पूर्व तयारी आढावा बैठक संपन्न

आंतरराष्ट्रीय योग दिनानिमित्त 21 जून रोजी  नांदेडात राज्यस्तरीय योग शिबीर

नांदेड, दि.18:- आंतरराष्ट्रीय योग दिनानिमित्त दि. 21 जून, 2019 रोजी राज्यस्तरीय योग शिबीराचे महाराष्ट्र शासनातर्फे पतंजली योग पिठाच्या संयुक्त विद्यमाने आंतरराष्ट्रीय योग दिनानिमित्त नांदेड येथील शिवरत्न जिवाजी महाले चौक (मामा चौक), असर्जन, नांदेड येथे सकाळी 5-00 ते 7-30 यावेळेत आयोजन करण्यात आले आहे. शिबीरानिमित्त शासकीय विश्रामगृह , नांदेड येथील मिनी सह्याद्री येथे  बैठक खा. प्रताप पाटील चिखलीकर यांच्या अध्यक्षतेखाली संपन्न झाली.  

या बैठकीस जिल्हाधिकारी अरुण डोंगरे, अप्पर जिल्हाधिकारी खुशालसिंह परदेशी, हरिद्वार येथील पतंजली योगपिठाचे मुख्य केंद्रीय प्रभारी डॉ. जयदीप आर्या,  माजी आमदार ओमप्रकाश पोकर्णा, जिल्हा परिषद सदस्य बबन बारसे,  निवासी उपजिल्हाधिकारी अनुराधा ढालकारी, उपविभागीय अधिकारी महेश वडदकर, तहसीलदार किरण अंबेकर, लेखाधिकारी निळकंठ पाचंगे, शिक्षणाधिकारी प्रशांत दिग्रसकर, मिलींद देशमुख, श्रीराम लाखे, मनपाचे शिक्षणाधिकारी दिलीप बनसोडे, आदिंची यावेळी उपस्थिती होती. 

  आंतरराष्ट्रीय योग दिनानिमित्त योग शिबीरात योग साधक, सामान्य नागरिक, शाळा, महाविद्यालयाचे विद्यार्थी यांना निमंत्रित करण्यात आले आहे. तसेच जिल्ह्यातील अधिकारी , कर्मचारी यांना या योगशिबीराचे प्रशिक्षण देण्यात आलेले आहे.

खा. प्रताप पाटील चिखलीकर यांनी योग शिबीराच्या अनुषंगाने नियंत्रण कक्ष, प्रशिक्षण समिती, मिडिया कक्ष, वाहतूक व्यवस्था, कायदा व सुव्यवस्था, स्टेज व्यवस्था, वाहनाची पार्किंग व्यवस्था, जनजागृती व जनजागरण समितीची माहिती, स्वच्छता निरीक्षणाबाबतची माहिती,मैदान व्यवस्था, वैद्यकीय सेवा, बैठक व्यवस्था आदि विविध विषयांचा आढावा घेवून उपयुक्त सुचना केल्या.

0000

कृषि विभागाचा लोगो सुधारीत करण्यासाठी आवाहन

नांदेड दि. 18 :- कृषि विभागाचा लोगो प्रचलित असून कार्यालयीन कामकाजासाठी वापरण्यात येतो. सध्या कृषिक्षेत्रात आधुनिक तंत्रज्ञान, माहिती तंत्रज्ञानाचा वापर करुन शेतकऱ्यांच्या हितासाठी विविध योजना राबविण्यात येतात. त्याअनुषंगाने प्रचलित लोगोमध्ये बदल करुन नव्याने लोगो करण्याचे प्रस्तावित आहे.

या लोगोमध्ये सुधारणा करुन डीटीपी, डिझाईनची सॉफ्ट व हार्ड (रंगीत) कॉपी कृषि माहिती विभाग, कृषि भवन 2 रा मजला, शिवाजीनगर पुणे-5 येथे समक्ष व ddinfor@gmail.com, या ईमेलद्वारे मंगळवार 25 जून 2019 पर्यंत पाठविण्यात यावा.

उत्कृष्ट लोगो तयार करणाऱ्या व्यक्ती, संस्था, फर्म्स यांना 25 हजार रुपयाचे पारितोषिक देऊन विजेता म्हणून घोषित करण्यात येईल. तसेच सदर लोगो वापरण्याचे स्वामित्व हक्क कृषि विभागाकडे राहील याची नोंद घ्यावी. अधिक संपर्कासाठी रामकृष्ण जगताप, कृषि उपसंचालक (माहिती) कृषि आयुक्तालय महाराष्ट्र राज्य पुणे-5 कार्यालय नं. 020-25537865 मो.नंबर 9823356835 वर संपर्क साधावा, असे आवाहन संचालक (विस्तार व प्रशिक्षण) कृषि आयुक्तालय पुणे यांनी केले आहे.

