खरीप हंगाम बीज प्रक्रिया स्पर्धेतील विजेत्यांचा सत्कार समारंभ 

नांदेड (जिमाका) दि. 15 :-  जिल्हा अधीक्षक कृषी अधिकारी कार्यालयातील सहाय्यक कृषी अधिकारी,  महाराष्ट्र राज्य कृषी सहाय्यक संघटना, आणि आरसीएफ कंपनी यांच्या संयुक्त विद्यमाने सन 2021 मध्ये शेतकऱ्यांसाठी खरीप हंगाम बीजप्रक्रिया स्पर्धा घेण्यात आली होती. या स्पर्धेतील सहभागी विजेत्या शेतकरी स्पर्धकांना जिल्हा अधिक्षक कृषि अधिकारी रविशंकर चलवदे व आत्मा यंत्रणेच्या उपसंचालक माधुरी सोनवणे यांच्या हस्ते सन्मानपत्र, ट्रॉफी, कृषी विभागातील योजनांची माहिती पुस्तिका व पुष्पगुच्छ देऊन सत्कार करण्यात आला. 

या स्पर्धेत महाराष्ट्रातील शेतकऱ्यांनी मोठ्या प्रमाणात सहभाग नोंदविला होता. स्पर्धेत महाराष्ट्रातील शेतकऱ्यांनी ऑनलाइन तंत्रशुद्ध पद्धतीने बीजप्रक्रिया करतानाचे व्हिडिओ तयार करून अपलोड करावयाचे होते. ज्या स्पर्धकांच्या व्हिडिओला जास्तीतजास्त लाईक मिळतील त्यांच्यामधून प्रथम तीन विजेत्या स्पर्धकाच्या नावाची  घोषणा करण्यात आली. त्यात नांदेड जिल्ह्यासाठी प्रथम क्रमांक हिमायतनगर येथील श्याम सुंदर गणपत ढगे, द्वितीय  क्रमांक मुदखेड तालुक्यातील विश्‍वनाथ संभाजी पवार निवघेकर, तृतीय क्रमांक नायगाव तालुक्यातील मांजरम येथील संदीप विश्वंभर गायकवाड यांना मिळाला.

स्पर्धेसाठी आरसीएफ कंपनीकडून स्पर्धकांना स्पर्धेत सहभागी होण्यासाठी बायोला या जैविक संघाचा पुरवठा करण्यात आला. कार्यक्रमात रविशंकर चलवदे यांनी बीज प्रक्रियेचे अनन्यसाधारण महत्त्व विशद करून सहाय्यक कृषी अधिकारी, कृषी सहाय्यक संघटना व आरसीएफ कंपनीकडून राबविण्यात येणाऱ्या उपक्रमाबद्दल गौरवोद्गार काढून पुढील हंगामात शेतकऱ्यांनी शंभर टक्के क्षेत्रावरील पेरणीसाठी बीज प्रक्रियाचा वापर करावा, असे आवाहन केले. 

सत्कार समारंभ कार्यक्रमास आरसीएफ कंपनी नांदेड जिल्हा समन्वयक केदार काचावार, सहाय्यक कृषी अधिकारी परिवाराचे जिल्हा समन्वयक शरद निळकंठवार,  जिल्हा अधीक्षक कृषी अधिकारी कार्यालयातील तंत्र अधिकारी वैभव लिंगे, जैविक कीडनियंत्रण प्रयोगशाळेचे तंत्र अधिकारी संदीप स्वामी, महाराष्ट्र राज्य कृषी सहायक संघटनेचे राज्य सरचिटणीस वसंत जारीकोटे, नांदेड जिल्हाध्यक्ष शंकर पवार, जिल्हा प्रसिद्धी प्रमुख राम कपाटे, जिल्हा कार्यकारणी सदस्य दिलीप काकडे, कृषी सहाय्यक शिवकुमार देशमुख, कदम, केकान,  त्याचबरोबर मोठ्या प्रमाणात शेतकरी व कार्यालयीन कर्मचारी यांची उपस्थिती होती.

0000

 “अनुभव लेखन कशासाठी ?  लिंगभाव समतेसाठी”

विषयावरील अनुभव लेखन उपक्रमात सहभागी होण्याचे आवाहन   

नांदेड (जिमाका) दि. 15 :- नागरिकांमध्ये निवडणूक व त्यासंदर्भात जागृती व्हावी तसेच त्यांना निवडणूक प्रक्रियेची माहिती व्हावी. या हेतूने यावर्षी महिला दिन कार्यक्रमाच्या निमित्ताने मुख्य निवडणूक अधिकारी यांच्या कार्यालयाकडून “अनुभव लेखन कशासाठी ?  लिंगभाव समतेसाठी” या विषयावरील अनुभव लेखन हा उपक्रम राबविण्यात येत आहे. 

