राज्य शासनाच्या उत्कृष्ट पत्रकारिता पुरस्कार - 2021 साठी

प्रवेशिका पाठविण्यास मुदतवाढ

·       प्रवेशिका 15 फेब्रुवारीपर्यंत पाठविण्याचे आवाहन

 

            मुंबई, दि. 31 : माहिती व जनसंपर्क महासंचालनालयामार्फत उत्कृष्ट पत्रकारिता, उत्कृष्ट लेखन, उत्कृष्ट दूरचित्रवाणी वृत्तकथा, उत्कृष्ट छायाचित्रकार, समाज माध्यम आणि स्वच्छता अभियानाबाबत केलेल्या जनजागृतीपर लेखनासाठी पुरस्कार स्पर्धा जाहीर करण्यात येत आहे. या स्पर्धेसाठी दिनांक 1 जानेवारी, 2021 ते 31 डिसेंबर, 2021 पर्यंतच्या कालावधीत प्रसिद्ध झालेल्या लेखन/छायाचित्रे/वृत्तकथा यांच्या प्रवेशिका दि.31 जानेवारी 2022 पर्यंत मागविण्यात आल्या होत्या, तथापि प्रवेशिका पाठविण्यास 15 फेब्रुवारी 2022 पर्यंत मुदतवाढ देण्यात आली आहे.

                        उत्कृष्ट पत्रकारिता पुरस्कार 2021 चे माहितीपत्रक/अर्जाचे नमुने शासनाच्या www.maharashtra.gov.in आणि महासंचालनालयाच्या dgipr.maharashtra.gov.in या संकेतस्थळावर उपलब्ध आहेत. तसेच राज्यातील विविध भागातील स्पर्धकांना संबंधित जिल्हा माहिती कार्यालयाकडून तर मुंबई शहर व मुंबई उपनगर जिल्ह्यातील इच्छुकांना, माहिती व जनसंपर्क महासंचालनालय, तळमजला, हुतात्मा राजगुरु चौक, मादाम कामा मार्ग, मंत्रालय, मुंबई-32 येथून विहित नमुन्यातील अर्ज प्राप्त करुन घेता येईल.

००००

 येत्या 7 फेब्रुवारीपासून पहिली ते चौथीची शाळा

सुरु करण्यास मान्यता

 

नांदेड (जिमाका) दि. 31 :-  इयत्ता पहिली ते बारावी पर्यंतचे वर्ग 24 जानेवारी पासून सुरू करण्याबाबत शासनाकडे सातत्याने मागणी करण्यात येत होती. ही मागणी लक्षात घेऊन स्थानिक परिस्थितीचा विचार करून महानगरपालिका क्षेत्रात आयुक्त व राज्यातील इतर भागात जिल्हा आपत्ती व्यवस्थापन प्राधिकारी व जिल्हा परिषदेच्या मुख्य कार्यकारी अधिकारी यांना अधिकार प्रदान करण्यात आले. नांदेड जिल्ह्यातील सर्व परिस्थितीचा आढावा घेऊन जिल्हा आपत्ती व्यवस्थापन प्रमुख तथा जिल्हाधिकारी डॉ. विपीन इटनकर यांनी येत्या 7 फेब्रुवारी पासून जिल्ह्यात पहिली ते चौथीच्या शाळा सुरू करण्यास मान्यता दिली आहे. ही मान्यता देतांना दिनांक 20 जानेवारी 2022 रोजीच्या शासन निर्णयातील मार्गदर्शक सूचना तसेच शासनाने वेळोवेळी दिलेल्या निर्देशांचे काटेकोर पालन करण्यात यावेत, असे आदेशात डॉ. विपीन इटनकर यांनी बजावले आहे. वय वर्षे 15 ते 18 वयोगटातील सर्व विद्यार्थ्यांचे 100 टक्के लसीकरण पूर्ण करण्यावर शाळांनी भर दिला पाहिजे, असेही त्यांनी स्पष्ट केले आहे. दिनांक 31 जानेवारी 2022 पासून नांदेड जिल्ह्यातील सर्व माध्यमांच्या इयत्ता पाचवी ते आठवीच्या शाळा सुरू करण्यासही मान्यता दिली आहे.

0000000

 नांदेड जिल्ह्यात 215 व्यक्ती कोरोना बाधित

तर 334 कोरोना बाधित झाले बरे 

 

नांदेड (जिमाका) दि. 31 :- जिल्ह्यात आज प्राप्त झालेल्या 1 हजार 203 अहवालापैकी 215 अहवाल कोरोना बाधित आले आहेत. यात आरटीपीसीआर तपासणीद्वारे 185 तर अँटिजेन तपासणीद्वारे 30 अहवाल बाधित आले आहेत. जिल्ह्यात आजवर एकुण बाधितांची संख्या 1 लाख 1 हजार 495 एवढी झाली असून यातील 96 हजार 415 रुग्णांना रुग्णालयातून सुट्टी देण्यात आलेली आहे. आजच्या घडीला 2 हजार 409 रुग्ण उपचार घेत असून यात 3 बाधितांची प्रकृती अतिगंभीर आहे. जिल्ह्यातील कोरोनाचा प्रादुर्भाव कमी करण्यासाठी सेवाभावी संस्था, प्रतिनिधी आणि जागरुक नागरिकांनी आरोग्य जागराच्या चळवळीत सहभाग घ्यावा. याचबरोबर मास्क, सॅनिटायझर, सुरक्षित अंतर आणि लसीकरण याबाबत व्यापक जनजागृती करुन अनावश्यक घराबाहेर पडणे टाळावे, असे आवाहन जिल्हाधिकारी डॉ. विपीन इटनकर यांनी केले आहे. 

