राज्यस्तरीय प्रश्न मंजुषा

शासकीय तंत्रनिकेतनमध्ये संपन्न

नांदेड, दि. 27 :- येथील शासकीय तंत्रनिकेतन नांदेड येथे महाराष्ट्र राज्य तंत्रशिक्षण मंडळ व शासकीय तंत्रनिकेतन नांदेड यांच्या संयुक्त विद्यमाने विद्युत विभागामध्ये राज्यस्तरीय “टेक्नीकल प्रश्नमंजुषा” आयोजित करण्यात आली असून यात जवळपास 80 विद्यार्थ्यांनी सहभाग नोंदवला.

कार्यक्रमाचे उद्घाटन महावितरणचे कार्यकारी अभियंता बी. बी. पहूरकर, प्राचार्य डॉ. जी. व्ही. गर्जे, उपप्राचार्य पी. डी. पोपळे, विद्युत विभाग प्रमुख व्ही. व्ही. सर्वज्ञ यांच्या हस्ते पार पडले. कार्यक्रमाचे आयोजक एस. टी. कांबळे, पी. एस. लिंगे, एस. जी. कदम, पी. के. विनकरे, ए. ए. सायर, जी. एम. बरबडे, वाय. के. ढाळे, बी. आर. कासारपठेकर, जी. आर. मिरासे, एस. एम. झडते, आर. एस. मध्यैबलवाड यांनी केले.

या कार्यक्रमास संस्थेचे प्रबंधक आर. एम. दुलेवाड, कार्यालयीन अधिक्षक जी. के. जमदाडे, विभाग प्रमुख डी. एम. लोकमनवार, आर. एम. सकहळकळे, बी. व्ही. यादव, डॉ. एस. एस. चौधरी, एस. एम. कंधारे, एस. पी. कुलकर्णी, एस. आर. मुधोळकर, एस. एन. ढोले यांची उपस्थिती होती. कार्यक्रम यशस्वीतेसाठी प्राचार्यांनी विद्युत विभागाचे कौतुक केले आहे.

00000

सुधारीत वृत्त क्र. 111

समाजातील गरजु व्यक्तींना न्याय मिळण्यासाठी

शासकिय सेवा, योजनांचा रविवारी महामेळावा

नांदेड, दि. 27 :- महाराष्ट्र राज्य विधी सेवा प्राधिकरण मुंबई यांच्या किमान कार्यक्रमांतर्गत व नांदेडचे प्रमुख जिल्हा न्यायाधीश दिपक अ. धोळकिया यांचे मार्गदर्शनाखाली नांदेड जिल्हा विधी सेवा प्राधिकरण, जिल्हा प्रशासन, नांदेड व डॉ. झाकीर हुसैन शिक्षण संस्था नांदेड यांच्या संयुक्त विद्यमानाने समाजातील गरजु, आर्थिकदृष्टया मागासलेल्या व्यक्तींना, योग्य न्याय मिळण्याच्या उद्देशाने देण्यात येणाऱ्या मोफत विधी सेवा त्याचप्रमाणे शासनाच्या विविध कल्याणकारी योजनांच्या महाशिबीराचे आयोजन रविवार 2 फेब्रुवारी 2020 रोजी हजरत फातेमा मुलींचे ऊर्दु हायस्कुल गाडेगाव रोड देगलुर नाका नांदेड येथे करण्यात आले आहे.

