचे अध्‍यक्ष श्री. सुधाकर शेवाळे यांचा सत्‍कार करण्‍यात आला. 

जागतिक अपंग दिनानिमित्‍त आयोजित कार्यक्रमात मा. श्री. अरुण डोंगरे जिल्‍हाधिकारी नांदेड यांनी सुलभ निवडणुकांच्‍या अनुषंगाने उपस्थितांना सविस्‍तर माहिती दिली व दिव्‍यांगांनी आपले नाव मतदार यादीत ध्‍वजांकित करण्‍यासाठी सहकार्य करावे आणि मतदानासाठी देखील पुढाकार घ्‍यावा असे आवाहन केले. मा. श्रीमती दिपाली मोतीयेळे उपजिल्‍हा निवडणूक  अधिकारी नांदेड यांनी भारत निवडणूक आयोगाकडील शासन निर्णयानूसार दिव्‍यांगांना देण्‍यात येणा-या विविध सोयी-सुविधांबाबत सविस्‍तर माहिती दिली. ईव्‍हीएम मशीनवर आता ब्रेल लिपीही उपलब्‍ध राहणार आहे. तसेच दिव्‍यांग मतदारांची विशेष नोंदीची स्‍वतंत्र यादी व मतदानासाठीही स्‍वतंत्र सुविधा उपलब्‍ध करुन देण्‍याबाबतची सविस्‍तर माहिती दिली. जिल्‍हा प्रशासनाच्‍यावतीने दिव्‍यांगांची विशेष नोंद घेण्‍यासाठी कार्यक्रमस्‍थळी उपविभागीय अधिकारी कार्यालय नांदेड व  तहसिल कार्यालय नांदेड यांच्‍यातर्फे स्‍टॉल लावण्‍यात आला होता.

या कार्यक्रमात श्री. किशन केने जिल्‍हा संघटनेचे तालुका अध्‍यक्ष यांनी आपले मनोगत व्‍यक्‍त केले. तसेच श्रीमती.लोणीकर यांनी गीत सादर केले.

कार्यक्रमाचे सूत्रसंचालन जिल्‍हा संघटनेचे उपाध्‍यक्ष श्री.गणेश रायेवार व श्री. दुधगोंडे यांनी केले. कार्यक्रमाचे आभार श्री. शेख यांनी केले. 

सदर कार्यक्रमासाठी श्री. मरळे नायब तहसिलदार श्री. नादंगावकर नायब तहसिलदार , श्रीमती स्‍वामी नायब तहसिलदार, श्रीमती जगताप नायब तहसिलदार श्री. कुणाल जगताप अव्‍वल कारकून, तहसिल कार्यालय नांदेड, दिव्‍यांग संघटनेचे जिल्‍हा कार्याध्‍यक्ष श्री कोयलवाड रामगौंड, एम.बी.शेख, चांदू दूधगोंडे, बापूराव मोरे, पदमिनी कासेवाड, पंचफुला जाधव, देविदास बस्‍वदे, बाबूराव वाभने, गणेश रायेवार, गणेश पाटील, अशोक सोळंके, सिध्‍देश्‍वर मठपती, साहेबराव सुरेवाड आदींनी परिश्रम घेतले.

0000