वृत्त 644

प्रधानमंत्री पीक विमा योजनेत सहभागी होण्यासाठी अंतिम दोन दिवस

नांदेड, दि. २९ जुलै : "प्रधानमंत्री पीक विमा योजना" खरीप हंगाम-२०२४ मध्ये शेतकऱ्यांना ऑनलाइन विमा अर्ज भरण्यास शेवटचे दोन दिवस उरले असून या योजनेत ज्यांनी विमा काढला नसेल त्या शेतकऱ्यांनी सहभाग नोंदविण्याचे आवाहन, जिल्हाधिकारी अभिजीत राऊत यांनी केले आहे.

या योजनेत सहभागी होण्याकरिता केवळ १ रुपया भरुन PMFBY पोर्टल http://pmfby.gov.in वर स्वत: शेतकऱ्यांना तसेच बँक विमा कंपनीचे नियुक्त केलेले एजंट, क्रॉप इन्शुरन्स ॲप व सामुहिक सेवा केंद्रांमार्फंत  योजनेत सहभाग नोंदविता येणार आहे.

या योजनेंतर्गत खरीप हंगाम २०२४ करिता ऑनलाइन स्वरूपात विमा अर्ज भरण्याची सुविधा १६ जून २०२४ पासून सुरू झाली असून सहभागाची अंतिम मुदत १५ जुलै २०२४ अशी निश्चित करण्यात आली होती. योजनेत सहभागासाठी पुरेसा कालावधी उपलब्ध करून देण्याच्या उद्देशाने खरीप हंगाम ऑनलाईन विमा भरण्यास ३१ जुलै २०२४ पर्यंत मुदतवाढ देण्यात आली. जिल्ह्यातील जनतेने पुढील दोन दिवसात विमा भरण्यासाठी पुढाकार घ्यावा असे आवाहनही त्यांनी केले आहे.

00000

 वृत्त 643

अनु.जाती प्रवर्गातील विद्यार्थ्यांकरीता मॅट्रिकपूर्व शिष्यवृत्ती

शाळा व विद्यार्थ्यांची ऑनलाईन नोंदणी करण्याचे आवाहन

नांदेड दि. 29 जुलै :-  केंद्र शासनाने दिलेल्या निर्देशानुसार सन 2024-25 या शैक्षणिक वर्षापासून अनु. जाती प्रवर्गातील विद्यार्थ्यांसाठी मॅट्रीकपूर्व शिष्यवृत्ती योजना ऑनलाईन पध्दतीने महाडीबीटी प्रणालीद्वारे सामाजिक न्याय व विशेष सहाय्य विभागामार्फत राबविण्यात येत आहे. या योजनेमध्ये सैनिकी शाळेत शिकणाऱ्या अनुसूचित जातीच्या विद्यार्थ्यांना निर्वाह भत्ता, 9 वी 10 वी मध्ये शिकणाऱ्या अनुसूचित जातीच्या विद्यार्थ्यांना मॅट्रिकपूर्व शिष्यवृत्ती, साफसफाई व आरोग्यास धोकादायक क्षेत्रात काम करणाऱ्या पालकांच्या पाल्यांना मॅट्रिकपूर्व शिष्यवृत्ती, इ. 5 वी ते 7 वी आणि इ. 8 वी ते 10 वी मधील अनुसूचित जातीच्या विद्यार्थिनींना सावित्रीबाई फुले शिष्यवृत्ती माध्यमिक शाळेत शिकणाऱ्या अनुसूचित जातीच्या विद्यार्थ्यांना गुणवत्ता शिष्यवृत्ती,महर्षि विठ्ठल रामजी शिंदे शिक्षण शुल्क, परिक्षा शुल्क योजना इ. योजना राबविण्यात येत आहेत.