 

रविवार 30 जानेवारी रोजी शासकीय वैद्यकीय महाविद्यालय विष्णुपुरी येथे खडकपुरा नांदेड येथील 85 वर्षाचा पुरुष, वसमत येथील 70 वर्षाचा पुरुष, किनवट कोविड रुग्णालय येथे उमरखेड येथील 77 वर्षाचा पुरुष तर खाजगी रुग्णालय हाऊसींग सोसायटी नांदेड येथील 82 वर्षाच्या एका पुरुषाचा उपचारा दरम्यान मृत्यू झाला.  जिल्ह्यात आतापर्यंत बाधित मृत रुग्णांची संख्या 2 हजार 671 एवढी आहे.

 

आजच्या बाधितांमध्ये आरटीपीसीआर तपासणीद्वारे नांदेड मनपा 83, नांदेड ग्रामीण 10, बिलोली 1, भोकर 1, धर्माबाद 1, हिमायतनगर 1, हदगाव 3, कंधार 2, किनवट 56, लोहा 4, मुदखेड 3, मुखेड 1, नायगाव 2, उमरी 4, परभणी 9, हिंगोली 2, निजामाबाद 1, वाशीम 1 तर अँटिजेन तपासणीद्वारे नांदेड मनपा 27, कंधार 3 असे एकुण 215 कोरोना बाधित आढळले आहे. 

 

आज जिल्ह्यात नांदेड जिल्ह्यातील तालुक्यांतर्गत गृह विलगीकरण 85, खाजगी रुग्णालय 7, नांदेड मनपा अंतर्गत गृह विलगीकरण 242 असे एकुण 334 कोरोना बाधितांना औषधोपचारानंतर बरे झाल्याने सुट्टी देण्यात आली. 

 

उपचार घेत असलेल्या बाधितांमध्ये शासकीय वैद्यकिय महाविद्यालय विष्णुपूरी 36, किनवट कोविड रुग्णालय 4, नांदेड जिल्ह्यातील तालुक्यांतर्गत गृह विलगीकरण 1 हजार 281,  नांदेड मनपा अंतर्गत गृहविलगीकरण 1 हजार 56, खाजगी रुग्णालय 32 असे एकुण 2 हजार 409 व्यक्ती उपचार घेत आहेत. 

 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 8 लाख 45 हजार 202

एकुण निगेटिव्ह स्वॅब- 7 लाख 27 हजार 826

एकुण पॉझिटिव्ह बाधित व्यक्ती- 1 लाख 1 हजार 495

एकूण रुग्णालयातून सुट्टी दिलेली संख्या- 96 हजार 415

एकुण मृत्यू संख्या-2 हजार 671

उपचारानंतर बाधित रुग्ण बरे होण्याचे प्रमाण 94.99 टक्के

आज स्वॅब तपासणी अनिर्णीत संख्या-1

आज स्वॅब नाकारण्यात आलेली संख्या-138

आज प्रलंबित स्वॅब तपासणी संख्या-निरंक

रुग्णालयात उपचार घेत असलेले बाधित व्यक्ती-2 हजार 409

आज रोजी अतिगंभीर प्रकृती असलेले-3. 

 

कोविड विषाणू विरुद्धची लस सुरक्षित असून कोरोनाची लाट पुनः येण्यापासून प्रतिबंध करण्यासाठी कोविड-19 लसीकरण दिर्घकाळ आणि प्रभावी उपाय आहे. “मिशन कवच कुंडल” अंतर्गत 18 वर्षावरील सर्व व्यक्तींनी कोविड लसीकरण करून घ्यावे आणि इतरांनाही लस घेण्यासाठी प्रोत्साहित करावे. ज्या नागरिकांनी कोविडच्या पहिल्या लसीचा डोस घेतला आहे त्यांनी ठराविक कालावधी नंतर दुसऱ्या लसीचा डोस आवश्य घ्यावा, असेही आवाहन करण्यात आले आहे.

000000

 मग्रारोहयो अंतर्गत फळबाग लागवड

योजनेचा लाभ घेण्याचे आवाहन

 

नांदेड (जिमाका) दि. 31 :-  महात्मा गांधी राष्ट्रीय ग्रामीण रोजगार हमी योजनेंतर्गत शेतकऱ्यांच्या सलग शेतजमिनीवर, बांधावर तसेच पडीक शेतजमिनीवर फळबाग लागवड कार्यक्रमाअंतर्गत वृक्ष लागवडीचा कालावधी 1 जुन ते 30 नोव्हेंबरपर्यंत ठरवून देण्यात आला होता. सन 2021-22 मध्ये फळबाग लागवडीसाठी असलेले अनुकूल वातावरण विचारात घेता फळबाग लागवडीसाठी हा कालावधी 31 मार्च 2022 पर्यंत वाढविण्यात आला आहे.

 

जिल्ह्यातील सर्व शासकीय व खाजगी रोपवाटीकेवर आंबा, चिकु, पेरू, सीताफळ, मोसंबी, का. लिंबु. इत्यादी फळपिकांचे एकुण 3 लाख 46 हजार 342 कलमे-रोपे उपलब्ध आहेत. लाभार्थ्यांनी या योजनेचा लाभ घ्यावा, असे आवाहन जिल्हा अधिक्षक कृषि अधिकारी आर. बी. चलवदे यांनी केले आहे.

00000