छायाचित्रासह मतदार यादीचा

विशेष संक्षिप्त पुनरिक्षण कार्यक्रम जाहीर 

·  मतदार यादीतील आपली नावे तपासून घेण्याचे आवाहन 

नांदेड, (जिमाका) दि. 1 :- जिल्‍हयातील प्रत्‍येक मतदारांनी मतदार यादीतील आपले तपशिल अचूक आहेत याची खात्री करून घेतली पाहिजे. यात नाव नोंदणी, दुरूस्ती, वगळणी करण्यासाठी नागरिकांनी www.nvsp.in या संकेतस्थळावर ऑनलाईन अर्ज सादर करावेत. ज्यांना ऑफलाईन अर्ज सादर करावयाचे आहेत त्यांनी संबंधित मतदान केंद्रस्तरीय अधिकारी (बीएलओ), तहसिल कार्यालय किंवा मतदार नोंदणी अधिकारी यांच्याशी संपर्क साधावे, असे आवाहन उपजिल्हा निवडणूक अधिकारी यांनी कळविले आहे.

भारत निवडणूक आयोगाने 1 जानेवारी 2024 या अर्हता दिनांकावर आधारीत छायाचित्रासह मतदार यादीचा विशेष संक्षिप्त पुनरिक्षण कार्यक्रम जाहीर केला आहे. या कार्यक्रमांतर्गत दिनांक 1 जून ते 16 ऑक्टोंबर 2023 पर्यंत पुनरिक्षण पूर्व कार्यक्रम निर्धारीत केला आहे. तसेच या कार्यक्रमांतर्गत 17 ऑक्टोंबर 2023 रोजी प्रारूप यादी प्रसिद्ध करावयाची असून 5 जानेवारी 2024 रोजी अंतिम यादी प्रसिद्ध करावयाची आहे.

दि. 1 जानेवारी 2024 या अर्हता दिनांकावर आधारीत छायाचित्रासह मतदार यादीचा विशेष संक्षिप्त पुनरिक्षण कार्यक्रम देण्यात आला आहे. सदर कार्यक्रमाच्‍या अनुषंगाने जिल्ह्यातील सर्व मतदान केंद्रावर संबंधित बीएलओ मार्फत मतदारांची पडताळणी करण्‍याकरीता घरोघरी भेट देतील तसेच सर्व मतदारांनी आपले मतदार यादीतील नाव, पत्‍ता, लिंग, जन्‍म दिनांक, वय, ओळखपत्र क्रमांक, मतदार संघ इत्यादी तपशिल मतदार यादीत तपासुन ते अचूक आहे याची मतदारांनी खात्री करून घेतली पाहिजे.

मतदार यादीमध्‍ये ज्‍या मतदाराची नावे नाहीत अशा मतदारांना नमुना-6 मध्‍ये अर्ज सादर करून त्‍यांची नावे मतदार यादीत समाविष्‍ट करता येतील. मतदार यादीत समाविष्‍ट असलेल्‍या नोंदीबाबत आक्षेप असल्‍यास सदर नोंद वगळण्‍यासाठी नमूना-7 मध्‍ये अर्ज सादर करता येतील. त्या मतदार यादीत असलेल्‍या नोंदीबाबत दुरूस्‍ती करावयाची असल्‍यास नमूना-8 मध्‍ये अर्ज सादर करता येतील. हे अर्ज दिनांक 21 जुलै 2023 ते 21 ऑगस्ट 2023 या कालावधीत विहित नमुन्यातील अर्ज प्रत्येक विधानसभा मतदारसंघातील मतदार नोंदणी अधिकारी तथा उपविभागीय अधिकारी, सहायक मतदार नोंदणी अधिकारी तथा तहसिलदार यांच्या कार्यालयात तसेच मतदान केंद्रस्‍तरीय अधिकारी (बीएलओ) यांच्‍याकडे स्विकारण्यात येतील. मतदारांच्या सुलभतेसाठी www.nvsp.in या संकेतस्थावर ऑनलाईन नाव नोंदणीची तसेच यादीतील तपशिलात बदल करण्याची सुविधा उपलब्ध करुन देण्यात आली आहे. अधिक माहितीसाठी www.ceo.maharashtra.gov.in या संकेतस्थळास भेट द्यावी, असे प्रसिद्धी पत्रकात म्हटले आहे.  00000 

 डॉ. शंकरराव चव्हाण शासकीय वैद्यकीय महाविद्यालयात

जागतिक तंबाखू विरोधी दिन साजरा

 

नांदेड, (जिमाका) दि. 1 :- मौखिक आरोग्य अभियान कार्यक्रमांतर्गत जागतिक तंबाखू विरोधी दिन डॉ. शंकरराव चव्हाण शासकीय वैद्यकीय महाविद्यालय विष्णुपूरी नांदेड येथे आज साजरा करण्यात आला. तंबाखू सेवनामुळे होणारे दुष्परिणाम व व्यसनापासून बचाव कसा करता येईल याविषयी अधिष्ठाता डॉ. एस. आर. वाकोडे यांनी यावेळी मार्गदर्शन केले.

