वृत्त क्र. 630

तीर्थ दर्शनासाठी समाज कल्याण विभागाकडे अर्ज दाखल करा 

ज्येष्ठ नागरिकांनी लाभ घ्यावा ; 31 ऑगस्ट शेवटची तारीख 

नांदेड दि. 24 जुलै :- राज्यातील ज्येष्ठ नागरिकांना देशातील मोठ्या तीर्थस्थळांना भेटी देणे सुकर व्हावे यासाठी राज्यातील सर्व धर्मातील ज्येष्ठ नागरिकांना जे 60 वर्षे किंवा त्याहून अधिक वयाचे आहेत त्यांना राज्य आणि भारतातील तीर्थ क्षेत्रांना मोफत दर्शनाची संधी देण्यासाठी "मुख्यमंत्री तीर्थ दर्शन योजना" सामाजिक न्याय व विशेष सहाय्य विभागाचा 18 जुलै 2024 रोजीच्या शासन निर्णयान्वये सुरू करण्यात आली आहे. या योजनेचा लाभ घेण्यासाठी लाभार्थ्यांनी 25 जुलै ते 31 ऑगस्ट 2024 या कालावधीत सहाय्यक आयुक्त समाज कल्याण नांदेड येथे अर्ज सादर करावेत, असे आवाहन समाज कल्याणचे सहायक आयुक्त शिवानंद मिनगिरे यांनी केले आहे.   

या योजनेमध्ये महाराष्ट्र राज्य व भारत देशातील प्रमुख तीर्थ स्थळांचा समावेश राहील. यात निर्धारित तीर्थस्थळांपैकी एकाच स्थळाच्या यात्रेकरिता पात्र व्यक्तीला या योजनेचा एक वेळ लाभ घेता येईल. प्रवास खर्चाची कमाल मर्यादा प्रति व्यक्ती 30 हजार रूपये इतकी राहील यामध्ये प्रत्यक्ष प्रवास भोजन निवास इत्यादी सर्व बाबींचा समावेश असेल.

 

लाभार्थी महाराष्ट्राचा रहिवासी असावा. लाभार्थ्याचे वय 60 वर्षे पूर्ण असावे. लाभार्थ्याचे उत्पन्न 2.50 लाखापेक्षा कमी असावे यापेक्षा जास्त नसावे. अर्जासोबत रहिवासी प्रमाणपत्र,आधार कार्ड / मतदान कार्ड, राष्ट्रीय सामाजिक सहाय्य कार्यक्रमांतर्गत इंदिरा गांधी, राष्ट्रीय वृध्दापकाळ निवृत्ती वेतन योजनेअंतर्गत किंवा राज्य/केंद्रशासित सरकारच्या इतर कोणत्याही पेन्शन योजनेअंतर्गत वृध्दापकाळ निवृत्तीवेतन मिळाल्याचा पुरावा किंवा तहसीलदार किंव्हा तत्सम सक्षम अधिकारी यांनी निर्गमित केलेले ज्येष्ठ नागरीक प्रमाणपत्र जोडणे आवश्यक. 

वैद्यकीय प्रमाणपत्र, पासपोर्ट आकाराचे 2 फोटो, उत्पन्नाचे प्रमाणपत्र (लाभार्थ्याचे कौटुंबिक वार्षिक उत्पन्न रु. 2.50 लाखाच्या आत असावे किंवा पिवळे/ केशरी रेशन कार्ड आवश्यक आहे. जवळच्या नातेवाईकाचा मोबाईल नंबर व या योजनेच्या अटी शर्तीचे पालन करण्याबाबतचे हमीपत्र सोबत जोडावे लागेल. 75 वर्षावरील अर्जदाराला त्याच्या जीवनसाथी किंवा सहाय्यकापैकी एकाला त्यांच्यासोबत नेण्याची परवानगी असेल परंतु अर्जदार त्याच्या अर्जात असे नमूद करणे आवश्यक आहे की त्याचा जीवनसाथी/सहाय्यक देखील प्रवास करण्यास इच्छुक आहे. 

वरील कागदपत्रे पूर्ण करणारे लाभार्थ्यांनी 25 जुलै ते 31 ऑगस्ट 2024 पर्यंत सहाय्यक आयुक्त, समाज कल्याण कार्यालय, डॉ. बाबासाहेब आंबेडकर सामाजिक न्याय भवन ग्यानमाता शाळेसमोर, नांदेड येथे परिपूर्ण अर्ज सादर करावेत. तसेच यापूर्वी अर्ज दाखल केलेल्या लाभार्थ्यांनी उपरोक्त प्रमाणे कागदपत्रांची पूर्तता करण्यासाठी समाज कल्याण कार्यालयाशी संपर्क साधावा, असेही आवाहन समाज कल्याण सहायक आयुक्त शिवानंद मिनगिरे यांनी केले आहे.  

