वृत्त क्रमांक

उपलब्ध चाऱ्याचे मूल्यवर्धन करून चारा टंचाईवर मात

चारा साक्षरता अभियानाला वेग

नांदेड (जिमाका), दि. ३ : जिल्ह्यात अल्प पर्जन्यमानामुळे दुष्काळसदृश परिस्थिती निर्माण झाली असून, अपेक्षेपेक्षा चारा उत्पादन कमी होण्याची शक्यता आहे. संभाव्य चारा टंचाईच्या पार्श्वभूमीवर उपलब्ध चाऱ्याचा शास्त्रीय व कार्यक्षम वापर करून पशुधनास सकस व पौष्टिक चारा उपलब्ध करून देण्यासाठी जिल्हाधिकारी, नांदेड व मुख्य कार्यकारी अधिकारी, जिल्हा परिषद, नांदेड यांच्या संकल्पनेतून जिल्ह्यात व्यापक स्वरूपात ‘चारा साक्षरता अभियान’ राबविण्यात येत आहे.

या अभियानांतर्गत वंदनीय राष्ट्रसंत श्री तुकडोजी महाराज गोवंश सुधार प्रकल्प, मौजे घुंगराळा, ता. नायगाव येथे ‘निकृष्ट चारा सकस करणे’ या विषयावर प्रत्यक्ष प्रात्यक्षिक घेण्यात आले. उपलब्ध सोयाबीन कुटारावर युरिया व मोलासेस (काकवी) प्रक्रिया करून चाऱ्याची पौष्टिकता, पाचकता व रुचकरता वाढविण्याची शास्त्रीय पद्धत पशुपालकांना प्रत्यक्ष करून दाखविण्यात आली.

चारा संवर्धन व काटकसरीच्या वापरावर मार्गदर्शन

उपलब्ध चाऱ्याचे योग्य संवर्धन, साठवणूक व व्यवस्थापन करून चारा टंचाईच्या काळात पशुधनासाठी त्याचा प्रभावी आणि काटकसरीने वापर कसा करता येईल, याबाबत यावेळी सविस्तर मार्गदर्शन करण्यात आले. दुष्काळी परिस्थितीत पशुधनाचे आरोग्य व उत्पादनक्षमता टिकविण्यासाठी उपलब्ध चाऱ्याचा शास्त्रीय पद्धतीने वापर करण्याचे महत्त्व यावेळी अधोरेखित करण्यात आले.

कार्यक्रमास मुख्य कार्यकारी अधिकारी, जिल्हा परिषद, नांदेड महेश पाटील, अतिरिक्त मुख्य कार्यकारी अधिकारी परीक्षित यादव, जिल्हा उपआयुक्त पशुसंवर्धन व दुग्धव्यवसाय डॉ. सखाराम खुणे, सहाय्यक आयुक्त पशुसंवर्धन व दुग्धव्यवसाय डॉ. प्रविणकुमार घुले, उपमुख्य कार्यकारी अधिकारी (नरेगा) अमित राठोड, प्रकल्प संचालक, जल जीवन मिशन मयूर अंदेलवाड, कृषी विकास अधिकारी डॉ. निलकुमार ऐतवडे यांच्यासह पशुसंवर्धन विभागाचे अधिकारी, कर्मचारी, शेतकरी व पशुपालक मोठ्या संख्येने उपस्थित होते.

गोमय गणेशमूर्ती व विविध वस्तूंची भेट

यावेळी गोशाळेच्या वतीने उपस्थित मान्यवरांचा गोमयापासून निर्मित गणेशमूर्ती तसेच शेणापासून तयार केलेल्या विविध उपयुक्त वस्तू भेट देऊन सन्मान करण्यात आला. या उपक्रमातून गोमय व शेणाच्या शाश्वत वापरासोबतच पर्यावरणपूरक उत्पादनांना प्रोत्साहन देण्याचा संदेश देण्यात आला.

***

वृत्त क्रमांक

चारा साक्षरतेतून चारा टंचाईवर मात

उपलब्ध चाऱ्याचे पौष्टिक मूल्यवर्धन करण्याचे जिल्हाधिकारी राहुल कर्डिले यांचे आवाहन

नांदेड (जिमाका), दि. ३ : जिल्ह्यात अल्प पर्जन्यमानामुळे दुष्काळी परिस्थिती निर्माण झाली असून, यंदा अपेक्षेपेक्षा चारा उत्पादन कमी होण्याची शक्यता आहे. या पार्श्वभूमीवर उपलब्ध चाऱ्याचा शास्त्रीय व कार्यक्षम वापर करून पशुधनास सकस व पौष्टिक चारा उपलब्ध करून देण्यासाठी जिल्हाधिकारी राहुल कर्डिले व जिल्हा परिषदेचे मुख्य कार्यकारी अधिकारी यांच्या संकल्पनेतून जिल्हाभर ‘चारा साक्षरता अभियान’ व्यापक स्वरूपात राबविण्यात येत आहे.