सदरील योजनांमध्ये लातूर विभागातील, लातूर जिल्ह्यातील एकूण शाळा २८२० त्यापैकी लॉगीन केलेल्या शाळांची संख्या २४७८ तर  शिल्लक शाळांची ३४२, धाराशिव जिल्ह्यातील १८६४ पैकी २36 तर शिल्लक शाळांची संख्या 1628, नांदेड जिल्ह्यातील ३८२७ पैकी 3379 तर शिल्लक शाळांची संख्या 448 व हिंगोली जिल्ह्यातील १३९४ शाळांपैकी 945तर शिल्लक शाळांची संख्या 449 आहे. लातूर विभागात एकूण 9905 शाळा आहेत. त्यापैकी 7038 शाळांची मॅट्रिकपूर्व शिष्यवृत्तीचे  शाळेच्या विद्यार्थ्यांचे ऑनलाईन लॉगीन झालेले आहे. उर्वरित 2867 त शाळेंच्या मुख्याध्यापकांनी तात्काळ आपल्या शाळेचे लॉगीन करून ऑनलाईन पध्दतीने अर्ज करावेत व पात्र विद्यार्थी योजनेपासून वंचीत राहणार नाही, याची काळजी घ्यावी. तसेच जास्तीत जास्त विद्यार्थ्यांनी या योजनेचा लाभ घ्यावा  तसेच या योजनेसंदर्भात काही अडचन असल्यास संबंधित जिल्ह्याचे जिल्हा समाज कल्याण, अधिकारी यांचे कार्यायाशी संपर्क साधावा असे अवाहन  लातूर विभागाचे प्रादेशिक उपायुक्त अविनाश देवसटवार यांनी केले आहे.

0000

 विशेष वृत्त 642 

नांदेड जिल्ह्यात मुख्यमंत्री युवा कार्यक्रम प्रशिक्षण योजनेतून युवकांची नियुक्ती सुरू

 

जिल्हाधिकारी कार्यालयात सोमवारी शुभारंभ

 

माजी मुख्यमंत्री खा.अशोक चव्हाण यांच्याहस्ते नियुक्तीपत्र प्रदान

 

नांदेड दि. 29 जुलै : राज्य शासनाच्या महत्त्वाकांशी मुख्यमंत्री युवा कार्यक्रम प्रशिक्षण योजनेचा शुभारंभ आज नांदेड जिल्ह्यामध्ये झाला. राज्याचे माजी मुख्यमंत्री तथा खासदार अशोक चव्हाण यांच्या हस्ते दोन तरुणांना  नियुक्तीपत्र देऊन या प्रशिक्षण योजनेची प्रतिनिधिक स्वरूपात सुरुवात जिल्ह्यात आज करण्यात आली.

 

कौशल्य, रोजगार, उदयोजकता व नाविन्यता विभाग आणि मुख्यमंत्री जनकल्याण कक्ष यांच्या संयुक्त विद्यमाने मुख्यमंत्री युवा कार्य प्रशिक्षण योजना राबविली जात आहे. पात्र उमेदवारांना प्रत्यक्ष कामाच्या अनुभवातून  कौशल्य व आत्मविश्वास विकसित व्हावा यादृष्टीने ही ६ महिन्यांच्या नियुक्तीची योजना आहे. याचबरोबर उद्योजकांना लागणारे कुशल मनुष्यबळ या योजनेद्वारे  घडविता येणार आहे.

 

आज दुपारी नांदेड जिल्हाधिकारी कार्यालयामध्ये मुख्यमंत्री युवा कार्यप्रशिक्षण योजनेचे पहिले कार्यादेश प्रदान करण्यात आले.सुप्रसाद सूर्यकांतराव दामेकर, देगलूर, अंजली राजेंद्र आवतिरक, पाथरड रेल्वे, ता. मुदखेड, विश्वजीत रंजू खानसोळे, ओमकेश्वर संतोष कुमार उपलवाड असे कार्यादेश दिलेल्या या चार उमेदवारांचे नाव आहे. यापैकी सुप्रसादला तहसील कार्यालय देगलूर तर अन्य तीन उमेदवारांना जिल्हाधिकारी कार्यालय नांदेड या ठिकाणी कामकाज सोपविण्यात आले आहे.