 

यावेळी दंतचिकित्स विभाग प्रमुख डॉ. भावना भगत, कान नाक घसा विभागाचे एचओडी डॉ. विनोद कंदकुरे, डॉ. एम. ए. समीर, प्राध्यापक, शरीरविकृतीशास्त्र, सहयोगी प्राध्यापक डॉ. शितल राठोड, औषध वैदयकशास्त्र,  डॉ. आय. एफ. इनामदार, जन औषध वैद्यकशास्त्र डॉ. व्यंकटेश खडके, सहयोगी प्राध्यापक, औषधशास्त्र यांनी जनजागृतीपर व्याख्याने सादर केली.

 

यावर्षी तंबाखू विरोधी दिनाची थीम 'आम्हाला तंबाखूची नव्हे तर अन्नाची गरज आहे” असून तंबाखूमध्ये निकोटीन, टार, आर्सेनिक, नायट्रोसामाइन्स इत्यादी 7 हजार 235 हानिकारक रसायने असतात. भारतातील कर्करोगाच्या घटना 4 फेब्रुवारी 2023 रोजी नोंदविल्यानुसार 2.25 दशलक्ष एवढी आहे. भारतातील सर्व कर्करोगांमध्ये तोंडाच्या कर्करोगाचा समावेश 30 टक्के  आहे. भारतात दरवर्षी तोंडाच्या कर्करोगाची 1.36 लाख नवीन प्रकरणे आढळून येतात आणि त्यांचा मृत्यू दरवर्षाला सुमारे 56 हजार आहे. प्राथमिक तंबाखूच्या सेवनामुळे स्वतःच्या शरीरावर विविध हानिकारक परिणाम होतात. परंतु निष्क्रिय धुम्रपानामुळे इतर व्यक्ती आणि पर्यावरणाला हानी पोहचते. तंबाखूच्या दुष्परिणामांमध्ये उच्च रक्तदाब वाढणे, रक्तवाहिन्या अरुंद होणे, भूक न लागणे, ताणतणावाची पातळी वाढणे, झोप न लागणे यामुळे हृदयविकार, फुफ्फुसाचे आजार, मूत्रपिंडाचे आजार, तोंडाचे कर्करोग आणि फुफ्फुस, यकृत इत्यादींचे कर्करोग यांचा समावेश होतो, अशी माहिती यावेळी देण्यात आली. या कार्यक्रमास सर्व अध्यापक वर्ग, कर्मचारी वर्ग, सुरक्षा रक्षक आदी उपस्थित होते.

000000

 दहावी परीक्षेचा 2 जूनला निकाल होणार जाहीर

 

नांदेड (जिमाका) दि. 1 :-  महाराष्ट्र राज्य माध्यमिक व उच्च माध्यमिक शिक्षण मंडळाच्या लातूर, औरंगाबाद, अमरावती, पुणे, नागपूर, मुंबई, कोल्हापूर, नाशिक व कोकण या नऊ विभागीय मंडळांमार्फत मार्च 2023 मध्ये घेण्यात आलेल्या माध्यमिक शालांत प्रमाणपत्र इयत्ता दहावी परीक्षेचा निकाल शुक्रवार दिनांक 2 जून, 2023 रोजी दुपारी 1 वा. जाहीर केला जाणार आहे. खाली दिलेल्या संकेतस्थळावर मंडळाच्या कार्यपद्धतीनुसार हा निकाल ऑनलाईन जाहीर करण्यात येईल.   