या अभियानांतर्गत आज पोखर्णी कृषी विज्ञान केंद्राच्या वतीने मौजे नांदेड तालुक्यातील सायाळ येथील प्रक्षेत्रावर ‘निकृष्ट चारा सकस करणे’ या विषयावर प्रत्यक्ष प्रात्यक्षिक घेण्यात आले. यामध्ये सोयाबीन कुटारावर युरिया व मोलासेस (काकवी) प्रक्रिया करून चाऱ्याची पौष्टिकता, पाचकता व रुचकरता वाढविण्याची शास्त्रीय पद्धत प्रत्यक्ष प्रात्यक्षिकाद्वारे दाखविण्यात आली.

पर्यायी चारा स्रोतांचा वापर करण्याचे आवाहन

दुष्काळी परिस्थितीत पशुधनासाठी चारा उपलब्धतेचे योग्य नियोजन करणे आवश्यक आहे. उपलब्ध चाऱ्याचे पौष्टिक मूल्य वाढविण्यासोबतच अझोला, हायड्रोपोनिक चारा यांसारख्या पर्यायी चारा स्रोतांचा वापर करण्याचे आवाहन जिल्हाधिकारी राहुल कर्डिले यांनी यावेळी केले. चारा व्यवस्थापनासाठी शास्त्रीय पद्धतींचा अवलंब केल्यास उपलब्ध चाऱ्याचा अधिक कार्यक्षम वापर करता येईल, असे त्यांनी सांगितले.

‘जलतारा’ योजनेचा शुभारंभ

यावेळी जलसंवर्धनासाठी राबविण्यात येणाऱ्या नावीन्यपूर्ण ‘जलतारा’ योजनेचा शुभारंभ करण्यात आला. तसेच प्रक्षेत्रावरील एकात्मिक कृषी प्रकल्पास भेट देऊन विविध उपक्रमांची पाहणी करण्यात आली व त्याबाबतची माहिती घेण्यात आली.

या कार्यक्रमास जिल्हा अधीक्षक कृषी अधिकारी दत्तात्रय कळसाइत, जिल्हा उपआयुक्त पशुसंवर्धन व दुग्धव्यवसाय डॉ. सखाराम खुणे, सहाय्यक आयुक्त पशुसंवर्धन व दुग्धव्यवसाय डॉ. प्रविणकुमार घुले, जिल्हा परिषदेचे कृषी विकास अधिकारी, डॉ.नीलकुमार ऐतवडे, कृषी विज्ञान केंद्र, पोखर्णी येथील शास्त्रज्ञ, पशुसंवर्धन विभागाचे अधिकारी व कर्मचारी तसेच परिसरातील शेतकरी व पशुपालक मोठ्या संख्येने उपस्थित होते.

***

वृत्त क्रमांक

भूकंपाच्या पार्श्वभूमीवर नांदेड प्रशासन सतर्क

नांदेड जिल्ह्यात जीवित व वित्तहानी नाही

नागरिकांनी घाबरू नये, अफवांवर विश्वास ठेवू नये – पालकमंत्री अतुल सावे

नांदेड व हिंगोली जिल्ह्यांमध्ये आज शनिवार, दि.03 ऑक्टोबर 2026 रोजी सकाळी 07:46 व 09:43 वाजता भूकंपाचे सौम्य धक्के जाणवल्याची माहिती जिल्हा आपत्कालीन कार्यकेंद्रास प्राप्त झाली आहे.

राष्ट्रीय भूकंपशास्त्र केंद्राच्या अधिकृत माहितीनुसार, या भूकंपांची तीव्रता रिश्टर स्केलवर अनुक्रमे 3.3 व 4.5 इतकी नोंदविण्यात आली आहे. भूकंपाचा केंद्रबिंदू हिंगोली जिल्ह्यातील वसमत तालुक्यातील पांगरा शिंदे या गावाजवळ असल्याचे समजते.

या भूकंपामुळे नांदेड जिल्ह्यात कोणतीही जीवित अथवा वित्तहानी झाल्याची माहिती प्राप्त झालेली नाही. जिल्हा प्रशासनाने तत्काळ परिस्थितीचा आढावा घेतला असून सर्व संबंधित यंत्रणा सतर्क ठेवण्यात आल्या आहेत.

भूकंपाचा धक्का जाणवल्याने नागरिकांमध्ये भीतीचे वातावरण निर्माण झाले होते. मात्र, नागरिकांनी घाबरून न जाता सतर्क राहावे, भूकंपाचे धक्के जाणवल्यास तत्काळ सुरक्षितरीत्या घराबाहेर पडून मोकळ्या जागेत थांबावे आणि प्रशासनाच्या सूचनांचे पालन करावे, असे आवाहन जिल्हाधिकारी राहुल कर्डिले यांनी केले आहे.

दरम्यान, जिल्ह्याचे पालकमंत्री अतुल सावे हे परिस्थितीवर सातत्याने लक्ष ठेवून असून त्यांनी जिल्हा प्रशासनाशी संपर्क साधून आवश्यक सूचना दिल्या आहेत. नांदेड जिल्ह्यात कोणतीही जीवित किंवा वित्तहानी झालेली नसून नागरिकांनी कोणत्याही अफवांवर विश्वास ठेवू नये, घाबरून जाऊ नये आणि केवळ अधिकृत माहितीवरच विश्वास ठेवावा, असे आवाहन पालकमंत्री अतुल सावे यांनी केले आहे.

0000