या महाशिबीरात अटल पेन्शन योजना, मतदार नोंदणी, ऑनलाईन प्रमाणपत्र, नवीन रेशनकार्ड, रेशनकार्डमधील नावात दुरुस्ती, नविन आधारकार्ड नोंदणी, दुरुस्ती, उत्पन्न दाखला, इंदिरा गांधी राष्ट्रीय वृध्दापकाळ निवृत्ती वेतन योजना, इंदिरा गांधी राष्ट्रीय अपंग निवृत्ती योजना, राष्ट्रीय कुंटूंब लाभ योजना, आम आदमी विमा योजना, संजय गांधी निराधार योजना, आयुष्यमान भारत योजना,  माता व बालसंगोपन कार्यक्रम योजना, विविध योजना, महसूल खातेफोड, उतारा दाखले, पशुसंवर्धन योजना, एसटी महामंडळ योजना, आर.टी.ओ. कार्यालयाच्या विविध सेवा, कृषी विभागाच्या योजना, पंतप्रधान जन आरोग्य योजना, सामाजिक न्याय विभागाच्या योजना, जिल्हा विधी सेवा प्राधिकरणाच्या योजना, महिला आर्थिक विकास महामंडळाच्या योजना, प्रधानमंत्री आवास योजना इत्यादी सर्व शासकिय कार्यालयाअंतर्गत येणाऱ्या योजनांचा या शिबीरात नागरिकांना प्रत्यक्ष त्या ठिकाणीच लाभ मिळणार आहे. या सर्व योजनांचा लाभ घेण्यासाठी नांदेड शहर व नांदेड तालुक्यातील नागरिकांनी आधारकार्ड, रेशनकार्ड, मतदान ओळखपत्र, फोटो, इत्यादी कागदपत्रे येतांना सोबत आणावे व लाभार्थ्यांनी या शिबीराचा लाभ घ्यावा, असे आवाहन नांदेडचे प्रमुख जिल्हा न्यायाधीश तथा जिल्हा विधी सेवा प्राधिकरणचे अध्यक्ष दिपक अ. धोळकिया व जिल्हा विधी सेवा प्राधिकरणचे सचिव न्यायाधीश आर. एस. रोटे सचिव यांनी केले असून हे महाशिबीर यशस्वी करण्यासाठी सहकार्याची अपेक्षा त्यांनी व्यक्त केली आहे.

00000

जिल्ह्यात जमावबंदी, शस्त्रबंदी आदेश लागू

नांदेड, दि. 27 :- जिल्ह्यात बुधवार 12 फेब्रुवारी 2020 रोजी मध्यरात्रीपर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 29 जानेवारी 2020 रोजी सकाळी 6 वाजेपासून ते 12 फेब्रुवारी 2020 रोजी मध्यरात्रीपर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.  

00000

शासकीय तंत्रनिकेतन येथे

राज्यस्तरीय बुध्दीबळ, कॅरम स्पर्धा संपन्न

नांदेड, दि. 27 :- शासकीय तंत्रनिकेतन नांदेड येथे दिनांक 22 व 23 जानेवारी 2020 दरम्यान IEDSSA अंतर्गत राज्यस्तरीय बुध्दीबळ व कॅरम स्पर्धा पार पडल्या. या स्पर्धेचे उद्घाटन अविनाश धोंडगे, अधिक्षक अभियंता सार्वजनिक बांधकाम मंडळ नांदेड यांच्या हस्ते पार पडले.

उद्घाटक श्री. धोंडगे यांनी खेळाडूंना प्रोत्साहानपर मार्गदर्शन केले. हरणे किंवा जिंकणे हा खेळाचा भाग असून सहभाग हा महत्वाचा टप्पा आहे असे नमुद केले. तसेच झेप ही गरुडाप्रमाणे असावी आणि प्रयत्न हे मुंगी सारखे असावेत असे मत त्यांनी व्यक्त केले. श्री. धोंडगे साहेबांनी त्यांच्या आत्मकथनातून स्पर्धा परीक्षेची तयारी व संधी याबाबी स्पर्धकांना प्रोत्साहीत करुन गेल्या. या कार्यक्रमास अध्यक्ष म्हणून संस्थेचे प्राचार्य डॉ. जी. व्ही. गर्जे यांनी भूषविले. कॅरम व बुध्दीबळ खेळण्यासाठी एकाग्रता व संयमाची आवश्यकता असते. या खेळामुळे विकसीत झालेले गुण विद्यार्थ्यांना त्यांचे आयुष्य घडविण्यासाठी उपयुक्त ठरतील असे प्रतिपादन त्यांनी केले.

प्रास्ताविक डी. एम. लोकमनवार, जीमखाना उपाध्यक्ष तथा विभाग प्रमुख उपयोजित यंत्रशास्त्र यांनी केले व सर्व संघ व व्यवस्थापकास शुभेच्छा दिल्या. या स्पर्धे दरम्यान बुध्दीबळ स्पर्धेकरिता शासकीय तंत्रनिकेतन पुणे ही संस्थातर कॅरम करिता ए.आय.ए.आर. काळसेकर पनवेल हे संघ विजय ठरले तर शा.तं.जळगाव व राजेंद्र माने तंत्रनिकेतन, आंबव जिल्हा रत्नागिरी हे उपविजेतेदाचे मानकरी ठरले.