 

या प्रतिनिधीक व छोटेखाली कार्यक्रमाला माजी मुख्यमंत्री तथा खासदार अशोक चव्हाण माजी आमदार अमर राजूरकर, जिल्हाधिकारी अभिजीत राऊत, कौशल्य, रोजगार, उदयोजकता व नाविन्यता विभागाच्या सहाय्यक आयुक्त रेणुका तम्मलवार यांची उपस्थिती होती

 

ही कार्य प्रशिक्षण योजना 6 महिन्यासाठी असून रितसर नोंदणी करुन रुजू झालेल्या बारावी पास उमेदवारांना  6 हजार रुपये, आयटीआय/पदविका उमेदवारांना 8 हजार रुपये तर पदविधर व पदव्युत्तर उमेदवारांना 10  हजार रुपये प्रतिमाह विद्यावेतन देण्यात येईल. बारावी, आय. टी. आय. पदविका, पदवीधर व पदव्युत्तर झालेल्या उमेदवारांनी www.mahaswayam.gov.in या पोर्टलवर जावून आपल्या लॉगिन आयडी पासवर्ड च्या माध्यमातून पोर्टलवर CMYKPY अंतर्गत नोंदविलेल्या विविध रिक्तपदांना ऑनलाईन अर्ज करावेत, असे आवाहन यावेळी जिल्हाधिकारी अभिजीत राऊत यांनी केले आहे.

0000

 विशेष वृत्त 641

मुख्यमंत्री तीर्थक्षेत्र योजनेतून जेष्ठांना देशासह राज्यातील तीर्थक्षेत्रांना भेट देण्याची संधी

 

भारतातील 73 व राज्यातील 66 तीर्थक्षेत्रांपैकी करा एकाची निवड

 

नांदेड दि. 29 जुलै :- राज्यातील सर्व धर्मियांमधील जेष्ठ नागरिकांना भारतातील 73 व राज्यातील 66 तीर्थक्षेत्रांना  भेट देण्याची इच्छा आता शासनाच्या मुख्यमंत्री तीर्थ दर्शन योजनेमुळे पूर्ण करता येणार आहे. जे नागरिक 60 वर्षे किंवा त्याहून अधिक वयाचे आहेत , त्यांच्यासाठी भारतातील आणि राज्यातील तीर्थक्षेत्रांना मोफत भेटीची  व दर्शनाची संधी उपलब्ध करुन दिली आहे.

 

या योजनेतर्गत निर्धारित तीर्थ स्थळांपैकी एका स्थळांच्या यात्रेसाठी पात्र व्यक्तीला या योजनेचा एकवेळ लाभ घेता येइल. प्रवास खर्चाची कमाल मर्यादा प्रती व्यक्ती 30 हजार रुपये इतकी राहील. यामध्ये प्रत्यक्ष प्रवास, भोजन , निवास इ. सर्व बाबींचा समावेश आहे. या योजनेत सहभाग घेण्यासाठी लाभार्थी हा महाराष्ट्र राज्याचा रहीवासी असणे आवश्यक आहे. वय वर्षे 60 व त्यावरील जेष्ठ नागरिकांना लाभ घेता येईल. लाभार्थी कुटुंबाचे वार्षिक उत्पन्न 2 लाख 50 हजार रुपयापेक्षा जास्त नसावे अशा व्यक्ती या योजनेचा लाभ घेण्यासाठी पात्र असणार आहेत.

 

नांदेड येथील सामाजिक न्याय भवन येथे या योजनेसाठी प्रत्यक्ष अर्ज करता येईल किंवा ऑनलाईन अर्ज सेतू केंद्रातून करता येईल. जिल्ह्यातील जेष्ठ नागरिकांनी अधिकाधिक लाभ घ्यावा असे आवाहन करण्यात आले आहे.

 

