डॉ. शंकरराव चव्हाण शासकीय वैद्यकीय महाविद्यालयाची प्रलंबित कामे वेगाने पूर्ण करा  - अशोक चव्हाण*

मुंबई, 14 :  नांदेडमधील डॉ. शंकरराव चव्हाण शासकीय वैद्यकीय महाविद्यालय व रुग्णालयाची प्रलंबित कामे वेगाने पूर्ण करण्याचे निर्देश सार्वजनिक बांधकाम मंत्री तथा नांदेडचे पालकमंत्री अशोक चव्हाण यांनी आज येथे दिले. 

डॉ. शंकरराव चव्हाण शासकीय वैद्यकीय महाविद्यालय व रुग्णालयाच्या प्रलंबित कामासंदर्भात मंत्रालयात आयोजित बैठकीत श्री. चव्हाण बोलत होते. यावेळी वैद्यकीय शिक्षण मंत्री अमित देशमुख, वैद्यकीय शिक्षण विभागाचे सचिव डॉ. संजय मुखर्जी उपस्थित होते. 

श्री. चव्हाण म्हणाले की, माजी मुख्यमंत्री शंकरराव चव्हाण यांचे यंदा जन्मशताब्दी वर्ष आहे. यामुळे हे महाविद्यालय पूर्ण क्षमतेने सुरू करण्यासाठी व्हेंटिलेटर, रुग्णवाहिका यांची खरेदी, स्वच्छतेसाठी मनुष्यबळाची नियुक्ती, मलशुद्धीकरण केंद्र उभारणे, मुलांच्या वसतिगृहाचे बांधकाम आदी कामांच्या निधीसाठी जिल्हा नियोजन तसेच वैद्यकीय शिक्षण विभागाकडे प्रस्ताव पाठवावेत. ही कामे पूर्ण करण्यासाठी कालबद्ध कार्यक्रम आखण्यात यावा. 

००००

राष्ट्रीय तंबाखू नियंत्रण कार्यक्रमांतर्गत

जिल्हा समन्वय समितीची बैठक संपन्न

नांदेड, दि. 14 :- राष्ट्रीय तंबाखू नियंत्रण कार्यक्रमांतर्गत जिल्हा समन्वय समितीची तिसरी त्रैमासिक बैठक  अति. जिल्हाधिकारी यांच्या अध्यक्षतेखाली जिल्हाधिकारी कार्यालयात  13 जानेवारी रोजी पार पडली.

बैठकी दरम्यान तंबाखू सेवनाची सद्यस्थिती, कोटपा कायदा 2003 व डिसेंबर अखेर नांदेड जिल्ह्याचे कामकाजाची माहिती जिल्हा सल्लागार डॉ. साईप्रसाद शिंदे यांनी दिली. 

यावेळी जिल्हा शल्य चिकित्सक डॉ. निळकंठ भोसीकर, अति. जिल्हा शल्य चिकित्सक डॉ. संतोष शिरसीकर, अति.जिल्हा आरोग्य अधिकारी डॉ. विद्या झिने, अन्न व औषध प्रशासन विभागाचे सहाय्यक आयुक्त श्री बोराळकर, शिक्षण विभागाचे शिक्षणाधिकारी प्रशांत दिग्रसकर, बी. आर. कुंडगीर, डी. आर. बनसोडे, बंडू अमदुरकर तथा सहाय्यक आयुक्त कामगार यांचे प्रतिनिधी श्रीकांत भंडाखार आदि उपस्थित होते. सामाजिक कार्यकर्ता बालाजी गायकवाड यांचे सहकार्य मिळाले.

00000

विशेष सहाय योजनेच्या लाभार्थ्यांना

बचत खात्याबाबत आवाहन

नांदेड, दि. 14 :- मुदखेड तालुक्‍यातील विशेष सहाय योजनेच्‍या लाभार्थ्‍यांचे चालु बॅंक खाते, पोष्‍ट कार्यालयाचे बचत खाते संबंधीत गाव तलाठी यांच्‍याकडे सोमवार 20 जानेवारी 2019 पर्यंत जमा करावीत. ज्‍या लाभार्थ्‍यांकडे  खाते नाहीत अशा लाभार्थ्‍यांनी तात्‍काळ त्‍यांच्‍या जवळच्‍या बॅकेत बॅंक खाते उघडण्‍याचे, आवाहन  मुदखेड तहसिलदार यांनी केले आहे.

