वृत्त क्र. 605
महात्मा बसवेश्वर सामाजिक समता-शिवा पुरस्काराचे
अर्ज करण्यास 31 जुलै पर्यंत मुदतवाढ
नांदेड,दि. 18 जुलै : महात्मा बसवेश्वर सामाजिक समता-शिवा पुरस्कारचे परीपूर्ण प्रस्ताव इच्छुक संस्था व व्यक्ती यांनी सहाय्यक संचालक, इतर मागास बहुजन कल्याण नांदेड यांच्याकडे दिनांक 31 जुलै 2024 पर्यंत विहित केलेल्या नमुन्यामध्ये सादर करावेत, असे आवाहन इतर मागास बहुजन कल्याणचे सहाय्यक संचालक शिवानंद मिनगिरे यांनी केले आहे.
महात्मा बसवेश्वर सामाजिक समता-शिवा पुरस्कार व्यक्ती व संस्था यांचे सन 2023-24 या वर्षाकरिता दिनांक 31 मार्च 2024 पर्यत प्रस्ताव मागविण्यात आले होते. परंतु सदरच्या पुरस्काराचे इच्छुक व्यक्ती व संस्था यांच्याकडून कमी प्रस्ताव प्राप्त झाल्यामुळे सदर पुरस्काराच्या प्रस्तावासाठी दिनांक 31 जुलै पर्यत सादर करण्यास मुदतवाढ देण्यात आली आहे.
महात्मा बसवेश्वर सामाजिक समता-शिवा पुरस्कार नियमावली बाबतचा शासन निर्णय दिनांक 8 मार्च 2019 रोजी निर्गमित करण्यात आला आहे. या शासन निर्णयान्वये वीरशैव लिंगायत समाजासाठी सामाजिक, कलात्मक, समाज संघटनात्मक, आध्यात्मिक प्रबोधन व साहित्यिक क्षेत्रात काम करीत असलेल्या व्यक्तीच्या व संस्थांच्या कामाची दाद/दखल घ्यावी व इतरांना त्यापासून प्रेरणा मिळावी, जेणेकरून या समाजातील समाजसेवक, कलावंत, समाज संघटनात्मक कार्यकर्ते, आध्यात्मिक प्रबोधनकार व साहित्यिक सरसावून पुढे यावेत याकरिता व्यक्तीसाठी एक व सामाजिक संस्थांसाठी एक असे एकूण दोन पुरस्कार देण्यात येते.
या पुरस्कारासाठी पात्रतेबाबतची नियमावली दिनांक 8 मार्च 2019 रोजीच्या
शासन निर्णयासोबत जोडण्यात आलेली असून महाराष्ट्र शासनाच्या वेबसाईटवर संबंधित
शासन निर्णय असून त्याचा संकेतांक क्रमांक. २०१९०३०८२०३९००३५२२ असा आहे.
00000