यात भारतातील तीर्थक्षेत्रे याप्रमाणे आहेत. वैष्णोदेवी मंदिर कटरा, अमरनाथ गुहा मंदिर, सुवर्ण मंदिर अमृतसर, अक्षरधाम मंदिर, श्री दिगबंर जैन लाल मंदिर, श्री लक्ष्मीनारायण मंदिर, बद्रीनाथ मंदिर, गंगोत्री मंदिर उत्तर काशी, केदारनाथ मंदिर रुद्रप्रयाग, नीलकंठ महादेव मंदिर ऋषीकेश, यमुनोत्री मंदिर उत्तरकाशी, वैद्यनाथ धाम देवघर, काशी विश्वनाथ मंदिर वाराणसी, इस्कॉन मंदिर वृंदावन, श्रीराम मंदिर अयोध्या, सूर्य मंदिर कोणार्क, जगन्नाथ मंदिर पुरी, लिंगराज मंदिर भुवनेश्वर, मुक्तेश्वर मंदिर भुवनेश्वर, कामाख्यादेवी मंदिर गुवाहाटी, महाबोधी मंदिर गया, रणकपूर मंदिर पाली, अजमेर दर्गा, सोमनाथ मंदीर वेरावळ, द्वारकाधीश मंदिर द्वारका, नागेश्वर मंदीर द्वारका, सांची स्तूप, खजुराहो मंदिर, महाकालेश्वर मंदीर उज्जैन, ओंकारेश्वर मंदिर आणि ममलेश्वर मंदिर खंडवा आणि ब्रम्हपुरी, श्री रंगनाथ स्वामी मंदिर श्रीरंगम, गोमटेश्वर मंदिर श्रवणबेळगोळ, विरुपाक्षी मंदिर हम्पी, चेन्नकेशव मंदिर बेलूर, अन्नपूर्णेश्वरी मंदिर होरानाडू, महाबळेश्वर मंदिर गोकर्ण, भूतनाथ मंदिर बदामी, मुरुडेश्वर मंदिर मुरुडेश्वर, आयहोल दुर्गा मंदिर, श्रीकृष्ण मंदिर उड्डपी, वीर नारायण मंदिर बेलावडी, तिरुपती बालाजी मंदिर तिरुमला, मल्लिकार्जून मंदिर श्रीशैलम, बृहदीश्वर मंदिर तंजावर, मीनाक्षी मंदिर मदुराई, रामनाथस्वामी मंदिर रामेश्वरम, कांचीपुरम मंदिर, रंगनाथस्वामी मंदिर त्रिची, अरुणाचलेश्वर मंदिर तिरुवन्नमलाई, कैलासनाथ मंदिर कांचीपुरम, एकंबरेश्वर मंदिर कांचीपुरम, सांरगपाणी मंदिर कुभंकोणम, किनारा मंदिर महाबलीपुरम, मुरुगन मंदिर तिरुचेंदुर, श्री पद्यनाभस्वामी मंदिर तिरुवनंतपुरम, गुरुवायुर मंदिर, वडक्कुन्नाथनमंदिर त्रिशुर, पार्थसारथी मंदिर अरनमुला, शबरीमाला मंदिर पथनामथिट्टा, अट्टकल भगवती मंदिर तिरुवनंतपुरम, श्रीकृष्ण मंदिर गुरुवायुर, थिरुनेल्ली मंदिर वायनाड, वैकोम महादेव मंदिर वर्कला, तिरुवल्ला मंदिर, शिवगिरी मंदिर वर्कला, श्री सम्मेद शिखरजी गिरीडीह, शत्रुंजय हिल, गिरनार, देवगड, पावापुरी, रणकपूर, दिलवाडा टेम्पल, उदयगिरी या तिर्थक्षेत्राचा समावेश आहे.

 