या विषयाबाबतचे अनुभव, लेखन नागरिकांनी शुक्रवार 25 मार्च 2022 पर्यंत मुख्य निवडणूक अधिकारी यांच्या कार्यालयाकडे पाठवावे. मुख्य निवडणूक अधिकारी यांच्या कार्यालयास प्राप्त होणाऱ्या निवडक अनुभव / लेखाचे पुस्तक तयार करुन ते प्रसिद्ध करण्यात येणार आहे. या उपक्रमात जिल्ह्यातील विद्यार्थी, महिला, सर्व सामान्य नागरिकांनी सहभाग नोंदवावा, असे आवाहन जिल्हाधिकारी तथा जिल्हा निवडणूक अधिकारी डॉ. विपीन इटनकर यांनी केले आहे.

00000

नांदेड जिल्ह्यात 6 व्यक्ती कोरोना बाधित

तर 5 कोरोना बाधित झाले बरे 

नांदेड (जिमाका) दि. 15 :- जिल्ह्यात आज प्राप्त झालेल्या 698अहवालापैकी 6 अहवाल कोरोना बाधित आले आहेत. यात आरटीपीसीआर तपासणीद्वारे 5 तर अँटिजेन तपासणीद्वारे 1 अहवाल बाधित आले आहेत. जिल्ह्यात आजवर एकुण बाधितांची संख्या 1 लाख 2 हजार 793 एवढी झाली असून यातील 1 लाख 86 रुग्णांना रुग्णालयातून सुट्टी देण्यात आलेली आहे. आजच्या घडीला 15 रुग्ण उपचार घेत आहे. 

जिल्ह्यात आतापर्यंत बाधित मृत रुग्णांची संख्या 2 हजार 692 एवढी आहे. आजच्या बाधितांमध्ये आरटीपीसीआर तपासणीद्वारे किनवट 1, लोहा 1, कंधार 1, दिल्ली 2 तर  अँटिजेन तपासणीद्वारे किनवट 1 असे एकुण 6 कोरोना बाधित आढळले आहे. 

आज नांदेड जिल्ह्यातील तालुक्यांतर्गत गृह विलगीकरण 5 असे एकुण 5 कोरोना बाधितांना औषध उपचारानंतर बरे झाल्याने सुट्टी देण्यात आली. 

उपचार घेत असलेल्या बाधितांमध्ये नांदेड जिल्ह्यातील तालुक्यातर्गत गृह विलगीकरण 8, नांदेड मनपा अंतर्गत गृह विलगीकरण 7 असे एकुण 15 व्यक्ती उपचार घेत आहेत. 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 8 लाख 87 हजार 839

एकुण निगेटिव्ह स्वॅब- 7 लाख 67 हजार 971

एकुण पॉझिटिव्ह बाधित व्यक्ती- 1 लाख 2 हजार 793

एकूण रुग्णालयातून सुट्टी दिलेली संख्या- 1 लाख 86

एकुण मृत्यू संख्या-2 हजार 692

उपचारानंतर बाधित रुग्ण बरे होण्याचे प्रमाण 97.36 टक्के

आज स्वॅब तपासणी अनिर्णीत संख्या-00

आज स्वॅब नाकारण्यात आलेली संख्या-01

आज प्रलंबित स्वॅब तपासणी संख्या-निरंक

रुग्णालयात उपचार घेत असलेले बाधित व्यक्ती-15

आज रोजी अतिगंभीर प्रकृती असलेले-निरंक 

कोरोना विषाणुची लस सुरक्षित असून कोरोनाची लाट पुन: येण्यापासून प्रतिबंध करण्यासाठी कोविड-19 लसीकरण दिर्घकाळ आणि प्रभावी उपाय आहे. इतरांनाही लस घेण्यासाठी प्रोत्साहित करावे. ज्या नागरिकांनी कोविडच्या पहिल्या लसीचा डोस घेतला आहे त्यांनी ठराविक कालावधीनंतर दुसऱ्या लसीचा डोस अवश्य घ्यावा, असे आवाहन जिल्हाधिकारी डॉ. विपीन इटनकर यांनी केले आहे.