जिल्‍हयातील संगायो, श्राबायो व इंगायो योजनेच्‍या लाभार्थ्‍यांना आयसीआयसीआय बॅंकेमार्फत बायोमॅट्रीक पध्‍दतीने अनुदानवाटप करण्‍यास अनेक अडचणी येत आहेत. जिल्‍हयातील विशेष सहाय योजनेच्‍या लाभार्थ्यांना अनुदान वाटपाबाबत शासन निर्णय 20 ऑगस्ट 2019 मधील तरतुदीनुसार लाभार्थ्‍यांना अनुज्ञेय अनुदानाचे वितरण बॅंक खाते, पोष्‍ट बचत खाते (पोष्‍ट ऑफिसचे सेव्हिंग खाते) यामार्फत वितरीत करण्‍याबाबत निर्देशित करण्‍यात आले आहेत.        

000000

तालुकास्तरीय स्पर्धा परीक्षा मार्गदर्शन

शिबीराचा विद्यार्थ्यांनी लाभ घ्यावा

- जिल्हाधिकारी अरुण डोंगरे

नांदेड, दि. 14 :-  जिल्हयातील तालुकास्तरीय स्पर्धा परीक्षा मार्गदर्शन शिबीराचा विद्यार्थ्यांनी लाभ घ्यावा, असे प्रतिपादन जिल्हाधिकारी अरुण डोंगरे यांनी केले.

जिल्हा प्रशासनाच्यावतीने "उज्वल नांदेड” नाविन्यपूर्ण योजना सन 2019-20 अंतर्गत तालुकास्तरावर संत गाडगेबाबा सार्वजनिक वाचनालय गोकुंदा किनवट येथे स्पर्धा परिक्षा मार्गदर्शन शिबिर नुकतेच आयोजित करण्यात आले होते. या कार्यक्रमाचे अध्यक्षस्थानावरुन जिल्हाधिकारी श्री. डोंगरे बोलत होते.

यावेळी आमदार भिमरावजी केराम, किनवटचे अतिरीक्त जिल्हाधिकारी तथा प्रकल्प अधिकारी अभिनव गोयल, जिल्हा ग्रंथालय अधिकारी अशिष ढोक, प्रमुख वक्ते बाल विकास प्रकल्प अधिकारी कैलास तिडके उपस्थित होते.

जिल्हाधिकारी अरुण डोंगरे यांनी मागील अकरा वर्षापासून सातत्याने 'उज्ज्वल नांदेड' अतर्गंत चालणाऱ्या या मार्गदर्शन शिबिरामुळे अनेक विद्यार्थी स्पर्धा परीक्षेमध्ये यशस्वी झाले आहेत. यापुढे पण त्यांच्या स्पर्धा परीक्षेतील यशासाठी विविध उपक्रम राबण्यासाठी जिल्हा प्रशासन प्रयत्नशिल राहील, असे श्री. डोंगरे यांनी सांगितले.

नांदेड जिल्हा प्रशासन अंतर्गत "उज्वल  नांदेड” ही नाविन्यपूर्ण योजना सन 2019-20 मार्फत राबविण्यात येणाऱ्या उपक्रमांची माहिती देऊन सर्व विद्यार्थ्यांनी तालुकास्तरावर होणाऱ्या शिबीरांचा देखील लाभ घेण्याबाबत आवाहन जिल्हाधिकारी अरुण डोंगरे यांनी केले. 

आमदार भिमरावजी केराम व अतिरीक्त जिल्हाधिकारी तथा प्रकल्प अधिकारी अभिनव गोयल यांनी देखील त्यांच्या अनुभवातुन विद्यार्थ्याना अभ्यास कसा करावा याबाबत सखोल असे मार्गदर्शन केले व विद्यार्थ्यांना पुढील वाटचालीसाठी शुभेच्छा दिल्या.

प्रमुख वक्ते कैलास तिडके  यांनी स्पर्धात्मक परीक्षेसाठी तयारी बाबत तसेच विद्यार्थ्यांना प्रेरणादायक व  सविस्तर मार्गदर्शन केले. विद्यार्थ्यांनी विचारलेल्या विविध प्रश्नांची उत्तरे देऊन विद्यार्थ्यांचे समाधान केले.  यावेळी कार्यक्रमाचे सूत्रसंचालन ग्रंथालयाचे अध्यक्ष उध्दव रामतिर्थकार यांनी केले. तर जिल्हा ग्रंथालय अधिकारी आशिष ढोक यांनी आभार मानले.

कार्यक्रमास मोठया प्रमाणात विद्यार्थ्यांची उपस्थिती होती. कार्यक्रम यशस्वीतेसाठी उध्दव रामतिर्थकार, पाटील अकॅडमीचे श्री पाटील व मॅडम, विद्यापीठ स्पर्धा परीक्षा केंद्राचे प्रतिनिधी श्री येलने, रवी जाधव, शिवाजी गायकवाड तसेच महाराष्ट्र ग्राम सामाजिक परिवर्तन अभियानात कार्यरत ग्रामपरिवर्तक इर्शाद शेख, संतोष देवसरकर, पांडुरंग मामीडकर, प्रशांक काळे व इतर प्रयत्न केले.