राज्यातील तीर्थक्षेत्रे- मुंबई येथील सिध्दीविनायक मंदिर, महालक्ष्मी मंदिर, चैत्यभूमी दादर, माउंट मेरी चर्च वांदे, मुंबादेवी मंदिर, वाळकेश्वर मंदिर मलबार हिल, विश्व विपश्यना पॅगोडा गोराई, चर्च ऑफ अवर लेडी ऑफ हेल्थ कॅवेल, सेंट ॲड्रयू चर्च, सेंट जॉन द बॅप्टिस्ट चर्च, सीप्झ औद्यागिक क्षेत्र अंधेरी, सेंट जॉन द बॅप्टिस्ट चर्च मरोळ, गोदीजी पार्श्वत मंदिर, नेसेट एलियाहू सिनेगॉग फोर्ट, शार हरहमीम सिनेगॉग मस्जिद भंडार, मॅगेने डेव्हिड सिनेगॉग भायखळा, ठाणे जिल्ह्यातील सेंट जॉन द बॅप्टिस्ट चर्च अग्यारी, अग्निमंदिर तर पुणे जिल्ह्यातील मयुरेश्वर मंदिर मोरगाव, चिंतामणी मंदिर थेऊर, गिरीजात्मज मंदिर लेण्याद्री, महागणपती मंदिर रांजणगाव, खंडोबा मंदिर जेजुरी, संत ज्ञानेश्वर समाधी मंदिर आळंदी, भिमाशंकर ज्योतिलिंग मंदिर खेड तालुका, संत तुकाराम महाराज समाधी मंदिर देहु सोलापूर जिल्ह्यातील संत चोखामेळा समाधी पंढरपूर, संत सावता माळी समाधी मंदिर अरण, ता. माढा, विठोबा मंदिर पंढरपूर सातारा जिल्ह्यातील शिखर शिंगणापूर कोल्हापूर जिल्ह्यातील महालक्ष्मी मंदिर, ज्योतिबा मंदिर, जैन मंदिर कुंभोज नांदेड जिल्ह्यातील रेणूका देवी मंदिर माहूर, गुरु गोविंदसिंग समाधी, हुजुर साहिब, खंडोबा मंदिर माळेगाव, श्री संत नामदेव महाराज देवस्थान उमरज तालुका कंधार धाराशिव जिल्ह्यातील तुळजा भवानी मंदिर छत्रपती संभाजीनगर जिल्ह्यातील संत एकनाथ समाधी पैठण, घृष्णेश्वर ज्योतिलिंग मंदिर वेरुळ, जैन स्मारके एलोरा लेणी नाशिक जिल्ह्यातील विघ्नेश्वर मंदिर ओझर, संत निवृत्तीनाथ समाधी त्रिंबकेश्वर जवळ, त्रिंबकेश्वर शिव मंदिर, मुक्तीधाम , सप्तश्रृंगी मंदिर वणी, काळाराम मंदिर, जैन मंदिरे, मांगी-तुंगी, गजपंथ अहमदनगर जिल्ह्यातील संत साईबाबा मंदिर शिर्डी, सिद्धिविनायक मंदिर सिद्धटेक, शनि मंदिर शनि शिंगणापूर, श्रीक्षेत्र भगवानगड पाथर्डी रायगड जिल्ह्यातील बल्लाळेश्वर पाली बुलढाणा जिल्ह्यातील संत गजानन महाराज शेगाव, पुणे जिल्ह्यातील एकविरा देवी कार्ला सांगली जिल्ह्यातील श्री दत्त मंदिर औदुबंर बीड जिल्ह्यातील केदारेश्वर मंदिर, वैजनाथ मंदिर परळी, रत्नागिरी जिल्ह्यातील पावस, गणपतीपुळे, मार्लेश्वर मंदिर चंद्रपूर जिल्ह्यातील महाकाली देवी सातारा जिल्ह्यातील श्री काळेश्वरी मंदीर ऊर्फ काळूबाई मंदिर नागपूर जिल्ह्यातील अष्टदशभुज (रामटेक), दिक्षाभूमी यवतमाळ जिल्ह्यातील चिंतामणी कळंब इत्यादी तीर्थक्षेत्राचा समावेश आहे.

0000

 

#मुख्यमंत्रीयुवाकार्यप्रशिक्षणयोजना #नांदेड पहिले कार्यादेश प्रातिनिधीक स्वरूपात प्राप्त करणाऱ्या देगलूरच्या सुप्रसाद दामेकर व पाथरड रेल्वेच्या अंजली आवतिरकने प्रशासनाचे आभार मानले. माजी मुख्यमंत्री तथा खासदार अशोक चव्हाण व जिल्हाधिकारी अभिजीत राऊत यांच्याकडून कौतुक.

#नांदेड #मुख्यमंत्रीयुवाकार्यप्रशिक्षणयोजना अंतर्गत आज माजी मुख्यमंत्री तथा खासदार अशोक चव्हाण, जिल्हाधिकारी अभिजीत राऊत व अन्य मान्यवरांच्या उपस्थितीत योजनेचा प्रातिनिधीक शुभारंभ. दोन तरुणांना नियुक्ती पत्र बहाल.