000000

 राष्ट्रीय लोकअदालतीमध्ये 10 हजार 409 प्रकरणे सामोपचाराने निकाली  

·  विविध प्रकरणात 17 कोटी 33 लाख 87 हजार 931 रक्कमेची तडजोड  

नांदेड (जिमाका) दि. 15 :- न्यायालयीन प्रकरणातील आपआपसातील वाद, तंटे सामोपचाराने मिटावेत या उद्देशाने जिल्ह्यात 12 मार्च 2022 रोजी राष्ट्रीय लोकअदालत संपन्न झाली. या लोकन्यायालयात तब्बल 10 हजार 409  प्रकरणे सामोपचाराने निकाली निघाली आहेत. याचबरोबर पाच दिवस घेण्यात आलेल्या विशेष मोहिमेअंतर्गत 1 हजार 421 प्रकरणे निकाली काढण्यात आली. यातील आर्थिक व्यवहाराशी निगडीत असलेल्या 17 कोटी 33 लाख 87 हजार 931 एवढ्या रक्कमेची विविध प्रकरणात  तडजोड झाली असल्याची माहिती जिल्हा विधी सेवा प्राधिकरणचे सचिव आर. एस. रोटे यांनी दिली.    

नांदेड जिल्हा विधी सेवा प्राधिकरणाचे अध्यक्ष तथा प्रमुख जिल्हा न्यायाधीश श्रीकांत ल. आणेकर यांच्या मार्गदर्शनाखाली नांदेड जिल्ह्यातील सर्व न्यायालयात शनिवार 12 मार्च रोजी राष्ट्रीय लोकअदालतीचे आयोजन करण्यात आले होते. तडजोड झालेल्या न्यायालयीन प्रकरणांमध्ये दिवाणी, फौजदारी, एन.आय.अॅक्ट., बॅंक प्रकरणे, मोटार वाहन अपघात, भूसंपादन, ग्रामपंचायतीचे घरपट्टी व पाणीपट्टीचे प्रकरणे इतर, तसेच कौटुंबिक न्यायालय, कामगार न्यायालयाच्या प्रकरणांचा, विविध बॅंका तसेच विद्युत प्रकरणे, टेलिफोन, मोबाईल यांचे दाखलपूर्व प्रकरणांचा यात समावेश होता.  

ही लोकअदालत यशस्वी होण्यासाठी जिल्हयातील सर्व न्यायाधीश,  पॅनलवरील न्यायाधीश, वकील, पॅनल सदस्य व सर्व विधिज्ञ यांनी जास्तीतजास्त प्रकरणे निकाली काढण्यासाठी प्रयत्न केले. प्रत्येक तालुक्यासह कौटुंबिक न्यायालय, कामगार न्यायालय, सहकार न्यायालय येथे त्या-त्या न्यायालयात राष्ट्रीय लोकअदालतीचे आयोजन करण्यात आले होते. यासाठी नांदेड अभिवक्ता संघाचे अध्यक्ष, जिल्हा सरकारी वकिल तसेच जिल्हयातील सर्व विधिज्ञ आणि विविध विमा कंपनी, भूसंपादन अधिकारी, मनपा, महसुल विभाग अधिकारी तसेच जिल्हा परिषद उपमुख्य कार्यकारी अधिकारी यांचे मोलाचे सहकार्य लाभले. 

लोकअदालत यशस्वी व जास्तीत जास्त प्रकरणे निकाली काढण्यासाठी प्रमुख जिल्हा न्यायाधीश तथा अध्यक्ष श्रीकांत आणेकर तसेच जिल्हा न्यायाधीश के. एन. गौतम व जिल्हा विधी सेवा प्राधिकरण सचिव आर. एस. रोटे यांनी विशेष प्रयत्न केले. प्रमुख जिल्हा न्यायाधीश श्रीकांत आणेकर यांनी लोकअदालत यशस्वी झाल्याबद्दल सर्वांचे आभार व्यक्त केले. जिल्हा विधी सेवा प्राधिकरणचे सचिव आर. एस. रोटे यांनी उपस्थित सर्व पक्षकार तसेच सर्व न्यायाधीश, विधीज्ञ, सर्व न्यायालयीन कर्मचारी, लोकअदालत यशस्वी करण्यासाठी प्रत्यक्ष व अप्रत्यक्ष सहकार्य केलेल्या सर्वांचे आभार मानून यापुढे अशीच सहकार्याची अपेक्षा त्यांनी व्यक्त केली.

00000

 आदिवासी सुशिक्षित बेरोजगार उमेदवारांसाठी प्रशिक्षण 

नांदेड (जिमाका) दि. 15 :- आदिवासी उमेदवारांसाठी कौशल्य विकास, रोजगार व उद्योजकता माहिती व मार्गदर्शन केंद्र किनवट या प्रशिक्षण केंद्रात येत्या 1 एप्रिल 2022 पासून विविध स्पर्धा परीक्षेच्या तयारीसाठी उमेदवारांना प्रवेश देण्यात येणार आहेत. या प्रशिक्षण सत्रात नोकऱ्यांसाठी विविध स्पर्धा परिक्षांची तयारी करून घेण्यात येते. पात्र इच्छूक आदिवासी (अनुसूचित जमातीचे) उमेदवारांनी गुरुवार 24 मार्च 2022 पर्यंत शैक्षणीक व जातीचे प्रमाणपत्राच्या सत्यप्रतीसह अर्ज करावेत, असे आवाहन कौशल्य विकास, रोजगार व उद्योजकता मार्गदर्शन अधिकारी किनवट यांनी केले आहे. 