 

मार्च 2023 मध्ये दहावी परीक्षेस प्रविष्ठ झालेल्या सर्व विद्यार्थ्यांचे विषयनिहाय संपादित केलेले गुण पुढील संकेतस्थळावरुन उपलब्ध होतील. www.mahresult.nic.in http://.sscresult.mkcl.org  https://ssc.mahresults.org.in, https://hindi.news18.com/news/career/board-results-maharashtra-board, https://www.indiatoday.in/education-today/maharashtra-board-class-10th-result-2023, http://mh10.abpmajha.com या संकेतस्थळावर सदर माहितीची प्रत / प्रिंट घेता येईल. तसेच

विद्यार्थ्यांच्या निकालाबरोबरच वेगवेगळी सांख्यिकी माहिती www.mahresult.nic.in या संकेतस्थळावर उपलब्ध होईल. तसेच www.mahahsscboard.in या संकेतस्थळावर शाळांना एकत्रित निकाल उपलब्ध होईल.

 

ऑनलाईन निकालानंतर दहावी परीक्षेस प्रविष्ट झालेल्या विद्यार्थ्यास स्वत:च्या अनिवार्य विषयांपैकी (श्रेणी विषयांव्यतिरिक्त) कोणत्याही विशिष्ट विषयात त्यांने संपादित केलेल्या गुण गुणपडताळणी करता येईल. याचबरोबर उत्तरपत्रिकांच्या छायाप्रत, पुनर्मूल्यांकनासाठी संबंधित विभागीय मंडळाकडे ऑनलाईन पद्धतीने मंडळाच्या अधिकृत संकेतस्थळावरुन अर्ज करण्याची सोय उपलब्ध करुन देण्यात आली आहे. हा अर्ज स्वत: किंवा शाळांमार्फत करता येईल. यासाठी आवश्यक अटी, शर्ती व सूचना संकेतस्थळावर देण्यात आलेल्या आहेत.

 

गुणपडताळणी शनिवार 3 जून ते सोमवार 12 जून 2023 पर्यंत ऑनलाईन पद्धतीने अर्ज करता येईल. छायाप्रतीसाठी 3 जून पासून  22 जून 2023 पर्यंत अर्ज ऑनलाईन पद्धतीने करता येईल. याचबरोबर याचे शुल्क ऑनलाईन पद्धतीने डेबिट  कार्ड, क्रिडेट कार्ड, युपीएल, नेटबँकिंग याद्वारे भरता येईल.

 

मार्च 2023 परीक्षेच्या उत्तरपत्रिकेच्या पुनर्मूल्यांकनासाठी ऑनलाईन पद्धतीने मंडळाच्या अधिकृत संकेतस्थळावरुन अर्ज करण्यासाठी प्रथम उत्तरपत्रिकेची छायाप्रत घेणे अनिवार्य आहे. छायाप्रत मिळाल्याच्या दिवसापासून कार्यालयीन कामाच्या पाच दिवसात पुनर्मूल्यांकनाच्या कार्यपद्धतीचा अवलंब करावा लागेल. विहित नमुन्यात विहित शुल्क भरुन संबंधित विभागीय मंडळाकडे विद्यार्थ्यांनी ऑनलाईन पद्धतीने अर्ज करणे आवश्यक राहील. ज्या विद्यार्थ्यांना उत्तरपत्रिकेचे पुनर्मूल्यांकन करावयाचे असे त्यांनी अधिक माहितीसाठी संबंधित विभागीय मंडळाकडे संपर्क साधावा.

 

मार्च 2023 च्या माध्यमिक शालांत प्रमाणपत्र इयत्ता दहावी परीक्षेस सर्व विषयासह प्रविष्ठ होऊन उत्तीर्ण होणाऱ्या विद्यार्थ्यांसाठी लगतच्या दोनच संधी जुलै 2023 व मार्च 2024 श्रेणी / गुणसुधार योजनेंतर्गत उपलब्ध राहतील. जुलै-ऑगस्ट 2023 मध्ये आयोजित करण्यात येणाऱ्या माध्यमिक शालांत प्रमाणपत्र (दहावी) पुरवणी परीक्षेसाठी व श्रेणी सुधार विद्यार्थ्यांसाठी बुधवार 7 जून 2023 पासून आवेदन करता येतील. हे आवेदनपत्र संकेतस्थळावरुन ऑनलाईन पद्धतीने भरून घेण्यात येणार आहेत. मार्च 2023 मध्ये दहावी परीक्षेस प्रविष्ठ झालेल्या विद्यार्थ्यांना गुणपत्रिका त्यांच्या माध्यमिक शाळेमार्फत दि. 14 जून 2023 रोजी दुपारी 3 वा. वितरीत करण्यात येतील, असे राज्य मंडळ सचिव अनुराधा ओक यांनी प्रसिद्धी पत्रकान्वये कळविले आहे.  

00000