00000                                                                                      

 वृत्त क्र. 629

जिल्ह्यात गत 24 तासात सरासरी  10  मि.मी. पाऊस

नांदेड दि. 24 जुलै :- जिल्ह्यात 24  जुलै रोजी सकाळी  संपलेल्या गत  24 तासात सरासरी  10  मिलीमीटर पावसाची नोंद झाली असून जिल्ह्यात एकुण 372.30  मिलीमीटर पाऊस झाला आहे.

 

जिल्ह्यात बुधवार 24 जुलै रोजी सकाळी संपलेल्या गत 24 तासात झालेला पाऊस मिली मीटरमध्ये तालुकानिहाय पुढील प्रमाणे, कंसात एकूण पाऊस : नांदेड- 9.70 (345.90), बिलोली-8.20 (417.10), मुखेड- 3.60 (412.30), कंधार-2 (383.10), लोहा-5.70 (371.80), हदगाव-11.70 (300.70), भोकर-19.10 (332.10), देगलूर-4.20 (325.90), किनवट-16.50(480.10), मुदखेड 15.60 (397.10), हिमायतनगर-12.70 (341.90), माहूर- 10 (359.40), धर्माबाद- 12.70 (442), उमरी- 14.60 (316.20), अर्धापूर- 19 (420), नायगाव-9.90 (267.70) मिलीमीटर आहे.

0000

 वृत्त क्र. 628

दहावी, बारावी लेखी परीक्षेसाठी हेल्पलाईन सुरु 

नांदेड,  दि. 24 :- महाराष्ट्र राज्य माध्यमिक व उच्च माध्यमिक शिक्षण मंडळ पुणे यांच्यावतीने जुलै-ऑगस्ट- 2024 मध्ये माध्यमिक व उच्च माध्यमिक प्रमाणपत्र परीक्षेसंदर्भात विद्यार्थ्यांना येणाऱ्या अडीअडचणी सोडविण्यासाठी लातूर विभागीय मंडळ स्तरावर सकाळी 8 ते सायंकाळी 8 पर्यत इयत्ता दहावीसाठी 02382-251633 व इयत्ता बारावीसाठी 02382-251733 या क्रमांकावर लातूर विभागीय मंडळात हेल्पलाईन सुरु करण्यात आली आहे. विद्यार्थी पालक व शाळा प्रमुखांनी आपल्या अडीअडचणी विषयी दूरध्वनीवर संपर्क साधावा, असे आवाहन लातूर विभागीय मंडळाचे विभागीय सचिव यांनी केले आहे.

 

तसेच नियुक्त अधिकारी-कर्मचाऱ्यांचे भ्रमणध्वनी क्रमांक पुढील प्रमाणे आहेत. सहसचिव श्रीमती भंडारी 9422886101 व सहा.सचिव ए.आर.कुंभार 9405077991, तसेच उच्च माध्यमिक साठी एन.एन.डुकरे (व.अ) मो.नं. 8379072565, एम.यु.डाळिंबे (व.लि) मो.नं. 9423777789,  तर माध्यमिक साठी स.अ. एस.एस. काथर 8275043112 तर एस.एल.राठोड (क.लि) मो.क्र. 8830298158 हा भ्रमणध्वनी संपर्क क्रमांक आहे. तर नांदेड जिल्ह्यासाठी समुपदेशक बी. एम. कच्छवे यांचा भ्रमणध्वनी 9371261500, बी.एम.कारखेडे मो.क्र.9860912898, पी.जी. सोळंके मो.क्र. 9860286857,  बी. एच. पाटील 9767722071 यांचे भ्रमणध्वनी क्रमांक लातूर विभागीय मंडळाने प्रसिद्धी पत्रकाद्वारे कळविले आहेत.