या स्पर्धेच्या यशस्वी आयोजनाकरिता जीमखाना विभाग  ए. बी. दमकोंडवार,  एस.एम. कंधारे, डॉ. जी. एम. डक, डॉ. डी. जी. कोल्हटकर, आर. व्ही. आदमवाड, श्रीमती. एस. जी. दुटाळ, श्रीमती. ए.ए. सायर तसेच उपप्राचार्य पी. डी. पोपळे यांनी सर्व स्पर्धकांना शुभेच्छा दिल्या तर सूत्रसंचालन श्रीमती आर. के. देवशी व ए. बी. दमकोंडवार यांनी कार्यक्रम यशस्वीते बद्दल सर्वांचे आभार मानले.

00000

शहरी महानेट प्रकल्पाच्या चरणास प्रारंभ

शहरी सर्व शासकीय कार्यालयांना मिळेल उच्च प्रतीची इंटरनेट जोडणी

            नांदेड, दि. 27 :- केंद्र सरकारच्या “भारतनेट” शहरी महानेट प्रकल्पाचे महाराष्ट्र राज्य माहिती व तंत्रज्ञान महामंडळ मुंबई यांचेमार्फत राबविण्यात येत असून या प्रकल्पाद्वारे नांदेड जिल्ह्यातील सर्व शहरी शासकीय कार्यालयांना उच्च प्रतीची इंटरनेट जोडणी करण्यात येणार आहे. ऑप्टीकल फायबर नेटवर्क जोडले जाणार आहेत.  

            नागरिकांनी डिजिटल सेवा देण्यासाठी केंद्र सरकारद्वारे हा उपक्रम सुरु केला आहे. हे काम जिल्ह्यात पूर्ण करण्यासाठी शासनाद्वारे रिलायन्स जिओ या कंपनीची निवड केलेली आहे.

            या कार्यक्रमाचा शुभारंभ जिल्हाधिकारी अरुण डोंगरे यांच्या हस्ते करण्यात आला आहे. या कार्यक्रमास अप्पर जिल्हाधिकारी खुशालसिंह परदेशी, निवासी उपजिल्हाधिकारी डॉ. सचिन खल्लाळ व सर्व अधिकारी, कर्मचारी तसेच महानेट जिल्हा टिम हे उपस्थित होते.

कार्यक्रमाचे प्रास्ताविक जिल्हा प्रकल्प व्यवस्थापक कपित पेंडलवार यांनी केले. आभार वरिष्ठ नेटवर्क अभियंता ज्ञानेश्वर राजणे यांनी मानले.

00000

अन्नदान हे सर्वश्रेष्ठ दान

-         पालकमंत्री अशोक चव्हाण       

नांदेड, दि. 26 :- अन्नदान हे सर्वश्रेष्ठ दान आहे. व्यक्तीची भुक भागविणे हा सर्वात मोठा पुण्य आहे. नागरिकांना स्वच्छ, चांगल्या प्रतीचे भोजन विनामुल्य देण्याचे श्री स्वामी समर्थ मंदिर व अन्नछत्र नांदेडचे कौतुकास्पद कार्य आहे. गेल्या तीन वर्षापासून कै. शंकरराव चव्हाण वैद्यकीय रुग्णालय, विष्णूपुरी येथे ही संस्था गरिब आणि गरजू रुग्णांना भोजन देण्याचे महत्वाचे कार्य करीत आहे. आता श्याम नगर येथील स्त्री रुग्णालयात मोफत अन्नछत्र सुरु करुन त्यांनी एक नवा आदर्श निर्माण केला आहे, असे राज्याचे सार्वजनिक बांधकाम मंत्री तथा नांदेड जिल्हा पालकमंत्री अशोक चव्हाण यांनी प्रतिपादन केले.   

येथील श्याम नगर स्त्री रुग्णालय येथे श्री स्वामी समर्थ मंदिर व अन्नछत्र नांदेडच्यावतीने रुग्ण व त्यांच्या नातेवाईकांना दररोज सांयकाळी अन्नछत्राच्या उद्घाटन कार्यक्रमप्रसंगी पालकमंत्री बोलत होते.

यावेळी व्यासपीठावर माजी मंत्री डी.  पी. सावंत, उपमहापौर सतिष देशमुख, श्री स्वामी समर्थ मंदिर व अन्नछत्र विश्वस्त मंडळाचे अध्यक्ष सुनिल शर्मा, ॲङ गजानन पिंपरखेडे, विजय गवारे, सुदेश मुक्कावार, प्रदीप तुप्तेवार, लक्ष्मीनारायण शर्मा, अशोक धनेगावकर, सुधाकर पांढरे, निलेश पावडे उपस्थित होते.