00000

महात्मा जोतिराव फुले शेतकरी कर्जमुक्ती योजना

गावस्तरावर शिबिराचे आज आयोजन

बँक कर्ज खाते आधार क्रमांकाशी संलग्न करण्याचे आवाहन

नांदेड, दि. 14 :- महात्मा जोतिराव फुले शेतकरी कर्जमुक्ती या योजनेची अंमलबजावणी संपूर्णत: आधार क्रमांक जोडलेल्या बँक खात्याशी संबंधित आहे. ज्या शेतकऱ्यांचे बँक कर्ज खाते आधार क्रमांकाशी संलग्न नाहीत अशा शेतकऱ्यांनी आज 15 जानेवारी 2020 या आयोजित केलेल्या कॅम्पमध्ये कॅम्प अधिकारी यांच्याकडे आपले आधार कार्डची छायाप्रतीवर आपला कर्ज खाते क्रमांक नमूद करून दयावीत, असे आवाहन जिल्हाधिकारी अरूण डोंगरे  व सहकारी संस्था जिल्हा उपनिबंधक प्रवीण फडणीस  यांनी केले आहे.

नैसर्गिक आपत्तीच्या पार्श्वभुमीवर शेतकऱ्यांचे नुकसान झाल्यामुळे मागील काही वर्षात शेती निगडीत कर्जाची मुदतीत परतफेड होऊ शकली नाही. त्यामुळे शेतकरी थकबाकीदार झाल्यामुळे कर्जाच्या चक्रात अडकलेला आहे आणि त्यांना शेती कामांकरिता नव्याने पीक कर्ज घेण्यास अडचणी निर्माण झाल्या आहेत. परिणामी सन 2019-20 मध्ये अल्पमुदत पीक कर्ज वाटप अत्यंत असमाधानकारक आहे. ही वस्तुस्थिती विचारात घेता शासनाने महात्मा जोतिराव फुले शेतकरी कर्जमुक्ती योजना 2019 घोषीत केली आहे.

महात्मा जोतिराव फुले शेतकरी कर्जमुक्ती योजनेच्या अंमलबजावणीसाठी शासनाद्वारे मार्गदर्शक कार्यपद्धती निर्गमित करण्यात आली आहे. या कार्यपद्धतीनुसार ज्या शेतकऱ्याचा आधार क्रमांक बँकेच्या कर्ज खात्याशी संलग्न नाही अशा शेतकऱ्याचा आधार क्रमांक बँकेच्या कर्ज खात्याशी दि. 14 जानेवारी 2020 पर्यत संलग्न करण्याचे निर्देश दिले होते. त्यानुषंगाने नांदेड जिल्ह्यात सदर कर्जमाफीस अंदाजे 1,79,624 शेतकरी पात्र असून त्यापैकी 1,30,115 शेतकऱ्यांच्या कर्ज खात्याशी आधार क्रमांक संलग्न आहे व उर्वरित 49,506 शेतकऱ्यांच्या कर्ज खात्याशी आधार क्रमांक संलग्न नाही. अशा शेतकऱ्यांचे आधार क्रमांक कर्ज खात्याशी संलग्न करण्याचे काम अत्यंत जलदगतीने करणे आवश्यक आहे. याकरिता 14  व 15 जानेवारी 2020 यादिवशी ग्रामसेवक, तलाठी, कृषी सहायक यांच्या उपस्थितीत गावस्तरावर कॅम्प आयोजित करणेबाबत   जिल्हाधिकारी अरुण डोंगरे यांनी आदेश दिले आहेत.

या कॅम्पमध्ये ज्या शेतकऱ्यांचे आधार क्रमांक कर्ज खात्याशी जोडलेले नाहीत व अशा शेतकऱ्यांची यादी 7 जानेवारी 2020 रोजी बँकेने सूचना फलकावर प्रसिद्ध केलेली आहे. अशा शेतकऱ्यांचे आधार कार्डची स्वसाक्षांकित छायाप्रत घेऊन त्यावर त्या कर्जदाराचा कर्ज खाते क्रमांक व उपलब्ध असल्यास, भ्रमणध्वनी क्रमांक नमूद करून घेऊन अशा आधार कार्डाच्या छायाप्रती त्याच दिवशी संबंधित बँकेच्या शाखाधिकारी यांच्याकडे देणेबाबत कॅम्प अधिकारी यांना सूचना दिलेल्या आहेत.

000000