00000

 वृत्त क्र. 627

मुख्यमंत्री माझी लाडकी बहीण योजनेतील अर्ज स्विकारण्यासाठी मनपाचे 23 मदत केंद्र

·         आतापर्यंत जवळपास 12 हजारावर अर्ज प्राप्त

·         जास्तीत जास्त पात्र महिलांनी अर्ज करण्याचे मनपा प्रशासनाचे आवाहन

·         अंगणवाडी सेविका, आशा वर्कर यांची अर्ज भरुन घेण्यासाठी घरोघरी भेट

 नांदेड दि. 24 जुलै :- मुख्यमंत्री माझी लाडकी बहीण योजनेत वार्ड समिती केंद्रामार्फत पात्र लाभार्थी महिलाचे अर्ज संकलित करण्याचे कामकाज नांदेड महानगरपालिकेच्या 23 मदत केंद्रामार्फत सुरु आहे. तसेच अंगणवाडी सेविकाही घरोघरी जावून पात्र महिलांचे अर्ज भरुन घेण्याचे काम प्राधान्याने करीत आहेत. आतापर्यत मनपाच्या मदत केंद्रावर ऑफलाईन 5 हजार व ऑनलाईन 1 हजार 500 असे एकूण 6 हजार 500 अर्ज प्राप्त झाले आहेत. तसेच अंगणवाडी सेविकांनी घरोघरी भेट देवून 5 हजारावर अर्ज संकलित केले आहेत. आजपर्यत असे जवळपास 12 हजारावर अर्ज प्राप्त झाले आहेत. तरी जास्तीत जास्त पात्र महिलांनी मुख्यमंत्री माझी लाडकी बहीण योजनेत आपले अर्ज भरावेत, असे आवाहन मनपा आयुक्त डॉ. महेशकुमार डोईफोडे यांनी केले आहे.

 

मुख्यमंत्री माझी लाडकी बहीण योजनेतील अर्ज स्विकारण्यासाठी शहरी भागात वार्डनिहाय समित्या गठीत केल्या आहेत. तसेच मनपाच्यावतीने 23 मदत केंद्र सुरु केले आहेत. या मदत केंद्रामार्फत आजपर्यत प्राप्त झालेल्या अर्जाची तपासणी करुन पात्र, अपात्रतेची यादी तयार करण्यात येणार आहे. ही यादी मनपाच्या वार्ड समितीची मान्यता घेवून प्रकाशित केली जाणार आहे. अंतिम यादी जिल्हास्तरीय समितीकडे सादर करण्यात येणार आहे.

 या योजनेतील पात्र महिलांचे अर्ज संकलित करण्यासाठी मनपाच्या अंगणवाडी सेविका, आशा वर्कर घरोघरी भेट देवून अर्ज भरुन घेण्याची कार्यवाही करीत आहेत. शासनाच्या निर्देशानुसार पात्र महिलांना रक्षाबंधनापूर्वी पहिला हप्ता दिला जाईल यांची दक्षता सुध्दा घेतली जात आहे. तरी नांदेड शहरातील पात्र महिलांना सेतू सुविधा केंद्र ,नारी शक्ती दूत ॲपच्या माध्यमातून तसेच मनपाचे मदत केंद्रावर येवून हा अर्ज भरता येईल. तरी जास्तीत जास्त महिलांनी या योजनेत सहभागी व्हावे असे आवाहन मनपा आयुक्त डॉ. महेशकुमार डोईफोडे यांनी केले आहे.

00000

 वृत्त क्र. 626

होमगार्ड नोंदणीसाठी 14 ऑगस्टपर्यत ऑनलाईन अर्ज करण्याचे आवाहन

नांदेड दि. 24 जुलै :- नांदेड जिल्हा होमगार्ड मधील रिक्त असलेल्या 335 चा होमगार्ड सदस्य अनुशेष  भरण्यासाठी होमगार्ड नोंदणीचे आयोजन 16 ऑगस्ट 2024 पासून पोलीस मुख्यालय नांदेड येथे केले आहे.

यासाठी 14 ऑगस्ट 2024 अखेर ऑनलाईन अर्ज मागविण्यात येत आहेत. होमगार्ड नोंदणीचे माहिती पत्रक नियम व अटीबाबत विस्तृत माहिती https://maharashtracdhg.gov.in/mahahg/login1.php या संकेतस्थळावर उपलब्ध आहे. या अनुशेषामध्ये बदल करण्याचा अधिकार जिल्हा समादेशक होमगार्ड नांदेड यांना राहील. तरी होमगार्ड मध्ये सेवा करु इच्छिणाऱ्या नांदेड जिल्ह्यातील रहीवासी उमेदवारांनी नोंदणीसाठी अर्ज करावेत असे आवाहन जिल्हा समादेशक तथा अपर पोलीस अधीक्षक अबिनाश कुमार यांनी केले आहे.

0000