आदिवासी उमेदवारांसाठी राबविण्यात येणाऱ्या इतर खात्याच्या स्वयंरोजगार योजनांची माहिती देवून मार्गदर्शन केले जाणार आहे. प्रशिक्षण केंद्रात 1 एप्रिल 2022 पासून सुरू होणाऱ्या 102 च्या प्रशिक्षण सत्रात आदिवासी सुशिक्षीत बेरोजगार उमेदवारांना विविध स्पर्धा परीक्षेची तयारीसाठी प्रवेश देण्यासाठी उमेदवारांनी 24 मार्च, 2022 तत्पुर्वी या कार्यालयास पोहचतील अशा बेताने आदिवासी (अनुसूचीत जमातीचे ) उमेदवारांकडून अर्ज मागविण्यात येत आहे. अर्ज करण्यासाठी या पत्त्यावर आदिवासी उमेदवारांकरीता कौशल्य विकास, रोजगार व उद्योजकता माहिती व मार्गदर्शन केंद्र, पेटकूले नगर, गोकुंदा ता. किनवट जि. नांदेड संपर्क दुरध्वनी क्रमांक 02469-221801/ 7620304096 / 7620216463 संपर्क करावा, असेही कळविले आहे. 

या प्रवेशाच्या अटी पुढीलप्रमाणे आहेत. उमेदवार अनुसूचित जमाती पैकी (एस.टी.) प्रवर्गातील असावेत नांदेड जिल्ह्यातील व इतर जिल्ह्यातील उमेदवारांचाही प्रवेशासाठी विचार करण्यात येइल. उमेदवार कमीत कमी शालांत परीक्षा उतीर्ण आसावे उच्च शैक्षणिक पात्रतेस प्राधाण्य देण्यात येईल. उमेदवारांनी कौशल्य विकास, रोजगार व उद्योजकता कार्यालयात नाव नोंदणी केलेली असावी. उमेदवारांनी किनवट येथे स्वत: रहाण्याची व जेवणाची व्यवस्था स्वखर्चाने करावी लागेल. प्रशिक्षण कालावधी 3 महीने 15 दिवस असून शालांत परीक्षा उतीर्ण उमेदवारांना तसेच पदवी धारकांना दरमहा 1 हजार रुपये विद्यावेतन दिले जाईल. वयोमर्यादा - उमेदवाराचे वय 31 मार्च 2022 रोजी 18 वर्ष पुर्ण असावे व 35 पेक्षा जास्त नसावे. प्रशिक्षणार्थिचे विद्यावेतन संबंधीत प्रशिक्षणार्थिचे बँक खात्यामध्ये दर महा जमा करण्यात येणार असल्यामूळे प्रशिक्षणार्थिंचे बँक खाते चालू असणे आवश्यक आहे. आपण यापुर्वी अशाप्रकारचे प्रशिक्षण घेतलेले असल्यास किंवा सदर प्रशिक्षण सत्र अर्ध्यातुन सोडलेले असल्यास प्रवेश देण्यात येणार नाही असेही प्रसिध्दीपत्रकाद्वारे कळविले आहे.

0000

 व्यवसायकर दात्यांसाठी विलंब शुल्क माफी योजना 

नांदेड (जिमाका) दि. 15 :- सर्व व्यवसायकर नोंदणी दाखला पीटीआरसी धारकांनी 31 डिसेंबर 2021 पर्यंत व्यवसायकर, व्यवसायकर ई-रिर्टन दाखल केले नसतील त्यांना व्यवसायकर कायदा-1975 अंतर्गत शासनाच्या अधिसूचनेनुसार 31 डिसेंबर 2021 पर्यंतच्या कालावधीचे ई-विवरणपत्र दाखल करावयाचे राहिले असल्यास ते आता विलंब शुल्काशिवाय गुरुवार 31 मार्च 2022 पर्यंत भरता येणार आहेत. 

31 डिसेंबर 2021 चे सर्व ई-रिटर्न (ई-विवरणपत्र) देय कर व व्याज भरून विलंब शुल्काशिवाय गुरुवार 31 मार्च 2022 पर्यंत दाखल करता येतील, याची सर्व पीटीआरसी धारकांनी नोंद घ्यावी. यासाठी https://www.mahagst.gov.in/ या संकेतस्थळाला भेट द्यावी, असे आवाहन जिल्हा व्यवसायकर अधिकारी गौ. म. स्वामी यांनी केले आहे.

000000