00000

अण्णाभाऊ साठे शिष्यवृत्ती योजनेसाठी 10 जुलै पर्यंत अर्ज करण्याचे आवाहन

नांदेड दि. 18 :- अण्णाभाऊ साठे शिष्यवृत्ती योजनेसाठी पात्र विद्यार्थ्यांनी विहित नमुन्यातील अर्ज आवश्यक कागदपत्र, गुणपत्रक व पुढील वर्गात प्रवेश घेतल्याच्या पुराव्यासह बुधवार 10 जुलै 2019 पर्यंत सादर करावीत, असे आवाहन महामंडळाचे जिल्हा व्यवस्थापक यांनी केले आहे.

साहित्यरत्न लोकशाहीर अण्णा भाऊ साठे महामंडळामार्फत इयत्ता दहावी, बारावी, पदवी, पदवीव्युत्तर, वैद्यकीय व अभियांत्रिकी आदी आभ्यासक्रमामध्ये उत्तीर्ण झालेल्या विद्यार्थ्यांना या शिष्यवृत्तीचे वितरण केले जाते. सन 2018-19 या शैक्षणिक वर्षात विशेष प्राविण्याने गुणवत्ता 60 टक्केच्यावर गुणाने उत्तीर्ण झालेल्या मातंग समाज व तत्सम 12 पोट जातीतील विद्यार्थी, विद्यार्थींनींना महामंडळाकडून ज्येष्ठता व गुणक्रमानुसार उपलब्ध निधीच्या अधीन राहून अण्णाभाऊ साठे शिष्यवृत्ती मंजूर करण्यात येते.

पात्र विद्यार्थी-विद्यार्थींनीना विहित नमुन्यातील अर्ज बुधवार 10 जुलै 2019 पर्यंत भरणा करुन आवश्यक ते कागदपत्र, गुणपत्रक टीसी, झेरॉक्स, जातीचा दाखला, आधार कार्ड, राशन कार्ड उत्पन्नाचे प्रमाणपत्र, एक फोटो व पुढील वर्गात प्रवेश घेतल्याबाबत पुराव्यासह हस्तलिखीत अर्ज स्विकारण्यात येत आहेत. अर्ज जिल्हा व्यवस्थापक साहित्यरत्न लोकशाहीर अण्णाभाऊ साठे विकास महामंडळ डॉ. बाबासाहेब आंबेडकर, सामाजिक न्याय भवन, हिंगोली रोड, नांदेड याठिकाणी देण्यात यावीत. बुधवार 10 जुलै नंतर अर्ज स्विकारल्या जाणार नाहीत, असेही आवाहन महामंडळाने केले आहे.

000000

माजी सैनिकांच्या प्रलंबीत प्रकरणांचा निपटारा करण्यासाठी बैठकीचे आयोजन

नांदेड दि. 18 :- माजी सैनिक / विधवा यांच्या अडचणी, पेन्शन तक्रारी,  इतर कार्यालयातील प्रलंबीत प्रकरणाबाबत माहिती घेऊन स्टेशन हेडक्वार्टर औरंगाबाद यांचेकडून मेजर जे. बी. सिंग यांच्या उपस्थितीत निपटरा करण्यात येणार आहे. याबाबत माजी सैनिकांचा मेळावा / बैठकीचे आयोजन गुरुवार 20 जून 2019 रोजी नांदेड जिल्हा सैनिक कल्याण कार्यालयात सकाळी 11 वा. करण्यात आले आहे.

हेडक्वार्टर औरंगाबाद यांच्या कार्यालयाकडून नियुक्त मेजर जे. बी. सिंग हे गुरुवार 20 जून 2019 रोजी नांदेड जिल्हा सैनिक कल्याण कार्यालय येथे भेट देत आहेत. जिल्ह्यातील सर्व माजी सैनिकांनी / विधवांनी त्यांची प्रलंबित असलेल्या प्रकरणांची एक प्रत सोबत घेऊन जिल्हा सैनिक कल्याण कार्यालयात गुरुवार 20 जून रोजी सकाळी 11 वा. उपस्थित राहून मेजर जे. बी. सिंग यांच्यासोबत चर्चा करावी. या बैठकीत शैक्षणिक सवलत / विद्यावेतन, पाल्यांचे प्रवेश प्रमाणपत्र व केंद्रीय सैनिक बोर्ड यांच्याकडील एज्युकेशन ग्राण्ट व इतर सुविधाबाबत माहिती देण्यात येणार आहे. तसेच जिल्ह्यातील विरनारी यांच्या जमीन वितरणाचा आढावा या बैठकीत घेण्यात येणार आहे. सर्व विरनारी / विरपिता / विरमाता व माजी सैनिकांनी उपस्थित रहावे, असे आवाहन नांदेड जिल्हा सैनिक कल्याण कार्यालयाकडून करण्यात आले आहे.

0000