यावेळी मंत्री महोदयांनी रुग्णालयाची पाहणी केली व अन्नछत्राच्या कक्षाला भेट दिली. या कार्यक्रमात महिला, नागरिक मोठ्या उपस्थित होते.

0000

“ मानव सेवा हीच, माधव सेवा ”

वैद्यकीय क्षेत्र सेवा प्रदान करण्याचा सर्वोत्तम माध्यम

-         पालकमंत्री अशोक चव्हाण       

नांदेड, दि. 26 :- “मानव सेवा हीच, माधव सेवा आहे ” वैद्यकीय क्षेत्र सेवा प्रदान करण्याचा  सर्वोत्तम माध्यम आहे. लोकांना निरोगी जीवन जगण्यास मदत करणाऱ्या वैद्यकीय सेवेला बळकट करण्यासाठी शासन सर्वोत्परीने सहाय्य करण्यास कटीबध्द आहे, असे राज्याचे सार्वजनिक बांधकाम मंत्री तथा नांदेड जिल्हा पालकमंत्री अशोक चव्हाण यांनी प्रतिपादन केले.    

येथील स्वातंत्र्य सैनिक कॉलनी, शोभा नगर, नांदेड कै. शंकररावजी चव्हाण यांच्या जन्मशताब्दी वर्षानिमित्त आरोग्य शिबीर व वाचनालयाचे उद्घाटन तसेच पोर्णिमानगर येथील स्थलांतरित आरोग्य केंद्राच्या उद्घाटन कार्यक्रमाप्रसंगी राज्याचे सार्वजनिक बांधकाम मंत्री तथा नांदेड जिल्हा पालकमंत्री अशोक चव्हाण यांच्या उपस्थितीत कार्यक्रम संपन्न झाला.

यावेळी महापौर दीक्षा धबाले, जिल्हा परिषद अध्यक्षा सौ. मंगाराणी अंबुलगेकर, माजी आमदार                          डी. पी. सावंत, स्थायी समितीचे सभापती अमिर तेहरा,माजी महापौर शैलेजा स्वामी, माजी आमदार वसंत चव्हाण, माजी आमदार हनुमंतराव बेटमोगरीकर, उपमहापौर आनंद चव्हाण, जिल्हाधिकारी अरुण डोंगरे,  नगरसेविका प्रकाश कौर खालसा, नगरसेवक किशोर स्वामी, उन्मेश पवळे, शैलेजा स्वामी,  अजितपालसिंघ संधू, आनंद पवळे, विरेंद्र गाडीवाले, आदी मान्यवर पदाधिकारी, अधिकारी, नागरिक आदिंची उपस्थिती होती .

पालकमंत्री श्री. चव्हाण म्हणाले की, नांदेडचा नावलौकीक आता येथील उत्कृष्ट शिक्षणामुळे राज्यभर होत आहे. त्यामुळे विद्यार्थ्यांना अनुकूल वातावरण आणि शैक्षणिक साहित्य उपलब्ध असणाऱ्या अभ्यासिकेसाठी लागणारा निधी उपलब्ध करुन देण्यात येईल. आपलं शहर सुंदर असायला हवे. शहरात होर्डींग विनापरवानगी लावण्यात येवू नयेत. रितसर मार्गाने परवानगी घेवूनच होर्डींग लावावेत. जिल्ह्यात सर्व जीवनावश्यक सुविधा उपलब्ध असाव्यात त्यासाठी जिल्ह्यातील प्रलंबित असलेली विकासात्मक कामे पूर्ण करण्याचा शासनाचा मानस आहे. जनतेच्या कामाला प्रथम प्राधान्य देण्यात येणार असून समान्य माणसाला मदत करण्याच्या हेतूने शासन कार्य करणार आहे.  

नांदेड शहर महानगरपालिकेच्या स्वातंत्र्य सैनिक कॉलनी , नांदेड येथील डॉ. राम मनोहर लोहिया ग्रंथालय, स्थलांतरित प्राथमिक आरोग्य केद्राचे उद्घाटन पालकमंत्री अशोक चव्हाण यांच्या हस्ते झाले. उद्घाटनानंतर पालकमंत्री श्री. चव्हाण यांनी आरोग्य केंद्राची पाहणी केली व माहिती घेतली. व उपस्थित अधिकाऱ्यांना मौलीक सुचनाही दिल्या.

या कार्यक्रमाचे प्रास्ताविक  माजी महापौर शैलेजा स्वामी यांनी केले. तर आभार आनंदराव चव्हाण यांनी मानले.

00000